Sura 11
Yerusalemu wa Kidunia Watofautiana na Yerusalemu wa Mbinguni
1. (a) Je! Kuharibiwa kwa Yerusalemu kungekuwa jambo jipya? (b) Kwa sababu gani haingekuwa msiba kwa wanadamu wote ikiwa Yerusalemu ungeharibiwa tena?
WALE ambao leo ni Wayahudi kulingana na mwili wameazimia kwamba Yerusalemu katika Mashariki ya Kati utadumu milele. Hata watu wa Jumuiya ya Wakristo wangali wanauheshimu sana mji huo ambako Yesu alimalizia huduma yake. Lakini je! yote hayo yanahakikisha kwamba mji huo utaendelea kuwapo? Umetangulia kuharibiwa na Wababuloni 607 K.W.K., tena na Waroma 70 W.K. Je! Ingemaanisha msiba kwa wanadamu wote ikiwa ungeharibiwa tena? Hapana, mji huo hauhitajiwi ili baraka za agano la Kiabrahamu ziwamiminikie wanadamu. Hata kwa habari ya Abrahamu imeandikwa hivi: “Alikuwa akiutazamia mji wenye misingi, ambao mwenye kuubuni na kuujenga ni Mungu.”—Waebrania 11:10.
2. (a) Mtume Paulo anaonyeshaje kwamba kuna Yerusalemu ulio juu zaidi? (b) Ni nani aliye Mume Mwenye Yerusalemu huyo, na ni nani walio wanaye kupitia yeye?
2 Mtume Paulo aliandika: “Lakini Yerusalemu wa juu yuko huru, naye ni mama yetu sisi.” (Wagalatia 4:26, NW) Hapo, yeye alionyesha kwamba Yerusalemu wa mbinguni, alilingana na Sara na alikuwa ndiye tengenezo lililo mfano wa mke wa yule Abrahamu Mkubwa Zaidi, Yehova Mungu. Kwa sababu hiyo, wale wana wa “Yerusalemu wa juu” ni Wakristo waliozaliwa kwa roho, kama Paulo.
“Yerusalemu wa Juu” Wawa Mji wa Kifalme
3. (a) Ni wakati gani Yehova Mungu mwenyewe alianza kutawala? (b) Ni wapi Yesu Kristo alikotawazwa, na hilo lilikuwa na matokeo gani juu ya huu umaliki wa Yehova mwenyewe?
3 Tangu “nyakati zilizowekwa za mataifa” zikome 1914 “Yerusalemu wa juu” umechukua hali ya kifalme. (Luka 21:24, NW) Tangu hapo, Zaburi 97:1, NW inatumika: “Yehova mwenyewe amekuwa mfalme! Acha dunia ishangilie.” Vilevile Zaburi 99:1, 2, NW inatumika: “Yehova mwenyewe amekuwa mfalme. . . . Yehova ni mkuu katika Sayuni, na yeye yuko juu, juu ya vikundi vyote vya watu.” Mwaka wa 1914 wakati ulifika kwake akomeshe kule kukanyagwa-kanyagwa kwa Ufalme katika ukoo wa kifalme wa Daudi, kama ulivyowakilishwa na Yerusalemu ambao wakati mmoja ulikuwa mji wa kifalme. Kwa sababu hiyo, yeye alimtawaza Mwanaye Yesu Kristo, awe Mfalme kwenye mkono Wake mwenyewe wa kuume katika “Yerusalemu wa juu,” Yerusalemu wa mbinguni, kwa njia hiyo akaufanya mji wa kifalme. Umaliki wa Yehova Mungu mwenyewe unatiwa nguvu au kuongezewa ukubwa kwa kutawazwa kwa Yesu Kristo kuwa Mfalme.
4. Ni kwa matukio gani “Yerusalemu wa juu” umepata kuwa mji wa kifalme tangu 1914?
4 Kwa hiyo baada ya Ufalme wa kimbingu kuzaliwa 1914 na baada ya Shetani na mashetani zake kufukuzwa kutoka mbinguni, ilifaa itangazwe hivi: “Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake; kwa maana ametupwa chini mshitaki wa ndugu zetu, yeye awashitakiye mbele za Mungu wetu, mchana na usiku”! (Ufunuo 12:1-10) “Mamlaka ya Kristo wake” yalikuwa ili Yeye huyo atawale akiwa Mfalme katika “Yerusalemu wa juu.” Kweli kweli, akawa mji wa kifalme katika mwaka huo wenye maana kubwa wa 1914.
Binti wa “Yerusalemu wa Juu”
5, 6. (a) Katika Ufunuo 21:1, 2, Yohana anaona mji gani mpya wa mfano? (b) Ule ukaribishaji wa kifalme kama ulivyoonyeshwa katika Zekaria 9:9, 10 unatolewa na nani, na kwa maneno gani?
5 Zaidi ya robo karne baada ya Yerusalemu kuharibiwa na majeshi ya Warumi mwaka wa 70 W.K., mtume Yohana alipewa yale maono ya ajabu sana katika kitabu cha Ufunuo. Katika Ufunuo 21:1, 2, Yohana anasema juu ya “Yerusalemu mpya.” Wale wanaokuwa huu “Yerusalemu mpya” ndio wanaomkaribisha kwa furaha yule Mfalme-mtawazwa mpya ambaye anakuja katika jina la Yehova, kama vile wanavyoombwa kufanya katika Zekaria 9:9, 10, katika maneno haya:
6 “Furahi sana, Ee binti Sayuni; piga kelele, Ee binti Yerusalemu; tazama, mfalme wako anakuja kwako; ni mwenye haki, naye ana wokovu; ni mnyenyekevu, amepanda punda . . . Na gari la vita nitaliondoa liwe mbali na Efraimu, na farasi awe mbali na Yerusalemu, na upinde wa vita utaondolewa mbali; naye atawahubiri mataifa yote habari za amani; na mamlaka yake yatakuwa toka bahari hata bahari, na toka Mto hata miisho ya dunia.”
7. Unabii huo umetimizwa na nani katika wakati huu wa “umalizio wa mfumo wa mambo,” na kwa njia gani?
7 Unabii huu ulitimizwa kwa sehemu wakati Yesu Kristo alipopanda kuingia Yerusalemu kwa shangwe na vigelegele mwaka wa 33 W.K. Tangu 1919 umekuwa na utimizo wake wa mwisho juu ya mabaki ya Israeli wa kiroho. Hakuna mgawanyiko kati ya washiriki wa mabaki hayo yaliyopakwa mafuta, kama ule uliokuwako kati ya yale makabila ya Efraimu wa kale na Yerusalemu, ule mji mkuu wa ufalme wa Yuda wa makabila mawili. Kwa kutumikia kwa umoja masilahi ya Ufalme wa Kimasihi kwa kusudi la kutimiza unabii wa Yesu kwenye Mathayo 24:14 na Marko 13:10, wao wanaendelea kumshangilia Mfalme mwenye ushindi, Yesu Kristo. Kwa umoja usioweza kuvunjwa wao wanajitiisha kishikamanifu kwa utawala wake wa kifalme wakati wa huu “umalizio wa mfumo wa mambo.”—Mathayo 24:3, NW.
8. (a) Ni nani wanaoshindwa kumkaribisha yule Mfalme mshindi? (b) Hao wamo mwendoni kuelekea wapi na kwenye kitu gani?
8 Kwa aibu yao, pamoja na Yerusalemu wa ile Jamhuri ya Israeli, yale mataifa yenye sifa ya kuwa Wakristo ambayo ndiyo Jumuiya ya Wakristo hawamkaribishi Mfalme mwenye ushindi anayekuja katika jina la Yehova. Hata hivyo, kunao wale ambao ni mashahidi wa Yeye ambaye katika jina lake anakuja, wakitumikia Yeye kwa shangwe katika hekalu lake. (Isaya 43:10-12) Macho yao ya kiroho yamefunguliwa waone kwamba ile Jamhuri ya Israeli pamoja na mataifa mengine yote ndani na nje ya UM sasa yameendelea sana katika mwendo wao kwenye “mahali paitwapo kwa Kiebrania Har–Magedoni.” (Ufunuo 16:16) Ile vita ya Mungu Mwenyezi imekaribia karibu!
9. Wakati ujao wa Yerusalemu wa kidunia unatofautianaje kabisa na ule wa Yerusalemu Mpya?
9 Wakati ujao wa Yerusalemu wa kidunia ni wenye huzuni, lakini ule wa Yerusalemu Mpya ni wenye furaha. Katika wakati wake, “zile pembe kumi” za yule “mnyama” wa kisiasa, pamoja na “mnyama” mwenyewe watageuka na kuchukia mfumo wa yule kahaba, Babeli Mkuu, ile milki ya ulimwengu ya dini ya uwongo. Wataonyesha chuki yao yenye jeuri juu ya Yerusalemu wa kidunia wenye kuheshimiwa sana kidini na kuuharibu kana kwamba kwa kuuteketeza kwa moto mkubwa. (Ufunuo 17:16) Lakini hawataweza kamwe kamwe kuugusa Yerusalemu Mpya wa kimbingu.
10. Yerusalemu wa kidunia unafuataje mwendo ulio tofauti na ule wa Wakristo waliozaliwa kwa roho na wenzi wao, ule “mkutano mkubwa”?
10 Mabaki ya Wakristo waliozaliwa kwa roho wanaotazamiwa kuwa sehemu ya Yerusalemu Mpya wa kimbingu wanaendelea kumshangilia yule Bwana-Arusi Mfalme, Yesu Kristo, pamoja na ule “mkutano mkubwa” wa mashahidi wengine wa Yehova. Katika mwendo huu wa tendo wa ushikamanifu, wao ni wenye kutokeza sana wakiwa tofauti sana na Yerusalemu wa kale. Tangu kuanzishwa kwa ile Jamhuri ya Israeli, ule mji wa Yerusalemu ambao sasa unakaliwa na Wayahudi wengi unafuata mwendo wa wakazi wa Yerusalemu wa karne ya kwanza. Chini ya uvutano wa kidini wenye kupofusha, unaendelea kumkataa Yesu Kristo, Yeye aliye na haki na mamlaka ya kutawala katika Ufalme wa kimbingu.
11, 12. (a) Ule utimizo wa unabii wa Yesu unaostahili kuangaliwa kwenye Mathayo 24:14, umetimizwa na nani hasa? (b) Ile Sosaiti wanayofanya kazi pamoja nayo, ina nini katika Jamhuri ya Israeli leo?
11 Kweli, tangu mwisho wa Majira ya Mataifa mwaka wa 1914, “Mwana-Mfalme wa Amani” amekuwa akitawala katika mbingu, bila kuonekana na macho ya wanadamu. Hata hivyo, tangu Yerusalemu ulipotekwa na Waingereza katika Vita ya Ulimwengu ya Kwanza na Uingereza ukapewa na Ushirika wa Mataifa mamlaka ya kuusimamia, zile habari njema za Ufalme wa kimbingu ukiwa mikononi mwa Mwana wa Kimasihi wa Mfalme Daudi zimekuwa ‘zikihubiriwa katika dunia yote inayokaliwa na watu kwa ushuhuda kwa mataifa yote,’ kama Yesu Kristo mwenyewe alivyotabiri.—Mathayo 24:14, NW.
12 Utimizo huu wa unabii unaostahili kuangaliwa umekuwa ukitimizwa na Mashahidi wa Yehova chini ya uangalizi wa Sosaiti ya Mnara wa Mlinzi. Sosaiti hii hata ina afisi ya tawi katika Tel Aviv, ambako kutoka huko utendaji wa Mashahidi wa Yehova unaelekezwa kote kote katika eneo la Israeli. Pia kuna makundi ya mashahidi wenye kutenda wa Yehova ambao sasa wanatangaza gospeli ya Ufalme katika nchi hiyo.
13. (a) Ni nini kinachofuata baada ya habari njema za Ufalme wa Mungu kuhubiriwa kikamilifu? (b) Je! Kutakuwako uhitaji wa Yerusalemu mwingine wa kidunia, hata ili kumpokea Daudi katika ufufuo?
13 Yesu Kristo alitabiri kwamba kuhubiriwa kwa “habari njema hizi za ufalme” kukiisha timizwa kabisa, “ule mwisho” ungekuja juu ya huu mfumo wa mambo wa kilimwengu. (Mathayo 24:14, NW) Kwa sasa mwisho wa Yerusalemu wa kidunia u karibu. Wakati huu, inaonekana hakuna uhitaji wa Yerusalemu mwingine kujengwa katika mahali pao pa kale, hata ili kumpokea Daudi, ambaye wakati mmoja alikuwa mfalme wa Yerusalemu, kupitia ufufuo wa wafu chini ya Ufalme wa Mileani wa mzao wake wa kifalme, Yesu Kristo. (Yohana 5:28, 29) Hata hivyo, inaelekea sana kuwa Daudi atarudishwa kwenye sehemu ile ile ambayo katika hiyo yeye alimtumikia Yehova Mungu zamani.
Wakati wa Kufurahi
14, 15. (a) Mtume Yohana anaelezaje juu ya Yerusalemu Mpya wenye utukufu pamoja na kushuka kwao kutoka mbinguni kwa ajili ya kubariki wanadamu? (b) Kwa sababu gani wakati wetu ni wakati wa kufurahi, na ni kipindi gani cha furaha ya ulimwengu wote kinachokaribia?
14 Yerusalemu Mpya unashirikishwa na ule mfumo mpya wa mambo wenye utukufu. Asema hivi mtume Yohana: “Nikaona mbingu mpya na [dunia] mpya; kwa maana mbingu za kwanza na [dunia] ya kwanza zimekwisha kupita, wala hapana bahari tena. Nami nikauona mji ule mtakatifu, Yerusalemu mpya ukishuka kutoka mbinguni kwa Mungu, umewekwa tayari, kama bibi-arusi aliyekwisha kupambwa kwa mumewe. Nikasikia sauti kubwa kutoka katika kile kiti cha enzi ikisema, Tazama, maskani ya Mungu ni pamoja na wanadamu naye atafanya maskani yake pamoja nao, nao watakuwa watu wake. Naye Mungu mwenyewe atakuwa pamoja nao.” (Ufunuo 21:1-3) Hivyo, Yerusalemu Mpya utakuwa baraka kwa wanadamu wote.
15 Hilo laufanya wakati wetu uwe wakati wa furaha. Kuongezea furaha yote hiyo, kipindi cha upendezi wa ulimwengu mzima na cha furaha ya ulimwengu mzima kinakaribia. Ni ile ndoa ya jamii ya bibi-arusi iliyo na hesabu kamili, Yerusalemu Mpya, na Yesu Kristo Mfalme. Kama ilivyoandikwa kwenye Ufunuo 19:6-9, NW: “Na mimi [mtume Yohana] nikasikia kilichokuwa kama sauti ya umati mkubwa, na kama mvumo wa maji mengi na kama mvumo wa mingurumo mizito. Walisema: ‘Sifuni Yah, enyi watu, kwa sababu Yehova Mungu wetu, Mwenye Nguvu Zote, ameanza kutawala akiwa mfalme. Acheni sisi tushangilie na kufurahi mno, na acheni sisi tumpe yeye utukufu, kwa sababu ndoa ya Mwana-Kondoo [Yesu Kristo] imefika na mke wake amejitayarisha mwenyewe. Ndiyo, amepewa kupambwa nguo-kitani yenye kung’aa safi, bora, kwa maana nguo-kitani bora inawakilisha matendo ya uadilifu ya watakatifu.’ Na yeye aniambia: ‘Andika hivi: Wenye furaha ni wale walioalikwa kwenye mlo wa jioni wa ndoa ya Mwana-Kondoo.’”
16. (a) Kwa ndoa yao ya kimbingu na Mwana-Kondoo, Yerusalemu Mpya unakuwa mama ya nani? (b) Yerusalemu mpya utathibitika kuwa baraka kwa upatani kabisa na nini?
16 Muungano huo katika ndoa pamoja na Mwana-Kondoo Yesu Kristo utamaanisha furaha isiyosemeka kwa Yerusalemu Mpya wa mfano mbinguni. Kupitia huo atakuwa “mama ya watoto mwenye furaha.” (Zaburi 113:9) Ndiyo, yeye atakuwa mama ya kimbingu kwa wanadamu wote, wanaoishi na waliokufa, ambao mumeye mpendwa alikomboa kwa dhabihu yake kamilifu ya kibinadamu karne 19 zilizopita. Kwa upatani kabisa na agano la Yehova la Kiabrahamu la maelfu ya miaka iliyopita, Yerusalemu Mpya utathibitika kuwa baraka kwa jamaa zote za dunia.
[Picha katika ukurasa wa 96]
Katika mfumo mpya wa mambo, Yerusalemu Mpya utabariki wanadamu wote