Sura ya 13

Wokovu na Kushangilia Chini ya Utawala wa Mesiya

Isaya 11:1–12:6

 1. Fafanua hali ya kiroho ya watu wa agano wa Mungu katika siku za Isaya.

KATIKA siku za Isaya, hali ya kiroho ya watu wa agano wa Mungu ilikuwa mbaya. Hata chini ya utawala wa wafalme waaminifu, kama vile Uzia na Yothamu, watu wengi waliabudia mahali pa juu. (2 Wafalme 15:1-4, 34, 35; 2 Mambo ya Nyakati 26:1, 4) Hezekia alipokuwa mfalme, ilibidi aondoe vyombo na mazoea ya ibada ya Baali nchini. (2 Mambo ya Nyakati 31:1) Haishangazi kuwa Yehova aliwasihi watu wake wamrudie naye akaonya kuhusu nidhamu itakayokuja!

2, 3. Yehova hutoa kitia-moyo gani kwa wale walio na hamu ya kumtumikia licha ya ukosefu ulioenea sana wa uaminifu?

² Hata hivyo, sio wote ambao waliasi kabisa. Yehova alikuwa na manabii waaminifu, na labda kulikuwepo Wayahudi fulani waliowasikiliza. Yehova aliwapa watu hao maneno yenye kufariji. Baada ya kufafanua uharibifu mkubwa utakaoikumba Yuda wakati wa uvamizi wa Ashuru, nabii Isaya alipuliziwa kuandika mojawapo ya mafungu bora zaidi katika Biblia nzima, ufafanuzi wa baraka zitakazokuja chini ya utawala wa Mesiya.a Sehemu fulani za baraka hizo zilitimizwa kwa kiwango kidogo Wayahudi waliporudi kutoka utekwani Babiloni. Kwa jumla, hata hivyo, unabii huo hutimizwa kwa njia kuu leo. Ni kweli kwamba Isaya na Wayahudi wengine waaminifu wa wakati wake walikufa kabla ya kuona baraka hizo. Lakini walizitazamia kwa imani nao wataona utimizo wa maneno ya Isaya baada ya ufufuo.—Waebrania 11:35.

³ Watu wa Yehova leo wahitaji kitia-moyo pia. Maadili yanayozorota haraka ulimwenguni, upinzani mkali kwa ujumbe wa Ufalme, na udhaifu mbalimbali wa kibinafsi huwasumbua wote. Maneno mazuri mno ya Isaya kuhusu Mesiya na utawala wake yaweza kuwaimarisha na kuwasaidia watu wa Mungu kukabiliana na magumu hayo.

Mesiya—Kiongozi Mwenye Uwezo

4, 5. Isaya alitabiri nini juu ya kuja kwa Mesiya, na yaonekana Mathayo alitumiaje maneno ya Isaya?

⁴ Karne kadhaa kabla ya wakati wa Isaya, Waebrania wengine walioandika Biblia walitaja kuja kwa Mesiya, Kiongozi wa kweli, ambaye Yehova angemtuma kwa Israeli. (Mwanzo 49:10; Kumbukumbu la Torati 18:18; Zaburi 118:22, 26) Sasa kupitia Isaya, Yehova aongeza mambo ya ziada. Isaya aandika: “Litatoka chipukizi katika shina la Yese, na tawi litakalotoka katika mizizi yake litazaa matunda.” (Isaya 11:1; linganisha Zaburi 132:11.) Maneno “chipukizi” na “tawi” yaonyesha kuwa Mesiya atakuwa mzao wa Yese kupitia Daudi mwana wake, aliyetiwa mafuta awe mfalme wa Israeli. (1 Samweli 16:13; Yeremia 23:5; Ufunuo 22:16) Mesiya wa kweli awasilipo, “tawi” hilo, la nyumba ya Daudi, litazaa matunda mema.

⁵ Yesu ndiye Mesiya aliyeahidiwa. Mathayo, mwandikaji wa gospeli, alirejezea maneno ya Isaya 11:1 aliposema kwamba Yesu alipoitwa “Mnazareti,” jina hilo lilitimiza maneno ya manabii. Kwa kuwa Yesu alilelewa mjini Nazareti, aliitwa Mnazareti, jina ambalo labda lahusiana na neno la Kiebrania lililotumiwa katika Isaya 11:1, yaani, “tawi.”b—Mathayo 2:23, NW, kielezi-chini; Luka 2:39, 40.

 6. Yatabiriwa kwamba Mesiya atakuwa mtawala wa aina gani?

⁶ Mesiya atakuwa mtawala wa aina gani? Je, atakuwa kama Mwashuri mkatili, mshupavu, anayeharibu ufalme wa kaskazini wa Israeli wenye makabila kumi? Sivyo hata kidogo. Isaya asema hivi kumhusu Mesiya: “Roho ya BWANA atakaa juu yake, roho ya hekima na ufahamu, roho ya shauri na uweza, roho ya maarifa na ya kumcha BWANA; na furaha yake itakuwa katika kumcha BWANA.” (Isaya 11:2, 3a) Mesiya ateuliwa na roho takatifu ya Mungu, wala si kwa kutiwa mafuta. Jambo hilo latukia kwenye ubatizo wa Yesu, Yohana Mbatizaji aonapo roho takatifu ya Mungu iliyo kama njiwa ikiteremka juu ya Yesu. (Luka 3:22) Roho ya Yehova ‘yakaa juu ya’ Yesu, naye atoa uthibitisho wa jambo hilo atendapo kwa hekima, ufahamu, shauri, uweza, na ujuzi. Ni sifa bora kama nini anazostahili mtawala kuwa nazo!

 7. Yesu aliwaahidi nini wafuasi wake waaminifu?

⁷ Wafuasi wa Yesu pia waweza kupokea roho takatifu. Katika mojawapo ya hotuba zake, Yesu alitangaza: “Ikiwa nyinyi, mjapokuwa waovu, mwajua jinsi ya kuwapa watoto wenu zawadi zilizo njema, je, si zaidi sana yule Baba aliye mbinguni atawapa roho takatifu wale wanaomwomba!” (Luka 11:13) Basi, hatupaswi kamwe kusita kumwomba Mungu roho takatifu, wala tusikome kukuza matunda yake mema—“upendo, shangwe, amani, ustahimilivu, fadhili, wema, imani, upole, kujidhibiti.” (Wagalatia 5:22, 23) Yehova aahidi kujibu maombi ya wafuasi wa Yesu yanayohusu “hekima ya kutoka juu” ili iwasaidie kukabiliana kwa mafanikio na magumu ya maisha.—Yakobo 1:5; 3:17.

 8. Yesu apataje furaha katika kumcha Yehova?

⁸ Mesiya anamchaje Yehova? Kwa hakika, Yesu hatishwi na Mungu, akihofu hukumu yake. Badala yake, Mesiya anamcha Mungu kwa staha, staha yenye upendo kwake. Mtu mwenye kumhofu Mungu hutamani ‘kufanya sikuzote mambo yale yanayompendeza,’ kama afanyavyo Yesu. (Yohana 8:29) Kwa neno na tendo, Yesu afundisha kwamba hakuna shangwe kubwa zaidi kuliko ile inayotokana na kutembea kila siku katika hofu ifaayo ya Yehova.

Hakimu Mwadilifu na Mwenye Rehema

 9. Yesu atoa kielelezo gani kwa wale wenye wajibu wa kuamua mambo katika kutaniko la Kikristo?

⁹ Isaya atabiri sifa zaidi za Mesiya: “Hatahukumu kwa kuyafuata ayaonayo kwa macho yake, wala hataonya kwa kuyafuata ayasikiayo kwa masikio yake.” (Isaya 11:3b) Iwapo ungefikishwa mahakamani, je, hungefurahia hakimu kama huyo? Akiwa katika cheo chake cha Hakimu wa wanadamu wote, Mesiya hapeperushwi na hoja zisizo za kweli, hila za mahakamani, porojo, au mambo ya kijuujuu, kama vile mali. Yeye atambua udanganyifu naye aona mengi zaidi kuliko sura ya nje inayopotosha, huku akitambua “mtu wa siri wa moyoni,” “mtu aliyefichika.” (1 Petro 3:4, NW, kielezi-chini) Kielelezo bora zaidi cha Yesu ni kigezo kwa wote wenye wajibu wa kuamua mambo katika kutaniko la Kikristo.—1 Wakorintho 6:1-4.

10, 11. (a) Yesu huwarekebishaje wafuasi wake? (b) Yesu huwapa waovu hukumu gani?

¹⁰ Je, sifa bora zaidi za Mesiya zitaathirije hukumu zake? Isaya aeleza: “Kwa haki atawahukumu maskini, naye atawaonya wanyenyekevu wa dunia kwa adili; naye ataipiga dunia kwa fimbo ya kinywa chake, na kwa pumzi ya midomo yake atawaua wabaya. Na haki itakuwa mshipi wa viuno vyake, na uaminifu mshipi wa kujifungia.”—Isaya 11:4, 5.

¹¹ Wafuasi wake wanapohitaji kurekebishwa, Yesu huwarekebisha kwa njia inayowanufaisha zaidi—kielelezo bora kwa wazee Wakristo. Kwa upande mwingine, wale wanaozoea uovu wanatarajia hukumu kali. Mungu atakapouhukumu mfumo huu wa mambo, Mesiya “ataipiga dunia” kwa sauti yake yenye mamlaka, huku akitoa hukumu ya kuharibu waovu wote. (Zaburi 2:9; linganisha Ufunuo 19:15.) Hatimaye, hakutabaki watu wowote waovu wanaoharibu amani ya wanadamu. (Zaburi 37:10, 11) Yesu, ambaye viuno vyake vimefungwa kwa haki na uaminifu, ana uwezo wa kutekeleza hayo.—Zaburi 45:3-7.

Hali Zilizobadilika Duniani

12. Huenda Myahudi akawa na mahangaiko gani anapotafakari juu ya kurudi katika Bara Lililoahidiwa kutoka Babiloni?

¹² Wazia juu ya Mwisraeli ambaye ametoka tu kupata habari juu ya agizo la Koreshi kwamba Wayahudi warudi Yerusalemu na kulijenga hekalu upya. Je, ataacha hali salama ya Babiloni na kufunga safari ndefu ya kurudi nyumbani? Wakati wa kipindi cha miaka 70 ya uhamisho wa Israeli, mashamba yaliyohamwa yamejaa magugu. Mbwa-mwitu, chui, simba, na dubu watembea-tembea bila wasiwasi katika mashamba hayo. Fira pia wakaa humo. Itabidi Wayahudi wanaorudi wategemee mifugo ili wapate kuishi—makundi ya kondoo na ng’ombe yatatoa maziwa, sufu, na nyama, na mafahali watavuta plau. Je, wataliwa na wanyama-wawindaji? Je, nyoka watawauma watoto wadogo? Namna gani hatari ya kuviziwa safarini?

13. (a) Isaya atoa wazo gani lenye kuchangamsha moyo? (b) Twajuaje kwamba amani anayoifafanua Isaya yahusisha mambo mengi kuliko tu usalama kutokana na wanyama wa mwituni?

¹³ Sasa Isaya atoa wazo lenye kusisimua moyo kuhusu hali ambazo Mungu ataleta nchini humo. Asema: “Mbwa-mwitu atakaa pamoja na mwana-kondoo, na chui atalala pamoja na mwana-mbuzi; ndama na mwana-simba na kinono watakuwa pamoja, na mtoto mdogo atawaongoza. Ng’ombe na dubu watalisha pamoja; watoto wao watalala pamoja; na simba atakula majani kama ng’ombe. Na mtoto anyonyaye atacheza penye tundu la nyoka, na mtoto aliyeachishwa atatia mkono wake katika pango la fira. Hawatadhuru wala hawataharibu katika mlima wangu wote mtakatifu; maana dunia itajawa na kumjua BWANA [“Yehova,” “NW”], kama vile maji yanavyoifunika bahari.” (Isaya 11:6-9) Je, maneno hayo hayachangamshi moyo? Ona kwamba amani inayofafanuliwa hapo hutokana na kumjua Yehova. Basi, yanayohusika ni mengi kuliko tu usalama kutokana na wanyama wa mwituni. Kumjua Yehova hakutabadili wanyama, bali kutabadili watu. Waisraeli hawatahitaji kuogopa wanyama wa mwituni wala wanadamu walio kama wanyama wakiwa safarini wala wakiwa katika nchi yao iliyorudishwa.—Ezra 8:21, 22; Isaya 35:8-10; 65:25.

14. Ni upi ulio utimizo mkubwa zaidi wa Isaya 11:6-9?

¹⁴ Hata hivyo, unabii huo una utimizo mkubwa zaidi. Yesu, Mesiya, alitawazwa kwenye Mlima Sayuni wa mbinguni mwaka wa 1914. Mwaka wa 1919, waliobaki wa “Israeli wa Mungu” waliachiliwa kutoka katika utekwa wa Babiloni nao wakashiriki katika kurudisha ibada ya kweli. (Wagalatia 6:16) Tokeo lilikuwa kufunguliwa kwa njia kwa ajili ya utimizo wa kisasa wa unabii wa Isaya uhusuo Paradiso. “Ujuzi sahihi,” yaani ujuzi juu ya Yehova, umebadili nyutu za watu. (Wakolosai 3:9, 10) Watu waliokuwa wajeuri hapo awali wamekuwa wenye amani. (Waroma 12:2; Waefeso 4:17-24) Matukio hayo sasa yameathiri mamilioni ya watu kwa sababu unabii wa Isaya umekuja kuhusisha Wakristo wanaoongezeka haraka, walio na tumaini la uhai duniani. (Zaburi 37:29; Isaya 60:22) Hao wamejizoeza kutazamia wakati ambapo dunia yote itarudishwa kuwa paradiso salama, yenye amani, kulingana na kusudi la awali la Mungu.—Mathayo 6:9, 10; 2 Petro 3:13.

15. Je, twaweza kutarajia ifaavyo maneno ya Isaya yatimizwe kihalisi katika ulimwengu mpya? Eleza.

¹⁵ Je, unabii wa Isaya utakuwa na utimizo zaidi, labda ulio halisi zaidi, katika Paradiso itakayorudishwa? Yaonekana inafaa kufikiri hivyo. Unabii huo huwapa wote watakaoishi chini ya utawala wa Mesiya uhakikishio uleule uliowapa Waisraeli waliokuwa wakirudi; wao pamoja na watoto wao hawataogopa madhara kutoka popote—kwa binadamu au kwa wanyama. Chini ya utawala wa Ufalme wa Mesiya, wakazi wote wa dunia watafurahia hali zenye amani kama zile ambazo Adamu na Hawa walifurahia huko Edeni. Ni wazi kwamba Maandiko hayafunui mambo yote kuhusu namna maisha yalivyokuwa katika Edeni—wala vile yatakavyokuwa katika Paradiso. Hata hivyo, twaweza kuwa na uhakika kwamba, chini ya utawala wenye hekima na upendo wa Mfalme Yesu Kristo, kila jambo litakuwa kama istahilivyo.

Ibada Safi Yarudishwa Kupitia Mesiya

16. Ni nini kilichokuwa ishara kwa watu wa Mungu mwaka wa 537 K.W.K.?

¹⁶ Ibada safi ilishambuliwa kwa mara ya kwanza katika Edeni Shetani alipofaulu kushawishi Adamu na Hawa wasimtii Yehova. Hadi leo hii, Shetani hajaacha lengo lake la kugeuzia mbali watu wengi iwezekanavyo kutoka kwa Mungu. Lakini Yehova hataruhusu kamwe ibada safi itoweke duniani. Jina lake lahusika, naye huwajali wale wanaomtumikia. Basi, kupitia Isaya, atoa ahadi maarufu: “Itakuwa katika siku hiyo, shina la Yese lisimamalo kuwa ishara kwa kabila za watu, yeye ndiye ambaye mataifa watamtafuta; na mahali pake pa kupumzikia patakuwa na utukufu.” (Isaya 11:10) Mwaka wa 537 K.W.K., Yerusalemu, jiji ambalo Daudi alikuwa amelifanya kuwa jiji kuu la taifa, lilikuwa ishara, likiwaita mabaki waaminifu wa Wayahudi waliotawanywa warudi na kujenga hekalu upya.

17. Yesu ‘aliinukaje ili kutawala mataifa’ katika karne ya kwanza na leo pia?

¹⁷ Hata hivyo, unabii huo huelekeza kwenye mambo mengi kuliko hayo. Kama tulivyoona, huo huelekeza kwenye utawala wa Mesiya, Kiongozi pekee wa kweli wa watu wa mataifa yote. Mtume Paulo alinukuu Isaya 11:10 ili kuonyesha kuwa watu wa mataifa katika siku yake wangepata nafasi katika kutaniko la Kikristo. Akinukuu tafsiri ya Septuagint juu ya mstari huo, aliandika: “Isaya asema: ‘Kutakuwa na mzizi wa Yese, na kutakuwa na mmoja ambaye anainuka ili kutawala mataifa; juu yake mataifa yataweka tumaini lao.’” (Waroma 15:12) Mbali na hayo, unabii huo hufika mbali hata zaidi—kufikia siku yetu wakati ambapo watu wa mataifa waonyesha upendo wao kwa Yehova kwa kuunga mkono ndugu watiwa-mafuta wa Mesiya.—Isaya 61:5-9; Mathayo 25:31-40.

18. Yesu amekuwaje mahali pa kukusanyika katika siku yetu?

¹⁸ Katika utimizo wa leo, “siku hiyo” anayoirejezea Isaya ilianza Mesiya alipotawazwa kuwa Mfalme wa Ufalme wa mbinguni wa Mungu mwaka wa 1914. (Luka 21:10; 2 Timotheo 3:1-5; Ufunuo 12:10) Tangu wakati huo, Yesu Kristo amekuwa ishara dhahiri, mahali pa kukusanyika, kwa Israeli wa kiroho na kwa watu wa mataifa yote wanaotamani serikali yenye uadilifu. Chini ya mwelekezo wa Mesiya, habari njema ya Ufalme imefikishwa kwa mataifa yote, kama alivyotabiri Yesu. (Mathayo 24:14; Marko 13:10) Hiyo habari njema ina matokeo makubwa. “Umati mkubwa, ambao hakuna mtu [awezaye] kuuhesabu” unamtii Mesiya kwa kujiunga na mabaki watiwa-mafuta katika ibada safi. (Ufunuo 7:9) Watu wengi wapya waendeleapo kujiunga na mabaki katika “nyumba ya sala” ya Yehova ya kiroho, wao huongeza kwenye utukufu wa ‘mahali pa kupumzikia’ pa Mesiya, hekalu kubwa la kiroho la Mungu.—Isaya 56:7; Hagai 2:7.

Watu Walioungana Wamtumikia Yehova

19. Ni katika pindi gani mbili Yehova arudisha mabaki ya watu wake waliotawanyika duniani kote?

¹⁹ Kisha Isaya awakumbusha Waisraeli kuwa wakati fulani Yehova aliwaandalia wokovu, adui mwenye nguvu alipolikandamiza taifa hilo. Sehemu hiyo ya historia ya Israeli—Yehova kulikomboa taifa hilo kutoka utekwani Misri—yathaminiwa sana na Wayahudi wote waaminifu. Isaya aandika: “Itakuwa katika siku hiyo, Bwana atapeleka mkono wake mara ya pili, ili ajipatie watu wake watakaosalia, kutoka Ashuru, na kutoka Misri, na kutoka Pathrosi, na kutoka Kushi, na kutoka Elamu, na kutoka Shinari, na kutoka Hamathi, na kutoka visiwa vya bahari. Naye atawatwekea mataifa bendera [“atawainulia mataifa ishara,” “NW”], atawakutanisha watu wa Israeli waliotupwa, atawakusanya watu wa Yuda waliotawanyika, kutoka ncha nne za dunia.” (Isaya 11:11, 12) Huku akiwa kana kwamba anawashika mkono, Yehova ataongoza mabaki waaminifu wa Israeli na wa Yuda pia kutoka katika mataifa ambamo wametawanyika naye atawaleta salama nyumbani. Hilo latukia kwa kadiri ndogo mwaka wa 537 K.W.K. Lakini utimizo mkuu ni wenye utukufu kama nini! Mwaka wa 1914, Yehova alimwinua Yesu Kristo aliyetawazwa kuwa ‘ishara kwa mataifa.’ Kuanzia mwaka wa 1919, waliobaki wa “Israeli wa Mungu” walianza kumiminika kwenye ishara hiyo, wakiwa na hamu ya kushiriki katika ibada safi chini ya Ufalme wa Mungu. Taifa hilo la pekee la kiroho latoka katika “kila kabila na ulimi na watu na taifa.”—Ufunuo 5:9.

20. Watu wa Mungu watafurahia mwungano gani baada ya kurudi kutoka Babiloni?

²⁰ Isaya sasa afafanua mwungano wa taifa lililorudishwa. Akirejezea ufalme wa kaskazini kuwa Efraimu na ufalme wa kusini kuwa Yuda, asema: “Wivu wa Efraimu utaondoka, na wale wanaomwudhi Yuda watakatiliwa mbali; Efraimu hatamhusudu Yuda, wala Yuda hatamwudhi Efraimu. Nao watashuka, watalirukia bega la Wafilisti upande wa magharibi; nao pamoja watawateka wana wa mashariki; watanyosha mkono juu ya Edomu na Moabu; na wana wa Amoni watawatii.” (Isaya 11:13, 14) Wayahudi warudipo kutoka Babiloni, hawatagawanyika tena kuwa mataifa mawili. Washiriki kutoka kwa makabila yote ya Israeli watarudi nchini mwao kwa mwungano. (Ezra 6:17) Hawataoneana uchungu wala kuchukiana. Wakiwa watu walioungana, watasimama kwa ushindi dhidi ya adui zao walio katika mataifa yanayowazingira.

21. Mwungano wa watu wa Mungu leo unatokezaje kwelikweli?

²¹ Jambo lenye kuvutia hata zaidi ni ule mwungano wa “Israeli wa Mungu.” Yale makabila 12 ya mfano ya Israeli wa kiroho, yamefurahia mwungano unaotegemea upendo kwa Mungu na kwa ndugu na dada zao wa kiroho kwa karibu miaka 2,000. (Wakolosai 3:14; Ufunuo 7:4-8) Leo, watu wa Yehova—Waisraeli wa kiroho na pia wale walio na tumaini la uhai duniani—hufurahia amani na mwungano wa ulimwenguni kote chini ya utawala wa Mesiya, hali ambazo hazipatikani kamwe katika makanisa ya Jumuiya ya Wakristo. Kwa pamoja, Mashahidi wa Yehova hukabiliana na jitihada za Shetani za kuingilia ibada yao. Wakiwa kikundi kimoja cha watu, wao hutekeleza utume wa Yesu wa kuhubiri na kufundisha habari njema ya Ufalme wa Mesiya katika mataifa yote.—Mathayo 28:19, 20.

Vizuizi Vitashindwa

22. Yehova ‘atauangamizaje ulimi wa bahari ya Misri’ na ‘kutikisa mkono wake juu ya Mto’?

²² Kuna vizuizi vingi, halisi na vya kitamathali, vinavyozuia kurudi kwa Waisraeli kutoka uhamishoni. Vitashindwaje? Isaya asema: “BWANA atauangamiza kabisa ulimi wa bahari ya Misri; na kwa upepo wake uteketezao atatikisa mkono wake juu ya Mto, naye ataupiga, uwe vijito saba, na kuwavusha watu wenye viatu vikavu.” (Isaya 11:15) Yehova ndiye atakayeondoa vikwazo vyote vinavyozuia watu wake kurudi. Hata vizuizi vyenye nguvu sana kama ulimi wa Bahari Nyekundu (kama vile Ghuba ya Suez) au visivyopitika kama vile Mto Frati ulio mkubwa, vitakaushwa kitamathali ili mtu avuke bila kuvua viatu vyake!

23. Kutakuwaje ‘njia kuu kutoka Ashuru’?

²³ Katika siku ya Musa, Yehova alitayarishia Israeli njia ya kuponyoka kutoka Misri na kusafiri hadi Bara Lililoahidiwa. Sasa yeye atafanya jambo fulani linalofanana na hilo: “Itakuwako njia kuu kwa mabaki ya watu wake watakaobaki, watokao Ashuru, kama vile ilivyokuwako kwa Israeli, katika siku ile waliyotoka katika nchi ya Misri.” (Isaya 11:16) Yehova atawaongoza wahamishwa wanaorudi kama watu wanaotembea kwenye njia kuu kutoka mahali pao pa uhamisho hadi nchini mwao. Wapinzani watajaribu kuwazuia, lakini Mungu wao, Yehova, atakuwa pamoja nao. Vivyo hivyo leo, Wakristo watiwa-mafuta na waandamani wao hushambuliwa vikali, lakini wao husonga mbele kwa ujasiri! Wametoka katika Ashuru ya kisasa, ulimwengu wa Shetani, nao husaidia wengine watoke humo. Wanajua kuwa ibada safi itafanikiwa nayo itasitawi. Hiyo si kazi ya mwanadamu, bali ya Mungu.

Raia za Mesiya Washangilia Bila Kukoma!

24, 25. Watu wa Yehova watapaza sauti kwa semi gani zenye sifa na shukrani?

²⁴ Isaya sasa afafanua, kwa maneno yenye shangwe, furaha nyingi ya watu wa Yehova juu ya kutimizwa kwa neno Lake: “Katika siku hiyo utasema, Ee BWANA, nitakushukuru wewe; kwa kuwa ijapokuwa ulinikasirikia, hasira yako imegeukia mbali, nawe unanifariji moyo.” (Isaya 12:1) Yehova awatia watu wake waliopotoka nidhamu kali. Lakini nidhamu hiyo yatimiza lengo lake la kuponya uhusiano wa taifa hilo pamoja naye na la kurudisha ibada safi. Yehova awahakikishia waabudu wake waaminifu kuwa hatimaye atawaokoa. Haishangazi kuwa wanatoa shukrani zao!

²⁵ Tumaini la Waisraeli waliorudishwa katika Yehova lathibitishwa kikamili, nao wapaza sauti: “Tazama, Mungu ndiye wokovu wangu; nitatumaini wala sitaogopa; maana BWANA [“Yah,” “NW”] YEHOVA ni nguvu zangu na wimbo wangu; naye amekuwa wokovu wangu. Basi, kwa furaha mtateka maji katika visima vya wokovu.” (Isaya 12:2, 3) Neno la Kiebrania lililotafsiriwa “wimbo” katika mstari wa 2 ni “sifa” katika tafsiri ya Septuagint. Waabudu washangilia kwa nyimbo za sifa kwa sababu ya wokovu kutoka kwa ‘Yah Yehova.’ Neno ‘Yah,’ ambalo ni ufupi wa jina Yehova, hutumiwa katika Biblia kuonyesha hisia zilizozidishwa za sifa na shukrani. Kutumia usemi ‘Yah Yehova’—kurudia mara mbili jina la Mungu—huinua ukuu wa sifa kwa Mungu kufikia kiwango cha juu hata zaidi.

26. Ni nani leo wanaotangaza matendo ya Mungu kati ya mataifa?

²⁶ Waabudu halisi wa Yehova hawawezi kukaa kimya tu na shangwe yao. Isaya atabiri: “Katika siku hiyo mtasema, Mshukuruni BWANA, liitieni jina lake; yatangazeni matendo yake kati ya mataifa, litajeni jina lake kuwa limetukuka. Mwimbieni BWANA; kwa kuwa ametenda makuu; na yajulikane haya katika dunia yote.” (Isaya 12:4, 5) Tangu mwaka wa 1919, Wakristo watiwa-mafuta—baadaye wakisaidiwa na “kondoo wengine” ambao ni waandamani wao—‘wametangaza kotekote sifa bora kabisa za yeye aliyewaita kutoka katika giza kuingia katika nuru yake ya ajabu.’ Wao ni “jamii iliyochaguliwa, . . . taifa takatifu” lililotengwa kwa kusudi hilo. (Yohana 10:16; 1 Petro 2:9) Watiwa-mafuta hutangaza kuwa jina takatifu la Yehova limetukuka nao hushiriki katika kulijulisha duniani kote. Wao huongoza waabudu wote wa Yehova washangilie katika uandalizi wake wa wokovu wao. Ni kama tu atangazavyo Isaya: “Paza sauti, piga kelele, mwenyeji wa Sayuni; maana Mtakatifu wa Israeli ni mkuu kati yako”! (Isaya 12:6) Mtakatifu wa Israeli ni Yehova Mungu mwenyewe.

Tazamia Wakati Ujao Ukiwa na Uhakika!

27. Huku wakingojea utimizo wa tumaini lao, Wakristo wana uhakika katika jambo gani?

²⁷ Leo, mamilioni wamemiminikia “ishara kwa kabila za watu”—Yesu Kristo aliyetawazwa katika Ufalme wa Mungu. Wao hushangilia kuwa raia za Ufalme huo nao husisimka kumjua Yehova Mungu na Mwana wake. (Yohana 17:3) Wao hupata furaha nyingi katika ushirika wao wa Kikristo ulioungana nao hujitahidi kuhifadhi amani ambayo ni alama ya watumishi wa kweli wa Yehova. (Isaya 54:13) Huku wakiwa na uhakika kuwa Yah Yehova ni Mungu atimizaye ahadi zake, wana imani katika tumaini lao nao hupendezwa sana kulishiriki na wengine. Kila mwabudu wa Yehova na aendelee kutumia nguvu zake zote kumtumikia Mungu na kusaidia wengine kufanya vivyo hivyo. Wote na wayazingatie maneno ya Isaya na kushangilia katika wokovu kupitia Mesiya wa Yehova!

[Maelezo ya Chini]

[Picha katika ukurasa wa 158]

Mesiya ni “tawi” kutoka kwa Yese, kupitia Mfalme Daudi

[Picha ya ukurasa mzima katika ukurasa wa 162]

[Picha katika ukurasa wa 170]

Isaya 12:4, 5, kama lionekanavyo katika Hati-Kunjo za Bahari ya Chumvi (Mahali ambapo jina la Mungu lipo pametiwa alama)