“Mzee wa Siku Akaketi”

BIBLIA inasema hivi: “Hakuna mwanadamu ambaye amemwona Mungu wakati wowote.” (Yohana 1:18) Mungu ni mwenye utukufu sana hivi kwamba hakuna kiumbe mwenye mwili wa nyama na damu anayeweza kumwona na kuishi. (Kutoka 33:20) Hata hivyo, katika visa fulani, Yehova aliwapa baadhi ya wanaume maono ya mbinguni. Mmoja kati yao ni nabii Danieli. Bila shaka, mambo aliyoona yalimstaajabisha na yanapaswa kutustaajabisha pia. Ona jinsi Danieli alivyofafanua kile ambacho alipendelewa kukiona katika maono.a​—Soma Danieli 7:9, 10.

“Mzee wa Siku.” Jina la cheo, “Mzee wa Siku,” ambalo Danieli pekee ndiye anayelitumia, linamaanisha “mtu aliyeishi siku nyingi (au miaka mingi).” (Danieli 7:9, 13, 22) Yehova ana umri gani? Kwa kuwa yeye ni “Mfalme wa milele,” kuwepo kwake hakuna mwanzo wala mwisho. (1 Timotheo 1:17; Yuda 25) Kwa vile Mungu amekuwepo kwa umilele tuna hakika kwamba ana hekima isiyo na mipaka, kwa sababu Biblia inahusianisha hekima na umri. (Ayubu 12:12) Kwa kweli, ni vigumu kwa akili zetu zenye mipaka kuelewa wazo la kuwepo milele. Lakini je, tunapaswa kutazamia kumwelewa kikamili Mungu mwenye hekima isiyo na kifani?​—Waroma 11:33, 34.

Ona kwamba Mzee wa Siku ‘aliketi.’ Akiwa na kusudi gani? Mistari inayozunguka andiko hilo inatoa madokezo fulani, ikitumia maneno kama vile “ile Mahakama” na “hukumu.” (Danieli 7:10, 22, 26) Hivyo, katika maono hayo Yehova alikuwa ameketi akiwa Hakimu. Angehukumu nani? Angehukumu mataifa ya dunia, ambayo mwanzoni mwa sura hiyo yanafananishwa na wanyama-mwitu katika maono ya Danieli.b (Danieli 7:1-8) Yehova ni Hakimu wa aina gani?

“Mavazi yake yalikuwa meupe kama theluji, na nywele za kichwa chake zilikuwa kama sufu safi.” Rangi nyeupe ni ishara ya uadilifu na utakato. Katika hali yake ya kiasili, sufu ina rangi nyeupe. Hivyo, nywele inayofanana na sufu ina rangi nyeupe. Unaweza kuwazia kile ambacho Danieli aliona? Je, unamwazia Hakimu mwenye nywele nyeupe ambaye labda amevalia joho jeupe kama theluji? Maneno hayo ya mfano yanatuhakikishia kwamba hukumu za Yehova ni za uadilifu na zenye hekima. Yeye ndiye Hakimu ambaye tunapaswa kumwamini na kumheshimu sana.

“Kulikuwa na maelfu elfu walioendelea kumtumikia, na elfu kumi mara elfu kumi walioendelea kusimama mbele zake.” Wahudumu hao wa kimbingu ni nani? Biblia inawataja malaika kuwa “wahudumu [wa Mungu].” (Zaburi 104:4) Huku idadi yao ikiwa labda mamia ya mamilioni, malaika wa Mungu wanajishughulisha kwa bidii ‘kulitenda neno lake’ na ‘kufanya mapenzi yake.’ (Zaburi 103:20, 21) Je, huo sio uthibitisho zaidi wa hekima ya Mungu isiyo na mipaka? Ni nani mwingine isipokuwa Yehova ambaye anaweza kufanya jeshi kubwa hivyo la kimbingu liwe na mpangilio na lifanye kazi kwa bidii kwa maelfu ya miaka?

Maono ya Danieli yanatufanya tuwe na uhakika katika Yehova, ambaye ni Mzee wa Siku. Hukumu zake ni za uadilifu, na hekima yake inategemeka. Kwa nini usijifunze mengi kumhusu Mungu huyo ambaye ni mwenye hekima yote?