“Watalazimika Kujua Kwamba Mimi Ni Yehova”

“Mimi sitaacha zaidi ya hapo jina langu takatifu litiwe uchafu; na mataifa watalazimika kujua kwamba mimi ndimi Yehova.”​—Ezekieli 39:7, NW.

 1, 2. Sisi tunajua jinsi gani kwamba Yehova hatavumilia bila kikomo kutiwa uchafu kwa jina lake takatifu?

JINA takatifu la Yehova lilitiwa uchafu na Waisraeli wa kale. Jambo hilo linaonyeshwa wazi na kitabu cha Ezekieli. Lakini watu wa Jumuiya ya Wakristo pia wanalitia uchafu jina la Mungu ambaye wao wanadai kumwabudu.

² Je! yule Mwenye Enzi Kuu wa Ulimwengu Wote Mzima atavumilia bila kikomo kuchafuliwa kwa jina lake? Hapana, kwa maana yeye amefanya itangazwe hivi: “Mimi sitaacha zaidi ya hapo jina langu takatifu litiwe uchafu; na mataifa watalazimika kujua kwamba mimi ndimi Yehova.” (Ezekieli 39:7; ona pia Ezekieli 38:23, NW.) Hiyo itamaanisha nini? Na ni masomo gani ambayo tunaweza kujifunza kutokana na sura za baadaye katika kitabu cha Ezekieli?

Manabii Yaliyo Dhidi ya Wengine

 3. (a) Mataifa mengine yalitenda jinsi gani kuhusu kuteseka kwa Yuda? (b) “Mfalme” wa Tiro aliondolewa kwa sababu ya roho gani, na jambo hilo linapasa kutuathiri sisi jinsi gani?

³ Baada ya uharibifu wa Yerusalemu, Amoni ilishutumiwa kwa sababu ya kuona raha juu ya mteseko wa Yuda, na Moabu kwa sababu ya kuchagua mwelekeo wa kudharau Yuda. Edomu ilionwa ikiwa na hatia ya chuki ya kindani, na ile roho ya kulipa kisasi ya Wafilisti ingeleta “makaripio yenye kiruu” cha Mungu. (Ezekieli 25:1-17, NW; Mithali 24:17, 18) Kwa sababu ya kuchachawa kuhusu afa la Yerusalemu, jiji la Tiro lingeanguka mbele ya Nebukadneza, au Nebukadreza (ambao ndio mwendelezo wa jina hilo unaokaribiana na ule wa Kibabuloni). (Ezekieli 26:1-21) Mji huo ulikuwa kama meli ambayo ingezama pasipo shaka. (Ezekieli 27:1-36) “Mfalme” wa Tiro (ambaye inaonekana ni ukoo wa watawala wa mji huo) aliondolewa kwa sababu ya kuwa na roho ya kiburi kama ile ya Shetani. (Ezekieli 28:1-26) Basi, kwa uhakika sisi tunapaswa kuepuka utakabari wenye dhambi ambao huenda ukasababisha tulitie uchafu jina la Yehova.​—Zaburi 138:6; Mithali 21:4.

 4. Ni jambo gani lililokuwa akibani kwa ajili ya Farao na Misri?

⁴ Ezekieli alitabiri ukiwa wa Misri wa miaka 40. Utajiri wayo ungekuwa malipo ya Nebukadreza kwa ajili ya utumishi wa kijeshi uliotolewa katika kufikiliza hukumu ya Yehova juu ya Tiro. (Ezekieli 29:1-21) Wakati ambapo Mungu angehakikisha kwamba Wamisri wametawanywa, ‘wao wangejua kwamba yeye ni Yehova.’ (Ezekieli 30:1-26) Akiwakilisha Misri, Farao mwenye kiburi alifananishwa na mwerezi ulioinuka sana ambao ungekatwa uangushwe. (Ezekieli 31:1-18) Hatimaye, Ezekieli alitokeza nyimbo za maombolezo juu ya Farao na kushuka kwa Misri ndani ya Sheoli.​—Ezekieli 32:1-32.

Wajibu wa Mlinzi

 5. (a) Ni chini ya mastakimu gani tu Mungu anakubali mlinzi wa kiroho? (b) Inamaanisha nini kutembea ‘katika sheria za uzima’?

⁵ Ezekieli alikumbushwa juu ya wajibu wake akiwa mlinzi. (Ezekieli 33:1-7.) Bila shaka, Mungu anakubali mlinzi wa kiroho ikiwa tu huyo anafanya wajibu wake na kuonya waovu. (Soma Ezekieli 33:8, 9.) Basi, jamii ya “mlinzi” aliyepakwa mafuta inatangaza maonyo ya kimungu kwa ujasiri kama Ezekieli. Kwa kuwa Mungu hapendezwi hata kidogo na kifo cha waovu, yeye hatawahesabia matendo yao ya zamani ikiwa wao wanatii maonyo na kutembea katika ‘sheria za uzima.’ Katika siku ya Ezekieli, kutembea katika sheria hizo kulimaanisha kushika ile Sheria, lakini sasa kunamaanisha kukubali ukombozi wa Kristo na kuwa mfuasi wake. (1 Petro 2:21) Hakuna jambo la kombokombo katika njia ambayo Mungu huadhibu au huthawabisha watu, na kuhifadhiwa kupita ile “dhiki kubwa” kunategemea kufuata sheria zake.​—Ezekieli 33:10-20; Mathayo 24:21.

 6. Leo, ni jinsi gani watu wengi walivyo kama wale wahamishwa wa Kiyahudi wa wakati wa Ezekieli?

⁶ Karibu na mwisho wa 607 K.W.K., mtoro mmoja aliripoti juu ya uharibifu wa Yerusalemu, na Ezekieli akanena tena ujumbe wa Yehova. (Ezekieli 33:21-29) Wahamishwa walitenda jinsi gani? (Soma Ezekieli 33:30-33.) Leo, watu wengi wako kama wale wahamishwa wa Kiyahudi ambao kwao Ezekieli alikuwa mwimbaji wa “wimbo mzuri sana” (‘wimbo wenye kunyegeresha wa mapenzi,’ NW). Wakati wapakwa-mafuta na washirika wao wanapozuru nyumba kwa nyumba, watu hawa wanafurahia mvumo wa ule ujumbe wa Ufalme lakini hawaupokei kwa shauku. Kwao, huo ni kama wimbo mzuri wa mapenzi, lakini wao hawafanyi wakfu kwa Yehova, nao hawataokoka ile “dhiki kubwa.”

“Mchungaji Mmoja” wa Yehova

 7. Ni vitendo gani vyenye kufanywa na Yehova katika wakati wetu ambavyo vinalinganika na shughuli zake pamoja na kondoo zake katika siku ya Ezekieli?

⁷ Katika ujumbe mmoja kwa Ezekieli baada ya anguko la Yerusalemu, Yehova aliwashutumu wenye kutia uchafu katika jina lake takatifu, wale “wachungaji wa Israeli” katika mambo ya kiserikali. Maneno hayo yanawafaa kama nini watawala wa Jumuiya ya Wakristo! (Soma Ezekieli 34:1-6.) Wakiwa tofauti na yule Mchungaji Mwema, Yesu Kristo, watawala wa kisiasa wa Jumuiya ya Wakristo wanajinenepesha kimwili kutokana na “kondoo.” (Yohana 10:9-15) Lakini kama vile Mungu alivyokomboa kondoo zake kwa kuvua utawala kutoka kwa wachungaji wabinafsi wakati Yuda ilipoachwa ukiwa, ndivyo tena atakavyokomboa kondoo zake kwa kunyang’anya watawala wa Jumuiya ya Wakristo mamlaka yao wakati wa ile “dhiki kubwa.” (Ufunuo 16:14-16; 19:11-21) Yehova alionyesha upendo kwa watu wake wenye mfano wa kondoo alipowakomboa kutoka Babuloni katika 537 K.W.K., kama vile alivyoonyesha sifa hiyo alipotumia Sairasi Mkubwa Zaidi, Yesu Kristo, kuwaweka huru mabaki waliopakwa mafuta wa Israeli wa kiroho kutoka kwenye utumwa wa Babuloni Mkuu katika 1919 W.K.​—Ezekieli 34:7-14.

 8. Yehova angefanya nini kama ‘kondoo mnono’ angeonea kundi la kondoo, na ni lazima wachungaji wadogo wa Kikristo watendee kondoo jinsi gani?

⁸ Mungu anawapa kondoo zake utunzaji mwororo. (Soma Ezekieli 34:15,16.) Kama ‘kondoo mnono’ angeonea kundi la kondoo la Mungu leo, Yehova ‘angemlisha’ kwa kumtenga na ushirika sasa na kumwangamiza kabisa katika ile “dhiki kubwa.” Katika 1914 Yehova aliweka juu ya mabaki waliopakwa mafuta “mchungaji mmoja,” Yesu Kristo. Tangu 1935 yeye ameelekeza ukusanyaji wa “mkutano mkubwa” wa “kondoo wengine,” ambao sasa wanatumikia pamoja na ‘kondoo za malisho ya Yehova’ waliopakwa mafuta. Ni lazima wachungaji wadogo wa Kikristo watendee kondoo hao wote kwa wororo kama vile Mungu na Kristo wanavyowatendea.​—Ezekieli 34:17-31; Ufunuo 7:9; Yohana 10:16; Zaburi 23:1-4; Matendo 20:28-30.

‘Bustani ya Edeni’!

 9. Kwa kuwa Yehova alikuwa amepiga moyo konde kwamba bara la Yuda na Israeli lilipaswa kushika sabato moja, yeye alifanya nini?

⁹ Fikiria tena lile bara lililofanywa ukiwa la Yuda na Israeli. Kwa kuwa Mungu alikuwa amepiga moyo konde kwamba lingepaswa kushika sabato kwa kubaki bila kukaliwa kwa miaka 70, yeye alichukua hatua kuzuia Edomu na mataifa mengine yasikae katika eneo hilo. (2 Nyakati 36:19-21; Danieli 9:2) Kwa uhakika, Edomu na jimbo layo la Seiri lenye milima-milima ilifanywa ukiwa pia, kama ilivyotabiriwa, ikatiishwa na Wababuloni katika 602-601 K.W.K.​—Ezekieli 35:1–36:5; Yeremia 25:15-26.

10. Kurudishwa Yuda kwa mabaki katika 537 K.W.K. kulielekeza kwenye matukio gani katika siku yetu?

¹⁰ Kurudishwa Yuda kwa mabaki katika 537 K.W.K. kulielekeza kwenye matukio yenye kusisimua katika siku yetu. Katika 1919 “milima ya Israeli,” au makao ya kiroho ya mashahidi wa Yehova waliopakwa mafuta, ilianza kujazwa tena watu kwa idadi ya mabaki waliohuishwa kiroho. (Ezekieli 36:6-15) Mungu alisafishiliza kukosa kwao usafi wa kidini na akaingiza ndani yao “roho mpya” ikiwawezesha kuzaa tunda la roho takatifu yake. (Wagalatia 5:22, 23) Na ili jina la Yehova lisitiwe uchafu na walimwengu kwa sababu ya yeye kuwa amewatia nidhamu watu wake, yeye amebariki mabaki kwa wingi​—Ezekieli 36:16-32.

11. Kupatana na Ezekieli 36:33-36, Mungu amefanya nini na makao ya kiroho ya mabaki waliopakwa mafuta?

¹¹ Baada ya mabaki kurudi Yuda, bara hilo lililofanywa ukiwa liligeuzwa likawa ‘bustani ya Edeni’ yenye kuzaa matunda. (Soma Ezekieli 36:33-36.) Vivyo hivyo, tangu 1919 Yehova amegeuza makao yaliyokuwa ukiwa ya mabaki waliopakwa mafuta yakawa paradiso ya kiroho yenye kujaa matunda, ambayo sasa inashirikiwa na “mkutano mkubwa.” Kwa kuwa hiyo paradiso ya kiroho imejazwa watu watakatifu, acheni kila Mkristo aliyejiweka wakfu ajitahidi kuiweka ikiwa safi.​—Ezekieli 36:37, 38.

Muungamano Warudishwa

12. Kutiliwa nguvu mpya za uhai kwa taifa la kale la Kiyahudi kulifanyiwaje kielezi kwenye Ezekieli 37:1-4, na jambo hilo lina ulinganifu gani wa ki-siku-hizi?

¹² Katika utekwa wa Kibabuloni, Wayahudi walikaribia kuwa taifa lililokufa, mifupa tu katika uwanja. (Ezekieli 37:1-4) Lakini Ezekieli aliona nini halafu? (Soma Ezekieli 37:5-10.) Mifupa hiyo ilivikwa mishipa (kano, NW), mnofu, na ngozi, nayo ikatendeshwa upya kwa kutiwa pumzi ya uhai. (Ezekieli 37:11-14) Mungu alifufua taifa la Kiyahudi watu 42,360 wa makabila yote ya Israeli na watu kama 7,500 wasio Waisraeli waliposhika fursa yao kujaza watu tena katika Yuda, kujenga upya Yerusalemu na hekalu lao, na kurudisha ibada ya kweli katika bara la maskani yao. (Ezra 1:1-4; 2:64, 65) Vivyo hivyo, katika 1918 mabaki wanyanyaswa wa Israeli wa kiroho walikuja kuwa kama ile mifupa mikavu​—wakauawa kuhusu kazi yao ya kutoa ushuhuda peupe. Lakini katika 1919 Yehova aliwahuisha kuwa watangazaji wa Ufalme. (Ufunuo 11:7-12) Ulinganifu huo unapasa kuimarisha uhakika wetu kwamba wapakwa-mafuta hawa na washirika wao ndio wanajumlika kuwa tengenezo la kidunia ambalo Yehova anatumia leo.​—Ona 1975 Yearbook of Jehovah’s Witnesses, kurasa 87-125.

13. Kurudishwa kwa muungamano wa kitengenezo miongoni mwa watu wa kale wa Mungu kulifanyiwaje kielezi kwenye Ezekieli 37:15-20, na kulikuwa na ulinganifu gani wa jambo hilo?

¹³ Kurudishwa kwa muungamano wa kitengenezo miongoni mwa watu wa kale wa Yehova kulifanyiwaje kielezi? (Soma Ezekieli 37:15-20.) Kuna ulinganifu wa ki-siku-hizi wa kuunganisha vile vijiti viwili (kimoja kilichotiwa alama kwa ajili ya ule ufalme wa Yuda wa makabila mawili, na kile kingine kwa ajili ya Israeli wenye makabila kumi). Wakati wa Vita ya Ulimwengu 1, wanaume wenye kutaka makuu walijaribu kuvunja-vunja muungamano wa watumishi wa Mungu, lakini katika 1919 wapakwa-mafuta walio waaminifu waliungamanishwa chini ya Kristo, “mfalme mmoja” na “mchungaji mmoja” wao. Waaidha, kama wale watu zaidi ya 7,500 wasio Waisraeli ambao walirudi Yuda, sasa wale wa “mkutano mkubwa” wameungamana pamoja na mabaki waliopakwa mafuta. Ni shangwe kama nini kuwa katika paradiso ya kiroho, kutumikia Yehova katika muungamano chini ya “mfalme mmoja” wetu!—Ezekieli 37:21-28.

Gogu Ashambulia!

14. Gogu wa Magogu ni nani, na yeye atafanya kitendo gani? (Ezekieli 38:1-17)

¹⁴ Ndipo, tukio la kutazamisha likatabiriwa. Akitumainia kutia uchafu katika jina la Mungu na kuharibu watu Wake, Gogu wa Magogu atashambulia mabaki ya Israeli wa kiroho, ambao wanawakilisha “mwanamke” wa Mungu, au tengenezo la kimbingu. (Ufunuo 12:1-17) Gogu ndiye “mtawala wa ulimwengu huu,” Shetani Ibilisi. Yeye alipokea jina hilo Gogu baada ya kutupwa kwake kutoka mbinguni, kufuatia kuzaliwa kwa Ufalme katika 1914. (Yohana 12:31) “Nchi ya Magogu” ni mahali ambapo Gogu na roho wake wabaya wanazuiliwa katika ujirani wa dunia. Baada ya kani zenye kupinga dini kuharibu Jumuiya ya Wakristo na sehemu ile nyingine yote ya Babuloni Mkuu, Yehova ataleta Gogu dhidi ya mabaki wa Israeli wa kiroho na washirika wao waliojiweka wakfu ambao inaonekana ni kama hawana ulinzi.​—Ezekieli 38:1-17; Ufunuo 17:12-14.

15. Ni jambo gani ambalo litatukia wakati Gogu ashambuliapo Mashahidi wa Yehova?

¹⁵ Ni jambo gani litatukia wakati Gogu atakaposhambulia Mashahidi wa Yehova? (Soma Ezekieli 38:18-23.) Yehova ataponyosha watu wake! Silaha zake zitakuwa mvua zenye kububujisha mafuriko kutoka mawinguni, mawe-barafu makubwa sana, moto wenye kufyatuka-fyatuka kama umeme, ugonjwa wa kipuku wenye kusambaa kweli kweli. Zikiwa katika mvurugo, kani za Gogu zitageuziana panga zao dhidi ya mmoja na mwenzake. Lakini kabla ya Mungu kuwafutilia mbali watokomee, wao watalazimishwa ‘kujua ya kuwa yeye ndiye Yehova.’

16. (a) Ni jambo gani ambalo litatukia kwa “nchi ya Magogu”? (b) Sisi tunapaswa kuathiriwa jinsi gani na maarifa ya kujua matukio yaliyotahiriwa kuhusu Gogu?

¹⁶ Wakati ambapo Shetani na roho wake wabaya watatiwa katika lile shimo lisilo na kikomo, “nchi ya Magogu,” mahali pao pa kushushwa duniani, patatoweka milele. (Ufunuo 20:1-3) Vifaa vya vita vya Gogu vitakuwa vimeenea sana hivi kwamba itachukua wakati fulani kuviondolea mbali. Ndege na wanyama watajivimbisha kwa kula miili isiyozikwa ya kutano la Gogu. Maarifa ya kujua hivyo yanapasa yatuathiri sisi jinsi gani? Naam, kujua kwamba shambulio la Gogu liko karibu sana lakini kwamba Yehova ataponyosha watu Wake kunapasa kuongezee imani yetu na kutufanya tushangilie kwamba matukio hayo yatatokeza kutakaswa kwa jina la Mungu ambalo limetiwa uchafu kwa muda mrefu!—Ezekieli 39:1-29.

Tazama Patakatifu pa Yehova!

17. (a) Ni njozi gani ambayo Ezekieli alipewa katika 593 K.W.K.? (h) Kuwako kwa lile hekalu la kinjozi ni uthibitisho wa nini?

¹⁷ Katika 593 K.W.K. ule mwaka wa 14 baada ya uharibifu wa hekalu katika Yerusalemu, Ezekieli alipewa njozi ya patakatifu papya kwa ajili ya ibada ya Yehova. Kwa kupimwa na yule malaika mwenye kumpa mwongozo mnabii huyo, palikuwa na vipimo vikubwa sana. (Ezekieli 40:1–48:35) Hekalu hilo lilifananisha “lile hema la kweli, ambalo Yehova alisimamisha,” na lilikuwa na vile “viwakilishi vya ufananishi vya vitu vilivyo katika mbingu.” Yesu Kristo aliingia Patakatifu Zaidi Sana pa hekalu hilo, “mbinguni kwenyewe,” katika 33 W.K. ili ampe Mungu ustahili wa dhabihu yake ya ukombozi. (Waebrania 8:2; 9:23, 24, NW) Lile hekalu la kinjozi linathibitisha kwamba ibada ya kweli itaokoka shambulio la Gogu. Hiyo ni faraja kama nini kwa wapendaji wa jina la Yehova!

18. Ni nini baadhi ya zile sehemu zilizoandikwa kuhusu lile hekalu la kinjozi?

¹⁸ Hekalu hilo lilikuwa na sehemu nyingi. Mathalani, kulikuwa na malango ya miingilio sita katika ukuta wa nje na wa ndani. (Ezekieli 40:6-35) Vyumba 30 vya kulia chakula (ambavyo inaelekea vilikuwapo kwa kusudi la watu kula dhabihu za ushirika) vilikuwa katika ua wa nje. (40:17) Madhabahu ya toleo la kuteketezwa ilikuwa katika ua wa ndani. (43:13-17) Madhabahu moja ya miti, ambayo inaonekana ilikuwa ya kuchomea uvumba, ilikuwa katika chumba cha kwanza cha hekalu. (41:21, 22) Patakatifu Zaidi Sana palikuwa pa dhiraa 20 za mraba, na ukuta uliozunguka lile hekalu ulikuwa mianzi 500 (meta 1,550) kila upande. Lo, ni nyumba kubwa kama nini yenye kujawa na utukufu wa Mungu!—Ezekieli 41:4; 42:16-20; 43:1-7

19. Sisi tunapaswa kuathiriwa jinsi gani na yale maelezo yenye kuhusu hata mambo madogo-madogo juu ya hekalu na uhakika wa kwamba wale wenye kuhudumu humo walipaswa kutimiza viwango vya Mungu?

¹⁹ Yale maelezo mengi kuhusu hata mambo madogo-madogo juu ya hekalu, dhabihu, matoleo, na sikukuu yanapasa kutukazia sisi uhitaji wa kufuata kwa uangalifu maagizo yanayotoka kwa tengenezo la Mungu, tuking’amua kwamba kila jitihada inapasa kufanywa kukweza Yehova na ibada yake. (Ezekieli 45:13-25; 46:12-20) Wale wanaohudumu kwenye hekalu hilo walipaswa kutimiza viwango vya juu vya Mungu, nao walipaswa kufundisha watu ‘tofauti kati ya mambo matakatifu na mambo yaliyotiwa uchafu.’ (Ezekieli 44:15, 16, 23, NW) Jambo hilo linapasa kutusukuma tudumishe utakatifu tukiwa watu wa Yehova.​—Waefeso 1:3, 4.

20. (a) Ni nini kinachofananishwa na yale maji yaliyotiririka kutoka kwenye hekalu la kinjozi? (b) Maji hayo ya ufananisho yatakuwa na tokeo gani?

²⁰ Kutoka kwenye hekalu kilitiririka kijito ambacho kiliyaponya, kikayatia utamu, yale maji yenye chumvi ya Bahari ya Chumvi, hata yakaja kumiminika samaki. (Ezekieli 47:1-11) Maji hayo yanafananisha uandalizi wa Mungu kwa ajili ya uhai wa milele, kutia na dhabihu ya Yesu, ambao ni mwingi sana kuwatosha waokokaji wa shambulio la Gogu na wengine, kutia na wale watakaofufuliwa. (Yohana 5:28, 29; 1 Yohana 2:2; Ufunuo 22:1, 2) Ile Bahari ya Chumvi inawakilisha mazingira ambamo aina ya wanadamu imekuwamo​—kushutumiwa kwenye dhambi ya urithi na kifo na pia utawala wa Shetani. Wakiwa kama wale samaki tele katika maji yaliyotiwa utamu ya Bahari ya Chumvi, aina ya wanadamu waliokombolewa itasitawi sana chini ya mastakimu zilizoponywa za utawala wa Kimesiya.

21. Ezekieli 47:12 inaonyesha kwamba aina ya binadamu watiifu itafurahia nini katika ulimwengu mpya?

²¹ Maponyo yanashirikishwa pia na miti inayokua kandokando ya kile kijito cha kinjozi. (Soma Ezekieli 47:12.) Katika ulimwengu mpya, aina ya wanadamu watiifu itafurahia afya kamilifu ya kimwili na kiroho. Na mbona isifurahie? Majani ya ile mitunda iliyoonwa katika njozi yana vitu vya kuponyesha daima. Lo, zitakuwa baraka zilizoje kwa wale wanaojua na kutumikia Yehova!

Ndipo Wao Watajua!

22. Ni nini kinachoonyesha kwamba Mungu ataweka watu mahali-mahali ambapo yeye atachagua katika Paradiso?

²² Kwa kufanya ushirikiano pamoja na tengenezo la Yehova sasa, sisi tunaweza kusitawisha sifa ambazo zitafanya sisi tuonyeshe ushirikiano wakati Mungu atakapoweka watu wake mahali-mahali ambapo yeye atachagua katika Paradiso ya kidunia. Kwamba litakuwako jambo hilo la kuweka watu mahali-mahali inadokezwa na uhakika wa kwamba migawo ya kikabila ilifanywa kaskazini na kusini mwa ukanda wa shughuli za usimamizi ambao Ezekieli aliona katika njozi. “Matoleo” hayo ya bara yaliyo na sehemu tatu yalitia ndani kisehemu fulani cha Walawi wale wasio wa kikuhani na kijisehemu kimoja chenye lile hekalu la kinjozi. Katika kitovu cha kile kisehemu cha kusini lilikuwamo jiji lenye kani ya wafanya kazi kutoka mataifa yote wakiwa chini ya “mkuu” wa ujumla, ambao ni wawakilishi walio wana-wafalme wa Mesiya katika ile “dunia mpya.”​—Ezekieli 47:13–48:34; 2 Petro 3:13; Zaburi 45:16.

23. Ili tuwe sehemu ya aina ya binadamu waliokombolewa wenye kuishi katika Paradiso, ni lazima sisi tufanye nini sasa?

²³ Akiwa amekalia kiti cha ufalme katika patakatifu pake pa kimbingu, Mungu atabariki jiji hilo la ufananisho lililoonwa na Ezekieli. (Soma Ezekieli 48:35, NW.) Kiti cha kidunia cha shughuli za usimamizi kitaitwa Yehova-Shama, au “Yehova Mwenyewe Yupo Hapa.” Endelea kuonyesha Mungu upendo usioisha, nawe unaweza kuwa sehemu ya aina ya binadamu waliokombolewa watakaokuwa wakiishi katika Paradiso, wakati ambapo hakuna mtu duniani atakuwa katika giza la kiroho bali wote watajua kwamba Yehova ndiye yule Mungu mmoja aliye hai na wa kweli. (Habakuki 2:14) Epuka kulazimishwa kulikubali jina la Mungu dhidi ya mapenzi yako mwenyewe wakati waovu wataharibiwa. Jizoeze imani, ukionyesha kwamba wewe unatumainia kuwa miongoni mwa waokokaji wakati yeye anapotimiza maneno haya: “Mataifa watalazimika kujua kwamba mimi ndimi Yehova.”​—Ezekieli 36:23, NW.

Wewe Ungesema Nini?

◻ Ni chini ya mastakimu gani tu Yehova anakubali mlinzi wa kiroho?

◻ Yehova anatendea jinsi gani kondoo zake, na wachungaji wa Kikristo wanapaswa kushughulikaje nao?

◻ Kutiliwa nguvu mpya za uhai kwa taifa la Israeli kulifanyiwaje kielezi? (Ezekieli 37:1-14) Ni nini ulinganifu wa ki-siku-hizi wa jambo hilo?

◻ Gogu wa Magogu ni nani, na ni jambo gani ambalo litatukia wakati yeye ashambuliapo Mashahidi wa Yehova?

◻ Ni nini kinachofananishwa na yale maji yenye kutiririka kutoka kwenye hekalu la kinjozi?

[Ramani/Picha katika ukurasa wa 25]

(Ona mpangilio kamili katika nakala iliyochapishwa)

Yale matoleo matakatifu na migawo ya kikabila

BAHARI KUU

KUINGIA HAMATHI

DANI

ASHERI

NAPHTALI

MANASE

EPHRAIMU

REUBENI

YUDA

MKUU

Mchango Takatifu

En-Eglaimu

BENJAMINI

SIMEONI

Engedi

ISSAKARI

ZEBULUNI

TamarI

GADI

Meribath-Kadeshi

Bahari ya Chumvi

Mto Yordani

Bahari ya Galilaya

[Picha katika ukurasa wa 23]

Yehova huwapa kondoo zake utunzaji mwororo, kama walivyofanya wachungaji wa kale. Kwa hiyo wachungaji wa Kikristo wanapaswa kutendea kundi la kondoo za Mungu kwa wororo