Sura 16
“Mkutano Mkubwa” Sasa Wachukua “Njia Kuu” Kuelekea Tengenezo la Mungu
1, 2. Isaya sura ya 35 inakuwa na utimizo wakati gani, na mistari miwili ya kwanza inatoa maelezo gani?
WAKATI wa utawala wa Mileani wa “Mwana-Mfalme wa Amani,” sehemu nyingi za Isaya sura 35, ambazo sasa zinatimizwa kabla ya uharibifu wa Babuloni Mkuu, zitatimizwa katika maana halisi juu ya wanadamu. Kwa kuwa yale yatakayokuwa yametimizwa katika njia ya kiroho bila shaka yatatimizwa katika njia ya kimwili. Utimizo mkubwa wa kiroho wa unabii huo unatukia sasa hivi, kwa kurudishwa kwa watumishi wa Mungu kutoka utekwa katika Babuloni Mkuu. Nabii Isaya aliueleza kwa usemi huu mzuri sana:
2 “Nyika na mahali palipo ukiwa patafurahi; jangwa litashangilia na kuchanua maua kama waridi. Litachanua maua mengi, na kufurahi, naam, kwa shangwe na kuimba; litapewa uzuri wa Lebanoni, utukufu wa Karmeli na Sharoni; watauona utukufu wa [Yehova].”—Isaya 35:1, 2.
3. Huko nyuma katika karne ya sita K.W.K., nchi isiyozaa ilikuwa wapi, na ingeweza kushangiliaje?
3 Ni wapi ilipokuwa nyika na mahali palipo ukiwa na jangwa? Katika karne ya sita K.W.K., palikuwa katika eneo la ufalme wa Yuda. Kufikia 537 K.W.K., nchi hiyo ilikuwa imekuwa ukiwa na bila wakazi kwa miaka 70. Lakini nyika ingeweza kushangiliaje? Ingekuwa lazima kuirudishia wale ambao hapo kwanza walikuwa wakaaji wayo. Ingeinuliwa kutoka hali yayo ya chini na kupewa utukufu wa ile milima mirefu ya Lebanoni yenye kuvutia.
Kutokeza Shamba la Edeni la Mfano
4, 5. (a) Katika nyakati za kisasa, ni wakati gani mgeuzo kama huo wa nchi kama hiyo iliyoachwa ulitukia, na kwa sababu gani? (b) Shughuli za kurudisha hali nzuri ya yale mabaki wapakwa mafuta zilileta matokeo gani? (c) Unabii wa Isaya 35:5-7 ulielezaje hali yao ya kiroho iliyofanywa upya?
4 Mlingano wa kisasa katika maana ya kiroho, wa mgeuzo huo wa nchi kutoka kwa hali inayoonyesha kwamba Mungu ameiacha na kuwa na hali inayoshuhudia kurudishwa kwa kibali cha Yehova ulianza kutukia 1919. Watu wa Yehova waliorudishwa waliazimia kutumia kwa faida kamili kipindi cha amani kilichokuwa kimeanza. Koreshi Mkubwa Zaidi, Yesu Kristo, na Baba yake, Yehova Mungu, waliwapa mgawo mabaki ya Waisraeli wa kiroho yaliyokombolewa kwa kufanya kazi kubwa iliyolingana na kujengwa upya hekalu la Yehova kukifanywa na mabaki ya Israeli wa kale waliorudishwa kwao baada ya 537 K.W.K. Shughuli za kurudisha hali nzuri baada ya 1919 zilikuwa na matokeo ya kutokeza shamba la Edeni la mfano.
5 Hilo lilikuwa limetabiriwa katika maneno haya ya Isaya 35: “Ndipo macho ya vipofu yatafumbuliwa, na masikio ya viziwi yatazibuliwa. Ndipo mtu aliye kilema ataruka-ruka kama kulungu, na ulimi wake aliye bubu utaimba; maana katika nyika maji yatabubujika; na vijito jangwani. Na mchanga ung’aao mfano wa maji utakuwa ziwa la maji, na nchi yenye kiu itakuwa chemchemi za maji; katika makao ya mbweha, walipokuwa wamelala, patakuwa na majani, pamoja na mianzi na manyasi.”—Isaya 35:5-7.
6. Kuendelea kuwako kwa Edomu wa kisasa hakukuzuia nini, na ni nani leo wanaoshangilia pamoja na mabaki yaliyorudishwa?
6 Kuwako kwa Edomu wa mfano wa kisasa hakukuzuia kurudishwa kwa Israeli wa kiroho kwenye hali ya paradiso katika kutimiza Isaya sura ya 35. Kwa hiyo Waedomu wa kisasa hawana sababu ya kufurahi kama wanavyofanya mabaki yaliyorudishwa ya Israeli wa kiroho, pamoja na “mkutano mkubwa.” Huo “mkutano mkubwa” unashiriki sehemu kubwa katika kuiendeleza paradiso ya kiroho ya Mashahidi wa Yehova wa kisasa.
7. Macho ya ufahamu ya mabaki hayakuwa yamepata kamwe kuona nini kabla ya 1914, lakini je! macho yao yenye ‘upofu’ yalifumbuliwa?
7 Kabla ya mwisho wa Majira ya Mataifa macho ya ufahamu ya Waisraeli wa kiroho hayakuwa yamefumbuliwa kamwe kuona kwamba ile taabu ya ulimwengu ambayo ingetokea 1914 ingekoma kukiwa bado na mabaki yao hapa duniani. Wala hawakuona kwamba wao pamoja na “mkutano mkubwa” wa “kondoo wengine” wangependelewa kuwa na pendeleo la kutoa ushuhuda wa uliwenguni pote juu ya Ufalme wa Mungu wa Kimasihi uliosimamishwa. Hivyo ilitukia kwamba 1919 macho yaliyokuwa na upofu wa kiroho ya mabaki yalifumbuliwa, nayo ni maono yaliyoje ya wakati ujao ulio karibu ambayo macho hayo yalifumbuliwa kuona!
8. Ile mikusanyiko miwili ya Seda Pointi, Ohaiyo, ilikuwa na matokeo gani juu ya macho na ndimi za kiroho za mabaki yaliyorudishwa?
8 Kwenye mikusanyiko yao katika Seda Pointi, Ohaiyo, 1919 na 1922, walipokea dokezi fulani juu ya kazi iliyokuwa mbele yao. Walijifunga wajibu waifanye kazi iliyokuwa mbele yao. Masikio yao ya kiroho yalizibuliwa yasikie ujumbe wenye kusisimua wa Ufalme wa Mungu na uhitaji wa kuutangaza. Kama kulungu, waliruka-ruka wakatumike wakiwa watoaji wa ushuhuda kwa ajili ya Ufalme huo ambao umeombwa kwa muda mrefu sana. Ndimi zao, ambazo kufikia hapo zilikuwa kimya, ziliimba kwa furaha juu ya Ufalme wa Kimasihi uliokuwa ukitawala katika mbingu.—Ufunuo 14:1-6.
9. Kwa njia ya kiroho, ilikuwaje kwamba maji yalibubujika nyikani?
9 Ndiyo, ilikuwa kana kwamba maji yalikuwa yamebubujika katika nchi ya kiroho ambayo hapo kwanza ilikuwa imekauka na kukaa ukiwa, hivi kwamba sasa kila kitu kikaonekana kijani kibichi kukawa na mimea mingi mibichi-mibichi—tayari kutoa mazao mengi. Si ajabu kwamba watu wa Yehova waliorudishwa walifurahi sana sana wakahisi ni wenye nguvu kama kulungu ambaye hupanda kwa nguvu nyingi vileleni! Kweli kweli, yale maji ya ukweli juu ya Ufalme wa Mungu, uliosimamishwa 1914, ukiwa mikononi mwa Yesu Kristo yalibubujika kwa kani yenye kuongezeka, yakitokeza burudisho kubwa sana.—Isaya 44:1-4.
“Njia Kuu” ya Utakatifu
10, 11. (a) Badiliko hilo lenye kuburudisha lilimaanisha nini? (b) Mabaki yalipitia njia gani kufika kwenye paradiso yao ya kiroho, na Isaya 35:8, 9 inaielezaje?
10 Yote hayo yaliyotangulia yanaonyesha nini? Hili: Kwanza mabaki na baadaye “mkutano mkubwa” wa “kondoo wengine” wametoka katika Babuloni Mkuu na wamefanywa kuwa mashahidi wa Ufalme wa Mungu. Lakini wangefuata njia gani kurudi kwenye kibali cha kimungu na kuingizwa kwenye hii paradiso ya kiroho? Ingekuwa kana kwamba barabara pana, yenye nafasi kubwa ilifunguliwa kuruhusu vikundi vya Waisraeli wenye roho ya upainia wapige miguu pamoja kwa umoja kuelekea nchi ya nyumbani kwao waliyopewa na Mungu. Unabii wa Isaya wenye kujaa furaha unaonyesha hilo:
11 “Na hapo patakuwa na njia kuu, na njia, nayo itaitwa, Njia ya [Utakatifu]; wasio safi hawatapita juu yake; bali itakuwa kwa ajili ya watu hao; wasafirio, wajapokuwa wajinga, hawatapotea katika njia hiyo. Hapo hapatakuwa na simba, wala mnyama mkali hatapanda juu yake.”—Isaya 35:8, 9.
12. Je! mwisho wa Vita ya Ulimwengu ya Kwanza uliwafungulia mabaki “njia kuu” mara moja, na ni jambo gani lilitukia siku ya nne ya mwaka wa 1919?
12 Mwisho wa Vita ya Ulimwengu ya Kwanza haukufungua mara moja “njia kuu” ya kisasa. Wafanya kazi wanane wa makao makuu ya Sosaiti ya Mnara wa Mlinzi walikuwa wangali gerezani na kazi ya kutoa ushuhuda ilikuwa imepunguzwa mwendo vibaya zaidi. Januari 4, 1919, kwenye mkutano wa kila mwaka wa Sosaiti ya Mnara wa Mlinzi huko Pittsburgh, Pennsylvania, J. F. Rutherford, msimamizi wa Sosaiti, alirudishwa kwenye cheo chake kwa kura, ajapokuwa gerezani, kwa uhakika wa kwamba yeye alikuwa mtumishi asiye na hatia wa Mungu Aliye Juu Zaidi Sana.
13, 14. Ni matukio gani katika 1919 yanaonyesha kwamba njia kuu ya mfano ilikuwa imefunguliwa kwa mabaki, na ni nani waliotembea katika hiyo “njia kuu”?
13 Machi 25, 1919, yeye pamoja na wafungwa wenzake saba walifunguliwa na baadaye wakaondolewa mashtaka kabisa. Mnara wa Mlinzi wa Septemba 15, 1919, ukurasa 283, ulikuwa na habari zenye kutia moyo kwamba, kuanzia Oktoba 1, 1919, afisi za Sosaiti, zingehamishwa kutoka Pittsburgh na kurudishwa Betheli ya Brooklyn katika barabara ya 124 Columbia Heights. Ndipo, kwa toleo la Desemba 15, 1919 la Mnara wa Mlinzi, kichapo hiki kinachotolewa mara mbili kwa mwezi kilitangaza kuwa kinachapwa tena huko Brooklyn, New York.
14 Hivyo ikawa kwamba 1919 watumishi wa Mungu wenye furaha walifunguliwa njia kuu ya mfano. Wale waliotaka kuwa watakatifu machoni pa Yehova ndio waliotembea juu ya “hiyo njia kuu,” ile “Njia ya [Utakatifu].” Ye yote ambaye hakuwa na lengo linalofaa, msukumo safi, hakuanza kutembea katika hiyo “Njia ya [Utakatifu]” ya mfano na kufikia kurudishwa kwenye kibali cha kimungu.
15. Ni jambo gani linalotoa ushuhuda wenye kuonekana kwamba ule “mkutano mkubwa” umeingia katika njia kuu ya mfano?
15 Juni 1, 1935, kwenye mkusanyiko katika Washington, D.C., 840 wa ule “mkutano mkubwa” walibatizwa katika maji, wakitoa ushuhuda wenye kuonekana kwamba walikuwa wameanza kuingia katika “njia kuu.” Sasa, mamilioni yenye kuongezeka yao, yameingia katika hiyo njia kuu, yakijiunga na ile hesabu inayopunguka ya mabaki wapakwa mafuta. Kwa amani na katika uhusiano wa kirafiki wenye furaha, sasa wanatembea pamoja katika “njia kuu,” wakiwa wameazimia kwamba, kwa msaada wa Mungu Mwenye Nguvu Zote mbinguni, hakuna kitu kitakachovunja umoja wao.
16. Kusema kwa jinsi ya mfano, inakuwaje kwamba hakuna simba wala mnyama mwingine mkali katika hii njia kuu?
16 Kusema kwa jinsi ya mfano, hakuna simba wala mnyama mwingineye yote mkali angepatikana katika hii njia kuu. Ndiyo kusema, hakuna kitu kingewazuia au kuwaogopesha wale mabaki wapakwa mafuta na ule “mkutano mkubwa.” Walianza kutembea wakiwa na uhakika katika ile njia ambayo Mkombozi wao, Koreshi Mkubwa Zaidi, aliwafungulia, sasa wakielekea Sayuni.
17. (a) Ingawa tumeingia ndani-ndani sana ya ule “umalizio wa mfumo wa mambo,” je! ile “njia kuu” ingali wazi? (b) Ni nani wanaoingia katika “Njia ya [Utakatifu],” nao wamefanyaje hivyo?
17 Leo, tukiwa tumeingia ndani-ndani sana ya ule “umalizio wa mfumo wa mambo,” hiyo “njia kuu” iliyotolewa na Mungu ingali wazi. Halaiki za watu wenye kuthamini wanaitikia juu ya habari ya kwamba Babuloni Mkuu ameangushwa na shambulio la Koreshi Mkubwa Zaidi, Yesu Kristo. Nao wanamkimbia, na kuingia katika njia ya paradiso ya kiroho, “Njia ya [Utakatifu].”—Yeremia 50:8.
18. Mstari wa mwisho wa Isaya 35 unaelezaje hali ya sasa ya mashahidi waaminifu wa Yehova, nazo shukrani zinamwendea nani kwa utimizo wa unabii huo?
18 Wanafikia furaha na shangwe isiyoelezeka, kama unavyosema ule mstari wa kufunga sura ya 35 ya Isaya: “Na hao waliokombolewa na [Yehova] watarudi, watafika Sayuni wakiimba; na furaha ya milele itakuwa juu ya vichwa vyao; nao watapata kicheko na furaha, huzuni na kuugua zitakimbia.” Huzuni yao na kuugua kwa sababu wakati mmoja walikuwa hawapatani na Yehova Mungu vimekimbia tangu mwaka wa 1919. Na huzuni na kuugua hazijawarudia mashahidi wenye furaha na waaminifu, wa Yehova. Shukrani zimwendee Mungu Yehova, mwenye kusema kweli, ambaye kwa kusifika sana ametimiza unabii huo wenye kuchangamsha sana wa Isaya sura ya 35!