Wazee, Hukumuni kwa Uadilifu

“Mkaamue kwa haki [uadilifu, “NW”] kati ya mtu na nduguye.”—KUMBUKUMBU LA TORATI 1:16.

1. Kwa habari ya hukumu, ni utoaji gani wa mamlaka ambao umetukia, na hilo lamaanisha nini kwa mahakimu wa kibinadamu?

AKIWA Hakimu Mkuu Zaidi, Yehova amepatia Mwana wake mamlaka ya hukumu. (Yohana 5:27) Naye, akiwa Kichwa cha kundi la Kikristo, Kristo hutumia jamii ya mtumwa mwaminifu na mwenye akili na Baraza Linaloongoza layo kuweka rasmi wazee, ambao nyakati nyingine huhitaji kutenda wakiwa mahakimu. (Mathayo 24:45-47; 1 Wakorintho 5:12, 13; Tito 1:5, 9) Wakiwa mahakimu wasaidizi, hao wana wajibu wa kufuata kwa ukaribu mfano wa wale Mahakimu wa kimbingu, Yehova na Kristo Yesu.

Kristo—Hakimu Aliye Mfano Mzuri

2, 3. (a) Ni unabii gani wa Kimesiya unaofunua sifa za Kristo akiwa Hakimu? (b) Ni mambo gani hasa yanayostahili kuangaliwa?

² Kuhusu Kristo akiwa Hakimu, iliandikwa hivi kiunabii: “Na roho ya BWANA [Yehova, NW] atakaa juu yake, roho ya hekima na ufahamu, roho ya shauri na uweza, roho ya maarifa na ya kumcha BWANA [Yehova, NW]; na furaha yake itakuwa katika kumcha [hofu ya, NW] BWANA [Yehova, NW]; wala hatahukumu kwa kuyafuata ayaonayo kwa macho yake, wala hataonya kwa kuyafuata ayasikiayo kwa masikio yake; bali kwa haki [uadilifu, NW] atawahukumu maskini, naye atawaonya wanyenyekevu wa dunia kwa adili.”—Isaya 11:2-4.

³ Angalia katika unabii huo sifa zinazomwezesha Kristo “kuhukumu dunia inayokaliwa kwa uadilifu.” (Matendo 17:31, NW) Yeye ahukumu kwa kupatana na roho ya Yehova, hekima ya kimungu, ufahamu, shauri, na maarifa. Ona pia, kwamba yeye ahukumu katika hofu ya Yehova. Hivyo, “kiti cha hukumu cha Kristo,” huwakilisha, “kiti cha hukumu cha Mungu.” (2 Wakorintho 5:10; Warumi 14:10) Yeye ni mwangalifu kuhukumu mambo kwa njia ambayo Mungu huyahukumu. (Yohana 8:16) Yeye hahukumu kwa yale aonayo tu au kwa yale asikiayo tu. Yeye huhukumu kwa adili kwa ajili ya wapole na wanyenyekevu. Ni Hakimu wa ajabu kama nini! Ni mfano wa ajabu kama nini kwa wanadamu wasio wakamilifu wanaotakwa watende katika cheo cha hukumu leo!

Mahakimu wa Kidunia

4. (a) Ni nini itakayokuwa mojawapo ya kazi za wale 144,000 wakati wa Utawala wa Kristo wa Mileani? (b) Ni unabii gani unaoonyesha kwamba baadhi ya Wakristo wapakwa-mafuta watawekwa rasmi kuwa mahakimu wakiwa wangali duniani?

⁴ Maandiko huonyesha kwamba ile hesabu ndogo kwa kulinganishwa ya Wakristo wapakwa-mafuta, kuanzia na wale mitume 12, watakuwa mahakimu washiriki pamoja na Kristo Yesu wakati wa Mileani. (Luka 22:28-30; 1 Wakorintho 6:2; Ufunuo 20:4) Mabaki ya washiriki wapakwa-mafuta wa Israeli wa kiroho walio duniani wenyewe walihukumiwa na kurudishwa katika 1918-19. (Malaki 3:2-4) Kuhusu kurudishwa huko kwa Israeli wa kiroho, unabii huu ulitolewa: “Nami nitarejeza upya waamuzi wako kama walivyokuwa hapo kwanza, na washauri wako kama hapo mwanzo.” (Isaya 1:26) Hi-vyo, kama alivyokuwa amefanya “hapo mwanzo” wa Israeli wa kimnofu, Yehova amewapa mabaki waliorudishwa mahakimu na washauri waadilifu.

5. (a) Ni nani ‘walioitwa wawe mahakimu’ baada ya kurudishwa kwa Israeli wa kiroho, nao huonyeshwaje katika kitabu cha Ufunuo? (b) Waangalizi wapakwa-mafuta wanasaidiwa na nani katika kazi ya hukumu, na hao wanazoezwaje kuwa mahakimu bora zaidi?

⁵ Kwanza, wale ‘watu wenye hekima’ ‘walioitwa wawe mahakimu’ walikuwa wote wazee wapakwa-mafuta. (1 Wakorintho 6:4, 5, HNWW) Waangalizi wapakwa-mafuta waaminifu, wenye kustahiwa, huonyeshwa katika kitabu cha Ufunuo wakiwa wameshikiliwa katika mkono wa kulia wa Yesu, yaani, chini ya udhibiti na mwelekezo wake. (Ufunuo 1:16, 20; 2:1) Tangu 1935 wapakwa-mafuta wamepokea utegemezo wenye uaminifu-mshikamanifu wa “mkutano mkubwa,” ambao tumaini lao ni la kuokoka “dhiki ile iliyo kuu” na kuishi milele kwenye dunia-paradiso. (Ufunuo 7:9, 10, 14-17) “Arusi ya Mwana-Kondoo” ikaribiapo, wengi zaidi na zaidi wa hao wanawekwa rasmi na Baraza Linaloongoza lililopakwa mafuta watumikie wakiwa wazee na mahakimu katika makundi zaidi ya 66,000 ya Mashahidi wa Yehova ulimwenguni pote.a (Ufunuo 19:7-9) Kupitia shule za pekee, wao huzoezwa kushughulikia madaraka katika jamii ya “dunia mpya.” (2 Petro 3:13, HNWW) Shule ya Huduma ya Ufalme, iliyofanywa mwishoni mwa 1991 hadi 1992 katika nchi nyingi, ilikazia kushughulikia kesi za hukumu ifaavyo. Wazee wanaotumikia wakiwa mahakimu wana wajibu wa kumwiga Yehova na Kristo Yesu, ambao hukumu zao ni za kweli na zenye uadilifu.—Yohana 5:30; 8:16; Ufunuo 19:1, 2.

‘Wanaoenenda kwa hofu’

6. Ni kwa nini wazee watumikiao kwenye halmashauri za hukumu wanapaswa ‘kuenenda kwa hofu’?

⁶ Ikiwa Kristo mwenyewe huhukumu katika hofu ya Yehova na kwa msaada wa roho Yake, wazee wasio wakamilifu wapaswa kufanya hivyo kwa kadiri kubwa zaidi kama nini! Wanapopewa mgawo wa kutumikia kwenye halmashauri ya hukumu, wanahitaji ‘kuenenda kwa hofu,’ wakimwita “Baba, yeye ahukumuye kila mtu pasipo upendeleo” awasaidie wahukumu katika uadilifu. (1 Petro 1:17) Wanapaswa wakumbuke kwamba wanashughulika na maisha za watu, “nafsi,” NW, zao, kama watu “watakaotoa hesabu.” (Waebrania 13:17) Kwa sababu ya hayo, kwa hakika watahitaji pia kutoa hesabu mbele za Yehova kwa makosa yoyote ya hukumu yawezayo kuepukwa ambayo huenda wakafanya. Katika ufafanuzi wake wa Waebrania 13:17, J. H. A. Ebrard aliandika hivi: “Ni wajibu wa mchungaji kulinda nafsi za wale waliowekwa chini ya utunzaji wake, na . . . ni lazima atoe hesabu kuhusu hao wote, kuhusu wale pia ambao wamepotea kwa sababu yake. Hilo ni agizo zito. Acha kila mhudumu wa agizo hilo aone kwamba, amekubali kwa hiari cheo hicho chenye madaraka mengi sana.”—Linganisha Yohana 17:12; Yakobo 3:1.

7. (a) Mahakimu wa ki-siku-hizi wanapaswa wakumbuke nini, na kusudi lao lapaswa kuwa nini? (b) Wazee wanapaswa kupata masomo gani kutokana na Mathayo 18:18-20?

⁷ Wazee wanaotenda katika cheo cha hukumu wapaswa kukumbuka kwamba Mahakimu wa kweli wa kila kesi ni Yehova na Kristo Yesu. Kumbuka lile ambalo mahakimu katika Israeli waliambiwa: “Hammfanyii mwanadamu hukumu, ila BWANA [Yehova, NW]; naye yupo pamoja nanyi katika neno la hukumu. Basi sasa hofu ya BWANA [Yehova, NW] na iwe juu yenu. . . . Fanyeni haya wala hamtakuwa na hatia.” (2 Mambo ya Nyakati 19:6-10) Kwa hofu yenye kicho, wazee wanaohukumu kesi wanapaswa wafanye yote wawezayo kuhakikisha kwamba Yehova ‘yupo pamoja nao katika neno la hukumu.’ Uamuzi wao wapaswa kuonyesha kwa usahihi njia ambayo Yehova na Kristo huona jambo hilo. Lile ambalo kwa ufananisho, ‘wafungalo’ (wapatalo kuwa lenye hatia) au ‘wafungualo’ (wapatalo kuwa bila hatia) hapa duniani lapaswa kuwa lile ambalo tayari limefungwa au kufunguliwa mbinguni—kama ilivyofunuliwa kwa yale yaliyoandikwa katika Neno la Mungu lililopuliziwa roho. Wakisali kwa Yehova katika jina la Yesu, atakuwa “katikati yao” kuwasaidia. (Mathayo 18:18-20, kielezi-chini; Mnara wa Mlinzi, Februari 15, 1988, ukurasa 9) Hali kwenye kikao cha hukumu yapaswa kuonyesha kwamba Kristo kwa kweli yumo katikati yao.

Wachungaji wa Wakati Wote

8. Ni nini daraka kuu la wazee kuelekea kundi la kondoo, kama inavyotolewa mfano na Yehova na Yesu Kristo? (Isaya 40:10, 11; Yohana 10:11, 27-29)

⁸ Wazee hawahukumu nyakati zote. Wao ni wachungaji wa wakati wote. Wao ni waponyaji, si watoa adhabu. (Yakobo 5:13-16) Wazo la msingi la neno la Kigiriki kwa mwangalizi (e·piʹsko·pos) ni lile la utunzaji wenye kulinda. Theological Dictionary of the New Testament hutaarifu hivi: “Kuongezea uchungaji [kwenye 1 Petro 2:25], neno [e·piʹsko·pos] hudokeza kazi ya uchungaji ya kutunza au kulinda.” Naam, daraka lao kuu ni kutunza kondoo na kuwalinda, kuwaweka wakiwa ndani ya kundi la kondoo.

9, 10. (a) Paulo alikaziaje wajibu wa kwanza wa wazee, kwa hiyo ni swali gani lifaalo kuulizwa? (b) Maneno ya Paulo kwenye Matendo 20:29 humaanisha nini, kwa hiyo wazee wanaweza kujaribuje kupunguza hesabu ya kesi za hukumu?

⁹ Akisema na wazee wa kundi la Efeso, mtume Paulo aliweka mkazo panapofaa: “Toeni uangalifu kwa nyinyi wenyewe na kundi lote la kondoo, ambalo miongoni mwalo roho takatifu imeweka nyinyi kuwa waangalizi, kuchunga kundi la Mungu, ambalo yeye alinunua kwa damu ya Mwanaye mwenyewe.” (Matendo 20:28, NW) Paulo akazia uchungaji, si kutoa adhabu. Baadhi ya wazee wangefanya vema kutafakari juu ya swali lifuatalo: ‘Je! tungeweza kuokoa kile kiasi kingi cha wakati kinachohitajiwa kuchunguza na kushughulikia kesi za hukumu ikiwa tungetoa wakati na jitihada nyingi zaidi kufanya uchungaji?’

¹⁰ Ni kweli, Paulo alionya dhidi ya “mbwa-mwitu wenye kuonea.” Lakini je, hakuwashutumu hao kwa ‘kutolitendea kundi la kondoo kwa wororo’? (Matendo 20:29, NW) Na ingawa alidokeza kwamba waangalizi waaminifu wapaswa kuondosha “mbwa-mwitu” hao, je, maneno yake hayaonyeshi kwamba wazee wanapaswa kuwatendea washiriki wengine wa kundi la kondoo “kwa wororo”? Kondoo anapokuwa mgonjwa kiroho na kuacha kumtumikia Mungu, yeye anahitaji nini—kupigwa au kuponywa, kutiwa adhabu au kutolewa uchungaji? (Yakobo 5:14, 15) Kwa hiyo, wazee wanapaswa kuratibu kwa kawaida wakati wa kufanya kazi ya uchungaji. Hilo laweza kuleta tokeo lenye furaha la kutumia wakati mchache zaidi katika kesi za hukumu zenye kutumia wakati mwingi zinazohusu Wakristo ambao wameshindwa na dhambi. Kwa hakika, hangaiko la kwanza la wazee lapaswa kuwa kuandaa chanzo cha kitulizo na burudisho, hivyo kuendeleza amani, utulivu, na usalama miongoni mwa watu wa Yehova.—Isaya 32:1, 2.

Kutumikia Mkiwa Wachungaji na Mahakimu Wafadhili

11. Ni kwa nini wazee wanaotumikia kwenye halmashauri za hukumu wanahitaji kuwa bila upendeleo na kuwa na “hekima itokayo juu”?

¹¹ Uchungaji wa bidii zaidi kabla ya Mkristo kuchukua hatua ya makosa huenda kwa kweli ikapunguza hesabu ya kesi za hukumu miongoni mwa watu wa Yehova. (Linganisha Wagalatia 6:1.) Hata hivyo, kwa sababu ya dhambi na kutokamilika kwa binadamu, waangalizi Wakristo huenda mara kwa mara wakahitaji kushughulikia kesi za ukosaji. Ni kanuni zipi zipaswazo kuwaongoza? Hizo hazikubadilika tangu wakati wa Musa au ule wa Wakristo wa mapema. Maneno ya Musa yaliyoelekezwa kwa mahakimu katika Israeli yangali yanatumika: “Mnapokuwa na kikao kati ya ndugu zenu, ni lazima mhukumu kwa uadilifu . . . Hampaswi kuwa na upendeleo katika hukumu.” (Kumbukumbu la Torati 1:16, 17, NW) Kutokuwa na upendeleo ni sifa ya “hekima itokayo juu,” hekima iliyo ya muhimu sana kwa wazee watumikiao kwenye halmashauri za hukumu. (Yakobo 3:17; Mithali 24:23) Hekima ya jinsi hiyo itawasaidia watambue tofauti kati ya udhaifu na uovu.

12. Mahakimu wanahitaji kuwa si watu waadilifu tu bali watu wema katika maana gani?

¹² ‘Ni lazima [wazee] wahukumu kwa uadilifu,’ kulingana na viwango vya Yehova vya yaliyo mema na mabaya. (Zaburi 19:9) Hata hivyo, wanapojitahidi kuwa watu waadilifu, wanapaswa pia wajaribu kuwa watu wema, katika maana ya ule utofautiano ambao Paulo hufanya kwenye Warumi 5:7, 8. Kikieleza kuhusu mistari hiyo katika makala yacho juu ya “Uadilifu,” kitabu Insight on the Scriptures hutaarifu hivi: “Utumizi wa neno la Kigiriki huonyesha kwamba mtu anayetokeza, au aliye na sifa ya wema ni mtu ambaye ni mkarimu (mwenye nia ya kufanya mema au kuwaletea wengine manufaa) na mfadhili (akionyesha wema huo kwa bidii). Hahangaikii kufanya tu lile linalotakwa na haki lakini hufanya zaidi ya hilo, akichochewa na ufikirio unaofaa kwa wengine na tamaa ya kuwanufaisha na ya kuwasaidia.” (Buku 2, ukurasa 809) Wazee ambao si waadilifu tu bali ni wema pia watawatendea wakosaji kwa ufikirio wenye fadhili. (Warumi 2:4) Wanapaswa kutaka kuonyesha rehema na huruma. Wanapaswa kufanya lile wawezalo kusaidia mkosaji aone uhitaji wa kutubu, hata ingawa huenda asionekane kuitikia jitihada zao mwanzoni.

Mtazamo Ufaao Kwenye Vikao

13. (a) Mzee atendapo akiwa hakimu, yeye haachi kuwa nini? (b) Ni shauri gani la Paulo linalotumika pia kwenye vikao vya hukumu?

¹³ Hali inapohitaji kikao cha hukumu, waangalizi hawapaswi kusahau kwamba wao wangali wachungaji, wanaoshughulika na kondoo wa Yehova, chini ya “mchungaji mwema.” (Yohana 10:11) Shauri ambalo Paulo alitoa kuhusu msaada wa kawaida wanaopewa kondoo ambao wamo katika hali ngumu hutumika kwa nguvu iyo hiyo kwenye vikao vya hukumu. Aliandika hivi: “Ndugu zangu, mtu akighafilika katika kosa lo lote, ninyi mlio wa Roho [wenye kustahili kiroho, NW] mrejezeni upya mtu kama huyo kwa roho ya upole, ukijiangalia nafsi yako usije ukajaribiwa wewe mwenyewe. Mchukuliane mizigo na kuitimiza hivyo sheria ya Kristo.”—Wagalatia 6:1, 2.b

14. Waangalizi wanapaswa waoneje vikao vya hukumu, na mtazamo wao kuelekea mkosaji wapaswa kuwa nini?

¹⁴ Badala ya kujifikiria wenyewe kuwa mahakimu wakuu wanaokutana kutekeleza adhabu, wazee wanaotumikia kwenye halmashauri ya hukumu wanapaswa kuona kikao hicho kuwa sehemu nyingine ya kazi yao ya uchungaji. Mmoja wa kondoo wa Yehova yumo hatarini. Wanaweza kufanya nini ili wamwokoe? Je! ni kuchelewa mno kumsaidia kondoo huyo ambaye amepotea kutoka katika kundi la kondoo? Tunatumaini sivyo. Wazee wanapaswa wawe na maoni yafaayo katika kuonyesha rehema wakati ambapo kufanya hivyo kungefaa. Si kwamba wanapaswa kushusha viwango vya Yehova ikiwa dhambi nzito imefanywa. Lakini kuwa kwao wenye ufahamu juu ya mambo yoyote yawezayo kupunguza uzito wa hali kutawasaidia waonyeshe huruma inapowezekana. (Zaburi 103:8-10; 130:3) Kwa kusikitisha, wakosaji wengine huwa wenye ushupavu sana katika mtazamo wao hivi kwamba wazee hulazimika kuonyesha uthabiti, ingawa hawaonyeshi kamwe ukali usio na huruma.—1 Wakorintho 5:13.

Sababu za Vikao vya Hukumu

15. Tatizo zito linapotokea kati ya watu, ni nini kipaswacho kuchunguzwa kwanza?

¹⁵ Tatizo zito linapotokea kati ya watu, wazee wenye hekima watachunguza kwanza kama wale wanaohusika wamejaribu kusuluhisha jambo hilo faraghani, kupatana na Mathayo 5:23, 24 au Mathayo 18:15. Ikiwa hilo halikufaulu, labda shauri kutoka kwa mzee mmoja au wawili litatosha. Tendo la hukumu ni la lazima tu ikiwa dhambi nzito iwezayo kuongoza hadi hatua ya kutengwa na ushirika imefanywa. (Mathayo 18:17; 1 Wakorintho 5:11) Lazima kuwe na msingi imara wa Kimaandiko ili kufanyiza halmashauri ya hukumu. (Ona Mnara wa Mlinzi, Septemba 15, 1989, ukurasa 18.) Halmashauri ya hukumu inapofanyizwa, yabidi wazee wanaostahili zaidi wachaguliwe kwa kesi hiyo hususa.

16. Wazee hujaribu kutimiza nini kupitia vikao vya hukumu?

¹⁶ Wazee hujaribu kutimiza nini kupitia vikao vya hukumu? Kwanza, haiwezekani kuhukumu kwa uadilifu isipokuwa ukweli unajulikana. Kama katika Israeli, ni lazima mambo mazito ‘yatafutwe kwa bidii.’ (Kumbukumbu la Torati 13:14; 17:4) Kwa hiyo kusudi moja la kikao ni ili kupata kujua mambo ya hakika ya kesi hiyo. Lakini hilo laweza na lapaswa lifanywe kwa upendo. (1 Wakorintho 13:4, 6, 7) Mambo ya hakika yanapojulikana, wazee watafanya lolote lililo la lazima ili kulinda kundi na kudumisha ndani yalo viwango vya juu vya Yehova na mtiririko usiozuiwa wa roho yake. (1 Wakorintho 5:7, 8) Hata hivyo, mojawapo ya makusudi ya kikao ni kuokoa mtenda dhambi aliye hatarini ikiwezekana.—Linganisha Luka 15:8-10.

17. (a) Mtu aliyeshtakiwa apaswa kutendewaje wakati wa kikao, na kwa kusudi gani? (b) Hilo litahitaji nini kwa upande wa washiriki wa halmashauri ya hukumu?

¹⁷ Mtu aliyeshtakiwa hapaswi kamwe kutendewa kwa njia nyingine yoyote ila kama kondoo wa Mungu. Yeye apaswa atendewe kwa wororo. Ikiwa dhambi moja (au nyingi) imefanywa, kusudi la mahakimu waadilifu litakuwa kusaidia mtenda dhambi ajirekebishe, aelewe kosa la njia yake, atubu, na hivyo kumwondosha katika “mtego wa Ibilisi.” Itahitaji “ustadi wa kufundisha,” “kufunza kwa upole.” (2 Timotheo 2:24-26; 4:2, NW) Namna gani ikiwa mtenda dhambi atambua kwamba amefanya dhambi, achomwa moyo wake, na kumwomba Yehova msamaha? (Linganisha Matendo 2:37.) Ikiwa halmashauri inasadikishwa kwamba ataka msaada kwa unyofu, kwa ujumla hakungekuwa na uhitaji wa kumtenga na ushirika.—Ona Mnara wa Mlinzi, Juni 15, 1984, ukurasa 23, fungu 4.

18. (a) Ni wakati gani halmashauri ya hukumu yapaswa ionyeshe uthabiti katika kutenga na ushirika mkosaji? (b) Wazee wanapaswa kujitahidi wenyewe kwa ajili ya kondoo wanaopotea kwa sababu ya hali gani yenye kuhuzunisha?

¹⁸ Kwa upande ule mwingine, washiriki wa halmashauri ya hukumu wanapokabiliwa na kesi ya wazi ya uasi-imani pasipo kujuta, uasi wa kimakusudi dhidi ya sheria za Yehova, au uovu wa wazi, wajibu wao ni kulinda wale washiriki wengine wa kundi kwa kutenga na ushirika mkosaji asiyetubu. Si lazima halmashauri ya hukumu ikutane na mkosaji tena na tena au imwamulie mambo ikijaribu kumlazimisha atubu, ikiwa ni wazi kwamba yeye hana huzuni ya kimungu.c Katika miaka ya hivi karibuni kutengwa na ushirika ulimwenguni pote kumekuwa karibu asilimia 1 ya wahubiri. Hiyo inamaanisha kwamba kati ya karibu kondoo mia moja wanaobaki zizini, mmoja hupotea—angalau kwa muda fulani. Kwa kufikiria wakati na jitihada inayohitajiwa ili kumleta mtu zizini, je, haihuzunishi kujua kwamba makumi ya maelfu ‘hukabidhiwa kwa Shetani’ kila mwaka?—1 Wakorintho 5:5, HNWW.

19. Wazee wanaotumikia kwenye halmashauri ya hukumu hawapaswi kamwe kusahau nini, kwa hiyo kusudi lao litakuwa nini?

¹⁹ Wazee wanaoanza kesi ya hukumu wanapaswa wakumbuke kwamba visa vingi vya dhambi kundini huhusisha udhaifu, si uovu. Hawapaswi kusahau kamwe kielezi cha Yesu cha kondoo aliyepotea, ambacho alimalizia kwa maneno haya: “Nawaambia, Vivyo hivyo kutakuwa na furaha mbinguni kwa ajili ya mwenye dhambi mmoja atubuye, kuliko kwa ajili ya wenye haki tisini na kenda ambao hawana haja ya kutubu.” (Luka 15:7) Kwa kweli, “Bwana [Yehova, NW] . . . hapendi mtu ye yote apotee, bali wote wafikilie toba.” (2 Petro 3:9) Kwa msaada wa Yehova, halmashauri za hukumu kotekote ulimwenguni na zifanye yote ziwezayo kuleta shangwe mbinguni kwa kuwasaidia wakosaji waone uhitaji wa kutubu na kurudisha miguu yao tena kwenye barabara nyembamba iongozayo kwenye uhai wa milele.—Mathayo 7:13, 14.

[Maelezo ya Chini]

Maswali ya Kupitia

◻ Kwa kufuata mfano wa Mchungaji Mkuu na wa Mchungaji Mwema, wazee wanapaswa kupendezwa na nini hasa?

◻ Ni kwa njia gani wazee wanaweza kujitahidi kupunguza hesabu ya kesi za hukumu?

◻ Mahakimu wanahitaji kuwa si waadilifu tu bali wema pia katika maana gani?

◻ Mkosaji apaswa kutendewaje wakati wa kikao, na kwa kusudi gani?

◻ Kwa nini kutenga na ushirika ni hatua ya mwisho kabisa kuchukuliwa?

[Picha katika ukurasa wa 16]

Uchungaji wa mapema unapofanywa, kesi nyingi za hukumu zinaweza kuepukwa

[Picha katika ukurasa wa 18]

Hata wakati wa kikao cha hukumu, wazee wanapaswa kujaribu kurekebisha mkosaji katika roho ya upole