Shangwe ya Yehova ni Ngome Yetu

“Siku hii ni takatifu kwa Bwana wetu, na msihisi maumivu, kwa kuwa shangwe ya Yehova ni ngome yenu.”—NEHEMIA 8:10, NW.

1, 2. (a) Ngome ni nini? (b) Daudi alionyeshaje kwamba alipata kimbilio kwa Yehova?

YEHOVA ni ngome isiyo na kifani. Nayo ngome ni nini? Ni boma lenye ulinzi, mahali pa ulinzi au wokovu. Daudi wa Israeli ya kale alimwona Mungu kuwa ngome yake. Mathalani, ebu fikiria wimbo ambao Daudi alielekeza kwa Aliye Juu Zaidi sana “katika siku ile ambayo Yehova alikuwa amemwokoa kutoka kwa viganja vya maadui wake wote na kutoka mkononi mwa Sauli,” mfalme wa Israeli.—Zaburi 18, maandishi ya utangulizi, NW.

² Daudi alianza wimbo huo wenye kugusa moyo kwa maneno: “Nitakuwa na shauku kwako, Ee Yehova nguvu yangu. Yehova ni jabali langu na ngome yangu na Mwaandaaji wa wokovu kwangu. Mungu wangu ni mwamba wangu. Nitapata kimbilio kwake, aliye ngao yangu na pembe yangu ya wokovu, mahali pangu pa usalama.” (Zaburi 18:1, 2, NW) Akiharamishwa isivyo haki na kufuatwa na Mfalme Sauli, Daudi aliye mnyoofu alipata kimbilio kwa Yehova, kama vile mtu aweza kukimbilia mahali pa ulinzi ili kuokoka msiba fulani.

3. Kwa nini Wayahudi wa siku za Ezra walikuwa na “shangilio kuu”?

³ Shangwe ambayo Yehova hutoa ni ngome isiyoshindwa kwa wale wanaotembea katika njia yake wakiwa washika uaminifu wa maadili. (Mithali 2:6-8; 10:29) Bila shaka, ili kuwa na shangwe itokayo kwa Mungu, ni lazima watu wafanye mapenzi ya kimungu. Kwa habari hiyo, ebu fikiria kile kilichotokea katika Yerusalemu katika 468 K.W.K. Yule mnakili Ezra pamoja na wengine walitoa uelewevu kupitia usomaji ufaao wa Sheria. Kisha watu walihimizwa: “Enendeni, mle vitu vilivyonona na mnywe vitu vitamu, mkapeleke visehemu kwa yule ambaye hakutayarishiwa kitu; kwa kuwa siku hii ni takatifu kwa Bwana yetu, na msihisi maumivu, kwa kuwa shangwe ya Yehova ni ngome yenu.” Kukawa na “shangilio kuu” Wayahudi walipotumia ujuzi waliokuwa wamepata nao wakawa na Msherehekeo wa Mabanda wenye shangwe. (Nehemia 8:1-12, NW) Wale waliofanya ‘shangwe ya Yehova kuwa ngome yao’ walipata nguvu kwa ajili ya ibada yake na utumishi wake. Kwa kuwa shangwe ya Yehova ilikuwa ngome yao, twatazamia watu wa Mungu leo vilevile wawe wenye furaha. Basi, ni zipi baadhi ya sababu zao za sasa za kuwafanya wawe na shangwe?

“Usiwe Chochote ila Uwe Mwenye Shangwe”

4. Ni gani chanzo kimoja kikuu cha shangwe kwa watu wa Yehova?

⁴ Sababu moja kubwa ya kuleta shangwe ni andalio afanyalo Yehova la kukusanyika pamoja. Makusanyiko na mikusanyiko ya Mashahidi wa Yehova huwaletea furaha leo, kama vile misherehekeo ya kila mwaka iliyofanywa na Waisraeli ilivyoleta shangwe mioyoni mwao. Watu wa Israeli waliambiwa: ‘Siku saba utaadhimisha msherehekeo [wa vibanda] kwa Yehova Mungu wako mahali ambapo Yehova atachagua, kwa sababu Yehova Mungu wako atakubariki kwa mazao yako yote na kila kazi ya mkono wako, usiwe chochote ila mwenye shangwe.’ (Kumbukumbu la Torati 16:13-15, NW) Ndiyo, Mungu aliwataka ‘wasiwe chochote ila wawe wenye shangwe.’ Ndivyo ilivyo kwa Wakristo, kwa kuwa mtume Paulo aliwahimiza waamini wenzake: “Sikuzote shangilieni katika Bwana. Mara moja tena hakika nitasema, Shangilieni!”—Wafilipi 4:4, NW.

5. (a) Shangwe ni nini, na Wakristo huipataje? (b) Twaweza kupataje shangwe tujapopata majaribu?

⁵ Kwa kuwa Yehova hututaka tuwe wenye shangwe, yeye hutupa shangwe ikiwa mojapo matunda ya roho yake takatifu. (Wagalatia 5:22, 23) Nayo shangwe ni nini? Ni hisia ya furaha nyingi iletwayo na tazamio la mazuri au la kupata mazuri. Shangwe ni hali ya furaha ya kweli, hata mchachawo. Tunda hili la roho takatifu ya Mungu hututegemeza tukiwa majaribuni. “Kwa ajili ya shangwe iliyowekwa mbele yake [Yesu] alivumilia mti wa mateso, akidharau aibu, na ameketi kwenye mkono wa kuume wa kiti cha ufalme cha Mungu.” (Waebrania 12:2, NW) Mwanafunzi Yakobo aliandika: “Fikirieni yote kuwa shangwe, ndugu zangu, mkutanapo na majaribu ya namna mbalimbali, kama mjuavyo kwamba ubora huu uliojaribiwa wa imani yenu hutokeza uvumilivu.” Lakini namna gani ikiwa hatujui jambo la kufanya kuhusu jaribu fulani? Basi twaweza kusali kwa uhakika kupata hekima ya kulikabili. Kutenda kwa kupatana na hekima ya kimbingu hutuwezesha kusuluhisha matatizo au kukabili majaribu ya daima bila kupoteza shangwe ya Yehova.—Yakobo 1:2-8, NW.

6. Kuna uhusiano gani kati ya shangwe na ibada ya kweli?

⁶ Shangwe ambayo Yehova hutoa hutuimarisha tuendeleze ibada ya kweli. Hilo ndilo jambo lililotokea katika siku za Nehemia na Ezra. Wayahudi wa wakati huo waliokuwa na shangwe ya Yehova ikiwa ngome yao waliimarishwa ili waendeleze masilahi ya ibada ya kweli. Na walipoendeleza ibada ya Yehova, shangwe yao iliongezeka. Ndivyo ilivyo leo pia. Tukiwa waabudu wa Yehova, tuna msingi mzuri wa kushangilia sana. Ebu sasa tuchunguze sababu nyinginezo chache kati ya sababu zetu nyingi za kuwa na shangwe.

Uhusiano Pamoja na Mungu Kupitia Kristo

7. Kuhusu Yehova, Wakristo wana sababu gani ya kuwa na shangwe?

⁷ Uhusiano wetu wa karibu pamoja na Yehova hutufanya kuwa watu wenye furaha zaidi duniani. Kabla ya kuwa Wakristo, tulikuwa sehemu ya jamii ya binadamu yenye kukosa uadilifu ambayo ‘akili zayo zimetiwa giza, nayo imefarakishwa na uzima wa Mungu.’ (Waefeso 4:18) Tunafurahi kama nini kwamba hatumo tena katika hali ya kufarakishwa na Yehova! Bila shaka, jitihada inahitajiwa kudumu katika upendeleo wake. Ni lazima ‘tudumu tu katika ile imani, hali tumewekwa juu ya msingi, tukawa imara; tusipogeuzwa na kuliacha tumaini la Injili.’ (Wakolosai 1:21-23) Twaweza kushangilia kwamba Yehova alituvuta karibu na Mwana wake kwa kupatana na maneno ya Yesu mwenyewe: “Hakuna mtu awezaye kuja kwangu, asipovutwa na Baba aliyenipeleka.” (Yohana 6:44) Tukithamini kikweli uhusiano wetu wenye thamani pamoja na Mungu kupitia Kristo, tutalinda dhidi ya kitu chochote kiwezacho kuuharibu.

8. Yesu amechangiaje hali yetu ya shangwe?

⁸ Msamaha wa dhambi kupitia imani katika dhabihu ya fidia ya Yesu ni sababu kubwa ya shangwe kwa sababu hilo ndilo jambo ambalo hutuwezesha kuwa na uhusiano pamoja na Mungu. Kwa mwendo wake wa kimakusudi wa dhambi, babu yetu Adamu alileta kifo kwa wanadamu wote. Hata hivyo, mtume Paulo alieleza hivi: “Mungu aonyesha pendo lake yeye mwenyewe kwetu sisi, kwa kuwa Kristo alikufa kwa ajili yetu, tulipokuwa tungali wenye dhambi.” Paulo pia aliandika: “Kama kwa kosa moja watu wote walihukumiwa adhabu, kadhalika kwa tendo moja la haki watu wote walihesabiwa haki yenye uzima. Kwa sababu kama kwa kuasi kwake mtu mmoja watu wengi waliingizwa katika hali ya wenye dhambi, kadhalika kwa kutii kwake mmoja watu wengi wameingizwa katika hali ya wenye haki.” (Warumi 5:8, 18, 19) Twaweza kuwa wenye shangwe kama nini kwamba Yehova Mungu afurahi kukomboa wale wazao wa Adamu wanaotumia vizuri andalio zuri kama hilo!

Uhuru wa Kidini na Uelewevu

9. Kwa nini sisi ni wenye shangwe kwa habari ya kidini?

⁹ Uhuru kutokana na Babiloni Mkubwa, milki ya ulimwengu ya dini ya uongo, ni sababu nyingine ya kuwa na shangwe. Ni kweli ya kimungu iliyotuweka huru. (Yohana 8:32) Na uhuru kutokana na kahaba huyo wa kidini wamaanisha kwamba hatushiriki dhambi zake, hatupatwi na mapigo yake, na kutoharibiwa pamoja naye. (Ufunuo 18:1-8) Hakuna kitu chochote cha kuhuzunisha kuhusu kuepuka hayo yote!

10. Twafurahia uelewevu gani tukiwa watu wa Yehova?

¹⁰ Kuelewa na kutumia Neno la Mungu maishani hutufanya tuwe na shangilio kuu. Tukiwa huru kutokana na uvutano wa dini ya uongo, sisi hufurahia ufahamu wa ndani unaozidi kuwa wazi na wazi unaoandaliwa na Baba yetu wa kimbingu kupitia “mtumwa mwaminifu mwenye akili.” (Mathayo 24:45-47) Kwa watu wote wanaoishi duniani, ni wale tu ambao wamejitoa kabisa kwa Yehova walio na roho yake takatifu na baraka ya kufahamu Neno lake na mapenzi yake. Ni kama Paulo alivyosema: “Mungu ametufunulia sisi [mambo ambayo ametayarishia wale wampendao] kwa Roho. Maana Roho huchunguza yote, hata mafumbo ya Mungu.” (1 Wakorintho 2:9, 10) Twaweza kuwa wenye shukrani na wenye shangwe kwamba tuna uelewevu unaoendelea kuwa bora uonyeshwao na maneno ya Mithali 4:18: “Njia ya wenye haki ni kama nuru ing’aayo, ikizidi kung’aa hata mchana mkamilifu.”

Tumaini la Ufalme na Uhai wa Milele

11. Tumaini la Ufalme lenye shangwe limeshirikiwaje na wengine?

¹¹ Tumaini letu la Ufalme pia hutufanya tuwe wenye shangwe. (Mathayo 6:9, 10) Tukiwa Mashahidi wa Yehova, kwa muda mrefu tumetangaza kwamba Ufalme wa Mungu ndio tumaini la pekee kwa wanadamu wote. Mathalani, ebu fikiria mwaka wa 1931, tulipokubali jina Mashahidi wa Yehova kupitia azimio lililopitishwa kwa shangwe katika mikusanyiko 51 kotekote ulimwenguni. (Isaya 43:10-12) Azimio hilo pamoja na hotuba yenye maana kwa mkusanyiko iliyotolewa na J. F. Rutherford (aliyekuwa wakati huo msimamizi wa Watch Tower Society) ilichapishwa katika kijitabu The Kingdom, the Hope of the World. Ndani yacho pia mlikuwa na azimio jingine lililopitishwa katika mkusanyiko huo, ambalo lilishutumu Jumuiya ya Wakristo kwa ajili ya uasi-imani wayo na kwa kudharau shauri la Yehova. Pia lilitangaza hivi: “Tumaini la ulimwengu ni ufalme wa Mungu, na hakuna tumaini jingine.” Baada ya miezi michache, Mashahidi wa Yehova waligawanya zaidi ya nakala milioni tano ya kijitabu hicho sehemu zote za dunia. Tangu wakati huo, mara nyingi sisi tumethibitisha kuwa Ufalme ndio tumaini la pekee la binadamu.

12. Ni matazamio gani yenye shangwe ya maisha yamewekwa mbele ya wale wanaomtumikia Yehova?

¹² Twashangilia pia juu ya tazamio la uhai wa milele chini ya utawala wa Ufalme. Lile “kundi dogo” la Wakristo watiwa-mafuta wana tumaini la kimbingu lenye shangwe. “Ahimidiwe Mungu, Baba wa Bwana wetu Yesu Kristo,” akaandika mtume Petro, “ambaye kwa rehema zake nyingi alituzaa mara ya pili ili tupate tumaini lenye uzima kwa kufufuka kwake Yesu Kristo katika wafu; tupate na urithi usioharibika, usio na uchafu, usionyauka, uliotunzwa mbinguni kwa ajili yenu.” (Luka 12:32; 1 Petro 1:3, 4) Leo, idadi kubwa zaidi ya Mashahidi wa Yehova watazamia uhai wa milele katika Paradiso chini ya utawala wa Ufalme. (Luka 23:43; Yohana 17:3) Hakuna watu wengine duniani walio na kitu chochote kiwezacho kulinganishwa na matazamio yetu yenye shangwe. Twapaswa kuyathamini sana kama nini!

Udugu Uliobarikiwa

13. Tuwe na maoni gani kuhusu udugu wetu wa kimataifa?

¹³ Kuwa sehemu ya udugu wa kimataifa unaokubaliwa na Mungu pia ni chanzo cha shangwe kubwa. Kwa furaha, tuna washiriki wenye kutamanika zaidi duniani. Yehova Mungu mwenyewe alielekezea siku zetu na kusema: “Nami nitatikisa mataifa yote, na vitu vinavyotamaniwa na mataifa yote vitakuja; nami nitaijaza nyumba hii utukufu.” (Hagai 2:7) Ni kweli kwamba Wakristo wote hawajakamilika. Hata hivyo, Yehova amevuta watu hao mmoja-mmoja kwake kupitia Yesu Kristo. (Yohana 14:6) Kwa kuwa Yehova amevuta kwake watu anaowaona kuwa wenye kutamanika, tutakuwa na shangwe nyingi zaidi tukiwaonyesha upendo wa kidugu, tukiwastahi sana, tukishirikiana nao katika utendaji wa kimungu, tukiwategemeza katika majaribu yao, na kusali kwa niaba yao.

14. Twaweza kupata kitia-moyo kipi kutoka 1 Petro 5:5-11?

¹⁴ Yote hayo yatachangia shangwe yetu. Kwa kweli, ni shangwe ya Yehova iliyo ngome ya udugu wetu wa kiroho ulimwenguni kote. Ndiyo, sisi sote hupatwa na mnyanyaso na magumu mengine. Lakini hilo lapaswa kutufanya tukaribiane na kutupa hisi ya muungamano tukiwa sehemu ya tengenezo la kweli la Mungu duniani. Kama Petro alivyosema, ni lazima tunyenyekee chini ya mkono wenye nguvu wa Mungu, tukimtwika hangaiko letu lote tukijua kwamba yeye hutujali. Twahitaji kuwa wenye uangalifu kwa sababu Ibilisi atafuta kutunyafua, lakini hatuko peke yetu kwa jambo hilo, kwa kuwa Petro aongezea hivi: “Mpingeni huyo, mkiwa thabiti katika imani, mkijua ya kuwa mateso yale yale yanatimizwa kwa ndugu zenu walioko duniani.” Na udugu huu wa kimataifa ulio na shangwe hautaharibika kamwe, kwa kuwa tuna uhakikisho kwamba ‘tukiisha kuteswa kwa muda kidogo, Mungu atatutengeneza, na kututhibitisha, na kututia nguvu.’ (1 Petro 5:5-11) Ebu fikiria juu ya jambo hilo. Udugu wetu wenye shangwe utadumu milele!

Maisha ya Kusudi

15. Kwa nini yaweza kusemwa kwamba Mashahidi wa Yehova wana maisha yenye kusudi?

¹⁵ Tuna shangwe katika ulimwengu wenye matatizo kwa sababu tuna maisha yenye kusudi. Tumekabidhiwa huduma inayotufanya sisi na wengine pia kuwa wenye furaha. (Warumi 10:10) Kwa kweli ni pendeleo lenye shangwe kuwa wafanyakazi wenzi wa Mungu. Kwa habari hii, Paulo alisema: “Apolo ni nani? na Paulo ni nani? Ni wahudumu ambao kwao mliamini; na kila mtu kama Bwana alivyompa. Mimi nilipanda, Apolo akatia maji; bali mwenye kukuza ni Mungu. Hivyo, apandaye si kitu, wala atiaye maji, bali Mungu akuzaye. Basi yeye apandaye, na yeye atiaye maji ni wamoja, lakini kila mtu atapata thawabu yake mwenyewe sawasawa na taabu yake mwenyewe. Maana sisi tu wafanya kazi pamoja na Mungu; ninyi ni shamba la Mungu, ni jengo la Mungu.”—1 Wakorintho 3:5-9.

16, 17. Ni vielelezi vipi viwezavyo kutajwa kuthibitisha kwamba watu wa Yehova wana maisha zenye kusudi zilizo na shangwe?

¹⁶ Vielelezo vingi vyaweza kutajwa vya kuonyesha kwamba kumtumikia Yehova kwa uaminifu hutokeza maisha yenye kusudi yatujazayo shangwe. Ni kawaida sana kusikia taarifa hii: “Nilitazama kote Jumba la Ufalme lililojaa [katika siku ya programu ya kuwekwa wakfu kwalo] na ningeweza kuona washiriki wanane wa familia yangu wakiwapo, kutia na mimi na mke wangu pamoja na watatu wa watoto wetu pamoja na wenzi wao. . . . Mimi na mke wangu tumekuwa na maisha yenye furaha sana, iliyo na kusudi katika utumishi wa Mungu.”

¹⁷ Ni jambo la kutia moyo vilevile kutambua kwamba kwa umri wowote mtu aweza kuanza maisha yenye shangwe ya kusudi halisi katika utumishi wa Yehova. Kwa kielelezo, mwanamke mmoja aliyejifunza kweli ya Biblia akiwa katika makao ya utunzaji alibatizwa kuwa mmoja wa Mashahidi wa Yehova akiwa na umri wa miaka 102. Hivyo, yeye alimaliza maisha yake akiwa na kusudi lenye shangwe, ‘akimhofu Mungu wa kweli na kushika amri zake.’—Mhubiri 12:13.

Ngome Isiyoshindwa

18. Ni nini kiwezacho kufanywa ili kushinda huzuni na kuongeza shangwe yetu?

¹⁸ Shangwe ya Yehova ni ngome isiyoshindwa kwa waaminifu. Lakini, kuwa na shangwe hiyo haimaanishi kwamba hatutakuwa na nyakati za huzuni kama zile zilizomfanya Yesu aseme hivi katika Gethsemane: “Nafsi yangu ina kihoro sana, hata kufikia kifo.” (Marko 14:32-34, NW) Na iwapo tuna huzuni kwa sababu ya kushindwa kwetu na mambo fulani ya ubinafsi. Basi tubadili mtindo wetu wa maisha. Ikiwa shangwe yetu imepungua kwa sababu tunabeba bila ubinafsi mzigo mzito wa madaraka ya Kimaandiko, labda twaweza kufanya marekebisho yatakayoondoa mkazo na kurudisha roho yetu yenye shangwe. Na zaidi, Yehova atatubariki kwa shangwe tukitafuta kumpendeza kwa kukinza kabisa mwili wenye dhambi, ulimwengu mwovu, na Ibilisi.—Wagalatia 5:24; 6:14; Yakobo 4:7.

19. Twapaswa kuonaje mapendeleo yoyote tuliyo nayo katika tengenezo la Mungu?

¹⁹ Kwa zile sababu ambazo tumezungumzia, na sababu nyinginezo nyingi, sisi tuna shangwe kuu. Tuwe wahubiri wa kutaniko au tuwe tunashiriki katika aina fulani ya utumishi wa wakati wote, sisi sote twaweza kuwa na mengi ya kufanya katika kazi ya Bwana, na kwa hakika jambo hilo litachangia shangwe yetu. (1 Wakorintho 15:58) Tuwe na mapendeleo gani katika tengenezo la Yehova, tushukuru kwa ajili yao na kwa shangwe tuendelee kutoa utumishi mtakatifu kwa Mungu wetu mwenye upendo na furaha.—1 Timotheo 1:11.

20. Pendeleo letu kubwa ni gani, na twaweza kuwa na hakika ya jambo gani?

²⁰ Hasa tuna sababu ya kushangilia katika pendeleo letu la kulichukua jina kuu la Yehova tukiwa Mashahidi wake. Ndiyo, hatujakamilika na twakabili majaribu mengi, lakini tuzingatie baraka zetu za ajabu tukiwa Mashahidi wa Yehova. Na kumbuka, Baba yetu mpendwa wa kimbingu hatatuacha. Twaweza kuwa na hakika kwamba tutabarikiwa siku zote ikiwa shangwe ya Yehova ni ngome yetu.

Ungejibuje?

◻ “Shangwe ya Yehova” ni nini?

◻ Wakristo hupataje shangwe ya kweli?

◻ Ni zipi baadhi ya sababu zinazofanya Mashahidi wa Yehova wawe wenye shangwe?

◻ Kwa nini shangwe ya Yehova ni ngome isiyoshindwa?