Sura 21

Bustani ya Edeni Yarudishwa—Duniani Pote

 1. (a) Ni katika maana gani bustani ya Edeni itarudishwa, na kwa sababu gani haitaenea sehemu ndogo tu ya dunia? (b) Maneno ya Yesu kwa yule mtenda mabaya yanaonyesha nini?

ILE BUSTANI ya Edeni ilikuwa “paradiso ya raha,” na katika maana hiyo itarudishwa. (Mwanzo 2:8, Douay Version) Ile paradiso ya kwanza ilienea kisehemu kidogo tu cha dunia. Lakini Yehova alikusudia kwamba mipaka yayo ingepanuliwa kuelekea upande wa nje, pande zote kuizunguka, na jamaa ya kibinadamu yenye kuendelea kukua mpaka Paradiso ifunike dunia nzima na kuipamba kwa uzuri mwingi wa asili. (Mwanzo 1:26-28; 2:8, 9, 15) Maneno ya Yesu kwa mtenda mabaya mwenye kuhurumia aliyekufa kando yake huko Kalvari yalimhakikishia mtu huyo kwamba yeye angefufuliwa wakati kurudishwa kwa Paradiso kumeendelea, na wakati huo ataona badiliko lenye kupendeza katika sura ya dunia. (Luka 23:43) Hiyo Paradiso ya kuenea dunia yote itakuwa namna gani? Itatofautianaje na bustani ya kwanza ya Edeni?

 2. (a) Ni nini kilichokuwa katika bustani ya Edeni ya kwanza ambacho kitakosekana katika Paradiso ya duniani pote? (b) Kwa sababu gani ni jambo la akili kwamba Mungu hatajaribu utii wa wanadamu kwa mti mmoja?

² Katika unabii wenye kupendeza sana wa mambo matukufu ambayo yako mbele tu, tunaona kitu fulani ambacho kinakosekana katika Paradiso ya duniani pote iliyorudishwa. Ni kitu gani? Ni ule “mti wa ujuzi wa mema na mabaya” ambao ulikuwa “katikati ya bustani.” (Mwanzo 2:17; 3:3) Kwa wazi huo ulikuwa mti mmoja. Je! lingekuwa jambo la akili kufikiri kwamba katikati ya bustani ya Edeni, iliyorudishwa duniani pote kungepasa kuwe na mti mmoja kama huo ambao juu yao kungekuwako katazo la kimungu? Hapana. Watu walioko kwenye zile pembe nne za dunia wangehitajiwa kutumia wakati mwingi sana wakisafiri ili kwenda mahali fulani penye mti kama huo katika Mashariki ya Kati ili ikiwezekana wale matunda kutokana na mti huo kwa kutokumtii Mungu Aliye Juu Zaidi Sana.

 3. Ni nini kingine ambacho kitakosekana katika Paradiso iliyorudishwa?

³ Zaidi ya hilo, hakutakuwako mahali kama hapo nyoka mwenye ‘kuongea’ ili awakaribishe wale wanaofikia mti huo watwae baadhi ya matunda yao yenye kuvutia kwa kudharau tu maagizo ya Mungu. Na hakutakuwako roho ye yote mwovu asiyeonekana wa kutumia kwa hila na kumfanya nyoka aonekane kana kwamba anaongea na kumkaribisha mtazamaji amwasi Mungu kwa kuchukua mwendo wa kutokutii Muumba, kukiwa na matokeo yenye kuleta kifo.

 4. Kwa sababu gani Shetani Ibilisi hatakuwapo wakati wa Utawala wa Miaka Elfu wa “Mwana-Mfalme wa Amani”?

⁴ Hapana, yule kiumbe wa kiroho asiyeonekana ambaye alimwezesha nyoka ‘kuongea’ huko nyuma katika bustani ya Edeni hatakuwapo wakati wa Utawala wa Miaka Elfu ya “Mwana-Mfalme wa Amani,” Kristo Yesu. Mwovu huyo, Shetani Ibilisi, atawekwa chini ya kizuizi kabisa baada ya Har–Magedoni. Ufunuo 20:2, 3 unatuambia kwamba yule “Mwana-Mfalme wa Amani” atamshika “nyoka wa zamani, ambaye ni Ibilisi na Shetani,” na kumfunga na kumvurumisha katika shimo refu kwa miaka elfu.

Amani na Usalama wa Kweli Katika Paradiso Iliyorudishwa

 5. Katika Paradiso iliyorudishwa, ni kwa sababu gani amani na usalama wa kweli vitaenea duniani pote?

⁵ Lo! ni amani na usalama ulioje utakaofuata! Uvutano na utawala wa Shetani juu ya wanadamu akiwa “mtawala wa ulimwengu” utakuwa umetoweka! (Yohana 14:30, NW) Vikosi vya kishetani vya Shetani vikiwa pia vimevurumishwa katika shimo refu, hatimaye dunia itakuwa huru bila namna zote za kuwasiliana na ulimwengu wa roho, mambo ya mafumbo, na uchawi, ulogi—ndiyo, kila namna ya kupashana habari na mashetani, ambazo Yehova anachukia sana.—Kumbukumbu la Torati 18:10-12.

 6, 7. (a) Ni kwa sababu gani viumbe wanyama havitakuwa tisho kwa wanadamu? (b) Ni unabii gani kuhusu hilo utakaokuwa na utimizo halisi?

⁶ Viumbe wanyama havitadhuru au kuwa tisho kwa wakaaji wa Paradiso iliyorudishwa. Mungu atarudishia viumbe wa hali ya chini kadiri yo yote ya kuwaogopa wanadamu iliyopotea. Hivyo tunaweza kutazamia yale maelezo yenye kupendeza ya maisha ya wanyama yaliyoandikwa kwenye Isaya 11:6-9 yawe na utimizo halisi wakati wa Utawala wa Mileani wa “Mwana-Mfalme wa Amani”:

⁷ “Mbwa-mwitu atakaa pamoja na mwana-kondoo, na chui atalala pamoja na mwana-mbuzi; ndama na mwana-simba na kinono watakuwa pamoja, na mtoto mdogo atawaongoza. Ng’ombe na dubu watalisha pamoja; watoto wao watalala pamoja; na simba atakula majani kama ng’ombe. Na mtoto anyonyaye atacheza penye tundu la nyoka, na mtoto aliyeachishwa atatia mkono wake katika pango la fira. Hawatadhuru wala hawataharibu katika mlima wangu wote mtakatifu; maana dunia itajawa na kumjua [Yehova], kama vile maji yanavyoifunika bahari.”

 8. Ni nini kinachomaanishwa na usemi wa kiunabii kwamba “mavumbi yatakuwa chakula cha nyoka”?

⁸ Lingekuwa jambo lisilopatana kwa Mungu kuongoza unabii kama huo uwe na maana ya kiroho tu bila kuonyesha mambo hayo katika maisha halisi ya kidunia. Hali moja na hiyo, Isaya 65:25 hutuambia hivi: “Mbwa-mwitu na mwana-kondoo watalisha pamoja, na simba atakula majani kama ng’ombe; na mavumbi yatakuwa chakula cha nyoka.” Je! hilo linamaanisha kuangamizwa kabisa kwa jamaa ya nyoka isiwepo katika bustani ya Edeni yenye kuenea dunia yote? Hapana, usemi wa kiunabii kwamba “mavumbi yatakuwa chakula cha nyoka” unamaanisha kwamba washiriki wa jamaa ya mtambaazi hawatakuwa hatari tena kamwe kwa maisha na afya njema ya viumbe wanadamu. Wao watalazimika kutambua kwamba wanadamu ndio mabwana zao walio na utawala juu ya kila kiendacho juu ya dunia, kama vile ilivyokuwa kwa habari ya Adamu katika bustani ya Edeni wakati alipowapa wanyama wote majina bila woga.—Mwanzo 2:19, 20; Hosea 2:18.

 9, 10. Zaburi 65 na Isaya 25:6 hutabiri nini juu ya dunia chini ya utawala wa “Mwana-Mfalme wa Amani”?

⁹ Uzuri na wingi wa vitu vya hiyo bustani ya Edeni ya duniani pote unashinda mawazo yetu. Lakini Biblia inatoa maelezo yao ya kiunabii katika Zaburi ya 65, ikimwambia Mungu. Kwa sehemu zaburi hiyo inasema hivi: “Wewe umeelekeza fikira zako kwenye dunia, ili wewe uipe wingi; wewe unaitajirisha sana. Kijito kutoka kwa Mungu kinajaa maji. Wewe watayarisha nafaka yao, kwa kuwa hivyo ndivyo unaitayarisha dunia.” Wakati huo hakutakuwa na ukosefu wa mvua bali, badala yake, kutakuwa na “manyunyu mengi”! (Zaburi 65:1, 9-13, NW) Kutakuwako wingi wa chakula kwa wakaaji wote wa dunia.

¹⁰ Wingi huo unatabiriwa pia kwenye Isaya 25:6: “Katika mlima huu [Yehova] wa majeshi atawafanyia mataifa yote karamu ya vitu vinono, karamu ya divai iliyokaa juu ya urojorojo wake, karamu ya vinono vilivyojaa mafuta, karamu ya divai iliyokaa juu ya urojorojo wake, iliyochujwa sana.” Wakaaji wa Paradiso iliyorudishwa watakula chakula kinono ambacho kinautia moyo nguvu na kufanya nyuso zao kung’ara. Watakunywa divai, iliyowekwa juu ya masimbi hivi kwamba ikawa ya hali bora na yenye kuchujwa sana, ikifurahisha mioyo yao. (Zaburi 104:14, 15) Hakutakuwa na upungufu wa chakula chini ya Utawala wa Mileani wa “Mwana-Mfalme wa Amani”! Badala yake, kutakuwa na “mfuriko.”—Zaburi 72:16, NW.

Mabadiliko Katika Lugha na Hali ya Hewa

11. Ni badiliko gani katika lugha litakalotukia, na hilo litakuwa na matokeo gani juu ya wanadamu?

¹¹ Je! Paradiso hiyo ya duniani pote itaharibiwa na mchafuko wa kuwa na lugha nyingi? Hapana, kwa sababu yule “Mwana-Mfalme wa Amani” vilevile anaitwa “Mungu Mwenye Nguvu.” (Isaya 9:6, NW) Hivyo yeye anaweza kugeuza ule mchafuko wa lugha ulioanza katika Mnara wa Babeli. (Mwanzo 11:6-9) Ni ipi itakayokuwa lugha ya ujumla ya watoto wote wa kidunia wa “Baba ya Milele”? Je! itakuwa ile lugha ya kwanza ya Adamu wa kwanza, ile lugha ambayo Yehova alimpa? Inaelekea kuwa hivyo. Hata iweje, vizuizi vyote vya lugha vitaondolewa kabisa. Utaweza kusafiri mahali po pote na kupashana habari na watu. Utaweza kuwaelewa wao, nao wataweza kukuelewa wewe. Kutakuwako lugha moja kwa wanadamu wote, na ingefaa Biblia nzima ipatikane kwa lugha hiyo. (Linganisha Sefania 3:9.) Katika hiyo lugha dunia yote itajawa na maarifa ya kumjua Yehova “kama vile maji yanavyoifunika bahari.”—Isaya 11:9.

12. Zekaria 14:9 litapataje utimizo?

¹² Ndipo maneno ya Zekaria 14:9, NW yatakapotimizwa: “Katika siku hiyo Yehova atathibitika kuwa mmoja, na jina lake moja.” Yehova pekee ndiye atakayeabudiwa akiwa Mungu mmoja wa kweli. Katika “siku hiyo” ya Ufalme wa Yehova kupitia “Mwana-Mfalme wa Amani,” Mungu atafunua tamko sahihi la jina lake. Ndipo kutakuwapo tamko moja tu la hilo jina takatifu kwa kila mtu duniani. Jina lake litakuwa moja.

13. Kwa sababu gani hali ya hewa, upepo, na mawimbi havitaleta tisho kwa wakaaji wa dunia?

¹³ Mabadiliko yatakayokuwako ya hali ya hewa na mazingira pia ni mambo yanayowapendeza sana wale wanaoitazamia Paradiso ya duniani pote ya yule “Mwana-Mfalme wa Amani.” Jambo moja ni hakika: Dunia yote itafanywa kuwa mahali pazuri ajabu pa kuishi. Paradiso hiyo haitasumbuliwa kamwe kamwe na mvua kubwa zenye kuharibu, dhoruba, mawimbi yenye kuumuka, tufani, au vimbunga. Upepo, mawimbi, na hali ya hewa vyote vitamtii “Mwana-Mfalme wa Amani.” (Marko 4:37-41) Hiyo bustani ya Edeni ya duniani pote itakuwa na hali ya hewa yenye kusimamiwa vizuri kabisa. Dunia yote itapambwa kwa uzuri kuwa paradiso ya raha, ambapo litakuwa pendeleo la furaha la wanadamu wote kukaa kwa usalama kwa wakati usio na mwisho.

14, 15. (a) Ni ahadi gani iliyoandikwa kwenye Ufunuo 21:3, 4 itakayotimizwa? (b) Mungu atapigaje hema lake katikati ya wanadamu? (c) Ni machozi ya namna gani yatakayofutwa milele?

¹⁴ Hakuna sababu yo yote ya kutoa machozi ya huzuni wakati huo! Neno la kiunabii la Yehova linatuhakikishia hivi: “Nikasikia sauti kubwa toka mbinguni, ikisema: Tazama, hema ya Mungu ni pamoja na watu, naye atakaa pamoja nao, nao watakuwa watu wake, na Mungu mwenyewe atakuwa pamoja nao, atakuwa Mungu wao. Naye atapangusa kila chozi katika macho yao; wala mauti haitakuwa tena; wala maombelezo, wala kilio, wala uchungu hautakuwa tena.”—Ufunuo 21:3, 4, ZSB.

¹⁵ Mbingu ndizo kiti cha enzi cha Mungu, na dunia ni mahali pa kuweka miguu yake. (Isaya 66:1) Kwa hiyo Mungu hawezi kukaa duniani katika maana halisi. Lakini atafanya hema yake pamoja na wanadamu. Wakati wa Utawala wa ile Miaka Elfu, Yehova atafanya hema yake kati ya wanadamu akiwakilishwa na Mwanaye aliyetukuzwa, Yesu Kristo. Inafaa sana jinsi gani kwamba kuwapo kwa Yehova kutawakilishwa na “Mwana-Mfalme wa Amani”! Hilo linatukumbusha maneno ya Isaya 7:14 kuhusu jina lililotumiwa kwa Masihi—Imanueli. Jina hilo linamaanisha “Mungu pamoja nasi.” (Mathayo 1:23) Inasisimua kama nini kwamba kwa njia ya Mwanaye mpendwa zaidi, Mungu ‘atakaa’ pamoja na wanadamu! Ndipo yaelekea kuwa machozi ya furaha yatatoka katika macho yetu tuonapo miujiza ya ajabu ikifanywa na huyu “Mungu Mwenye Nguvu,” sana sana wakati wapendwa wafu wanaporudishwa kwenye uhai katika ufufuo wa kwenye hali za Paradiso. (Matendo 24:15) Miujiza hiyo itakuwa ushuhuda wa ajabu kwamba Mungu yu pamoja na wanadamu na kwamba yeye anafuta machozi yote ya huzuni kutoka macho yetu milele.

Mahali Penye Uzuri Katika Ulimwengu Mzima Usio na Mipaka

16. Je! ni lazima ufufuo wa wafu ungojee mpaka Paradiso imeenezwa na kuifunika dunia? Eleza.

¹⁶ Adamu wa kwanza aliambiwa jinsi ya kuanzisha mpango wa kupanua Paradiso kuanzia papo hapo katika bustani ya Edeni. Kutimizwa kwa kusudi hilo la kwanza la kuipanua duniani pote kutafikiwa. Lakini je! ufufuo wa wafu ni lazima ungojee mpaka Paradiso iwe imeenezwa kuizunguka dunia? Hapana. Kwa mfano, wale wanaorudishwa kwenye ufufuo wa mapema watafufuliwa kwenye sehemu za dunia watakakokuwa wale waokokaji wa Har–Magedoni na watakazokuwa wamezigeuza kuwa paradiso. Kadiri ufufuo wa wanadamu kwa ujumla utakavyokuwa ukiendelea, sehemu hizo za Paradiso zitapanuka mpaka zikutane na kufanyiza Paradiso ya duniani pote.

17. Ni maelezo gani ya Paradiso ya duniani pote yanayotolewa?

¹⁷ Ile Paradiso ijayo itapita bustani zote zenye kuvutia au mashamba ya starehe ya leo. Kwa uzuri wenye kung’aa, dunia yote itachanua ikiwa paradiso yenye amani, yenye kupendeza si jicho la wanadamu tu bali pia hata jicho la Muumba. Itakuwa bustani ya Edeni duniani pote ikipambwa na mimea na miti—mizuri kutazamwa na yenye kutoa chakula cha kutegemeza uhai wa viumbe katika ukamilifu. Dunia itabaki milele ikiwa mahali penye uzuri katika ulimwengu mzima wa Yehova usio na mipaka. Na wanadamu wote waliounganishwa watakuwa na wajibu na pendeleo la milele la kuiweka dunia kuwa mahali kama hapo penye uzuri.

18. Twajuaje kwamba wote, wanaume na wanawake, watakaa pamoja kwa amani wakiwa ndugu na dada?

¹⁸ Washiriki wote wa jamaa hii ya kibinadamu yenye kumwogopa Mungu watakaa pamoja kwa amani wakiwa ndugu na dada katika usafi wote, kwa kuwa watakuwa hasa watoto wa “Baba ya Milele,” “Mwana-Mfalme wa Amani.” Kwa hiyo hakutakuwa na kutawala kwa kujigamba upande wa wanaume juu ya wanawake, dada zao. Lakini wanawake hao waliokamilishwa watakuwa kile ambacho Yehova Mungu alikusudia, hata kama vile alivyomkusudia Hawa kuwa “msaidizi” kwa mumeye mkamilifu, Adamu.—Mwanzo 2:18; Ona pia 1 Petro 3:7.

19. Dunia Paradiso itaonekanaje kwa wale wanaokaa katika mbingu zisizoonekana?

¹⁹ Kuonekana kwa hiyo dunia ya kiparadiso kwa wale walio katika mbingu zisizoonekana ikiwa imejawa na wanaume na wanawake wakamilifu, kutakuwa kuzuri na kwenye kupendeza kuliko vile dunia ilivyoonekana mara ilipoumbwa, “hapo nyota za asubuhi zilipoimba pamoja, na wana wote wa Mungu walipopiga kelele kwa furaha.” (Ayubu 38:7) Hapo ndipo Mungu Aliye Juu Zaidi Sana, Yehova, atakuwa amekwisha ondolewa malawama kabisa kabisa awe ni Yeye ambaye kusudi lake tukufu haliwezi kamwe kushindwa. Sifa zote zimwendee yeye!

[Picha katika ukurasa wa 172, 173]

Paradiso halisi itapamba kwa uzuri dunia, “mahali pa kuweka miguu” pote pa Mungu