Siku za Kiunabii za Danieli na Imani Yetu

“Heri [mwenye furaha ni yule, NW] angojaye, na kuzifikilia siku hizo elfu na mia tatu na thelathini na tano.”—DANIELI 12:12.

1. Kwa nini wengi hushindwa kupata furaha halisi, na furaha ya kweli huhusianishwa na nini?

KILA mtu ataka kuwa mwenye furaha. Lakini leo, ni wachache walio wenye furaha. Kwa nini? Kwa sehemu ni kwa sababu wengi hutafuta furaha mahali-mahali pasipofaa. Furaha hutafutwa katika mambo kama vile elimu, utajiri, kazi-maisha, au ufuatiaji-mamlaka. Lakini, mwanzoni mwa Mahubiri yake juu ya Mlima, Yesu alihusianisha furaha na mtu kufahamu uhitaji wake wa kiroho, rehema, usafi wa moyo, na sifa kama hizo. (Mathayo 5:3-10) Aina ya furaha ambayo Yesu alisema juu yayo ni ya kweli na yenye kudumu.

2. Kulingana na unabii, ni nini kingeongoza kwenye furaha katika wakati wa mwisho, na ni maswali gani yanayotokea kuhusu jambo hilo?

² Kwa mabaki ya wapakwa katika huu wakati wa mwisho, furaha inahusianishwa na jambo jingine la ziada. Katika kitabu cha Danieli, twasoma hivi: “Enenda zako, Danieli; maana maneno haya yamefungwa, na kutiwa muhuri, hata wakati wa mwisho. Heri [mwenye furaha ni yule, NW] angojaye, na kuzifikilia siku hizo elfu na mia tatu na thelathini na tano.” (Danieli 12:9, 12) Siku hizo 1,335 zilitia ndani kipindi gani cha wakati? Kwa nini wale waliokuwa wakiishi katika siku hizo walikuwa wenye furaha? Je! hilo lahusu imani yetu leo kwa njia yoyote? Twasaidiwa kujibu maswali hayo tukitazama nyuma kwenye wakati ambapo Danieli aliandika maneno hayo, muda mfupi baada ya kuachiliwa huru kwa Israeli kutoka katika utekwa Babuloni na katika mwaka wa tatu wa Sairasi mfalme wa Uajemi.—Danieli 10:1.

Mrejesho Waleta Furaha

3. Ni tendo jipi la Mfalme Koreshi lililoleta furaha kubwa kwa Wayahudi waaminifu katika 537 K.W.K., lakini Koreshi hakuwapa Wayahudi pendeleo jipi?

³ Kwa Wayahudi, kuachiliwa huru kutoka katika Babuloni kulikuwa pindi ya kushangilia sana. Baada ya Wayahudi kuwa wamevumilia karibu miaka 70 ya uhamisho, Koreshi Mkuu aliwaalika warudi Yerusalemu kujenga upya hekalu la Yehova. (Ezra 1:1, 2) Wale walioitikia waliondoka wakiwa na matazamio makubwa, wakawasili bara lao nyumbani katika 537 K.W.K. Hata hivyo, Koreshi hakuwaalika warejeshe ufalme chini ya mzao wa Mfalme Daudi.

4, 5. (a) Ufalme wa Kidaudi ulipinduliwa lini? Kwa nini? (b) Yehova alitoa uhakikishio upi kwamba ufalme wa Kidaudi ungerejeshwa?

⁴ Hilo lilikuwa jambo la maana. Karne tano hivi mapema, Yehova alikuwa amemwahidi Daudi hivi: “Nyumba yako, na ufalme wako, vitathibitishwa milele mbele yako. Nacho kiti chako kitafanywa imara milele.” (2 Samweli 7:16) Kwa kusikitisha, walio wengi kati ya wazao wa kifalme wa Daudi walithibitika kuwa wenye kuasi, na hatia ya umwagaji damu ya taifa hilo ikawa kubwa sana hivi kwamba katika 607 K.W.K., Yehova aliruhusu ufalme wa Kidaudi upinduliwe. Isipokuwa kipindi kifupi chini ya Wamakabayo, Yerusalemu lilikuwa chini ya utawala wa kigeni kutoka wakati huo hadi uharibifu walo wa pili katika 70 W.K. Hivyo, katika 537 K.W.K., “nyakati zilizowekwa za mataifa,” ambazo katika hizo hakuna mwana wa Daudi angetawala akiwa mfalme, zilikuwa zikiendelea.—Luka 21:24, NW.

⁵ Hata hivyo, Yehova hakusahau ahadi yake kwa Daudi. Kwa mfululizo wa njozi na ndoto, alifunua kupitia nabii wake Danieli mambo mengi juu ya matukio ya ulimwengu ya wakati ujao ambayo yangeenea muda wa karne kadhaa kutoka wakati wa utawala wa Babuloni juu ya ulimwengu hadi wakati ambapo mfalme katika nasaba ya Daudi angetawala mara nyingine tena katika ufalme wa watu wa Yehova. Unabii huo mwingi, uliorekodiwa katika Danieli sura ya 2, 7, 8, na 10-12, uliwahakikishia Wayahudi waaminifu kwamba, hatimaye, kiti cha utawala cha Daudi kwa kweli ‘kingefanywa imara milele.’ Kwa hakika, kweli hiyo iliyofunuliwa ilileta furaha kwa Wayahudi wale waliorudi bara lao katika 537 K.W.K.!

6. Twajuaje kwamba baadhi ya unabii wa Danieli ungetimizwa katika wakati wetu?

⁶ Wafafanuzi wa Biblia walio wengi hudai kwamba karibu unabii wote wa Danieli ulitimizwa kabla ya kifo cha Yesu Kristo. Lakini sivyo kwa wazi. Kwenye Danieli 12:4, malaika mmoja amwambia Danieli hivi: “Yafunge maneno haya, ukakitie muhuri kitabu, hata wakati wa mwisho; wengi wataenda mbio huko na huko, na maarifa yataongezeka.” Ikiwa kitabu cha Danieli kingeondolewa muhuri—maana yacho ifunuliwe kikamili—katika wakati wa mwisho tu, kwa hakika ni lazima angalau baadhi ya unabii wacho mwingi uhusu kipindi hicho.—Ona Danieli 2:28; 8:17; 10:14.

7. (a) Nyakati zilizowekwa za mataifa ziliisha lini, na ni swali gani la haraka lililopasa kujibiwa wakati huo? (b) Ni nani ambao hawakuwa “mtumwa mwaminifu mwenye akili”?

⁷ Katika 1914 nyakati zilizowekwa za mataifa ziliisha, na wakati wa mwisho wa ulimwengu huu ukaanza. Ufalme wa Kidaudi ulirejeshwa, si katika Yerusalemu la kidunia, bali kwa njia isiyoonekana katika “mawingu ya mbingu.” (Danieli 7:13, 14) Wakati huo, kwa sababu yale “magugu” ya Ukristo wa kuiga tu yalikuwa yakisitawi, hali ya Ukristo wa kweli haikuwa wazi—angalau kwa macho ya kibinadamu. Hata hivyo, swali la maana lilihitaji kujibiwa: “Ni nani basi yule mtumwa mwaminifu mwenye akili?” (Mathayo 13:24-30; 24:45) Ni nani angeuwakilisha duniani Ufalme wa Kidaudi uliorejeshwa? Si ndugu za kimwili wa Danieli, yaani Wayahudi. Walikuwa wamekataliwa mbali kwa sababu walikosa imani wakakwazika juu ya Mesiya. (Warumi 9:31-33) Mtumwa mwaminifu hakupatikana hata kidogo miongoni mwa matengenezo ya Jumuiya ya Wakristo! Matendo yao maovu yalithibitisha kwamba Yesu hakuwajua. (Mathayo 7:21-23) Basi, huyo alikuwa nani?

8. Ni nani wamethibitika kuwa “mtumwa mwaminifu mwenye akili” katika wakati wa mwisho? Twajuaje?

⁸ Bila shaka yoyote, lilikuwa lile baraza dogo la ndugu za Yesu wapakwa waliojulikana katika 1914 kuwa Wanafunzi wa Biblia lakini tangu 1931 wametambuliwa kuwa Mashahidi wa Yehova. (Isaya 43:10) Ni wao tu ambao wametangaza ule Ufalme uliorejeshwa katika nasaba ya Daudi. (Mathayo 24:14) Ni wao tu ambao wameendelea kujitenga na ulimwengu na kutukuza jina la Yehova. (Yohana 17:6, 14) Na unabii mwingi wa Biblia unaohusu watu wa Mungu katika siku za mwisho umetimizwa juu yao tu. Miongoni mwa unabii huo mwingi ni ule mfululizo wa vipindi vya kiunabii ulioorodheshwa katika Danieli sura ya 12 unaotia ndani zile siku 1,335 ambazo zingeleta furaha.

Zile Siku 1,260

9, 10. Ni matukio gani yaliyoonekana katika kile kipindi cha “wakati, na nyakati mbili, na nusu wakati” cha Danieli 7:25, na kipindi cha wakati kinachofanana na hicho chatajwa katika maandiko gani mengine?

⁹ Kwenye Danieli 12:7, twasoma juu ya kipindi cha kwanza cha kiunabii: “Itakuwa wakati, na nyakati mbili, na nusu wakati; tena watakapokuwa wamekwisha kuvunja nguvu za hao watu watakatifu, ndipo mambo hayo yote yatakapotimizwa.”a Kipindi icho hicho chatajwa kwenye Ufunuo 11:3-6, lisemalo kwamba mashahidi wa Mungu wangehubiri wakiwa wamevikwa magunia kwa muda wa miaka mitatu na nusu kisha wauawe. Tena, kwenye Danieli 7:25, twasoma hivi: “Atanena maneno kinyume chake Aliye juu, naye atawadhoofisha watakatifu wake Aliye juu; naye ataazimu kubadili majira [nyakati, NW] na sheria; nao watatiwa mikononi mwake kwa wakati, na nyakati mbili, na nusu wakati.”

¹⁰ Katika unabii huo wa pili, ‘yeye’ ni ile serikali ya ulimwengu ya tano kuhesabu kutoka Babuloni. Hiyo ndiyo ‘pembe, iliyo ndogo,’ ambayo katika wakati wayo wa mamlaka Mwana wa binadamu apokea “mamlaka, na utukufu, na ufalme.” (Danieli 7:8, 14) Pembe hiyo ya ufananisho, ambayo awali ilikuwa Uingereza ya kibepari, ilisitawi katika vita ya ulimwengu ya kwanza ikawa serikali ya ulimwengu ya uwili ya Uingereza na Amerika, ambayo sasa hutawalwa na United States. Kwa muda wa nyakati au miaka mitatu na nusu, serikali hiyo ingewahangaisha watakatifu na kujaribu kubadili nyakati na sheria. Mwishowe, watakatifu wangetiwa mikononi mwayo.—Ona pia Ufunuo 13:5, 7.

11, 12. Ni matukio gani yaliyoongoza hadi kwenye mwanzo wa zile siku 1,260 za kiunabii?

¹¹ Unabii huo wote wenye kufanana ulitimizwaje? Kwa miaka kadhaa kabla ya Vita ya Ulimwengu 1, ndugu za Yesu wapakwa walionya hadharani kwamba 1914 ungekuwa umalizio wa nyakati zilizowekwa za mataifa. Vita ilipoanza, ilikuwa wazi kwamba lile onyo lilikuwa limepuuzwa. Shetani alitumia “hayawani-mwitu” wake, lile tengenezo la kisiasa la ulimwengu lililokuwa likitawalwa na Milki ya Uingereza wakati huo, akijaribu “kubadili majira [nyakati, NW] na sheria,” ili kuahirisha wakati ambapo Ufalme wa Mungu ungetawala. (Ufunuo 13:1, 2, NW) Alishindwa. Ufalme wa Mungu ulisimamishwa mbinguni, mbali usikoweza kufikiwa na binadamu.—Ufunuo 12:1-3.

¹² Kwa Wanafunzi wa Biblia, vita hiyo ilimaanisha wakati wa kutahiniwa. Tangu Januari 1914 walikuwa wamekuwa wakionyesha ile Photo-Drama of Creation, utoaji wa Kibiblia ulioelekeza fikira kwenye unabii mwingi wa Danieli. Katika kiangazi cha mwaka huo katika Kizio cha Kaskazini, vita ilianza. Katika Oktoba, nyakati zilizowekwa ziliisha. Kufikia mwisho wa mwaka huo, mabaki ya wapakwa walikuwa wakitazamia mnyanyaso, kama ionwavyo kutokana na jambo la kwamba andiko-mwaka lililochaguliwa kwa mwaka wa 1915 lilikuwa lile swali la Yesu kwa wanafunzi wake, “Je! mwaweza kunywea kikombe nitakachonywea mimi?” lililotegemea Mathayo 20:22.

13. Wanafunzi wa Biblia walihubirije wakiwa wamevikwa magunia katika zile siku 1,260, na ni nini kilichotukia mwishoni mwa kipindi hicho?

¹³ Kwa hiyo, kutoka Desemba 1914, kikundi kidogo hicho cha mashahidi ‘kilihubiri kikiwa kimevikwa magunia,’ kikivumilia kwa unyenyekevu kikiwa chatangaza hukumu za Yehova. Kifo cha C. T. Russell, msimamizi wa kwanza wa Watch Tower Bible and Tract Society katika 1916, kilikuwa mshtuko kwa wengi. Msisimuko wa vita ulipochacha, wao walikabili upinzani wenye kuongezeka. Wengine walifungwa gerezani. Watu mmoja-mmoja, kama vile Frank Platt katika Uingereza na Robert Clegg katika Kanada, waliteswa na mamlaka zenye ukatili. Hatimaye, katika Juni 21, 1918, J. F. Rutherford, msimamizi mpya, pamoja na wakurugenzi wa Watch Tower Bible and Tract Society, alihukumiwa kifungo cha muda mrefu gerezani juu ya mashtaka bandia. Hivyo, mwishoni mwa kipindi hicho cha kiunabii, ile “pembe ndogo” ilikatiza kazi ya kuhubiri hadharani iliyopangwa kitengenezo.—Danieli 7:8, King James Version.

14. Mambo yalibadilikaje kwa mabaki ya wapakwa katika 1919 na baada ya hapo?

¹⁴ Kitabu cha Ufunuo chatoa unabii juu ya yale yaliyotukia baada ya hapo. Baada ya kipindi kifupi cha kutotenda—kilichotabiriwa kuwa siku tatu na nusu za kulala barabarani wakiwa wafu—mabaki ya wapakwa wakawa hai na wenye kutenda tena. (Ufunuo 11:11-13) Katika Machi 26, 1919, msimamizi na wakurugenzi wa Watch Tower Bible and Tract Society walifunguliwa, na baadaye wakaondolewa kabisa yale mashtaka bandia dhidi yao. Papo hapo baada ya kufunguliwa kwao, mabaki ya wapakwa kwa roho walianza kutengeneza mambo upya kwa ajili ya utendaji zaidi. Hivyo, kwa kutimiza ole wa kwanza wa Ufunuo, walitoka katika abiso ya kutotenda kama vile nzige wa kiroho wakifuatana na moshi mzito, ukiwa ishara ya wakati ujao wenye giza kwa dini bandia. (Ufunuo 9:1-11) Katika ile miaka michache iliyofuata, walilishwa kiroho na kutayarishwa kwa ajili ya yale yaliyokuwa mbele. Katika 1921 walitangaza kitabu kipya, The Harp of God, kilichokusudiwa kusaidia wapya na watoto wajifunze kweli za Biblia za msingi. (Ufunuo 12:6, 14) Mambo yote hayo yalitukia katika kipindi kingine cha maana sana.

Zile Siku 1,290

15. Twaweza kuhesabuje mwanzo wa zile siku 1,290? Kipindi hicho kiliisha lini?

¹⁵ Yule malaika alimwambia Danieli hivi: “Tangu wakati ule ambapo sadaka [dhabihu, kielezi-chini, NW] ya kuteketezwa ya daima itaondolewa, na hilo chukizo la uharibifu litakaposimamishwa, itapata siku elfu na mia mbili na tisini.” (Danieli 12:11) Chini ya Sheria ya Kimusa, ‘dhabihu ya daima’ iliteketezwa juu ya madhabahu kwenye hekalu katika Yerusalemu. Wakristo hawatoi dhabihu za kuteketezwa, lakini wanatoa dhabihu ya daima ya kiroho. Paulo alirejezea hilo aliposema hivi: “Na tumpe Mungu dhabihu ya sifa daima, yaani, tunda la midomo iliungamayo jina lake.” (Waebrania 13:15; linganisha Hosea 14:2.) Dhabihu hiyo ya daima iliondolewa katika Juni 1918. Basi, “hilo chukizo” lilikuwa nini—lile jambo la pili la kutafuta? Lilikuwa ule Ushirika wa Mataifa, uliodhaminiwa na serikali zenye ushindi mwishoni mwa Vita ya Ulimwengu 1.b Ulikuwa chukizo kwa sababu viongozi wa Jumuiya ya Wakristo waliuweka mahali pa Ufalme wa Mungu, wakionyesha Ushirika huo kuwa tumaini pekee la binadamu la kupata amani. Ushirika huo ulipendekezwa katika Januari 1919. Tukihesabu siku 1,290 (miaka mitatu, miezi saba) tangu wakati huo, twafikia Septemba 1922.

16. Mwishoni mwa zile siku 1,290, ilikuwaje wazi kwamba mabaki ya wapakwa walikuwa tayari kuchukua hatua?

¹⁶ Ni nini kilichotukia wakati huo? Wanafunzi wa Biblia waliburudishwa sasa, wakiwa wamewekwa huru na Babuloni Mkubwa, na wakiwa tayari kushambulia. (Ufunuo 18:4) Kwenye mkusanyiko uliofanywa katika Septemba 1922 kwenye Cedar Point, Ohio, U.S.A., walianza kujulisha hukumu za Mungu bila hofu juu ya Jumuiya ya Wakristo. (Ufunuo 8:7-12) Vichomo vya nzige hao vikaanza kuumiza kwelikweli! Isitoshe, ole wa pili wa Ufunuo ukaanza. Tungamano la jeshi la wapanda-farasi la Kikristo—ambao mwanzoni walitia ndani wale mabaki ya wapakwa na baadaye wakazidishwa na umati mkubwa—liliinuka kotekote duniani. (Ufunuo 7:9; 9:13-19) Naam, mwisho wa zile siku 1,290 uliwaletea shangwe watu wa Mungu.c Lakini mengi zaidi yalikuwa yatokee.

Zile Siku 1,335

17. Zile siku 1,335 zilianza na kwisha lini?

¹⁷ Danieli 12:12 lasema hivi: “Heri [mwenye furaha ni yule, NW] angojaye, na kuzifikilia siku hizo elfu na mia tatu na thelathini na tano.” Ni wazi kwamba siku hizo 1,335, au miaka mitatu, miezi minane na nusu, zilianza mwishoni mwa kipindi kilichotangulia. Tukihesabu kutoka Septemba 1922, hilo latuleta hadi mwisho-mwisho wa masika (Kizio cha Kaskazini) ya 1926. Ni nini kilichotukia katika siku hizo 1,335?

18. Ni mambo gani ya hakika yanayoonyesha kwamba huko nyuma katika 1922 maendeleo yalihitaji kufanywa bado?

¹⁸ Ujapokuwa umaana wa matukio katika 1922, ni wazi kwamba wengine walitamani bado wakati uliopita. Studies in the Scriptures, vilivyotungwa na C. T. Russell, vilikuwa bado habari ya funzo ya msingi. Zaidi ya hayo, kile kijitabu kilichoenezwa sana Millions Now Living Will Never Die kilitoa maoni kwamba katika 1925, makusudi ya Mungu kuhusu kurejeshwa kwa dunia kuwa Paradiso na kule kufufuliwa kwa waaminifu wa zamani kungeanza kutimizwa. Uvumilivu wa wale wapakwa ulionekana kuwa karibu kumalizika. Hata hivyo, wengine walioshirikiana na Wanafunzi wa Biblia hawakuhisi kuchochewa kushiriki habari njema na wengine.

19, 20. (a) Mambo mengi yalibadilikaje kwa watu wa Mungu katika zile siku 1,335? (b) Ni matukio gani yaliyotia alama mwisho wa kile kipindi cha siku 1,335, nayo yalionyesha nini kuhusu watu wa Yehova?

¹⁹ Zile siku 1,335 zilipoendelea, yote hayo yalibadilika. Ili kuwaimarisha akina ndugu, vikundi vya mafunzo ya Mnara wa Mlinzi (Kiingereza) vya kawaida vilipangwa. Utumishi wa shambani ulikaziwa. Kuanzia Mei 1923, kila mtu alialikwa kushiriki katika utumishi wa shambani katika Jumanne ya kwanza ya kila mwezi, na wakati uliwekwa kando katika mkutano wa kutaniko wa katikati ya juma ili kuwatia moyo katika kazi hiyo. Katika Agosti 1923, kwenye kusanyiko katika Los Angeles, Kalifornia, U.S.A., ilionyeshwa kwamba mfano wa Yesu wa kondoo na mbuzi ungetimizwa kabla ya Utawala wa Mileani. (Mathayo 25:31-40) Katika mwaka wa 1924 stesheni ya redio ya WBBR ilizunduliwa, iliyotumiwa kusambaza habari njema kupitia mawimbi ya hewa. Makala “Kuzaliwa kwa Taifa” katika toleo la Machi 1, 1925 la Mnara wa Mlinzi (Kiingereza), ilitoa uelewevu uliorekebishwa wa Ufunuo sura ya 12. Hatimaye, Wakristo waaminifu wangeweza kuelewa ifaavyo yale matukio yenye msukosuko ya 1914-19.

²⁰ Mwaka 1925 ulifikia umalizio wao, lakini mwisho haukuwa umefika bado! Tangu miaka ya 1870, Wanafunzi wa Biblia walikuwa wametumikia wakiwa na tarehe fulani akilini—kwanza 1914, kisha 1925. Sasa, wakang’amua kwamba ni lazima watumikie maadamu Yehova apenda iwe hivyo. Toleo la Januari 1, 1926 la Mnara wa Mlinzi (Kiingereza), lilikuwa na ile makala kuu “Nani Ataheshimu Yehova?” ikikazia zaidi ya wakati mwingine wowote umaana wa jina la Mungu. Na hatimaye, katika Mei 1926 kwenye mkusanyiko katika London, Uingereza, azimio lilikubaliwa lenye kichwa “Ushuhuda kwa Watawala wa Ulimwengu.” Hilo lilipiga mbiu waziwazi ya kweli kuhusu Ufalme wa Mungu na ya uharibifu unaokuja wa ulimwengu wa Shetani. Kwenye mkusanyiko uo huo, kile kitabu Deliverance cha kugonga sana kilitolewa, kikiwa cha kwanza kati ya mfululizo ambao ungechukua mahali pa Studies in the Scriptures. Sasa watu wa Mungu walikuwa wakitazama mbele, si nyuma. Zile siku 1,335 zilikuwa zimemalizika.

21. Uvumilivu katika kile kipindi cha siku 1,335 ulimaanisha nini kwa watu wa Mungu wakati huo wa nyuma, na utimizo wa unabii kuhusu kipindi hicho cha wakati wamaanisha nini kwetu?

²¹ Wengine hawakutaka kujirekebisha kulingana na matukio hayo, lakini wale waliovumilia walikuwa wenye furaha kwelikweli. Zaidi ya hayo, tutazamapo nyuma kwenye utimizo wa vipindi hivyo vya wakati vya kiunabii, sisi pia ni wenye furaha kwa sababu uhakika wetu unaimarishwa kwamba kwa kweli lile baraza dogo la Wakristo wapakwa lililoishi katika nyakati hizo ni yule mtumwa mwaminifu mwenye akili. Katika miaka tangu wakati huo, tengenezo la Yehova limepanuka mno, lakini yule mtumwa mwaminifu mwenye akili angali katika kitovu chalo, akiliongoza. Kwa hiyo, inasisimua kama nini kujua kwamba kwa wapakwa na wale kondoo wengine, bado furaha zaidi itatokea! Hilo litaonwa tunapochunguza mwingine kati ya unabii mwingi wa Danieli.

[Maelezo ya Chini]

Je! Wewe Waweza Kueleza?

◻ Twajuaje kwamba baadhi ya unabii katika Danieli ungetimizwa katika wakati wetu?

◻ Kwa nini twaweza kuwa na uhakika kwamba mabaki ya wapakwa ndio “mtumwa mwaminifu mwenye akili”?

◻ Zile siku 1,260 zilianza na kwisha lini?

◻ Zile siku 1,290 ziliwaletea mabaki ya wapakwa kiburudisho na mrejesho upi?

◻ Kwa nini wale waliovumilia hadi mwisho wa zile siku 1,335 walikuwa wenye furaha?

[Picha katika ukurasa wa 8]

Tangu 1919 imekuwa wazi kwamba “mtumwa mwaminifu mwenye akili” ni mabaki ya wapakwa

[Picha katika ukurasa wa 10]

Makao makuu ya Ushirika wa Mataifa katika Geneva, Uswisi

[Hisani]

Picha ya UN

[Sanduku katika ukurasa wa 11]

VIPINDI VYA WAKATI VYA KIUNABII VYA DANIELI

Siku 1,260:

Desemba 1914 hadi Juni 1918

Siku 1,290:

Januari 1919 hadi Septemba 1922

Siku 1,335:

Septemba 1922 hadi Mei 1926