Masomo Kutokana na Maandiko: Malaki 1:1–4:6

Bwana wa Kweli Aja kwa Ajili ya Hukumu

Kumtumikia Mungu hakuna faida.” (Malaki 3:14) Maneno hayo ya kutia shaka yalitamkwa na watu wa Mungu mwenyewe wakati Malaki alipotoa unabii katika karne ya tano K.W.K. Kwa nini? Kwa sababu hali za kusikitisha sana zilikuwa katika Yuda, hasa miongoni mwa makuhani. Lengo lao kuu lilikuwa kujipatia vitu wakiwa na ubinafsi. Kwa njia ya moja kwa moja na yenye mkazo, Malaki aliwafichua viongozi hao wa kidini wenye unafiki na akaonya kwamba Bwana wa kweli alikuwa akija kwa ajili ya hukumu.​—Malaki 1:6-8; 2:6-9; 3:1.

Unabii wa Malaki una utimizo katika siku yetu wenyewe. Kwa hiyo, ingefaa tufikirie masomo yaliyomo.

Kudharau Jina la Mungu

Yehova anatazamia watu wake wamtolee kitu chao kilicho bora zaidi. Mungu anaonyesha kwanza upendo wake kwa watu wake. Hata hivyo, makuhani wanadharau jina lake kwa kukubali kutoka kwa watu wanyama vipofu, wagonjwa, na vilema kwa ajili ya dhabihu. Yehova hana upendezo katika makuhani wenye kujitumikia wenyewe wala katika matoleo hayo ya hali ya chini yanayotoka mikononi mwao. Lakini hata wafanye nini, ‘jina la Yehova litakuwa la kuvuvia hofu miongoni mwa mataifa.’​—1:1-14, NW.

Wale walio walimu wana daraka zito. (Yakobo 3:1) Makuhani ‘wamewakwaza watu wengi katika sheria.’ Jinsi gani? Kwa kutofundisha watu katika sheria ya Mungu na kwa kuwaonyesha upendeleo. Kwa haki Yehova ana hasira nao, “kwa maana yapasa midomo ya kuhani ihifadhi maarifa, tena yawapasa watu kuitafuta sheria kinywani mwake.”​—2:1-9.

Yehova hawaoni kwa mchezo tu wale wanaodharau mpango wa ndoa. Kinyume cha sheria ya Mungu, wanaume wa Yuda wametwaa wake wa kigeni. (Kumbukumbu 7:3, 4) Wameshughulika kwa hila na wake za ujana wao kwa kuwataliki. Yehova “amechukia kutaliki,” Malaki anaonya.​—2:10-17, NW.

Hukumu na Kuondoa Taka

Yehova havumilii milele utendaji makosa. “Bwana wa kweli” atakuja kwenye hekalu lake, akiandamwa na “mjumbe wa agano.” Ataondoa taka na kusafisha wana wa Lawi. Yehova atakuwa shahidi wa haraka dhidi ya walozi, wazinzi, wale wanaoapa kwa ubandia, wapunjaji, na waonevu.​—3:1-5, NW.

Wale wanaozuilia matoleo yao wasimpe Yehova wanajifanya wawe maskini. Yehova habadiliki. Watu hao waliopotoka wakimrudia, yeye atawarudia kwa rehema. Wao wamekuwa wakinyang’anya Mungu kwa kumnyima zaka na michango yao. Lakini wakileta ndani sehemu za kumi, Yehova anaahidi baraka “hata isiwepo nafasi ya kutosha.” Watapata tunda lisiloisha.​—3:6-12.

Macho ya Yehova yako juu ya watu wake. Mungu anatokeza suala la mapambano na wale ambao wamenena maneno makali dhidi yake. Tofauti na hivyo, anaelekeza fikira za karibu kwa wale wanaomhofu. “Kitabu cha ukumbusho” kitaandikwa kwa ajili ya “wale wanaofikiria jina lake.” Watu wake wataona tofauti ya wazi kati ya waadilifu na waovu.​—3:13-18, NW.

Siku ya Yehova Inakuja!

Siku ya Yehova itamaanisha uharibifu kamili kwa waovu. Siku ya Yehova inakuja, na waovu watamezwa kama mabua makavu katika tanuri inayowaka. Watamezwa, ‘isiache shina wala tawi.’ Kwa habari ya wale wanaohofu jina la Yehova, wataona shangwe ya kupata manufaa zenye kuponya za “jua la uadilifu.” Kabla ya kuja kwa siku hii inayovuvia hofu, Yehova atapeleka Eliya mnabii kufanya kazi ya urudishaji.​—4:1-6, NW.

Masomo kwa leo: Wakati ibada inapohusika, Yehova anataka kwamba watu wake wamtolee kitu chao kilicho bora zaidi. (Linganisha Mathayo 22:37, 38.) Walimu wa Neno la Mungu wana daraka la kufundisha ifaavyo na kuongoza watu katika ibada ya kweli. Ingefaa tukumbuke kwamba macho ya Mungu wa haki yako juu ya wale wasioonyesha staha inayofaa kwa ndoa na wale wanaojitia katika utendaji makosa. Sisi na tujitiishe kwa unyenyekevu kwenye utaratibu wa kutakasa na kusafisha wa Bwana wa kweli huku tukingojea “kuja kwa siku ya Yehova iliyo kubwa na yenye kuvuvia hofu”!

[Sanduku katika ukurasa wa 30]

MAANDIKO YA BIBLIA YACHUNGUZWA

○ 1:10​—Makuhani wabinafsi, wenye njaa ya pesa walikuwa wakitumikia kwa ajili ya pato la ubinafsi. Walidai bei kwa ajili ya utumishi sahili (mwepesi) zaidi wa hekalu, kama vile kufunga milango au kuwasha mioto ya madhabahu. Si ajabu kwamba Yehova ‘hakufurahia matoleo yaliyotoka mikononi mwao’!

○ 1:13​—Makuhani hao wasio na imani walikuwa wamekuja kuziona dhabihu kuwa sherehe yenye kuchosha, mzigo wa kulemea. Walibeza, au wakadharau sana, vitu vitakatifu vya Yehova. Haitupasi kamwe kuruhusu “ndama wachanga wa midomo yetu” watolewe kama desturi tu!​—Hosea 14:2, NW; Waebrania 13:15.

○ 2:13​—Waume wengi Wayahudi walikuwa wakitaliki wake za ujana wao, labda ili wafunge ndoa na wanawake vijana zaidi wa kipagani. Madhabahu ya Yehova ikafunikwa na machozi​—kwa uwazi hayo yakiwa ni yale ya wake waliokataliwa ambao walikuja patakatifu kumimina kihoro chao mbele za Mungu.​—Malaki 2:11, 14, 16.

○ 3:1, NW​—“Bwana wa kweli” ni Yehova Mungu, na “mjumbe wa agano” ni Yesu Kristo. Utimizo wa kwanza wa unabii huu ulitukia wakati Yesu aliposafisha hekalu. (Marko 11:15-17) Hii ilikuwa miaka mitatu na nusu baada ya yeye kupakwa mafuta kuwa Mfalme-Mkusudiwa. Vivyo hivyo, miaka mitatu na nusu baada ya Yesu kutawazwa kuwa Mfalme katika vuli ya 1914, alimwandama Yehova kwenye hekalu la kiroho akakuta watu wa Mungu wakihitaji kuondolewa taka na kusafishwa.

○ 3:2, 3​—Utaratibu huo wa kale wa kuondoa taka ulichukua muda. Kwa hiyo, mara nyingi mwondoaji taka ‘angeketi’ tu, akingojea mpaka madini ile majimaji ilipong’aa kama kioo kilichosuguliwa sana na angeweza kuona mfano wake ndani. Vivyo hivyo, Yehova ameendelea kuondoa taka za watu wake leo, akiondolea mbali mafundisho na mazoea yasiyo safi. Hii imewasaidia kuangazia sifa yake kwa usahihi zaidi.​—Waefeso 5:1.

○ 4:2​—Hili ni elezo la baraka za wakati ujao ambazo zitaonewa shangwe na wale wanaohofu jina la Mungu. Wao wana tazamio la kuota jua la upendeleo wa Mungu wakati magonjwa ya kimwili, ya kiakili, na ya kihisia-moyo ambayo yamepiga jamaa ya kibinadamu yatakapokuwa yameponywa.​—Ufunuo 21:3, 4.

○ 4:5​—Mnabii Eliya aliishi kama miaka 500 kabla unabii huu haujatolewa. Katika karne ya kwanza W.K., Yesu Kristo alitambulisha Yohana Mbatizaji kuwa mfanani aliyetabiriwa wa Eliya. (Mathayo 11:12-14; Marko 9:1-13) Hata hivyo, “Eliya” angekuwa mtangulizi wa “siku ya Yehova,” hiyo ikionyesha utimizo zaidi katika wakati huu wa “kuwapo” kwa Kristo.​—2 Wathesalonike 2:1, 2.

[Picha katika ukurasa wa 31]

Wakati wa huduma yake ya kidunia, Yesu alilisafisha hekalu. Katika 1918 alimwandama Yehova kwenye hekalu la kiroho kusafisha watu wa Mungu