Wajumbe wa Amani ya Kimungu Watamkwa Kuwa Wenye furaha

“Na hao waliokombolewa na BWANA watarudi, watafika Sayuni wakiimba; na furaha ya milele itakuwa juu ya vichwa vyao.” —ISAYA 35:10.

1. Ulimwengu wahitaji nini sana?

LEO, kuliko wakati mwingineo wo wote, wanadamu wahitaji mjumbe wa habari njema. Kuna uhitaji wenye uharaka kwa mtu fulani kueleza kweli kuhusu Mungu na makusudi yake, shahidi asiyehofu atakayeonya waovu juu ya uharibifu unaokuja na atakayesaidia wenye mioyo ya haki kupata amani ya kimungu.

2, 3. Katika kisa cha Israeli, Yehova alitimizaje ahadi yake iliyorekodiwa kwenye Amosi 3:7?

² Katika siku za Israeli, Yehova aliahidi kuandaa wajumbe wa aina hiyo. Mwishoni mwa karne ya tisa K.W.K., nabii Amosi alisema hivi: “Bwana MUNGU hatafanya neno lo lote, bila kuwafunulia watumishi wake manabii siri yake.” (Amosi 3:7) Katika karne zilizofuata tamko hilo, Yehova alifanya matendo mengi makuu. Kwa kielelezo, katika 607 K.W.K., aliadhibu vikali watu wake waliochaguliwa kwa sababu walikuwa waasi na wenye hatia ya damu. Yeye pia aliyaadhibu mataifa yaliyokuwa karibu yaliyofurahi kwa sababu ya kuteseka kwa Israeli. (Yeremia, sura za 46-49) Kisha, katika 539 K.W.K., Yehova akatokeza anguko la serikali ya ulimwengu yenye uweza ya Babiloni, na tokeo ni kwamba, katika 537 K.W.K., mabaki ya Israeli yalirudi kwa bara lao ili kujenga upya hekalu.—2 Mambo ya Nyakati 36:22, 23.

³ Haya yalikuwa matukio yenye umaana mkubwa sana, na kupatana na maneno ya Amosi, Yehova aliyafunua kimbele kwa manabii waliotumika wakiwa wajumbe, wakiwaonya Israeli juu ya kile kilichokuwa kije. Katikati mwa karne ya nane K.W.K., yeye alitokeza Isaya. Katikati mwa karne ya saba K.W.K., akatokeza Yeremia. Kisha, kuelekea mwishoni mwa karne hiyo, akatokeza Ezekieli. Manabii hawa na wengineo waaminifu walitoa ushahidi kamili juu ya makusudi ya Yehova.

Kutambulisha Wajumbe wa Mungu Leo

4. Ni nini kinachoonyesha uhitaji wa wanadamu wa wajumbe wa amani?

⁴ Namna gani leo? Wengi ulimwenguni wana hisi yenye nguvu kwamba jambo fulani lenye kutia hofu litatukia wanapoona kuzorota kwa jamii ya kibinadamu. Wale wenye kupenda haki wanaumia moyoni wanapoona unafiki na uovu mtupu wa Jumuiya ya Wakristo. Kama alivyotabiri Yehova kupitia Ezekieli, wao “wanaugua na kulia kwa sababu ya machukizo yote yanayofanyika kati yake.” (Ezekieli 9:4) Hata hivyo, wengi hawang’amui makusudi ya Yehova ni nini. Wanahitaji kuambiwa.

5. Yesu alionyeshaje kwamba kungekuwa na wajumbe katika siku yetu?

⁵ Je, kuna yeyote leo anayesema akiwa na roho isiyo na hofu ya Isaya, Yeremia, na Ezekieli? Yesu alionyesha kwamba mtu fulani angefanya hivyo. Alipokuwa akitabiri matukio ya siku yetu, yeye alisema hivi: “Na habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.” (Mathayo 24:14) Ni nani leo anayetimiza unabii huo, akitumika akiwa mjumbe, mhubiri wa habari njema? Ufanano kati ya siku yetu na wakati wa Israeli la kale hutusaidia kujibu swali hilo.

6. (a) Fafanua mambo yaliyopata “Israeli wa Mungu” wakati wa vita ya ulimwengu ya kwanza. (b) Ezekieli 11:17 lilitimizwaje juu ya Israeli la kale?

⁶ Wakati wa siku zenye msiba za Vita ya Ulimwengu 1, watu wa Yehova wa siku ya kisasa, mabaki ya “Israeli wa Mungu” waliotiwa mafuta, walienda utekwani sawa na ule wa Israeli katika Babiloni. (Wagalatia 6:16) Walipatwa na uhamisho wa kiroho katika Babiloni Mkubwa, mkusanyo wa ulimwengu wa dini zisizo za kweli, ambazo kati yazo Jumuiya ya Wakristo ndiyo yenye kutokeza na kulaumika kupita zote. Hata hivyo, maneno ya Yehova kwa Ezekieli yalionyesha kwamba hawakuwa wameachwa. Yeye alisema hivi: “Nitawakusanya ninyi toka kati ya kabila za watu, na kuwakutanisha toka nchi zile mlizotawanyika, nami nitawapeni nchi ya Israeli.” (Ezekieli 11:17) Ili kutimizia Israeli la kale ahadi hiyo, Yehova alimtokeza Sairasi Mwajemi, ambaye alipindua Serikali ya Ulimwengu ya Kibabiloni na kufungua njia kwa ajili ya mabaki ya Israeli kurudia bara lao. Lakini namna gani leo?

7. Katika 1919, ni tukio gani lililoonyesha kwamba Yesu alikuwa amechukua hatua dhidi ya Babiloni Mkubwa? Fafanua.

⁷ Mapema katika karne hii, kulikuwa na uthibitisho wenye nguvu kwamba Sairasi Mkuu alikuwa kazini. Alikuwa nani? Si mwingine ila Yesu Kristo, aliyetawazwa kuwa mfalme tangu 1914 katika Ufalme wa kimbingu. Mfalme huyo mkuu alionyesha nia njema kwa ndugu zake watiwa mafuta duniani, wakati, Wakristo watiwa mafuta walipowekwa huru kutoka utekwa wa kiroho na kurudia “bara” lao, makao yao ya kiroho katika mwaka wa 1919. (Isaya 66:8; Ufunuo 18:4) Kwa njia hiyo unabii wa Ezekieli 11:17 ukawa na utimizo wa siku ya kisasa. Katika nyakati za kale ilihitaji Babiloni lianguke ili kufungua njia kwa ajili ya Waisraeli warudie bara lao. Katika nyakati za kisasa kurudishwa kwa Israeli wa Mungu kulikuwa uthibitisho kwamba Babiloni Mkubwa alikuwa amepata anguko mikononi mwa Sairasi Mkubwa. Anguko hili lilitangazwa na malaika wa pili wa Ufunuo sura ya 14 wakati aliposema kwa sauti kubwa hivi: “Ameanguka! Babiloni Mkubwa ameanguka, yeye aliyefanya mataifa yote yanywe kutokana na divai ya hasira ya uasherati wake!” (Ufunuo 14:8) Ni badiliko la hali lililoje kwa Babiloni Mkubwa, hasa kwa Jumuiya ya Wakristo! Na ni baraka iliyoje kwa Wakristo wa kweli!

8. Kitabu cha Ezekieli chafafanuaje furaha ya watu wa Mungu baada ya kuwekwa huru katika 1919?

⁸ Kwenye Ezekieli 11:18-20, twasoma ufafanuzi wa huyo nabii juu ya furaha ya watu wa Mungu baada ya kurudishwa kwao. Utimizo wa kwanza wa maneno yake ulimaanisha kusafishwa kwa Israeli katika siku za Ezra na Nehemia. Utimizo wa siku ya kisasa ulimaanisha jambo sawa na hilo. Acheni tuone ni jinsi gani. Yehova asema hivi: “Watafika huko [kwenye bara lao], nao wataondolea mbali vitu vyake vyote vichukizavyo, na machukizo yake yote.” Kama tu ilivyotolewa unabii, kuanzia 1919, Yehova aliwasafisha watu wake na kuwatia upya nguvu wamtumikie. Walianza kuondoa kutoka mazingira yao ya kiroho mazoea yote ya Kibabiloni na mafundisho yaliyowatia uchafu machoni pake.

9. Kuanzia 1919, Yehova aliwapa watu wake baraka zipi zenye umaana?

⁹ Kisha, kulingana na mstari wa 19, Yehova aendelea kusema: “Nami nitawapa moyo mmoja, nami nitatia roho mpya ndani yao; nami nitauondoa moyo wa kijiwe katika miili yao, nami nitawapa moyo wa nyama.” Kupatana na maneno haya, katika 1919, Yehova aliunganisha watumishi wake watiwa mafuta, na kwa kusema kitamathali akawapa “moyo mmoja,” ili waweze kumtumikia “bega kwa bega.” (Sefania 3:9, NW) Na zaidi, Yehova aliwapa watu wake roho takatifu ili iwatie nguvu katika kazi ya kutoa ushahidi na kutokeza ndani yao matunda mazuri yafafanuliwayo kwenye Wagalatia 5:22, 23. Na badala ya moyo usioitikia, ulio kama jiwe, Yehova aliwapa moyo laini, wenye kukubali kwa utayari, na wenye utii, moyo ambao ungeitikia mapenzi yake.

10. Kwa nini Yehova amebariki watu wake waliorudishwa kuanzia 1919 na kuendelea?

¹⁰ Kwa nini alifanya hivi? Yehova mwenyewe aeleza. Twasoma kwenye Ezekieli 11:20: “Ili waende katika amri zangu, na kuyashika maagizo yangu, na kuyatenda; nao watakuwa watu wangu, nami nitakuwa Mungu wao.” Israeli wa Mungu walijifunza kutii sheria ya Yehova badala ya kufuata mawazo yao wenyewe. Walijifunza kufanya mapenzi ya Mungu bila kuhofu mwanadamu. Hivyo, walidhihirika kuwa tofauti na Wakristo bandia wa Jumuiya ya Wakristo. Walikuwa watu wa Yehova. Na kwa sababu hiyo, Yehova alikuwa tayari kuwatumia wakiwa mjumbe wake, “mtumwa mwaminifu mwenye akili” wake.—Mathayo 24:45-47.

Furaha ya Wajumbe wa Mungu

11. Kitabu cha Isaya chafafanuaje furaha ya watu wa Yehova?

¹¹ Je, waweza kuwazia furaha yao wakati walipong’amua ni cheo chenye pendeleo kama nini walichokuwa nacho? Wakiwa kikundi, walirudia maneno ya Isaya 61:10: “Nitafurahi sana katika BWANA, nafsi yangu itashangilia katika Mungu wangu.” Ahadi ya Isaya 35:10 ilitimizwa juu yao: “Na hao waliokombolewa na BWANA watarudi, watafika Sayuni wakiimba; na furaha ya milele itakuwa juu ya vichwa vyao; nao watapata kicheko na furaha, huzuni na kuugua zitakimbia.” Furaha ya wajumbe wa Yehova wa amani ya kimungu ilikuwa kama hiyo huko nyuma katika 1919 walipojiandaa kuhubiria wanadamu wote habari njema. Tangu wakati huo hadi siku hii, hawajakoma kufanya kazi hii, nayo furaha yao imeongezeka. Katika Mahubiri yake ya Mlimani, Yesu alitaarifu hivi: “Wenye furaha ni wenye kufanya amani, kwa kuwa wao wataitwa ‘wana wa Mungu.’” (Mathayo 5:9) Ukweli wa tamko hili umeonwa na mabaki ya “wana wa Mungu” waliotiwa mafuta kuanzia 1919 hadi leo.

12, 13. (a) Ni nani waliojiunga na Israeli wa Mungu katika kumtumikia Yehova, nao walifanya kazi gani? (b) Watumishi watiwa mafuta wa Yehova wamekuwa na shangwe gani kubwa?

¹² Kadiri miaka ilivyopita, ndivyo idadi ya Israeli wa Mungu ilivyoongezeka hadi miaka ya 1930 wakati kukusanywa kwa waliobaki wa watiwa mafuta kulipokaribia umalizio. Je, ndipo ongezeko katika idadi ya wahubiri wa habari njema likakoma? Sivyo hata kidogo. Umati mkubwa wa Wakristo wenye tumaini la kidunia ulikuwa tayari umeanza kutokea, na huo ulikuwa ukijiunga na ndugu zao waliotiwa mafuta katika kazi ya kuhubiri. Mtume Yohana aliuona umati mkubwa huu katika ono, na inavutia namna anavyowafafanua: “Wako mbele ya hicho kiti cha ufalme cha Mungu; nao wanamtolea utumishi mtakatifu mchana na usiku.” (Ufunuo 7:15) Ndiyo, umati mkubwa ukawa na shughuli katika kumtumikia Mungu. Likiwa tokeo, idadi ya watiwa-mafuta ilipoanza kupungua, kuanzia 1935, kazi ya kutoa ushahidi iliendelezwa kwa mwendo ulioongozeka na waandamani hawa waaminifu.

¹³ Kwa njia hii unabii wa Isaya 60:3, 4 ulitimizwa: “Mataifa wataijilia nuru yako, na wafalme kuujia mwanga wa kuzuka kwako. Inua macho yako, utazame pande zote; wote wanakusanyana; wanakujia wewe; wana wako watakuja kutoka mbali. Na binti zako watabebwa nyongani.” Furaha ambayo matukio haya yalileta kwa Israeli wa Mungu inafafanuliwa vizuri sana kwenye Isaya 60:5, ambapo twasoma hivi: “Ndipo utakapoona na kutiwa nuru, na moyo wako utatetemeka na kukunjuka; kwa kuwa wingi wa bahari utageuzwa kukujia, utajiri wa mataifa utakuwasilia.”

Tengenezo la Yehova Mwendoni

14. (a) Ezekieli aliona ono gani la mambo ya kimbingu, naye alipokea amri ipi? (b) Watu wa Yehova katika nyakati za kisasa walifahamu nini, nao walihisi wajibu upi?

¹⁴ Katika mwaka 613 K.W.K., Ezekieli aliona katika ono tengenezo la Yehova la kimbingu, lililo kama gari likiwa mwendoni. (Ezekieli 1:4-28) Baadaye, Yehova alimwambia hivi: “Mwanadamu, haya! waendee wana wa Israeli ukawaambie maneno yangu.” (Ezekieli 3:4) Katika mwaka huu wa 1997, twafahamu kwamba tengenezo la Yehova la kimbingu bado lasonga bila kuzuilika ili kutimiza makusudi ya Mungu. Kwa sababu hiyo, bado twahisi tukisukumwa kuwaambia wengine juu ya makusudi hayo. Katika siku yake, Ezekieli alisema maneno ambayo yalipuliziwa moja kwa moja na Yehova. Leo, twasema maneno kutoka kwa Neno la Yehova lililopuliziwa, Biblia. Na ni ujumbe ulioje ulicho nao kitabu hicho kwa ajili ya wanadamu! Ingawa wengi wana wasiwasi kuhusu wakati ujao, Biblia huonyesha kwamba mambo ni mabaya kwa kuzidi sana—na kwa wakati huohuo, mambo ni mazuri kwa kuzidi sana—kuliko wanavyofikiri.

15. Kwa nini hali ni mbaya kuliko wengi wafikirivyo leo?

¹⁵ Mambo ni mabaya zaidi kwa sababu, kama tulivyoona katika makala zilizotangulia, Jumuiya ya Wakristo na dini nyinginezo zisizo za kweli hivi karibuni zitaharibiwa, kabisa kama lilivyoharibiwa Yerusalemu katika 607 K.W.K. Zaidi ya hilo, tengenezo zima la kisiasa, tufeni pote linalofananishwa na hayawani-mwitu mwenye vichwa saba na pembe kumi katika kitabu cha Ufunuo lakaribia kufagiliwa mbali, sawa na walivyofagiliwa mbali wapagani wengi waliokuwa majirani wa Yerusalemu. (Ufunuo 13:1, 2; 19:19-21) Katika siku ya Ezekieli, Yehova alifafanua waziwazi hofu kuu iliyochochewa na uharibifu wa Yerusalemu uliokuwa ukikaribia. Lakini maneno yake yatakuwa na maana nyingi zaidi wakati watu watakapoutambua uharibifu unaokaribia wa ulimwengu huu. Yehova alimwambia Ezekieli hivi: “Ugua, basi, Ee mwanadamu; kwa kuvunjika kwake viuno vyako, na kwa uchungu, utaugua mbele ya macho yao. Na itakuwa, wakuambiapo, Mbona unaugua? ndipo utakaposema, Kwa sababu ya habari hizo, maana linakuja; na kila moyo utayeyuka, na mikono yote itakuwa dhaifu, na kila roho itazimia, na magoti yote yatalegea kama maji; tazama, linakuja, nalo litatendeka, asema Bwana MUNGU.” (Ezekieli 21:6, 7; Mathayo 24:30) Matukio yenye kutia hofu yako mbele tu. Hangaikio letu lenye kina kwa ajili ya wanadamu wenzetu hutusukuma kutoa onyo, kuwaeleza “habari” ya hasira-kisasi ya Yehova inayokuja.

16. Kwa wapole, kwa nini hali ni bora kuliko wengi wafikirivyo?

¹⁶ Wakati huohuo, kwa watu wapole mambo ni mazuri kwa kuzidi sana kuliko wanavyowaza watu. Katika njia gani? Katika njia ya kwamba Yesu Kristo amekufa kwa ajili ya dhambi zetu na sasa anatawala akiwa Mfalme wa Ufalme wa Mungu. (1 Timotheo 1:15; Ufunuo 11:15) Matatizo ya wanadamu yaonekanayo kama hayatatuliki, hivi karibuni yatatatuliwa kupitia Ufalme huo wa kimbingu. Kifo, magonjwa, ufisadi, njaa, na uhalifu yatakuwa mambo yaliyopita, na Ufalme wa Mungu utatawala bila kupingwa juu ya dunia paradiso. (Ufunuo 21:3, 4) Wanadamu watafurahia amani ya kimungu—uhusiano wenye amani na wenye upendo pamoja na Yehova Mungu na pamoja na mtu na mwenzake.—Zaburi 72:7.

17. Ni maongezeko gani yanayofurahisha mioyo ya wajumbe wa amani ya kimungu?

¹⁷ Katika sehemu fulani za ulimwengu, umati mkubwa ajabu wa wapole unaitikia ujumbe huu wa amani ya kimungu. Kutaja vielelezo vichache tu, mwaka jana Ukrainia iliripoti ongezeko la asilimia 17 katika watangazaji. Msumbiji iliripoti ongezeko la asilimia 17, Lithuania asilimia 29. Urusi ilikuwa na ongezeko la asilimia 31, huku Albania ikipata ongezeko la asilimia 52 katika watangazaji. Maongezeko haya huwakilisha makumi ya maelfu ya watu wenye mioyo ifuatayo haki wanaotaka kufurahia amani ya kimungu na ambao wamechukua msimamo wao kwa ajili ya uadilifu. Ukuzi huo wa haraka huletea udugu wote wa Kikristo shangwe.

18. Mtazamo wetu utakuwa nini, watu wasikie au wasisikie?

¹⁸ Je, watu huitikia kwa haraka hivyo unakoishi? Ikiwa ndivyo, twashangalia pamoja nawe. Hata hivyo, katika maeneo fulani, huchukua saa nyingi mno za kazi ngumu kabla ya hata mtu mmoja mwenye kupendezwa kupatikana. Je, wale wanaotumikia katika maeneo hayo hulegeza mikono yao au kukata tamaa? La. Mashahidi wa Yehova hukumbuka maneno ya Mungu kwa Ezekieli wakati Alipomtuma nabii huyo mchanga kwa mara ya kwanza kuwahubiria Wayahudi wenzake: “Nao, kwamba watasikia, au kwamba hawataki kusikia, (maana ndio nyumba ya kuasi hao), hata hivyo watajua ya kuwa nabii amekuwako miongoni mwao.” (Ezekieli 2:5) Kama Ezekieli, twafuliza kueleza watu juu ya amani ya kimungu wasikilize au wasisikilize. Wakisikiliza, tunasisimuka. Wakitukataa, kutudhihaki, hata kutunyanyasa, twavumilia. Twampenda Yehova, nayo Biblia yasema hivi: “Upendo . . . huvumilia yote.” (1 Wakorintho 13:4, 7) Kwa sababu twahubiri kwa uvumilivu, watu wanajua Mashahidi wa Yehova ni akina nani. Wanajua ujumbe wetu ni nini. Mwisho ujapo, watajua kwamba Mashahidi wa Yehova walijaribu kuwasaidia kufurahia amani ya kimungu.

19. Tukiwa watumishi wa Mungu wa kweli tunahazini pendeleo gani kubwa?

¹⁹ Je, kuna pendeleo lolote lililo kubwa kuliko kumtumikia Yehova? Hakuna! Furaha yetu kubwa kuliko zote huja kutokana na uhusiano wetu pamoja na Mungu na kujua kwamba twafanya mapenzi yake. “Heri [“wenye furaha ni,” NW] watu wale waijuao sauti ya shangwe. Ee BWANA, [wao] huenenda katika nuru ya uso wako.” (Zaburi 89:15) Basi sikuzote na tuhazini shangwe ya kuwa wajumbe wa Mungu wa amani kwa wanadamu. Na tutimize sehemu yetu kwa bidii nyendelevu katika kazi hii hadi Yehova asemapo imefanywa.

Je, Wakumbuka?

◻ Ni nani walio wajumbe wa amani wa Mungu leo?

◻ Twajuaje kwamba Babiloni Mkubwa lilianguka mwaka wa 1919?

◻ Hangaiko kubwa la “umati mkubwa” ni nini?

◻ Kwa nini wakati ujao ni wenye giza kuliko watu wengi wafikirivyo leo?

◻ Kwa watu wenye mioyo minyofu, kwa nini wakati ujao waweza kuwa bora zaidi kuliko wawaziavyo?

[Picha katika ukurasa wa 21]

Wanapoona kuzorota kwa jamii ya kibinadamu, watu wengi ulimwenguni wana hisi yenye nguvu kwamba jambo fulani lenye kutia hofu litatukia

[Picha katika ukurasa wa 23]

Wajumbe wa amani ya kimungu ndio watu wenye furaha zaidi duniani leo