Yehova Achomoa Upanga Wake Kutoka Ala!

“Wote wenye mwili watajua ya kuwa mimi, BWANA [Yehova, NW], nimeufuta upanga wangu alani mwake.”​—Ezekieli 21.5

 1. Yehova alitumia upanga wake dhidi ya nani katika Yuda na Israeli?

UPANGA wa Yehova unafanya jambo linalofaa kwa kuvuvia hofu kuu katika adui zake. Lakini wakati yeye alipoutumia dhidi ya watenda makosa katika falme za Yuda na Israeli, je! kweli falme hizo zilijua jambo lililokuwa likitukia? Ndiyo, zilifanywa zikajua kwamba Yehova alikuwa ameleta upanga wake wa ufananisho kutoka kwenye ala yao,—Ezra 9:6-9; Nehemia 1:8; 9:26-30.

 2. Yehova alisema nini juu ya “upanga” wake, hiyo ikitokeza maswali gani?

² Kupitia mnabii na mlinzi wake Ezekieli, Mungu alisema: “Watu wote wenye mwili watajua ya kuwa mimi, BWANA [Yehova, NW], nimeufuta upanga wangu alani mwake.” (Ezekieli 21:5) Je! maneno hayo yalitumika katika nyakati za kale tu? Au yana maana kwetu?

Matabiri Juu ya Hukumu ya Yerusalemu

 3. Ezekieli aliwaambia nini wahamishwa katika Babulonia, na jambo hilo lina ulinganifu gani wa ki-siku-hizi?

³ Gari-vita la Yehova lilijongea tena, na mahali alipokuwa Ezekieli pakabadilika pia. Ilikuwa kama kwamba tengenezo la Mungu la kimbingu lililo kama gari-vita lilijongea kwenda kwenye kituo cha kuonea mambo juu ya Mlima wa Mizeituni. Alipokuwa hapo, Yesu alitabiri uharibifu uliokuja juu ya Yerusalemu katika 70 W.K., mkumbo ambao ulikuwa unabii juu ya mwisho wa Jumuiya ya Wakristo. (Marko 13:1-20) Katika njozi, Ezekieli mwenyewe alikuwa amechukuliwa kutoka kwenye mto Kebari, lakini sasa yeye aliletwa kwa njia ya roho ya Mungu akawa kwenye nyumba yake ya uhamisho katika Babulonia. Akiwa huko aliambia wahamishwa wale wengine ‘habari ya mambo yote ambayo Yehova alimwonyesha.’ Vivyo hivyo, yule “mlinzi” aliye mpakwa-mafuta wa Mungu na mashahidi wanaoshirikiana naye leo wanatangaza mambo yote ambayo wamefunuliwa na yule Mwendeshaji wa gari-vita la kimbingu.​—Ezekieli 11:22-25.

 4. Wahamishwa wa Kiyahudi waliitikia jinsi gani vitendo vya Ezekieli vya ufananisho?

⁴ Kwa vitendo vya ufananisho, Ezekieli alionyesha wahamishwa Wayahudi kwamba msiba wa kitaifa ulikuwa karibu sana. (Soma Ezekieli 12:1-7.) Mnabii yule alibeba ‘vyombo vya uhamisho’ kuonyesha kwamba ni vitu vichache ambavyo watekwa wangeweza kubeba juu ya mabega yao. Karibuni mambo mabaya sana yangetukia katika Yerusalemu wenye kuzingiwa. Ingawa wengi hawakuchukua maonyo hayo kwa uzito, Ezekieli alipaswa kuwaambia watu hivi: “Maneno yangu hayatakawilishwa tena.” Leo pia madharau yanafanywa kwa maonyo na manabii ya kimungu, lakini sisi tunaweza kufanya mengi tuwasaidie wenye kutafuta ukweli watie uhakika wao katika utimizo wayo.​—Ezekieli 12:8-28.

 5. Kwa kuwa ‘siku ya Yehova’ ilikuwa karibu sana, ni malaumu gani ya wazi yaliyofaa?

⁵ Wale wasiosikiliza mlinzi wa Yehova walihitaji kujua kwamba wao wangehisi jinsi “upanga” wa Mungu ulivyo. Kwa hiyo, wale wenye kusababisha dhana zenye makosa kwamba Yerusalemu na Yuda zilikuwa na usalama walilaumiwa waziwazi. Wanabii bandia walilinganishwa na mabweha, na ilionyeshwa kwamba waongo walikuwa wakizipaka chokaa kuta zenye kutikisika, au miradi ya kazi-bure tu, ya wale watu. Wanabii-wake walio wa bandia walilaumiwa waziwazi pia. ‘Siku ya Yehova’ ilikuwa karibu sana, na uso wake ulikuwa umeelekezwa kabisa dhidi ya wale ‘wenye kufarakana naye’ (wenye kujiondoa kwake, NW), yaani, ‘wakijiweka wakfu kwa kujiondolea mbali waache kufuata Mungu.’ Ikiwa sisi tumejiweka wakfu kwa Yehova, kwa uhakika hatungetaka kamwe kujiondoa kwenye utumishi wake mtakatifu.​—Ezekieli 13:1–14:11.

 6. Je! mwanadamu ye yote angeweza kuokoa watu hao wenye kupotoka wa Yuda, na jambo hilo linatufundisha nini sisi?

⁶ Ni nani angeweza kuwaokoa watu wa Yuda wenye kupotoka? Wala hata Noa mwadilifu, Danieli, wala Ayubu hangeweza kuwakomboa wakati Mungu angeleta hukumu zake juu ya bara hilo. Basi, ikiwa sisi tutapata wokovu ni lazima tujibebee wenyewe daraka letu la kibinafsi mbele za Mungu na kufanya mapenzi yake.​—Ezekieli 14:12-23; Warumi 14:12.

 7. Yuda ilifananishwa na nini, hata hivyo Mungu angeanzisha nini pamoja na walio waaminifu?

⁷ Kwa sababu ya wakaaji wayo wasio waaminifu, Yuda ilifananishwa na mzabibu-mwitu usio na tunda jema na wenye kufaa kutiwa motoni tu. (Ezekieli 15:1-8) Ilifananishwa pia na mtoto-mwokotwa aliyeokolewa na Mungu kutoka Misri na kulelewa mpaka akafikia kuwa mwanamke mzima. Yehova alimchukua akawa mke wake, lakini yeye akageukia miungu bandia na angepatwa na uharibifu kwa ajili ya uzinzi wake wa kiroho. Hata hivyo, Mungu angeanzisha ‘agano la milele’ pamoja na walio waaminifu​—agano jipya pamoja na Israeli wa kiroho,—Ezekieli 16:1-63; Yeremia 31:31-34; Wagalatia 6:16.

 8. (a) Babuloni na Misri zilifananishwa na nini? (b) Kuvunja kwa Sedekia kiapo chake kunapasa kutuathiri sisi jinsi gani?

⁸ Ndipo, watawala wa Babuloni na Misri wakafananishwa na tai wakubwa. Mmoja alivunja sehemu ya juu ya mwerezi kwa kuondoa MfaIme Yehoyakini na kuweka Sedekia mahali pake. Ingawa Sedekia alifanya kiapo cha ushikamanifu kwa Nebukadreza, yeye alikivunja, akitafuta msaada wa kijeshi wa mtawala wa Misri, yule tai mkubwa mwingine. Ikiwa Sedekia alitaja jina la Mungu wakati wa kufanya kiapo chake, kukivunja kulileta suto juu ya Yehova. Ile fikira yenyewe tu ya kuleta suto juu ya Mungu inapasa ituzuie tusifanye kamwe ubandia kuhusiana na ahadi yetu. Sisi tumependelewa kweli kweli kuchukua jina la kimungu tukiwa Mashahidi wa Yehova!—Ezekieli 17:1-21.

 9, 10. (a) Ni unabii gani ulioandikwa kwenye Ezekieli 17:22-24, lakini ni lazima jambo gani lifanywe ikiwa sisi tutanufaika kutokana na utimizo wao? (b) Ni nani aliye na daraka juu ya mwenendo wetu?

⁹ Unabii wa Kimesiya ulio wa kuchangamsha moyo unafuata sasa. (Soma Ezekieli 17:22-24.) Hapa, “kilicho chororo” ni yule Mfalme wa Kimesiya, Yesu Kristo. Akiwa amepandwa na Yehova juu ya Mlima Sayuni wa kimbingu, yeye angekuwa “mwerezi mzuri,” chanzo cha himaya na baraka anapotawala juu ya dunia. (Ufunuo 14:1) Tunaweza kweli kweli kujipa moyo kutokana na jambo hilo.

¹⁰ Hata hivyo, ili sisi tunufaike kutokana na ule utimizo wa unabii wa Kimesiya ni lazima tudumishe uhusiano mwema pamoja na Yehova. Inaonekana kwamba wahamishwa wenzi wa Ezekieli walifikiri walikuwa na msimamo mzuri pamoja na Mungu na walilaumu babu zao wa kale kwa mateso yao. Lakini mnabii yule alionyesha wazi kwamba kila mtu ana daraka kwa matokeo ya mwenendo wake mwenyewe. (Ezekieli 18:1-29; linganisha Yeremia 31:28-30.) Ndipo likafuata ombi la kusihi. (Soma Ezekieli 18:30-32.) Ndiyo, Yehova ni mwenye rehema kwa wenye kutubu na hapendezwi na kifo cha mtu yeyote. Kwa hiyo, Mungu anasema: ‘Ghairini na mwendelee kuishi, Enyi watu.’​—Linganisha 2 Petro 3:9.

11. Watawala wa Yuda walilinganishwa na nini, na ni jambo gani ambalo lingeipata wakati ambapo angepigwa na “upanga” wa Yehova?

¹¹ Katika wimbo mmoja wa maombolezo juu ya anguko la Yuda, watawala wayo walilinganishwa na simba wachanga. Mfalme Yehoahazi alikufa akiwa uhamishoni Misri, Yehoyakimu akatekwa na Nebukadreza, na Yehoyakini akahamishiwa Babuloni Ndipo Nebukadreza alipoweka Sedekia juu ya kiti cha ufalme cha Yuda, lakini yeye akaasi Mwishowe, akiwa kama simba aliyefungiwa katika kizimba, Sedekia alipelekwa Babuloni akiwa mtekwa. Kwa kupatana na ule wimbo wa kiunabii wa maombolezo, katika 607 K.W.K. Yuda ikawa mzabibu ulioharibiwa, ikawa ‘haina tena kijiti cha nguvu kifaacho kwa fimbo ya enzi ya kutawala.’ Ilikuwa imepigwa na “upanga” wa Yehova!—Ezekieli 19:1-14; Yeremia 39:1-7.

12. (a) Kama vile babu zao wa kale, marika wa Ezekieli walijitia katika kutenda kosa gani? (b) Kwa nini watu waliuliza kama Ezekieli hakuwa akitunga mithali, na jambo hilo linatuandalia sisi onyo gani?

¹² Alipofikiwa na “baadhi ya wazee wa Israeli,” Ezekieli alinena ujumbe wa Mungu. Yeye alionyesha wazi kwamba ingawa Yehova aliwakomboa Waisraeli kutoka Misri na kuwapa Sheria Yake, wao waliikataa na wakazoea ibada ya sanamu. Kwa kuwa marika wa Ezekieli walikuwa na hatia ya kosa kama hilo, Mungu angejitia katika hukumu dhidi yao. Inaonekana kwamba kutia mashaka-mashaka wala si kutoelewa jambo lililomaanishwa na Ezekieli ndiko kulifanya watu hao waulize hivi: “Je! mtu huyu si mtu mwenye kupiga mithali?” Karibuni wao wangejua kwamba hakukuwa na mithali yoyote kuhusiana na ujumbe wa mnabii huyo. Jambo hilo linapasa kutuonya sisi tusichague kamwe kufuata mwelekeo wa mashaka-mashaka kuhusu utimizo wa maonyo ya Kimaandiko.​—Ezekieli 20:1-49.

Yehova Yule Shujaa wa Kivita

13. “Upanga” wa Mungu unamaanisha nini, na ni jambo gani ambalo “wote wenye mwili” wangelazimishwa kujua wakati ambapo upanga huo ungetumiwa?

¹³ Katika mwaka wa saba wa uhamisho (kufikia siku ya Abu 10, 611 K.W.K.), miaka inayopungua miwili na nusu ndiyo iliyobaki kabla ya ile ‘vita katika siku ya Yehova’ kuanza dhidi ya Yuda na Yerusalemu. (Ezekieli 13:5; 20:1) Angalia vile Yehova Shujaa wa Kivita alivyosema kupitia Ezekieli baada ya hapo. (Soma Ezekieli 21:1-5.) “Upanga” wa Mungu unamaanisha chombo ambacho yeye angetumia, lakini upanga huo unaweza kutia ndani tengenezo lake la kimbingu, lililo kama gari-vita. Wakaaji wa Yuda na Israeli walio ‘wenye haki’ na walio ‘wabaya,’ na pia mataifa walio na nia mbaya kuelekea watu wa Mungu, wangeanguka kwa ukali wa “upanga” wa Mungu. Kweli kweli, “wote wenye mwili” wangelazimishwa kujua kwamba Yehova ndiye mwenye kufanya vita dhidi yao.

14. (a) Kama Ezekieli, ni jambo gani ambalo mashahidi wa Yehova waliopakwa mafuta wanavutia fikira? (b) Ni jambo gani linaloonyesha kwamba watawala wa Jumuiya ya Wakristo hawatauponyoka “upanga” wa Mungu?

¹⁴ Kama Ezekieli, leo mashahidi wa Yehova waliopakwa mafuta wanavuta fikira kwenye “upanga” ambao Mungu atapunga-punga dhidi ya wafuasi wa Jumuiya ya Wakristo, ambayo makao yayo ndiyo yaliyofananishwa na “nchi ya Israeli.” Karibuni “upanga” huo utahisiwa na “wote wenye mwili toka kusini hata kaskazini,” na wazoeaji wote wa dini bandia. Wenye kujitumainia sana katika siku ya Ezekieli hawakuwa na sababu ya kuchachwa, huku wakikata shauri kwamba “upanga” wa Yehova ‘haungefanyiza machinjo’ dhidi yao. “Upanga” huo uliikataa fimbo ya kifalme ya ufalme wa Yuda, kama vile ulivyokataa “mti,” au fimbo nyingineyo yote. Basi, kwa uhakika watawala wa Jumuiya ya Wakristo hawataachiliwa na chombo cha Mungu cha uuaji.​—Ezekieli 21:6-17.

15. Ni kituko gani cha kale chenye kuhusisha Nebukadreza ambacho kinaonyesha kwamba hakuna mtu anayeweza kugeuzia kando “upanga” wa Yehova?

¹⁵ Unabii wa Ezekieli unaendelea kuonyesha kwamba hakuna mtu, kutia na roho wabaya, anaweza kugeuzia kando “upanga” wa Yehova. (Soma Ezekieli 21:18-22.) Ingawa Mfalme Nebukadreza angetumia uaguzi wa roho wabaya, Yehova angehakikisha kwamba mtawala huyo wa Kibabuloni angepiga miguu kusonga mbele dhidi ya Yerusalemu, si dhidi ya Rabba mji mkuu wa Kiamoni uliokuwa dhaifu zaidi. Nebukadreza angechagua kutokana na chombo fulani mshale mmoja uliotiwa alama kwa ajili ya Yerusalemu. Yeye angetumia vinyago (terafimu, NW, ambavyo inaelekea vilikuwa ni visanamu vyenye umbo la kibinadamu) na angetafuta katika ini la mnyama aliyechinjwa vidalili vya kumwelekeza. Hata hivyo, ajapofanya uaguzi yeye angefuata ile barabara ya kwenda kwenye mji mkuu wa Kiyudea na kuuzingia. Ni kweli kwamba, Nebukadreza alikuwa amefanya agano pamoja na Mfalme Sedekia. Lakini kwa sababu wao walivunja kiapo, Sedekia na Wayahudi wale wengine ‘wangekamatwa kwa mkono’ na kupelekwa Babuloni wakiwa mateka.​—Ezekieli 21:23, 24.

16. (a) Ni jambo gani lililotukia kwa utimizo wa Ezekieli 21:25-27? (h) Nyakati za Mataifa Yasiyo ya Kiyahudi zilianza lini, na ziliisha kwa tukio gani?

¹⁶ Kwa kuasi, Sedekia alijitia mwenyewe jeraha lenye kuleta kifo. (Soma Ezekieli 21:25-27.) Mfalme wa Yuda alipoondolewa kwenye mamlaka, kile kilemba cha kifalme na lile taji viliondolewa. (2 Wafalme 25:1-7) Ufalme wa Yuda ‘ulioinuka’ juu ‘ulishushwa chini’ kwa kuharibiwa katika 607 K.W.K. Hivyo zile falme zilizokuwa “chini” za mataifa yasiyo ya Kiyahudi ‘zilikwezwa,’ zikaachwa zikiwa katika kudhibiti dunia bila kuvurugwa na ufalme wa Mungu ulio kifananishi. (Kumbukumbu 28:13, 15, 36, 43, 44) Hivyo ndivyo zilivyoanza “nyakati zilizowekwa za mataifa”​—Nyakati za Mataifa Yasiyo ya Kiyahudi​—ambazo zilimalizika katika 1914 wakati Mungu alipompokeza ufalme Yesu Kristo, ‘yeye ambaye ni haki yake.’ (Luka 21:20-24, NW; Zaburi 110:1, 2; Danieli 4:15-28; 7:13, 14) Yesu akiwa juu ya kiti cha ufalme cha kimbingu, mataifa yasiyo ya Kiyahudi hayawezi kukanyaga-kanyaga kile kilichofananishwa na Yerusalemu wa kale, Ufalme wa mrithi halali wa Daudi,—Waebrania 12:22.

17. Ni “uongo” gani uliokuwa ukitangazwa na wanabii Waamoni?

¹⁷ Wanabii wa Kiamoni walikuwa wakisema kwamba Rabba, mji mkuu wa Amoni, ungeponyoka uharibifu wenye kuletwa na upanga wa Nebukadreza. Lakini huo ulikuwa “uongo,” kwa maana bara zima la Amoni lingeharibiwa liwe ukiwa. Katika siku yetu, Mungu ameamrisha kwamba uharibifu wa mataifa utafuata ule wa Jumuiya ya Wakristo, kama vile Rabba ulivyoharibiwa baada ya Yerusalemu.​—Ezekieli 21:28-32; Ufunuo 16:14-16.

Yerusalemu Wafanyiwa Mashtaka

18. Ezekieli aliulaumu wazi Yerusalemu kwa sababu ya dhambi gani, na sisi tunapaswa kutenda jinsi gani kwa sababu hiyo?

¹⁸ Akinena tena neno la Yehova, Ezekieli aliulaumu wazi Yerusalemu kwa dhambi kama vile umwagaji wa damu, ibada ya sanamu, mwenendo mlegevu, kupunja, na kusahau Mungu. Wakuu wao wenye hatia ya damu walitumia vibaya mamlaka yao kufikia hatua ya kuua kwa kutumia hukumu, na wachongezi waliondolea mbali adui zao kwa kutoa mashtaka bandia juu yao. Kwa makosa hayo, wakaaji wa Yerusalemu wangetapanywa. Kujua hivyo kunapasa kuimarishe azimio letu kuepuka utumizi mbaya wa mamlaka, mwenendo mlegevu, uchongezi, na dhambi nyinginezo zilizo nzito.​—Ezekieli 22:1-16.

19. Ni kwa njia gani watu wa Yuda wangechemshwa katika moto, na kwa nini walifaa kuuliwa mbali?

¹⁹ Pia Yehova angewachemsha watu wa Yuda katika tanuri ya moto. Hiyo haikuwa kwa kusudi la kuwaondoa takataka katika utaratibu wa kuwatakasa, bali ilikuwa kwa kusudi la kuwayeyusha watokomee katika hasira yake iliyo kama moto. (Ezekieli 22:17-22) Hukumu hiyo ilistahiliwa sana na wale wanabii wenye kutunga hila, makuhani wasiofuata sheria, wakuu wenye pupa, na wenye kutenda yasiyo haki. Wote walilaumiwa waziwazi. Kwa kuwa hakuna hata mwanamume mmoja aliyesimama kutetea uadilifu, Mungu angewaulia mbali kwa moto wa kiruu chake.​—Ezekieli 22:23-31.

Adhabu Yastahiliwa

20. Kasirani ya Mungu ingemiminwa juu ya wanawake gani wawili wa ufananisho, na ni maelezo gani marefu unayoweza kuandaa kuhusu utambulisho wao?

²⁰ Ndipo kumiminwa kwa kasirani ya Mungu kukawakilishwa kuwa hukumu yenye kufikilizwa juu ya wanawake wawili wa ufananisho walio na hatia ya uzinzi wa kiroho. Mmoja alikuwa Ohola, ule ufalme wa Israeli wa makabila kumi ambao mji mkuu wao ulikuwa Samaria. Ulikuwa ndio “mkubwa” kwa umri kwa sababu ndio uliokuwa na hesabu kubwa zaidi ya makabila ya Israeli, kutia na yale yaliyotokana na wana wakubwa zaidi wa Yakobo, Reubeni na Simeoni. Dada yake alikuwa Oholiba, ile Yuda yenye makabila mawili ambayo mji kuu wayo ulikuwa Yerusalemu. Ohola inamaanisha “Hema Yake.” Oholiba inamaanisha “Hema Yangu Imo Katika Yeye,” na jina hilo linafaa kwa kuwa hema, au hekalu, ya Mungu ilikuwa katika Yuda.​—Ezekieli 23:1-4.

21. Ohola alitafuta usalama katika nini, hiyo ikituandalia sisi onyo gani?

²¹ Ohola (Israeli) aliacha kuwako wakati alipopinduliwa na Waashuri katika 740 K.W.K. Yeye alikuwa amefanya nini? (Soma Ezekieli 23:5-7.) Ohola alikuwa ametafuta usalama katika miungano ya kisiasa kwa kukosa imani, lakini jambo hilo lilimwongoza achague kufuata ibada bandia ya wenye kuungana naye, hivi kwamba ‘alijitia unajisi kwa vinyago vyote vyao.’ Kwa kuchukua onyo kutokana na uzinzi wa kiroho wa Ohola, inatupasa sisi tulinde dhidi ya kuwa na mahusiano ya kilimwengu yanayoweza kuharibu imani yetu.​—Yakobo 4:4; 1 Yohana 2:15-17.

22. Kama Ohola na Oholiba, Jumuiya ya Wakristo inafanya nini, lakini ni jambo gani litaipata?

²² Kwa sababu ya kufuatia mwendo wenye dhambi kuliko ule wa dada yake, Oholiba (Yuda) alipatwa na afa la kitaifa mikononi mwa Wababuloni katika 607 K.W.K. Watoto wake walianguka kwa upanga au wakaongozwa waende zao wakiwa mateka, naye akafedheheshwa miongoni mwa mataifa. Kama vile Ohola na Oholiba, Jumuiya ya Wakristo inafanya uzinzi wa kiroho, jambo ambalo ni dhambi machoni pa Mungu ambaye jumuiya hiyo inadai kumwabudu. Uprotestanti, ulio na madhehebu nyingi, umejitia unajisi pamoja na mamlaka za kibiashara na kisiasa za ulimwengu kwa kadiri kubwa kuliko hata dada yao mkubwa zaidi, Ukatoliki wa Kiroma. Hivyo, Yehova atahakikisha kwamba Jumuiya ya Wakristo itaharibiwa yote. Ndipo watu watakapojua kwamba yeye ndiye Bwana Mwenye Enzi Kuu Yehova. Hali yetu ya kupiga moyo konde tuepuke mahusiano ya kilimwengu itaimarishwa tukikumbuka kwamba karibuni washirika wa Jumuiya ya Wakristo wataigeukia na kufikiliza hukumu ya Mungu juu yayo ikiwa ndiyo sehemu kubwa zaidi ya Babuloni Mkuu, ile milki ya ulimwengu ya dini bandia.​—Ezekieli 23:8-49; Ufunuo 17:1-6, 15-18.

Wanafiki Washangazwa Sana

23. Yerusalemu uliwakilishwa jinsi gani katika ujumbe wa Mungu kwa Ezekieli mwishoni-mwishoni mwa Desemba wa 609 K.W.K., na ni jambo gani lingeupata?

²³ Katika siku ile ile ya mwisho-mwisho wa Desemba ambayo Nebukadreza alianza kuzingia Yerusalemu kwa miezi 18 (Tebethi 10, 609 K.W.K.), Mungu alimpa Ezekieli ujumbe mwingine wenye maelezo ya wazi kabisa. Katika huo, Yerusalemu uliozingiwa uliwakilishwa kuwa sufuria ambamo wakaaji wa jiji hilo ‘wangetokoswa.’ Kuwa na tabia zenye kinyaa kulikuwa kumesababisha “kutu” katika sufuria hiyo ya kupikia iliyo ya ufananisho. Watenda-makosa hao wangeondolewa katika Yerusalemu wakiwa “kipande kipande,” na ole wa mji huo haungekwisha mpaka upatwe na uharibifu. Yehova alikuwa amehukumu Yerusalemu kulingana na shughuli za uovu wa mji huo, na ilikuwa lazima uharibiwe, kama vile ni lazima Jumuiya ya Wakristo iharibiwe.​—Ezekieli 24:1-14.

24. (a) Kwa nini Ezekieli hakuonyesha kihoro chochote wakati mke wake alipokufa? (b) Wakati “upanga” wa Yehova utakaposhuka juu ya Jumuiya ya Wakristo, hiyo itatenda jinsi gani, nayo itakuja kujua nini?

²⁴ Ndipo, Ezekieli alipaswa kutenda kwa njia isiyo ya kikawaida. (Soma Ezekieli 24:15-18.) Kwa nini mnabii huyo hakupaswa kuonyesha kihoro cho chote wakati mke wake alipokufa? Ili aonyeshe jinsi Wayahudi wangeshangazwa sana na uharibifu wa Yerusalemu, wakaaji wao, na lile hekalu. Tayari Ezekieli alikuwa amesema ya kutosha juu ya mambo hayo na hangenena tena ujumbe wa Mungu mpaka aletewe ripoti ya kwamba Yerusalemu ulikuwa umeanguka. Vivyo hivyo, Jumuiya ya Wakristo na wanadini wake walio wanafiki watashangazwa sana wakati wa kuharibiwa kwao. Na baada ya “dhiki kubwa” kuanza, mambo ambayo tayari jamii ya mlinzi aliyepakwa mafuta ilikuwa imekwisha kuyasema juu ya mwisho wake yatakuwa yametosha. (Mathayo 24:14) Lakini wakati “upanga” wa Mungu utakaposhuka juu ya Jumuiya ya Wakristo, wanadini hao wenye kushangazwa sana na wengine watalazimika ‘kujua ya kuwa yeye ndiye Yehova.’​—Ezekieli 24:19-27.

Wewe Ungejibu Jinsi Gani?

◻ Ni jambo gani lililotukia wakati Yehova alipotumia “upanga” wake dhidi ya Yuda na Israeli?

◻ Sisi tunapaswa kuathiriwa jinsi gani na kuvunja kwa Sedekia kiapo chake kwa Nebukadreza?

◻ “Upanga” wa Mungu unamaanisha nini?

◻ Ni kituko gani kinachohusisha Nebukadreza ambacho kinaonyesha kwamba hakuna mtu anayeweza kugeuzia kando “upanga” wa Yehova?

◻ Ni jambo gani lililotukia kwa utimizo wa Ezekieli 21:25-27?

◻ Kutoonyesha kihoro kwa Ezekieli wakati mke wake alipokufa kulikuwa kivuli cha jambo gani?

[Picha katika ukurasa wa 18]

Wakati Mfalme Sedekia alipovunja kiapo chake kwa Nebukadreza na akachukuliwa mateka, ni unabii gani ulioanza kutimizwa?