Kusawazisha Kazi na Wasaa wa Mapumziko

“WASAA wa mapumziko ni nguo nzuri, lakini haitafaa ikivaliwa daima.” Kwa maneno hayo mwandishi asiyejulikana alifafanua thamani ya wasaa wa mapumziko. Hata hivyo, yeye aonyesha kwamba lazima usawazishwe na utendaji wenye matokeo.

Jambo hilo lilizungumziwa pia na Solomoni, mwandishi wa Biblia aliyepuliziwa. Mfalme huyo mwenye hekima alionyesha hali mbili zenye kupita kiasi zipaswazo kuepukwa. Kwanza, yeye alisema: “Mpumbavu hafanyi kazi na mwisho hujiua kwa njaa.” (Mhubiri 4:5, BHN) Naam, uvivu unaweza kufanya mtu awe maskini. Hivyo, uvivu unaweza kuhatarisha afya na hata uhai wa mtu. Kwa upande mwingine, kuna wale walio tayari kuachilia kila kitu ili wafanye kazi kwa bidii. Solomoni alifafanua kumenyeka kwao daima kuwa “ubatili na kujilisha upepo.”—Mhubiri 4:4.

Akiwa na sababu nzuri, Solomoni alipendekeza kuwepo na usawaziko: “Heri konzi moja pamoja na utulivu, kuliko konzi mbili pamoja na taabu; na kujilisha upepo.” (Mhubiri 4:6) Mtu apaswa ‘kuburudika kwa mema katika kazi yake’—yaani, apaswa kuchukua wakati mara kwa mara kufurahia vitu alivyochuma. (Mhubiri 2:24) Mbali na kazi ya kimwili mtu apaswa pia kufanya mambo mengine maishani. Familia yetu yastahili kutengewa kiasi fulani cha wakati wetu. Solomoni alikazia kwamba wajibu wetu mkuu ni utumishi kwa Mungu wala si kufanya kazi ya kimwili. (Mhubiri 12:13) Je, wewe ni miongoni mwa wale wenye maoni yaliyosawazika kuhusu kazi?