Sura 3

Utawala wa “Mwana-Mfalme wa Amani” Katikati ya Maadui

 1, 2. (a) Yesu Kristo alisema maneno gani ya kuaga kikundi cha wanafunzi wake? (b) Je! Hilo lilihitaji ulimwengu wote ugeuzwe kabla hajatawala akiwa “Mwana-Mfalme wa Amani”?

MUDA mfupi kabla ya kupaa kwake kwenda mbinguni zaidi ya karne kumi na tisa zilizopita, yule “Mwana-Mfalme wa Amani” wa wakati ujao, Yesu Kristo, alisema maneno haya ya kuaga kwa kikundi cha wanafunzi wake waaminifu: “Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu . . . na tazama mimi nipo pamoja na ninyi sikuzote mpaka umalizio wa mfumo wa mambo.”—Mathayo 28:19, 20, NW.

² Je! Maneno hayo ya Yesu yalihitaji ulimwengu wote ugeuzwe kabla ya ule “umalizio wa mfumo wa mambo” ulioanza mwaka wa 1914? Hapana. Leo, karibu na mwisho wa karne hii ya 20, ulimwengu wa wanadamu unabaki ukiwa mbali sana na kugeuzwa umfuate Yesu Kristo akiwa Mwokozi wao na yeye aliye na haki ya kuwa Mfalme. Hata hivyo, hilo halikuchelewesha kule kutimizwa kwa yale ambayo Yehova alitabiri katika unabii wa Biblia. Halijapata kuwa kusudi la Mungu kwamba ulimwengu wote wa wanadamu ugeuzwe kabla ya Yesu Kristo kuanza kutawala akiwa yule “Mwana-Mfalme wa Amani.” Tofauti kabisa na hilo, yeye alitabiriwa kwamba angeanza kutawala katikati ya adui zake.

 3. Rejezo la Yesu kwenye Zaburi 110 lilionyeshaje kwamba angetawala katikati ya maadui?

³ Hata alipokuwa hapa duniani, Yesu Kristo alijua uhakika huo. Muda mfupi kabla ya kifo chake cha kufia imani, alikuwa na mabishano na wapinzani wake wa kidini naye akarejezea maneno ya Zaburi 110. Tunasoma habari hiyo kwenye Luka 20:41-44: “Akawaambia, Wasemaje watu kwamba Kristo ni Mwana wa Daudi? Maana Daudi mwenyewe asema katika chuo cha Zaburi, [Yehova] alimwambia Bwana wangu, Uketi mkono wangu wa kuume, hata niwaweke adui zako kuwa kiti cha kuwekea miguu yako. Basi Daudi amwita Bwana; amekuwaje mwana wake?”

 4-6. (a) Vilevile, Zaburi 2 inaonyeshaje kwamba Yesu hangengojea ulimwengu ugeuzwe kabla ya kuanza kutawala akiwa “Mwana-Mfalme wa Amani”? (b) Zaburi 2:7 ilitimizwa wakati gani?

⁴ Ni wazi, basi, Yesu Kristo akiwa yule Mwana wa Daudi, hangeanza kutawala baada ya ulimwengu kugeuzwa. Badala yake, angeanza kutawala katikati ya maadui ambao kwa njia ya vita mwishowe Yehova Mungu angewaweka wawe kiti cha kuwekea miguu ya Mwanaye aliyetawazwa. Vivyo hivyo Zaburi ya pili, katika maneno yafuatayo, inaonyesha kuanza kwa utawala wake akiwa ndiye “Mwana-Mfalme wa Amani” katikati ya maadui:

⁵ “Mbona mataifa wanafanya ghasia, na makabila wanatafakari ubatili? Wafalme wa dunia wanajipanga, na wakuu wanafanya shauri pamoja, juu ya [Yehova], na juu ya masihi [Kristo wake], na tuvipasue vifungo vyao, na kuzitupia mbali nasi kamba zao. Yeye aketiye mbinguni anacheka, [Yehova] anawafanyia dhihaka. Ndipo atakaposema nao kwa hasira yake, na kuwafadhaisha kwa ghadhabu yake. Nami nimemweka mfalme wangu juu ya Sayuni, mlima wangu mtakatifu.

⁶ “Nitaihubiri amri; [Yehova] aliniambia [mimi Kristo], Ndiwe mwanangu, Mimi leo nimekuzaa. [Zaburi 2:7 ilitimizwa wakati Yehova alipomfufua Mwanaye kutoka kwa wafu, hivyo akawa Baba ya milele wa Yesu. (Warumi 1:4)] Uniombe, nami nitakupa mataifa kuwa urithi wako, na miisho ya dunia kuwa milki yako. Utawaponda kwa fimbo ya chuma, na kuwavunja kama chombo cha mfinyanzi. Na sasa, enyi wafalme, fanyeni akili, enyi waamuzi wa dunia, mwadibiwe. Mtumikieni [Yehova] kwa kicho, shangilieni kwa kutetemeka. Shikeni yaliyo bora, asije akafanya hasira nanyi mkapotea njiani, kwa kuwa hasira yake itawaka upesi; [wenye furaha ni] wote wanaomkimbilia.”

 7. Ni rejezo gani kwenye Zaburi 2 lililofanywa na mitume baada ya siku ya Pentekoste?

⁷ Kulingana na Matendo 4:24-27, (NW) wale mitume wa Yesu Kristo, walirejeza kwenye Zaburi hii ya pili baada ya siku ya Pentekoste, 33 W.K.: “Wao kwa umoja wakainua sauti zao kwa Mungu, wakasema: ‘Bwana Mwenye Enzi Kuu, wewe Ndiwe uliyefanya mbingu na dunia na bahari na vitu vyote vilivyomo, na ambaye kupitia kwa roho takatifu ulisema kupitia kinywa cha Daudi babu yetu, mtumishi wako, “Kwa sababu gani mataifa wakawa wenye msukosuko na vikundi vya watu vikatafakari juu ya mambo yaliyo tupu? Wafalme wa dunia walichukua msimamo wao na watawala wakakusanyika pamoja kama mtu mmoja dhidi ya Yehova na dhidi ya mpakwa mafuta wake.” Ndivyo, wote wawili Herode na Pontio Pilato pamoja na watu wa mataifa pamoja na vikundi vya watu wa Israeli kwa hakika walikusanyika pamoja katika mji huu dhidi ya mtumishi mtakatifu wako Yesu, ambaye wewe ulipaka mafuta.’”

Utimizo Mkubwa wa Zaburi 2

 8. (a) Ni wakati gani Zaburi 2:1, 2 ilipotimizwa mara ya kwanza? (b) Utimizo mkubwa wa Zaburi 2 umekuwa ukitukia tangu lini?

⁸ Mwaka wa 33 wa karne ya kwanza uliona utimizo wa kwanza wa maneno hayo ya kiunabii ya Zaburi 2:1, 2. Hiyo ilikuwa ni kuhusiana na yule mwanadamu Yesu Kristo hapa duniani. Yeye alikuwa amepakwa mafuta kwa roho takatifu ya Yehova wakati alipobatizwa na Yohana Mbatizaji. Lakini ule utimizo mkubwa zaidi wa Zaburi 2 umekuwa ukitukia tangu mwisho wa yale Majira ya Mataifa mwaka wa 1914. (Luka 21:24, NW) Imekwisha kuthibitishwa vya kutosha kwamba zile “nyakati zilizowekwa za mataifa,” ambazo zilianza wakati wa kuharibiwa kwa mara ya kwanza kwa mji wa Yerusalemu 607 K.W.K., zilikwisha mwaka wa 1914.a Wakati huo onyo juu ya kifo lilianza kutolewa kwa mataifa ya ulimwengu huu, kutia yale ya Jumuiya ya Wakristo.

 9. Ni jambo gani lililotukia wakati wa kuharibiwa Yerusalemu kwa mara ya kwanza kuhusiana na Ufalme wa Mungu kama ulivyowakilishwa na ukoo wa kifalme wa Mfalme Daudi?

⁹ Wakati wa kuharibiwa kwa Yerusalemu, na Wababuloni, ule Ufalme wa Yehova Mungu juu ya taifa la Israeli, kama ulivyowakilishwa na ukoo wa kifalme wa Mfalme Daudi ulikoma. Tangu hapo, Wayahudi wa asili hawajawa na mfalme akitawala juu yao katika ukoo wa kifalme wa nyumba ya Daudi. Lakini ule Ufalme wa Mungu Aliye Juu Zaidi ukiwa mikononi mwa mzao wa Daudi, ambaye Yehova alifanya agano la Ufalme wa milele katika ukoo wake, haungeendelea kukanyagwa milele duniani.

10, 11. (a) Mungu alisema nini kupitia nabii wake Ezekieli kuhusiana na kiti cha ufalme cha Daudi? (b) Ni nani aliyekuja akiwa na “haki” ya kiti cha ufalme cha Daudi? (c) Umati wa Wayahudi ulisema nini alipojitoa mwenyewe akiwa yule mrithi halali?

¹⁰ Yehova alimfanya nabii wake Ezekieli aelekeze maneno haya kwa mfalme wa Yerusalemu wa kale, kabla tu ya kuangamizwa mara ya kwanza: “Na wewe, Ewe mtu mwovu, uliyetiwa jeraha kiasi cha kukuua, mkuu wa Israeli, ambaye siku yako imekuja, katika wakati wa uovu wa mwisho; Bwana [Yehova] asema hivi; Kiondoe kilemba, ivue taji; haya hayatakuwa tena kama yalivyo; kikweze kilicho chini, kakishushe kilichoinuka. Nitakipindua, nitakipindua, nitakipindua; hiki nacho hakitakuwa tena, hata atakapokuja yeye ambaye ni haki yake; nami nitampa.”—Ezekieli 21:25-27.

¹¹ Yeye ambaye “ni haki yake” alikuja akiwa ndiye mtu Yesu Kristo, na mstari wake wa ukoo kutokana na Daudi umeandikwa kwenye Mathayo 1:1-16 na Luka 3:23-31. Yeye alitajwa na watu wengi kama “Mwana wa Daudi.” Katika ile siku alipokwenda Yerusalemu kwa shangwe, akiwa amempanda punda katika kutimiza unabii, ule umati wa Wayahudi wenye kushangilia ulioandamana naye na mitume wake ulipaza sauti kwa furaha hivi: “Hosana, Mwana wa Daudi; ndiye mbarikiwa, yeye ajaye kwa jina la [Yehova]; Hosana juu mbinguni.”—Mathayo 21:9

“Mwana wa Daudi” Atawazwa Mbinguni

12. Yesu Kristo, akiwa mrithi wa kudumu wa Daudi, alitawazwa wapi, Majira ya Mataifa yalipokwisha?

¹² Miaka 2,520 ya Mataifa kukanyaga chini ya miguu yao Ufalme wa Mungu ukiwa mikononi mwa nyumba ya Daudi ilimalizika 1914. Ndipo ulipofika wakati wa Yesu Kristo, “Mwana wa Daudi,” kutawazwa, si hapa chini kwenye kiti cha ufalme cha kidunia, bali ni katika mbingu zilizo juu zaidi kwenye mkono wa kuume wa Yehova Mungu!—Danieli 7:9, 10, 13, 14.

13. (a) Ni tangu tarehe gani ilipoelekezwa mbele kwamba Majira ya Mataifa yangekwisha mwaka wa 1914, na ni nani walioelekeza hivyo? (b) Ni nini uliokuwa mwelekeo wa mataifa ya dunia kuhusu “Mwana wa Daudi” aliyekuwa ametawazwa?

¹³ Wale waliokuja kushirikiana na Sosaiti ya Mnara wa Mlinzi walikuwa wameelekeza mbele kwenye tarehe hiyo yenye maana kubwa tangu 1876. Lakini mataifa ya dunia, hata yale ya Jumuiya ya Wakristo, yalikataa kutambua kwamba huo ndio uliokuwa wakati wao wa kutoa enzi zao za kidunia kwa yule “Mwana wa Daudi” aliyekuwa ametawazwa karibuni. Wao walikataa kukubali kwamba yeye alikuwa na haki aliyopewa na Mungu ya kuwa na enzi kuu juu ya dunia yote, ambayo ni kiti cha kuwekea miguu cha Yehova Mungu. (Mathayo 5:35) Walionyesha wazi kumkataa huyo aliyekuwa na haki ya kuwa Mfalme kwa kupigana katika vita ya ulimwengu ya kwanza.

14. (a) Ilipotokea Vita ya Ulimwengu ya Kwanza, mataifa yalionyesha mwelekeo gani juu ya wale Wakristo walioshirikiana na Sosaiti ya Mnara wa Mlinzi? (b) Kwa sababu hiyo, hali ya ulimwenguni pote inaonyesha nini?

¹⁴ Katika mataifa yote yenye kupigana, Wakristo walio wakfu walioshirikiana na Sosaiti ya Mnara wa Mlinzi walikuja chini ya mkazo mkubwa waache azimio lao la kuendelea bila hatia ya damu. Wakati huo hawakufahamu kabisa kabisa lile takwa la kutokuwamo kwa Kikristo. Ule unabii wa “Mwana wa Daudi,” Yesu Kristo, kwa wanafunzi wake kuhusu “umalizio wa mfumo wa mambo” ulitimia kwa maumivu makali: “Nanyi mtakuwa vitu vya kuchukiwa na mataifa yote kwa ajili ya jina langu.” (Mathayo 24:9, NW) Chuki hiyo haijapungua tangu mwisho wa Vita ya Ulimwengu ya Kwanza. Kwa sababu ya mambo hayo ya uhakika yenye maana ya historia ya kisasa, hali ya ulimwenguni pote inaonyesha nini? Hili: Kwamba yule “Mwana-Mfalme wa Amani” anatawala katikati ya maadui waliopo papa hapa duniani!

15. Shetani Ibilisi na majeshi yake ya kishetani yalipatwa na nini vita ilipotokea mbinguni, na ni kufikia mwaka gani lazima matokeo hayo yawe yalikamilika?

¹⁵ Ijapokuwa maadui wote waliokuwapo mbinguni na duniani, Mungu Mwenye Nguvu Zote aliufanya uzaliwe Ufalme wa Kimasihi ulioahidiwa katika wakati wake uliowekwa. Ufunuo 12:1-9 unaonyesha kwamba baada ya Ufalme ulio kama “mtoto mwanamume” kuzaliwa katika mbingu kutoka tumbo la uzazi la tengenezo la Yehova lililo kama mke, vita ilitokea mara hiyo katika mbingu yenyewe. Mbingu takatifu hazikuwa tena mahali pa yule joka wa mfano, Shetani Ibilisi, na malaika zake wa kishetani. Katika vita hiyo, isiyoonwa na macho ya kibinadamu, yule “Mwana wa Daudi” wa kifalme aliyepewa uwezo alipiga vita akashinda, akamwondoa Shetani Ibilisi na majeshi yake ya kishetani kutoka mbingu na kuwazuia kwenye ujirani wa kidunia. Ushuhuda unaonyesha kwamba kufikia 1918 ule mwaka ambao Vita ya Ulimwengu ya Kwanza ilifikia ukomo wayo, kushushwa cheo huko kwa majeshi ya kishetani kulikuwa kumetimizwa kabisa-kabisa.

Ibilisi Aliyeshushwa Cheo, Apiga Vita

16, 17. (a) Shetani Ibilisi aliyeshushwa cheo anapiga vita dhidi ya nani? (b) Yeye anatumia nani kupiga vita hii?

¹⁶ Shetani Ibilisi aliyeshushwa cheo, yule joka wa mfano, sana sana sasa ana ghadhabu nyingi juu ya tengenezo la Yehova Mungu lililo kama mke. (Ufunuo 12:17) Hivyo yeye anapiga vita kwa ukatili sana juu ya mabaki ya Wakristo walio wakfu waliozaliwa kwa roho ambao wana ushuhuda wa kuwa yeye ni mama yao wa kiroho.—Wagalatia 4:26.

¹⁷ Vilevile Shetani anapiga vita juu ya wale “kondoo wengine,” ambao kwa utii wanafanya kazi pamoja na mabaki ya wapakwa mafuta katika kutoa ushuhuda juu ya kuzaliwa kwa Ufalme. (Yohana 10:16) Si kwamba tu yeye anatumia majeshi ya kishetani yaliyoshushwa cheo, ambao sasa wapo kwenye ujirani wa dunia, bali pia anatumia ile sehemu ionekanayo ya tengenezo lake ili kupiga vita hii dhidi ya mabaki na wale “kondoo wengine.”

18. (a) Ijapokuwa Ibilisi anapiga vita kwa ukatili dhidi ya mabaki wapakwa mafuta na wenzi wao, wao wana jeshi gani la ulinzi? (b) Ni sehemu gani ya utawala wa “Mwana-Mfalme wa Amani” inayokaribia mwisho wayo?

¹⁸ Ule utawala wa yule “Mwana-Mfalme wa Amani” katikati ya maadui wake hapa duniani unakaribia kikomo chao. Yeye ameishughulikia hali hiyo vizuri sana. Mchana na usiku malaika zake watakatifu wenye ushikamanifu wamesimama wakiwa chonjo kabisa, tayari kupokea maagizo ya kifalme kutoka kwake na kuchukua hatua kwa haraka sana. Wao wanatumika wakiwa jeshi la ulinzi kwa mabaki ya wapakwa mafuta na wenzi wao, ule “mkutano mkubwa” wa “kondoo wengine,” wanapoendelea kutumikia faida za Ufalme katika wakati huu unaopunguka haraka sana “Mwana-Mfalme wa Amani” anapotawala katikati ya maadui wake.—Ufunuo 7:9.

[Maelezo ya Chini]