Vijana Wanaofurahisha Moyo wa Yehova

“Fanya moyo wangu ufurahi, kwamba mimi nipate kumpa jibu yeye anayenidhihaki mimi vikali.”—MITHALI 27:11, NW.

 1. Wazazi wetu na Muumba wetu wanapatwa na matokeo gani kutokana na jinsi tunavyoishi maisha yetu?

KAMA unatambua au hutambui jambo hili, njia yako ya kuishi inatokeza tofauti fulani. Kwa mfano, inatokeza tofauti fulani kwa wazazi wako. “Mwana mwenye hekima ni yule anayefanya baba afurahi,” Biblia inaeleza, “Na mwana mpumbavu ni kihoro cha mama yake.” (Mithali 10:1; 23:24, 25, NW ) Lakini jambo lililo la maana hata zaidi ni kwamba, njia yako ya kuishi inaweza kufurahisha au kusikitisha Muumba wetu Yehova Mungu. “Uwe mwenye hekima, mwana wangu,” Yehova anasihi, “na fanya moyo wangu ufurahi, kwamba mimi nipate kumpa jibu yeye anayenidhihaki mimi vikali.”—Mithahi 27:11, NW.

 2. Ni suala gani la maana lililotokezwa na Shetani, nasi tunahusikaje?

² Bila shaka, mwenye kudhihaki Yehova vikali ni Shetani Ibilisi. Katika bustani ya Edeni, Shetani alitokeza suala la maana sana lililohitaji jibu kutoka kwa Mungu. Ibilisi alipoweza kufanya Hawa, halafu Adamu, wavunje sheria ya Mungu na ikaonekana amefanya hivyo kwa urahisi, kuna ushuhuda unaoonyesha kwamba yeye alimtokezea Yehova mwito wa ushindani. Ilikuwa ni kama Shetani anadai hivi: ‘Wewe nipe tu nafasi nami naweza kugeuza mtu ye yote aache kukutumikia wewe.’ (Ayubu 1:6-12) Basi, Yehova alitoa kwa uchangamfu wa moyo ombi lenye kusihi lililoandikwa juu, kwamba mwanaye amtolee Yeye “jibu” ili aweze kujibu mwito wa ushindani wa Shetani.

 3. Kwa sababu gani ombi la Yehova la kusihi linahusu hasa Yesu, na ni nani wengine watakaokuwa wamekwisha kufurahisha moyo wa Mungu?

³ Lakini, ni kwa nani hasa Yehova alielekeza ombi hilo la kusihi, akimtaja kuwa “mwana wangu? ” Yesu Kristo ni mwana wa Mungu kwa njia isiyo na ulinganifu, kwa kuwa yeye ndiye Mwana wake mzaliwa pekee. (Yohana 1:14) Zaidi ya hilo, mbali na Adamu, aliyemkatisha tamaa Muumba wake, Yesu alikuwa ndiye mwanadamu mkamilifu wa pekee yake mwenye kuweza kuthibitisha kwa ukamili kwamba uaminifu kwa Mungu unaweza kudumishwa. (1 Wakorintho 15:45) Hivyo ombi la Yehova la kusihi linahusu Yesu hasa. Na Yesu hakumkatisha tamaa Baba yake. Kwa mwendo wake wa uaminifu, Yesu alimpa Mungu jibu kwa mwito wa ushindani wa Shetani wa kujisifu kwamba wanadamu hawangemtumikia Yeye wakiwa chini ya jaribu. (Waebrania 2:14; 12:2) Zaidi ya hilo, wote wale watakaotawala pamoja na Kristo katika mbingu watakuwa pia wamekwisha kufurahisha moyo wa Yehova kwa uaminifu wao kuelekea, Mungu mpaka kifo.—Ufunuo 2:10.

 4. Unapoamua la kufanya na maisha yako, ni jambo gani la maana unalopaswa kufikiria?

⁴ Namna gani sisi leo, kutia na ninyi wenye umri mdogo? Je! mnahusika katika suala hili la kama wanadamu watakuwa au hawatakuwa waaminifu kwa Mungu? Hakika mnahusika! (Zaburi 147:11; 148:12, 13) Njia yenu ya kutumia maisha yenu inaunga mkono ama upande wa Mungu wa lile suala ama upande wa Shetani, ingawa huenda msiwe mnatambua jambo hilo. Njia hiyo ama inafurahisha Yehova ama inafurahisha Shetani. Kwa kweli mwaliko au ombi la kusihi linalotolewa na Yehova linaweza kuonwa kuwa linaelekezwa kwako binafsi pia: “Uwe mwenye hekima, mwana [au binti] wangu, na fanya moyo wangu ufurahi, kwamba mimi nipate kumpa jibu yeye anayenidhihaki mimi vikali.” (Mithali 27:11, NW ) Je! kuufurahisha moyo wa Muumba wako si mradi wenye kuridhisha unaopasa kuwa nao.

Sababu ni Jambo la Hekima

 5. Kwa sababu gani ni hekima kuufurahisha moyo wa Yehova?

⁵ Angalia kwamba Yehova anatoa kitia moyo akisema, “Uwe mwenye hekima.” Kwa sababu gani sisi ni wenye hekima tukiufurahisha moyo wa Yehova? Ni kwa sababu Yehova ni Baba mwenye upendo anayetutakia yale yaliyo bora tu, na kwa hiyo jambo lo lote analotuomba tufanye ni kwa faida yetu. Kama vile Isaya 48:17, 18 inavyosema: “Mimi ni [Yehova], Mungu wako, nikufundishaye ili upate faida, nikuongozaye kwa njia ikupasayo kuifuata. Laiti ungalisikiliza amri zangu! Ndipo amani yako ingalikuwa kama mto wa maji na haki yako kama mawimbi ya bahari.”

 6. (a) Ni jambo gani linaloonyesha kwamba Yehova anakutaka ufurahie maisha? (b) Ni matokeo gani ambayo huwezi kuepuka?

⁶ Akiwa kama mzazi mwenye upendo, Yehova anakutaka wewe ufurahie kwa ukamili zawadi yake yenye thamani kubwa ya uhai. Basi anasema: “Wewe, kijana, uufurahie ujana wako, na moyo wako ukuchangamshe siku za ujana wako, ukaziendee njia za moyo wako, na katika maono ya macho yako.” Lakini, huo bila shaka si mwaliko wa kutenda jambo lo lote la kufurahika unalotamani. Hiyo inaonyeshwa na tahadhari ifuatayo inayotolewa: “Lakini ujue wewe ya kwamba kwa ajili ya haya yote Mungu atakuleta hukumuni.” (Mhubiri 11:9) Ndiyo, huwezi kuyaepuka matokeo ya vitendo vyako; Mungu atataka umjibu kwa mambo unayotenda. Kanuni ni hii: “Cho chote apandacho mtu, ndicho atakachovuna.”—Wagalatia 6:7

 7, 8. (a) Unaweza kuondoaje kisababishi cha wasiwasi na kukanusha kando mabaya? (b) Ni wakati gani ujana na kipindi cha kusitawi maisha kinapokuwa ni ubatili?

⁷ Kwa sababu hiyo, Yehova anaongeza hivi: “Kwa hiyo ondoa [kisababishi cha wasiwasi] katika moyo wako, na ukanushe mabaya katika mwili wako; kwa maana ujana na kipindi cha kusitawi maisha ni ubatili.” (Mhubiri 11:10, NW ) Hakika ni jambo la hekima kuepuka utendaji utakaokuletea matatizo yenye kutia wasiwasi baadaye. Ndiyo, watakuwako wale watakaosema unakosa mambo—kwamba bado hujajua maisha ni nini kama hujapata kulewa, kufanya ngono haramu, au kutenda jambo jingine kama hilo la ‘kujasiria.’ Lakini hao ni wapumbavu kama nini! “Hakika haikufaa,’ mwanafunzi mchanga mwenye machozi akaomboleza baada ya kufanya uasherati. “Mimi nimekuwa na wasiwasi tangu wakati huo.”

⁸ Kwa hiyo ninyi watu wa umri mdogo, iweni na hekima mtii shauri la Mungu juu ya kuondoa katika moyo wenu kisababishi cho chote cha hangaiko au majuto, kama yale wanayokuwa nayo vijana wanaofuatia njia ya maisha ya kutokujali au ya kichoyo. Mwandikaji insha wa karne ya 17 alitoa maoni haya: “Sehemu iliyo kubwa zaidi ya wanadamu wanatumia miaka yao ya kwanza kufanya ile ya mwisho iwe yenye masikitiko.” Hiyo ni kweli, lakini ni jambo la kusikitisha kama nini! Wakati kijana anapotapanya nishati zake za kimwili na uwezo wake wa kufanya mambo mbalimbali kwa njia inayofanya miaka yake ya utu mzima baadaye iwe migumu zaidi, hakika ujana wake na kipindi cha kusitawi wa maisha ni ubatili! (Mithali 22:3) Kwa hiyo uwe mwenye hekima! Fuata onyo la upole linalotolewa halafu: “Mkumbuke Muumba wako siku za ujana wako.”—Mhubiri 12:1.

 9. Ni faida gani utakazofurahia kwa kukumbuka Yehova katika ujana wako?

⁹ Kwa kumkumbuka Yehova katika ujana wako, utajifaidi mwenyewe kweli kweli. Si kwamba utaepuka tu visababishi vya kukutia wasiwasi na magumu yenye mabaya, bali pia utafurahia sasa hivi maisha yenye furaha, yenye kuthawabisha katika kutumikia Muumba wako Mkuu. Zaidi ya hilo, utafanya hekima kujiwekea hazina mbinguni zitakazokufaidi kwa umilele wote. (Mathayo 6:19-21) Ukimkumbuka Yehova sasa kwa kufanya mapenzi yake, yeye atakukumbuka na kukuthawabisha kwa “haja za moyo wako,” ndiyo, maisha kamili yenye furaha katika Paradiso milele!—Zaburi 37:4; 133:3; Luka 23:43, ZSB; Ufunuo 21:3, 4.

Wewe Unajisikiaje Juu ya Yehova?

10. (a) Kwa sababu gani uamuzi wako wa kutumikia Mungu hauwezi kuwa ni kufikiria kufanya mambo yaliyo ya hekima shauku nyingi? (b) Ni ombi gani zaidi la kusihi ambalo Yehova anafanya?

¹⁰ Hata hivyo uamuzi wako wa kutumikia Yehova hauwezi kuwa ni kupanga tu kufuata yaliyo ya hekima bila shauku nyingi. Shetani ni adui mjanja sana hivi kwamba, ikiwa wewe unafikiria faida yako binafsi tu, hatimaye yeye ataweza kuvutia elekeo fulani la kichoyo akuondoe katika kumtumikia Yehova. Kwa hiyo, Yehova hakualiki uwe mwenye hekima tu. Hapana, bali yeye anakusihi pia ufanye wakfu wa kibinafsi kwake. Yesu alisema: “Ni lazima umpende Yehova Mungu wako kwa moyo wako wote.” (Mathayo 22:37, NW ) Je! wewe unajua maana ya kumpenda Yehova kwa moyo wote?

11. (a) Maana yake nini kwamba umpe Yehova moyo wako? (b) Lililompata Yusufu linaonyeshaje jinsi kichocheo kinachofaa cha moyoni kinavyoweza kutusukuma tufanye mapenzi ya Mungu?

¹¹ Moyo wako unamaanisha utu wako wa ndani kabisa, makusudio yako, mielekeo yako, na maono yako ya moyo ya ndani ndani, pamoja na uwezo wako wa kufikiri. Hivyo kumpenda Yehova kwa moyo wako wote kunamaanisha kwamba umpende vilivyo na kwamba utafikiria kufanya uchaguzi wako uwe ni kufurahisha moyo wake kwa kumwandalilia jibu la kukanushia dhihaka kali ya Shetani, hilo likiwa ndilo jambo unalotanguliza mbele ya mengine yote maishani. Kuwa na utambuzi huo na kumpenda sana Mungu na kumfikiria kutakupa kichocheo kilicho na nguvu nyingi zaidi cha kufanya mapenzi yake hata inapoonekana kama kwamba inavutia sana kufanya kinyume cha hivyo. Kijana Yusufu alikuwa na upendo kama huo kwa Yehova, kwa hiyo mwanamke mashuhuri alipomwalika akisema: “Lala nami,” Yusufu alijibu: “Nifanyeje ubaya huu mkubwa nikamkose Mungu? ”—Mwanzo 39:7-9

12. (a) Unaonyeshaje kwamba umempa Yehova moyo wako? (b) Ikiwa wewe hujampa Yehova moyo wako, ni maulizo gani unayopaswa kufikiria?

¹² Unaonyesha kwamba unampenda Yehova kwa moyo wako wote wakati unapomwendea katika sala na kumwambia unataka uwe mali yake, kwamba unataka kumtumikia milele. Kwa njia hiyo unajiweka wakfu kwa Yehova. Je! wewe umefanya hivyo? Ikiwa sivyo, sababu ni nini? Ni kitu gani kinachokuzuia? Je! wewe una umri wa kutosha kufahamu na kuthamini lile suala kuu kati ya Yehova na Shetani? Na je! unataka kuufurahisha moyo wa Yehova? Hakika Shetani hataki wewe umpende Yehova kwa moyo wako wote. Anataka ufanye ujitakiavyo kwa uchoyo ili kujipendeza mwenyewe? Wewe utafurahisha nani? Yehova au Shetani? Fikiria jambo hilo kwa uzito.

13. Ikiwa wewe uko wakfu na umebatizwa, ni maulizo gani unayopaswa ujiulize?

¹³ Ikiwa wewe umejiweka wakfu kwa Mungu na ukaonyesha hivyo kwa kubatizwa katika maji, je! mwendo wako wa maisha unaonyesha kwamba kwa kweli moyo wako ni mali ya Mungu? Wewe umeyaweka mapendezi yako na mambo unayopenda kwa shauku yategemee nini? ni kutegemea kupata gari jipya? ni kutegemea kuchuma pesa ili ununue mavazi au vitu vingine vya kibinafsi? Ni mapendezi ya nani yanayokuja kwanza—yako mwenyewe au ya Yehova? Je! wewe umeitikia kweli kweli ombi la Yehova la kukusihi umpe moyo wako?

14. (a) Ni jambo gani lenye thamani kubwa walilo nalo vijana? (b) Kwa sababu gani inasikitisha wakati kijana hamkumbuki Muumba wake?

¹⁴ Ingawa watu wenye umri mkubwa zaidi ndio wenye ujuzi mwingi zaidi na kwa ujumla ndio wenye hekima nyingi zaidi, vijana pia wana jambo lenye thamani kubwa wanaloweza kutumia wampendeze Mungu. “Fahari ya vijana ni nguvu zao,” Biblia inasema. (Mithali 20:29) Kwa hiyo tumia nguvu hizo sasa. Kumbuka Muumba wako “kabla hazijaja siku zilizo mbaya” za uzee, wakati mwili unapodhoofika na viungo vyao vinalegea na kuacha kufanya kazi vizuri. Ni jambo la kusikitisha sana kwa mtu ambaye ameshindwa kukumbuka Muumba wake katika ujana wake na kwa hiyo katika uzee hana kitu cha kumpendekeza mwenyewe kwa Mungu! Huo ndio “ubatili mtupu” kabisa! (Mhubiri 12:1-8) Basi, fanya hekima ukumbuke Muumba wako maadamu una nguvu na bidii. Sitawisha kumbukumbu la utumishi wenye uaminifu kwa Mungu, ambaye atakukumbuka kwa hukumu ya kukupendelea, naam, mpaka uwe na uzima wa milele.—Waebrania 6:10-12; Mhubiri 12:13, 14.

Wao Walifurahisha Moyo wa Mungu

15. Kuna mifano gani ya Biblia juu ya vijana waliotumia uwezo wao katika utumishi wa Mungu?

¹⁵ Biblia imejawa na mifano ya vijana waliotumia “fahari” yao—uwezo wao—katika utumishi wa Mungu. “Vijana” ndio walioipeleleza ile Nchi ya Ahadi kwa wepesi na hima. (Yoshua 6:22, 23; 2:15, 16, 23) Daudi mwenyewe alipokuwa na umri wa miaka 20, alipeleka “vijana kumi” katika tume ya kuomba hisani kutoka kwa Nabali. (1 Samweli 25:4, 5) Wakati wayahudi walipojenga upya kuta za Yerusalemu wakiwa chini ya gavana Nehemia na huku wakiwa chini ya tisho la kushambuliwa, ni nani aliyeifanya kazi hiyo hatari na ngumu? “Nusu ya vijana wangu wa kiume,” Nehemia akaeleza, “walikuwa watendaji katika ile kazi na nusu yao walikuwa wameishika mikuki, ngao na pinde na deraya.” (Nehemia 4:16, NW ) Na wakati Mungu alipopiga Anania na Safira mkeye wakafa kwa sababu ya kusema uwongo, “vijana” ndio waliowachukua wakawazika.—Matendo 5:5, 6, 10.

16. Ni katika utendaji gani wa kiroho vijana wameshiriki wakati uliopita?

¹⁶ Hakika inafurahisha moyo wa Yehova vijana wanapojitoa watumiwe kwa utumishi wo wote unaotakwa wakati huo. Hata hivyo vijana wamehusika katika utendaji wa kiroho uliotaka mambo mengine zaidi ya nguvu za kimwili na nishati tu. “Mimi ni kijana,” Elihu akakiri. Hata hivyo, Yehova alimtumia kumsahihisha Ayubu. (Ayubu 32:4-6) Samweli alikuwa “kivulana” tu wakati alipoanza kutumikia kwenye hema takatifu la Yehova katika Shilo. (1 Samweli 2:18, NW ) “Kisichana” ndicho kilichotangaza bila woga jambo ambalo nabii wa Yehova angeweza kufanya, ingawa kilikuwa mtumwa katika nyumba ya Naamani. (2 Wafalme 5:2-4, NW ) Wakati Yehova alipompa Yeremia mgawo awe nabii, Yeremia alisema: “Mimi ni kivulana tu.” (Yeremia 1:5, 6, NW ) “Kwa habari za hao vijana wanne”—Danieli na Waebrania wenzake watatu—walikuwa watumishi wa Yehova wenye kutokeza kama nini katika uhamisho wa Kibabuloni! (Danieli, Sura 1 na 3) Mpwa wa Paulo, “kijana mwanamume,” alitenda kwa ushujaa kwa ajili ya mjomba wake. (Matendo 23:16-22, NW ) Halafu alikuwako yule mvulana Timotheo, ambaye tangu utoto mchanga aliyajua maandiko matakatifu na akatumia ujana wake katika utumishi wa Yehova.—2 Timotheo 3:15; Wafilipi 2:19-23; 1 Wakorintho 4:17.

Kuufurahisha Moyo wa Mungu Leo

17. Kwa sababu gani tutazamie kupata vijana wanaopendeza Yehova leo, na je! tunawapata?

¹⁷ Hata hivyo si vijana wa zamani tu ambao wamefurahisha moyo wa Mungu kwa utumishi wao wa uaminifu. “Itakuwa siku za mwisho, asema Mungu, Nitawamwagia watu wote [roho] yangu, na wana wenu na binti zenu watatabiri; na vijana wenu wataona maono.” (Matendo 2:17; Yoeli 2:28) Kwa hiyo inatupasa kwa kufaa tutazamie kuona katika hizi siku za mwisho Wakristo wengi vijana wanaompendeza Yehova. Nasi tunawaona! Ingawa Mashahidi vijana si watu wasio na makosa, kama vile ye yote kati yetu asivyokuwa hana kosa, wengi wanaendelea vizuri sana wakiwa Wakristo. Wao wanajishughulisha kufurahisha moyo wa Yehova.—Mithali 27:11; 3:1, 2.

18, 19. Ni kazi gani inayohitaji kufanywa leo, na kwa sababu gani kazi hiyo inawafaa sana vijana?

¹⁸ Katika hizi siku za mwisho, mapenzi ya Yehova ni kwamba ushahidi mkubwa wa duniani pote utolewe juu ya Ufalme wake, na jambo hilo linahusu jitihada kubwa sana. (Mathayo 24:14) Majumba ya Ufalme yanahitaji kujengwa kwa ajili ya ibada, na pia majengo makubwa zaidi kwa ajili ya makusanyiko ya mizunguko. Katika nchi nyingi, nafasi zaidi ya viwanda inahitajiwa ili kuchapisha vitabu vya Biblia, na pia sehemu zaidi za kukaa katika nyumba za Betheli. Kazi nzito ya ujenzi inatakwa ifanywe ili kuwe na majengo hayo mapya, na kama ilivyokuwa juu ya kujenga ukuta siku za Nehemia, vijana wenye nguvu na nishati ndio wanaofanya nyingi ya kazi hiyo.

¹⁹ Vijana hao ndio pia wanaofanya sehemu kubwa ya kazi nzito ya kimwili inayotakwa ili kuchapa, kujalidi, na kusafirisha maelfu ya tani za vitabu vya Biblia kila mwaka. Kwa kweli, kwenye makao makuu ya Mashahidi wa Yehova New York, kutia na mashamba ya Watchtower, kuna vijana 1,400 wenye umri wa miaka 25 kurudi chini. Na utumishi wao hauhusu kufanya kazi zile zinazohitaji nguvu za mwili tu wakati wa juma; bali wakati wa miisho-juma wanashiriki pia utendaji wa kuhubiri nyumba kwa nyumba na katika mikutano ya Kikristo pamoja na makundi ya kwao. Wao wanaufurahisha moyo wa Yehova kama nini!

20. (a) Ni ushiriki gani ambao vijana wanakuwa nao katika huduma ya painia? (b) Ni maulizo gani wanayopaswa kujiuliza vijana ambao hawamo katika huduma ya wakati wote?

²⁰ Katika United States, wenye kufanya kazi bega kwa bega pamoja na vijana hao ni wengine wa rika hilo hilo zaidi ya 12,000 wanaotumikia wakiwa wahudumu mapainia wa kawaida. Katika sehemu nyingine za ulimwengu, makumi mengine ya maelfu ya vijana wanapainia pia. Ikiwa wewe ni kijana ambaye bado hujaingia katika huduma ya wakati wote, je! unaweza kujiwekea miradi yako mwenyewe itakayomtanguliza Yehova katika maisha yako, badala ya labda kukusudia tu kupata kazi ya kimwili yenye mshahara mnono, kisha kufunga ndoa na kuwa na jamaa? Je! wewe unalielewa lile suala kubwa linalohusu ulimwengu wote? Je! unatamani kweli kweli kuona jina la Muumba wetu Mkuu likiondolewa mashutumu yote? Ikiwa ndivyo je, haifai ufanye yote uwezayo katika utumishi wa Yehova? Na je! hiyo haingetia ndani angalau wengi zaidi kati yenu mjitolee kutumikia katika nyumba za Betheli au mwingie katika kazi ya upainia?

21. (a) Ni mwaliko gani kutoka kwa Yehova ambao inakupasa uitikie, na jinsi gani? (b) Kwa sababu gani tunaweza kuwa na uhakika kwamba vijana wengi zaidi wataitikia mwaliko wa Yehova kama alivyofanya Isaya?

²¹ Sikiliza! Yehova anakualika, ndiyo, anakusihi wewe umwandalilie jibu la dhihaka kali zenye uovu za Shetani. Je! wewe, kama Isaya, unaweza kusikia Yehova akiuliza hivi: “Nimtume nani, naye ni nani atakayekwenda kwa ajili yetu? ” Kwa nini usiwe na hekima, uitikie hivi: “Mimi hapa, nitume mimi.” (Isaya 6:8) Sisi tuna tumaini hakika kwamba wengi zaidi kati yenu ninyi vijana mtaitikia kwa sababu Neno la Mungu linaahidi: “Watu wako watajitoa wenyewe kwa moyo wa kupenda siku ya jeshi lako ya vita. . . . Unalo shirika la wanaume [na wanawake] vijana kama matone ya umande. (Zaburi 110:3, NW; 148:12, 13) Nawe unapoitikia, unaweza kuwa na furaha ya kujua kwamba Yehova anakuona na kukubali—kwamba unafurahisha moyo wake!

SANDUKU LA KURUDIA

◻ Kwa sababu gani jinsi tunavyoishi maisha yetu ni jambo la maana kwa Yehova?

◻ Kwa sababu gani ni jambo la hekima kufurahisha moyo wa Yehova?

◻ Tunaweza kuonyeshaje kwamba tumempa Yehova moyo wetu?

◻ Ni nani katika wakati uliopita aliyefurahisha moyo wa Yehova, na jinsi gani?

◻ Ni akina nani leo wanaofurahisha moyo wa Yehova, na jinsi gani?

[Blabu katika ukurasa wa 17]

Wakati vijana wanapovunja sheria za Mungu, wanapatwa na matokeo machungu sana baadaye

[Picha katika ukurasa wa 18]

Vijana walifurahisha moyo wa Mungu kwa kusaidia kujenga upya kuta za Yerusalemu