Masomo Kutokana na Maandiko: Zekaria 1:1-14:21

Yehova Achochea Roho ya Watu Wake

MWISHONI mwa 538 K.W.K. au mapema katika 537 K.W.K., Sairasi (Koreshi) mfalme Mwajemi alitoa amri ya kwamba Wayahudi wanapaswa kurudi kutoka Babuloni kwenda Yerusalemu ‘kujenga upya nyumba ya Yehova.’ (Ezra 1:3, NW) Hata hivyo, kufikia 520 K.W.K. hekalu lilikuwa halijajengwa bado. Kwa sababu hiyo, Yehova aliinua mnabii Zekaria afanye kazi pamoja na Hagai kuchochea roho ya watu.

Maneno ya Zekaria yenye uvuvio yaliwatia nguvu mpya Wayahudi waaminifu kwa kuonyesha kwamba Yehova alikuwa akiwaunga mkono na angebariki kazi yao. Kitabu hiki cha Biblia kinatia shauku ndani yetu pia kwa sababu kina manabii ya Kimesiya, na pia manabii mengine yanayotimizwa wakati wetu.a Pia kinatuandalia masomo ya thamani kubwa.

Yehova Abariki Watu Wake

Yehova anahangaikia watu wake. Baada ya Wayahudi kukiri kwamba ilikuwa haki Mungu kuwatia nidhamu, Zekaria anapata njozi tatu zinazoonyesha kwamba Yeye anaendelea kuwahangaikia. Katika njozi ya kwanza, anaona farasi ambao wapandaji ni malaika. Malaika mmoja anafadhaika kwa sababu mataifa yaliyosababisha afa la Wayahudi ‘yametulia yakiwa na starehe.’ Katika njozi ya pili, Yehova anaazimia kuzitupa chini “pembe nne”​—serikali zenye nguvu zilizotawanya watu wake. Na njozi ya tatu inaeleza kwa udhihirifu mwingi juu ya utunzaji wa Yehova wenye upendo na ulinzi kwa Yerusalemu.​—1:1-2:13.

Hakuna mtu ataweza kuzuia watumishi waaminifu wa Mungu. Katika njozi ya nne, Shetani, yule mkinzani mkuu wa watu wa Yehova, anakemewa wazi kabisa. (Linganisha Ufunuo 12:10.) Katika njozi ya tano, Zekaria anapata kujua kwamba watu wa Mungu watafanya penzi Lake kujapokuwako vipingamizi vilivyo kama milima. Jinsi gani? “Si kwa uwezo [kani ya kijeshi, NW], wala si kwa nguvu, bali ni kwa roho yangu, asema Bwana wa majeshi.”​—3:1-4:14.

Watumishi wa Mungu ‘wanachukia lililo baya.’ (Zaburi 97:10, 11, NW) Katika njozi ya sita, Mungu anatamka laana juu ya watenda maovu ambao kufikia hapo wameendelea bila kuadhibiwa. Na katika njozi ya saba, uwakilishi wa uovu unapelekwa mbali kwenye “nchi ya Shinari,” mahali pa dini bandia ya Kibabuloni. Kweli umepelekwa mahali panapoufaa! Uovu haupasi kuwa miongoni mwa watu wa Yehova, ambao wanauchukia. Ndipo Zekaria anapoona magari manne yenye kukokotwa na farasi​—kani-roho za kimalaika zilizopewa utume wa kulinda watumishi wa Mungu duniani.​—5:1-6:8.

Mionzi ya Kiunabii Yenye Matumaini Mazuri

Utimizo wa neno la kiunabii la Yehova unasisimua na kuimarisha imani. Hii ni kweli kama nini kuhusu mionzi ya kiunabii ya Zekaria yenye matumaini mazuri kwa siku yetu! Yeye anapaswa, kumfanyia Yoshua Kuhani wa Juu taji tukufu, akitumia fedha na dhahabu iliyochangwa na Wayahudi wahamishwa. Zaidi ya hilo, “walio mbali [katika Babuloni] watakuja na kujenga katika hekalu la BwANA[Yehova, NW],” hata kama vile wengi walivyoacha Babuloni Mkubwa wakasaidie katika kazi ya hekalu baada ya 1919. Usahihisho wa mawazo yenye makosa juu ya kufunga uliongoza kwenye uelezaji wa hali inayokuja yenye shangwe kwa Yerusalemu. Ilitabiriwa kwamba ‘watu kumi kutoka mataifa yote’ wangejiunga na Wayahudi wa kiroho katika ibada ya kweli. (Wagalatia 6:16; Ufunuo 7:4-10) “Piga kelele [paaza sauti kwa shangwe ya ushindi, NW], Ee binti Yerusalemu,” Yehova anasema. Mfalme wa Yerusalemu anakuja akipanda punda na ‘atawahubiri mataifa habari za amani.’​—6:9-9:11.

Mungu na Wachungaji

Waangalizi wana daraka zito na wanapaswa kutumikia kwa bidii. Baada ya kuahidi kuokoa watu wake, Yehova anaonyesha hasira yake dhidi ya wachungaji wasio waaminifu. “Wachungaji watatu” wanafisidi kundi kwa kadiri kubwa sana hivi kwamba Mungu anavunja agano lake pamoja na watu wake. Yerusalemu atakuwa “jiwe la kuwalemea watu.” Wowote wamshambuliao “watapata jeraha nyingi.” Lakini “wakuu [mashekhe, NW] wa Yuda”​—wale wenye uangalizi miongoni mwa watu wachaguliwa wa Mungu​—ni lazima wawe “kama kigae chenye moto [tochi ya moto, NW],” wakiwa na bidii yenye kutokeza ajabu.​—9:12-12:14.

Yehova anawachukia mabandia. Katika kundi la Mungu, wowote wanaokazania tu ‘kunena uongo’ ‘wanatumbuliwa’ (kutobolewa tokea upande mmoja hadi mwingine, NW), wakikataliwa kuwa waasi-imani. “Mafungu mawili” katika bara yatakatiliwa mbali, huku sehemu ya tatu ikitakaswa kwa kupitishwa motoni. Kwa ulinganifu wa jambo hili, wengi zaidi kati ya wale wanaodai kuwa Wakristo​—wale wa Jumuiya ya Wakristo​—wamekatiliwa mbali na Yehova. Kuanzia 1919 na kuendelea, Wakristo waaminifu wachache waliopakwa mafuta ndio tu wameitia jina la Yehova na kujitiisha kwenye hatua-hatua zake za utakasaji.​—13:1-9.

Watu wa Yehova wanaweza kutegemea ulinzi wake. Adui watakapojaribu kuharibu waabudu wa kweli, Mungu atalinda watu wake na kufutilia mbali umati wa Shetani. Kugawanywa kwa Mlima wa Mizeituni kunatokeza bonde la ufananisho ambamo wapakwa-mafuta wanapata ulinzi chini ya Ufalme wa Yehova wa ulimwengu wote mzima na serikali ya Kimesiya ya Mwana wake. Kutakuwa na nuru kwa watumishi waaminifu wa Mungu na giza kwa mataifa. Ni lazima aina ya binadamu wachague: Ama kuabudu Yehova pamoja na watu wake ama wapate uharibifu wa milele.​—14:1-21.

[Maelezo ya Chini]

[Sanduku katika ukurasa wa 31]

MAANDIKO YA BIBLIA YACHUNGUZWA

○ 1:3​—Ingawa Wayahudi walirudi kutoka Babuloni katika 537 K.W.K., walihimizwa pia kumrudia Mungu kwa utii na ibada ya nafsi nzima. Wangetoa ushuhuda unaoonekana wa kurudi hivyo kwa kujihusisha katika kazi ya kujenga upya mpaka hekalu limalizwe.

○ 2:1-5​—Inaelekea kwamba kijana huyu alikuwa akipima Yerusalemu ili ajenge ukuta wa ulinzi kuuzunguka. Lakini malaika wa Mungu alionyesha kwamba ukuzi wa jiji haukupasa kuwekewa mipaka na ukuta. Hakuna mwanadamu angeweza kuzuia Yerusalemu lisiendelee kukua. Yehova angekuwa ndiye ulinzi walo, hata kama vile leo anavyolinda mabaki wapakwa-mafuta watakaokuwa sehemu ya Yerusalemu Jipya la kimbingu.​—Ufunuo 21:2.

○ 6:11-15​—Kuvikwa taji kwa Yoshua Kuhani wa Juu hakukumfanya kuhani-mfalme, kwa maana yeye hakuwa katika ukoo wa kifalme wa Daudi. Bali, kulimfanya Yoshua awe mfananishi wa kiunabii wa Mesiya, ambaye katika yeye ule unabii unaohusu “Chipukizi” unatimizwa kikamili. (Zekaria 3:8; Yeremia 23:5) Yoshua alisaidia kumalizia kazi ya kujenga upya hekalu huko Yerusalemu. Kuhani-Mfalme wa kimbingu, Yesu Kristo, anamalizia kazi ya hekalu la kiroho.

○ 11:4-11, NW​—Watu walio kama kondoo ndilo “kundi la kondoo waliokusudiwa kuuawa” (kundi la machinjo, UV) katika maana ya kwamba wachungaji wa kiserikali walikuwa wakiwanyonya. Akiwa na fimbo moja yenye kuitwa “Ufurahishi” (Neema, UV) na ile nyingine “Muungano” (Vifungo, UV), Zekaria alitenda kama mchungaji mwenye kuchukua fimbo ya kuongoza kundi la kondoo na ufito wa kuwafukuzia mbali hayawani. (Zaburi 23:4) Yeye alitangulia kuwa kivuli cha Yesu, aliyetumwa awe mchungaji wa kiroho lakini akakataliwa na Wayahudi. Kama vile Zekaria alivyovunja fimbo ya Ufurahishi (Neema), Mungu aliacha kushughulika kwa ufurahishi pamoja na Wayahudi, akivunja agano lake pamoja nao. Na kama vile Zekaria alivyoivunja fimbo ya Muungano, ufutaji wa Mungu wa agano la Sheria uliwaacha Wayahudi bila kifungo cha muungano wa kitheokrasi. Ukosefu wao wa umoja wa kidini uliwaletea msiba wakati Yerusalemu lilipoharibiwa na Waroma katika 70 W.K.

○ 12:11​—“Maombolezo ya Hadadrimoni” huenda yakawa yanamaanisha kuomboleza kifo cha Mfalme Yosia wa Yuda. Inaonekana wazi kwamba Hadadrimoni ulikuwa uwanja fulani katika bonde la Megido, ambapo yeye aliuawa akipigana na Farao Neko. Kifo cha Yosia kilililiwa, huku Yeremia akitaja-taja maneno ya kuomboleza na waimbaji wakimtaja mfalme katika nyimbo za kumlilia.​—2 Mambo ya Nyakati 35:20-25.

[Picha katika ukurasa wa 31]

Kama vile Zekaria alivyotabiri, sasa watu wa mataifa yote wanashirikiana na Israeli wa kiroho