Sikiliza​—Mlinzi wa Yehova Anena!

“Nimekuweka kuwa mlinzi wa nyumba ya Israeli;... ukawape maonyo haya yatokayo kwangu.”​—EZEKIELI 3:17.

 1. Kwa nini kusikiliza wakati “mlinzi” wa Yehova anaponena?

“MLINZI” wa Yehova ananena ujumbe wa Mungu sasa hivi. Je! wewe unasikiliza? Uhai wako wenyewe unategemea kuitikia kwako ujumbe huo ukiwa na uthamini na kwa kufanya kitendo. Karibuni, ‘mataifa yatamjua Yehova’ wakati yeye atakasapo jina lake takatifu kwa kuharibu mfumo huu mwovu na kuhifadhi watu wake. Je! wewe unatumainia kuwa miongoni mwao? (Ezekieli 36:23; 39:7; 2 Petro 3:8-13) Huenda ukawa, lakini ni ikiwa tu wewe unasikiliza wakati “mlinzi” wa Yehova anaponena.

 2. Kutosikiliza wanabii wa Mungu kuliletea nini ufalme wa Yuda?

² Kukosa kusikiliza wanabii wa Mungu kulileta msiba juu ya ufalme wa Yuda katika 607 K.W.K. Mataifa ya maadui yaliutazama kwa macho ya kusimanga ukiwa huo ulioletwa na Wababuloni. Lakini jina la Yehova lilitukuzwa kama nini wakati yeye alipofanya maarifa akatokeza mrudisho wa Wayahudi waaminifu kwenye bara la kwao katika 537 K.W.K.!

 3. Kitabu cha Ezekieli kina nini?

³ Ukiwa huo pia mrudisho huo ulitabiriwa na mlinzi wa Yehova, Ezekieli. Kitabu cha Biblia chenye jina lake na kilichokamilishwa naye katika Babulonia karibu 591 K.W.K. kina (1) utume wa Ezekieli; (2) miigizo ya maisha halisi ya kiunabii; (3) ujumbe mbalimbali dhidi ya Israeli; (4) matabiri juu ya hukumu ya Yerusalemu; (5) manabii dhidi ya mataifa mengine; (6) ahadi za kurudishwa; (7) unabii mmoja dhidi ya Gogu wa Magogu; na (8) njozi moja juu ya patakatifu pa Mungu. Sisi tunakualika wewe usome kitabu hicho wakati tunapojifunza kutokana nacho. Hivyo utaona jinsi kinatuathiri leo na utakuwa ukisikiliza wakati “mlinzi” wa Yehova anenapo.a

Mlinzi wa Mungu Apewa Utume

 4. (a) Ezekieli aliona nini katika njozi? (b) Wale “viumbe hai” walikuwa nani, na ni sifa gani walizokuwa nazo?

⁴ Siku ya Tammuzi 5, 613 K.W.K. (katika mwaka wa tano wa uhamisho wa Yehoyakini mfalme Myudea katika Babuloni), Ezekieli yule kuhani mwenye umri wa miaka 30 alikuwa miongoni mwa watekwa Wayahudi kando ya “mto Kebari,” uliokuwa mfereji wa maana sana wa Mto Eufrate. Katika njozi, yeye aliona gari-vita la kimbingu la Yehova, likitumikiwa na “viumbe hai vinne.” (Soma Ezekieli 1:4-10.) Kila ‘kiumbe hai,’ au kerubi mwenye mabawa, alikuwa na nyuso nne. (Ezekieli 10:1-20; 11:22) Hizo zinaonyesha kwamba makerubi wana upendo (yule mwanadamu), haki (yule simba), nguvu za kimamlaka (yule ndama), na hekima (yule tai) za kupewa na Mungu. Kila kerubi alisimama kwenye upande wa ‘gurudumu kubwa sana ndani ya gurudumu jingine,’ na roho ya Mungu, au kani ya utendaji, iliweza kuyajongeza katika upande wowote.​—Ezekieli 1:1-21.

 5. Lile gari-vita la kimbingu linawakilisha nini, na mwono huu wa gari hilo unapasa kuathiri watu wa Yehova jinsi gani?

⁵ Yule Mwendeshaji wa gari-vita alikuwa mwakilishi mtukufu wa Yehova. (Soma Ezekieli 1:22-28.) Lo, gari-vita hilo linawakilisha vizuri kama nini tengenezo la Mungu la malaika walio roho! (Zaburi 18:10; 103:20, 21; Danieli 7:9, 10) Yehova analiendesha katika maana ya kusimamia mwelekezo wa viumbe hawa na kuwatumia kulingana na kusudi lake. Mwendeshaji yule alikuwa mtulivu, kama ule upinde-mvua wenye kuandamana nalo, lakini Ezekieli alizidiwa na hisia-moyo. Kwa uhakika, mwono huu wenye kuogofya wa utukufu na nguvu za Yehova akiwa ndiye Mpanga-tengenezo Aliye Mkuu Zaidi wa vikosi vyake vya kimbingu unapasa kutufanya tushukuru kwa unyenyekevu lile pendeleo la kumtumikia tukiwa sehemu ya tengenezo lake la kidunia.

 6. (a) Ezekieli aliwekwa rasmi kwa jambo gani, na yeye alikuwa na rai gani juu ya kutumikia Mungu? (b) Ezekieli alipaswa kutoa unabii miongoni mwa watu wa aina gani, na kuna manufaa gani kujua jinsi Mungu alishughulika naye?

⁶ Ingawa alikumbushwa kwamba alikuwa mwanadamu kwa awali na alikuwa wa hali dhalili kwa kuitwa “mwanadamu,” Ezekieli aliwekwa rasmi awe mnabii wa Yehova. (Soma Ezekieli 2:1-5.) Ezekieli angeenda kwa “mataifa wanaoasi,” falme za Israeli na Yuda. Kwanza, kwa amri ya kimungu yeye alikula hati-kunjo (gombo, UV) yenye nyimbo za maombolezo, lakini ladha yayo ikawa kama asali kwa sababu yeye alijawa na shukrani kuwa mnabii wa Mungu. Vivyo hivyo, Wakristo waliopakwa mafuta na watumishi wenzao wanaona ni jambo tamu kuwa mashahidi wa Yehova. Ezekieli alipaswa kutoa unabii miongoni mwa watu wenye mioyo migumu na vichwa vigumu, lakini Mungu angefanya uso wake ukazane kama nyuso zao, kipaji cha uso wake kiwe kigumu kama almasi. Yeye angetoa unabii kwa ujasiri, wasikilize wasisikilize. Inatia moyo kujua kwamba kama vile Mungu alivyomtegemeza Ezekieli katika mastakimu ngumu, Yeye atatusaidia sisi tutoe ushuhuda kwa ushujaa katika eneo lolote.​—Ezekieli 2:6–3:11.

 7. Utume wa Ezekieli ulihusisha ndani daraka gani?

⁷ Kula hati-kunjo ile kulitokeza ndani ya Ezekieli ‘hasira kali rohoni mwake’ ambayo ilifaana na ujumbe wa hati-kunjo hiyo. Alikaa Telabibu ‘katika hali ya ushangao mwingi’ akiwaza na kuwazua juu ya ujumbe huo. (Ezekieli 3:12-15) Sisi tunahitaji kutafakari na kujifunza kwa bidii-endelevu ndipo tuweze kufahamu mambo ya kiroho yaliyo na kina kirefu. Akiwa na ujumbe wa kutangaza, Ezekieli alipewa utume awe mlinzi wa Mungu. (Soma Ezekieli 3:16-21.) Mlinzi huyo aliyewekwa rasmi karibuni alipaswa kuwaonya Waisraeli wenye kuvunja sheria kwamba wao walikabiliana uso kwa uso na mfikilizo wa hukumu ya Mungu.

 8. Ni nani wanaotumikia wakiwa “mlinzi” wa Yehova leo, na ni nani wanaoshirikiana nao?

⁸ Kama Ezekieli angeshindwa kuwa mlinzi, Yehova angemhesabu yeye kuwa mwenye daraka la vifo vya wenye kuuawa. Ingawa wale wasiotaka yeye atoe karipio wangemtia pingu za kitamathali, yeye angetangaza ujumbe wa Mungu kwa ujasiri. (Ezekieli 3:22-27) Katika siku yetu, Jumuiya ya Wakristo inakataa kusikiliza na inajaribu kuweka vizuizi juu ya Wakristo waliopakwa mafuta. Lakini tangu 1919 wapakwa-mafuta hao wametumikia wakiwa “mlinzi” wa Yehova, wakitangaza kwa ushujaa ujumbe wake unaohusu “wakati wa mwisho” wa mfumo huu. (Danieli 12:4) Wanaoshirikiana naye katika kazi hii ni “mkutano mkubwa” unaoongezeka wa “kondoo wengine” wa Yesu. (Ufunuo 7:9, 10; Yohana 10:16) Kwa kuwa jamii ya “mlinzi” inaendelea kunena ujumbe wa Mungu, kwa uhakika kila mmoja wa wapakwa-mafuta na ule “mkutano mkubwa” angetaka kuutangaza akiwa mhubiri wa kawaida.

Manabii Yenye Kuigizwa

 9. (a) Ni jinsi gani Ezekieli alituwekea sisi kielelezo? (b) Ezekieli alifanya nini kuonyesha jinsi mazingiwa ya Yerusalemu yangekuwa, na ni nini kilichoonyeshwa na zile siku 390 na siku 40?

⁹ Ndipo Ezekieli alipoigiza kwa unyenyekevu na ujasiri miigizo ya kiunabii yenye kufanyika kimya-kimya, akituwekea kielelezo kinachopasa kutusukuma tutekeleze kwa unyenyekevu na ushujaa migawo tuliyopewa na Mungu. Ili afananishe yale mazingiwa ya Kibabuloni, yeye alipaswa kulala chini akikabilisha uso wake kwenye tofali ambalo yeye alikuwa amelichongelea picha ya Yerusalemu. Ezekieli alipaswa kulalia upande wake wa kushoto kwa siku 390 ili kuhimili kosa la ufalme wa Israeli wenye makabila kumi, halafu alalie upande wake wa kuume kwa siku 40 ili kuchukua dhambi ya Yuda wenye makabila mawili. Siku moja ilisimamia mwaka mmoja. Kwa hiyo ile miaka 390 ilianzia wakati wa kupigwa kwa msingi wa Israeli katika 997 K.W.K. mpaka uharibifu wa Yerusalemu katika 607 K.W.K. Miaka 40 ya Yuda ilianzia wakati wa Yeremia kuwekwa rasmi awe mnabii wa Mungu katika 647 K.W.K. mpaka wakati wa kuachwa ukiwa kwa Yuda katika 607 K.W.K.​—Ezekieli 4:1-8; Yeremia 1:1-3.

10. Ezekieli aliigiza jinsi gani matokeo ya mazingiwa yale, na ni somo gani ambalo sisi tunaweza kujifunza kutokana na uhakika wa kwamba Mungu alimruzuku yeye?

¹⁰ Ndipo Ezekieli alipoigiza matokeo ya mazingiwa hayo. Ili afananishe njaa, yeye aliishi kwa kutegemea kiasi cha chakula ambacho kinazidi kidogo tu aunzi nane na karibu painti moja ya maji kwa siku. Mkate wake (mchanganyo usioruhusiwa na sheria wa ngano, shayiri, maharagwe mapana, dengu, mtama, na kusemethi [ngano laini sana, JVW] iliyookwa juu ya mashonde ya ng’ombe) haukuwa safi. (Walawi 19:19) Kitendo hicho kilionyesha kwamba wakaaji wa Yerusalemu wangepatwa na ukosefu mkubwa wa vitu. Lakini lilikuwa jambo la kutia moyo kama nini kujua kwamba sawa na vile Yehova alivyoruzuku Ezekieli chini ya mastakimu ngumu, Mungu atatusaidia sisi tubaki waaminifu na tutimize utume wetu wa kuhubiri kwa kukabiliana na magumu yote!—Ezekieli 4:9-17.

11. (a) Ni vitendo gani vinavyotajwa kwenye Ezekieli 5:1-4, na vilikuwa na maana gani? (b) Uhakika wa kwamba Mungu alitimiza miigizo ya Ezekieli unapasa kuwa na matokeo gani juu yetu?

¹¹ Ndipo Ezekieli aliponyoa nywele na ndevu zake kwa kutumia upanga. (Soma Ezekieli 5:1-4.) Wale wenye kufa kutokana na njaa na ugonjwa wa kipuku wangekuwa kama theluthi moja ya nywele za mnabii huyo ambazo aliteketeza katikati ya Yerusalemu. Wenye kuuawa na vita wangekuwa kama ile theluthi moja iliyopigwa kwa upanga. Waokokaji wangetawanywa miongoni mwa mataifa kama ile theluthi moja ya nywele zake zilizotapanywa kwenye upepo. Lakini wahamishwa fulani wangekuwa kama nywele chache zilizochukuliwa kutoka kwenye kile kisehemu kilichotapanywa na kufungiliwa katika vazi la Ezekieli ili kuonyesha kwamba wao wangepeleka ibada ya kweli katika Yuda baada ya ule ukiwa wa miaka 70. (Ezekieli 5:5-17) Uhakika wa kwamba Yehova alitimiza mwigizo huu na miigizo mingine ya kiunabii unapasa utusukume sisi kuitibari katika yeye kuwa ndiye Mtimizaji wa unabii.​—Isaya 42:9; 55:11.

Uharibifu Kule Mbele!

12. (a) Ezekieli 6:1-7 inaonyesha kwamba wavamizi wangefanya nini? (b) Kulingana na unabii wa Ezekieli, Yerusalemu ya ufananisho ni nini, na ni jambo gani litapata kifananishwa hicho?

¹² Katika 613 K.W.K. Ezekieli alihutubia bara lile kuonyesha mambo ambayo yangeangukia wakaaji wa Yuda wenye kuabudu sanamu. (Soma Ezekieli 6:1-7.) Wavamizi wangeharibu-haribu mahali pa juu, vinara vya uvumba, na madhabahu zenye kutumiwa katika ibada bandia. Ile fikira yenyewe tu ya kwamba mkumbo ungeletwa na njaa, ugonjwa wa kipuku, na vita ingefanya mmoja alie “Ole”! na kukazia jambo hilo kwa kupiga makofi na kugongesha chini wayo wa mguu wake. Miili mifu ya waasherati wa kiroho ingezagaa-zagaa katika mahali pa juu. Wakati Jumuiya ya Wakristo, iliyo Yerusalemu ya ufananisho, itakapopatwa na uharibifu kama huo, hiyo itajua kwamba afa layo ni kutoka kwa Yehova.​—Ezekieli 6:8-14.

13. Ni nini ile “fimbo” iliyokuwa katika mkono wa Yehova, na nini lililokuwa tokeo la kutumiwa kwayo?

¹³ ‘Mwisho ulikuwa ukija juu ya miisho ya lile bara,’ mfumo wa kidini wa Yuda isiyo na uaminifu. “Shada ya maua” ya vitu vyenye maafa ingezungukia kichwa cha mwabudu-sanamu wakati “fimbo” iliyo katika mkono wa Mungu​—Nebukadreza na vikosi vyake vya Kibabuloni​—ingefanya kitendo dhidi ya watu wa Yehova na hekalu lake. Wale walio wa “kutano” la Yuda la wanunuaji na wauzaji wangeuawa ama wangepelekwa ndani ya uhamisho, na mikono ya wowote ambao waliweza kubaki hai ingelegea kwa kuzimia. Wakati wa upinduzi wa mfumo wao wa dini bandia, wao wangekuwa ni kama wananyoa vichwa vyao vibaki upara kwa kuomboleza.​—Ezekieli 7:1-18, NW.

14. Hongo halikuweza kufanya nini kwa ajili ya Yerusalemu, na hiyo inaonyesha nini kwa Jumuiya ya Wakristo?

¹⁴ Yehova na kani zake za uuaji hawezi kuhongwa. (Soma Ezekieli 7:19.) Hongo halingeweza kuokoa pale ‘mahali pa siri’ [penye kufichika, pale Patakatifu Zaidi, pasitendwe mambo yasiyo matakatifu wakati “wanyang’anyi” wa Kikaldayo wangekuwa wakikamata vyombo vitakatifu na kuacha hekalu likiwa magofu. Yehova ‘alikomesha kiburi chao wenye nguvu’ wakati Mfalme Sedekia alipotekwa na walio wakuu wa ukuhani wa Kilawi wakauawa. (2 Wafalme 25:4-7, 18-21) Hapana, watenda dhambi katika Yerusalemu uliozingiwa hawangeweza kuepuka taabu kubwa kwa kutoa hongo wakati Mungu ‘alipowahukumu’ kuwa wavunja agano. Vivyo hivyo, wakati wa kutiwa taka kwa vitu ambavyo Jumuiya ya Wakristo inavichukua kuwa vitakatifu, jumuiya hiyo haitaweza kutoa hongo kutoka kwenye mfikilizo wa hukumu ya kimungu juu yayo. Itakuwa ni kuchelewa mno kusikiliza “mlinzi” wa Yehova wakati huo.​—Ezekieli 7:20-27.

Kuugua Juu ya Machukizo

15. Ezekieli aliona nini katika Yerusalemu, na jambo hilo linapasa kuwa na tokeo gani juu yetu?

¹⁵ Wakati Ezekieli alipoona njozi ya Mungu akiwa katika utukufu siku ya Eluli 5, 612 K.W.K., ‘mfano wa mkono ulimshika kishungi kimoja cha nywele’ na kumchukua mpaka Yerusalemu kwa roho ya uvuvio. Lile gari-vita la kimbingu lilikuwa limehamia huko pia. Mambo ambayo Ezekieli aliona wakati huo yanapasa kutufanya tuogope sana kuwasikiliza waasi-imani. (Mithali 11:9) Kwenye hekalu, waasi-imani wa Kiisraeli walikuwa wakiabudu kifananishi cha ibada ya sanamu (labda nguzo fulani takatifu) ambacho kilichochea wivu wa Mungu. (Kutoka 20:2-6) Alipoingia katika ua wa ndanindani, lo! Ezekieli akaona mambo yaliyo ya kuchukiza kama nini! (Soma Ezekieli 8:10, 11.) Lilikuwa jambo lenye fedheha kama nini kwamba wazee 70 wa Kiisraeli walikuwa wakitoa uvumba kwa miungu bandia iliyowakilishwa na vitu vya kudharaulika vilivyochongelewa ukutani!—Ezekieli 8:1-12.

16. Njozi ya Ezekieli inaonyesha nini juu ya matokeo ya uasi-imani?

¹⁶ Njozi ya Ezekieli inaonyesha jinsi uasi-imani ulivyo hatari kiroho. Kwani, wanawake wa Kiisraeli walikuwa wameambiwa walie machozi kwa ajili ya Tammuzi, mungu wa Kibabuloni na mpenzi wa Ishtari mungu-mke wa nguvu za uzazi! Tena yalikuwa makuruhi kama nini kuona wanaume 25 wa Kiisraeli katika ua wa ndanindani wa hekalu wakiabudu jua! (Kumbukumbu 4:15-19) Wao walishikilia kitawi cha matusi kwenye pua ya Mungu, labda kikiwa kinawakilisha uume wa kibinadamu. Si ajabu kwamba Yehova hakutaka kusikiliza sala zao, kama vile Jumuiya ya Wakristo itafanya kazi-bure tu kutafuta msaada wake wakati wa “dhiki kubwa”!—Ezekieli 8:13-18; Mathayo 24:21.

Watiwa Alama ya Kuokokea

17. Ni watu gani saba walioonwa katika njozi, nao walifanya nini?

¹⁷ Ndipo, sisi tunaona wanaume saba​—mmoja akiwa ni mwandishi aliyevaa bafta (kitani, NW) na wengine sita wakiwa na silaha za kuponda-ponda. (Soma Ezekieli 9:1-7.) Wale “watu sita” waliwakilisha kani za kimbingu za Yehova za uuaji, ingawa yeye angeweza kutumia mawakili wa kidunia. Wale ambao yule ‘mtu aliyevaa bafta’ angewatia alama katika vipaji vya nyuso zao wangeonyeshwa huruma ya Mungu kwa sababu wao hawakuunga mkono machukizo yenye kufanywa hekaluni. Kuuawa na wale “watu sita” kulianza na wale wazee 70 wenye kuabudu sanamu, wale wanawake wenye kutoa machozi wakililia Tammuzi, na wale waabudu-jua 25. Watu hao na wengine wasio washikamanifu kwa Mungu waliuawa na Wababuloni katika 607 K.W.K.

18. (a) Ni nani yule ‘mtu aliyevaa bafta’ wa ki-siku-hizi? (b) Ile “alama” ni nini, ni nani walio nayo sasa, na kuwa nayo kutatokeza nini?

¹⁸ Yule ‘mtu aliyevaa bafta’ ni jamii ya Wakristo waliopakwa mafuta. Wao wanaenda nyumba kwa nyumba kutia alama ya ufananisho juu ya wale ambao wanakuwa sehemu ya ule “mkutano mkubwa” wa “kondoo wengine” wa Kristo. “Alama” hiyo ni ithibati ya kwamba kondoo hao ni watu mmoja mmoja waliojiweka wakfu na kubatizwa, walio na utu kama ule wa Kristo. Wao ‘wanaugua na kulia kwa sababu ya machukizo’ yanayofanyika katika Jumuiya ya Wakristo, na wametoka ndani ya Babuloni Mkuu, ile milki ya ulimwengu ya dini bandia. (Ufunuo 18:4, 5) “Alama” yao itaonyesha wazi kwa kani za uuaji za Mungu kwamba wao wanapaswa kuachiliwa wakati wa ile “dhiki kubwa.” Wao wanaweza kubaki wakiwa na “alama” hiyo kwa kushiriki pamoja na wapakwa-mafuta katika kuwatia alama wengine zaidi. Kwa hiyo, ikiwa wewe ‘umetiwa alama,’ shiriki kwa bidii katika ile kazi ya ‘kutia alama.’​—Ezekieli 9:8-11.

Uharibifu Wenye Moto Kule Mbele!

19. Yule ‘mtu aliyevaa bafta’ wa ki-siku-hizi anatapanya nini katika sehemu zote za Jumuiya ya Wakristo

¹⁹ Yule mtu aliyevaa bafta alienda kati ya magurudumu ya lile gari-vita la kimbingu ili ajipatie makaa-mawe yenye moto. Yakatupwa juu ya Yerusalemu, hiyo ikitoa taarifa ya mapema kwamba uharibifu wao ungekuwa wonyesho wa hasira kuu ya Mungu yenye moto. (Ezekieli 10:1-8; Maombolezo 2:2-4; 4:11) Katika siku ya Ezekieli, kasirani ya Yehova ilimiminwa kwa kuwatumia Wababuloni. (2 Nyakati 36:15-21; Yeremia 25:9-11) Lakini namna gani siku yetu? Yule aliye ufananisho wa yule ‘mtu aliyevaa bafta’ anatapanya ujumbe wenye moto wa Mungu katika sehemu zote za Jumuiya ya Wakristo kama taarifa ya kwamba kasirani ya kimungu itamwagwa juu ya jumuiya hiyo na sehemu nyingine yote ya Babuloni Mkuu. Bila shaka, wale wanaokataa kusikiliza “mlinzi” wa Yehova hawana tumaini la kuokoka.​—Isaya 61:1, 2; Ufunuo 18:8-10, 20.

20. (a) Ule upatano ulio kati ya magurudumu ya gari-vita la kimbingu na wale makerubi unapasa kutuathiri sisi jinsi gani? (b) Wakuu fulani walikuwa wakifanya nini, nao walifananisha Yerusalemu na nini kimakosa?

²⁰ Fikira zinavutwa tena kwenye lile gari-vita la kimbingu, tengenezo la kimbingu la Mungu. Kwa kuona ule upatano ulio kati ya magurudumu ya gari-vita hilo na wale makerubi, inatupasa sisi tusukumwe kufanya ushirikiano kamili pamoja na tengenezo la Mungu la kidunia. Kwa kuwa na ushikamanifu, inatupasa sisi pia tulipatie himaya lisidhuriwe na watu wenye hila. (Ezekieli 10:9-22) Kulikuwa na watu kama hao katika siku ya Ezekieli, kwa maana yeye aliona wakuu 25 wa kiserikali wakipanga kufanya maasi dhidi ya kani za Mungu za uuaji kwa msaada wa Misri. Wao walifananisha Yerusalemu na sufuria (nyungu kubwa, NW), na wakajifananisha wao wenyewe na mnofu ulio salama ndani ya sufuria hiyo. Lakini walikosea kama nini! “Upanga” wa “wageni” Wababuloni ungeua baadhi ya hao wenye kupanga njama, hali wengine wangekuwa mateka. Jambo hilo lingetukia kwa kuwa Mungu aliona kwamba Wayahudi walipaswa kumjibu kwa sababu ya kuvunja agano lake. (Ezekieli 11:1-13; Kutoka 19:1-8; 24:1-7; Yeremia 52:24-27) Kwa sababu Jumuiya ya Wakristo inadai kuwa katika agano pamoja na Mungu lakini inatia uhakika katika miungano ya kilimwengu, itatokomea itakaposhambuliwa na kani za Yehova za uuaji.

21. Ni jambo gani lililotukia baada ya ukiwa wa Yuda wa miaka 70, na ni tukio gani linaloweza kulinganishwa na hilo ambalo liliathiri mabaki waliopakwa mafuta?

²¹ Ingawa Waisraeli walikuwa ‘wametawanyika katika nchi’ mbalimbali, kama vile katika 617 K.W.K., Mungu alikuwa “patakatifu,” au kimbilio, kwa wahamishwa wenye kutubu. (Ezekieli 11:14-16) Lakini ni jambo gani zaidi lingeweza kutarajiwa? (Soma Ezekieli 11:17-21.) Baada ya ukiwa wa Yuda wa miaka 70, mabaki walirudishwa kwenye “nchi ya Israeli” iliyosafishilizwa. Kwa kulinganisha, baada ya utekwa wa Kibabuloni, mabaki waliopakwa mafuta walikombolewa katika 1919, na chini ya mwongozo wa roho ya Mungu, ile “nchi” (udongo, NW) ya Israeli iliyokuwa ukiwa wakati mmoja ikawa imesafishilizwa. Kwa sababu hiyo, sasa wale ‘waliotiwa alama’ ili kuhifadhiwa wanafurahia upendeleo wa kimungu pamoja na mabaki waliorudishwa wa Israeli wa kiroho. Na ukiendelea kusikiliza “mlinzi” wa Mungu, huenda wewe ukawa miongoni mwa waokokaji wakati ambapo Yehova atachomoa upanga wake kutoka ala.

[Maelezo ya Chini]

Wewe Unakumbuka?

◻ Kwa nini kusikiliza wakati“mlinzi”wa Yehova anaponena?

◻ Ni nini kilichowakilishwa na gari-vita la Mungu la kimbingu?

◻ Ni nani wanaotumikia wakiwa “mlinzi” wa Yehova leo?

◻ Ni vitendo gani vya uasi-imani ambavyo Ezekieli aliona katika Yerusalemu, na njozi hiyo inapasa kutuathiri jinsi gani?

◻ Ni nani yule‘mtu aliyevaa bafta’ wa ki-siku-hizi, na ni nini ile “alama” anayotia katika vipaji vya nyuso?