Hukumu Yatekelezwa Katika Bonde la Kukata Maneno
‘Mataifa na wapande juu katika bonde la Yehoshafati; maana huko ndiko nitakakoketi niwahukumu mataifa yote.’—YOELI 3:12.
1. Ni kwa sababu gani Yoeli aona makutano makubwa yakiwa yamekusanyika “katika bonde la kukata maneno”?
“MAKUTANO makubwa, makutano makubwa, wamo katika bonde la kukata maneno!” Twasoma maneno hayo yenye kuamsha kwenye Yoeli 3:14. Makutano hayo makubwa yamekusanyika kwa sababu gani? Yoeli ajibu hivi: ‘Siku ya Yehova i karibu.’ Ndiyo siku kubwa ya utetezi wa Yehova—siku ya kutekeleza hukumu dhidi ya halaiki za watu ambao wamekataa Ufalme wa Mungu ulioanzishwa chini ya Kristo Yesu. Hatimaye, wale “malaika wanne” wa Ufunuo sura ya 7 wanapaswa kuacha kushikilia kwao sana “pepo nne za dunia,” kukitokeza “dhiki kubwa ya namna ambayo haijapata kutukia tangu mwanzo wa ulimwengu hadi sasa, la, wala haitatukia tena.”—Ufunuo 7:1; Mathayo 24:21.
2. (a) Kwa nini mahali pa utekelezaji wa hukumu ya Yehova panaitwa kwa kufaa ‘bonde la Yehoshafati’? (b) Yehoshafati aliitikiaje kwa kufaa aliposhambuliwa?
2 Kwenye Yoeli 3:12, mahali pa utekelezaji huo wa hukumu panaitwa ‘bonde la Yehoshafati.’ Kwa kufaa, wakati wa kipindi chenye ugomvi mwingi katika historia ya Yuda, Yehova alitekeleza hukumu huko kwa niaba ya Mfalme mzuri Yehoshafati, ambaye jina lake lamaanisha “Yehova Ni Hakimu.” Kufikiria kwa uangalifu yaliyotokea wakati huo kutatusaidia vizuri zaidi kung’amua kinachokaribia kutukia katika wakati wetu. Rekodi hiyo yapatikana katika kitabu cha Mambo ya Nyakati cha 2, sura ya 20. Kwenye mstari wa 1 wa sura hiyo, twasoma kwamba “wana wa Moabu, na wana wa Amoni, na pamoja nao baadhi ya Wameuni, wakaja juu ya Yehoshafati vitani.” Yehoshafati aliitikiaje? Alifanya yale ambayo watumishi waaminifu wa Yehova hufanya sikuzote wakiwa katika tatizo. Alimgeukia Yehova apate mwongozo, akisali hivi kwa bidii: “Ee Mungu wetu, je! hutawahukumu? maana sisi hatuna uwezo juu ya jamii kubwa hii, wanaotujia juu yetu; wala hatujui tufanyeje; lakini macho yetu yatazama kwako.”—2 Mambo ya Nyakati 20:12.
Yehova Ajibu Sala
3. Yehova aliwapa Yuda maagizo gani walipokabili shambulio kali la mataifa jirani?
3 Huku ‘wakisimama Yuda wote mbele za BWANA, pamoja na wadogo wao, na wake zao, na watoto wao,’ Yehova alitoa jibu lake. (2 Mambo ya Nyakati 20:13) Kama tu atumiavyo “mtumwa [wake] mwaminifu na mwenye busara” leo, ndivyo Msikiaji mkuu wa sala alivyompa nguvu nabii Mlawi Yahazieli ili awape watu waliokuwa wamekusanyika, jibu Lake. (Mathayo 24:45) Twasoma hivi: “BWANA awaambia hivi, Msiogope, wala msifadhaike kwa ajili ya jeshi kubwa hili; kwani vita si yenu bali ni ya Mungu. . . . Hamtahitaji kupigana vita, jipangeni, simameni, mkauone wokovu wa BWANA ulio pamoja nanyi, . . . msiogope, wala msifadhaike; kesho tokeni juu yao; kwa kuwa BWANA yu pamoja nanyi.”—2 Mambo ya Nyakati 20:15-17.
4. Ni katika njia gani Yehova aliwataka watu wake wawe wenye kutenda na si wenye kukaa tu, walipokabili mwito wa adui?
4 Yehova alimtaka Mfalme Yehoshafati na watu wake wafanye mengi zaidi ya kukaa tu, wakingojea ukombozi wa kimuujiza. Walipaswa kuchukua hatua ya kwanza katika kukabili mwito wa adui. Mfalme na ‘Yuda wote, pamoja na wadogo wao, na wake zao, na watoto wao,’ walionyesha imani yenye nguvu walipoamka kwa utii asubuhi na mapema na kupiga mwendo ili kukutana na magenge hayo yenye kushambulia. Njiani, mfalme aliendelea kuandaa maagizo ya kitheokrasi na kitia-moyo, akiwasihi sana hivi: “Mwaminini BWANA, Mungu wenu, ndivyo mtakavyothibitika; waaminini manabii wake, ndivyo mtakavyofanikiwa.” (2 Mambo ya Nyakati 20:20) Imani katika Yehova! Imani katika manabii wake! Humo mlikuwamo ufunguo wa kufanikiwa. Hali kadhalika leo, tuendeleapo kuwa watendaji katika utumishi wa Yehova, na tusishuku kamwe kwamba atafanya imani yetu ishinde!
5. Mashahidi wa Yehova hutendaje leo wamsifupo Yehova?
5 Sawa na Wayudea wa siku ya Yehoshafati, lazima ‘tumpe Yehova sifa, kwa kuwa fadhili-upendo zake ni za wakati usio dhahiri.’ Twampaje sifa hiyo? Kwa kuhubiri kwetu Ufalme kwa bidii! Kama Wayudea hao ‘walivyoanza kuimba na kusifu,’ ndivyo tuongezavyo kazi katika imani yetu. (2 Mambo ya Nyakati 20:21, 22, linganisha NW.) Ndiyo, acheni tuonyeshe imani ya kweli kama hiyo huku Yehova akijitayarisha kuchukua hatua dhidi ya adui zake! Ingawa huenda njia ikaonekana kuwa ndefu, acheni tuazimie kuvumilia, kuwa watendaji katika imani, kama vile watu wake washindi wafanyavyo katika sehemu zenye hali za kutatiza duniani leo. Katika nchi fulani ziathiriwazo sana na minyanyaso, ujeuri, njaa kuu, na hali ngumu za kiuchumi, watumishi waaminifu wa Mungu wanapata ukuzi wenye kutokeza, kama vile 1998 Yearbook of Jehovah’s Witnesses kiripotivyo.
Yehova Aokoa Watu Wake
6. Imani yenye nguvu hutusaidiaje leo kudumisha uaminifu-mshikamanifu?
6 Mataifa yasiyomwogopa Mungu yaliyozunguka Yuda yalijaribu kuwameza watu wa Mungu, lakini wakiwa na imani ambayo ni kielelezo chema, watumishi wa Yehova waliitikia kwa kuimba sifa zake. Twaweza kuonyesha imani hiyohiyo leo. Kwa kujaza maisha yetu kazi za kumsifu Yehova, twaimarisha silaha zetu za kiroho, bila kuziachia nafasi mbinu zenye hila za Shetani zipenye. (Waefeso 6:11) Imani yenye nguvu itazima vishawishi vya kukengeushwa na vitumbuizo vyenye kushusha, vitu vya kimwili, na ubaridi, sifa za ulimwengu unaotuzunguka ambao unaangamia. Imani hiyo isiyoshindwa itatudumisha tukitumikia kwa uaminifu-mshikamanifu pamoja na “mtumwa mwaminifu na mwenye busara” tuendeleapo kulishwa chakula cha kiroho kinachoandaliwa “kwa wakati ufaao.”—Mathayo 24:45.
7. Mashahidi wa Yehova wameitikiaje mashambulio mbalimbali dhidi yao?
7 Imani yetu inayotegemea Biblia itatukinga dhidi ya kampeni zinazochochewa na wale wanaodhihirisha roho ya “mtumwa mwovu” wa Mathayo 24:48-51. Waasi-imani wanatimiza unabii huo kwa njia yenye kutokeza, kwa kuwa watendaji katika kupanda uwongo na propaganda katika nchi nyingi leo, wakila njama na wenye nyadhifa za mamlaka miongoni mwa mataifa. Ifaapo, Mashahidi wa Yehova wameitikia, kama ifafanuliwavyo kwenye Wafilipi 1:7, kwa “kutetea na kuthibitisha kisheria habari njema.” Kwa kielelezo, siku ya Septemba 26, 1996, katika kesi kutoka Ugiriki, wale mahakimu tisa wa Mahakama ya Ulaya ya Haki za Kibinadamu, iliyoko Strasbourg, walihakikisha tena kwa pamoja kwamba “Mashahidi wa Yehova wafasiliwa kuwa ‘dini inayojulikana,’” wenye haki ya kufurahia uhuru wa kufikiri, dhamiri, na itikadi, na haki ya kujulisha imani yao. Kwa habari ya waasi-imani, hukumu ya Mungu yataarifu hivi: “Usemi wa mithali ya kweli umetukia kwao: ‘Mbwa amerudi kwenye matapiko yake mwenyewe, na nguruwe-jike aliyeoshwa kwenye kugaagaa katika matope.’”—2 Petro 2:22.
8. Ni jinsi gani Yehova alivyotekeleza hukumu dhidi ya adui za watu Wake katika siku ya Yehoshafati?
8 Huko nyuma katika siku ya Yehoshafati Yehova alitekeleza hukumu dhidi ya wale waliotaka kuwadhuru watu Wake. Twasoma hivi: “BWANA akaweka waviziao juu ya wana wa Amoni, na Moabu, na wa mlima Seiri, waliokuja juu ya Yuda; nao wakapigwa. Kwani wana wa Amoni na wa Moabu waliwaondokea wenyeji wa mlima Seiri kuwaulia mbali na kuwaharibu; nao walipokwisha kuwakomesha hao wakaao Seiri, wakajitia kuharibu kila mtu mwenziwe.” (2 Mambo ya Nyakati 20:22, 23) Wayudea walipaita mahali hapo Bonde la “Baraka.” Katika nyakati za kisasa pia, utekelezaji wa hukumu wa Yehova juu ya adui zake utatokeza baraka kubwa kwa watu wake mwenyewe.
9, 10. Ni nani ambao wamejionyesha kuwa wastahili hukumu mbaya ya Yehova?
9 Huenda tukauliza hivi, Katika nyakati za kisasa ni nani watakaopokea hukumu mbaya kutoka kwa Yehova? Ili kupata jibu la swali hilo, yatupasa tuurudie unabii wa Yoeli. Andiko la Yoeli 3:3 lazungumza juu ya adui za watu wake ambao “mtoto mwanamume wamemtoa ili kupata kahaba, na mtoto mwanamke wamemwuza ili kupata divai.” Ndiyo, wanawaona watumishi wa Mungu wakiwa chini yao sana, watoto wao wakiwa wenye thamani ndogo kuliko malipo ya kahaba, au bei ya kopo la divai. Watalazimika kutoa hesabu kwa sababu ya hilo.
10 Wenye kustahili hukumu sawa na hiyo ni wale wafanyao ukahaba wa kiroho. (Ufunuo 17:3-6) Na wa kulaumika hasa ni wale wenye kuwachochea wenye mamlaka za kisiasa wawanyanyase Mashahidi wa Yehova na kuzuia utendaji wao, kama vile ambavyo viongozi wa kidini wenye kuzusha ghasia wamekuwa wakifanya katika Ulaya Mashariki katika nyakati za juzi. Yehova aonyesha azimio lake la kuwachukulia hatua watenda-maovu hao.—Yoeli 3:4-8.
“Takaseni Vita”!
11. Yehova awatoleaje adui zake mwito wa vita?
11 Kisha, Yehova awaita watu wake wapige mbiu ya mwito huu miongoni mwa mataifa: “Takaseni vita; waamsheni mashujaa; watu wa vita na wakaribie; na wapande juu.” (Yoeli 3:9) Hili ni tangazo la vita isiyo ya kawaida—vita ya uadilifu. Mashahidi wa Yehova wenye uaminifu-mshikamanifu hutegemea silaha za kiroho waitikiapo propaganda zisizo za kweli, wakikinza mambo yasiyo ya kweli kwa yaliyo kweli. (2 Wakorintho 10:4; Waefeso 6:17) Karibuni, Mungu atatakasa “vita ya siku kubwa ya Mungu Mweza-Yote.” (Ufunuo 16:14) Itaondolea dunia wapinzani wote wa enzi kuu ya Mungu. Watu wake duniani hawatashiriki kimwili katika vita hiyo. Kihalisi na kitamathali, ‘wamefua panga zao ziwe majembe na mikuki yao iwe miundu.’ (Isaya 2:4) Tofauti nao, Yehova atolea mataifa yenye kupinga mwito yafanye kinyume cha hilo: “Yafueni majembe yenu yawe panga, na miundu yenu iwe mikuki.” (Yoeli 3:10) Awaalika watumie silaha zao zote vitani. Lakini hayawezi kufanikiwa, kwa kuwa pigano na ushindi ni wa Yehova!
12, 13. (a) Ijapokuwa Vita Baridi imeisha, mataifa mengi yameonyeshaje kwamba ni yenye kupenda vita bado? (b) Mataifa hayako tayari kwa jambo gani?
12 Mapema katika miaka ya 1990, mataifa yalitangaza kwamba Vita Baridi ilikuwa imeisha. Kwa sababu hiyo, je, kusudi la msingi la Umoja wa Mataifa la kupata amani na usalama limefikiwa? La hasha! Matukio katika Burundi, Iraki, Jamhuri ya Kidemokrasia ya Kongo, Liberia, Rwanda, Somalia, na Yugoslavia ya zamani yatuambia nini? Kwa maneno ya Yeremia 6:14, wao wanasema hivi: “Amani, Amani, wala hapana amani.”
13 Hata ingawa vita ya moja kwa moja imekoma katika sehemu fulani, mataifa washiriki wa UM yangali yakishindana katika kutengeneza silaha za vita za hali ya juu. Baadhi yayo yanaendelea kuweka akiba ya silaha za nyuklia. Wengine hutengeneza silaha za kemikali na za kibakteria ziwezazo kutokeza uharibifu mkubwa. Mataifa hayo yakusanyikapo kwenye mahali pa ufananisho paitwapo Har–Magedoni, awatolea mwito huu: “Aliye dhaifu na aseme, Mimi ni hodari. Fanyeni haraka, mje, enyi mataifa yote, wa pande zote, jikusanyeni pamoja.” Kisha Yoeli akatiza kwa ombi lake mwenyewe: “Na huko watelemshe mashujaa wako wote, Ee BWANA.”—Yoeli 3:10, 11, italiki ni zetu.
Yehova Huwalinda Walio Wake
14. Ni nani walio mashujaa wa Yehova?
14 Mashujaa wa Yehova ni nani? Kwenye Biblia, Mungu wa kweli anaitwa “Yehova wa majeshi” mara 280. (2 Wafalme 3:14, NW) Majeshi hayo ni majeshi ya kimalaika ya kimbingu, ambayo yako tayari kufanya amri ya Yehova. Washami walipojitahidi kumkamata Elisha, hatimaye Yehova alifumbua macho ya mtumishi wa Elisha ili aweze kuona ni kwa nini hao Washami hawangefanikiwa: “Na tazama, kile kilima kilikuwa kimejaa farasi na magari ya moto yaliyomzunguka Elisha pande zote.” (2 Wafalme 6:17) Yesu alisema kwamba angaliweza kumwomba Baba yake “malejioni zaidi ya kumi na mawili ya malaika.” (Mathayo 26:53) Kikimfafanua Yesu akiwa amepanda farasi ili atekeleze hukumu kwenye Har–Magedoni, kitabu cha Ufunuo chataarifu hivi: “Majeshi yaliyokuwa mbinguni yalikuwa yakimfuata juu ya farasi weupe, nayo yalikuwa yamevikwa kitani nyeupe, safi, bora. Na kutoka kinywani mwake hutokeza upanga mrefu mkali, ili apate kupiga mataifa kwa huo, naye atawachunga kwa fimbo ya chuma. Yeye akanyaga pia sindikio la divai ya hasira ya hasira-kisasi ya Mungu Mweza-Yote.” (Ufunuo 19:14, 15) Sindikio hilo la divai la ufananisho lafafanuliwa kwa maneno waziwazi kuwa “sindikio kubwa la divai la hasira ya Mungu.”—Ufunuo 14:17-20.
15. Yoeli hufafanuaje vita ya Yehova dhidi ya mataifa?
15 Hivyo basi, Yehova anajibuje ombi la Yoeli la kutelemsha mashujaa wa Mungu mwenyewe? Katika maneno haya yaliyo wazi: “Mataifa na wajihimize, wakapande juu katika bonde la [Yehoshafati]; maana huko ndiko nitakakoketi niwahukumu mataifa yote yaliyo pande zote. Haya! utieni mundu, maana mavuno yameiva; njoni, kanyageni; kwa maana shinikizo limejaa, mapipa nayo yanafurika; kwani uovu wao ni mwingi sana. Makutano makubwa, makutano makubwa, wamo katika bonde la kukata maneno! kwa maana siku ya BWANA i karibu, katika bonde la kukata maneno. Jua na mwezi vimetiwa giza, na nyota zimeacha kuangaza. Naye BWANA atanguruma toka Sayuni, atatoa sauti yake toka Yerusalemu; na mbingu na nchi zitatetemeka; lakini BWANA atakuwa kimbilio la watu wake, na ngome ya wana wa Israeli.”—Yoeli 3:12-16.
16. Ni nani watakaotiwa ndani ya wale ambao Yehova atekeleza hukumu dhidi yao?
16 Kama vile kwa hakika jina Yehoshafati limaanishavyo “Yehova Ni Hakimu,” ndivyo kwa hakika Mungu, Yehova, atakavyoitetea enzi kuu yake kikamili atekelezapo hukumu. Huo unabii wafafanua wanaopata hukumu mbaya kuwa ‘makutano makubwa, makutano makubwa, walio katika bonde la kukata maneno.’ Wateteaji wowote wanaosalia wa dini isiyo ya kweli watakuwa miongoni mwa makutano hayo makubwa. Wanaotiwa ndani pia watakuwa wale wafafanuliwao katika Zaburi ya pili—mataifa, makabila, wafalme wa dunia, na wakuu—ambao wameupendelea mfumo mfisadi wa ulimwengu huu badala ya ‘kumtumikia BWANA kwa kicho.’ Hao hukataa ‘kumbusu mwana.’ (Zaburi 2:1, 2, 11, 12) Hawamkubali Yesu kuwa Mfalme mshirika wa Yehova. Zaidi, makutano hayo makubwa yaliyotiwa alama ili kuharibiwa yatatia ndani watu wote ambao Mfalme huyo mtukufu atawahukumu kuwa “mbuzi.” (Mathayo 25:33, 41) Wakati wa Yehova wa kunguruma kutoka Yerusalemu wa kimbingu, Mfalme wa wafalme aliyemweka, atapanda farasi ili kutekeleza hukumu hiyo. Bila shaka mbingu na dunia zitatikisika! Hata hivyo, twahakikishiwa kwamba: “BWANA atakuwa kimbilio la watu wake, na ngome ya wana wa Israeli.”—Yoeli 3:16.
17, 18. Ni nani watambulishwao kuwa waokokaji wa dhiki kubwa, nao wataonea shangwe hali gani?
17 Ufunuo 7:9-17 latambulisha waokokaji wa dhiki kubwa kuwa “umati mkubwa” ufanyizwao na wale wadhihirishao imani katika nguvu za kufidi za damu ya Yesu. Hao wapata kinga katika siku ya Yehova huku makutano makubwa yanayokusanyika ya unabii wa Yoeli yakipata hukumu mbaya. Yoeli asema hivi kwa waokokaji: “Hivyo ndivyo mtakavyojua ya kuwa mimi ndimi BWANA, Mungu wenu, nikaaye Sayuni, mlima wangu mtakatifu,” makao ya Yehova ya kimbingu.—Yoeli 3:17a.
18 Kisha unabii huo watujulisha kwamba, milki ya Ufalme wa kimbingu wa Mungu ‘itakuwa takatifu, wala wageni hawatapita tena ndani yake kamwe.’ (Yoeli 3:17b) Mbinguni na katika milki ya kidunia ya Ufalme huo wa kimbingu, hakutakuwa na wageni, kwa kuwa wote wataunganishwa katika ibada safi.
19. Furaha ya kiparadiso ya watu wa Mungu leo yafafanuliwaje na Yoeli?
19 Hata leo, kuna amani nyingi miongoni mwa watu wa Yehova hapa duniani. Wanapiga mbiu ya hukumu zake katika nchi zaidi ya 230 na katika lugha tofauti zaidi ya 300 kwa muungano. Ufanisi wao umetolewa unabii vizuri na Yoeli: “Tena itakuwa siku ile, ya kwamba milima itadondoza divai tamu, na vilima vitatiririka maziwa, na vijito vyote vya Yuda vitatoa maji tele.” (Yoeli 3:18) Ndiyo, Yehova ataendelea kuwamwagia wasifaji wake walio duniani baraka zenye shangwe na ufanisi mwingi na mfululizo wenye kuongezeka wa kweli zenye thamani. Enzi kuu ya Yehova itakuwa imetetewa kikamili katika bonde la kukata maneno, nayo shangwe itafurika akaapo milele miongoni mwa watu wake waliokombolewa.—Ufunuo 21:3, 4.
Je, Wakumbuka?
◻ Yehova aliwaokoaje watu wake katika siku za Yehoshafati?
◻ Ni nani ambao Yehova huwahukumu kuwa wastahili uharibifu katika “bonde la kukata maneno”?
◻ Ni nani walio mashujaa wa Mungu, na watatimiza sehemu gani katika pambano la mwisho?
◻ Waabudu waaminifu huonea shangwe furaha zipi?
[Picha katika ukurasa wa 21]
Yuda waliambiwa hivi: ‘Msiogope, kwani vita si yenu bali ni ya Mungu’
[Picha katika ukurasa wa 23]
Yehova awatolea mwito adui zake ‘wayafue majembe yao yawe panga’
[Picha katika ukurasa wa 24]
Biblia huutambulisha umati mkubwa wa waokokaji wa dhiki kubwa