Darasa la 84 la Gileadi Laishi Kulingana na Matarajio!

MITHALI 10:28, NW inasema: “Tarajio la wenye uadilifu ni shangilio.” Ndivyo ilivyokuwa asubuhi ya Machi 6, 1988. Ilikuwa wazi kwa mtazamaji ye yote kwamba matarajio yalikuwa ya juu miongoni mwa 4,360 waliokuwa wamekusanyika kwenye Jumba la Mkusanyiko katika Jiji la Jersey la Mashahidi wa Yehova.

Uhakika wa kwamba karibu jamaa yote nzima ya Betheli ya Brooklyn na ya Mashamba ya Mnara wa Mlinzi iliweza kuwa pamoja katika mazingira yenye kupendeza ulikuwa wenyewe sababu ya shangwe na msisimuko mkubwa! Hata hivyo, wale waliokuwapo walikuwa wamekuja kwa tarajio ambalo lilikuwa kubwa zaidi ya kuunganika tena kwa jamaa kubwa. Jambo kuu lililokuwa akilini mwao ni kile ambacho wao walijua kwamba kingekuwa tukio kubwa maishani: Kuhitimu kwa darasa la 84 la Shule ya Biblia ya Gileadi ya Mnara wa Mlinzi.

Ikiwa sasa katika makao makuu ya Mashahidi wa Yehova katika Brooklyn, New York, Gileadi ilianzishwa katika 1943 ili kusongeza mbele kazi iliyoagizwa rasmi ya Mungu ya ‘kufanya wanafunzi.’ (Mathayo 28:19, 20) Baada ya kumaliza mtaala wa miezi mitano wa elimu ya Biblia, wahitimu wa Gileadi wanapelekwa si kwenye kazi zenye mapesa mengi, lakini katika shamba la ulimwenguni pote wakiwa wamisionari. (Mathayo 13:38) Inaeleweka basi, mtu ye yote ambaye amepata pendeleo la kuhudhuria Gileadi anakuwa na matarajio ya juu.​—Linganisha Luka 12:48.

Kwa nguvu, programu ya kuhitimu ilikazia matarajio haya waziwazi. Ilifunguliwa kwa sala ya moyo wenye bidii iliyotolewa na George Gangas, mshiriki wa Baraza Linaloongoza. C. W. Barber, ambaye pia ni wa Baraza Linaloongoza, alitumikia akiwa mwenye kiti siku hiyo. ‘Sisi tunashiriki kampeni kubwa sana ya kuelimisha katika historia,’ akasema Barber. Akitumia Isaya sura 6, yeye alieleza kwamba lazima tuhubiri chini ya hali zenye uhasama mara kwa mara. Na kama ilivyokuwa katika siku ya Isaya, “sehemu moja katika sehemu kumi” ya mfano au “mabaki,” huenda wakaitikia ujumbe wetu. (Isaya 6:13; linganisha Warumi 9:27.) Ingawaje, hatupaswi kamwe kuhisi kwamba jitihada zetu za kuhubiri ni za bure!

Maneno hayo yenye kutia moyo yalitokeza mwonjo wa kimbele wa yale ambayo yangefuata: mfululizo wa hotuba fupi lakini zenye nguvu ulielekezwa kwa wahitimu. Calvin Chyke wa Halmashauri ya Kiwanda alianza kwa kuuliza swali, ‘Je! ninyi mtathibitika kuwa baraka kwa wengine?’ Wao walikuwa wamepokea baraka nyingi katika Gileadi. Sasa lazima wao watoe baraka, wakiwatolea wengine ‘zawadi za kiroho.’ (Warumi 1:11, 12, NW) Hata wakati hali zenye kujaribu zinatokea kama vile kuishiwa pesa, lazima wamisionari waendelee “kuzoea kutoa” kiroho. (Luka 6:38, NW) Ndipo maneno ya Zaburi 84:6, NW yatatimizwa juu yao: “Hata pamoja na baraka mkufunzi anajitia ndani mwenyewe.”

David Olson wa Halmashauri ya Idara ya Utumishi ndiye aliyefuata kuwakumbusha wamisionari juu ya udugu wetu wa ulimwenguni pote. Kwa miezi mitano wao walikuwa wamefurahia upendo na utegemeo wa wanadarasa wenzao—na sasa wanatawanywa katika tufe lote. Olson aliwahakikishia kwamba watafurahia utimizo wa Marko 10:29, 30, unaowaahidi marafiki wapya na ‘jamaa.’

Daniel Sydlik wa Baraza Linaloongoza alikazia uhitaji wa wahitimu ‘Kukuza Matarajio Makubwa na Yaliyo Bora.’ Yehova ametuumba na uwezo wa kuwa na matarajio, matumaini, na ndoto. Basi je! wamisionari hawapaswi kuwa na matarajio ya juu kwa ajili yao wenyewe? ‘Wekeni mradi, jifanyieni matakwa!’ akasihi Sydlik. ‘Jifunzeni lugha ya nchi ambazo mmegawiwa. Wekeni makala za Mnara wa Mlinzi na Amkeni! katika lugha zenu ili mwendeleze hali yenu ya kiroho. Mnapowafundisha wengine,’ Sydlik akaendelea, ‘wawekeeni matarajio ya juu pia. Acheni wajue kwamba wanatazamiwa kuhudhuria mikutano na kutayarisha somo kabla ya wakati.

Wasemaji waliofuata waliendelea vivyo hivyo. Lyman Swingle, pia wa Baraza Linaloongoza, aliwakumbusha wanafunzi: ‘Yesu Kristo ndiye anayewapeleka nje. Na yeye mwenyewe ndiye alipelekwa katika shamba la kigeni hapa duniani.’ Kama Yesu, wamisionari wapaswa wachukue mgawo wao kwa uzito. Hata hivyo, hawapaswi kujiona wenyewe kuwa wazito. ‘Mwe na uwezo wa kujicheka wenyewe mnapofanya mambo mapuuzi.’ akasema Swingle. ‘Mhubiri 3:4 inatukumbusha sisi kwamba kuna “wakati wa kucheka.”’

Wakufunzi wawili wakuu wa shule sasa walipata nafasi ya kuwapa wanafunzi wao onyo la upole la hatima. Kichwa cha Jack Redford kilikuwa ‘Usisahau Kamwe Wewe Ni Mmisionari!’ Viongozi wa kidini wa Jumuiya ya Wakristo wamesahau maana ya umisionari, wengi wao wakijitia katika siasa za ulimwengu. Hata hivyo, Yesu Kristo alitimiza umisionari wake wa kuhubiri, bila kukengeushwa fikira na yale ambayo ulimwengu wa Shetani ulitoa. Basi lazima wamisionari sikuzote wakumbuke kwa nini wamepelekwa —kulisha aina ya binadamu wenye kufa njaa kiroho. (Linganisha Mathayo 9:36.) Lazima wao waepuke mitego kama ufuatiaji wa vitu vya kimwili na ukosefu wa adili. Kwa kukazia fikira umisionari wao wa kuhubiri, wao wana tazamio la mbele la kufurahia mambo mengi yaliyoonwa yaliyo mazuri katika shamba!

U. V. Glass alifuata kwa kielezi kilichohusu bilauri ya maji na kamba yenye lulu. Katika mabara mengi utakato wa bilauri ya maji unatiliwa mashaka kwa ukawaida. Linaloweza kutiliwa mashaka pia ni ule uzuri wa kamba yenye lulu. ‘Namna gani ustahilifu wa kusadikika kwenu?’ akauliza Glass. ‘Ukosefu wa ustahilifu wa kusadikika umeitwa “mharabu wa polepole wa mahusiano.’ “Wahitimu wanawezaje kuimarisha ustahilifu wa kusadikika kwao? ‘Sema ukweli,’ akasema Glass, ‘si kuufanya uonekane kuwa kweli au kuupindua. Kushika ukamilifu ndio msingi wa ustahilifu wa kusadikika.’​—Waefeso 4:25.

Jambo kuu la asubuhi hiyo lilikuwa hotuba ya kumalizia iliyotolewa na msimamizi wa Sosaiti ya Mnara wa Mlinzi mwenye umri wa miaka 94, F. W. Franz. Kwa sauti ambayo ingali yenye imara na nguvu, Franz alirudia historia ya Gileadi. Wakati wa vita ya ulimwengu ya pili, Baraza Linaloongoza lilikuja kufahamu kwamba ‘Vita ya Ulimwengu ya Pili haingeongoza kwenye Har–Magedoni. Ingemalizika na kipindi cha amani kingefuata.’ Gileadi ilianzishwa ili kutumia kikamili kipindi hicho kilichotokea—nayo imekuwa ikiendelea kwa nguvu tangu wakati huo! ‘Sisi tunaishi katika wakati wenye pendeleo kupita mwinginewo wote!’ akapaaza sauti msimamizi wa Sosaiti. Hadhirina ilionyesha uthamini wao kwa onyo hilo la upole lililotolewa na mtumishi huyo wa Yehova wa muda mrefu kwa kupiga makofi kwa mngurumo!

Sasa pazia zikafunguliwa, zikiwafunua wanafunzi 24 wa darasa la 84 la Gileadi wakiwa wameketi jukwaani. Ijapokuwa walikuwa na wastani wa miaka 31.6, wao si wahubiri wapya. Kwani, walikuwa na wastani wa miaka 11.3 ya kueneza evanjeli wakati wote! Na wao walikuwa kikundi cha kimataifa, wakitoka Uholanzi, Australia, Ufini, Sweden, Ujeremani, na United States. Kwa msaada wa A. D. Schroeder, mmoja wa wakufunzi wa kwanza wa Gileadi, C. W. Barber aliwapa diploma zao. Hadhirina ilisisimuka kusikia kwamba wahitimu wangepelekwa kwenye mabara tisa: Ufilipino, Sierra Leone, Samoa ya Magharibi, Taiwan, Tanzania, Papua New Guinea, Bolivia, Guam, na Kolombia! Kisha barua nzuri ya uthamini ya darasa hilo ilisomwa na mmoja wa wanafunzi.

Baada ya kupumzika kidogo kwa ajili ya chakula cha mchana, hadhirina ilikusanyika tena kwa funzo la Mnara wa Mlinzi lililofupishwa, likiwa linaongozwa na Robert Wallen wa Halmashauri ya Betheli. Funzo lilipomalizika, taa zikafifia. Mwenyekiti wa programu alisihi hadhirina: ‘Mstarehe na kufurahia zawadi yenu kutoka kwa wanafunzi, programu ya wanafunzi ya Darasa la 84 yenye kichwa: “Kutukuza Huduma Yetu.”’

Kupitia nyimbo, mambo yaliyoonwa, na viigizo vya kuchekesha, sasa wanafunzi walitoa mtazamo wa ndani wa maisha ya uanafunzi na umisionari. Mathalani, ilionyeshwa jinsi eneo la kuhubiri la namna mbalimbali la Jiji la New York linatumiwa kama msingi wa mazoezi ya wamisionari. Kiigizo kimoja chenye kuchekesha ambacho kilitegemea mambo ambayo wanafunzi wenyewe wa Gileadi waliona, kilionyesha jinsi wanafunzi wanajifunza kutoa ushuhuda wa ki-vivi-hivi kwenye reli za chini ya ardhi. Pia zilizotolewa katika njia yenye kutumbuiza na iliyo halisi ni tamasha za wamisionari wakifanya marekebisho magumu mara kwa mara ili wafuate tamaduni na desturi za nchi za kigeni.

Mmisionari mmoja aliyekuwa akihitimu alimalizia programu hiyo kwa njia nzuri akisema: ‘Kuna njia gani ambayo ni bora zaidi kutukuza huduma yetu kuliko kuwasaidia wengine wategemee Neno la Yehova kikamili?’ Bila shaka wote katika hadhirina walichochewa kufikiria jinsi wanavyoweza kushiriki kibinafsi kazi ya kuhubiri kwa njia kubwa zaidi! Kama jambo la kumalizia, wanafunzi waliigiza drama ya ki-siku-hizi iliyokazia uhitaji wa kujitiisha chini ya Mungu. Pindi nyingine yenye tukio kubwa ikafikia ukomo kwa sala yenye uthamini iliyotolewa na J. E. Barr wa Baraza Linaloongoza.

Bila shaka, programu ya kuhitimu kwa Gileadi iliishi kulingana na matarajio. Ingawaje, namna gani darasa lenyewe lenye kuhitimu? Sisi tuna uhakika kwamba, kama wale waliowatangulia, kikundi hiki cha karibuni cha wahitimu wamisionari kitafanya zaidi ya kuishi kulingana na yale yanayotarajiwa, ndiyo, yanayodaiwa na Yehova kutoka kwao —kwamba wao watukuze huduma yao katika migawo yao ya kigeni!

[Picha katika ukurasa wa 24]

Darasa la 84 la kuhitimu la Shule ya Biblia ya Gileadi ya Mnara wa Mlinzi

Katika orodha iliyopo chini, mistari imepewa namba kuanzia mbele mpaka nyuma, na majina yameorodheshwa kuanzia kushoto mpaka kulia katika kila mstari.

(1) Norberg, C.; Holmes, T.; Holland, J.; Vehlen, B.; Rector, D.; Thomas, K. (2) Rajalehto, T.; Rajalehto, T.; Hoefnagels, J.; Moonen, A.; Summers, C.; Wahl, H. (3) Holland, J.; Holmes, F.; Hoefnagels, H.; Koivula, V.; Moonen, M.; Thomas, B. (4) Wahl, M.; Rector, W.; Summers, G.; Keighley, P.; Vehlen, P.; Norberg, O.