Upendo Wenye Nguvu Kushinda wa Mama

KWENYE vituo vya njia zinazopita chini ya ardhi, kwenye vyoo, au kwenye mitaa yenye shughuli nyingi, akina mama huwaacha watoto wao wachanga waliozaliwa tu karibuni. Nyakati nyingine, watu wanaookota takataka hata wamepata vitoto vichanga vikiwa vimechoka kulilia mama zao. Kulingana na O Estado de S. Paulo, “visa vya watoto wachanga walioachwa mitaani vinaongezeka.” Bila shaka, mama huyo mchanga aweza kujutia uamuzi huo baadaye. Ingawa hivyo, yeye hufanya hivyo ijapokuwa hilo laweza kumfanya mtoto wake afe.

Huenda ukajiuliza, ‘Yawezekanaje mama hata afikirie kumwacha mtoto wake bila kuwa na wakati ujao ulio hakika?’ Biblia hutumia hali kama hiyo yenye kuhuzunisha kama mfano ili kutofautisha kwa njia kubwa hisia za Muumba wetu kuelekea wale walio wake: “Je! mwanamke aweza kumsahau mtoto wake anyonyaye, hata asimhurumie mwana wa tumbo lake? naam, hawa waweza kusahau, lakini mimi sitakusahau wewe.”—Isaya 49:15.

Kwa kweli, zaidi ya mama yeyote wa kibinadamu, Mungu ana upendo wenye kina kwetu, naye huonyesha hisia kuelekea mahitaji yetu. Uwe kijana au mtu mzima, hata upate tatizo lipi, hauko peke yako. Muumba wako ataka kukusaidia na anapendezwa na hali njema yako. Kwa maneno ya mtunga-zaburi, “Baba yangu na mama yangu wameniacha, bali BWANA atanikaribisha kwake.”—Zaburi 27:10.

Ulimwenguni kote, magazeti ya Mnara wa Mlinzi na Amkeni! huchapishwa ili kuandaa ujuzi wa “Mungu pekee wa kweli,” Yehova, na Mwana wake, Yesu Kristo, ambao waweza kumaanisha uhai udumuo milele kwa wale wanaoutwaa kwa uthamini.—Yohana 17:3.