Faraja na Kitia-Moyo Vito Vyenye Pande Nyingi

WENGI wetu tumepitia nyakati ambazo tulihisi umaskini sana—si lazima uwe ulikuwa umaskini wa pesa bali umaskini wa rohoni. Tulikuwa tumekosa tumaini, hata kuvunjika moyo sana. Lakini, katika nyakati hizo huenda tuliweza kufikia kitu fulani chenye thamani kiwezacho kutusaidia sana. “Kito” hicho ni kitia-moyo.

Katika Biblia neno lilelile moja la Kigiriki hutumiwa kwa “tia moyo” na “fariji.” Maneno hayo mawili hutoa maana ya kutia moyo, nguvu, au tumaini. Basi, kwa wazi, tunapohisi udhaifu au kushuka moyo, faraja na kitia-moyo ndizo tunazohitaji hasa. Hizo zaweza kupatikana wapi?

Biblia hutuhakikishia kwamba Yehova ndiye “Mungu wa faraja yote.” (2 Wakorintho 1:3) Biblia hutuambia pia kwamba “hawi mbali na kila mmoja wetu.” (Matendo 17:27) Hivyo, faraja na kitia-moyo hupatikana. Ebu tuone njia nne kuu ambazo kwazo Yehova huandaa kitia-moyo.

Kupitia Uhusiano wa Kibinafsi Pamoja na Mungu

Chanzo kikuu kupita vyote cha faraja ni uhusiano wa kibinafsi pamoja na Yehova Mungu. Uhakika wa kwamba kunaweza kuwa na uhusiano kama huo watia moyo. Kwani, ni mtawala gani wa kilimwengu angekubali kupokea simu zetu au angeonyesha upendezi wa kibinafsi katika matatizo yetu? Yehova ana uweza sana kuliko watu hao. Lakini, yeye ni mnyenyekevu—akiwa tayari sana kushughulika na wanadamu wasiokamilika wenye hali ya chini. (Zaburi 18:35) Yehova hata amechukua hatua ya kutuonyesha upendo. Yohana ya Kwanza 4:10 husema: “Hili ndilo pendo, si kwamba sisi tulimpenda Mungu, bali kwamba yeye alitupenda sisi, akamtuma Mwanawe kuwa kipatanisho kwa dhambi zetu.” Na zaidi, kwa upendo Yehova hutuvuta kwa Mwana wake.—Yohana 6:44.

Je, umeitikia na kutafuta faraja katika urafiki pamoja na Mungu? (Linganisha Yakobo 2:23.) Mathalani, ukiwa na rafiki wa karibu umpendaye, je, si jambo la kufurahisha kutumia wakati fulani mkiwa peke yenu, mkizungumza kwa uhuru juu ya mahangaiko yako na mashaka yako, matumaini yako na shangwe zako? Yehova akualika ufanye hivyo pamoja naye. Yeye haweki mpaka juu ya muda ambao unaweza kuzungumza naye katika sala—naye husikiliza kwelikweli. (Zaburi 65:2; 1 Wathesalonike 5:17) Yesu alisali kwa ukawaida na kwa bidii. Hakika, kabla ya kuchagua mitume wake 12, yeye alisali usiku kucha.—Luka 6:12-16; Waebrania 5:7.

Mara kwa mara, kila mmoja wetu aweza kufaulu kuwa peke yake pamoja na Yehova. Kuketi tu kwa ukimya dirishani au kutembea kwa utulivu kwaweza kuandaa fursa nzuri ya kufungua moyo wetu katika sala kwa Yehova. Kufanya hivyo kwaweza kuwa chanzo cha kitulizo na faraja kubwa sana. Ikiwa kuna kitu fulani cha uumbaji wa Yehova ambacho unaweza kutazama unapotafakari—kiwe tu ni kisehemu cha anga, miti au ndege fulani—twaweza kupata katika vitu hivyo vikumbusha fulani vyenye kufariji vya upendo wa Yehova na hangaiko lake kwetu.—Warumi 1:20.

Kupitia Funzo la Kibinafsi la Neno la Mungu

Hata hivyo, ni kupitia funzo la kibinafsi la Biblia, tunapojua kwelikweli sifa za Yehova. Biblia humfunua Yehova kwa kurudia-rudia kuwa “Mungu mwingi wa huruma, mwenye fadhili, si mwepesi wa hasira, mwingi wa rehema na kweli.” (Kutoka 34:6; Nehemia 9:17; Zaburi 86:15) Tamaa ya kufariji watumishi wake wa kidunia ni sehemu ya asili ya utu wa Yehova.

Mathalani, fikiria maneno ya Yehova kwenye Isaya 66:13: “Mfano wa mtu ambaye mama yake amfariji, ndivyo nitakavyowafariji ninyi.” Yehova alibuni upendo wa mama kwa watoto wake wa kuwa mwenye kujidhabihu na mwaminifu-mshikamanifu. Kama umepata kuona mama mwenye upendo akifariji mtoto wake aliyeumia, wajua amaanishayo Yehova asemapo kwamba atawafariji watu wake.

Masimulizi mengi ya Biblia huonyesha jinsi yeye hufariji kihalisi. Nabii Eliya alipotishwa kuuawa na Malkia Yezebeli aliyekuwa mwovu, aliogopa akatoroka kuokoa uhai wake. Alikosa tumaini sana hivi kwamba alitembea nyikani kwa safari ya siku nzima, yaonekana bila kuchukua maji au vifaa. Akiumia sana Eliya alimwambia Yehova kwamba alitaka kufa. (1 Wafalme 19:1-4) Yehova alifanya nini kumfariji na kumtia moyo nabii wake?

Yehova hakumkemea Eliya kwa kuhisi upweke, kujiona kuwa hafai kitu, na kwa kuogopa. Tofauti na hivyo, nabii huyo alisikia “sauti ndogo, ya utulivu.” (1 Wafalme 19:12) Ukisoma 1 Wafalme sura ya 19, utaona jinsi Yehova alivyomfariji Eliya, akamtuliza, na kujenga imani yake. Hiyo haikuwa faraja ya kijuu-juu tu. Ilifika ndani ya moyo wenye mfadhaiko wa Eliya, ikimtia moyo nabii huyo kuendelea mbele. (Linganisha Isaya 40:1, 2.) Upesi, alirudia mgawo wake.

Yesu Kristo vilevile hufariji na kutia-moyo wafuasi wake walio waaminifu-washikamanifu. Kwa hakika, Isaya alitoa unabii kuhusu Mesiya: “BWANA Mungu . . . amenituma ili kuwaganga waliovunjika moyo, . . . kuwafariji wote waliao.” (Isaya 61:1-3) Wakati wa maisha yake, Yesu alionyesha wazi kwamba maneno haya yalimhusu. (Luka 4:17-21) Ukihisi unahitaji faraja, tafakari juu ya jinsi Yesu alivyoshughulika na watu walioumia na wenye uhitaji kwa wanana na kwa upendo. Hakika, funzo la uangalifu la Biblia ni chanzo kikubwa cha faraja na kitia-moyo.

Kupitia Kutaniko

Katika kutaniko la Kikristo, vito vya faraja na kitia-moyo hung’aa katika pande nyingi. Mtume Paulo alipuliziwa kuandika hivi: “Basi, farijianeni na kujengana kila mtu na mwenzake, vile vile kama mnavyofanya.” (1 Wathesalonike 5:11) Faraja na kitia-moyo zaweza kupatikanaje kwenye mikutano ya kutaniko?

Bila shaka, hasa sisi huhudhuria mikutano ya Kikristo ili ‘kufundishwa na Yehova,’ ili kupokea maagizo juu yake na juu ya njia zake. (Yohana 6:45) Maagizo hayo yamekusudiwa yawe yenye kutia-moyo na kufariji. Kwenye Matendo 15:32, (NW) twasoma: “Yudasi na Sila . . . wakawatia moyo akina ndugu kwa hotuba nyingi na kuwatia nguvu.”

Je, umepata kuwa na ono la kwenda kwenye mkutano wa Kikristo ulipokuwa umekosa tumaini na kurudi nyumbani ukihisi vizuri zaidi? Labda jambo fulani lililotajwa katika hotuba, katika maelezo, au katika sala liligusa moyo wako na kuandaa faraja na kitia-moyo ulichohitaji. Basi usikose kuhudhuria mikutano ya Kikristo.—Waebrania 10:24, 25.

Kushirikiana na ndugu na dada zetu katika huduma na katika pindi nyingine kwaweza kuwa na matokeo kama hayo. Katika Kiebrania vitenzi kadhaa vinavyomaanisha “kufunganisha pamoja” pia vilikuja kurejezea “nguvu” au “kutia nguvu”—wazo lionekanalo kuonyesha kwamba vitu hupata nguvu zaidi vinapofungwa pamoja. Kanuni hiyo ni kweli katika kutaniko. Sisi hufarijiwa, kutiwa moyo, ndiyo, kutiwa nguvu, kwa kushirikiana pamoja. Na tumefunganishwa pamoja kwa upendo, kifungo chenye nguvu kuliko vyote.—Wakolosai 3:14.

Nyakati fulani ni uaminifu wa ndugu au dada zetu wa kiroho ambao hututia moyo. (1 Wathesalonike 3:7, 8) Nyakati nyingine ni ule upendo waonyeshao. (Filemoni 7) Na nyakati nyingine ni kule kufanya kazi pamoja, bega kwa bega, tunapozungumza na wengine kuhusu Ufalme wa Mungu. Ukihisi kuwa dhaifu na wahitaji kitia-moyo kwa habari ya huduma, mbona usifanye mipango ya kuhubiri pamoja na mhubiri wa Ufalme mwenye umri mkubwa zaidi au mwenye uzoefu zaidi? Yaelekea utapata faraja nyingi ukifanya hivyo.—Mhubiri 4:9-12; Wafilipi 1:27.

Kupitia “Mtumwa Mwaminifu Mwenye Akili”

Ni nani hupanga zile sehemu zenye kufariji za ibada yetu? Yesu aliweka rasmi jamii ambayo alitambulisha kuwa “mtumwa mwaminifu mwenye akili” ili kutoa “chakula [cha kiroho] kwa wakati wake.” (Mathayo 24:45) Katika karne ya kwanza W.K., baraza hili la Wakristo watiwa-mafuta tayari lilikuwa likifanya kazi. Baraza linaloongoza la wazee katika Yerusalemu lilipeleka barua za maagizo na miongozo kwa makutaniko. Kukiwa na tokeo gani? Biblia hurekodi jinsi makutaniko yalivyoitikia kwa barua moja kama hiyo: “Walipoisoma hiyo barua, maneno yake yaliwatia moyo, wakafurahi sana.”—Matendo 15:23-31, HNWW.

Vilevile, katika hizi siku za mwisho, mtumwa mwaminifu mwenye akili anatoa chakula cha kiroho ambacho huandaa faraja kubwa na kitia-moyo kikubwa kwa ajili ya watu wa Yehova. Je, wewe hushiriki kula chakula hicho? Chapatikana kwa urahisi katika fasihi iliyochapishwa ambayo jamii ya mtumwa hutokeza ulimwenguni pote. Magazeti ya Mnara wa Mlinzi na Amkeni! pamoja na vitabu, broshua, na trakti ambazo Watch Tower Society hutangaza zimeleta faraja kwa wasomaji wengi sana.

Mwangalizi mmoja asafiriye aliandika hivi: “Wengi wa ndugu na dada zetu hutaka kufanya yaliyo sawa, lakini mara nyingi wao hung’ang’ana na mivurugo, hofu, na hisia kwamba hawana uwezo wa kujisaidia. Makala zilizo katika majarida yetu husaidia wengi kudhibiti tena maisha zao na hisia zao. Hizo makala pia huwapa wazee jambo fulani zaidi la kutoa kuliko kitia-moyo cha kijuu-juu tu.”

Tumia kikamili fasihi kutoka kwa jamii ya mtumwa mwaminifu. Magazeti, vitabu, na vichapo vingine vya wakati ufaao vyaweza kutusaidia kupata faraja nyakati zinapokuwa ngumu. Kwa upande mwingine, ukiwa katika hali ya kutoa kitia-moyo kwa mtu ambaye ameshuka moyo, tumia habari za Kimaandiko katika majarida haya. Hizo makala huandikwa kwa uangalifu sana, mara nyingi baada ya majuma mengi au miezi mingi ya utafiti, uchunguzi, na sala yenye bidii. Shauri hutegemea Biblia, limejaribiwa na ni la kweli. Wengine wamepata likifaa sana kusoma makala moja au mbili zifaazo pamoja na mtu ambaye ameshuka moyo. Hilo laweza kutokeza faraja na kitia-moyo kingi.

Ikiwa ungepata vito vyenye thamani, je, ungevificha kwa uchoyo, au ungeshiriki kwa ukarimu hazina hiyo pamoja na wengine? Weka mradi wa kuwa chanzo cha faraja na kitia-moyo kwa ndugu na dada kutanikoni. Ukijenga badala ya kubomoa, kupongeza badala ya kuchambua, kusema “kwa ulimi wa hao wafundishwao” badala ya kusema ‘bila kufikiri kama kuchoma kwa upanga,’ waweza kutokeza tofauti katika maisha za wengine. (Isaya 50:4; Mithali 12:18) Kwa kweli, wewe mwenyewe utaelekea zaidi kuonwa kuwa kito—chanzo cha faraja na kitia-moyo!

[Sanduku katika ukurasa wa 20]

Faraja kwa Wale Wenye Uhitaji

WENGI wameeleza jinsi makala fulani za Mnara wa Mlinzi na Amkeni! zimeimarisha sana uhusiano wao wa kibinafsi pamoja na Yehova. Mmoja alisema hivi: “Baada ya kusoma makala hii, nilihisi kwamba Yehova akiwa na uweza na utukufu wake wote alikuwa nami papo hapo. Nilihisi kwamba yeye ni mtu halisi.” Barua nyingine ilisema: “Mioyo yetu na akili zetu zimebadilika sana katika maoni yetu juu ya Yehova hivi kwamba hatuko vile tulivyokuwa. Ni kana kwamba mtu alipangusa miwani yetu, na sasa twaweza kuona kila kitu kwa wazi zaidi.”

Wengine huandika wakisema jinsi hayo magazeti yalivyowasaidia kushughulikia matatizo au magumu hususa, kwa njia hiyo yakiwahakikishia upendezi wa kibinafsi wa Yehova kwao. Msomaji mmoja alitaja wazo hilo hivi: “Asanteni sana kwa kutufanya tuone kwa mara nyingine tena jinsi Yehova hujali na kupenda watu wake.” Mwanamke mmoja katika Japani aliyepoteza mtoto wake kwa kifo alisema hivi juu ya makala za Amkeni! zilizozungumzia habari hiyo: “Rehema nyingi za Mungu zilijaa katika hizo kurasa, nikalia, na kulia, na kulia. Nimeweka makala hizo mahali ambapo naweza kuzifikia mara moja na kuzisoma wakati wowote nihisipo nina huzuni na upweke.” Mwanamke mwingine mwenye kuomboleza aliandika hivi: “Makala za Mnara wa Mlinzi na Amkeni! na ile broshua “Mtu Fulani Umpendaye Anapokufa” zimenipa nguvu niliyohitaji ili nivumilie nyakati zangu za huzuni.”

Maandiko Matakatifu ndiyo chanzo cha msingi cha faraja. (Warumi 15:4) Mnara wa Mlinzi hushikamana na Biblia ikiwa mamlaka yalo, na ndivyo ilivyo na gazeti-jenzi, Amkeni! Kwa sababu hiyo, majarida haya yamethibitika kuwa faraja na kitia-moyo kwa wasomaji wayo.

[Picha katika ukurasa wa 23]

Mungu wa faraja yote pia ni Msikiaji wa sala