Mashahidi Wakristo kwa Ajili ya Enzi Kuu ya Kimungu
“Mpate kuzitangaza fadhili zake yeye aliyewaita mtoke gizani mkaingie katika nuru yake ya ajabu.”—1 PETRO 2:9.
1. Ni ushahidi gani wenye matokeo uliotolewa juu ya Yehova katika nyakati za kabla ya Ukristo?
KATIKA nyakati za kabla ya Ukristo, mashahidi wengi walitoa ushuhuda kwa ujasiri kwamba Yehova ndiye Mungu wa pekee wa kweli. (Waebrania 11:4–12:1) Wakiwa na imani yenye nguvu, wao walitii bila hofu sheria za Yehova na kukataa kuridhiana katika mambo ya ibada. Wao walitoa ushahidi wenye nguvu juu ya enzi kuu ya ulimwengu wote mzima ya Yehova.—Zaburi 18:21-23; 47:1, 2.
2. (a) Ni nani aliye Shahidi mkubwa zaidi wa Yehova? (b) Ni nani waliochukua mahali pa taifa la Israeli wakiwa mashahidi wa Yehova? Twajuaje?
2 Shahidi wa mwisho wa nyakati za kabla ya Ukristo na aliye pia mkubwa zaidi ya wote ni Yohana Mbatizaji. (Mathayo 11:11) Alipata pendeleo la kutangaza kuja kwa Yule Mchaguliwa, naye alimtambulisha Yesu kuwa Mesiya aliyeahidiwa. (Yohana 1:29-34) Yesu ni Shahidi mkubwa zaidi wa Yehova, “sha[h]idi aliye mwaminifu na wa kweli.” (Ufunuo 3:14) Kwa sababu Waisraeli wa kiasili walimkataa Yesu, Yehova aliwakataa na kuweka rasmi taifa jipya, Israeli wa kiroho wa Mungu, kuwa shahidi wake. (Isaya 42:8-12; Yohana 1:11, 12; Wagalatia 6:16) Petro alinukuu unabii kuhusu Israeli na kuonyesha kwamba ulihusu “Israeli wa Mungu,” kutaniko la Kikristo, aliposema hivi: “Ninyi ni mzao mteule, ukuhani wa kifalme, taifa takatifu, watu wa milki ya Mungu, mpate kuzitangaza fadhili zake yeye aliyewaita mtoke gizani mkaingie katika nuru yake ya ajabu.”—1 Petro 2:9; Kutoka 19:5, 6; Isaya 43:21; 60:2.
3. Ni nini daraka la msingi la Israeli wa Mungu na la “umati mkubwa”?
3 Maneno ya Petro yaonyesha kwamba daraka la msingi la Israeli wa Mungu ni kutoa ushahidi wa peupe juu ya utukufu wa Yehova. Katika siku yetu, taifa hili la kiroho limeungana na “umati mkubwa,” (NW) wa mashahidi ambao pia hutukuza Mungu peupe. Wao hupaaza sauti ili wote wasikie: “Wokovu una Mungu wetu aketiye katika kiti cha enzi, na Mwana-Kondoo.” (Ufunuo 7:9, 10; Isaya 60:8-10) Israeli wa Mungu na waandamani wao wanaweza kutimizaje ushahidi wao? Kwa imani yao na utii wao.
Mashahidi Bandia
4. Kwa nini Wayahudi wa siku ya Yesu walikuwa mashahidi bandia?
4 Imani na utii wahusu kuishi kwa kanuni za kimungu. Umuhimu wa jambo hilo waonwa katika yale aliyoyasema Yesu kuhusu viongozi wa kidini wa Kiyahudi wa siku yake. Hawa “wameketi katika kiti cha Musa” wakiwa walimu wa Sheria. Hata walituma wamishonari kuongoa watu wasioamini. Lakini, Yesu aliwaambia: “Mnazunguka katika bahari na nchi kavu ili kumfanya mtu mmoja kuwa mwongofu; na akiisha kufanyika, mnamfanya kuwa mwana wa jehanum mara mbili zaidi kuliko ninyi wenyewe.” Watu hawa wa kidini walikuwa mashahidi bandia—wenye kiburi, unafiki, na wasio na upendo. (Mathayo 23:1-12, 15) Katika pindi moja Yesu aliwaambia baadhi ya Wayahudi: “Ninyi ni wa baba yenu, Ibilisi, na tamaa za baba yenu ndizo mpendazo kuzitenda.” Kwa nini alisema jambo hilo kwa washiriki wa taifa lililochaguliwa na Mungu? Kwa sababu wao hawakutii maneno ya Shahidi mkubwa zaidi wa Yehova.—Yohana 8:41, 44, 47.
5. Tunajuaje kwamba Jumuiya ya Wakristo imetoa ushahidi bandia juu ya Mungu?
5 Kwa njia kama hiyo, katika karne zilizopita tangu wakati wa Yesu, mamia ya mamilioni katika Jumuiya ya Wakristo wamedai kuwa wanafunzi wake. Hata hivyo, wao hawajafanya mapenzi ya Mungu na hivyo hawatambuliwi na Yesu. (Mathayo 7:21-23; 1 Wakorintho 13:1-3) Jumuiya ya Wakristo imepeleka wamishonari, ambao wengi wao bila shaka walikuwa wanyoofu. Lakini, walifundisha watu kuabudu mungu wa Utatu achomaye watenda-dhambi katika moto wa helo, na wengi wa watu waliogeuzwa imani hawaonyeshi uthibitisho wa kuwa Wakristo. Kwa mfano, nchi ya Kiafrika ya Rwanda imekuwa eneo zuri zaidi kwa wamishonari wa Katoliki ya Kiroma. Na bado, Wakatoliki Warwanda walishiriki sana katika vita vya kikabila vilivyotokea majuzi katika nchi hiyo. Matunda katika shamba hilo la mishonari yaonyesha kwamba halikupokea ushahidi wa kweli wa Kikristo kutoka kwa Jumuiya ya Wakristo.—Mathayo 7:15-20.
Kuishi kwa Kanuni za Kimungu
6. Ni kwa njia gani mwenendo mzuri ni sehemu muhimu ya kutoa ushahidi?
6 Mwenendo mbaya wa wale wanaodai kuwa Wakristo huletea suto ile “njia ya kweli.” (2 Petro 2:2) Mkristo wa kweli huishi kwa kupatana na kanuni za kimungu. Yeye haibi, hasemi uwongo, hadanganyi, au kufanya tendo la kukosa adili. (Warumi 2:22) Hakika haui kimakusudi jirani yake. Waume Wakristo husimamia familia zao kwa upendo. Wake hutii kwa staha usimamizi huo. Watoto huzoezwa na wazazi wao na hivyo kutayarishwa kuwa watu wazima walio Wakristo wenye kuchukua madaraka. (Waefeso 5:21–6:4) Ni kweli kwamba sisi sote hatujakamilika nasi hufanya makosa. Lakini Mkristo halisi hustahi viwango vya Biblia na kufanya jitihada za kweli kuvitumia. Hilo huonwa na wengine na kutoa ushahidi mzuri. Nyakati nyingine, wale ambao awali walipinga kweli waliona mwenendo mzuri wa Mkristo nao walivutwa.—1 Petro 2:12, 15; 3:1.
7. Ni muhimu kadiri gani kwamba Wakristo wapendane?
7 Yesu alionyesha sehemu muhimu ya mwenendo wa Kikristo aliposema hivi: “Hivyo watu wote watatambua ya kuwa ninyi mmekuwa wanafunzi wangu, mkiwa na upendo ninyi kwa ninyi.” (Yohana 13:35) Ulimwengu wa Shetani umejaa “udhalimu wa kila namna, uovu na tamaa na ubaya; [u]mejawa na husuda, na uuaji, na fitina, na hadaa; watu wa nia mbaya, wenye kusengenya, wenye kusingizia, wenye kumchukia Mungu, wenye jeuri, wenye kutakabari, wenye majivuno, wenye kutunga mabaya, wasiowatii wazazi wao.” (Warumi 1:29, 30) Katika mazingira hayo, tengenezo la ulimwenguni pote lenye kujawa na upendo lingekuwa uthibitisho wenye nguvu nyingi wa roho ya Mungu ikitenda—ushahidi wenye matokeo. Mashahidi wa Yehova ni tengenezo kama hilo.—1 Petro 2:17.
Mashahidi Ni Wanafunzi wa Biblia
8, 9. (a) Mtunga-zaburi aliimarishwaje na funzo lake la Sheria ya Mungu na kuitafakari? (b) Ni katika njia zipi funzo la Biblia na kutafakari zitatusaidia kuendelea kutoa ushahidi?
8 Ili kufaulu katika kutoa ushahidi mzuri, ni lazima Mkristo ajue na kupenda kanuni zenye uadilifu za Yehova na kuchukia kabisa ufisadi wa ulimwengu. (Zaburi 97:10) Ulimwengu ni wenye kushawishi unapoendeleza mawazo yao wenyewe, na roho yao yaweza kuwa ngumu kukinza. (Waefeso 2:1-3; 1 Yohana 2:15, 16) Ni nini kiwezacho kutusaidia kudumisha mtazamo ufaao wa kiakili? Funzo la Biblia la kawaida na lenye umaana. Mwandikaji wa Zaburi 119 alirudia mara nyingi sana upendo wake kwa Sheria ya Yehova. Aliisoma na kuitafakari sikuzote, “mchana kutwa.” (Zaburi 119:92, 93, 97-105) Matokeo ni kwamba yeye angeweza kuandika: “Nimeuchukia uongo, umenikirihi, sheria yako nimeipenda.” Isitoshe, upendo wake wa kina ulimsukuma atende. Asema hivi: “Mara saba kila siku nakusifu, kwa sababu ya hukumu za haki yako.”—Zaburi 119:163, 164.
9 Kwa njia kama hiyo, funzo letu la kawaida la Neno la Mungu na kulitafakari kutagusa mioyo yetu na kutusukuma ‘kumsifu’—kutoa ushahidi kumhusu Yehova—mara nyingi, hata “mara saba kila siku.” (Warumi 10:10) Kwa kupatana na hilo, mwandikaji wa zaburi ya kwanza asema kwamba mtu ambaye hutafakari maneno ya Yehova kwa ukawaida “atakuwa kama mti uliopandwa kandokando ya vijito vya maji, uzaao matunda yake kwa majira yake, wala jani lake halinyauki; na kila alitendalo litafanikiwa.” (Zaburi 1:3) Pia, mtume Paulo alionyesha uwezo wa Neno la Mungu alipoandika: “Kila andiko, lenye pumzi ya Mungu, lafaa kwa mafundisho, na kwa kuwaonya watu makosa yao, na kwa kuwaongoza, na kwa kuwaadibisha katika haki; ili mtu wa Mungu awe kamili, amekamilishwa apate kutenda kila tendo jema.”—2 Timotheo 3:16, 17.
10. Ni jambo jipi lililo wazi kuhusu watu wa Yehova katika hizi siku za mwisho?
10 Ongezeko la kasi la idadi ya waabudu wa kweli katika karne hii ya 20 laonyesha baraka ya Yehova. Bila shaka lolote, wakiwa kikundi, mashahidi hawa wa kisasa kwa ajili ya enzi kuu ya kimungu wamesitawisha upendo kwa sheria ya Yehova mioyoni mwao. Kama mtunga-zaburi, wao husukumwa kutii sheria Yake nao hutoa ushahidi kwa uaminifu “mchana na usiku” kuhusu utukufu wa Yehova.—Ufunuo 7:15.
Matendo Makuu ya Yehova
11, 12. Ni nini lililotimizwa na miujiza iliyofanywa na Yesu na wafuasi wake?
11 Katika karne ya kwanza, roho takatifu iliwapa nguvu mashahidi Wakristo waaminifu wafanye miujiza, iliyotoa uthibitisho wenye nguvu kwamba ushahidi wao ulikuwa kweli. Yohana Mbatizaji alipokuwa gerezani, alituma wanafunzi wake wamwulize Yesu: “Wewe ndiwe yule ajaye, au tumtazamie mwingine?” Yesu hakujibu ndiyo au la. Badala ya hivyo, alisema: “Nendeni mkamweleze Yohana mnayoyasikia na kuyaona; vipofu wanapata kuona, viwete wanakwenda, wenye ukoma wanatakaswa, viziwi wanasikia, wafu wanafufuliwa, na maskini wanahubiriwa habari njema. Naye heri awaye yote asiyechukizwa nami.” (Mathayo 11:3-6) Matendo hayo yenye nguvu yalitumika yakiwa ushahidi kwa Yohana kwamba hakika Yesu alikuwa ndiye “yule ajaye.”—Matendo 2:22.
12 Katika njia hiyo, baadhi ya wafuasi wa Yesu waliponya wagonjwa na hata kuinua wafu. (Matendo 5:15, 16; 20:9-12) Miujiza hiyo ilikuwa kama ushahidi kutoka kwa Mungu mwenyewe kwa niaba yao. (Waebrania 2:4) Na matendo hayo yalionyesha uwezo mkuu wa Yehova. Kwa mfano, ni kweli kwamba Shetani, “mkuu wa ulimwengu,” ana njia za kusababisha kifo. (Yohana 14:30; Waebrania 2:14) Lakini Petro alipofufua mwanamke mwaminifu Dorkasi kutoka kwa wafu, angeweza tu kufanya hivyo kwa uwezo wa Yehova, kwa sababu ni Yeye pekee awezaye kurudisha uhai.—Zaburi 16:10; 36:9; Matendo 2:25-27; 9:36-43.
13. (a) Ni katika njia gani miujiza ya Biblia ingali inatoa uthibitisho wa uwezo wa Yehova? (b) Utimizo wa unabii hutimiza fungu gani muhimu katika kuthibitisha Uungu wa Yehova?
13 Leo, matendo hayo ya kimuujiza hayatukii tena. Kusudi layo lilitimizwa. (1 Wakorintho 13:8) Hata hivyo, tungali tuna rekodi zayo katika Biblia, zilizoshuhudiwa na watazamaji wengi. Leo Wakristo waelekezapo fikira kwenye masimulizi hayo ya kihistoria, matendo hayo yangali yanatoa ushahidi wenye matokeo kwa uwezo wa Yehova. (1 Wakorintho 15:3-6) Kwa kuongezea, huko nyuma katika siku za Isaya, Yehova alitaja unabii sahihi kuwa uthibitisho wenye kutokeza wa kwamba Yeye ndiye Mungu wa kweli. (Isaya 46:8-11) Unabii mwingi wa Biblia uliopuliziwa kimungu unatimizwa leo—hesabu fulani kati yao katika kutaniko la Kikristo. (Isaya 60:8-10; Danieli 12:6-12; Malaki 3:17, 18; Mathayo 24:9; Ufunuo 11:1-13) Pamoja na kutaja kihususa kwamba twaishi katika “siku za mwisho,” utimizo wa unabii huu mbalimbali wamtetea Yehova kuwa ndiye Mungu wa pekee wa kweli.—2 Timotheo 3:1.
14. Ni katika njia zipi historia ya kisasa ya Mashahidi wa Yehova ni ushahidi wenye nguvu kwamba Yehova ndiye Bwana Mwenye Enzi Kuu?
14 Hatimaye, Yehova angali anafanya mambo makubwa, mambo ya ajabu, kwa ajili ya watu wake. Nuru inayoongezeka juu ya kweli ya Biblia inaelekezwa na roho ya Yehova. (Zaburi 86:10; Ufunuo 4:5, 6) Maongezeko yenye kutokeza yanayoripotiwa ulimwenguni pote ni uthibitisho wa kwamba Yehova ‘anayahimiza hayo wakati wake.’ (Isaya 60:22) Mnyanyaso mkali unapofyatuka katika nchi moja baada ya nyingine katika hizi siku zote za mwisho, uvumilivu wa moyo mkuu wa watu wa Yehova umewezekana kwa sababu ya utegemezo wenye kuimarisha wa roho takatifu. (Zaburi 18:1, 2, 17, 18; 2 Wakorintho 1:8-10) Ndiyo, historia ya kisasa ya Mashahidi wa Yehova yenyewe ni ushahidi wenye nguvu kwamba Yehova ndiye Bwana Mwenye Enzi Kuu.—Zekaria 4:6.
Habari Njema za Kuhubiriwa
15. Ni ushahidi gani wenye kuenea ulikuwa utolewe na kutaniko la Kikristo?
15 Yehova aliweka rasmi Israeli kuwa shahidi wake kwa mataifa. (Isaya 43:10) Hata hivyo, ni Waisraeli wachache tu walioamriwa kimungu kwenda kuwahubiri wasio Waisraeli, na mara nyingi hilo lilifanywa ili kutangaza hukumu za Yehova. (Yeremia 1:5; Yona 1:1, 2) Lakini, unabii mbalimbali katika Maandiko ya Kiebrania waonyesha kwamba siku moja Yehova angeelekezea mataifa fikira zake kwa njia kubwa, naye amefanya hivyo kupitia Israeli wa kiroho wa Mungu. (Isaya 2:2-4; 62:2) Kabla ya kupaa mbinguni, Yesu aliamuru wafuasi wake hivi: “Basi, enendeni, mkawafanye mataifa yote kuwa wanafunzi.” (Mathayo 28:19) Ingawa Yesu alikazia fikira “kondoo waliopotea wa nyumba ya Israeli,” wafuasi wake walitumwa kwa “mataifa yote,” hata “mwisho wa nchi.” (Mathayo 15:24; Matendo 1:8) Ushahidi wa Kikristo ulikuwa usikizwe na wanadamu wote.
16. Ni utume gani uliotimizwa na kutaniko la kwanza la Kikristo, na kwa kadiri gani?
16 Paulo alionyesha kwamba alielewa jambo hilo vema. Kufikia mwaka wa 61 W.K., yeye angeweza kusema kwamba habari njema zilikuwa ‘zikizaa matunda na kukua katika ulimwengu wote.’ Habari njema hazikuhubiriwa taifa moja tu au madhehebu moja tu, kama ile iliyojiingiza katika “kuabudu malaika.” Badala ya hivyo, ‘zilihubiriwa katika viumbe vyote vilivyo chini ya mbingu.’ (Wakolosai 1:6, 23; 2:13, 14, 16-18) Hivyo, Israeli wa Mungu katika karne ya kwanza ulitimiza utume wao wa ‘kuzitangaza fadhili zake yeye aliyewaita watoke gizani wakaingie katika nuru yake ya ajabu.’
17. Mathayo 24:14 inaendelea kutimizwaje kwa njia kubwa?
17 Hata hivyo, kazi ya kuhubiri ya karne ya kwanza ilikuwa wonyesho tu wa yale ambayo yangetimizwa katika siku za mwisho. Akitazamia mbele hasa kwa wakati wetu, Yesu alisema: “Habari njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.” (Mathayo 24:14; Marko 13:10) Je, unabii huu umetimizwa? Ndiyo, umetimizwa. Tangu mwanzo mdogo katika 1919, kuhubiriwa kwa habari njema sasa kumeenezwa kwa zaidi ya nchi 230. Ushahidi unasikizwa katika Kaskazini iliyoganda barafu na katika tropiki zenye joto kwelikweli. Mabara makubwa huhubiriwa, na visiwa vya mbali hutafutwa ili wakazi wavyo waweze kupata ushahidi. Hata katikati ya misukosuko mikubwa, kama vile ile vita katika Bosnia na Herzegovina, habari njema huendelea kuhubiriwa. Kama ilivyokuwa katika karne ya kwanza, ushahidi unazaa matunda “katika ulimwengu wote.” Habari njema hutangazwa peupe kwa “viumbe vyote vilivyo chini ya mbingu.” Tokeo limekuwa nini? Kwanza, wasaliao wa Israeli wa Mungu wamekusanywa kutoka “kila kabila na lugha na jamaa na taifa.” Pili, mamilioni ya “umati mkubwa,” (NW) wakaanza kuletwa kutoka “kila taifa, na kabila, na jamaa, na lugha.” (Ufunuo 5:9; 7:9) Mathayo 24:14 yaendelea kutimizwa kwa njia kubwa.
18. Ni yapi baadhi ya mambo yanayotimizwa na kuhubiriwa kwa habari njema ulimwenguni pote?
18 Kazi ya kuhubiri habari njema ulimwenguni pote yasaidia kuthibitisha kwamba kuwapo kwa Yesu kwa kifalme kumeanza. (Mathayo 24:3) Na zaidi, hiyo ndiyo njia kubwa ambayo “mavuno ya nchi” yanavunwa, kwa sababu inaelekeza watu kwa tumaini la pekee la wanadamu, Ufalme wa Yehova. (Ufunuo 14:15, 16) Kwa kuwa ni Wakristo wa kweli pekee wanaoshiriki katika kuhubiri habari njema, kazi hii muhimu husaidia kutofautisha Wakristo wa kweli kutokana na wale bandia. (Malaki 3:18) Kwa njia hii, hiyo hutokeza wokovu kwa wale wanaohubiri na vilevile kwa wale wanaoitikia vizuri. (1 Timotheo 4:16) Jambo la maana zaidi, kuhubiri habari njema humletea Yehova Mungu sifa na heshima, aliyeamuru kwamba kazi hiyo ifanywe, ategemezaye wale wanaoifanya, na kuifanya izae matunda.—2 Wakorintho 4:7.
19. Ni azimio gani Wakristo wote wanatiwa moyo kuwa nalo waingiapo katika mwaka mpya wa utumishi?
19 Si ajabu kwamba mtume Paulo alisukumwa kusema: “Ole wangu nisipoihubiri Injili!” (1 Wakorintho 9:16) Wakristo leo huhisi vivyo hivyo. Ni pendeleo tukufu na daraka kubwa kuwa “wafanya kazi pamoja na Mungu,” tukiangaza nuru ya kweli katika ulimwengu huu wenye giza. (1 Wakorintho 3:9; Isaya 60:2, 3) Kazi iliyokuwa na mwanzo mdogo katika 1919 sasa imefikia kadiri kubwa ajabu. Karibu Wakristo milioni tano wanatoa ushahidi kwa ajili ya enzi kuu ya kimungu wanapotumia zaidi ya muda wa saa bilioni moja kila mwaka ili kuleta ujumbe wa wokovu kwa wengine. Ni shangwe kama nini kushiriki katika kazi hii ya kutakasa jina la Yehova! Tuingiapo katika mwaka wa utumishi wa 1996, na tuazimie kukaza mwendo. Badala ya hivyo, tutatii kuliko wakati mwingine wowote maneno ya Paulo kwa Timotheo: “Lihubiri neno, lifanye kwa hima.” (2 Timotheo 4:2, NW) Tuendeleapo kufanya hivyo, twasali kwa mioyo yetu yote kwamba Yehova ataendelea kubariki jitihada zetu.
Je, Wakumbuka?
◻ Ni nani waliochukua mahali pa Israeli kuwa “shahidi” wa Yehova kwa mataifa?
◻ Mwenendo wa Kikristo huchangiaje kutoa ushahidi?
◻ Kwa nini funzo la Biblia na kuitafakari ni muhimu kwa Shahidi Mkristo?
◻ Ni katika njia gani historia ya kisasa ya Mashahidi wa Yehova inatumika ikiwa uthibitisho kwamba Yehova ndiye Mungu wa kweli?
◻ Ni nini kinachotimizwa na kuhubiriwa kwa habari njema?
[Picha katika ukurasa w15]
Badala ya kuzuiwa, habari njema zinahubiriwa sasa “katika viumbe vyote vilivyo chini ya mbingu”