Unaweza Kufaidika Kutokana na Agano Jipya

 1. Yeremia alitimiza utume gani wenye sehemu mbili?

YEHOVA alimpa Yeremia utume wenye sehemu mbili. Kwanza, “kung’oa na kubomoa na kuangamiza na kuangusha.” Na pili, “kujenga na kupanda.” Nabii huyo alitimiza sehemu ya kwanza kwa kufunua uovu wa Wayahudi wenye kiburi, akitangaza hukumu ya Mungu juu yao na juu ya Babiloni. Hata hivyo, unabii mbalimbali wa Yeremia ulitia ndani tumaini la wakati ujao. Alitabiri kujengwa kwa kile ambacho Mungu alikusudia kijengwe na kupandwa kwa kile ambacho Mungu alitaka kipandwe. Kwa mfano, Yeremia alikuwa akitimiza sehemu ya pili ya mgawo wake alipokuwa akizungumzia kurudishwa kwa Wayahudi katika nchi yao.—Yer. 1:10; 30:17, 18.

 2. Kwa nini Yehova alitekeleza hukumu juu ya watu wake, naye alifanya hivyo kwa kadiri gani?

² Unabii wa Yeremia kuhusu kurudishwa haukumaanisha kwamba Mungu angewabembeleza watu wake au kulegeza viwango vyake vya haki. Angewahukumu Wayahudi waliopotoka. (Soma Yeremia 16:17, 18.) Katika siku za Yeremia, ni watu wachache jijini Yerusalemu ‘waliokuwa wakitenda haki’ au ‘kutafuta uaminifu,’ nayo subira ya Yehova ilikuwa imefikia kikomo. Alisema: “Nimechoka kujuta.” (Yer. 5:1; 15:6, 7) Wayahudi hao walikuwa “wamerudi kwenye makosa ya mababu zao, wale wa kwanza, waliokataa kuyatii” maneno ya Yehova. Isitoshe, walimhuzunisha Mungu kwa kufanya uzinzi wa kiroho, kuabudu miungu ya uwongo. (Yer. 11:10; 34:18) Yehova angewarekebisha watu wake, hata kuwaadhibu “kwa kiwango kinachofaa.” Huenda baadhi yao wangejuta na kumrudia.—Yer. 30:11; 46:28.

 3. Kwa nini uchunguze unabii kuhusu agano jipya?

³ Mungu alimtumia Yeremia kutabiri jambo ambalo lingekuwa na faida nyingi zaidi na kwa muda mrefu, yaani, agano jipya. Tunapoendelea kuchunguza maandishi ya Yeremia ya kinabii, tuna sababu za kutosha za kuzingatia agano jipya. Agano hilo lilipaswa kuchukua mahali pa agano lililofanywa na Waisraeli baada ya kutoka Misri, Musa akiwa mpatanishi. (Soma Yeremia 31:31, 32.) Alipoanzisha Mlo wa Jioni wa Bwana, Yesu Kristo alizungumzia agano hilo jipya. Kwa hiyo, tunapaswa kupendezwa nalo. (Luka 22:20) Mtume Paulo alirejelea agano hilo alipokuwa akiwaandikia Waebrania. Alinukuu unabii wa Yeremia na kukazia umuhimu wa agano jipya. (Ebr. 8:7-9) Lakini agano jipya ni nini hasa? Kwa nini lilihitajika? Ni nani wanaohusika, nawe unaweza kufaidika jinsi gani? Acheni tuone.

 4. Agano la Sheria lilitimiza nini?

⁴ Ili kulielewa vizuri agano jipya, lazima kwanza tuelewe kusudi la agano lililotangulia, yaani, agano la Sheria. Lingetimiza mambo mengi mazuri kwa ajili ya taifa lililokuwa likingojea Uzao ulioahidiwa, ambao kupitia huo wengi wangejibariki. (Mwa. 22:17, 18) Waisraeli walipokubali agano la Sheria, Mungu aliwaona kuwa ‘mali yake ya pekee.’ Chini ya agano hilo, makuhani wa taifa wangetoka katika kabila la Lawi. Hata hivyo, alipokuwa akifanya agano hilo la kitaifa kati yake na Israeli kwenye Mlima Sinai, Yehova alitaja “ufalme wa makuhani na taifa takatifu” lakini hakufunua wakati na jinsi ambavyo hilo lingetimia. (Kut. 19:5-8) Hadi wakati huo, agano hilo lilionyesha wazi kwamba Waisraeli hawangeweza kuishika Sheria kikamili. Kwa hiyo, ilifunua dhambi zao. Hivyo, chini ya Sheria, Waisraeli walipaswa kutoa dhabihu kwa ukawaida ili kufunika dhambi zao. Hata hivyo, ni wazi kwamba kulikuwa na uhitaji mkubwa zaidi, uhitaji wa dhabihu kamilifu ambayo haingehitaji kutolewa tena. Kulikuwa na uhitaji mkubwa wa kupata msamaha wa dhambi mara moja kwa wakati wote.—Gal. 3:19-22.

 5. Kwa nini Yehova alitabiri kuhusu agano jipya?

⁵ Hivyo basi, tunaweza kuona ni kwa nini hata wakati ambapo agano la Sheria lilikuwa likitumika, Mungu alimwagiza Yeremia atabiri kuhusu agano lingine, agano jipya. Kwa sababu ya upendo na fadhili zake, Yehova alitaka kutoa msaada wa kudumu kwa ajili ya watu wa mataifa yote. Kupitia Yeremia, Mungu alisema hivi kuhusu wale ambao wangehusishwa katika agano ambalo lingefanywa baadaye: “Nitalisamehe kosa lao, na dhambi yao sitaikumbuka tena.” (Yer. 31:34) Ingawa ahadi hiyo ilitolewa katika siku za Yeremia, inatoa tumaini zuri kwa wanadamu wote. Jinsi gani?

6, 7. (a) Wengine huhisi namna gani kuhusiana na hali yao yenye dhambi? (b) Kwa nini kuchunguza agano jipya kunaweza kukutia moyo?

⁶ Sisi si wakamilifu, na mara kwa mara tunajikuta katika hali zinazotukumbusha hilo. Kwa mfano, ndugu mmoja alikuwa akijitahidi kushinda zoea fulani baya. Anasema: “Nilipojikuta nimerudia zoea hilo, niliumia sana moyoni. Nilifikiri hakuna lolote ninaloweza kufanya ili kupata msamaha. Nilishindwa kusali. Nilikuwa nikianza kwa kusema, ‘Yehova, sijui kama utaisikiliza sala hii, lakini . . .’” Watu fulani ambao wamerudia zoea fulani au kufanya dhambi wamehisi kana kwamba “wingu kubwa” linazuia sala zao zisimfikie Mungu. (Omb. 3:44) Wengine wamesumbuliwa na kumbukumbu za makosa yao ya wakati uliopita, miaka mingi baadaye. Hata Wakristo wakomavu huenda wakasema mambo ambayo baadaye wanajuta kwamba waliyasema.—Yak. 3:5-10.

⁷ Hakuna yeyote kati yetu anayepaswa kufikiri kwamba hawezi kamwe kutumbukia katika mwenendo usiofaa. (1 Kor. 10:12) Hata mtume Paulo alitambua kwamba mara kwa mara alikuwa akikosea. (Soma Waroma 7:21-25.) Kuhusiana na hilo, tunapaswa kukumbuka agano jipya. Mungu aliahidi kwamba jambo moja kuu kuhusu agano jipya ni kwamba hatazikumbuka dhambi tena. Faida isiyo na kifani ya agano jipya! Lazima kutabiri hilo kulimchochea Yeremia sana, nasi pia tunaweza kuchochewa tunapojifunza mengi kuhusu agano jipya na kuona jinsi tunavyopata faida kutokana nalo.

8, 9. Ilimgharimu Yehova nini ili kuandaa msamaha wa dhambi?

⁸ Unapopata kumjua Yehova vizuri, unaendelea kutambua jinsi alivyo mwenye fadhili na rehema kuwaelekea wanadamu wasio wakamilifu. (Zab. 103:13, 14) Alipotabiri kuhusu agano jipya, Yeremia alikazia kwamba Yehova ‘angesamehe kosa lao’ na dhambi yao hangeikumbuka tena. (Yer. 31:34) Lazima Yeremia alikuwa na hamu ya kujua jinsi ambavyo Mungu angefanya hivyo. Angalau alielewa kwamba Mungu alipozungumzia agano jipya, alimaanisha kwamba kungekuwa na makubaliano, au mapatano, kati Yake na wanadamu. Kwa njia fulani, kupitia agano hilo, Yehova angetimiza yale ambayo alimwongoza Yeremia kuandika, kutia ndani kuwasamehe wanadamu. Habari zaidi zingepatikana wakati ambapo Mungu angefunua zaidi kusudi lake, kutia ndani yale ambayo Masihi angefanya.

⁹ Huenda umeona wazazi wanaowaendekeza watoto wao, kwa kutowatia nidhamu. Je, unafikiri ndivyo alivyo Yehova? Sivyo, hata kidogo! Hilo laonekana wazi kutokana na jinsi agano jipya lilivyotekelezwa. Badala tu ya kufutilia mbali dhambi, kwa uangalifu mwingi sana, Mungu alitilia maanani viwango vyake vya haki kwa kuandaa msingi halali wa kusamehe dhambi, jambo lililomgharimu sana. Unaweza kuelewa jambo hilo kwa kufikiria yale ambayo Paulo aliandika alipokuwa akizungumzia agano jipya. (Soma Waebrania 9:15, 22, 28.) Paulo alitaja “kuachiliwa huru kwa fidia” na kusema kwamba “damu isipomwagwa hakuna msamaha unaotokea.” Katika agano jipya, hilo halikumaanisha damu ya dhabihu za ng’ombe dume au mbuzi kama ilivyokuwa chini ya Sheria. Agano jipya lilianzishwa kupitia damu ya Yesu. Kwa msingi wa dhabihu hiyo kamilifu, Yehova angeweza ‘kusamehe makosa na dhambi’ milele. (Mdo. 2:38; 3:19) Lakini ni nani ambao wangekuwa katika agano hilo jipya na kupata msamaha huo? Si taifa la Kiyahudi. Yesu alisema kwamba Mungu angewakataa Wayahudi, wale waliokuwa wakitoa dhabihu za wanyama chini ya Sheria, Naye angeligeukia taifa lingine. (Mt. 21:43; Mdo. 3:13-15) Taifa hilo likaja kuwa “Israeli wa Mungu,” yaani, Wakristo waliotiwa mafuta kwa roho takatifu. Kimsingi, agano la Sheria lilikuwa kati ya Mungu na Israeli wa asili, lakini agano jipya ni kati ya Yehova Mungu na Israeli wa kiroho, Yesu akiwa Mpatanishi.—Gal. 6:16; Rom. 9:6.

10. (a) “Chipukizi” la Daudi ni nani? (b) Wanadamu wanaweza kufaidika jinsi gani kutokana na “chipukizi” hilo?

¹⁰ Yeremia, akizungumzia Yule anayekuja, yaani, Masihi, alimwita “chipukizi” la Daudi. Hilo linafaa. Hata Yeremia alipokuwa nabii, nasaba ya kifalme ya familia ya Daudi ilikuwa imekatishwa. Hata hivyo, kisiki cha mti uliowakilisha nasaba hiyo hakikuwa kimekufa. Baadaye, Yesu alizaliwa katika ukoo wa Mfalme Daudi. Angeweza kuitwa “Yehova Ni Uadilifu Wetu,” jina linalokazia kwamba Mungu anahangaikia sana sifa hiyo. (Soma Yeremia 23:5, 6.) Yehova alimtoa Mwana wake wa pekee ateseke na kufa hapa duniani. Kisha Yehova, kulingana na haki yake, alitumia thamani ya dhabihu ya fidia ya “chipukizi” la Daudi kuwa msingi wa msamaha. (Yer. 33:15) Hilo liliwafungulia njia wanadamu kadhaa kutangazwa kuwa “waadilifu kwa ajili ya uzima” na kutiwa mafuta kwa roho takatifu wawe washiriki wa agano jipya. Uthibitisho mwingine wa kwamba Mungu anapendezwa na uadilifu ni kwamba wengine ambao si sehemu ya agano hilo jipya wanaweza na wanafaidika kutokana na agano hilo, kama tutakavyoona.—Rom. 5:18.

11. (a) Sheria ya agano jipya imeandikwa wapi? (b) Kwa nini “kondoo wengine” wanapendezwa na sheria ya agano jipya?

¹¹ Je, ungependa kujua sehemu nyingine mbalimbali za agano jipya? Tofauti kuu kati ya agano hilo na agano la Sheria ya Musa ni mahali yalipoandikwa. (Soma Yeremia 31:33.) Amri Kumi za agano la Sheria ziliandikwa kwenye mabamba ya mawe, ambayo baadaye yalipotea. Tofauti na hilo, Yeremia alitabiri kwamba sheria ya agano jipya ingeandikwa katika mioyo ya wanadamu, nayo ingedumu. Washiriki wa agano jipya, yaani, Wakristo watiwa-mafuta, wanaipenda sana sheria hiyo. Namna gani wale ambao si washiriki wa agano hilo moja kwa moja, yaani, “kondoo wengine,” walio na tumaini la kuishi duniani? (Yoh. 10:16) Wao pia wanaipenda sheria ya Mungu. Wao ni kama wale wakaaji wageni katika Israeli la kale, ambao walikubali na kufaidika kutokana na Sheria ya Musa.—Law. 24:22; Hes. 15:15.

12, 13. (a) Sheria ya agano jipya ni nini? (b) Kwa nini chini ya “sheria ya Kristo,” hatulazimishwi kumtumikia Mungu?

¹² Ungejibu namna gani ikiwa ungeulizwa, ‘Ni sheria gani hiyo ambayo imeandikwa katika moyo wa Wakristo watiwa-mafuta?’ Sheria hiyo inaitwa pia “sheria ya Kristo.” Ilitolewa kwanza kwa Israeli wa kiroho, wale walio katika agano jipya. (Gal. 6:2; Rom. 2:28, 29) “Sheria ya Kristo” inaweza kujumlishwa kwa neno moja: upendo. (Mt. 22:36-39) Sheria hiyo huandikwa jinsi gani katika moyo wa watiwa-mafuta? Njia za msingi ni kupitia kujifunza Neno la Mungu na kusali kwa Yehova. Njia hizo za ibada ya kweli zinapaswa kuwa sehemu ya maisha ya Wakristo wote wa kweli, hata wale wasio katika agano jipya lakini wanaotaka kufaidika kutokana na agano hilo.

¹³ “Sheria ya Kristo” inaitwa “sheria kamilifu iliyo ya uhuru” na “sheria ya watu huru.” (Yak. 1:25; 2:12) Wengi walizaliwa chini ya Sheria ya Musa, lakini hakuna mtu anayezaliwa katika agano jipya au chini ya sheria ya Kristo. Wanaotii sheria ya Kristo hawalazimishwi kumtumikia Mungu. Badala yake wanafurahi kujua kwamba sheria ya Mungu inaweza kuandikwa katika mioyo na kwamba wanadamu leo wanaweza kufaidika kutokana na agano ambalo Yeremia alitabiri.

14. Ni nani wanaofaidika kutokana na agano jipya?

¹⁴ Baada ya kujifunza kwamba watu 144,000 ndio walio katika agano jipya, huenda wengine walifikiri kwamba ni hao tu wanaofaidika. Huenda walifikiri hivyo kwa sababu ni watiwa-mafuta tu ndio wanaokula mkate na kunywa divai wakati wa Ukumbusho wa kifo cha Kristo wa kila mwaka, ambapo divai huwakilisha ‘damu ya agano.’ (Marko 14:24) Hata hivyo, kumbuka kwamba wale walio katika agano jipya ni washiriki pamoja na Kristo wakiwa “uzao” wa Abrahamu, ambao kupitia wao, mataifa yote yatajibariki. (Gal. 3:8, 9, 29; Mwa. 12:3) Kupitia agano jipya, Yehova atatimiza ahadi yake ya kuwabariki wanadamu wote kupitia “uzao” wa Abrahamu.

15. Kama ilivyotabiriwa, watiwa-mafuta watakuwa na jukumu gani?

¹⁵ Yesu Kristo, sehemu ya msingi ya uzao wa Abrahamu, ndiye Kuhani Mkuu, naye aliandaa dhabihu kamilifu inayotuwezesha kupata msamaha wa kosa na dhambi. (Soma Waebrania 2:17, 18.) Hata hivyo, Mungu alikuwa ametabiri zamani za kale kuhusu “ufalme wa makuhani na taifa takatifu.” (Kut. 19:6) Katika Israeli la asili, makuhani walitoka katika kabila moja na wafalme kutoka kabila lingine. Hivyo basi, taifa hilo lililoahidiwa la wafalme na makuhani lingetokea jinsi gani? Mtume Petro aliwaandikia barua yake ya kwanza wale waliotakaswa na roho. (1 Pet. 1:1, 2) Aliwaita “ukuhani wa kifalme, taifa takatifu, watu wa kuwa mali ya pekee.” (1 Pet. 2:9) Kwa hiyo, Wakristo watiwa-mafuta katika agano jipya watatumikia wakiwa makuhani chini ya Kristo. Hebu fikiria hilo linamaanisha nini! Kila siku tunapambana na dhambi, ambayo bado ‘inatawala kama mfalme.’ Wanaotumikia kama makuhani chini ya Kristo wamepitia hali kama yetu. (Rom. 5:21) Wataelewa jinsi tunavyohisi tunapokosea na kupambana na hisia za hatia. Hivyo wakiwa pamoja na Kristo, wataweza kutusikitikia tunapojitahidi kuushinda mwelekeo wenye dhambi.

16. Andiko la Ufunuo 7:9, 14 linawatia moyo jinsi gani washiriki wa “umati mkubwa”?

¹⁶ Andiko la Ufunuo 7:9, 14, linaonyesha “umati mkubwa” ukiwa ‘umevikwa kanzu nyeupe,’ zinazowakilisha msimamo safi mbele za Mungu. Umati huo mkubwa unakusanywa sasa ili kuwa tayari kuokoka “dhiki kuu.” Hivyo basi, kwa kiasi fulani hata sasa, umati huo una msimamo wa uadilifu mbele za Mungu. Wanatangazwa kuwa waadilifu wakiwa rafiki za Yehova. (Rom. 4:2, 3; Yak. 2:23) Hiyo ni faida iliyoje! Ikiwa wewe ni sehemu ya umati mkubwa, unaweza kuwa na hakika kwamba Mungu yuko tayari kukusaidia unapoendelea kujitahidi kubaki safi machoni pake.

17. Ni kwa njia gani Yehova ‘hakumbuki’ dhambi tena?

¹⁷ Inakuwaje baada ya Mungu kusamehe dhambi za wale wenye kibali chake? Kama tulivyokwisha kuona, Yehova alisema kupitia Yeremia: “Nitalisamehe kosa lao, na dhambi yao sitaikumbuka tena.” (Yer. 31:34) Mungu anawasaheme watiwa-mafuta kwa msingi wa dhabihu ya Yesu. Vivyo hivyo, Mungu anaweza kusamehe dhambi za umati mkubwa kwa msingi wa ‘damu ya agano’ hilohilo. Yeremia anaposema kwamba Mungu ‘hatazikumbuka’ dhambi tena haimaanishi kwamba Mungu ni msahaulifu na hivyo hataweza kukumbuka dhambi zao. Badala yake, inamaanisha kwamba Yehova akiisha kutoa nidhamu inayohitajiwa na kumsamehe mkosaji mwenye kutubu, Mungu anaitupa dhambi hiyo nyuma yake. Fikiria dhambi ambazo Mfalme Daudi alifanya kuhusiana na Bath-sheba na Uria. Daudi alipata nidhamu na kuvuna matokeo ya dhambi zake. (2 Sam. 11:4, 15, 27; 12:9-14; Isa. 38:17) Hata hivyo, Mungu hakuendelea kumhesabia Daudi dhambi hizo. (Soma 2 Mambo ya Nyakati 7:17, 18.) Kama inavyoonyeshwa katika agano jipya, Yehova akishasamehe dhambi kwa msingi wa dhabihu ya Yesu, hazikumbuki tena.—Eze. 18:21, 22.

18, 19. Tunaweza kujifunza nini kuhusu msamaha katika agano jipya?

¹⁸ Agano jipya linakazia jinsi Yehova ameshughulika na wanadamu wenye dhambi, watiwa-mafuta walio katika agano hilo, na wale walio na tumaini la kuishi duniani. Unaweza kuwa na hakika kwamba Yehova akishakusamehe, hatakumbuka dhambi zako tena. Hivyo, tunaweza kujifunza jambo fulani kutokana na ahadi ya Mungu kuhusu agano jipya. Jiulize, ‘Mimi hujaribu kumwiga Yehova kwa kutotaja-taja makosa ya wengine, makosa ambayo tayari nilisema nimesamehe?’ (Mt. 6:14, 15) Hilo linahusu makosa madogo-madogo na vilevile makosa mazito, kama vile uzinzi ambao umefanywa na mume au mke wa Mkristo. Ikiwa mwenzi asiye na hatia amekubali kumsamehe mwenzi mzinzi mwenye kutubu, je, hapaswi ‘kutoikumbuka dhambi hiyo tena’? Ni kweli kwamba si rahisi kusahau makosa, hata hivyo, hiyo ni njia moja ya kumwiga Yehova.a

¹⁹ Tunaweza kutumia habari hiyo kuhusu agano jipya hata kwa mtu ambaye wakati fulani alikuwa ametengwa na ushirika lakini akatubu na kurudishwa. Namna gani ikiwa kwa njia fulani mtu huyo alikusababishia hasara au kukuharibia jina? Sasa amekubaliwa kutanikoni. Maneno ya Yeremia 31:34 yataongoza jinsi gani maoni yetu na matendo yetu kumwelekea? Je, tutamsamehe mkosaji na kutoyataja tena kamwe makosa yake? (2 Kor. 2:6-8) Kwa kweli, hilo ni jambo ambalo wote wanaothamini agano jipya wanapaswa kujaribu kutumia maishani.

20. Mtazamo wetu leo unatofautiana jinsi gani na mtazamo wa watu wengi katika siku za Yeremia?

²⁰ Katika siku za Yeremia, ni kana kwamba Wayahudi wengi walikuwa wakisema: “Yehova hatatenda mema, wala hatatenda mabaya.” (Sef. 1:12) Ijapokuwa walikuwa na ujuzi fulani kumhusu Yehova, walihisi kwamba hangechukua hatua; wala hakutazamia waishi kulingana na viwango vyovyote. Hata hivyo, tunajua kwamba Mungu anaona mambo yote. Tunamwogopa Mungu kwa njia inayofaa na bila shaka tungependa kuepuka kufanya mambo mabaya. (Yer. 16:17) Wakati uleule, tunajua kwamba Yehova ni Baba mwenye fadhili. Yeye hutambua matendo yetu mema, iwe wengine wanaona au hapana.—2 Nya. 16:9.

21, 22. Kwa nini huhitaji kuendelea kuambiwa: ‘Mjue Yehova’?

²¹ Jambo moja lenye kutokeza kuhusu agano jipya ni hili: “Nitaitia sheria yangu ndani yao, nami nitaiandika katika moyo wao. Nami nitakuwa Mungu wao, . . . Nao hawatafundishana tena kila mtu na mwenzake wala kila mtu na ndugu yake, wakisema, ‘Mjueni Yehova!’ kwa maana wote watanijua mimi.” (Yer. 31:33, 34) Watiwa-mafuta walio duniani leo wameonyesha kwamba wana sheria ya Mungu ndani yao. Wanapenda kweli wanazopata ndani yake, badala ya kutegemea mafundisho ya wanadamu. Nao wanafurahia kushiriki ujuzi wa Biblia pamoja na wale wa umati mkubwa. Hivyo, wale wenye tumaini la kuishi duniani wamepata pia kumjua na kumpenda Yehova. Wanajitiisha chini ya mwongozo wake na wanaamini ahadi zake. Huenda wewe ni mmoja wao. Umepata kumjua vizuri na kujenga uhusiano wa kibinafsi pamoja naye. Hilo ni pendeleo kubwa kama nini!

²² Umeweza kuimarisha uhusiano wako pamoja na Yehova jinsi gani? Bila shaka unakumbuka pindi ambazo ulihisi kwamba amejibu sala zako. Hali kama hizo zilikusaidia kumthamini Mungu hata zaidi. Huenda ulihisi kuwa anakusaidia ulipokumbuka andiko fulani ambalo lilikusaidia kukabiliana na shida fulani. Zithamini sana pindi kama hizo. Unapoendelea kujifunza Neno lake, ujuzi wako utaendelea kuongezeka, nawe utazidi kufaidika.

23. Kumjua Yehova kunaweza kukuondolea jinsi gani hisia zenye kusumbua?

²³ Hata hivyo, kuna baraka nyingine inayohusianishwa na agano jipya ambayo tunaweza kupata leo. Kujua kwamba Yehova ndiye anayesamehe kupatana na agano hilo kunaweza kutuondolea hisia za hatia zinazotusumbua. Kwa mfano, wengine ambao walitoa mimba kabla ya kujua kanuni za Mungu huenda wakajiona kuwa wenye hatia na kuhuzunika kwa sababu waliua kimakusudi. Wengine wanahisi hivyo kwa sababu waliua walipokuwa vitani. Dhabihu ya fidia ya Yesu, sehemu muhimu ya agano jipya, inaandaa msamaha kwa wale wanaotubu kikweli. Basi je, hatupaswi kuwa na hakika kwamba ikiwa Yehova ametusamehe dhambi zetu, jambo hilo limesahaulika? Hatupaswi kuendelea kuweka akilini dhambi ambazo Yehova amesamehe kabisa.

24. Masimulizi ya Yeremia 31:20 yanakutia moyo kwa njia gani?

²⁴ Tunapata uthibitisho ulio wazi wa msamaha wa Mungu kwenye Yeremia 31:20. (Soma.) Makumi ya miaka kabla ya siku za Yeremia, Yehova aliliadhibu taifa la makabila kumi ya ufalme wa kaskazini wa Israeli (lililowakilishwa na Efraimu, kabila mashuhuri) kwa sababu ya ibada ya sanamu. Walipelekwa uhamishoni. Hata hivyo, Mungu aliwapenda sana watu wa taifa hilo na akawaonyesha upendo mwororo. Bado aliwapenda kama “mtoto anayetendewa kwa upendo.” Alipowafikiria, matumbo yake ‘yalikuwa na msukosuko,’ yaani, hisia zake za ndani zilichochewa. Masimulizi hayo, yanayozungumziwa kuhusiana na agano jipya, yanaonyesha kwamba Yehova huwa tayari kuwasamehe wale wanaotubu kwa sababu ya makosa yao ya wakati uliopita.

25. Kwa nini unapaswa kumshukuru Yehova kwa sababu ya agano jipya?

²⁵ Ahadi ya Yehova ya kusamehe dhambi kupitia agano jipya itatimizwa kikamili mwishoni mwa Utawala wa Miaka Elfu wa Kristo. Yesu Kristo, pamoja na makuhani 144,000 walio chini yake, watakuwa wamewarudisha wanadamu washikamanifu watakaopita lile jaribu la mwisho kwenye ukamilifu. Baada ya mtihani wa mwisho, wanadamu watakuwa washiriki kamili wa familia ya Yehova ya ulimwenguni pote. (Soma Waroma 8:19-22.) Kwa karne nyingi, wote wamekuwa wakiugua kwa kulemewa na dhambi. Hata hivyo, wakati huo, uumbaji wa Yehova utakuwa na “uhuru wenye utukufu wa watoto wa Mungu,” uhuru kutokana na dhambi na kifo. Hivyo basi, uwe na hakika kwamba kupitia mpango wenye upendo wa agano jipya, unaweza kupata faida nyingi. Unaweza kufaidika sasa na milele kupitia “chipukizi” la Daudi na kufurahia “uadilifu katika nchi.”—Yer. 33:15.