Masomo Kutokana na Maandiko: Yoeli 1:1-3:21

Itia Jina la Yehova Uponyoke Ukiwa Salama!

“TAUNI ya kwanza ikishindwa kudhibitiwa, itaenea mpaka Afrika Mashariki na Mashariki ya Karibu. Ingeweza kuwa msiba mkubwa.” Ndivyo alivyosema ofisa mmoja wa Tengenezo la UM la Chakula na Ukulima kuhusu yule mdudu mtafunaji sana ambaye kwa sasa anavamia kaskazini-mashariki mwa Afrika kwa mabilioni​—nzige.

Karibu mwaka 820 K.W.K., Yoeli mnabii wa Mungu alinena juu ya tauni kama hiyo. Kwa maneno wazi yasiyo na kifani kwa usahihi na uhalisi, yeye alieleza jinsi taifa la Yuda lingeharibiwa sura na shambulio kali la wadudu. Hata hivyo, tauni hiyo ilikuwa picha ya kitu chenye maana kubwa kuliko tisho la mazingira. Ilikuwa ujumbe wa “siku ya Bwana [Yehova, NW]”! Kizazi chetu kinakabiliana na hiyo ‘siku itishayo’ na kiruu chayo chote cha uharibifu. Kuna tumaini gani la wokovu? Na tunaweza kujifunza masomo gani kutokana na kitabu cha kinabii cha Yoeli?

Uvamizi Wenye Kutisha wa Wadudu

Toba inahitajiwa ili kupata wokovu wakati wa siku ya Yehova inayotisha. Kupitia macho ya Yoeli, sisi tunaona afa wakati bara linapobaki bila majani kwa kufyekwa na mabumba ya viwavi, nzige, nzige watambaaji wasio na mabawa, na komba-mwiko. Makuhani, wanaume wazee, na wakaaji wengine wa Yuda wanahimizwa watubu “na kulilia Yehova kwa msaada.” Nyumba za akiba zinafanywa ukiwa, na ghala zinabomolewa kwa kuwa zinakosa mazao. Wanyama wa kufugwa wanatanga-tanga kwa kuvurugika, wakitafuta malisho wasiyapate. Lo, ni siku iliyoje ya kutekwa nyara na Mweza Yote!​—1:1-20, NW.

Kukaribia kwa siku ya Yehova kunapasa kutuongoze tujitie katika vitendo vitakatifu na matendo ya kuogopa Mungu. (2 Petro 3:10-12) Yoeli anatuwezesha kuiona kuwa siku ya giza, mawingu, na weusi tititi. Nzige hao ni dalili ya kutisha ya siku hiyo. Baada ya kuwapo kwao, mandhari ya bara la Yuda iliyo kama Edeni inakuwa jangwa lililo ukiwa. Kishindo chenyewe pia cha nzige hao ni dalili mbaya, kwa maana ni kama kishindo cha gari-vita na moto unaowaka kweli kweli ukiteketeza mabua makavu. Nzige wanaposonga mbele “kama mashujaa waliopangwa tayari kwa vita,” wanapanda kuta, wanaingia mbio-mbio katika majiji, na kuziingia nyumba. Hata jua, mwezi, na nyota zinatiwa giza wakati wa ‘siku ya Yehova itishayo.’​—2:1-11.

Njia ya Wokovu

lli tupate wokovu, ni lazima tukiri kwamba ‘Yehova ni Mungu na hakuna mwingine.’ “Nirudieni mimi kwa mioyo yenu yote,” Yehova anashauri. Wazee kwa vijana wanahimizwa wakusanyike katika kusanyiko la mambo mazito ili kusihi sana wakiomba upendeleo wa kimungu. Mungu ataonyesha huruma, alipie teketezo hilo lenye kuletwa na wadudu, na kubariki watu wake kwa utele. Wale wanaokiri cheo cha Yehova kuwa Mungu wa pekee wa kweli na Chanzo cha wokovu hawataaibika.​—2:12-27, NW.

Wokovu wetu unategemea pia kuitia jina la Yehova kwa imani. Kabla ya “siku ya Bwana [Yehova, NW] iliyo kuu na itishayo,” Mungu ‘atamimina roho yake juu ya wote wenye mwili.’ Vijana kwa wazee, wanaume kwa wanawake, watafanya kazi ya kutoa unabii. Hivyo, wengi watajifunza kwamba “mtu awaye yote atakayeliitia jina la Bwana [Yehova, NW] ataponywa [ataponyoka akiwa salama, NW].”​—2:28-32.

Hukumu Juu ya Mataifa

Yehova ataokoa watu wake waaminifu wakati afikilizapo hukumu juu ya mataifa. (Linganisha Ezekieli 38:18-23; Ufunuo 16:14-16.) Tiro, Sidoni, na Filistia lazima zilipe kwa kuwatenda vibaya watu wa Mungu na kuwauza utumwani. Yehova atarudisha watekwa wa Yuda na Yerusalemu, naye anawatolea adui zake wito wa ushindani, akisema: “Takaseni vita”! Lakini wao hawalinganiki na Mungu, anayefikiliza hukumu juu yao katika “bonde la Yehoshafati” lililo la ufananisho. Ingawa mbingu na dunia zitatikisika, Yehova atakuwa kimbilio kwa watu wake. Waaminifu wataokoka hukumu juu ya mataifa na kuonea maisha shangwe wakiwa chini ya hali za kiparadiso.​—3:1-21.

Masomo ya kukumbuka: Toba inahitajiwa mapema ndipo mtu aokolewe wakati wa siku ya Yehova itishayo. Kukaribia kwa siku hiyo kunapasa kutusukume tujitie katika vitendo vitakatifu na matendo ya kuogopa Mungu. Bila shaka, wokovu wetu unategemea kukiri kwamba Yehova pekee ndiye Mungu. Na tukiitia jina lake kwa imani, yeye atatuokoa wakati afikilizapo hukumu juu ya mataifa.

Unabii wa Yoeli unatutolea mambo mengine zaidi ya kufikiria. Kwani, “siku ya Bwana [Yehova, NW] iliyo kuu na itishayo” iko karibu sana! Aina ya binadamu lazima ionywe. Wakiwa kama wale nzige katika unabii wa Yoeli, Mashahidi wa Yehova wanateketeza Jumuiya ya Wakristo kwa kuifichua hali yayo ya utasa wa kiroho bila kusita-sita. Hiyo inaamsha kiruu na upinzani wa viongozi wayo, lakini vipingamizi vyovyote wanavyojaribu kuweka kama ukuta katika kijia cha nzige hao wa ufananisho vinakosa matokeo. Yehova amemimina roho yake juu ya watu wake, akiwapa vifaa vya kutangaza hukumu zake. Kwa hiyo, katika wakati mfupi uliobaki kabla ya siku ya Mungu itishayo, acheni sisi tuwe na ushiriki kamili katika kusaidia wengine ‘kuitia jina la Yehova ili tuponyoke tukiwa salama.’

[Sandiko katika ukurasa wa 30]

MAANDIKO YA BIBLIA YACHUNGUZWA

○ 1:2​—Yoeli alisema na “wazee” waliokuwa wameliongoza taifa vibaya. Kwa sababu “wenyeji wote wa nchi” walifuata uongozi huo bandia, wao pia walipaswa kutoa hesabu machoni pa Yehova. Leo, viongozi wa kidini wa Jumuiya ya Wakristo wameongoza kondoo vibaya jinsi hiyo hiyo. Kama Yoeli, Mashahidi wa Yehova wameelekeza ujumbe mbalimbali kwenye jamii hiyo ya makasisi. Hata hivyo, ni lazima watu kwa ujumla watangaziwe Neno la Mungu kwa sababu wao pia watamtolea Yehova hesabu. ​—Isaya 9:15-17; Warumi 14:12.

○ 2:1-10, 28​—Waisraeli walionywa kwamba kama hawangetii Mungu, nzige na viumbe wengine wangeyatafuna fyu mazao yao. (Kumbukumbu 28:38-45) Kwa kuwa Maandiko hayana kumbukumbu la maandishi ya kuonyesha kwamba Kanaani ilishambuliwa na wadudu kwa kadiri inayotajwa na Yoeli, inaonekana kwamba tauni aliyoeleza ilikuwa picha ya jambo fulani. Ushuhuda unaonyesha kwamba unabii huo ulianza kutimizwa kwenye Pentekoste 33 W.K., wakati Yehova alipoanza ‘kumimina roho yake’ juu ya wafuasi wa Yesu, waliotesa-tesa wanadini bandia kwa ujumbe waliopewa na Mungu. (Matendo 2:1, 14-21; 5:27-29) Sasa Mashahidi wa Yehova wanaendesha kazi kama hiyo ya uteketezaji.

○ 2:12, 13​—Nyakati za kale, mtu kurarua mavazi yake kulikuwa wonyesho wa nje-nje wa kihoro. (Mwanzo 37:29, 30; 44:13) Lakini jambo hilo lingeweza kufanywa bila moyo mweupe, kwa unafiki. Yoeli alielewesha wazi kwamba mawonyesho ya nje-nje ya huzuni hayakutosha. Watu walihitaji ‘kurarua mioyo yao’ kwa kuonyesha toba yenye kuhisiwa moyoni.

○ 2:31, 32​—Yehova aliandalia waaminifu njia ya kuokoka uharibifu wakati wa Yoeli. Sasa, katika hizi “siku za mwisho,” Mungu anafanya wokovu uwezekane kupitia Yesu Kristo. (2 Timotheo 3:1; Warumi 5:8, 12; 6:23) Hata hivyo, jina la Yehova ndilo lazima wanadamu wenye dhambi waliitie ili wapate wokovu wa milele. Hiyo inamaanisha kujua jina la kimungu, kulistahi kikamili, na kumtegemea kabisa Mwenye jina hilo. Wenye kuitia jina la Yehova kwa imani hivyo ‘wataponyoka wakiwa salama’ wakati Mungu atakapofikiliza hukumu yake juu ya mataifa wakati wa ‘siku yake kuu itishayo.’​—Sefania 2:2, 3; 3:12; Warumi 10:11-13.

○ 3:2, 14​—Mahali pa ufananisho pa kufikilizia hukumu ya kimungu katika “siku ya Bwana [Yehova, NW]” panaitwa “bonde la kukata maneno.” Pia panaitwa “bonde la Yehoshafati.” Hiyo inafaa, kwa kuwa jina Yehoshafati linamaanisha “Yehova Ni Hakimu.” Wakati wa utawala wa Mfalme Yehoshafati, Mungu alikomboa Yuda na Yerusalemu kutoka majeshi ya Moabu, Amoni, na jimbo lenye milima-milima la Seiri, akisababisha wavurugike na kuchinjana. (2 Mambo ya Nyakati 20:1-30) Katika siku yetu, “bonde la Yehoshafati” linatumika kuwa shinikizo la ufananisho ambamo mataifa yanapondwa-pondwa kama zabibu kwa kuwatenda vibaya watu wa Yehova.

○ 3:6​—Tiro, Sidoni, na Filistia zilikuwa na hatia ya kuwauza utumwani watu wa Yuda na Yerusalemu kwa Wagiriki. Inawezekana kwamba Wayahudi fulani waliotekwa na mataifa mengine waliingia mikononi mwa Watiro, Wasidoni, na Wafilisti wenye kufanya biashara ya watumwa. Kwa ubaya zaidi, labda mataifa hayo yaliwafanya watumwa Wayahudi waliotafuta kimbilio kutoka adui zao. Vyovyote ilivyokuwa, Mungu aliwapasisha wachuuzi hao wa uhai wa kibinadamu watoe hesabu kwa kuwatenda vibaya watu wake. Hiyo inaonyesha ni nini kinachongoja mataifa yanayonyanyasa watumishi wa Yehova leo.

[Hisani ya Picha katika ukurasa wa 31]

Pictorial Archive (Near Eastern History) Est.