Je, Wachoshwa na Kazi Yako?

YAELEKEA wafanya kazi kwa muda wa saa nane hivi kwa siku. Huo ni wakati mwingi sana na maisha mengi kudhabihu kwa uchoshi! Na bado, kazi nyingi katika karne ya 20 ni za kukinaisha na humpa mfanyakazi jambo dogo analoweza kujisifia.

Hivyo una mengi uwezayo kufaidika kwayo kwa kufanya kazi yako iwe yenye kufurahisha. Wapata furaha nyingi zaidi kwa kufanya kazi yako, na wajifunza siri ya kuboresha kazi yako yoyote ya wakati ujao. Wacha basi, tuchunguze baadhi ya njia za kufanikisha hili.

Tenda kwa Shauku

Mamlaka fulani zimeshauri kwamba ufanye kazi kana kwamba uliifurahia. Ikiwa utafanya hivyo, mtazamo huo utafaa sana.

‘Lakini nisingeweza kamwe kuwa mwenye shauku kuhusu kazi yangu!’ waweza kujibu. Kazi yako yaweza kuhusisha kawaida isiyobadilika, kama vile kufanya kazi hatua kwa hatua katika kuunda au kutengeneza kitu. Au yaweza kuwa umefanya kazi hiyo kwa miaka mingi sana hivi kwamba wahisi haiwezekani kuifanya ipendeze tena. Lakini, mbinu rahisi kama vile kutabasamu na kusimama wima zaweza kukusaidia uhisi mwenye shauku kuhusu kazi yako.

Yaweza kusaidia pia ikiwa utaelekeza fikira zako zote kwenye kile unachofanya. Usifanye kazi kama mtambo tu, na usifanye kazi yako huku ukifikiria wakati wa chakula cha mchana, au mwisho-juma, au hata kazi nyingine ipasayo kufanywa. Kwa kawaida ni vizuri kukaza fikira zote katika kazi uifanyayo. Matokeo? Waweza kuifurahia kazi yako, na kisha wakati utaonekana ukipita upesi-upesi.

Hili ndilo kwa kawaida hutukia ujikutapo umemezwa kabisa na utendaji fulani ambao waufurahia kwelikweli. Waweza kufikia lengo hilohilo kwa kujilazimisha kukazia uangalifu wote kazi ambayo kwa kawaida wajikuta huifurahii.

Fanya Yote Uwezayo

Kufanya yote uwezayo kwaweza kukusaidia kufikia uradhi katika kazi. Bila shaka, shauri kama hilo lapingana na wazo lipendwalo kwamba upatapo kazi ambayo haifurahishi, wapaswa kufanya jitihada kidogo sana. Lakini kupuuza, kuahirisha, na kufanya jitihada kidogo bila shaka kutaelekea kumaliza nishati zako na kuongeza hangaiko na uchovu. Katika visa fulani mtu arudiye nyumbani kutoka kazini akiwa na mkazo, mwenye mahangaiko, na amechoka kabisa aelekea sana kuwa ateseka kwa sababu ya kushindwa kufanya kazi kwa bidii nyendelevu.

Kulingana na Biblia, kufanya kazi kwa juhudi katika mradi fulani hufanya saa za mapumziko kuwa za kufurahisha zaidi. “Mwanadamu hapati jema kupita kula na kunywa, na kuiburudisha roho yake kwa mema katika kazi yake [“ya bidii,” NW].” (Mhubiri 2:24) Kwa baadhi ya watu, waweza kufikiria kwamba huu ni wito uliopitwa na wakati, lakini wengine wanatumia kanuni hii isiyopitwa na wakati. Wao wakubali kwamba, kwa kweli, ‘hakuna jambo jingine jema zaidi’ kuliko kwamba wapaswa kufurahia matunda ya kazi yao ya bidii. Kitabu The Joy of Working chakubali hivi: “Kazi iliyofanywa vizuri humwacha mtu na uradhi wa ndani.”

Kwa hiyo, fanya kazi bora kabisa uwezayo kufanya na bila shaka utahisi umeongezewa nishati. Fanya zaidi ya kiwango cha chini, na huenda ukajisikia mwenye furaha zaidi. Fanya kazi za maana kwanza, na utafurahia vipindi vya mapumziko ya mchana na miisho-juma zaidi ya mtu ajichoshaye katika kuahirisha.—Linganisha Esta 10:2; Waroma 12:11; 2 Timotheo 2:15.

Badala ya kushindana na wengine, jitahidi kujizidi mwenyewe. (Wagalatia 6:4) Weka viwango vipya, malengo mapya. Endelea kufanya maendeleo. Mwanamke mmoja, ambaye kazi yake hutia ndani kurudia-rudia kushona nguo ambako wengine wangeifikiria kuwa yenye kuchosha, alijifanyia mchezo wa kujipimia wakati. Aliifuatilia kazi yake saa kwa saa, na kisha akajaribu kuiongeza. Yeye huifurahia kazi yake kwelikweli kwani yeye hujaribu kufanya kazi kwa uwezo wake wote.—Mithali 31:31.

“Boresha” Kazi Yako

Madaktari Dennis T. Jaffe na Cynthia D. Scott washauri: “Ifikirie kazi yako kama nyumba iliyo tupu. Waingia ndani na kuangalia muundo wake. Kisha ubunifu wako waanza. Waanza kufikiria utakavyoitumia nafasi, kupamba, na kuifanya nyumba kuwa makao yako. Waifanya kulingana na mtindo wako.”

Kazi nyingi zinapewa kwako zikiwa na maelezo ya sheria na miongozo. Kufanya tu kama inavyotazamiwa ni kama kuhamia nyumba iliyo tupu. Hakuna utu. Lakini ikiwa utaongeza mtindo wako binafsi, kazi yako yaweza kupendeza zaidi. Hakuna watu wawili “watakaoiboresha” kazi katika njia inayofanana. Mhudumu mmoja atakumbuka maagizo ya chakula ya wateja wa kawaida. Mwingine atakuwa mwenye fadhili sana na adabu nyingi kwa njia ya pekee. Wote wawili wafurahia kazi zao kwa sababu wajihusisha katika yale wayafanyayo.

Endelea Kujifunza

Njia nyingine ya kupata furaha katika kazi ni kujifunza. Kitabu Tension Turnaround chaeleza kwamba kadiri tukuavyo, ubongo wetu waongeza uwezo wake wa kuchanganua habari. Hili laeleza kwa nini mambo yaliyotufurahisha wakati uliopita yaweza kutuchosha sasa. Suluhisho ni kuridhisha hamu ya ubongo ya kupata habari mpya kwa kujifunza mambo mapya.

Kujifunza mengi zaidi juu ya kazi yako baadaye kwaweza kuongoza katika kupewa kazi ambayo inafurahisha zaidi. Lakini hata ikiwa hilo halitukii, hatua yenyewe ya kujifunza itafanya kazi yako ipendeze na kuridhisha zaidi. Wabuni Charles Cameron na Suzanne Elusorr wataja: “Kujifunza hakuongezi uhakika wako tu wa kuongeza uwezo wako, bali pia kutaondoa maoni ya ujumla ambayo yanakuathiri wewe: kwamba matatizo yaweza kusuluhishwa, magumu yaweza kushindwa, hofu zaweza kuondolewa, na kwamba mambo mengi yanawezekana kuliko ulivyofikiri.”

‘Lakini,’ waweza kupinga hivi, ‘nilijifunza kila kitu nilichopaswa kujifunza kuhusu kazi yangu muda mrefu uliopita!’ Katika jambo kama hilo, je ungeweza kujifunza mambo mengine ambayo hayahusiani moja kwa moja na kazi yako? Kwa kielelezo, waweza kuamua kujifunza zaidi kuhusu mahusiano ya kibinadamu au kuhusu vifaa vyako. Labda waweza kujifunza jinsi ya kuandika taarifa nzuri zaidi za ofisi au jinsi ya kuendesha mkutano vizuri zaidi. Waweza kujifunza njia zilizo bora zaidi za kushughulika na wasimamizi wako.

Utajifunzaje mambo hayo? Labda kampuni uifanyiayo kazi yatoa kozi ambazo waweza kuzitumia. Au maktaba yaweza kuwa na vitabu unavyohitaji. Lakini usipuuze vyanzo vya habari visivyo dhahiri sana. Kuwachunguza watu wakifanya kazi na kuangalia nguvu zao na udhaifu wao mbalimbali kwaweza kuwa elimu. Waweza kujifunza kutokana na makosa yako, na waweza kujifunza kutokana na mafanikio yako pia, kwa kuchunguza yale uliyofanya kwa usahihi. Ujifunzacho kutokana na mambo yaliyokupata na kwa kuangalia watu wengine chaweza kukufundisha mambo ambayo kamwe usingesoma vitabuni au kusikia katika masomo.

Baadhi ya Madokezo ya Mwisho

Kuna njia nyingine ambayo waweza kuichukua kuhusu kazi yako. Waweza kuamua kwamba wastahili kilicho bora—kwamba wengine wapata nafasi zote na kwamba hujapata kamwe nafasi ya kufanya kazi uitakayo kwelikweli. Waweza kuongea bila mwisho na wengine ambao wakubaliana nawe, na waweza kusadikishwa kwamba yote hayo ni kweli.

Lakini yaweza kuwa si kweli. Watu wengi ambao wafurahia kufanya kazi zao wamejifunza kufanya hivyo. Mtu afurahiaye kupamba nyumba aweza pia kuja kufurahia kuendesha basi. Kwa nini? Kwa sababu mwelekeo wake wa ubunifu kuelekea kazi wampa furaha na uradhi.

Hivyo jiepushe na kufikiri kusikofaa ambako hufanya kazi katikati ya juma kuwa kusikopendeza kwa kulinganisha na mwisho wa juma. Usipoteze wakati ukifikiria makosa yako ya wakati uliopita, ukifikiria ni nini kitakachoharibika baadaye, na kuwa na wasiwasi kuhusu jinsi wengine wanavyokufikiria. Itazamie kazi iliyo mbele yako. Ipe uangalifu wako wote. Jitahidi kumezwa katika kazi hiyo kama vile ungemezwa kabisa katika shughuli ya kufurahisha uipendayo. Fanya jitihada yako yote na bado, ufurahi katika kazi ifanywayo vizuri.

[Sanduku/Picha katika ukurasa wa 11]

Usiipuuze Kazi Yako

Biblia yasema hivi, katika Mithali 27:23, 24: “Fanya bidii kuijua hali ya makundi yako; na kuwaangalia sana ng’ombe zako. Kwa maana mali haziwi za milele; na taji je! yadumu tangu kizazi hata kizazi?” Hilo lamaanisha nini?

Lamaanisha kwamba mali (hazina) na nafasi za umashuhuri (taji), ikiwa zapatikana, mara nyingi huthibitika kuwa za muda tu. Kwa hiyo, mchungaji katika nyakati za Biblia alionyesha hekima ikiwa alikazia uangalifu wenye bidii kutunza mifugo yake, yaani, ‘kuangalia sana mifugo yake.’ Kama mistari mitatu ifuatayo ionyeshavyo, matokeo yangekuwa usalama wa mali za kimwili kwa mfanyakazi huyo na kwa familia yake.—Mithali 27:25-27.

Vipi leo? Mara nyingi watu huelekeza mioyo yao katika kupata mali au cheo chenye umashuhuri, ambazo, watumaini, zitawawezesha kuacha kazi zao za wakati huu. Baadhi ya watu wana mipango halisi; wengine wanawazia tu. Katika visa vyote viwili si hekima kudharau au kupuuza kazi ya kuajiriwa ya mtu ya sasa. Ndivyo ilivyo, na yaweza kuendelea kuwa, ndiyo chanzo cha mapato chenye kutegemeka zaidi. Ni busara zaidi kwa mtu kuelekeza moyo wake katika “mifugo” yake, akikazia uangalifu wote kazi yake ya kuajiriwa. Kufanya kwake hivyo kwaelekea kutokeza usalama wa mali za kimwili kwa sasa na kwa wakati ujao.