Wakaaji-Pamoja Katika “Bara” Lililorudishwa

‘Ninyi mtaitwa makuhani wa Yehova; watu watawaiteni wahudumu wa Mungu wetu.’—ISAYA 61:6.

1, 2. (a) Wageuzwa-imani walikuwa na hali gani katika Israeli? (b) Washiriki wa “umati mkubwa” wameonyesha roho gani katika nyakati za kisasa?

KATIKA nyakati za kale, Israeli lilipokuwa lenye uaminifu lilitenda duniani likiwa shahidi wa utukufu wa Yehova. (Isaya 41:8, 9; 43:10) Wageni wengi waliitikia wakaja kumwabudu Yehova kwa kushirikiana na watu Wake wateule. Kwa kweli, wao waliambia Israeli yale Ruthu aliyomwambia Naomi: “Watu wako watakuwa watu wangu, na Mungu wako atakuwa Mungu wangu.” (Ruthu 1:16) Wao walitii matakwa ya agano la Sheria, wanaume wakitahiriwa. (Kutoka 12:43-48) Baadhi ya wanawake waliolewa na Waisraeli. Rahabu wa Yeriko na Ruthu Mmoabi wakawa nyanya wa kale wa Yesu Kristo. (Mathayo 1:5) Wageuzwa-imani kama hawa walikuwa sehemu ya kutaniko la Israeli.—Kumbukumbu la Torati 23:7, 8.

² Kama ilivyokuwa na wageuzwa-imani katika Israeli, “umati mkubwa” leo wamewaambia mabaki watiwa-mafuta: “Tutakwenda pamoja nanyi, kwa maana tumesikia kwamba Mungu yu pamoja nanyi.” (Ufunuo 7:9, NW; Zekaria 8:23) Wao hutambua kwamba Wakristo hawa watiwa-mafuta ni “mtumwa mwaminifu mwenye akili” wa Yehova, nao hufanya kazi kwa ukaribu sana nao hivi kwamba watiwa-mafuta na “kondoo wengine” ni “kundi moja na mchungaji mmoja.” (Mathayo 24:45-47; Yohana 10:16) Itakuwaje kwa umati mkubwa wakati ndugu zao wote watiwa-mafuta wapokeapo thawabu yao ya kimbingu? Hawahitaji kuwa na hofu. Katika hizi ‘siku zote za mwisho,’ Yehova amefanya matayarisho kwa ajili ya wakati huo.—2 Timotheo 3:1.

“Bara” la Kiroho

3. Ni nini “mbingu mpya” zilizotolewa unabii na Petro, nazo zilisimamishwa lini?

³ Mpango wa kimbingu wa kuongoza ambao Wakristo watiwa-mafuta 144,000 watakuwa sehemu yao ulitolewa unabii na mtume Petro. Yeye alisema: “Ziko mbingu mpya na dunia mpya ambazo tunangojea kulingana na ahadi yake, na katika hizo uadilifu utakaa.” (2 Petro 3:13, NW) Hizi “mbingu mpya” zilisimamishwa katika 1914, Kristo alipotawazwa kuwa Mfalme katika Ufalme wa kimbingu. Lakini vipi juu ya “dunia mpya”?

4. (a) Ni tukio gani lisilotazamiwa lililotukia katika 1919? (b) ‘Taifa lililozaliwa kwa wakati mmoja’ lilikuwa nini, na ‘bara lililozaliwa kwa utungu’ lilikuwa nini?

⁴ Katika 1919, Yehova alitoa mabaki watiwa-mafuta kutoka utekwa wa Babiloni Mkubwa. (Ufunuo 18:4) Kwa viongozi wa Jumuiya ya Wakristo, tukio hilo la kustaajabisha halikutazamiwa kabisa. Biblia yasema hivi kulihusu: “Ni nani amesikia jambo kama hili? Ni nani ameona mambo kama haya? Je, kweli bara litazaliwa kwa utungu katika siku moja? Au kweli taifa litazaliwa kwa wakati mmoja?” (Isaya 66:8, NW) Kutaniko lililotiwa mafuta lilipotokea ghafula mbele ya mataifa likiwa watu waliofunguliwa, hakika lilikuwa taifa ‘lililozaliwa kwa wakati mmoja.’ Lakini, “bara” ni nini? Kwa maana fulani, ni mlingano wa kiroho wa bara la Israeli la kale. Lilikuwa ni eneo la utendaji lililopewa “taifa” jipya lililozaliwa, mahali ambapo unabii mbalimbali wa Paradiso wa kitabu cha Isaya una utimizo wa kisasa wa kiroho. (Isaya 32:16-20; 35:1-7; linganisha Waebrania 12:12-14.) Popote awapo Mkristo kihalisi, yeye yupo katika “bara” hilo.

5. Ni kiini gani kilichokuja kuwapo katika 1919? Fafanua.

⁵ Hili lilihusianaje na “dunia mpya” iliyotolewa unabii na Petro? Naam, hilo “taifa” jipya, lililozaliwa katika 1919 katika “bara” lililorudishwa, lilipaswa kusitawi liwe tengenezo la ulimwenguni pote lenye kufanyizwa na wasifaji wa Yehova watiwa-mafuta na wasiotiwa mafuta. Tengenezo hili litaokoka Har–Magedoni na kuingia katika ulimwengu mpya wa Mungu. Kwa njia hii taifa hilo lingeonwa kuwa kiini cha jamii ya kibinadamu yenye uadilifu, dunia mpya, itakayokuwapo baada ya kuharibiwa kwa ulimwengu wa Shetani.a Kufikia miaka ya katikati ya 1930, watiwa-mafuta, wakiwa kikundi, walikuwa wamekusanywa katika bara hilo lililorudishwa. Tangu wakati huo, mkazo umetiwa kwa kukusanywa kwa umati mkubwa wa kondoo wengine, ambao leo wafikia karibu milioni tano. (Ufunuo 14:15, 16) Je, hilo “bara” limesongamana watu kupita kiasi? La, mipaka yalo yaweza kupanuliwa kwa kadiri inavyohitajiwa. (Isaya 26:15) Hakika, inasisimua kuona idadi ya watu walo ikiongezeka wakati mabaki watiwa-mafuta wanapolijaza hilo “bara” “mazao”—chakula cha kiroho chenye afya na chenye kuimarisha. (Isaya 27:6) Lakini cheo cha hawa kondoo wengine ni nini katika “bara” lililorudishwa la watu wa Mungu?

Wageni Watendaji Katika “Bara”

6. Wageni wamekuwaje watendaji katika “bara” la watu wa Mungu?

⁶ Kama vile wageuzwa-imani katika bara la Israeli walivyotii Sheria ya Kimusa, umati mkubwa leo katika “bara” lililorudishwa hutii amri za Yehova. Wakiwa wameelimishwa na ndugu zao watiwa-mafuta, wao huepuka aina zote za ibada bandia na kutii utakato wa damu. (Matendo 15:19, 20; Wagalatia 5:19, 20; Wakolosai 3:5) Wao humpenda Yehova kwa moyo, akili, nafsi, na nguvu zao zote na kupenda jirani yao kama wanavyojipenda. (Mathayo 22:37; Yakobo 2:8) Katika Israeli la kale wageuzwa-imani walisaidia kujenga hekalu la Sulemani na kuunga-mkono marudisho ya ibada ya kweli. (1 Mambo ya Nyakati 22:2; 2 Mambo ya Nyakati 15:8-14; 30:25) Leo, umati mkubwa pia hushiriki katika miradi ya ujenzi. Kwa kielelezo, wao husaidia kujenga makutaniko na mizunguko, bila kutaja miradi ya ujenzi halisi, kama vile Majumba ya Ufalme, Majumba ya Kusanyiko, na majengo ya tawi.

7. Nini kilichotendeka katika Yerusalemu la baada ya uhamisho wakati hakukuwa na Walawi wa kutosha kutekeleza utumishi wa hekalu?

⁷ Katika 537 K.W.K., Israeli liliporudi kutoka uhamishoni Babiloni, hilo lilianza kupanga utumishi katika mahali pa hekalu. Lakini, Walawi waliorudi hawakuwa wengi sana. Kwa sababu hiyo, Wanethini—wakazi wa kigeni waliotahiriwa ambao awali walikuwa wasaidizi wa Walawi—walipewa mapendeleo yaliyoongezeka katika utumishi wa hekalu. Hata hivyo, wao hawakuwa na cheo sawa na makuhani watiwa-mafuta wa Kiharuni.b—Ezra 7:24; 8:15-20; Nehemia 3:22-26.

8, 9. Kondoo wengine wametwaaje sehemu yenye kuongezeka ya kazi ya kutoa utumishi mtakatifu katika siku za mwisho?

⁸ Wakristo watiwa-mafuta leo wamefuata kigezo hicho. Kadiri ambavyo “wakati wa mwisho” umeendelea, ndivyo wasaliao wa watiwa-mafuta wamekuwa wachache zaidi na zaidi katika “bara” la watu wa Mungu. (Danieli 12:9; Ufunuo 12:17) Kwa sababu hiyo, umati mkubwa sasa hutimiza sehemu iliyo kubwa ya kazi ya kutoa “utumishi mtakatifu.” (Ufunuo 7:15, NW) Wakifuata mwongozo wa ndugu zao watiwa-mafuta, wao ‘humpa Mungu dhabihu ya sifa, yaani, tunda la midomo iliungamayo jina lake.’ ‘Hawasahau kutenda mema na kushirikiana,’ wakijua kwamba ‘dhabihu kama hizo humpendeza Mungu.’—Waebrania 13:15, 16.

⁹ Isitoshe, umati mkubwa ukiwa unaongezeka kwa mamia ya maelfu kila mwaka, kuna uhitaji unaoendelea kukua wa uangalizi. Wakati fulani huo ulishughulikiwa na Wakristo watiwa-mafuta pekee. Sasa, uangalizi wa makutaniko yaliyo mengi, na vilevile mizunguko, wilaya, na matawi, kwa sababu ya uhitaji umekabidhiwa kondoo wengine. Katika 1992 wachache kati yao walipewa pendeleo la kuhudhuria mikutano ya halmashauri za Baraza Linaloongoza na kutumikia wakiwa wasaidizi wasioshiriki katika maamuzi ya mwisho. Na bado, kondoo wengine hudumisha uaminifu-mshikamanifu kwa Wakristo wenzao watiwa-mafuta na kuhisi kwamba wamependelewa kuwaunga mkono wakiwa mtumwa mwaminifu mwenye akili wa Yehova.—Mathayo 25:34-40.

“Kama Shehe”

10, 11. Kufuatia kigezo cha Wafilisti fulani, baadhi ya waliokuwa zamani maadui wa watu wa Mungu wamebadilikaje? Kwa matokeo gani?

¹⁰ Jinsi mtumwa mwaminifu mwenye akili ametumia kondoo wengine katika vyeo vya madaraka ilitolewa unabii katika Zekaria 9:6, 7 (NW). Hapo twasoma hivi: “Kwa hakika nitakikatilia mbali kiburi cha Mfilisti. Na nitaviondoa vitu vyake vyenye kutiwa madoa ya damu kutoka kinywa chake na vitu vyake vyenye kuchukiza sana kutoka kati ya meno yake, na kwa hakika yeye mwenyewe ataachwa akibaki kwa ajili ya Mungu wetu; naye lazima awe kama shehe katika Yuda, na Ekroni kama Myebusi.”c Wafilisti walikuwa maadui wakubwa wa watu wa Yehova, kama ulivyo ulimwengu wa Shetani leo. (1 Yohana 5:19) Kama vile Wafilisti hatimaye walivyoangamizwa wakiwa taifa, ndivyo na ulimwengu huu, pamoja na sehemu zao za kidini, kisiasa, na kibiashara, utakavyopatwa karibuni na hasira kali ya uharibifu wa Yehova.—Ufunuo 18:21; 19:19-21.

¹¹ Hata hivyo, kulingana na maneno ya Zekaria, baadhi ya Wafilisti walibadilika, na hilo lilikuwa kivuli cha kuonyesha kwamba baadhi ya walimwengu leo hawangebaki katika uadui pamoja na Yehova. Wao wangeacha ibada ya sanamu ya kidini pamoja na desturi zenye kuchukiza sana na dhabihu zayo zenye kunyarafisha na kuwa waliosafishwa machoni pa Yehova. Katika siku yetu “Wafilisti” kama hao waliobadilika wanapatikana miongoni mwa umati mkubwa.

12. Katika nyakati za kisasa, “Ekroni” limekujaje kuwa “kama Myebusi”?

¹² Kulingana na unabii huo, jiji kuu la Wafilisti la Ekroni lingekuwa “kama Myebusi.” Wayebusi pia pindi moja walikuwa maadui wa Israeli. Yerusalemu lilikuwa mikononi mwao hadi Daudi alipolishinda. Hata hivyo, yaonekana baadhi ya wale waliookoka vita pamoja na Israeli walikuja kuwa wageuzwa-imani. Walitumikia katika bara la Israeli wakiwa watumwa na hata wakawa na pendeleo la kufanya kazi katika ujenzi wa hekalu. (2 Samweli 5:4-9; 2 Mambo ya Nyakati 8:1-18) Leo, “Waekroni” wanaokuja kumwabudu Yehova pia wana mapendeleo ya utumishi katika lile “bara” chini ya uangalizi wa mtumwa mwaminifu mwenye akili.

13. Mashehe walikuwa nini katika ulimwengu wa kale?

¹³ Zekaria asema kwamba Mfilisti angekuwa kama shehe katika Yuda. Neno la Kiebrania ʼal·luphʹ, linapotafsiriwa “shehe,” lamaanisha “kiongozi wa elfu.” Hicho kilikuwa cheo cha juu sana. Yaonekana taifa la awali la Edomu lilikuwa na mashehe (majumbe) 13 pekee. (Mwanzo 36:15-19) Neno “shehe” halitumiwi sana kuhusu Israeli, lakini maneno “kichwa (au, mkuu) cha elfu” huonekana mara nyingi. Musa alipowaita wawakilishi wa taifa la Israeli, yeye aliwaita “vichwa vya wale maelfu wa Israeli.”d Vilikuwako 12 kati ya hivi, kwa wazi vikiwa chini ya Musa pekee. (Hesabu 1:4-16) Vivyo hivyo, katika tengenezo la jeshi, wakuu wa maelfu walikuwa wa pili kwa jemadari pekee au kwa mfalme.—2 Samweli 18:1, 2; 2 Mambo ya Nyakati 25:5.

14. Leo, “Mfilisti” amekujaje kuwa kama shehe?

¹⁴ Zekaria hakutoa unabii kwamba Mfilisti aliyetubu angekuwa hasa shehe katika Israeli. Hilo halingefaa, kwa kuwa yeye hakuwa Mwisraeli wa asili. Lakini angekuwa kama shehe, akiwa na cheo cha kulinganika na cha shehe. Na ndivyo imekuwa. Idadi ya mabaki wa Wakristo watiwa-mafuta ipunguapo na wengi wanaosalia wakiwa wamepungukiwa uwezo kwa sababu ya umri mkubwa, kondoo wengine waliozoezwa vizuri husaidia inavyohitajiwa. Hawataki kuchukua mahali pa ndugu zao watiwa-mafuta. Lakini mtumwa mwaminifu mwenye akili huwapa mamlaka kama inavyohitajiwa katika lile “bara” ili tengenezo la Mungu liendelee kusonga mbele kwa njia ya kitengenezo. Mwendo kama huo wenye maendeleo waonwa katika unabii mwingine tena.

Makuhani na Wakulima

15. (a) Katika utimizo wa Isaya 61:5, 6, ni nani walio ‘makuhani wa Yehova’ nao watumikia katika cheo hicho katika maana kamili wakati gani? (b) Ni nani walio “wageni” wanaofanya kazi ya kulima ya Israeli, na—katika maana ya kiroho—kazi hiyo yahusisha nini?

¹⁵ Isaya 61:5, 6, lasema: ‘Wageni watasimama na kuchunga makundi yenu, na watu wa kabila nyingine watakuwa wakulima wenu, na watunzaji wa mizabibu yenu. Bali ninyi mtaitwa makuhani wa Yehova; watu watawaiteni wahudumu wa Mungu wetu; mtakula utajiri wa mataifa, na kujisifia utukufu wao.’ Leo, ‘makuhani wa Yehova’ ni Wakristo watiwa-mafuta. Katika maana ya mwisho iliyo kamili, wao watatumikia wakiwa ‘makuhani wa Yehova, wahudumu wa Mungu wetu,’ katika Ufalme wa kimbingu. (Ufunuo 4:9-11) Ni nani hao “wageni” wenye madaraka ya kazi ya ukulima? Hawa ni kondoo wengine, wanaokaa katika “bara” la Israeli wa Mungu. Ni kazi gani ya kuchunga, ukulima, na kutunza mizabibu waliyokabidhiwa? Katika maana iliyo muhimu ya kiroho, kazi hizo zinahusu kusaidia, kutunza, na kuvuna watu.—Isaya 5:7; Mathayo 9:37, 38; 1 Wakorintho 3:9; 1 Petro 5:2.

16. Hatimaye ni nani watakaoifanya kazi yote katika “bara” la watu wa Mungu?

¹⁶ Wakati huu, idadi ndogo ya Waisraeli wa kiroho yabaki duniani ikishiriki katika kazi ya kiroho ya kuchunga, kulima, na kutunza mizabibu. Kutaniko lote lililotiwa mafuta hatimaye liunganapo na Kristo, kazi hii yote itaachiwa kondoo wengine. Hata uangalizi wa kibinadamu wa lile “bara” utaachwa mikononi mwa kondoo wengine wenye kustahili, ambao katika kitabu cha Ezekieli wametajwa kwa jina la cheo la jamii ya wakuu (majumbe).—Ezekieli, sura 45, 46.e

Lile “Bara” Ladumu

17. Ni matayarisho gani ambayo Yehova amekuwa akifanya katika hizi siku zote za mwisho?

¹⁷ Ndiyo, umati mkubwa hauhitaji kuwa na hofu! Yehova amewafanyia matayarisho ya kutosha. Maendeleo makubwa zaidi duniani katika hizi siku za mwisho yamekuwa kukusanywa na kutiwa muhuri kwa watiwa-mafuta. (Ufunuo 7:3) Hata hivyo, akihakikisha kwamba jambo hilo lafanywa, Yehova ameleta kondoo wengine katika ushirika pamoja nao katika bara la kiroho lililorudishwa. Wakiwa humo wamelishwa kiroho na kuzoezwa waishi maisha ya Kikristo. Na zaidi, wao wamefundishwa vizuri katika utumishi mtakatifu, kutia ndani uangalizi. Wao washukuru sana Yehova na ndugu zao watiwa-mafuta kwa kufundishwa hivyo.

18. Ni kupitia matukio gani kondoo wengine watabaki wakiwa waaminifu-washikamanifu katika “bara” la Israeli la kiroho?

¹⁸ Gogu wa Magogu afanyapo shambulio lake la mwisho dhidi ya watu wa Mungu, kondoo wengine watasimama imara pamoja na mabaki watiwa-mafuta katika “bara la nchi iliyo wazi ya mashambani.” Kondoo wengine watakuwa wangali katika hilo “bara” waokokapo uharibifu huo wa mataifa na kuingia katika ulimwengu mpya wa Mungu. (Ezekieli 38:11, NW; 39:12, 13; Danieli 12:1; Ufunuo 7:9, 14) Wakiendelea kuwa waaminifu, hawatalazimika kamwe kuacha mahali hapo pa kupendeza.—Isaya 11:9.

19, 20. (a) Katika ulimwengu mpya, ni uangalizi gani mtukufu utakaofurahiwa na wakazi wa hilo “bara”? (b) Twatazamia nini kwa hamu nyingi?

¹⁹ Israeli la kale lilitawalwa na wafalme wa kibinadamu nalo lilikuwa na makuhani wa Kilawi. Katika ulimwengu mpya, Wakristo watakuwa na uangalizi ulio mtukufu hata zaidi. Chini ya Yehova Mungu, wao watakuwa raia wa Kuhani wa Cheo cha Juu aliye pia Mfalme, Yesu Kristo, na wa wale 144,000 walio makuhani-washirika ambao pia ni wafalme—baadhi yao wakiwa waliwajua awali wakiwa ndugu na dada zao Wakristo duniani. (Ufunuo 21:1) Wakazi waaminifu wa bara la kiroho wataishi katika dunia iliyorudishwa kuwa paradiso halisi, wakifurahia baraka zenye kuponya zinazoletwa kupitia Yerusalemu Mpya.—Isaya 32:1; Ufunuo 21:2; 22:1, 2.

²⁰ Gari tukufu la kimbingu la Yehova lisongapo mbele bila kuzuiwa ili kutimiza makusudi yake, sisi sote twatazamia kwa hamu nyingi kutimiza mgawo tuliopewa. (Ezekieli 1:1-28) Hatimaye makusudi hayo yatimizwapo, ebu fikiria ni kwa shangwe iliyoje utakaso wenye shangwe ya ushindi wa Yehova utakavyosherehekewa! Kisha wimbo wa kusifu uliorekodiwa kwenye Ufunuo 5:13 utaimbwa na uumbaji wote: “Baraka na heshima na utukufu na uweza una [Y]eye aketiye juu ya kiti cha enzi, na yeye Mwana-Kondoo, hata milele na milele”! Mahali petu pawe mbinguni ama duniani je, hatutamani kuwapo, tukiziunga sauti zetu katika korasi hiyo tukufu ya sifa?

[Maelezo ya chinis]

Wajibuje?

◻ Ni “bara” gani lililorudishwa katika 1919, nalo lilijazwaje wakazi?

◻ Kondoo wengine wamepewaje madaraka yenye kuongezeka katika “bara” la watu wa Mungu waliorudishwa?

◻ Ni kwa njia gani washiriki wa umati mkubwa ni “kama Myebusi”? “kama shehe katika Yuda”?

◻ Kondoo wengine waaminifu watadumu kwa muda gani wakiwa katika lile “bara”?

[Picha katika ukurasa wa23]

Mfilisti wa kisasa atakuwa “kama shehe katika Yuda”

[Picha katika ukurasa w24]

Watiwa-mafuta pamoja na kondoo wengine hutumikia pamoja katika bara la kiroho