Siku ya Yehova Iko Karibu

“Sikieni haya, enyi wazee; sikilizeni, enyi wenyeji wote wa nchi.”—YOELI 1:2.

 1, 2. Yehova alimpulizia Yoeli atamke unabii wake wenye nguvu kwa sababu ya hali gani iliyokuwa Yuda?

“OLE wake siku hii! Kwa maana siku ya BWANA [“Yehova,” NW] inakaribia, nayo itakuja kama uangamivu utokao kwake aliye Mwenyezi.” Ni tangazo lenye kutazamisha kama nini! Lilikuwa ujumbe wa Mungu kwa watu wake, uliotolewa na nabii wake Yoeli.

² Maneno hayo ya Yoeli 1:15 yalirekodiwa Yuda, yamkini wapata mwaka wa 820 K.W.K. Wakati huo, vilima vyenye majani mabichi viliremba hiyo nchi. Kulikuwako wingi wa matunda na nafaka. Malisho yalikuwa mapana na ya kijani kibichi. Hata hivyo, kulikuwa na kosa fulani kubwa. Ibada ya Baali ilisitawi katika Yerusalemu na katika nchi ya Yuda. Watu walishiriki katika karamu za ulevi mbele ya mungu huyo asiye wa kweli. (Linganisha 2 Mambo ya Nyakati 21:4-6, 11.) Je, Yehova angeruhusu yote hayo yaendelee?

 3. Yehova alionya juu ya nini, na mataifa yapaswa yajitayarishie nini?

³ Kitabu cha Biblia cha Yoeli hakiachi shaka yoyote kuhusu jibu la hilo swali. Yehova Mungu angetetea enzi kuu yake na kutakasa jina lake takatifu. Siku kubwa ya Yehova ilikuwa karibu. Kisha Mungu angetekeleza hukumu dhidi ya mataifa yote katika ‘bonde la Yehoshafati.’ (Yoeli 3:12) Acheni wajitayarishie vita dhidi ya Mweza Yote, Yehova. Sisi pia, twakabili siku kubwa ya Yehova. Kwa hiyo acheni tuchunguze maneno ya kiunabii ya Yoeli kwa ajili ya siku yetu na wakati uliopita.

Uvamizi wa Wadudu

 4. Tukio ambalo Yoeli aonya juu yake lingekuwa kubwa kadiri gani?

⁴ Kupitia nabii wake, Yehova asema hivi: “Sikieni haya, enyi wazee; sikilizeni, enyi wenyeji wote wa nchi. Je! mambo haya yamekuwako katika siku zenu, au katika siku za baba zenu? Waarifuni watoto wenu habari yake, watoto wenu wakawaambie watoto wao, na watoto wao wakakiambie kizazi kingine.” (Yoeli 1:2, 3) Wazee na watu wote wangeweza kutarajia tukio fulani ambalo halikuwa limetukia maishani mwao au katika siku za baba zao wa zamani. Lingekuwa lenye kutokeza sana hivi kwamba lingesimuliwa hata kwa kizazi cha tatu! Tukio hilo lenye kutokeza lilikuwa nini? Ili kujua, acheni tuwazie tumerudi nyuma hadi siku ya Yoeli.

 5, 6. (a) Fafanua tauni ambayo Yoeli atoa unabii juu yake. (b) Ni nani aliyekuwa Chanzo cha tauni hiyo?

⁵ Sikilizeni! Yoeli asikia mngurumo ulio mbali. Anga lafunikwa na giza, nayo sauti ya kutia hofu yaongezeka huku giza lizidipo kufunika juu angani. Kisha wingu lililo kama moshi lashuka. Ni jeshi la mamilioni ya wadudu. Na ni angamizo kubwa kama nini wasababishalo! Sasa, fikiria kwa uangalifu Yoeli 1:4. Wadudu hao wanaovamia si nzige wenye mabawa tu. La, hasha! Wajao pia, ni magenge ya nzige wenye njaa wasio na mabawa, wenye kutambaa. Wakiwa wameletwa na upepo, hao nzige wafika ghafula, na mshindo wao ni kama ule wa magari ya vita. (Yoeli 2:5) Kwa sababu ya hamu yao ya ulafi, mamilioni yao yaweza kubadili paradiso halisi iwe nyika.

⁶ Walio mwendoni pia ni tunutu—viwavi vya nondo na vipepeo. Majeshi makubwa ya tunutu wenye njaa yaweza kula kabisa majani ya mimea kipande kwa kipande, jani kwa jani, hadi mimea iwe karibu imepukutwa majani kabisa. Na mengi ya yale wanayoacha, nzige wanakula. Na yale ambayo nzige wanaacha, mende wenye mwendo wa kasi kwa hakika wanamalizia. Lakini ona hili: Kwenye Yoeli sura ya 2, mstari wa 11, Mungu atambulisha hilo jeshi la nzige kuwa “jeshi lake.” Ndiyo, yeye ndiye aliyekuwa Chanzo cha tauni ya nzige ambayo ingeangamiza nchi kabisa na kusababisha njaa kuu iliyo kali. Lini? Punde tu kabla ya ‘siku ya Yehova.’

“Levukeni, Enyi Walevi”!

 7. (a) Hali ya viongozi wa kidini wa Yuda ilikuwa namna gani? (b) Ni jinsi gani viongozi wa Jumuiya ya Wakristo wako katika hali sawa na hiyo ya viongozi wa kidini wa Yuda?

⁷ Umati wenye kudharauliwa, viongozi wa kidini wa Yuda wateuliwa amri hii itamkwapo: “Levukeni, enyi walevi, mkalie; pigeni yowe, ninyi nyote mnywao divai; kwa sababu ya divai mpya; maana umekatiliwa mbali na vinywa vyenu.” (Yoeli 1:5) Ndiyo, walevi wa kiroho wa Yuda waliambiwa ‘walevuke,’ watoe ulevi. Lakini usifikiri kwamba hii ni historia ya kale tu. Sasa hivi, kabla ya siku kubwa ya Yehova, makasisi wa Jumuiya ya Wakristo wamelewa kitamathali divai mpya hivi kwamba, hawana habari juu ya amri hii kutoka kwa Aliye Juu Zaidi Sana. Watashangaa kama nini watakapoamshwa kutoka katika ulevi wao chakari, na ile siku kubwa na yenye kutia hofu ya Yehova!

 8, 9. (a) Yoeli awafafanuaje nzige na matokeo ya tauni yao? (b) Hao nzige wanawakilisha nani leo?

⁸ Litazameni jeshi kubwa lile la nzige! “Maana taifa limepanda juu ya nchi yangu, lenye nguvu, tena halina hesabu; meno yake ni kama meno ya simba, naye ana magego ya simba mkubwa. Ameuharibu mzabibu wangu; ameuvunja mtini wangu; ameyaambua magamba yake kabisa; ameuangusha chini; matawi yake yamefanywa kuwa meupe. Ombolea kama mwanamwali avaaye magunia kwa ajili ya mume wa ujana wake.”—Yoeli 1:6-8.

⁹ Je, huu ni unabii tu juu ya “taifa” la nzige, kundi la nzige linalovamia Yuda? La, kuna mengi zaidi. Kwenye Yoeli 1:6 na pia Ufunuo 9:7, watu wa Mungu wanawakilishwa na nzige. Jeshi la nzige la siku ya kisasa si jingine ila “jeshi” la “nzige” watiwa-mafuta wa Yehova. Sasa “kondoo wengine” wa Yesu wapatao 5,600,000 wamejiunga nao. (Yohana 10:16) Je, hufurahii kuwa sehemu ya songamano hilo kubwa la waabudu wa Yehova?

10. Tauni ya nzige ina matokeo gani juu ya Yuda?

¹⁰ Kwenye Yoeli 1:9-12, twasoma juu ya matokeo ya hiyo tauni ya nzige. Kundi moja baada ya jingine lilileta ukiwa kabisa wa hiyo nchi. Kwa kukosa nafaka, divai, na mafuta, makuhani wasio waaminifu hawawezi kuendelea katika kazi zao. Hata ardhi yaomboleza, kwa kuwa hao nzige waliinyang’anya nafaka, na miti ya matunda iliachwa bila matunda. Mizabibu ikiwa imeangamizwa, hakuna tena divai zaidi kwa ajili ya walevi wa divai wa Kibaali waliokuwa walevi wa kiroho pia.

‘Ombolezeni, Enyi Makuhani’

11, 12. (a) Ni nani wadaio kuwa makuhani wa Mungu leo? (b) Viongozi wa kidini wa Jumuiya ya Wakristo wameathiriwaje na tauni ya nzige wa siku ya kisasa?

¹¹ Sikilizeni ujumbe wa Mungu kwa makuhani hao waliopotoka: “Jikazeni mkaomboleze, enyi makuhani; pigeni yowe, enyi wahudumu wa madhabahu.” (Yoeli 1:13) Katika utimizo wa kwanza wa unabii wa Yoeli, makuhani wa Kilawi walitumika kwenye madhabahu. Lakini namna gani juu ya utimizo wa mwisho? Leo, makasisi wa Jumuiya ya Wakristo wamechukua mamlaka ya kutumika kwenye madhabahu ya Mungu, wakidai kuwa wahudumu wake, “makuhani” wake. Hata hivyo, ni nini linalotukia sasa kwa kuwa nzige wa Mungu wa siku ya kisasa wako mwendoni?

¹² “Makasisi” wa Jumuiya ya Wakristo waonapo watu wa Yehova wakitenda na kusikia onyo lao la hukumu ya kimungu, wanataharuki. Wanapiga vifua vyao kwa usumbufu na hasira kwa sababu ya matokeo yenye kulemea ya huo ujumbe wa Ufalme. Nao wapiga yowe kwelikweli makundi yao yawaachapo. Malisho yao yakiwa yamepukutwa, acha walale usiku kucha katika magunia, wakiombolezea kupotea kwa mapato yao. Punde si punde, watapoteza kazi zao pia! Kwa hakika, Mungu awaambia waomboleze usiku kucha kwa sababu mwisho wao uko karibu.

13. Je, Jumuiya ya Wakristo kwa ujumla itaitikia kwa mwelekeo mzuri onyo la Yehova?

¹³ Kulingana na Yoeli 1:14, tumaini lao pekee lategemea kutubu na “kumlilia BWANA.” Je, twaweza kutarajia jamii yote ya makasisi wa Jumuiya ya Wakristo wamgeukie Yehova? Bila shaka la! Huenda mtu mmoja-mmoja miongoni mwao akaitikia onyo la Yehova. Lakini hali ya njaa ya kiroho ya viongozi hao wa kidini na waparokia wao wakiwa jamii, itaendelea. Nabii Amosi alitabiri hivi: “Angalia, siku zinakuja, asema Bwana MUNGU, ambazo nitaleta njaa katika nchi; si njaa ya kukosa chakula, wala kiu ya kukosa maji, bali ya kukosa kuyasikia maneno ya BWANA.” (Amosi 8:11) Kwa upande mwingine, tu wenye shukrani kama nini kwa sababu ya karamu nono ya kiroho ambayo Mungu huandaa kwa upendo kupitia “mtumwa mwaminifu na mwenye busara”!—Mathayo 24:45-47.

14. Tauni ya nzige ni dalili ya jambo gani litakalotokea?

¹⁴ Tauni ya nzige ilikuwa na bado ni dalili ya jambo fulani litakalotokea. Jambo gani? Yoeli atuambia waziwazi, kwa kusema hivi: “Ole wake siku hii! Kwa maana siku ya BWANA [“Yehova,” NW] inakaribia, nayo itakuja kama uangamivu utokao kwake aliye Mwenyezi.” (Yoeli 1:15) Uvamizi mbalimbali wa ulimwenguni pote wa jeshi la nzige wa Mungu waonyesha waziwazi kwamba ile siku kubwa na yenye kutia hofu ya Yehova iko karibu. Bila shaka, wote wenye mioyo minyoofu huitamani sana siku hiyo ya pekee ya hukumu wakati ambapo hukumu ya kimungu inatekelezwa dhidi ya waovu na Yehova kuibuka mshindi akiwa Mwenye Enzi Kuu ya Ulimwengu Wote Mzima.

15. Kwa sababu ya hali yenye kusikitisha ya nchi, wale wanaotii maonyo ya kimungu, wanaitikiaje?

¹⁵ Kama vile andiko la Yoeli 1:16-20 lionyeshavyo, chakula kilikatiliwa mbali katika Yuda la kale. Na ndivyo na shangwe. Ghala zilifanywa ukiwa, na mabohari yalikuwa yamevunjwa. Kwa kukosa malisho kwa sababu nzige walikuwa wamepukuta mimea ya nchi, ng’ombe walizurura-zurura katika vurugu na makundi ya kondoo yaliangamia. Ni afa lililoje! Ni nini kilichompata Yoeli katikati ya hali hizo? Kulingana na mstari wa 19, alisema hivi: “Ee BWANA, nakulilia wewe.” Leo pia, watu wengi hutii maonyo ya kimungu na kumlilia Yehova Mungu katika imani.

‘Siku ya Yehova Inakuja’

16. Kwa nini ‘wenyeji wa nchi’ wapaswa kutetemeka?

¹⁶ Sikiliza amri hii kutoka kwa Mungu: “Pigeni tarumbeta katika Sayuni, pigeni na kelele katika mlima wangu mtakatifu; wenyeji wote wa nchi na watetemeke.” (Yoeli 2:1) Kwa nini watetemeke? Huo unabii wajibu hivi: ‘Kwa maana siku ya Yehova inakuja. Kwa sababu inakaribia; siku ya giza na weusi, siku ya mawingu na giza kuu. Kama mapambazuko yakitandazwa juu ya milima.’ (Yoeli 2:1, 2) Kuna uharaka halisi unaohusishwa na siku kubwa ya Yehova.

17. Nchi na watu wa Yuda waliathiriwaje na tauni ya nzige?

¹⁷ Wazia matokeo ya ono la huyo nabii huku nzige wasiotulia walipokuwa wakigeuza paradiso halisi iwe ardhi isiyotumiwa yenye ukiwa. Sikiliza ufafanuzi wa hilo jeshi la nzige: “Kuonekana kwao ni kama kuonekana kwa farasi; na kama wapanda farasi ndivyo wanavyopiga mbio. Kama mshindo wa magari ya vita juu ya vilele vya milima, ndivyo warukavyo; kama mshindo wa miali ya moto ilapo mabua makavu, kama mashujaa waliopangwa tayari kwa vita. Mbele yao watu wanahangaika; nyuso zote zimegeuka kuwa nyeupe kwa hofu.” (Yoeli 2:4-6) Wakati wa tauni ya nzige katika siku ya Yoeli, maumivu makali ya waabudu wa Baali yaliongezeka, na weupe wa hofu ungeweza kuonekana nyusoni mwao.

18, 19. Utendaji wa watu wa Mungu leo umekuwaje kama tauni ya nzige?

¹⁸ Hakuna chochote kilichowazuia wale nzige wenye utaratibu, wasiochoka. Walipiga mbio “kama mashujaa” na hata walipanda kuta. Ikiwa ‘baadhi yao walianguka kati ya silaha, wale wengine hawakuacha kuifuata njia yao.’ (Yoeli 2:7, 8) Ni wonyesho dhahiri kama nini wa kiunabii wa jeshi la Mungu la siku hizi la nzige wa kitamathali! Leo pia, jeshi la nzige wa Yehova lafuliza kwenda mbele moja kwa moja. Hakuna “ukuta” wowote wa upinzani huwazuia. Hawaridhiani uaminifu-maadili wao kwa Mungu bali wako tayari kukabili kifo, kama walivyofanya maelfu ya Mashahidi ambao ‘walianguka kati ya silaha’ kwa kukataa kutoa salamu ya Hitler wakati wa utawala wa Nazi wa Ujerumani.

¹⁹ Jeshi la nzige wa Mungu wa siku ya kisasa wametoa ushahidi kamili katika “mji” wa Jumuiya ya Wakristo. (Yoeli 2:9) Wamefanya hivyo ulimwenguni pote. Wangali wanapanda vizuizi vyote na kuingia mamilioni ya makao, kuwafikia watu barabarani, kusema nao kwenye simu, na kuwafikia katika njia yoyote iwezekanayo, wajulishapo rasmi ujumbe wa Yehova. Kwa kweli, wamegawanya mamilioni ya vichapo vya Biblia na watagawanya vingine vingi, vingi zaidi katika huduma yao isiyokoma—hadharani na nyumba hadi nyumba.—Matendo 20:20, 21.

20. Jeshi hilo la nzige la siku ya kisasa linategemezwa na nani, kukiwa na matokeo gani?

²⁰ Andiko la Yoeli 2:10 laonyesha kwamba, jeshi kubwa sana la nzige ni kama wingu liwezalo kuzuia nuru ya jua, mwezi, na nyota. (Linganisha Isaya 60:8.) Je, kuna shaka yoyote juu ya ni nani mwenye kulitegemeza jeshi hilo la kivita? Zaidi ya mngurumo wa hao nzige, twasikia maneno ya Yoeli 2:11: “BWANA anatoa sauti yake mbele ya jeshi lake; maana matuo yake ni makubwa sana; kwa maana yeye ni hodari atekelezaye neno lake; kwa kuwa siku ya BWANA [“Yehova,” NW] ni kuu, yenye kitisho sana; naye ni nani awezaye kuistahimili?” Ndiyo, Yehova Mungu anayatuma majeshi yake ya kivita ya nzige sasa—kabla ya siku yake kubwa.

“Yehova Si wa Polepole”

21. Ni nini kitakachotokea ‘siku ya Yehova ijapo kama mwizi’?

²¹ Sawa na Yoeli, mtume Petro alisema juu ya siku kubwa ya Yehova. Aliandika hivi: “Siku ya Yehova itakuja kama mwizi, ambayo katika hiyo mbingu zitapitilia mbali kwa kelele ya kuchatachata, lakini elementi zikiwa moto sana zitafumuliwa, na dunia na kazi zilizo ndani yayo zitagunduliwa.” (2 Petro 3:10) Chini ya uvutano wa Shetani Ibilisi, “mbingu” za kiserikali zenye uovu hutawala “dunia,” yaani, wanadamu waliotengwa na Mungu. (Waefeso 6:12; 1 Yohana 5:19) Mbingu na dunia hizo za ufananisho hazitaokoka joto la hasira ya kimungu wakati wa siku kubwa ya Yehova. Badala ya hivyo, mahali pa mbingu na dunia hizo patachukuliwa na “mbingu mpya na dunia mpya ambazo tunangojea kulingana na ahadi yake, na katika hizo uadilifu utakaa.”—2 Petro 3:13.

22, 23. (a) Twapaswa kuitikiaje wonyesho wenye rehema wa subira ya Yehova? (b) Twapaswa kuitikiaje ukaribu wa siku ya Yehova?

²² Kukiwa na vikengeusha-fikira vyote na majaribio ya imani yote ya siku hizi, tungeweza kusahau uharaka wa nyakati zetu. Lakini kwa kadiri nzige wa ufananisho wanavyozidi kusonga mbele siku zote, ndivyo watu wengi waitikiavyo ujumbe wa Ufalme. Ingawa Mungu ameruhusu wakati kwa ajili ya hilo, lazima tutofautishe subira yake na kuwa wa polepole. “Yehova si wa polepole kwa habari ya ahadi yake, kama watu fulani waonavyo kuwa ni upolepole, bali yeye ni mwenye subira kwenu kwa sababu hataki yeyote aangamizwe bali hutaka wote wafikie toba.”—2 Petro 3:9.

²³ Tungojeapo ile siku kubwa ya Yehova, acheni tuzingatie moyoni maneno ya mtume Petro yaliyorekodiwa kwenye 2 Petro 3:11, 12: “Kwa kuwa vitu vyote hivi vitafumuliwa hivyo, nyinyi mwapaswa kuwa watu wa namna gani katika matendo matakatifu ya mwenendo na vitendo vya ujitoaji-kimungu, mkingojea na kuweka karibu akilini kuwapo kwa siku ya Yehova, ambayo kupitia kwayo mbingu zikiwa zimewaka moto zitafumuliwa na elementi zikiwa moto sana zitayeyuka!” Bila shaka matendo na vitendo hivyo vyatia ndani kwamba twende sambamba na jeshi la nzige wa Yehova, kwa kushiriki kwa ukawaida na kwa njia yenye umaana katika kuhubiri habari njema ya Ufalme kabla ya ule mwisho kuja.—Marko 13:10.

24, 25. (a) Waitikiaje pendeleo la kushiriki katika kazi ya jeshi la nzige wa Yehova? (b) Ni swali gani lenye umaana ambalo Yoeli azusha?

²⁴ Jeshi la kivita la Mungu la nzige halitakoma hadi siku kubwa ya Yehova ifyatukapo. Kuwako kwenyewe kwa jeshi hilo la nzige lisiloweza kuzuiwa ni ithibati yenye kutokeza ya kwamba siku kubwa ya Yehova iko karibu. Je, hupendezwi kutumikia miongoni mwa nzige wa Mungu watiwa-mafuta na waandamani wao katika shambulio la mwisho kabla ya siku kubwa na yenye kutia hofu ya Yehova?

²⁵ Siku ya Yehova itakuwa kubwa kama nini! Si ajabu kwamba swali hili linazushwa: “Ni nani awezaye kuistahimili?” (Yoeli 2:11) Swali hilo na mengine mengi yatachunguzwa katika makala mbili zenye kufuata.

Je, Waweza Kueleza?

◻ Kwa nini Yehova alionya juu ya tauni ya wadudu kuelekea Yuda?

◻ Katika utimizo wa siku ya kisasa wa unabii wa Yoeli, ni nani walio nzige wa Yehova?

◻ Viongozi wa Jumuiya ya Wakristo huitikiaje tauni ya nzige, na baadhi yao waweza kuponyokaje matokeo yake?

◻ Tauni ya nzige imekuwa kubwa kadiri gani wakati wa karne ya 20, na itaendelea mpaka lini?

[Picha katika ukurasa wa 9]

Tauni ya wadudu ilikuwa dalili ya kutokea kwa jambo fulani lililokuwa baya hata zaidi

[Hisani]

Mti usio na majani yoyote: FAO photo/G. Singh

[Picha katika ukurasa wa 10]

Yehova Mungu ndiye hutegemeza tauni ya nzige ya siku ya kisasa

[Hisani ya Picha katika ukurasa wa 8]

Nzige: FAO photo/G. Tortoli; kundi la nzige: FAO photo/Desert Locust Survey