Je! Wewe Unatosheka na Maandalizi ya Kiroho ya Yehova?

“Mkanijaribu kwa njia hiyo, asema BWANA [Yehova, NW] wa majeshi; mjue kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha.”—MALAKI 3:10.

1. Walio wengi wa viumbe wanaoishi wanaridhika na maandalizi gani?

IKIWA wewe utaacha kupumua hewa, wewe utakufa katika muda wa dakika chache. Ikiwa wewe utaacha kunywa maji, wewe utakufa katika muda wa siku chache. Ikiwa wewe utaacha kula chakula, wewe utakufa katika muda wa majuma machache. Ikiwa utaacha kujilisha maandalizi ya kiroho ya Yehova, basi wakati wewe utakapokufa wewe utakuwa mfu milele. Yehova anaandaa hewa, maji, na chakula ambacho viumbe wote wanaoishi wanahitaji. Kwa sababu hiyo, mtunga zaburi anamwambia Yehova: “Wewe unafungua mkono wako na kutosheleza tamaa ya kila kitu kinachoishi.” (Zaburi 145:16, NW) Tamaa ya vilivyo vingi kati ya vitu vinavyoishi inatimizwa na maandalizi hayo ya kimwili. Lakini hivyo sivyo ilivyo juu ya viumbe wa kibinadamu.

2. Ni nini tamaa ya moyo wa mwanadamu, na ni uandalizi gani unaohitajiwa kabisa kwa utimizo wa tamaa hiyo?

² Yesu alionyesha hilo wazi wakati yeye aliposema: “Mtu hataishi kwa mkate tu, ila kwa kila neno litokalo katika kinywa cha Mungu.” (Mathayo 4:4) Viumbe wale wa hali ya chini zaidi hawana wazo la umilele, lakini mwanadamu analo, kama Mhubiri 3:11 (NW) inavyosema: “hata wakati usiojulikana yeye ametia katika moyo wao.” Au kama vile Revised Standard Version inavyofasiri maneno hayo: “Yeye ametia umilele ndani ya akili ya mwanadamu.” Kwa sababu hiyo, tamaa ya mwanadamu ya moyoni ni kuishi mpaka wakati usiojulikana, hata milele. Hewa, maji, na mkate tu havitoshi kwa jambo hilo. Kuishi milele kunataka maandalizi ya kiroho yenye msingi wa ‘kila neno litokalo katika kinywa cha Yehova.’ Leo, maneno hayo yanapatikana katika kitabu kimoja, Biblia, na akiba yayo haimaliziki—kuna yote unayohitaji, zaidi ya unayoweza kutumia. Kabati la akiba hiyo haliwi tupu kamwe.

3. Ni nini ambalo Yesu alilitenga kati ya mambo mengine yote kuwa la maana zaidi, na ni jambo gani ambalo Paulo alijifunza?

³ Yesu alitufundisha kusali tuombe chakula cha kimwili kinachohitajiwa: “Tupe leo mkate wetu kwa siku hii.” Lakini mara tu baada ya hapo yeye alitanguliza mambo ya kiroho wakati aliposema: “Basi, endeleeni kuutafuta ufalme kwanza na uadilifu wake.” (Mathayo 6:11, 33, NW) Chakula cha kimwili kinatuendeleza hai kwa siku moja-moja; kuendelea kujilisha kiroho kunaweza kufanya hivyo muda wa maisha yote, na hata kwa umilele. Kwa hiyo usiwe na wasiwasi juu ya vitu vya kimwili. Paulo hakuwa nao. Yeye alisema juu ya mali za kiroho zilizomwezesha yeye kutosheka bila kujali hali zake za kimwili zilivyokuwa, akisema: “Nimefundishwa kushiba na kuona njaa, kuwa na vingi na kupungukiwa. Nayaweza mambo yote katika yeye anitiaye nguvu.”—Wafilipi 4:12, 13.

Balaa Inawajia Wasiotosheka

4. Ni maandalizi gani ambayo hayakutosha kwa watu wawili wa kwanza, na wao walitaka nini zaidi?

⁴ Hata hivyo, wengi hawatosheki na maandalizi ya Yehova. Wazazi wetu wa kwanza hawakutosheka. Wao waliishi katika bustani-paradiso—mandhari ya kupendeza ilifurahisha macho yao, maua yenye manukato yalitia harufu nzuri katika hewa waliyopumua, vyakula vyenye ladha nzuri vikaamsha vionja-ladha vyao katika ulimi, nyimbo za ndege ziliimbia masikio yao. Zaidi ya hilo, wao walikuwa na kazi ya kupendeza ya kutunza bustani hiyo, kuongeza na baraka ya kuijaza dunia wazao wakamilifu. Lakini wao walikuwa na ubinafsi. Vitu ambavyo Mungu alikuwa amewapa havikutosha. Wao walitaka zaidi. Walitaka kujiamulia wenyewe yaliyofaa na yasiyofaa. Kwa hiyo wao walifanya hivyo, na uamuzi ule ule wa kwanza waliofanya ulikuwa wenye balaa, ukatokeza hasara ya kila kitu, kwao wenyewe na kwa wazao wao.—Mwanzo 3:1-7, 16-19.

5. Yehova alibariki Waisraeli kwa kitu gani, na itikio lao lilikuwa nini?

⁵ Waisraeli waliiga mfano wao mbaya. Mungu aliwakomboa wao kutoka utumwani Misri, akawafanya taifa, akawapa Sheria kamilifu, akawaongoza katika safari zao za jangwani, akawaandalia nguo ambazo hazikuchakaa kamwe, na akawalisha kimwujiza kwa mana ambayo ilianguka kutoka mbinguni na kwa maji yaliyobubujika kutoka mwamba fulani. Lakini wao hawakutosheka na maandalizi ya Yehova. (1 Wakorintho 10:1-5) Walipokuwa wakisafiri kupitia jangwani, wao walilalamika tena na tena.—Kutoka 13:21, 22; Hesabu 11:1-6; Kumbukumbu 29:5.

6. Ni mwendo gani ambao ulileta uharibifu juu ya Waisraeli wakiwa taifa?

⁶ Bado wao waliguna-guna baada ya kuthibitishwa katika Nchi ya Ahadi—nchi yenye rutuba na maji mengi “ijaayo maziwa na asali.” Bado wakiwa hawana shukrani, bado wakiwa hawatosheki na maandalizi ya Yehova, wao waliacha ibada yake, wakageukia ibada ya sanamu ya kuabudu ngono, wakadhabihu watoto wao kwa Moleki, na wakaleta uharibifu juu yao wenyewe wakiwa taifa. Waliporudishwa kutoka utekwa wa Kibabuloni, wao walifuata mapokeo ya mdomo yaliyofanya Neno la Mungu liwe bure. Walimalizia kwa kuua Masihi wao aliyeahidiwa, Kristo Yesu.—Kumbukumbu 6:3; 8:7-9; Waamuzi 10:6; 1 Wafalme 14:22-24; 2 Wafalme 21:1-16; Isaya 24:1-6; Mathayo 15:3-9; 27:17-26.

7. Viongozi wa kidini wa leo wa Jumuiya ya Wakristo wameendelea jinsi gani katika mwendo ule ule kama makuhani wasio waaminifu wa wakati wa Malaki?

⁷ Mpaka siku hii wanadamu kwa ujumla wameendelea kupendelea itikadi za kidini zisizo za kweli. Viongozi wa kidini wanadharau jina la Yehova, bila hata kulitumia. Wao wanamvunjia yeye heshima kwa mafundisho yasiyo ya Kimaandiko kama vile Utatu, nafsi isiyokufa, na mateso ya milele katika moto. Mafundisho yao si kwamba tu yamechafuliwa na mambo yasiyo ya kweli yaliyotolewa katika Babuloni na Misri za kale bali pia, katika visa vingi, yametiwa sumu kwa kukana ukombozi wa Kristo na kukubali nadharia ya mageuzi. Wao wanamnyang’anya Yehova sifa yake anayostahili, sawasawa na walivyofanya makuhani katika siku za Malaki.—Malaki 1:6-8; 3:7-9.

8. (a) Ni mwaliko gani ambao makuhani wa siku za Malaki na viongozi wa kidini wa leo wanakataa? (b) Ni nani aliyeitikia mwaliko huo, na kwa tokeo gani?

⁸ Kule nyuma Waisraeli walitiwa moyo wajisafishe wenyewe na kumrudia Yehova. “Nirudieni mimi, nami nitawarudia ninyi,” Yehova akasema. Yeye aliwaalika zaidi hivi: “Mkanijaribu kwa njia hiyo, asema BWANA [Yehova, NW] wa majeshi; mjue kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha.” (Malaki 3:7, 10) Ni mabaki tu ya taifa la Kiyahudi yaliyorudi; leo, mabaki waaminifu wa Israeli wa kiroho wametoka katika dini zisizo za kweli za ulimwengu huu. Wao, pamoja na mkutano mkubwa unaoongezeka wa waabudu wengine walio mfano wa kondoo, wanasifu Yehova wakiwa Mashahidi wake. (Yohana 10:16) Yehova ametimiza ahadi yake kwao, na ‘amefungua madirisha ya mbinguni na kuwamwagia baraka ikawa haipo nafasi ya kutosha’—karamu kweli kweli ya chakula cha kiroho!—Isaya 25:6.

Chakula cha Kiroho kwa Wingi

9. Ni maandalizi gani ya kiroho yanayopatikana leo, kwa njia gani, na kwa tokeo gani?

⁹ “Mtumwa mwaminifu mwenye akili” ambaye Yesu alitabiria siku zetu anaandaa chakula cha kiroho kwa wingi akiwa na shughuli nyingi. (Mathayo 24:45) Mwaka uliopita tu, katika nchi na visiwa vya bahari 208, na katika lugha zapata 200, Mashahidi wa Yehova zaidi ya milioni tatu walifanya maandalizi ya kiroho hayo yapatikane kupitia ziara za nyumba kwa nyumba na ugawaji wa mamia ya mamilioni ya vitabu, magazeti, na Biblia. Wengi walishiriki chakula hiki cha kiroho na wakatosheka: wapya zaidi ya 225,000 walibatizwa katika mwaka mmoja!

10. Ni maandalizi gani yanayopatikana ili kutii onyo la upole la Paulo kukusanyika pamoja?

¹⁰ Maandalizi ya kiroho ya Yehova yamefanywa yapatikane pia kwa njia ya mikusanyiko ya wilaya, makusanyiko ya mizunguko, na mikutano ile mitano ya kila juma inayofanywa kwa ukawaida katika makundi yapata 52,000 ya Mashahidi wa Yehova—yote hayo yakiwa ni kwa kutii onyo la upole la Paulo kwenye Waebrania 10:25 “tusiache kukusanyika pamoja.”

11. Ni nini kinachoitolea mfano njia yenye kutamanika ya kutayarishwa kwa chakula cha kiroho?

¹¹ Wakati mwanamke anapoalika wageni kwenye mlo, yeye hachemshi tu kipande cha nyama na kukiangusha po juu ya sahani. Yeye anatumia viungo na michuzi kuongeza mikolezo yenye kuamsha hamu na kuitia-tia madoido ya kuvuta macho. Kule tu kuonekana na kunukia kwa nyama hiyo kunatosha kudondosha mate kinywani na umajimaji wa tumboni. Hivyo ndivyo maandalizi ya kiroho ya Yehova yametayarishwa—si kwa namna isiyovutia, ya chapwachapwa, bali kwa njia yenye ladha ya kuipendeza akili na kuugusa moyo. Kila Mkristo mmoja mmoja anapaswa afuate mfano huo. “Je! sikio silo lijaribulo maneno, kama vile kaakaa lionjavyo chakula?”—Ayubu 12:11.

12. Ni mifano gani tuliyo nayo juu ya chakula cha kiroho kikitayarishwa kwa njia yenye kuamsha hamu

¹² Kiongozi cha Shule ya Huduma ya Kitheokrasi kinakazia kutumia maneno yenye upendezi katika somo lacho la kwanza. Sulemani alitumia si maneno sahihi tu bali yaliyo na upendezi pia. (Mhubiri 12:10) Zaburi 45:2 (NW) ilitabiri hivi juu ya Masihi, Yesu Kristo, “upendezi umemiminwa juu ya midomo yako.” Ndivyo ilivyothibitika kuwa. Wasikiaji wake waliyastaajabia “maneno ya kuvutia yenye kutoka katika kinywa chake.” Wao waliendelea kukaa-kaa karibu naye ili wamsikie, wakaja mapema kwenye hekalu ili wamsikie, wakamsikiliza yeye kwa furaha, wakashangazwa sana na njia yake ya kufundisha. Maafisa waliotumwa wakamkamate walitangaza hivi: “Hajanena kamwe mtu ye yote kama huyu anavyonena.” (Luka 4:22, NW; 19:48; 21:38; Marko 12:37; Mathayo 7:28; Yohana 7:46, UV) Kiongozi kiliandaliwa kutusaidia sisi tuseme maneno ya ukweli yaliyo na upendezi. Je! wewe unakitumia kwa ukamili?

13. Ni jinsi gani Waefeso 5:15-17 ilivyo na mkazo kuhusu ‘kununua kabisa wakati,’ na kwa sababu gani jambo hilo linakaziwa?

¹³ Waefeso 5:15-17 (NW) inatuonya kwa upole hivi: “Endeleeni kulinda kwa uangalifu sana kwamba jinsi mnavyotembea si kama wasio na hekima bali kama watu walio na hekima, kununua kabisa wakati unaofaa kwa ajili yenu wenyewe, kwa sababu siku ni zenye uovu. Kwa sababu hiyo acheni kuwa wajinga, bali endeleeni kufahamu yaliyo mapenzi ya Yehova.” Neno la Kigiriki lililotafsiriwa hapa “wakati” halimaanishi wakati katika maana ya ujumla tu bali linaonyesha wakati uliowekwa rasmi, wakati unaofaa majira fulani kwa kusudi fulani la waziwazi. Kitenzi cha Kigiriki kilichotafsiriwa “kununua kabisa” ni ile namna ya kutilia sana mkazo jambo linalotendwa, na “utumizi unaolihusu hapa labda unamaanisha ‘kununua sana sana’; yaani kudaka kila nafasi inayokuja.”a Je! wewe unadaka wakati kutokana na ratiba yako ili ujifanye mwenye hekima kwa kuyashiriki maandalizi ya kiroho ya Yehova? Inakupasa ufanye hivyo. Sisi sote tunapaswa kufanya hivyo. Kwa sababu gani? “Kwa sababu siku ni zenye uovu.”

Kutoka Kwenye Jangwa la Kiroho Kuja Kwenye Paradiso ya Kiroho

14. Ni mstari gani wa Biblia unaotumikia kama mfano wa jambo gani la New World Translation Reference Bible yetu ya Kiingereza?

¹⁴ Uandalizi mmoja wa kiroho unaotokeza ni Biblia yetu ya New World Translation of the Holy Scriptures—With References, iliyotolewa katika 1984. Ina mambo mengi ambayo yanafanya iwezekane kutumia ‘wakati ulionunuliwa kabisa’ kuongezea maarifa yetu.b Mfano mmoja ni marejezo-milinganisho yaliyomo. Chukua Zaburi 1:3, NW, inayoshughulika na hali ya mtu ambaye anatafakari juu ya sheria ya Mungu mchana na usiku. Mstari huo unasomwa hivi: “Yeye kwa uhakika atakuwa kama mti uliopandwa kando-kando ya vijito vya maji, ambao unatoa tunda lao wenyewe katika majira yao na ambao majani yao hayanyauki, na kila jambo ambalo yeye anafanya litafanikiwa.” Kuna mengi zaidi, mengi zaidi sana, kuhusiana na mstari huo kuliko yale yanayoonwa na jicho la msomaji mwenye kusoma kwa haraka tu na kupita.

15. Ni maswali gani yanayotokezwa juu ya ule mti wa Zaburi 1:3, na ni uangaziaji gani ambao Isaya 44:4 anatoa?

¹⁵ Tafadhali angalia: Mti ule unapandwa. Ni nani aliyeupanda? Mti huo uko kando-kando ya vijito, katika mtajo wa wingi. Je! mti mmoja unakua katika kingo za vijito kadha? Sivyo. Kwa hiyo uwe mdadisi. Kwani mti huo unahusiana na nini hasa? Ile mitajo-milinganisho inayafungua macho ya akili yetu. Hiyo ni Isaya 44:4, 61:3 na Yeremia 17:8. Isaya 44:4 inasema kwamba watu wake watakuwa kama miti “kando-kando ya mitaro ya maji.” Mitaro ya maji ati? Naam, ndiyo! Vijito vile ni mitaro ya unyunyizaji ambayo inatilia maji shamba la miti ya matunda!

16. Ni ubainifu gani zaidi unaotolewa na Isaya 61:3 na Yeremia 17:8?

¹⁶ Isaya 61:3 inaita baadhi ya miti hiyo “miti mikubwa ya uadilifu, ule mpando wa Yehova, ili yeye arembeshwe.” Yehova ndiye anayeipanda na kuitilia maji, na yeye ndiye anayerembeshwa na matunda ambayo miti hiyo inazaa! Yeremia 17:8 inamfananisha mtu ambaye anatafakari juu ya sheria ya Mungu mchana na usiku na “mti uliopandwa kando-kando ya maji, ambao unapeleka nje mizizi yao pale pale kando-kando ya mfereji-maji; na yeye hataona wakati joto linapokuja, bali majani yake kwa kweli yatathibitika kuwa yenye kusitawi sana. Na katika ule mwaka wa ukame yeye hatakuwa mwenye wasiwasi, wala yeye hataondoka kwenye utokezaji tunda.” Majani ya mti huo hayanyauki; kila jambo ambalo unafanya linafanikiwa!

17. Ni picha gani ambayo sasa inazuka kuhusu Zaburi 1:3, na ni fungu gani ambalo sisi tunatimiza katika hiyo?

¹⁷ Sasa magamba ya kutoona vizuri yanaanguka kutoka macho yetu! Zaburi 1:3 inafafanisha picha ya kupendeza. Wale ambao wanatafakari juu ya sheria ya Yehova mchana na usiku ni kama miti iliyopandwa kando-kando ya chanzo kisichoisha cha maji. Sasa wao si sehemu yo yote ya matengenezo ya kilimwengu yenye ukavu wa kiroho bali sasa wanashirikiana na tengenezo la Mungu linalopelekewa kwa wingi yale maji yanayoburudisha ya ukweli. Kweli kweli, wao wamo katika paradiso ya kiroho, wanaburudishwa kiroho, na wanazaa tunda la kiroho kwa sifa ya Yehova. Na ebu fikiri! Mungu anatumia Mashahidi wake kuelekeza watu watoke kwenye matengenezo ya kilimwengu yenye ukavu na joto kali waje kwenye paradiso hii ya kiroho inayoburudisha, yenye maji ya kutosha.

18. Watu fulani wanaitikia jinsi gani wakati wao wanapoona wengine wakiwazidi katika kutoa ushuhuda, na kwa sababu gani huenda wao wakapungukiwa?

¹⁸ Ili kutimiza kazi hiyo kwa matokeo mazuri, ni lazima sisi tutie akili na mioyo yetu nidhamu ili itumie maandalizi yote ya kiroho ya Yehova. Watu fulani wanasikia wengine wakieleza maandiko ya Biblia halafu wanasema: “Laiti mimi ningeijua Biblia kama ndugu yule!” Lakini ikiwa watu hao watajitia nidhamu wenyewe kujifunza Biblia, wao pia wanaweza kuongezeka katika maarifa ya Biblia. Watu fulani wanasikia.wakitoa ushuhuda kwenye milango halafu wanasema: “Laiti mimi ningeweza kutoa ushuhuda kwenye milango jinsi dada yule anavyofanya!” Lakini ikiwa wao watajitia nidhamu wenyewe kushiriki mara nyingi katika utumishi wa shambani, wakikitumia kitabu Reasoning From the Scriptures wao pia wanaweza kuwa Mashahidi wenye ustadi mwingi zaidi. Watu fulani wamesikia wengine wakitoa hotuba za Biblia halafu wanasema: “Laiti mimi ningeweza kutoa hotuba jinsi ndugu yule anavyofanya.” Lakini, tena, ikiwa watu hao watajitia nidhamu wenyewe kutayarisha vizuri migawo yao ya kusema, wakifyonza yale masomo ya Kiongozi cha Shule ya Huduma ya Kitheokrasi, wao pia watafanya maendeleo katika uwezo wa kusema.

19. Ni nini ufunguo wa kukuza mawezekano yetu ya kutoa ushuhuda?

¹⁹ Sasa, ni sawa kuona laiti ingekuwa, lakini kuona laiti ingekuwa bila kutenda kazi hakufanyi kazi ile ifanyike. Kazi ndiyo inayofanya kule kuona laiti ingekuwa kutimilike. Jitie mwenyewe nidhamu ununue kabisa ule wakati, na ufanye ile kazi inayofanya kule kuona laiti ingekuwa kutimilike. Ikiwa wewe hutumii msuli fulani, huo utapotewa na nguvu. Ikiwa wewe hutumii ustadi fulani, huo utafifia uishe. Ikiwa wewe hutumii akili yako, uwezo wa kufikiri utanyauka. Ikiwa wewe hutumii maarifa, wewe utapoteza yale uliyo nayo. Katika kila kisa, kanuni ni, “Kitumie au kipoteze.” Ni ‘kupitia utumizi kwamba zile nguvu za ufahamivu zinazoezwa.’ Ndipo ‘uwezo wa kufikiri wenyewe utaendelea kukupa wewe kinga, utambuzi wenyewe utakupa wewe kinga salama.’—Waebrania 5:14; Mithali 2:11, NW.

20. Kwa kutumia kwa faida maandalizi ya kiroho ya Yehova, sisi tutaepuka nini, na tutapata nini?

²⁰ Kwa hiyo tumia maandalizi ya kiroho ya Yehova. Furahi sana pamoja na wenye kuridhika. Kimbia ile njaa ambayo Amosi alitabiri: “Angalia, siku zinakuja, asema Bwana MUNGU [Yehova, NW], ambazo nitaleta njaa katika nchi; si njaa ya kukosa chakula, wala kiu ya kukosa maji, bali ya kukosa kuyasikia maneno ya BWANA [Yehova, NW].” (Amosi 8:11) Gawana pamoja na wale wanaokula na kufurahi sana, si wale wanaokataa chakula kile na kupata aibu: “Hili ndilo Bwana Mwenye Enzi Kuu Yehova amesema: ‘Tazama! Watumishi wangu wenyewe watakula, lakini ninyi wenyewe mtaenda njaa. Tazama! Watumishi wangu mwenyewe watakunywa, lakini ninyi wenyewe mtaenda kiu. Tazama! Watumishi wangu mwenyewe watafurahi sana, lakini ninyi wenyewe mtapata aibu.”—Isaya 65:13, NW.

[Maelezo ya Chini]

Je! Wewe Unakumbuka

◻ Ni jinsi gani taifa la Israeli lilivyoonyesha ukosefu walo wa kuridhika na maandalizi ya Yehova?

◻ Ni jinsi gani Malaki 3:10 imetimizwa juu ya Mashahidi wa Yehova?

◻ Ni nini maana iliyo chini-chini ya Zaburi 1:3.

◻ Kwa sababu gani ni jambo la maana kabisa kufanya utumizi wa mambo ambayo tumejifunza kupitia maandalizi ya kiroho ya Yehova?

[Picha katika ukurasa wa 15]

Wale ambao wanatafakari juu ya sheria ya Yehova ni kama miti iliyopandwa kando-kando ya chanzo kisichokwisha cha maji