Kujenga kwa Ajili ya Wakati Ujao wa Milele
“Kila nyumba hujengwa na mjenzi fulani—na Mungu ndiye mjenzi wa vitu vyote.”—WAEBRANIA 3:4, Habari Njema kwa Watu Wote.
1, 2. (a) Ni nani aliyechora muundo wa safina, na maagizo ya kuijenga yalikuwa ya kadiri gani? (b) Kwa sababu gani ni jambo la maana sana tutii, kama Noa?
MIAKA kama 4,400 Yehova alimwamuru Noa ajenge safina ya kuhifadhia uhai. Lakini Mungu hakumwachia Noa uamuzi wa kujenga jengo lo lote tu ambalo lingeweza kuelea majini. Bali, alimpa maagizo ya waziwazi juu ya vifaa vya kutumia, muundo, urefu, upana, kimo, nafasi za kuingizia hewa, na mambo mengine madogo-madogo ya kuikamilisha ndani na nje. “Noa akafanya kulingana na yote ambayo Mungu alikuwa amemwamuru yeye. Yeye alifanya ivyo hivyo.”—Mwanzo 6:13-16, 22.
2 Huo ni mfano mzuri kama nini kwa mashahidi wa kisasa wa Yehova! Kama Noa, sisi tumekabidhiwa kazi ya kuokoa uhai lakini safari hii tunaangalia wokovu wa ‘mamilioni ya watu wanaoishi sasa ambao huenda wasife kamwe.’ Ni jambo la maana kama nini tuwe watii kama Noa! Ni jambo la haraka kama nini tufuate kielelezo cha Yule aliye mkubwa kuliko Noa, Yesu Kristo, katika kutumikia tukiwa ‘wahubiri wa uadilifu’!—2 Petro 2:5, NW.
Kazi ya Ujenzi wa Kiroho
3. (a) Matokeo ya kujenga juu ya semi za Yesu yatakuwa nini? (b) Kwa sababu gani mahubiri ya Yesu yalikuwa yenye kujenga imani?
3 Sasa miaka 1,956 imepita tangu Yesu alipowagutusha watu wa mashambani Galilaya kwa tangazo hili: “Tubuni; kwa maana ufalme wa mbinguni umekaribia.” Yeye alisema kila mtu anayetii semi zake na kujenga kwa kuzitegemea anafanana na “mtu mwenye akili, aliyejenga nyumba yake juu ya mwamba.” Imani ya mtu huyo ni imara, isiyotikisika, isiyoondoleka. Hiyo haitabomoka itiliwapo mikazo. Mahubiri ya Yesu yalikuwa yenye kujenga imani. Yalifikia mioyo ya watu, yakawa tofauti sana na hotuba za kujisingizia utakatifu zilizotolewa na viongozi wa kidini Wayahudi. Watu wa kawaida walishangazwa sana na njia ya Yesu ya kufundisha. Hata askari waliotumwa wakamkamate walirudi mikono mitupu, wakitamka hivi: “Hajanena kamwe mtu ye yote kama huyu anavyonena.”—Mathayo 4:17; 7:24, 25, 28; Yohana 7:46.
4. (a) Yesu alijengaje kwa ajili ya wakati ujao? (b) Ni tukio gani lililo sehemu ya ujenzi lililotokea Pentekoste ya mwaka 33 W.K.?
4 Yesu alikuwa akijenga kwa ajili ya wakati ujao. Alikusanya wafanya kazi wenzake, kama Petro, ambaye pia aliitwa Kefa, maana yake “jiwe.” Yesu alimwambia mwanafunzi huyo hivi: “Wewe ndiwe Petro, na juu ya mwamba huu nitalijenga [kundi] langu.” Baada ya muda fulani Petro akawa mmoja wa ‘mawe mengi yaliyo hai’ yaliyojengwa juu ya Yesu, aliye “jiwe kuu la pembeni” la kundi. Kundi hilo lilianzishwa Pentekoste ya mwaka 33 W.K. wakati Yesu mfufuliwa, akiwa kwenye mkono wa kuume wa Mungu mbinguni, alipomimina roho takatifu juu ya wanafunzi wenye kungoja.—Mathayo 16:18; 1 Petro 2:4-6; Matendo 2:2-4, 32, 33.
5. Ni matukio gani ya kisasa yanayohusu sana kundi la Kikristo?
5 Leo, kundi la Kikristo linahusika sana katika utimizo wa makusudi ya Mungu. Huu ni wakati wa “ufunuo,” au “ufichuo,” wakati “mambo ambayo ni lazima yatukie upesi” yanapofunuliwa kwa “watumwa” wa Mungu duniani. (Ufunuo 1:1-3, maelezo ya chini ya Ref. Bi.) Huu ndio wakati ambao watumwa hawa ni lazima ‘wahubiri habari njema za Ufalme wa Mungu katika dunia yote kwa ushuhuda,’ kabla hajafikiliza hukumu juu ya mfumo mbovu wa Shetani. Ndio wakati wa Mfalme, Yesu Kristo, ambaye sasa amekwisha kutawazwa mbinguni, kutenga watu wapole, wenye mfano wa kondoo watoke kati ya watu wenye mioyo migumu wenye mfano wa mbuzi wasioutaka Ufalme huo, na kukusanya “kondoo” hao kwenye kundi lake la “ndugu” za kiroho kabla ya “dhiki kubwa” kutokea.—Mathayo 24:14, 21, NW; 25:31-40.
6. “Safina” ni nini leo, nasi tunaweza kuokolewaje?
6 Ni nini safina ya wokovu ya kisasa? Ni hali ya kiroho ambamo Mashahidi wa Yehova wanajikuta wamo tangu mwaka 1919, paradiso ya kiroho. Kama washiriki wa jamaa ya Noa, baki la Wakristo wapakwa mafuta na wenzi wao ni lazima wadumu ndani ya paradiso hiyo, wafanye kazi kwa utii, kwa moyo wote, katika kuikamilisha shughuli kubwa ya kiroho ambayo Yehova amekusudia. Shughuli hiyo ni “kuvikusanya tena vitu vyote pamoja katika Kristo, vitu vilivyomo mbinguni [tangu mwaka 33 W.K. kwa kuanza na wapakwa-mafuta wenye kwenda mbinguni] na vitu vilivyomo duniani [tangu mwaka 1935 W.K. hasa kwa kuanza na “mkutano mkubwa” wa mataifa yote ambao watapata uzima wa milele duniani].”—Waefeso 1:10, NW; Ufunuo 7:9, 14.
“Kujenga na Kupanda”
7. Ni kazi gani yenye sehemu mbili inayoendelea sasa, nasi tunaweza kupataje furaha kama Noa na Yeremia?
7 Yehova amewaagiza Wakristo wapakwa mafuta waliobaki duniani, kama vile alivyomwagiza nabii Yeremia, awe “juu ya mataifa na juu ya falme, ili kung’oa, na kubomoa, na kuharibu, na kuangamiza; ili kujenga na kupanda.” Kwa hiyo, sasa kazi yenye sehemu mbili inaendelea, (1) kutangaza hukumu ya Yehova juu ya mfumo mbovu wa ulimwengu wa Shetani na (2) kujenga na kuimarisha jamii ya watu wa Mungu mwenyewe watakaohifadhiwa. (Yeremia 1:10; 24:6, 7; Isaya 26:20, 21) Ni wenye furaha kama nini mabaki ya wapakwa mafuta na halaiki inayoongezeka ya wenzi wao wanapoishiriki kazi hiyo leo! Furaha waliyo nayo ni ya aina ambayo Noa mwenye bidii na jamaa yake lazima wawe walikuwa nayo siku zao.
8. (a) Ni ongezeko gani la wahubiri juu ya miaka 22 iliyopita linalofaa kuangaliwa? (b) Ukirejezea kurasa 20-23, kuna nchi gani kati ya zile zilizofurahia ongezeko kubwa sana mwaka 1985?
8 Je! mamilioni ya watu wataiokoka siku ya hasira ya Yehova? Kuna taraja zuri kwamba itakuwa hivyo, kama inavyoonyeshwa na Ripoti ya Mashahidi wa Yehova ya Mwaka wa Utumishi wa 1985. Maelezo marefu juu ya ripoti hiyo yanapatikana humu katika kurasa 20-23. Ni jambo la kusisimua sana kuona ongezeko zuri sana katika kilele cha hesabu ya wafanya kazi wa shamba. Sasa wameongezeka wakawa jumla ya wahubiri wa Ufalme 3,024,131. Kiwango cha 1,000,000 kilifikiwa mara ya kwanza mwaka 1963, na kiwango cha 2,000,000 kikafikiwa mwaka 1974, na sasa kulikuwa zaidi ya 3,000,000 mwaka 1985. Muda wa miaka hiyo 22 kumekuwa na ongezeko la asilimia 200. Tunamshukuruje Yehova, anayekuza mambo kwa kutumia roho yake!—Zekaria 4:6; 1 Wakorintho 3:6.
9. (a) Kwa sababu gani ongezeko la mapainia ni la kupendeza hata zaidi? (b) Ni jambo gani linalopendekezwa kwa wote wanaoweza kuutafutia nafasi upainia, na kwa sababu gani?
9 Lenye kutokeza zaidi wakati wa miaka hiyo limekuwa ongezeko la watangazaji wa wakati wote wa Ufalme. Ijapokuwa hali za kiuchumi zimezidi kuharibika ulimwenguni pote, hesabu ya kikundi hicho hodari cha “mapainia” imeruka kutoka wastani ya kila mwezi ya 38,573 mwaka 1963 wakawa 322,821 mwaka 1985—ongezeko la asilimia 737! Hilo linaonyesha nini? Linaonyesha kwamba roho nzuri sana ya kujinyima ipo kati ya watu wa Mungu, kupatana na maneno ya Yesu katika Luka 9:23. Kwa kawaida, kupanga mambo kwa uangalifu na kujinyima kunahitajiwa ili kufanikisha utumishi wa painia. Lakini thawabu ni kubwa.—Warumi 12:1, 2; Malaki 3:10
10. (a) Wahubiri wa kundi wanapaswa kusifiwa kwa jambo gani? (b) Ni vilele gani vipya vitatu vya utendaji vinavyoonekana hapa, navyo vinaonyesha nini?
10 Mamilioni ya wahubiri wa kundi pia yanalazimika kupambana na mikazo wanayoletewa na Shetani na ulimwengu wake. Lakini wao, pia, wanatolea Mungu “dhabihu ya sifa.” (Waebrania 13:15; Warumi 10:9, 10) Saa hizo, ziwe ni nyingi au chache, ambazo ninyi wahubiri waaminifu mliripoti kila mwezi zilikuja kuwa sehemu ya kilele kipya cha saa 590,540,205 za utumishi wa shambani wa mwaka 1985. Hilo ni ongezeko la asilimia 16.8 juu ya mwaka 1984! Vilele vipya vya ziara za kurudia 224,725,918 na mafunzo ya nyumbani ya Biblia 2,379,146 yaliyoongozwa kwa watu wanaopendezwa vinaonyesha kwamba watangazaji wa Ufalme kila mahali wanajitahidi kuwa walimu wazuri na pia wahubiri wenye bidii.—Mathayo 28:19, 20.
Kujenga Ili Kuwe na Amani na Usalama wa Kweli
11. Amani na usalama wa kweli vinatangazwaje, na kwa kadiri gani?
11 Mwishoni-mwishoni mwa mwaka 1985, Umoja wa Mataifa ulitangaza mwaka 1986 kuwa Mwaka wa Amani ya Kimataifa. Juzijuzi, Umoja wa Mataifa umekuwa ukitaja-taja sana amani na usalama. Lakini tangazo lililo la maana kuliko hilo, lile la tumaini linalotolewa na Maandiko juu ya jinsi amani na usalama vitakavyopatikana, limekuwa likitangazwa sana mwaka 1985 Mashahidi wa Yehova walipokuwa wakiangusha katika kazi ya shambani jumla ya Biblia, vitabu na vijitabu 38,805,561, na pia magazeti 300,545,609, kisha wakapata maandikisho 1,719,930 ya Mnara wa Mlinzi na Amkeni! Kwa kutumia vichapo na kinywa, Ufalme uliosimamishwa wa “MwanaMfalme wa Amani” aliye wa kweli umepewa ushahidi mkubwa zaidi ya zamani zote zilizotangulia. Kwa kweli, “kwa habari ya ongezeko la serikali yake na amani hakutakuwa na mwisho.”—Isaya 9:6, 7, King James Version.
12. Mpanuko umetokeza uhitaji gani mkubwa, na watu wa Yehova wameunganaje wajaribu kutimiza uhitaji huo?
12 Ukuzi mkubwa sana katika shamba umetokeza uhitaji wa ukuzi wa tengenezo lenye kutegemeza. Mwaka 1985, hesabu ya makundi ya Mashahidi wa Yehova ulimwenguni pote iliongezeka kutoka 47,869 ikawa 49,716. Jambo hilo limetokeza uhitaji wa mamia ya mahali papya pa mikutano. Ni vizuri kama nini kwamba, katika nchi nyingi, Mashahidi wamebarikiwa katika jitihada zao za kutoa pesa za kugharimia Majumba ya Ufalme! Mahali ambako kumekuwa na uhitaji, watu mmoja mmoja na makundi wameungana mkono kusaidiana katika programu za ujenzi, mpaka kukawa na ‘usawazishi’ kati ya udugu wa ulimwenguni pote.—2 Wakorintho 8:14, 15.
13. Watu mmoja mmoja wanaweza kuchangiaje shughuli za ujenzi wa Majumba ya Ufalme?
13 Katika nchi ambako hali zinaruhusu, afisi za matawi pia za Sosaiti yetu zimesaidia shughuli za kujenga Majumba ya Ufalme. Katika United States na Kanada, watu wengi wanachangia Hazina ya Majumba ya Ufalme iliyo ya namna ya pekee, na jambo hilo limewezesha mikopo itolewe ili Majumba ya Ufalme zaidi yajengwe. Wengine wamechanga nishati na ustadi wao, hivi kwamba Majumba ya Ufalme yanajengwa haraka hata kwa muda wa mwisho-juma mmoja tu. Kwa kufanya shughuli hizo za ujenzi “kwa nafsi yote kama kumfanyia Yehova,” Mashahidi wake wanaweza kutimiza mambo yanayoweza kufikiriwa na walimwengu kuwa yasiyowezekana.—Wakolosai 3:23, NW.
14. Mahitaji ya Majumba ya Makusanyiko yametimizwaje?
14 Katika nchi kadha, ukosefu wa mahali panapofaa kutumiwa mara kwa mwaka kufanya makusanyiko ya mizunguko ya Mashahidi wa Yehova umetokeza tatizo kubwa. Kwa mara nyingine, Mashahidi wamekabili tatizo hilo kupitia programu za ujenzi, wakiwa na roho ile ile iliyoonyeshwa na watumishi wa Mungu katika nyakati za kale. Kwa mfano, ilipokuwa lazima kutafuta vifaa vya ujenzi wa hema takatifu, kusanyiko la Israeli liliitii kwa umoja amri hii ya Mungu: “Kutoka kati yenu wenyewe pelekeni mchango kwa ajili ya Yehova. Kila mmoja aliye na moyo wa kupenda na aulete uwe mchango wa Yehova.” Kusanyiko hilo lilitoa kiasi kilichozidi uhitaji, nayo kazi ikatimizwa haraka.—Kutoka 35:5-19; 36:7, NW.
15. (a) Ni mpanuko gani umekuwa ukitukia katika matawi ya Sosaiti ya Mnara wa Mlinzi? (b) Kazi hiyo imefanywaje?
15 Kadiri ambavyo uhitaji wa Biblia na vichapo vinavyoitegemea Biblia unavyoongezeka, ndivyo mengi ya matawi yale 94 ya Sosaiti ya Mnara wa Mlinzi katika sehemu zote za ulimwengu yamelazimika kupanua majengo yao. Sehemu ya uchapaji ya Brooklyn na Mashamba ya Mnara wa Mlinzi ingali ndiyo kubwa zaidi, lakini matawi 36 ya Sosaiti sasa yanasimamia uchapaji wao wenyewe wa magazeti, na matawi 6 yana vifaa pia vya kuchapia vitabu na kuvijalidi. Kati ya hayo, Ujeremani, Italia, na Japani ni matawi yanayotengeneza Biblia. Kiwanda kipya cha kule Selters, Ujeremani, kinafanya kazi kwa kujikaza kweli kweli. Kule Ebina, Japani, ujenzi unaendelea wa nyongeza ya kiwanda chenye ghorofa sita na jengo jipya la ghorofa nane lililounganishwa na Makao ya Betheli la kuishi wafanya kazi wengine 280. Kama vile watu wa Yehova walivyosaidia ujenzi wa hekalu la Sulemani “kwa moyo kamili,” ndivyo leo watu wa Mungu katika nchi mbalimbali wanavyotoa “matoleo ya kujitolea kwa Yehova,” naye anaongeza baraka yake mpaka kazi inatimizwa,—1 Mambo ya Nyakati 22:14, 15; 29:7, 9, ona maelezo ya chini ya Ref. Bi.
16. Kwa sababu gani kazi hiyo ya ziada ya kujenga na kusimamia mambo kitengenezo imekuwa ya lazima?
16 Je, kweli kuna uhitaji wa ujenzi na utengenezaji wote huo? Ndiyo, ikiwa “mtumwa mwaminifu mwenye akili” ataendelea kutoa ‘chakula cha kiroho kwa wakati wake.<u5E> Chakula hicho kinahitajiwa kabisa ili “watu wa nyumbani mwake Mungu” wapate ukuzi na ili kuwezesha mahubiri ya duniani pote katika lugha zaidi ya 200. (Mathayo 24:45; Waefeso 2:19; 4:15, 16) Watu wenyewe wa Yehova wamejumlisha pamoja ustadi wao mbalimbali wakatokeza mfumo wenye lugha nyingi wa kupanga maandishi kwa kupiga picha kielektroni (MEPS). mfumo ambao sasa yamepelekewa matawi 26 ya Mnara wa Mlinzi. Jambo hilo limewezesha .kuwe na uchapaji wa ofseti duniani pote, na limesaidia kutangaza ujumbe wa Ufalme wakati ule ule mmoja katika sehemu nyingi za dunia.—Linganisha Isaya 52:7-9.
17. Ni uhitaji gani ulio katika makao makuu ya Brooklyn, nao unashughulikiwaje?
17 Inaonekana hakuna mwisho wa mpanuko wa kisasa wa tengenezo la Yehova. Hata sasa, jamaa ya Betheli kule Brooklyn, New York, ambayo ndiyo makao makuu ya Sosaiti imeongezeka mpaka ikajaza nafasi yote iliyoko. Yakiwa ni mapenzi ya Yehova, jengo lenye ghorofa nyingi la kuwapa makao wafanya kazi 1,000 zaidi wa Betheli huenda likasimamishwa kwenye uwanja wa Sosaiti katika Columbia Heights. Lakini kama haitakuwa hivyo, tutaendelea kutafuta mwelekezo wa Yehova katika jambo hilo. Inathaminiwa sana wakati udugu wa ulimwenguni pote unapotoa sala zao na kuunga mkono kwa ushikamanifu mpanuko wote huo.—Linganisha Matendo 21:14; 2 Wathesalonike 3:1.
18. Kwa sababu gani kuna shughuli nyingi sana za ujenzi, ijapokuwa Har–Magedoni imekaribia?
18 ‘Lakini kwa sababu gani kuwe na majengo mengi sana ya upanuzi na hali Har–Magedoni imetukaribia sana?’ huenda mtu akauliza. Jibu ni kwamba tengenezo la Yehova halifungi kazi kwa sababu ya Har–Magedoni kukaribia. Huo ni wakati wa kufunga kazi kwa tengenezo la Shetani tu. Tengenezo la Yehova linajenga kwa ajili ya wakati ujao wa milele. Hata kama majengo yaliyofanywa na wanadamu yata-au-hayatastahimili dhoruba ya Har–Magedoni, tunajua kwamba tengenezo la Mungu litaiokoka likiwa linafanya kazi. Yehova atalitumia hilo pamoja na wale wanaoliunga mkono kwa ushikamanifu, aimarishe amani na usalama wa milele katika Paradiso tukufu ya kidunia iliyoahidiwa na Mungu.—Ufunuo 7:9, 14-17; 21:1, 4, 5.
Kujenga Tukiwa na Kusudi
19. Ni dai gani linalohitaji jitihada nyingi linaloonekana katika ripoti ya Ukumbusho ya mwaka 1985?
19 Noa alijenga akiwa na kusudi, na ndivyo inavyotupasa kufanya. Sehemu moja ya Ripoti ya Mwaka wa Utumishi wa 1985 inatuonyesha jambo linalofaa kufikiriwa. Ni lile hudhurio zuri sana la watu 7,792,109 kwenye Ukumbusho wa kifo cha Yesu siku ya Aprili 4, 1985—ongezeko la watu 375,135 juu ya jumla ya mwaka 1984. Ni vizuri kweli kweli! Lakini tarakimu hiyo inadai jitihada nyingi. Kwa kuwa kuna kilele cha wahubiri 3,024,131 wanaoshiriki katika utumishi wa Ufalme, kuna karibu 4,000,000 wengine wanaoshirikiana nasi, angalau kwa kadiri fulani, wanaohitaji kujenga kwa ajili ya wakati ujao kwa kushiriki katika huduma ya Kikristo. Tunaweza kuwasaidiaje?
20. Kuna uhitaji gani wa haraka wa kukabiliana na dai hilo, nasi tunaweza kulikabilije kwa njia yenye mafaa?
20 Tunawajua kibinafsi wengi wa watu hao wenye kupendezwa. Huenda wakawa ni washiriki wa jamaa, watu tunaojifunza nao Biblia, wenye kujiandikisha wapate magazeti yetu, au wenginewo. Huenda wengine hata wakawa walianza kupendezwa wakati wa Ukumbusho uliopita. Je, sasa tunaweza kufanya jitihada za pekee tuwasitawishe hao, tuwajenge kupitia funzo la Biblia, ili wapate kimbilio katika mpango wa Yehova ‘hata misiba itakapopita’? (Zaburi 57:1) “Dhiki kubwa” itakuwa kitendo cha Yehova cha kujiondolea malawama, chenye maana kubwa na chenye kukata maneno hata kuliko Gharika ya siku za Noa. Tunataka kuwajenga watu hao wenye kupendezwa kwa kutumia kweli zinazotoa uzima, ili ‘waliitie jina la Yehova’ wasije wakafagiliwa mbali. (Mathayo 24:21, 22, 39; Sefania 2:3; 3:8, 9) Na tujifunze Neno la Mungu pamoja nao, tukitumia kitabu cha mafundisho kinachoitwa Unaweza Kuishi Milele Katika Paradiso Duniani au vitabu vingine vya Kibiblia vinavyojenga imani.
21. Kama Noa tunaweza kujengaje imani ndani yetu wenyewe na ndani ya wengine?
21 Yehova Mungu ndiye Mjenzi Mkubwa Zaidi na Mwandalizi Mkuu wa wanadamu. (Zaburi 127:1; 145:6; Mhubiri 3:10-13) Ndiye aliyeelekeza Noa juu ya muundo na ujenzi wa safina. Kwa kupata ushirikiano wa moyo wa kupenda kutoka kwa Noa Mkubwa Zaidi, Yesu Kristo, yeye amepanga kukomboa wanadamu watiifu katika dhambi na kifo. Kupitia Mwanaye amejenga pia “safina” ya kisasa, ile paradiso ya kiroho inayositawi sana ambamo wanaume na wanawake wenye imani wanaweza kuingia wapate hifadhi, watazamie kupata uzima wa milele. (Mathayo 20:26-28; Yohana 3:16; 17:3) Na tusaidie watu wengine wengi wajenge imani yao na hivyo wajitengenezee kifungo cha usiri pamoja na Yehova na Mwanaye. Na tuwasaidie wapende uadilifu na kuchukia uovu. (Waebrania 1:9) Hivyo, kwa kuwa na imani kama ya Noa, tunaweza kuendelea kujenga pamoja kwa ajili ya wakati ujao wa milele.—1 Timotheo 4:15, 16.
MASWALI FULANI YA KURUDIA—
◻ Yesu alijengaje kwa ajili ya wakati ujao?
◻ Umeona mambo gani ya kutokeza katika ripoti ya mwaka 1985?
◻ Kwa sababu gani programu za ujenzi wa kiroho zinahitajiwa?
◻ Sote tunaweza kujengaje tukiwa na kusudi?
[Sanduku katika ukurasa wa 24]
Kundi moja katika nchi moja ya Afrika ambako kazi ya Yehova imepigwa marufuku lina wahubiri 95, na wote wanaushiriki utumishi kila mwezi. Wana wastani wa watu 130 kwenye mikutano yao lakini 160 wanahudhuria hotuba za watu wote. Wana mapainia wa kawaida watatu na hivi majuzi wamekuwa na mapainia-wasaidizi wanane. Katika muda wa miezi sita tu, wahubiri wapya 21 walianza kufanya utumishi wa shambani.
[Sanduku/Pictures katika ukurasa wa 16, 17]
UJENZIWA DUNIANIPOTE UNAOFANYWA NA MASHAHIDIWA YEHOVA
Ulimwenguni pote, mapainia 322,821 walikuwa wakiripoti kila mwezi (ongezeko la asilimia 24.7)
Wahubiri ulimwenguni pote waliongezeka wakawa 3,024,131 (ongezeko la asilimia 6.4)
Jumla ya ziara za kurudia watu wenye kupendezwa mwaka huo, ilikuwa 224,725,918 (ongezeko la asilimia 14.8)
Mafunzo ya Biblia yenye kuongozwa kila mwezi, yalikuwa 2,379,146 (ongezeko la asilimia 16.2)
[Pictures]
Mapainia wanaondoka kwenda kwenye huduma ya nyumba kwa nyumba, Brooklyn, New York
Mkusanyiko wa lugha 14 katika Montreal, Quebec, Kanada
Kutoa ushuhuda, Castle Combe, Wiltshire, Uingereza
Kikundi cha funzo katika Yap, Micronesia
Majengo fulani yanayotumiwa kutegemeza utendaji wa ujenzi wa kiroho duniani pote:
Katika Brooklyn, usafirishaji wa Biblia na vitabu vya Kibiblia unashughulikiwa kutoka jengo hili la futi za mraba 1,000,000 katika 360 Furman Street
Jumba la Ufalme hili (katika Downpatrick, Ailandi Kaskazini) lilijengwa kwa muda wa saa 31
Hili Jumba la Makusanyiko katika Roma ni moja la makorija mengi ya majumba ya namna hiyo yanayotumiwa kuzunguka dunia
Nyongeza hii kwenye makao ya Betheli ya Japani sasa inaendelea kujengwa
[Chati katika kurasa za 20-23]
RIPOTI YA MWAKA WA UTUMISHI WA 1985 YA MASHAHIDI WA YEHOVA ULIMWENGUNI POTE
(Ona kitabu cha Mnara wa Mlinzi)
[Chati katika ukurasa wa 25]
Nchi nane ziliripoti kilele cha wahubiri zaidi ya 100,000 mwaka 1985
U.S.A. 723,220
Brazili 177,904
Meksiko 173,037
Italia 127,526
Nigeria 121,729
Ujeremani 115,604
Uingereza 103,522
Japani 103,117