Sura ya 21

Mkono wa Yehova Wainuliwa

Isaya 25:1–27:13

 1. Kwa nini Isaya amthamini Yehova?

ISAYA ampenda sana Yehova naye afurahia kumsifu. Yeye apaaza sauti: “Ee BWANA, wewe u Mungu wangu; nitakutukuza na kulihimidi jina lako.” Ni nini kinachomsaidia nabii huyo kumthamini Muumba wake kwa njia bora hivyo? Jambo muhimu ni ujuzi alio nao juu ya Yehova na matendo yake. Maneno yafuatayo ya Isaya yaufunua ujuzi huo: “Kwa kuwa umetenda mambo ya ajabu, mashauri ya kale, kwa uaminifu na kweli.” (Isaya 25:1) Kama vile Yoshua aliyeishi kabla yake, Isaya ajua kuwa Yehova ni mwaminifu na mwenye kutumainika, na kwamba “mashauri” yake yote—mambo anayokusudia—hutimia.—Yoshua 23:14.

 2. Isaya sasa atangaza shauri gani la Yehova, na huenda shauri lake laelekezwa wapi?

² Mashauri ya Yehova yahusisha matangazo yake ya hukumu dhidi ya adui za Israeli. Isaya sasa atangaza mojawapo ya hukumu hizo: “Umefanya mji kuwa ni chungu; mji wenye boma kuwa ni magofu; jumba la wageni kuwa si mji; hautajengwa tena milele.” (Isaya 25:2) Ni mji gani huo usio na jina? Huenda Isaya akawa anarejezea Ari wa Moabu—Moabu imekuwa adui ya watu wa Mungu kwa muda mrefu.a Au huenda analirejezea jiji jingine, lenye nguvu zaidi—Babiloni.—Isaya 15:1; Sefania 2:8, 9.

 3. Adui za Yehova wamtukuzaje?

³ Adui za Yehova watatendaje wakati wa kutekelezwa kwa shauri lake dhidi ya jiji lao lenye nguvu? “Watu walio hodari watakutukuza, mji wa mataifa watishao utakuogopa.” (Isaya 25:3) Yaeleweka kwamba adui za Mungu Mweza Yote watamwogopa. Lakini wao wamtukuzaje? Je, wataiacha miungu yao isiyo ya kweli na kuikubali ibada safi? Hata kidogo! Badala yake, kama vile Farao na Nebukadreza, wamtukuza Yehova walazimikapo kutambua ukuu wake mkubwa.—Kutoka 10:16, 17; 12:30-33; Danieli 4:37.

 4. “Mji wa mataifa watishao” uliopo leo ni upi, nao walazimikaje kumtukuza Yehova?

⁴ Leo, “mji wa mataifa watishao” ni “jiji kubwa lililo na ufalme juu ya wafalme wa dunia,” yaani, “Babiloni Mkubwa,” milki ya ulimwengu ya dini isiyo ya kweli. (Ufunuo 17:5, 18) Sehemu kuu ya milki hiyo ni Jumuiya ya Wakristo. Viongozi wa kidini wa Jumuiya ya Wakristo humtukuzaje Yehova? Kwa kukiri kwa uchungu mambo mazuri ambayo amewatimizia Mashahidi wake. Hasa mwaka wa 1919 Yehova alipowarudisha watumishi wake kwenye utendaji wenye bidii baada ya kuachiliwa kutoka utekwani wa kiroho katika Babiloni Mkubwa, viongozi hao “wakawa wenye kuogopa na kumpa utukufu Mungu wa mbinguni.”—Ufunuo 11:13.b

 5. Yehova huwalindaje wale wanaomtumaini kabisa?

⁵ Ingawa Yehova ni mwenye kutisha machoni pa adui zake, yeye ni kimbilio kwa wasikivu na wanyenyekevu wanaotaka kumtumikia. Huenda watu watishao wa kidini na kisiasa wakajaribu kwa njia zote kuivunja imani ya waabudu wa kweli, lakini wao hushindwa kwa sababu waabudu hawa humtumaini Yehova kwa ukamili. Hatimaye, yeye huwanyamazisha wapinzani wake kwa urahisi, naye hufanya hivyo kana kwamba anafunika jua kali la jangwani kwa wingu au anaizuia dhoruba kwa ukuta.—Soma Isaya 25:4, 5.

‘Karamu kwa Mataifa Yote’

6, 7. (a) Yehova aandaa karamu ya aina gani, naye awaandalia nani? (b) Karamu aliyoitabiri Isaya yawakilisha nini?

⁶ Kama vile baba mwenye upendo, Yehova huwalinda na pia kuwalisha watoto wake, hasa kiroho. Baada ya kuwakomboa watu wake mwaka wa 1919, aliwaandalia karamu ya ushindi, yaani, chakula kingi cha kiroho: “Katika mlima huu BWANA wa majeshi atawafanyia mataifa yote karamu ya vitu vinono, karamu ya divai iliyokaa juu ya urojorojo wake, karamu ya vinono vilivyojaa mafuta, karamu ya divai iliyokaa juu ya urojorojo wake, iliyochujwa sana.”—Isaya 25:6.

⁷ Karamu hiyo yafanyiwa katika “mlima” wa Yehova. Mlima huo ni nini? Huo ni “mlima wa nyumba ya BWANA [“Yehova,” NW]” ambao mataifa yote yanauendea “katika siku za mwisho.” Huo ni ‘mlima mtakatifu’ wa Yehova, ambako waabudu wake waaminifu hawadhuru wala hawaharibu. (Isaya 2:2; 11:9) Katika mahali hapo pa ibada palipoinuliwa, Yehova aandaa karamu ya vitu vitamu kwa ajili ya watu waaminifu. Na vitu vizuri vya kiroho vinavyoandaliwa kwa wingi sasa vyaonyesha kimbele vitu vitamu vya kimwili vitakavyoandaliwa Ufalme wa Mungu utakapokuwa serikali pekee ya wanadamu. Wakati huo njaa haitakuwepo tena. ‘Kutakuwepo wingi wa nafaka katika ardhi juu ya milima.’—Zaburi 72:8, 16.

8, 9. (a) Ni adui gani wawili wakuu wa wanadamu watakaoondolewa? Eleza. (b) Mungu atafanya nini ili kuiondoa aibu ya watu wake?

⁸ Wale wanaokula sasa karamu ya kiroho ambayo Mungu ameandaa wana matazamio matukufu. Yasikilize maneno yafuatayo ya Isaya. Azilinganishapo dhambi na kifo na ‘utaji uliotandwa’ ambao husonga pumzi, au “sitara,” asema: “Katika mlima huu [Yehova] atauharibu uso wa sitara iliyowekwa juu ya watu wote, na utaji ule uliotandwa juu ya mataifa yote. Amemeza mauti hata milele; na Bwana MUNGU atafuta machozi katika nyuso zote.”—Isaya 25:7, 8a.

⁹ Naam, dhambi na kifo hazitakuwapo tena! (Ufunuo 21:3, 4) Zaidi ya hayo, aibu inayotokana na uwongo ambayo watumishi wa Yehova wamevumilia kwa maelfu ya miaka itaondolewa pia. “Aibu ya watu wake ataiondoa katika ulimwengu wote; maana BWANA amenena hayo.” (Isaya 25:8b) Hayo yatatukiaje? Yehova atakiondoa chanzo cha aibu hiyo, yaani, Shetani na mbegu yake. (Ufunuo 20:1-3) Haishangazi kwamba watu wa Mungu watashurutika kupaaza sauti wakisema: “Tazama, huyu ndiye Mungu wetu, ndiye tuliyemngoja atusaidie; huyu ndiye BWANA tuliyemngoja, na tushangilie na kuufurahia wokovu wake.”—Isaya 25:9.

Wenye Kiburi Washushwa

10, 11. Yehova ataitendaje Moabu kwa ukali?

¹⁰ Yehova huwaokoa watu wake waonyeshao unyenyekevu. Hata hivyo, Moabu, jirani ya Israeli ina kiburi, na Yehova huchukia kiburi. (Mithali 16:18) Basi Moabu imekusudiwa kuaibishwa. “Mkono wa BWANA utatulia katika mlima huu, na Moabu atakanyagwa chini huko aliko, kama vile majani makavu yakanyagwavyo katika maji ya jaa [“katika mahali pa mbolea,” “NW”]. Naye atanyosha mikono yake katikati yake, kama vile aogeleaye anyoshavyo mikono yake ili aogelee, naye atashusha kiburi chake, pamoja na hila za mikono yake. Na boma la ngome ya kuta zako ameliinamisha, na kulilaza chini, na kulitupa chini hata mavumbini.”—Isaya 25:10-12.

¹¹ Mkono wa Yehova “utatulia” katika mlima wa Moabu. Ni nini kitakachotokea? Moabu yenye kiburi itapigwa kofi na kukanyagiwa chini mfano wa ‘mahali pa mbolea.’ Wakati wa Isaya, majani makavu hukanyagwa-kanyagwa katika samadi ili kutengeneza mbolea, kwa hiyo Isaya atabiri aibu kwa Moabu, licha ya kuwa na kuta ndefu zinazoonekana kuwa salama.

12. Kwa nini Moabu yateuliwa kwa ajili ya matangazo ya hukumu ya Yehova?

¹² Kwa nini Yehova aiteua Moabu ili aishauri kwa ukali hivyo? Wamoabi ni wazao wa Loti, mpwa wa Abrahamu aliye pia mwabudu wa Yehova. Basi, wao ni jirani za taifa la agano la Mungu na vilevile watu wa jamaa yao. Licha ya hayo, wamefuata miungu isiyo ya kweli na kuonyesha uadui mkubwa kwa Israeli. Matokeo hayo makali yawastahili. Kwa habari hiyo, Moabu ni kama adui za watumishi wa Yehova leo. Yeye hasa ni kama Jumuiya ya Wakristo, inayodai kwamba chanzo chake ni kutaniko la Kikristo la karne ya kwanza, lakini kama tulivyoona mapema, hiyo ni sehemu kuu ya Babiloni Mkubwa.

Wimbo wa Wokovu

13, 14. Watu wa Mungu leo wana ‘mji gani ulio na nguvu,’ na ni nani wanaoruhusiwa kuingia humo?

¹³ Namna gani watu wa Mungu? Huku wakifurahia kupata upendeleo na ulinzi wa Yehova, wapaza sauti zao kwa wimbo. “Siku ile wimbo huu utaimbwa katika nchi ya Yuda; Sisi tunao mji ulio na nguvu; ataamuru wokovu kuwa kuta na maboma. Wekeni wazi malango yake, taifa lenye haki, lishikalo kweli, liingie.” (Isaya 26:1, 2) Ingawa hapana shaka maneno hayo yalitimia kwa njia fulani nyakati za kale, hayo pia yatimizwa waziwazi leo. “Taifa lenye haki” la Yehova, Israeli wa kiroho, limeandaliwa tengenezo lenye nguvu, lifananalo na mji. Hiyo ni sababu iliyoje ya kushangilia na kuimba!

¹⁴ Ni watu wa aina gani wanaokuja katika “mji” huo? Wimbo huo wajibu: “[Mungu] utamlinda yeye ambaye moyo wake umekutegemea katika amani kamilifu, kwa kuwa anakutumaini. Mtumainini BWANA siku zote maana BWANA [“Yah” “NW”] YEHOVA ni mwamba wa milele.” (Isaya 26:3, 4) “Moyo” ambao Yehova autegemeza ni ile tamaa ya kutii kanuni zake zenye uadilifu na kumtumaini yeye, wala si kuitumaini mifumo ya ulimwengu ya kibiashara, kisiasa, na kidini inayotapatapa. “Yah Yehova” ndiye Mwamba pekee wa usalama unaotegemeka. Wale wanaomtumaini Yehova kwa ukamili hupata ulinzi wake na kufurahia “amani kamilifu.”—Mithali 3:5, 6; Wafilipi 4:6, 7.

15. ‘Mji ulioinuka’ umeshushwaje leo, na “miguu yao walio maskini” imeukanyagiaje chini?

¹⁵ Jambo hilo ni tofauti kama nini na mambo yanayowakumba adui za watu wa Mungu! “Amewashusha wakaao juu, mji ule ulioinuka, aushusha, aushusha hata nchi, auleta hata mavumbini. Mguu utaukanyaga chini, naam, miguu yao walio maskini, na hatua zao walio wahitaji.” (Isaya 26:5, 6) Mara nyingine tena, huenda hapo Isaya aurejezea “mji ule ulioinuka” katika Moabu, au labda anamaanisha mji mwingine tofauti, kama vile Babiloni, ambao bila shaka umeinuka katika kiburi. Vyovyote vile, Yehova ameushinda “mji ule ulioinuka,” na watu wake ‘walio maskini na wahitaji’ waukanyagia chini. Leo unabii huo wafaa kabisa Babiloni Mkubwa, hasa Jumuiya ya Wakristo. Mwaka wa 1919, ‘mji huo ulioinuka’ ulilazimika kuwaachilia watu wa Yehova—anguko lenye aibu—wao nao wamechukua hatua ya kumkanyagia chini mtekaji wao wa awali. (Ufunuo 14:8) Wamefanyaje hivyo? Kwa kutangaza hadharani kisasi cha Yehova kinachokuja juu yake.—Ufunuo 8:7-12; 9:14-19.

Kutamani Uadilifu na “Ukumbusho” wa Yehova

16. Isaya aweka kielelezo gani chema cha ujitoaji?

¹⁶ Baada ya wimbo huo wa ushindi, Isaya afunua kina cha ujitoaji wake mwenyewe na thawabu za kumtumikia Mungu mwenye uadilifu. (Soma Isaya 26:7-9.) Nabii huyo aweka kielelezo chema cha ‘kumngojea Yehova’ na cha kuwa na tamaa nyingi kwa ajili ya “jina” na “ukumbusho” wa Yehova. Ukumbusho wa Yehova ni nini? Andiko la Kutoka 3:15 lasema: “BWANA [“Yehova,” NW] . . . ndilo jina langu hata milele, nalo ni kumbukumbu langu [“ukumbusho wangu,” NW] hata vizazi vyote.” Isaya alipenda sana jina la Yehova na maana yake yote, kutia ndani viwango na njia Zake za uadilifu. Wale wanaositawisha upendo kama huo kwa Yehova wanahakikishiwa kupata baraka yake.—Zaburi 5:8; 25:4, 5; 135:13; Hosea 12:5.

17. Wabaya watanyimwa mapendeleo gani?

¹⁷ Hata hivyo, sio watu wote wanaompenda Yehova na viwango vyake bora. (Soma Isaya 26:10.) Wabaya, wajapoalikwa, hukataa kwa kichwa kigumu kujifunza uadilifu ili wapate kuingia katika “nchi ya unyofu,” nchi inayokaliwa na watumishi wa Yehova walio wanyofu kiadili na kiroho. Kwa hiyo, wabaya ‘hawatauona utukufu wa BWANA.’ Hawataishi ili wapate baraka zitakazowajia wanadamu baada ya kutukuzwa kwa jina la Yehova. Hata katika ulimwengu mpya, dunia yote itakapokuwa “nchi ya unyofu,” huenda watu fulani wakashindwa kuzikubali fadhili-upendo za Yehova. Majina ya watu hao hayataandikwa katika kitabu cha uhai.—Isaya 65:20; Ufunuo 20:12, 15.

18. Watu fulani katika siku ya Isaya wameamuaje kuwa vipofu, nao watalazimika ‘kumwona’ Yehova lini?

¹⁸ “BWANA, mkono wako umeinuliwa, lakini hawaoni; lakini watauona wivu wako kwa ajili ya watu wako, nao watatahayari; naam, moto utawala adui zako.” (Isaya 26:11) Katika siku ya Isaya, mkono wa Yehova umethibitika kuinuliwa Yehova awalindapo watu wake kwa kuchukua hatua dhidi ya adui zao. Lakini wengi hawajatambua hilo. Watu hao, ambao wameamua wenyewe kuwa vipofu kiroho, hatimaye watalazimika ‘kumwona,’ au kumkiri, Yehova, moto wa wivu wake uwachomapo. (Sefania 1:18) Baadaye Mungu amwambia Ezekieli: “Nao watajua ya kuwa mimi ndimi BWANA.”—Ezekieli 38:23.

“Ambaye Yehova Ampenda Humtia Nidhamu”

19, 20. Kwa nini Yehova amewatia watu wake nidhamu, naye amewatiaje nidhamu hiyo, na ni nani ambao wamenufaika kutokana nayo?

¹⁹ Isaya afahamu kwamba amani na ufanisi wowote ambao wananchi wenzake wafurahia hutokana na baraka ya Yehova. “BWANA, utatuamuria amani; maana ni wewe pia uliyetutendea kazi zetu zote.” (Isaya 26:12) Licha ya hayo na licha ya kwamba Yehova aliweka mbele ya watu wake fursa ya kuwa “ufalme wa makuhani, na taifa takatifu,” Yuda imekuwa na historia yenye mawaa. (Kutoka 19:6) Mara kwa mara, watu wake wamegeukia ibada ya miungu isiyo ya kweli. Kwa hiyo, wametiwa nidhamu mara nyingi. Hata hivyo, nidhamu hiyo ni uthibitisho wa upendo wa Yehova kwa maana mtu “ambaye Yehova ampenda humtia nidhamu.”—Waebrania 12:6.

²⁰ Mara kwa mara, Yehova awatia watu wake nidhamu kwa kuyaruhusu mataifa mengine, “mabwana wengine,” wawatawale. (Soma Isaya 26:13.) Mwaka wa 607 K.W.K., awaruhusu Wababiloni wawapeleke uhamishoni. Je, hilo lawanufaisha? Mateso peke yake hayamfaidi mtu. Hata hivyo, iwapo mwenye kuteseka ajifunza kutokana na mateso hayo, atubu, na kumpa Yehova ujitoaji usiohusisha wengine, ndipo anaponufaika. (Kumbukumbu la Torati 4:25-31) Je, kuna Wayahudi wowote waonyeshao toba ya kimungu? Ndiyo! Isaya atabiri: “Kwa msaada wako peke yako tutalitaja jina lako.” Baada ya kurudi kutoka uhamishoni mwaka wa 537 K.W.K., mara nyingi Wayahudi wahitaji nidhamu kwa sababu ya dhambi nyinginezo, lakini hawanaswi tena katika mtego wa kuabudu miungu ya mawe.

21. Ni nini litakalowapata wale ambao wamewakandamiza watu wa Mungu?

²¹ Vipi juu ya watekaji wa Yuda? “Wamekufa, hawataishi; wamekwisha kufariki, hawatafufuka; kwa sababu hiyo umewajilia, na kuwaangamiza, na kuupoteza ukumbusho wao.” (Isaya 26:14) Babiloni litateseka kwa sababu ya ukatili wake juu ya taifa teule la Yehova. Kwa kutumia Wamedi na Waajemi, Yehova atalipindua Babiloni lenye kiburi na kuwaachilia huru watu Wake waliopelekwa uhamishoni. Jiji hilo kubwa, Babiloni, litafifia, kana kwamba limeuawa. Hatimaye, halitakuwapo kabisa.

22. Watu wa Mungu wamebarikiwaje leo?

²² Katika utimizo wa leo, mabaki ya Israeli wa kiroho waliotiwa nidhamu waliachiliwa huru kutoka Babiloni Mkubwa nao wakarudishwa kwenye utumishi wa Yehova mwaka wa 1919. Huku wakiwa wametiwa nguvu upya, Wakristo watiwa-mafuta walijitolea kwa bidii kutimiza kazi yao ya kuhubiri. (Mathayo 24:14) Yehova naye amewabariki kwa kuwapa ongezeko, hata akauleta umati mkubwa wa “kondoo wengine” watumikie pamoja nao. (Yohana 10:16) “Umeliongeza hilo taifa, BWANA, umeliongeza taifa; wewe umetukuzwa, umeipanua mipaka yote ya nchi hii. BWANA, katika taabu zao walikwenda kwako; waliomba maombi mengi wakati adhabu yako ilipokuwa juu yao.”—Isaya 26:15, 16.

‘Watafufuka’

23. (a) Kunatukia wonyesho gani mkubwa wa nguvu za Yehova mwaka wa 537 K.W.K.? (b) Kulitukia wonyesho gani kama huo mwaka wa 1919 W.K.?

²³ Isaya airudia hali inayoikabili Yuda inapokuwa ingali utekwani huko Babiloni. Alilinganisha taifa hilo na mwanamke ambaye ana uchungu wa kuzaa ijapokuwa hawezi kuzaa pasipo msaada. (Soma Isaya 26:17, 18.) Msaada huo wapatikana mwaka wa 537 K.W.K., na watu wa Yehova warudi nchini kwao, wakiwa na hamu ya kujenga upya hekalu na kuirudisha ibada ya kweli. Ni kana kwamba taifa hilo lafufuliwa kutoka kwa wafu. “Wafu wako wataishi, maiti zangu zitafufuka; amkeni, kaimbeni, ninyi mnaokaa mavumbini, kwa maana umande wako ni kama umande wa mimea, nayo ardhi itawatoa waliokufa.” (Isaya 26:19) Huo ni wonyesho ulioje wa nguvu za Yehova! Isitoshe, ulikuwa wonyesho mkubwa kama nini maneno hayo yalipotimizwa kiroho mwaka wa 1919! (Ufunuo 11:7-11) Nasi twatazamia kama nini wakati maneno hayo yatakapotimizwa kihalisi katika ulimwengu mpya na wale waliokufa ‘watakapoisikia sauti ya Yesu na kutoka’ katika makaburi ya ukumbusho!—Yohana 5:28, 29.

24, 25. (a) Huenda Wayahudi walitiije amri ya Yehova ya kujificha katika mwaka wa 539 K.W.K.? (b) Huenda “vyumba” vikarejezea nini leo, na inatupasa tusitawishe mtazamo gani kuvielekea?

²⁴ Hata hivyo, iwapo watu waaminifu wataka kufurahia baraka za kiroho zilizoahidiwa kupitia Isaya, ni sharti watii amri za Yehova: “Njoni, watu wangu, ingia wewe ndani ya vyumba vyako, ukafunge mlango nyuma yako ujifiche kitambo kidogo, mpaka ghadhabu hii itakapopita. Kwa maana, tazama, BWANA anakuja kutoka mahali pake, ili kuwaadhibu wakaao duniani, kwa sababu ya uovu wao; ardhi nayo itafunua damu yake, wala haitawafunika tena watu wake waliouawa.” (Isaya 26:20, 21; linganisha Sefania 1:14.) Huenda maneno hayo yakatimizwa mara ya kwanza wakati Wamedi na Waajemi, wakiongozwa na Mfalme Koreshi, washindapo Babiloni mwaka wa 539 K.W.K. Kwa mujibu wa mwanahistoria Mgiriki aitwaye Xenophon, Koreshi aingiapo Babiloni, aamuru kila mtu akae nyumbani kwake kwa sababu jeshi lake la wapanda-farasi “limeamriwa kumwua mtu yeyote watakayemkuta nje ya nyumba.” Leo, “vyumba” katika unabii huo huenda vikahusianishwa kwa ukaribu na makumi ya maelfu ya makutaniko ya watu wa Yehova ulimwenguni kote. Makutaniko hayo yataendelea kutimiza fungu muhimu maishani mwetu, hata wakati wa “dhiki kubwa.” (Ufunuo 7:14) Basi ni muhimu kama nini kwamba tuendelee kuwa na mtazamo unaofaa kuelekea kutaniko nasi tushirikiane nalo kwa ukawaida!—Waebrania 10:24, 25.

²⁵ Mwisho wa ulimwengu wa Shetani utakuja hivi karibuni. Kwa sasa hatujui jinsi Yehova atakavyowalinda watu wake katika kipindi hicho chenye kuhofisha. (Sefania 2:3) Hata hivyo, tujuacho ni kwamba wokovu wetu utategemea imani, uaminifu-mshikamanifu na utii wetu kwa Yehova.

26. “Lewiathani” ni nani katika siku ya Isaya na leo pia, na ni nini kinachompata huyu “joka aliye baharini”?

²⁶ Akiutazamia wakati huo, Isaya atabiri: “Katika siku hiyo BWANA, kwa upanga wake ulio mkali, ulio mkubwa, ulio na nguvu, atamwadhibu lewiathani, nyoka yule mwepesi, na lewiathani, nyoka yule mwenye kuzonga-zonga; naye atamwua yule joka aliye baharini.” (Isaya 27:1) Katika utimizo wa kwanza, ‘Lewiathani’ huzirejezea nchi ambako Israeli imetawanyika, kama vile Babiloni, Misri, na Ashuru. Nchi hizo hazitaweza kuzuia kurudi kwa watu wa Yehova kwenye nchi ya kwao wakati ufikapo. Ingawa hivyo, Lewiathani wa leo ni nani? Yaonekana ni Shetani—“nyoka wa awali”—na mfumo wake mwovu wa mambo hapa duniani, ambao ni chombo chake anachotumia kuwapiga Israeli wa kiroho. (Ufunuo 12:9, 10; 13:14, 16, 17; 18:24) “Lewiathani” alipoteza mshiko wake juu ya watu wa Mungu mwaka wa 1919, na hivi karibuni atatoweka kabisa Yehova ‘atakapomwua yule joka aliye baharini.’ Kwa sasa, chochote ambacho huenda ‘Lewiathani’ akajaribu kufanya dhidi ya watu wa Yehova hakitafanikiwa.—Isaya 54:17.

“Shamba la Mizabibu la Mvinyo”

27, 28. (a) Shamba la mizabibu la Yehova limejaza nini duniani kote? (b) Yehova hulilindaje shamba lake la mizabibu?

²⁷ Kwa kutumia wimbo mwingine, Isaya sasa atoa kielezi kizuri kuhusu mazao ya watu wa Yehova walioachiliwa huru: “Katika siku hiyo; Shamba la mizabibu la mvinyo, liimbieni. Mimi, BWANA, nalilinda, nitalitia maji kila dakika, asije mtu akaliharibu; usiku na mchana nitalilinda.” (Isaya 27:2, 3) Mabaki ya Israeli wa kiroho na wenzi wao wanaofanya kazi kwa bidii kwa kweli wameijaza dunia yote kwa mazao ya kiroho. Hiyo ni sababu nzuri kama nini ya kusherehekea na kuimba! Sifa yote yamwendea Yehova, yeye ambaye amelitunza shamba lake la mizabibu kwa upendo.—Linganisha Yohana 15:1-8.

²⁸ Kwa kweli, shangwe imechukua mahali pa hasira ya awali ya Yehova! “Hasira sinayo ndani yangu; kama mibigili na miiba ingekuwa mbele zangu, ningepanga vita juu yake, ningeiteketeza yote pamoja. Au azishike nguvu zangu, afanye amani nami; naam, afanye amani nami.” (Isaya 27:4, 5) Ili kuhakikisha kuwa mizabibu yake yaendelea kuzaa “mvinyo” kwa wingi, Yehova auharibu na kuuteketeza kana kwamba kwa moto, uvutano wowote ulio kama magugu uwezao kuliharibu shamba lake la mizabibu. Kwa hiyo, yeyote asithubutu kuhatarisha hali njema ya kutaniko la Kikristo! Badala yake, wote na ‘wazishike nguvu za Yehova,’ wakitafuta upendeleo na ulinzi wake. Kwa kutenda hivyo, wanafanya amani na Mungu—jambo lililo muhimu sana hivi kwamba Isaya alitaja mara mbili. Matokeo yatakuwaje? “Siku zijazo Yakobo atatia mizizi; Israeli atatoa maua na kuchipuka; nao watajaza uso wa ulimwengu matunda.” (Isaya 27:6)c Kutimizwa kwa mstari huo ni uthibitisho mzuri kama nini wa nguvu za Yehova! Tangu mwaka wa 1919, Wakristo watiwa-mafuta wameijaza dunia kwa “matunda,” yaani, chakula cha kiroho kinachotia nguvu. Matokeo ni kwamba mamilioni ya kondoo wengine wenye uaminifu-mshikamanifu wamejiunga nao, nao kwa pamoja “wanamtolea [Mungu] utumishi mtakatifu mchana na usiku.” (Ufunuo 7:15) Wao hudumisha kwa shangwe viwango vya juu kati ya ulimwengu wenye ufisadi. Yehova naye huendelea kuwabariki kwa kuwapa ongezeko. Na tusilisahau kamwe pendeleo kuu la kuyala “matunda” na kuwagawia wengine kupitia sauti zetu za sifa!

[Maelezo ya Chini]

[Sanduku katika ukurasa wa 285]

“Tarumbeta Kubwa” Yatangaza Uhuru

Mwaka wa 607 K.W.K., maumivu ya Yuda yaongezeka Yehova alitiapo nidhamu taifa lake lililopotoka kwa kutumia fimbo ya uhamisho. (Soma Isaya 27:7-11.) Dhambi ya taifa hilo ni kubwa sana isiweze kufunikwa kwa dhabihu za wanyama. Basi, kama vile mtu awezavyo kuwatawanya kondoo au mbuzi kwa kutoa ‘sauti ya kushtua’ au awezavyo ‘kuyapepeta’ majani kwa upepo mkali, Yehova afukuza Israeli kutoka katika nchi yao. Baadaye, hata watu walio dhaifu, wafananishwao na wanawake, wanavitumia vitu vibakivyo nchini humo.

Hata hivyo, wakati wa Yehova wa kuwakomboa watu wake kutoka utekwani wafika. Awaweka huru kama vile mkulima awezavyo kuweka huru zeituni zilizofungwa mitini kitamathali. “Itakuwa katika siku hiyo, BWANA atayapiga-piga matunda yake toka gharika ya Mto [Frati] hata kijito cha Misri, nanyi mtakusanywa mmoja mmoja, enyi wana wa Israeli. Tena itakuwa katika siku hiyo, tarumbeta kubwa itapigwa, nao waliokuwa karibu na kuangamia katika nchi ya Ashuru watakuja; na hao waliotupwa katika nchi ya Misri; nao watamsujudu BWANA katika mlima mtakatifu huko Yerusalemu.” (Isaya 27:12, 13) Baada ya ushindi wa Koreshi mwaka wa 539 K.W.K., atoa agizo la kuwekwa huru kwa Wayahudi katika milki yake, inayotia ndani wale walio Ashuru na Misri. (Ezra 1:1-4) Ni kana kwamba “tarumbeta kubwa” ilipigwa, ikitangaza wimbo wa sifa wa uhuru kwa watu wa Mungu.

[Picha katika ukurasa wa 275]

“Karamu ya vitu vinono”

[Picha katika ukurasa wa 277]

Babiloni lakanyagwa chini ya miguu ya wale waliokuwa wafungwa

[Picha katika ukurasa wa 278]

“Ingia wewe ndani ya vyumba vyako”