Endelea Kuonya Juu ya Kazi ya Ajabu ya Yehova
“Maana BWANA [Yehova, NW] ataondoka kama vile katika mlima Perasimu, ataghadhibika kama vile katika bonde la Gibeoni.”—ISAYA 28:21.
1, 2. Yehova alifanya kazi gani ya ajabu kwa ajili ya watu Wake katika siku ya Daudi?
TENDO geni! Kazi ya ajabu sana! Hiyo ndiyo Yehova alifanya kwa ajili ya watu wake katika nyakati za kale huko nyuma katika karne ya 11 K.W.K. Na tendo hilo geni lilikuwa kigezo cha kazi ya ajabu hata zaidi ambayo atafanya katika wakati ujao ulio karibu. Lilikuwa tendo gani hilo katika nyakati za kale? Upesi baada ya Daudi kutawazwa awe mfalme katika Yerusalemu, Wafilisti waliokuwa jirani walianza shambulio, na hilo lilichochea tendo geni la Yehova. Kwanza, Wafilisti walianza kuvamia katika uwanda wa Refaimu. Daudi aliuliza Yehova jambo alilopaswa kufanya naye akaagizwa ashambulie. Kwa kutii neno la Yehova, Daudi alishinda kabisa jeshi lenye uwezo mwingi la Ufilisti kwenye Baali-perasimu. Lakini Wafilisti hawakukubali ushinde. Upesi wakarudi kuharibu na kuteka nyara zaidi katika uwanda wa Refaimu. Tena, Daudi akatafuta mwelekezo kutoka kwa Yehova.
2 Safari hii aliambiwa aende upande wa nyuma wa Wafilisti akiwa na vikosi vyake. Yehova alisema: “Hapo utakapoisikia sauti ya kwenda katika vilele vya miforsadi, ndipo nawe ujitahidi; kwa maana ndipo BWANA [Yehova, NW] ametoka mbele yako awapige jeshi la Wafilisti.” Na hivyo ndivyo ilivyotukia. Daudi alingojea mpaka Yehova alipotokeza sauti ya kupiga miguu katika vilele vya miforsadi—pengine kwa upepo wenye nguvu. Mara hiyo, Daudi pamoja na vikosi vyake wakaruka kutoka katika maficho wakashambulia Wafilisti waliokuwa wamekengeushwa fikira, wakawashinda kwa machinjo makubwa. Sanamu za kidini ambazo Wafilisti walikuwa wameacha kwenye uwanda wa vita zilikusanywa pamoja na kuharibiwa.—2 Samweli 5:17-25; 1 Nyakati 14:8-17.
3. Kwa nini tendo geni la Yehova lilipendeza Wayahudi wa siku ya Isaya, na kwa sababu gani lapasa kupendeza Jumuiya ya Wakristo leo?
3 Hiyo ilikuwa kazi ya ajabu, tendo geni, lililotimizwa na Yehova dhidi ya Wafilisti na kwa ajili ya mfalme wake mpakwa-mafuta. Tendo hilo la ajabu ni lenye kupendeza hasa kwa sababu nabii Isaya alionya kwamba Yehova angefanya jambo fulani geni na lenye nguvu sawasawa na hilo dhidi ya walevi wa kiroho wa Yuda. Kwa hiyo, viongozi wa kidini wasio waaminifu wa siku za Isaya walihitaji kuangalia jambo hilo. Jumuiya ya Wakristo leo yapaswa kuangalia maneno yake pia kwa sababu yaliyopata Yuda yalikuwa kigezo cha kuonya kimbele yatakayopata Jumuiya ya Wakristo hatimaye.
“Kitanda Kile Ni Kifupi”
4, 5. (a) Isaya aelezaje kwa kielezi hali isiyostarehesha ya viongozi wa kidini wa siku yake? (b) Ni nini kinachosababisha kutostarehe kwa Jumuiya ya Wakristo leo?
4 Kwanza, Isaya alifichua uhakika wa kwamba mapatano ambayo katika hayo hao walevi wa kiroho wa kale walitumaini yalikuwa madanganyo, uwongo. Halafu alieleza kwa kielezi hali isiyostarehesha ya wale wanaotumaini katika uwongo huo. Alisema hivi: “Maana kitanda kile ni kifupi asiweze mtu kujinyosha juu yake, na nguo ile ya kujifunika ni nyembamba asipate mtu kujizingisha.” (Isaya 28:20) Yeyote anayejinyosha kwenye kitanda kilicho kifupi mno hupata kwamba miguu yake hutokeza nje katika baridi. Kwa upande mwingine, akikunyata magoti yake ili kutosha kwenye kitanda kifupi, nguo ya kitanda ni nyembamba mno na sehemu kubwa ya mwili wake ingali imefunuliwa. Hata afanye nini, sehemu yake fulani iko nje katika baridi.
5 Kusema kiufananisho, hali ilikuwa hivyo, kwa wale katika siku ya Isaya walioweka tumaini lao katika kimbilio la uwongo. Hiyo ni hali isiyostarehesha pia ya wale ambao leo huweka tumaini lao katika kimbilio la Jumuiya ya Wakristo lililo la uwongo. Ni kama wako nje katika baridi. Huu sio wakati wa kutafuta starehe kati ya mipango ya kilimwengu kwa ajili ya amani na usalama. Chini ya kivuli cha matendo ya Mungu ya hukumu yanayokuja, mapatano pamoja na watawala wa kisiasa hayataandaa starehe yenye ujoto kwa Jumuiya ya Wakristo.
Tendo Geni la Yehova
6. Yehova angetendaje dhidi ya Yuda, naye atatendaje dhidi ya Jumuiya ya Wakristo?
6 Akiwa ameeleza kwa wazi hali isiyostarehesha ya Yerusalemu wa siku yake usio na uaminifu—na ya Jumuiya ya Wakristo ya ki-siku-hizi isiyo na uaminifu—Isaya aendelea kusema hivi: “Maana BWANA [Yehova, NW] ataondoka kama vile katika mlima Perasimu, ataghadhibika kama vile katika bonde la Gibeoni; apate kufanya kazi yake, kazi yake ya ajabu; na kulitimiza tendo lake, tendo lake la ajabu.” (Isaya 28:21) Ndiyo, Isaya alionya, karibuni Yehova angeinuka kama alivyofanya kwenye Baali-perasimu. Lakini wakati huu angetenda dhidi ya watu wake wasio na imani, na angefanya hivyo kama gharika ya maji isiyozuilika ikifurika kupitia mwanya katika dimbwi lenye kubomoka. Agano la Yerusalemu pamoja na kifo lingeonyeshwa kuwa ubatili na la bure. Katika njia inayofanana na hiyo, Yehova atatenda katika wakati ujao wa karibu dhidi ya Jumuiya ya Wakristo, nayo itapata kwamba mapatano yayo yote yenye kulevya pamoja na ulimwengu huu ni yasiyo na maana. Tengenezo layo lote kubwa mno litavunjwa-vunjwa na wafuasi wayo kutawanywa. Miungu yayo bandia itateketezwa kikamili.
7. Kwa nini kusudi za Yehova kuhusu Yuda zilitajwa kwa maneno “ngeni” na “la ajabu”?
7 Kwa nini Isaya aita tendo la Yehova dhidi ya Yerusalemu kazi geni na ya ajabu? Basi, Yerusalemu lilikuwa ndilo kao la ibada ya Yehova na jiji la mfalme mpakwa-mafuta wa Yehova. (Zaburi 132:11-18) Likiwa hivyo, lilikuwa halijapata kuharibiwa kamwe. Hekalu lalo lilikuwa halijapata kuteketezwa. Nyumba ya kifalme ya Daudi, iliyoimarishwa wakati mmoja katika Yerusalemu, ilikuwa haijapata kupinduliwa. Mambo kama hayo yalikuwa hayawaziki. Lilikuwa jambo la ajabu kabisa kwamba Yehova angefikiria kuruhusu mambo kama hayo yatukie.
8. Yehova alitoa onyo gani juu ya tendo lake la ajabu lililokuwa likija?
8 Lakini Yehova alitoa maonyo ya haki kupitia manabii wake kwamba matukio yenye kushtua yangetendeka. (Mika 3:9-12) Kwa kielelezo, nabii Habakuki, aliyeishi katika karne ya saba K.W.K., alisema: “Angalieni, enyi mlio kati ya mataifa, katazameni, kastaajabuni sana; kwa maana mimi natenda tendo siku zenu, ambalo hamtaliamini hata mkiambiwa. Kwa maana, angalieni, nawaondokesha Wakaldayo, taifa lile kali, lenye haraka kupita kiasi; wapitao katikati ya dunia, ili wayamiliki makao yasiyo yao. Hao ni watu wa kutisha sana, wa kuogofya sana.”—Habakuki 1:5-7.
9. Yehova alitimiza onyo lake dhidi ya Yerusalemu kwa njia gani?
9 Katika 607 K.W.K., Yehova alitimiza onyo lake. Akiwa ameruhusu majeshi ya Babuloni yaje dhidi ya Yerusalemu, aliyaruhusu yaharibu jiji na hekalu. (Maombolezo 2:7-9) Zaidi ya hilo, aliruhusu Yerusalemu uharibiwe mara ya pili. Kwa nini? Basi, baada ya miaka 70 ya uhamisho, Wayahudi waliotubu walirudi katika bara la kwao, na hatimaye hekalu jingine likajengwa katika Yerusalemu. Ingawa hivyo, kwa mara nyingine, Wayahudi walipeperuka wakawa mbali na Yehova. Katika karne ya kwanza W.K., Paulo alinukuu maneno ya Habakuki kwa Wayahudi wa siku yake, hivyo akionyesha kwamba unabii huu ungekuwa na utimizo wakati ujao. (Matendo 13:40, 41) Yesu mwenyewe alikuwa ameonya mahsusi kwamba Yerusalemu na hekalu lao vingeharibiwa kwa sababu ya Wayahudi kukosa imani. (Mathayo 23:37–24:2) Je! Wayahudi hao wa karne ya kwanza walitii? La. Kama baba zao watangulizi, walikataa kabisa onyo la Yehova. Hivyo, Yehova alirudia kazi yake geni. Yerusalemu na hekalu lao viliharibiwa katika 70 W.K. na malejioni ya Kiroma.
10. Yehova atatendaje dhidi ya Jumuiya ya Wakristo katika wakati ujao wa karibu?
10 Kwa nini, basi, mtu yeyote afikiri kwamba Yehova hatafanya jambo linalofanana na hilo katika wakati wetu wenyewe? Uhakika ni kwamba, yeye atatimiza kusudi lake hata kama laonekana kuwa ngeni na lisilo la kawaida kwa watiaji shaka. Safari hii, kitu cha kuchukuliwa naye hatua kitakuwa ni Jumuiya ya Wakristo, ambayo, kama vile Yuda ya kale, hudai kumwabudu Mungu lakini imekuwa yenye ufisadi kupindukia. Kupitia Daudi Mkuu Zaidi wake, Kristo Yesu, Yehova atajilia “Wafilisti” wa Jumuiya ya Wakristo katika saa wasiyotazamia. Yeye atafanya kazi yake ya ajabu kufikia hatua ya kufutilia mbali kabisa visalio vya mwisho vya mifumo ya kidini ya Jumuiya ya Wakristo.—Mathayo 13:36-43; 2 Wathesalonike 1:6-10.
Kuonya Juu ya Tendo la Yehova
11, 12. Mashahidi wa Yehova wameonyaje juu ya hukumu za Yehova zinazokuja?
11 Kwa miaka mingi, Mashahidi wa Yehova wameonya juu ya tendo hilo la hukumu lijalo la Yehova. Wameonyesha kwamba uharibifu wa Yerusalemu na hekalu lalo katika 607 K.W.K. na tena katika 70 W.K. ulikuwa maonyo ya kiunabii ya yale yatapata Jumuiya ya Wakristo. Zaidi ya hilo, wameonyesha kwamba kwa sababu ya uasi-imani wayo, Jumuiya ya Wakristo imekuwa sehemu ya milki ya ulimwengu ya dini bandia, Babuloni Mkubwa. Kwa sababu hiyo, hukumu za Mungu juu ya Babuloni Mkubwa zitaletwa hasa juu ya Jumuiya ya Wakristo, kwa kuwa ndiyo sehemu yenye hatia kuliko zote ya mchanganyiko huo wa kishetani.—Ufunuo 19:1-3.
12 Mashahidi wa Yehova wameelekeza kwenye onyo la kiunabii la Biblia kwamba wakati wa Yehova uwadiapo, hawara wa kisiasa wa Babuloni Mkubwa watamgeukia. Ukiwafananisha hao na pembe kumi za hayawani-mwitu wa rangi nyekundu-nyangavu, Ufunuo huonya hivi: “Na zile pembe kumi ulizoziona, na huyo mnyama, hao watamchukia yule kahaba [Babuloni Mkubwa], nao watamfanya kuwa mkiwa na uchi, watamla nyama yake, watamteketeza kabisa kwa moto.” (Ufunuo 17:16) Jumuiya ya Wakristo ya kidini itateketezwa na kuharibiwa pamoja na dini nyingine zote bandia. Hilo ndilo litakuwa tendo geni la Yehova, kazi yake ya ajabu kwa siku yetu.
13. Maitikio-tendo kwa maonyo ya Yehova leo yamefananaje na yale ambayo Isaya alikabili?
13 Mashahidi wa Yehova wanapowasilisha onyo la msiba huu mkuu unaokuja, mara nyingi hukutana na kicheko cha kudhihaki. Watu hushangaa wao hujifikiria ni akina nani hata waseme mambo kama hayo. Jumuiya ya Wakristo huonekana ikiwa thabiti sana, imeimarishwa vizuri sana. Watu fulani huhisi kwamba hali yayo hata inapata maendeleo. Serikali zilizoikandamiza hapo mbeleni zimeiruhusu hivi karibuni uhuru zaidi wa tendo. Ingawa hivyo, kwa kweli Jumuiya ya Wakristo yapaswa itii shauri la Isaya: “Basi sasa msiwe watu wenye kudharau, vifungo vyenu visije vikakazwa; maana nimesikia kwa Bwana, BWANA [Yehova, NW] wa majeshi, habari ya hukumu itakayotimizwa, nayo imekusudiwa, itakayoipata dunia yote pia.” Isaya 28:22; 2 Petro 3:3, 4.
14. Vifungo vya Jumuiya ya Wakristo vitakuwaje imara zaidi na kukazika zaidi?
14 Kwa sehemu iliyo kubwa zaidi, Jumuiya ya Wakristo itaendelea kuwa yenye uhasama kwa Mfalme na Ufalme. (2 Wathesalonike 2:3, 4, 8) Hata hivyo, wakati uo huo, vifungo vyao vitakuwa imara zaidi na kukazika zaidi. Kwa maneno mengine, uharibifu wao utazidi kuwa hakika. Yehova hatageuka aachane na uamuzi wake wa kuona Jumuiya ya Wakristo imeharibiwa kama ambavyo hakugeuka akaacha uamuzi wake wa kuruhusu uharibifu wa Yerusalemu na hekalu lalo katika 607 K.W.K.
“Tokeni Kwake”
15. Ni njia gani ya kuponyoka imefunguliwa kwa watu mmoja mmoja wenye mioyo inayofaa?
15 Yeyote aweza kuponyokaje yale yatakayoipata Jumuiya ya Wakristo? Huko nyuma katika siku za Israeli, Yehova alituma manabii waaminifu kuwaita wenye mioyo inayofaa wairudie ibada safi. Leo, yeye ameinua Mashahidi wake, ambao sasa hesabu yao ni mamilioni, kwa kusudi linalofanana na hilo. Bila hofu wanafichua hali iliyokufa kiroho ya Jumuiya ya Wakristo. Katika kufanya hivyo, wanarudisha mwangwi kwa uaminifu wa matangazo yaliyo mfano wa tauni ya mipigo ya tarumbeta ya kimalaika ya Ufunuo sura ya 8 na 9. Zaidi ya hilo, wametangaza kwa bidii-nyendelevu ule waadhi ulioandikwa kwenye Ufunuo 18:4: “Tokeni kwake, enyi watu wangu, . . . msipokee mapigo yake.” Hapa “kwake” inarejezea Babuloni Mkubwa, ile milki ya ulimwengu ya dini bandia, wa kwanza kabisa wa hiyo milki mbovu akiwa ni Jumuiya ya Wakristo.
16. Mamilioni wameponyokaje kutoka kwa dini bandia?
16 Tangu 1919, na hasa tangu 1922, umati wenye kuongezeka wa wasikivu, wanaoitikia waadhi huo, wameacha Babuloni Mkubwa. Kwanza maelfu, halafu mamia ya maelfu, na sasa mamilioni, wamejitenga wenyewe na dini bandia, hasa na Jumuiya ya Wakristo, wakaponyoka na kuingia katika ibada safi. (Isaya 2:2-4) Wanajua kwamba ni kwa njia hiyo tu ya kuacha Babuloni Mkubwa ndivyo wanavyoweza kuepuka kupatwa na mapigo yake, ambayo yatafikia mwisho katika uharibifu wake wakati ujapo wa kutekelezwa kwa kazi ya Yehova ya ajabu.
17, 18. Yehova amekuwaje taji ya fahari na ua la uzuri kwa watu wake?
17 Nabii Isaya hueleza hali yenye furaha ya wale ambao huchukua msimamo wao kwa ajili ya ibada safi. Asema hivi: “Katika siku ile BWANA [Yehova, NW] wa majeshi atakuwa ni taji ya fahari, na kilemba cha uzuri, kwa mabaki ya watu wake. Naye atakuwa roho ya hukumu kwake yeye aketiye ili ahukumu; naye atakuwa nguvu kwao wageuzao nyuma vita langoni.”—Isaya 28:5, 6.
18 Kwa sababu ya ushikamanifu wao kwa kweli, Yehova ndiye taji ya fahari isiyokufa kwa washiriki wapakwa-mafuta wa jamii ya mtumwa mwaminifu mwenye akili. Hiyo imekuwa kweli hasa tangu 1926. Katika mwaka huo, toleo la Januari 1 la Mnara wa Mlinzi (Kiingereza) lilikazia uhitaji muhimu wa kutukuza jina la Yehova katika makala yenye kusisimua yenye kichwa “Nani Ataheshimu Yehova?” Tangu hapo, Wakristo wapakwa-mafuta wametangaza jina hilo ulimwenguni pote kuliko ilivyopata kuwa. Katika 1931 wakaja kutambulishwa kwa ukaribu hata zaidi na Yehova kwa kukubali jina Mashahidi wa Yehova. Zaidi ya hilo, umati mkubwa wa kondoo wengine umetoka pia katika Jumuiya ya Wakristo na sehemu nyingine ya Babuloni Mkubwa. Hao vilevile wamekubali kwa moyo jina la Mungu. Matokeo? Yehova mwenyewe—badala ya taifa fulani lenye kujitawala kwa muda tu—amekuwa taji ya fahari na ua la uzuri kwa watu zaidi ya milioni nne katika mabara na visiwa vya bahari 212 hivi. Ni heshima kama nini waliyo nayo hawa kubeba jina la yule Mungu pekee aliye hai na wa kweli!—Ufunuo 7:3, 4, 9, 10; 15:4.
“Juu Yake Roho ya Yehova Itatulia”
19. Ni nani aketiye ili ahukumu, na Yehova amekuwaje roho ya hukumu kwake?
19 Kwa Yesu, “yeye aketiye ili ahukumu,” Yehova amekuwa “roho ya hukumu.” Yesu alipokuwa duniani, alikataa kushindwa na roho yenye kulevya ya mapatano ya ulimwengu. Leo, akiwa Mfalme wa Yehova aliyetawazwa, anajawa na roho takatifu, na hiyo humwelekeza katika kufanya maamuzi yaliyosawazika, yenye kuona wazi. Katika Yesu, unabii huu umetimizwa: “Na juu yake roho ya Yehova itatulia, roho ya hekima na ya uelewevu, roho ya ushauri na uweza, roho ya maarifa na ya hofu kwa Yehova.” (Isaya 11:2, NW) Kweli kweli, kupitia Yesu, Yehova ‘atafanya hukumu kuwa ndiyo kanuni, na haki kuwa ndiyo timazi.’ (Isaya 28:17) Hali maadui waliolewa kiroho wakizidiwa katika uharibifu, haki itafanywa kwa jina takatifu la Yehova na kwa enzi kuu yake ya ulimwengu wote mzima.
20, 21. Maneno ya Isaya 28:1-22 yanakuathiri kwa njia gani?
20 Basi, unabii huu wa Isaya sura ya 28 una maana bora kama nini kwetu leo! Tukikaa mbali na walevi wa kiroho wa Jumuiya ya Wakristo na kushikamana na ibada safi, tutalindwa wakati Yehova afanyapo tendo lake geni na kazi yake ya ajabu. Jinsi tunavyoshangilia kujua hivyo! Nasi tunafurahi kama nini kuhakikishiwa kwamba wakati mambo hayo yatimiapo, kila mmoja atalazimika kujua kwamba Yehova wa majeshi ametenda kwa ajili ya watu wake waaminifu na kwa ajili ya kutetewa kwake kwa njia ya Yesu Kristo!—Zaburi 83:17, 18.
21 Kwa hiyo Wakristo wote halisi na waendelee bila hofu kuonya juu ya tendo geni la Yehova. Acheni wadumu katika kusimulia juu ya kazi yake ya ajabu. Wafanyapo hivyo, acheni wapigie mbiu wote kwamba tumaini letu lisilotikisika ni katika Ufalme wa Mungu chini ya Mfalme wake aliyetawazwa. Bidii yao, azimio, na uaminifu-mshikamanifu na vichangie sifa ya milele ya Mungu wetu mweza yote, Yehova.—Zaburi 146:1, 2, 10.
Waweza Kukumbuka?
◻ Kwa nini Jumuiya ya Wakristo iko katika hali ya kutostareheka?
◻ Yehova alikusudia nini kwa Yerusalemu, na kwa nini hilo lilikuwa “geni” na “la ajabu”?
◻ Mashahidi wa Yehova wametangaza onyo gani kuhusu Jumuiya ya Wakristo, nao wamekabili itikio-tendo gani?
◻ Watu waweza kuponyokaje msiba utakaopata Jumuiya ya Wakristo?
[Picha katika ukurasa wa 24]
Yehova atarudia tendo lake geni,
wakati huu dhidi ya Jumuiya ya Wakristo