Fanyia Jina la Yehova Tangazo la Peupe

“Sikuzote na tumtolee Mungu dhabihu ya sifa, yaani, tunda la midomo ambayo hulifanyia jina lake tangazo la peupe.”—WAEBRANIA 13:15, New World Translation.

1. Nabii Hosea aliwahimiza Waisraeli wenzake wafanye nini?

NABII wa Yehova Hosea alikuwa na ujumbe muhimu kwa Waisraeli wenzake. Katika karne ya nane kabla ya Wakati wa Kawaida, aliwahimiza wenzake waliopotoka watubu. Yeye alihimiza hivi: “Chukueni maneno pamoja nanyi, mkamrudie BWANA; mkamwambie, Ondoa maovu yote, uyatakabali yaliyo mema; na hivyo ndivyo tutakavyotoa sadaka za midomo yetu kana kwamba ni ng’ombe, [“fahali wachanga,” NW].” (Hosea 14:2) Ukiwahimiza watu wamtolee Yehova ‘fahali wachanga wa midomo yao,’ unabii wa Hosea ulikuwa unawatia moyo Waisraeli watubu na kutoa dhabibu za sifa za unyoofu kwa Mungu.

2. Mtume Paulo aliwatia moyo Wakristo watoe dhabihu ya aina gani?

² Mashahidi wa Yehova hutoa ‘fahali wachanga wa midomo yao’ leo. Wao pia hutii himizo la mtume Paulo, aliyerejezea maneno ya unabii wa Hosea alipoandika: “Kupitia [Yesu Kristo] sikuzote na tumtolee Mungu dhabihu ya sifa, yaani, tunda la midomo ambayo hulifanyia jina lake tangazo la peupe.” (Waebrania 13:15, NW) Kwa njia hiyo, watumishi wa Mungu humsifu Yehova kwa shangwe, wakiwa katika utendaji wao wa kuhubiri juu ya Ufalme.—Mathayo 24:14.

3. Twaweza kumtoleaje Yehova “dhabihu ya sifa,” na ni utendaji wa nani tutakaochunguza sasa?

³ Kulifanyia jina la Yehova tangazo la peupe ni pendeleo lisilostahiliwa na wanadamu wasiokamilika. Tuna furaha kama nini kujulisha wengine juu ya Mungu wetu, kwa njia hiyo tukimtolea Yehova “dhabihu ya sifa,” ‘fahali wachanga wa midomo yetu’! Ili tupate kitia moyo katika kuhubiri peupe habari njema za Ufalme leo, ebu tuchunguze yasemwayo na Biblia juu ya manabii wa Mungu na watumishi wengine wa Yehova. Kutokana na mwendo wa maisha yao, twaweza kujifunza mengi yawezayo kutusaidia kufurahia utendaji wetu wa kuhubiri.—Warumi 15:4.

Fungu la Manabii

4, 5. (a) Katika lugha za awali za Biblia, ni nini maana ya msingi wa maneno yaliyotafsiriwa “nabii”? (b) Ni nini kionyeshacho kwamba manabii walikuwa na fungu la maana sana katika mpango wa Mungu?

⁴ Manabii wa Yehova walikuwa na pendeleo la kutangaza ujumbe wake peupe. Asili ya neno la Kiebrania la “nabii” (na·viʼʹ) haijulikani vizuri, lakini matumizi yalo katika Biblia yaonyesha kwamba manabii wa kweli walikuwa wasemaji wa Yehova, watu wa Mungu waliokuwa na jumbe zilizovuviwa. Neno la Kigiriki linalotafsiriwa “nabii” (pro·pheʹtes) lamaanisha kihalisi “msemaji wazi,” kusema jambo “mbele ya” mtu. Nabii ni mtu atangazaye jumbe zitokazo chanzo cha kimungu. Mara nyingi, ingawa si nyakati zote, manabii wa kweli wa Mungu walitabiri matukio ya wakati ujao.

⁵ Kuhusu fungu la maana la manabii katika mpango wa Mungu, Cyclopædia cha M’Clintock na Strong chasema: “Nyakati nyingine waliombwa mashauri . . . Lakini mara nyingi zaidi walijihisi kusukumwa kindani kutangazia watu bila kuombwa mashauri, nao hawakuogopa kusema kijasiri katika sehemu ambazo labda kuonekana kwao kulitokeza chuki na hofu.” (Buku 8, ukurasa 640) Ebu fikiria vielelezo fulani vilivyofanya manabii wachukue msimamo wenye ujasiri kama huo.

Hisia na Kichocheo

6, 7. Yehova alimfanya nabii wake Ezekieli ale nini, nalo likawa na matokeo gani kwake?

⁶ Kabla ya uharibifu wa Yerusalemu katika 607 K.W.K., Yehova alisema na watu wa Kiyahudi waliokuwa uhamishoni katika Babiloni kupitia nabii wake Ezekieli. Yehova alimwambia: “Mwanadamu, kula uonacho; kula gombo hili, kisha enenda ukaseme na wana wa Israeli.” Ezekieli alitii. Naye akasema: “Basi nikafunua kinywa changu, naye akanilisha lile gombo. Akaniambia, Mwanadamu, lisha tumbo lako, ulijaze tumbo lako kwa hili gombo nikupalo. Ndipo nikalila, nalo kinywani mwangu lilikuwa tamu, kama utamu wa asali.”—Ezekieli 3:1-3.

⁷ Miili yetu hupata lishe kutokana na chakula tulacho, na kwa maana fulani hiyo huwa sehemu za miili yetu. Kwa njia iyo hiyo, lile “gombo” lililoliwa na Ezekieli—ujumbe wa Yehova ambao nabii huyo alipaswa kutangaza—ungekuwa sehemu ya mwili wake, ukiwa na uvutano kwa hisia zake. Maneno ya Mungu yalichochea sana hisia za ndani za Ezekieli hivi kwamba alifurahia kuyatangaza peupe. Ukiwa Shahidi wa Yehova, je, wewe hufurahia kufanya tangazo la peupe la ujumbe wa Mungu?

8, 9. Ni nini kilichomchochea Amosi atoe unabii?

⁸ Fikiria pia nabii Amosi. Akiishi katika karne ya tisa K.W.K., yeye alikuwa miongoni mwa manabii wa kwanza wa Kiebrania kuandika kitabu cha Biblia chenye jina lake. Kama Ezekieli, Amosi alikuwa mtangazaji wa neno la Yehova kwa ujasiri. Kwani, maneno ‘haya ndiyo asemayo BWANA’ yarudiwa mara 11 katika kitabu chote chenye jina lake! (Amosi 1:3, 6, 9, 11, 13; 2:1, 4, 6; 3:12; 5:4; 7:17) Amosi alihisi uhitaji wa kutangaza maneno ya Mungu peupe.

⁹ Akiwa nabii wa Mungu, Amosi aliitikia jumbe za kimungu kwa kuchukua hatua ya mara moja. Kupitia Amosi, Mungu alisema: “Simba amekwisha kunguruma, ni nani asiyeogopa? Bwana MUNGU amenena, ni nani awezaye neno ila kutabiri?” (Amosi 3:8) Nabii huyo alichochewa sana kutangaza ujumbe wa Yehova.

10. Watumishi wa kisasa wa Yehova huitikiaje kazi yao ya kuhubiri inapopingwa?

¹⁰ Kama simba Yehova hunguruma akitoa jumbe za hukumu kwa mfumo mwovu wa sasa wa ulimwengu. Kama Amosi, watumishi wa kisasa wa Yehova huhisi ni lazima watangaze maneno ya Mungu peupe. Hata watishwapo na wapinzani, wao hufuata kielelezo cha mitume Petro na Yohana, waliotangaza hivi kwa nguvu: “Sisi hatuwezi kuacha kuyanena mambo tuliyoyaona na kuyasikia.” Mitume hao pia walithibitisha: “Imetupasa kumtii Mungu kuliko wanadamu.” (Matendo 4:20; 5:29) Basi, vipi sisi? Ni vizuri tuchunguze hisia zetu juu ya kufanyia jina la Yehova tangazo la peupe.

“Katika Hazina Njema ya Moyo”

11. Ni nini kipasacho kutusukuma tuvumilie katika kufanyia jina la Yehova tangazo la peupe?

¹¹ Hakuwezi kuwa na shaka kwamba manabii wa Yehova walishukuru kwa ajili ya mapendeleo yao. Shukrani kama hizo kwa Yehova zapasa kutusukuma kufanyia jina lake tangazo la peupe. Zaburi 145:1, 2 yasema: “Ee Mungu wangu, Mfalme, nitakutukuza, nitalihimidi jina lako milele na milele. Kila siku nitakuhimidi, nitalisifu jina lako milele na milele.” Je, maneno hayo yaonyesha mtazamo wako? Funzo la kawaida la Biblia hutusaidia kuimarisha uthamini wetu kwa yale ambayo Yehova ametufanyia, anayotufanyia, na atakayotufanyia. Na tujifunzapo Biblia pamoja tukiwa familia, je, hatuoni kwamba Neno la Mungu lina nguvu, likitufanya tutake kusema juu yake na makusudi yake? (Waebrania 4:12) Ili tuwe wenye matokeo katika kutangaza peupe jina la Yehova, twahitaji pia kutumia kikamili vichapo vya Kikristo vinavyoandaliwa na Yehova Mungu kupitia “mtumwa mwaminifu mwenye akili” aliyetiwa mafuta.—Mathayo 24:45-47.

12. Mikutano ya Kikristo pamoja na kutafakari kwaweza kutusaidiaje kufanya tangazo la peupe?

¹² Ikiwa tutamsifu Yehova kutoka kwa mioyo yenye shukrani, twahitaji kuhudhuria mikutano ya Kikristo kwa ukawaida. Watu wote wa Yehova wapaswa kutii onyo hili la mtume Paulo: “Tukaangaliane sisi kwa sisi na kuhimizana katika upendo na kazi nzuri; wala tusiache kukusanyika pamoja, kama ilivyo desturi ya wengine; bali tuonyane; na kuzidi kufanya hivyo, kwa kadiri mwonavyo siku ile kuwa inakaribia.” (Waebrania 10:24, 25) Je, wewe huwapo kwa ukawaida katika mikutano ya Kikristo? Je, wewe huongea kwa ukawaida juu ya kweli za Kimaandiko, maono mazuri, na habari zenye kusisimua za upanuzi wa kitheokrasi unazozisikia katika mikutano ya watu wa Mungu? Ikiwa unasitasita kujieleza mwenyewe juu ya Yehova na makusudi yake, chukua muda wa kutafakari juu ya Neno lake ili mawazo yake yapenye moyo wako mpaka ndani. (Zaburi 77:12; 143:5) Naam, mikutano ya Kikristo pamoja na kutafakari kwa ukawaida Neno la Mungu kutakusaidia kuthamini pendeleo la ajabu la kufanyia jina la Yehova tangazo la peupe.

13. ‘Twatoaje mema’ kutoka mioyoni mwetu?

¹³ Mioyo yetu ikiwa imejawa na shukrani kwa Yehova, twatokeza mambo mazuri. “Mtu mwema katika hazina njema ya moyo wake hutoa yaliyo mema,” Yesu akatoa sababu, “na mtu mwovu katika hazina mbovu ya moyo wake hutoa yaliyo maovu; kwa kuwa mtu, kinywa chake hunena yale yaujazayo moyo wake.” (Luka 6:45) Kuna njia gani bora zaidi ya ‘kutoa mema’ kuliko kufanyia jina la Yehova tangazo la peupe na kusema juu ya makusudi yake kwa majirani wetu, watu wetu wa ukoo—kwa kweli, kwa wote tunaokutana nao?

Matokeo ya Tangazo la Peupe

14. (a) Mtangazaji na msikilizaji wa ujumbe wa Ufalme waweza kupata ono gani? (b) Ni nini kinachotimizwa kwa kazi ya kuhubiri Ufalme?

¹⁴ Manabii wa Mungu walipata shangwe katika utumishi wao, na yale waliyoyasema yalinufaisha wasikilizaji wenye kuitikia. Kwa kulinganishwa, tangazo la peupe la ujumbe wa Ufalme huleta shangwe kubwa kwa wale wanaolitoa. (Matendo 20:35) Na hilo lanufaisha kama nini wasikilizaji wenye kuthamini! Kukubali habari njema husaidia watu kushinda mshuko wa moyo au kuukabili. Wale waliofiwa hushangilia juu ya tazamio la ufufuo. Waraibu hushinda utumwa wao kwa nikotini, heroini, na vitu vinginevyo vya kulevya. Wengi hufanya maendeleo kiadili, na wote wanaokubali kweli ya Biblia hupata uhuru wa kiroho. (Yohana 5:28, 29; 8:32) Kutangaza Ufalme kuwa tumaini la pekee la wanadamu pia kwatumika kuonya waovu, huku kukitokeza itikio zuri kwa watu wenye mioyo minyoofu. Kwa hiyo watu wanabaguliwa ama kwa ajili ya “kukataliwa-mbali kudumuko milele” ama kwa “uhai udumuo milele” wakati hukumu ya kimungu inapotekelezwa juu ya ulimwengu mwovu. (Mathayo 24:14; 25:31-46, NW; Ezekieli 33:1-9; 1 Timotheo 2:3, 4) Kazi yetu ya kuhubiri ni hatua ya kuokoa uhai isiyo na kifani, nayo ni tangazo lililopata kufanywa zaidi na kutimizwa zaidi kwa mapana na marefu duniani!

15. Ni nini kiwezacho kufanywa katika kusaidia watu wanaostahili ambao tuna matarajio mazuri nao katika eneo letu la kutoa ushahidi?

¹⁵ Tukiwa Mashahidi wa kisasa wa Yehova, sisi kwa furaha na kwa utii twamtumikia Baba yetu wa mbinguni. (Warumi 12:11) Kwa hiyo, tunafurahi kuweka wakati kando kwa ukawaida ili kushiriki katika kazi ya kuhubiri habari njema peupe na kwenda nyumba kwa nyumba. (Matendo 5:42; 20:20) Ripoti za ulimwenguni pote zaonyesha kwamba kungali kuna watu fulani wastahilio katika maeneo yetu. Hali katika ulimwengu ziendeleapo kubadilika, watu huathiriwa kwa njia mbalimbali. Wengi wamekuwa wakimbizi bila kutarajia, wakiwa wageni katika nchi za kigeni. Labda kuna baadhi ya watu hao katika maeneo yetu ya kutoa ushahidi. Ikiwa ni hivyo, na tufanye yale tuwezayo ili kuwasaidia kiroho huku tukivumilia katika “kazi takatifu ya habari njema.” (Warumi 15:16, NW) Wakristo wengine wamejifunza lugha nyingine ili watangaze habari njema za Ufalme kwa watu kama hao.

16. Ni nini kiwezacho kutusaidia kuvumilia katika kutangaza jina la Yehova?

¹⁶ Wengi wa manabii wa Mungu walikuwa na migawo migumu sana. Haikuwa rahisi kwao kutangaza jumbe za kimungu kwa watu wasioitikia. Vivyo hivyo, si kila mtu aliyejiweka wakfu kwa Yehova hupata ikiwa rahisi kufanyia jina Lake tangazo la peupe, hasa katika maeneo ambayo hakuna itikio. Hata hivyo, kwa kuwa na uhakika unaotokana na funzo la sala la Neno la Mungu, ukiambatana na nguvu anazotoa Yehova, twaweza kuvumilia katika kutangaza ujumbe wa Ufalme. (Wafilipi 4:13; Ufunuo 14:6) Kwa habari hiyo, twaweza kujifunza nini pia kutokana na manabii wa Yehova na watumishi wake wengine wa nyakati za kale?

Uandamani Katika Huduma ya Shambani

17. Ni vipi baadhi ya vielelezo vya Kimaandiko vya uandamani wenye kunufaisha katika utumishi wa Mungu?

¹⁷ Katika kutunza mgawo wake, mwanzoni nabii wa Mungu Musa alikuwa akisaidiwa na kaka yake, Haruni. Yehova alimwambia Musa: “[Haruni] atakuwa msemaji wako kwa watu, hata yeye atakuwa mfano wa kinywa kwako.” (Kutoka 4:16) Fikiria pia siku za manabii Eliya na Elisha, wakati “wana wa manabii” walipokuwa wengi. Yaonekana hao walikuwa katika vikundi vya watumishi wa Mungu waliofanya kazi pamoja, bila shaka wakifurahia uandamani mzuri. (2 Wafalme 2:3-5; 4:38; linganisha 1 Samweli 10:5, 10.) Bila shaka, Musa na Haruni na “wana wa manabii” hawakufanya kazi ya kutangaza habari njema za Ufalme. Hata hivyo, ushirika wao uliwanufaisha wote. Karne nyingi baadaye Yesu Kristo alituma wanafunzi 70 waende katika huduma wakiwa “wawili wawili,” na bila shaka wao walinufaika na uandamani waliopata.—Luka 10:1-16; linganisha Matendo 17:10, 11; 20:20.

18. Uandamani katika huduma umetimizaje kusudi zuri leo?

¹⁸ Katika mwaka wa 1953, Mashahidi wa Yehova walianzisha programu ambayo watangazaji wa Ufalme walifanya kazi pamoja katika huduma ya shambani. Bila shaka, hiyo haikuanzishwa kwa sababu tu ya kuwa na mwandamani. Programu hiyo ya mazoezi ilifanyizwa ili kufanya watumishi wa Mungu wawe walimu na wahubiri wa habari njema wenye matokeo zaidi. Wakiwa na kusudi hilo akilini, wahubiri wa Ufalme wenye ujuzi zaidi walishiriki katika huduma pamoja na wapya. Programu hiyo ya mazoezi ya nyumba kwa nyumba imenufaisha sana na imesaidia sana watu wa Yehova kufanya maendeleo katika kufanyia jina lake tangazo la peupe. (1 Timotheo 4:16) Leo, usalama ni jambo jingine linalofanya iwe bora kwa Wakristo kushiriki katika huduma wakiwa “wawili wawili,” hasa katika maeneo fulani.

19. Ni nini kipaswacho kuwekwa akilini kuhusu miradi ya binafsi katika huduma?

¹⁹ Iwe unahubiri na mwamini mwenzako katika huduma au unaenda milangoni ukiwa peke yako, jitahidi kutimiza miradi fulani uliyojiwekea binafsi. Wapasa uwe mradi halisi, unaoweza kutimizwa. Je, wahitaji msaada katika kutumia utangulizi wako ili uamshe kupendezwa kwa watu katika eneo lako? Ikiwa ni hivyo, labda waweza kuandamana na painia, mtangazaji wa Ufalme wa wakati wote, au mhubiri ambaye huenda anapata matokeo katika kutumia matangulizi mazuri. Mwandamani wako aweza kukusaidia kutayarisha na kutumia matangulizi yaliyo katika Huduma ya Ufalme Yetu au kitabu Kutoa Sababu kwa Kutumia Maandiko. Katika pindi mnapotoa ushahidi nyumba kwa nyumba, sikiliza kwa makini utoaji wa mwandamani wako. Halafu jaribu utoaji kama huo wewe mwenyewe mpaka uzoee katika upande huo wa huduma yako.

20, 21. Ni nini kiwezacho kufanya uandamani katika huduma ya shambani uwe wenye msaada hasa?

²⁰ Namna gani ikiwa unahitaji msaada katika kufanya ziara za kurudia zenye mafanikio kwa lengo la kuanzisha funzo la Biblia nyumbani? Labda kupitia kiongozi wenu wa Funzo la Kitabu la Kutaniko, mipango yaweza kufanywa ili ufanye kazi katika utumishi wa shambani pamoja na mhubiri wa Ufalme ambaye amekuwa mwenye mafanikio sana katika kuanzisha mafunzo ya Biblia. Usiwe mwenzi mnyamavu mnapofanya ziara za kurudia pamoja. Badala ya hivyo, baada ya mwandamani wako kuonyesha jinsi anavyoshughulikia mambo katika ziara moja, waweza kupata manufaa kwa kutoa utoaji kama huo unapofanya ziara ya kurudia ifuatayo. Mwandamani wako atakuwapo kukusaidia na kukutolea shauri baadaye.—Linganisha Wagalatia 6:6.

²¹ Msaada kama huo wenye upendo wa mwandamani wa utumishi wa shambani waweza kukusaidia kufikia miradi yako katika huduma. Msaada huo na uthamini wako wa kina kirefu kwa ajili ya fadhili zisizostahiliwa za Yehova katika kukuruhusu ufanye kazi hii yenye pendeleo utakusaidia uwe mwenye matokeo hata zaidi katika utendaji wako wa kuhubiri juu ya Ufalme. Na uthamini pendeleo lako la kumbariki Yehova kwa nyakati zote kusema mambo mema kumhusu na kwa kufanyia jina lake tangazo la peupe kwa ukawaida.—Zaburi 145:1, 2, 9-13.

22. Funzo letu lifuatalo litatusaidia kujibu maswali gani?

²² Tukiwa Mashahidi wa Yehova, sisi hufanya ziara za tena na tena tukiwa katika huduma yetu ya nyumba kwa nyumba. Wengi wanasikiliza habari njema kwa uthamini wenye kina kirefu. Hata hivyo, huenda wengine wasite kusikiliza ujumbe wa Ufalme. Tufanye nini katika hali kama hizo? Twaweza kuvumiliaje katika kazi ambayo Yehova amewapa watu wake mgawo wa kufanya? Ni vielelezo vipi vya Kimaandiko viwezavyo kutusaidia au kutuongoza? Maswali hayo yatajibiwa katika makala ifuatayo.

Je, Uliyafahamu Mambo Haya?

◻ Wote wawili Hosea na mtume Paulo walisema nini juu ya dhabihu kwa Mungu?

◻ Ni nini kilichowachochea Ezekieli na Amosi watoe unabii?

◻ Twapaswa kuonaje kazi yetu ya kuhubiri juu ya Ufalme?

◻ Twaweza kupata manufaa zipi tukiwa na uandamani katika huduma ya shambani?

[Picha katika ukurasa wa 13]

Uandamani wenye kusudi waweza kutusaidia kufanya maendeleo katika huduma