Yanayomaanishwa na Nyakati na Majira ya Yehova kwa Siku Zetu

“Kila mti usiozaa tunda zuri hukatwa ukatupwa motoni.”—MATHAYO 7:19.

 1. Tunaweza kujifunza nini kutokana na jinsi Yehova alivyoshughulika na watawala fulani zamani?

KUMBUKUMBU lililoandikwa katika historia linaushuhudia uhakika wa kwamba Yehova anaweza kubadili ‘majira na nyakati, kuuzulu [au, kuwaondoa] wafalme na kuwamilikisha wafalme.’ (Danieli 2:21) Katika karne zilizotangulia, aliwauzulu Farao, Nebukadreza, Belshaza, Herode Agrippa wa Kwanza, na wengine, wakati kufanya hivyo kulipolifaa kusudi lake. ‘Lakini,’ huenda wengine wakasema, ‘matukio hayo yote ni historia ya kale. Yanatuhusuje sisi? ’ Yanatuhusu sana kwa sababu hayo ni masomo makubwa sana kwetu. Tunayojifunza kwa matukio hayo ni kwamba Yehova anakomesha utawala wa viongozi wa ulimwengu na kuondoa wafalme wakati wake unapofika. Naye ameweka katika mamlaka mtawala wa uchaguzi wake wakati alipoona imefaa kufanya hivyo.

 2. Katika siku zetu umefika wakati wa Yehova kufanya nini?

² Katika siku zetu, wakati wa Yehova umefika tena wa ‘kuuzulu wafalme na kuwakimilisha wafalme.’ Lakini kwa kuwa sasa amekwisha ‘kumilikisha’ mfalme wa uchaguzi wake, karibuni Yehova ataondoa watawala wote wa ulimwengu huu, na pia mfumo mzima wa mambo ambao wanautawala. Kwa sababu gani? Kwa sababu wao, kama Belshaza wa Babuloni wa kale, ‘wamepimwa katika mizani nao wameonekana kuwa wamepunguka.’ Hali leo iko sawa na vile Danieli mtumishi wa Yehova alivyomwambia Belshaza: “Mungu ameuhesabu ufalme wako na kuukomesha.” (Danieli 5:26, 27) Basi, katika wakati wetu Yehova “atawavunia wafalme vipande vipande siku ya hasira yake. Atafikiliza hukumu miongoni mwa mataifa.”—Zaburi 110:5, 6, NW.

‘Wameonekana Kuwa Wamepunguka’

 3, 4. Watawala wa ulimwengu wameonekanaje kuwa wamepungukiwa katika karne hii, hasa kwa habari ya vita?

³ Ni kwa njia gani watawala wa ulimwengu ‘wameonekana kuwa wamepunguka’? Njia moja ni kwamba lazima wao wapate lawama iliyo kubwa zaidi kwa mambo ambayo yamepata jamaa ya kibinadamu katika wakati wetu, wakati ambao umejawa na maafa kuliko ya kizazi kinginecho chote. Kwa mfano, tangu mwaka 1914 tu karibu watu milioni mia moja wameuawa katika vita mbalimbali! Leo, silaha za nyukilia zinatisha kumaliza uhai duniani. Dakika ii hii, maelfu ya makombora ya nyukilia, yenye kusimamiwa na watu walio tayari kuyafyatusha, yameelekezwa katika maeneo makubwa yaliyo na watu wengi.

⁴ Kwa habari ya vita ya nyukilia, gazeti Science liliripoti juu ya uchanganuzi huu unaotia hofu mno: ‘Katika mtupiano wo wote mkubwa wa makombora ya nyukilia, inaelekea kuwa sehemu kubwa ya mimea na wanyama duniani itamalizwa isiwepo tena. Hata wanadamu hawatakosa kumalizwa wasiwepo tena.’ Afisa mmoja wa kiserikali katika Ulaya alisema: “Hasara hazingehesabiwa kulingana na miji iliyoharibiwa bali kulingana na mabara mazima yaliyoharibiwa.” Rais wa nchi moja ya Latini Amerika alisema hivi juu ya gharama zinazotokana na ulinzi: “Wanadamu wanasafiri katika merikebu ambayo ni rahisi kuvunjika nayo huenda ikavuja maji . . . Ikizama, ingeweza kwenda na kila mtu.” Na gazeti moja la Kijapani lilisema: “Yaelekea ulimwengu uko mbali sana na [amani] kuliko katika wakati mwinginewo wote wa historia. “

 5, 6. Hali ya uchumi ya nchi nyingi na mataifa mengi ikoje?

⁵ Hata hivyo, mataifa yanaendelea kutumia pesa zaidi na zaidi kwa silaha. Sasa gharama imepanda kufikia dola karibu trilioni moja (za U.S.) kwa mwaka! Chanzo kimoja kinasema kwamba ulimwengu unatumia kwa kila askari kiasi cha pesa ambacho ni mara 50 hivi kuliko kile inachotumia kwa kila mtoto mwenye umri wa kwenda shuleni. Fikiria, pia, ripoti ya Umoja wa Mataifa inayoonyesha kwamba watu wasiopungua milioni 450 katika sehemu zote za ulimwengu ni wenye njaa, na hesabu yao inaongezeka. Ripoti nyingine inasema kwamba “kila mwaka watu milioni 30 kufika 40 wanakufa kwa njaa” katika nchi zisizositawi sana. Inasema, pia, kwamba karibu nusu ya wale wanaokufa ni watoto walio chini ya umri wa miaka mitano.

⁶ Katika Amerika ya Kusini, afisa wa kiserikali wa nchi moja kubwa anasema kwamba “asilimia 40 ya wafanya kazi wanaishi katika umaskini wa mwisho.” Katika nchi nyingine ya kule kule, ukosefu wa kazi katika mji mkuu unahusu asilimia 51 ya wafanya kazi. Ripoti moja inakata maneno hivi: “Bara lenye watu milioni 260 limezama katika mshuko wa kiuchumi ulio mkubwa zaidi katika muda wa nusu-karne iliyopita.” Halafu, angalia vichwa hivi vikubwa vitatu kutoka nchi tofauti-tofauti: “Kiasi cha umaskini kinasemekana ‘kinashtua.’ ““Kiasi cha Umaskini Kimeongezeka.” “Umaskini ni kituko chenye maumivu.” Je, ripoti hizo zilitoka katika nchi zisizositawi sana? Hapana, zilitoka kwa maafisa wa kiserikali katika Kanada, United States, na Jamhuri ya Muungano wa Ujeremani. Ndiyo, hata yale yanayoitwa mataifa yenye utajiri yamo katika matatizo.

 7. Ni maoni gani yametolewa juu ya uhalifu na jeuri ambayo imeenea sana wakati wetu?

⁷ Katika nchi nyingi matatizo hayo yanaonyeshwa kwa mfuriko mkubwa wa uhalifu, jeuri, na uvamizi haramu. Kwa mfano, katika United States Makao ya Serikali ya Kuzuia Maradhi yanasema kwamba Waamerika zaidi ya 50,000 wanauawa au wanajiua kila mwaka! Hivyo, makala ya mhariri katika gazeti The New York Times ilikata maneno hivi: “Mambo yamepita mpaka.” Makala nyingine ya mhariri ilisema: “Huu ni wakati wa machafuko ya utawala wa mataifa.” Kwa hiyo, ijapokuwa jitihada imefanywa, ujuzi ukapatikana, na kukawa na maendeleo ya elimu ya kiufundi, viongozi wa ulimwengu wanashindwa kuwapa wengi wa watu wao mahitaji yao ya msingi.

 8. Kumbukumbu la historia iliyoandikwa linashuhudia nini?

⁸ Kwa hakika, kumbukumbu la historia, la kale na la sasa pia, linashuhudia kwamba mwanadamu akiwa peke yake hana majibu kwa matatizo hayo. Uongozi wa kisiasa, kiuchumi na kidini wa ulimwengu huu hauwezi kamwe kuleta amani, usalama, furaha, afya, na uzima tunaoutaka na kuuhitaji. Basi, ni lazima ulimwengu huu uondoke! Nao utaondoka kwa sababu ndivyo Yehova ameukusudia. Ni kama vile Biblia inavyosema: “Sasa hivi shoka limekwisha kuwekwa penye mashina ya miti; basi kila mti usiozaa matunda mazuri hukatwa na kutupwa motoni.” —Luka 3:9.

Sababu Nyingine ya Hukumu

 9. Kwa ujumla viongozi wa ulimwengu wanayachukuaje makusudi ya Yehova?

⁹ Sababu moja ambayo imemfanya Yehova auone ulimwengu huu kuwa umepungukiwa baada ya kuupima katika mizani ni yale matunda mabaya ambayo yamezaliwa na ulimwengu huo na viongozi wao, naye ataumaliza. Lakini kuna sababu nyingine: Viongozi wa ulimwengu wamemwacha Yehova—Muumba na Mwenye Enzi Kuu—katika mafikirio yao. Wao hawapendezwi kikweli na makusudi yake wala nyakati na majira yake. Ndiyo sababu andiko la Wakorintho wa Kwanza 2:8 (NW) linasema kwa usahihi hivi juu yao: “Hekima hii [ya kimungu] hakuna mmoja wa watawala wa mfumo huu wa mambo alipata kuijua.” Hivyo, Zaburi 146:3 inatushauri hivi: “Msiwatumainie wakuu, wala binadamu ambaye hakuna wokovu kwake.”

10, 11. (a) Ni jambo gani linalopasa kufanywa na wale wanaotaka kumjua Yehova? (b) Ni kwa njia gani watumishi wa Mungu wanaweza kujua yasiyojulikana na wengine?

¹⁰ Badala yake, Mithali 3:5, 6 inahimiza hivi: “Mtumaini [Yehova] kwa moyo wako wote, wala usizitegemee akili zako mwenyewe; katika njia zako zote mkiri yeye, naye atayanyosha mapito yako,” Watu wanaofanya hivyo hawatabaki katika giza la ukosefu wa tumaini lililo katika ulimwengu huu. Yehova atawabariki kwa kuwapa roho yake ili wapate kuyajua makusudi, nyakati na majira aliyoweka kwa ajili yao. Kama vile Matendo 5:32 inavyosema, Yehova anawapa roho takatifu yake “wote wanaomtii yeye kuwa mtawala.” (NW)

¹¹ Kwa hiyo watumishi wa Mungu wanayajua yasiyojulikana na watawala wa ulimwengu huu. Wao wanayajua makusudi na majira ya Yehova. Andiko la Petro wa Kwanza 1:11 (NW) linasema kwamba, zamani, watumishi wa Mungu “waliendelea kupeleleza ili wajue ni majira gani hasa au ni majira ya namna gani ambayo ile roho iliyokuwa ndani yao ilikuwa ikionyesha.” Kwa kuwa roho ya Mungu ilikuwa ikionyesha jambo hilo, mtume Paulo aliweza kuwaambia hivi waabudu wenzake wa kweli: “Ninyi watu mnayajua ni majira gani sasa.” (Warumi 13:11, NW ) Kwa kuwa watumishi wa Yehova wa leo pia wanamtii yeye kuwa mtawala, roho takatifu ya Mungu inawafunulia wao pia ni majira gani sasa kulingana na maoni yake. Amosi 3:7 inasema: “Bwana [Yehova] hatafanya neno lo lote, bila kuwafunulia watumishi wake manabii siri zake.”

Sababu Nyingine Tena

12, 13. Ni sababu gani nyingine yenye nguvu inayofanya Yehova auone ulimwengu huu na viongozi wao kuwa umepungukiwa?

¹² Wazo hilo linatuleta kwenye sababu nyingine tena ambayo imemfanya Yehova auone ulimwengu huu na viongozi wao kuwa wamepungukiwa na kuwa atawaangamiza. Kumbuka mambo ambayo Farao, Belshaza, Herode, na watawala wengine wa zamani waliwatenda watumishi wa Yehova. Waliwapinga, wakawatesa, na hata wakawaua. Mungu aliwapasisha watawala hao wajibu wa matendo yao.

¹³ Ndivyo ilivyo katika siku zetu. Watawala mbalimbali wa ulimwengu wamepinga, wakatesa, na hata wakaua watumishi wa Yehova wenye amani. Watawala hao ‘wananena hata maneno yaliyo dhidi ya Aliye Juu Zaidi, na wanaendelea kuwanyanyasa watakatifu wenyewe wa yule Aliye Mkuu Zaidi.’ (Danieli 7:25; 11:36, NW) Lakini masimulizi yaliyoandikwa kwa roho ya Mungu kwenye Isaya 54:17 yanatangaza hivi: “Kila silaha itakayofanyika juu yako haitafanikiwa. . . . Huu ndio urithi wa watumishi wa [Yehova].” Kwa hiyo, wapinzani wote watashushwa, sawasawa na wengine walivyofanywa zamani. Kwa upande mwingine, Yehova anaahidi kwamba watu wake watapata wokovu na ufanisi.

Wakati wa Kufunga Mambo Unakaribia

14, 15. (a) Tunaishi katika kipindi gani cha wakati, na inatupasa tutii maonyo gani? (b) Viongozi wa ulimwengu wajapofanya jitihada zo zote, ni nini kinachokuja kasi?

¹⁴ Kwa hiyo, kwa maoni ya Mungu, sasa ni saa ngapi? Ni saa ya kufunga mambo ya ulimwengu huu, Jua lao linashuka. Usiku wao unakaribia mbio-mbio. Majira ya baridi karibu yaufikilie. Ushuhuda wote unaotimiza unabii wa Yehova na orodha ya Yehova ya wakati vinaonyesha kwamba tunaishi katika “siku za mwisho.” kwenye “umalizio wa mfumo wa mambo.” (2 Timotheo 3:1-5; Mathayo 24:3-14;) Hivyo tunahitaji kulithamini onyo hili la Yesu: “Endeleeni kusali kwamba kukimbia kwenu kusije kukatukia katika wakati wa baridi.” (Mathayo 24:20, NW ) Utakapokuja wakati wa usiku, au wa baridi, wa ulimwengu huu, itakuwa ni kuchelewa mno kutafuta upendeleo..wa Yehova muda huo.

¹⁵ Hivyo, wakati wa kuukomesha ulimwengu huu unaodharau Mungu unakuja kasi. Ufikapo, Yehova atatumia nguvu kuwaondoa katika cheo watawala wote wa ulimwengu. Mipango yao isiyozaa matunda na isiyo na tumaini itakoma, hata kama waliifanya kwa weupe gani wa moyo. Ni kweli kwamba huenda wakajaribu kuchangamsha watu wao kwa kufanya mapatano ya kuacha kuunda silaha na mipango mingine mbalimbali ya ‘amani na usalama,’ hata kwa kuwa na ‘miaka mitakatifu.’ Lakini bado tu wanaendelea kusonga mbele bila kulegea kukielekea kile kivumbi cha mwisho kwenye Har–Magedoni.—Ufunuo 16:13-16.

16. Yehova amempa nani utawala wa ulimwengu?

¹⁶ Pia, kumbuka kwamba zaidi ya Yehova ‘huuzulu wafalme’ ‘anawamilikisha wafalme’ pia. (Danieli 2:21) Majeshi ya kimbingu atakayoyatumia Yehova kufikiliza hukumu zake kwenye Har–Magedoni yataongozwa na Mtawala ambaye yeye ‘amemilikisha’ kwa ajili ya dunia yote. Huyo ni mwanaye mwaminifu, Kristo Yesu. ambaye sasa yu katika uwezo na utukufu wa kimbingu. Ufunuo 19:16 unamwita “Mfalme wa wafalme, na Bwana wa mabwana.” Andiko la Danieli 7:14 linasema: “Naye akapewa mamlaka. na utukufu, na ufalme, ili watu wa kabila zote na taifa zote, na lugha zote, wamtumikie; mamlaka yake ni mamlaka ya milele ambayo haitapita kamwe, na ufalme wake ni ufalme usioweza kuangamizwa.”—Ona pia Danieli 2:44.

17, 18. (a) Neno la Mungu linasema ni nini litakalowapata wale wasiomtambua yeye na mtawala aliyemweka rasmi aitawale dunia hii? (b) Ni nani mwingine anayejua kwamba wakati uliobaki si mwingi?

¹⁷ Neno la Mungu la kiunabii linaeleza waziwazi litakalowapata wale wasiomtambua Yehova na Mtawala aliyemweka rasmi atawale dunia yote. Linasema hivi: “Kisha nikaona malaika mmoja amesimama katika jua; akalia kwa sauti kuu, akiwaambia ndege wote warukao katikati ya mbingu, Njoni mkutane kwa karamu ya Mungu iliyo kuu; mpate kula nyama ya wafalme, na nyama ya majemadari, na nyama ya watu hodari, na nyama ya farasi na ya watu wawapandao, na nyama ya watu wote, waungwana kwa watumwa. wadogo kwa wakubwa. “—Ufunuo 19:17, 18.

¹⁸ Andiko la Yeremia 25:33 linaeleza hayo kwa njia hii: “Waliouawa na [Yehova] siku ile watakuwapo, toka upande mmoja wa dunia hata upande wa pili; hawataliliwa, wala kukusanywa, wala kuzikwa; watakuwa samadi juu ya uso wa nchi.” Ndiyo, kwa mfumo mzima wa Shetani wa mambo yenye ufisadi, huu ni wakati wa kufunga. Hata yeye anajua hivyo! Ufunuo 12:12 unasema kwamba yeye anajua amebakiwa na “wakati mchache tu.”

Mtafute Yehova Sasa

19. Ni siku na majira gani ya kusisimua yatakayoanza baada ya mfumo huu kukomeshwa?

¹⁹ Uishapo wakati wa usiku, au wa baridi, wa mfumo wa Shetani, itakuwaje halafu? Hapo ndipo utakapofika wakati wa Yehova kuleta siku mpya nyangavu. majira mapya yenye umoto wa kusisimua. Utakuwa wakati wa kuanza Utaratibu Mpya wa Yehova wenye uadilifu, chini ya utawala wa Mfalme wake wa kimbingu. Kristo Yesu. Katika Utaratibu Mpya huo, jeuri, udhalimu, taabu, ugonjwa, na kifo hayatakuwapo tena. Wanadamu watainuliwa kwenye hali ya ukamilifu, wakiwa na tazamio la kupata uzima wa milele. Hilo ni tazamio la kuburudisha wee! —Zaburi 37:10, 11, 29; Ufunuo 21:4.

20, 21. Ni kwa njia gani watu wa kutoka mataifa yote wanamtafuta Yehova sasa?

²⁰ Lakini, kabla mfumo huu haujaisha na ule mfumo mpya kuanza, haya ni majira ya Yehova kufanya jambo la maana sana kwa ajili ya wapole wa dunia. Ni wakati wake wa kukusanya pamoja wale wanaotaka kujifunza juu yake, wanaotaka kutii mapenzi yake, na watakaokubali kumwinamia mfalme wa uchaguzi wake. Kwa kufanya hivyo, wao wanakuja chini ya ulinzi wa Yehova: “Jina la [Yehova] ni ngome imara; mwenye haki huikimbilia, akawa salama.”—Mithali 18:10.

²¹ Leo, watu wengi wanafanya hivyo—kwa kweli, ni mamilioni. Nao wanatoka katika kila taifa la dunia, Hao wanasimuliwa hivi katika Zekaria sura ya 8, mistari 20 na 21: “[Yehova] wa majeshi asema hivi, Itatokea halafu ya kwamba watakuja mataifa na wenyeji wa miji mingi; wenyeji wa mji huu watauendea mji huu, wakisema, Haya! twendeni zetu kwa haraka tuombe fadhili za [Yehova], na kumtafuta [Yehova] wa majeshi Mstari wa 23 unaongeza hivi: “Siku hizo watu kumi, wa lugha zote za mataifa, wataushika upindo wa nguo yake yeye aliye Myahudi; naam, wataushika wakisema, Tutakwenda pamoja nanyi, kwa maana tumesikia kwamba Mungu yu pamoja nanyi.”

22. Ni lazima tuthamini na kufanya nini ikiwa tunataka kuiokoka siku ya hasira ya Yehova?

²² Basi, abudu Yehova pamoja na watu wake na uje mahali pa usalama. Shiriki katika kazi iliyo ya maana zaidi inayofanywa duniani leo—kukusanywa na kuzoezwa kwa wale watakaookoka Har–Magedoni na watakaokuwa na taraja zuri ajabu la kujenga paradiso duniani na kuishi humo milele. Thamini sasa ni wakati na majira gani kisha ufanye vile Isaya 55:6 inavyohimiza: “Mtafuteni [Yehova], enyi nyote mlio wanyenyekevu wa dunia, ninyi mliozitenda hukumu zake; itafuteni haki, utafuteni unyenyekevu; huenda mtafichwa katika siku ya hasira ya [Yehova].”—Sefania 2:3.

Questions for Review

◻ Ni kwa njia gani watawala wa ulimwengu ‘wameonekana kuwa wanapungukiwa’ machoni pa Mungu

◻ Ni kwa sababu gani watumishi wa Yehova wanajua nyakati na majira Yake hali watawala wa ulimwengu hawajui?

◻ Ni kwa sababu gani watawala wengi wanastahili hukumu kali ya Mungu?

◻ Kwa maoni ya Yehova, ni wakati na majira gani yamefika?

◻ Ni kwa sababu gani na jinsi gani inatupasa tumtafute Yehova sasa?

[Picha katika ukurasa wa 18]

Wengi wanaojizoeza imani sasa watauokoka wakati wa ulimwengu huu wa kufunga mambo