Maisha na Huduma ya Yesu

Wenye Kiburi na Wenye Udhalili

BAADA YA kutaja sifa za wema za Yohana Mbatizaji, Yesu anageuza fikira kwenye watu wenye kiburi na vigeu-geu waliomzunguka. “Kizazi hiki,” yeye anatangaza, “kinafanana na watoto wachanga wanaokaa mahali penye masoko, wanaopiga kelele kuambia wenzao, wakisema, Sisi tulipiga filimbi kwa ajili ya ninyi, lakini ninyi hamkucheza dansi; sisi tuliomboleza, lakini ninyi hamkujipiga wenyewe kwa huzuni.’”

Yesu anamaanisha nini? Yeye anaeleza hivi: “Yohana alikuja hali wala hanywi, hata hivyo watu wasema, ‘Yeye ana shetani’; Mwana wa mtu alikuja akila na kunywa, na bado watu wasema, ‘Tazama! Mwanamume mlafi na mzoevu wa kunywa divai, rafiki wa wakusanya kodi na watenda dhambi.’”

Haiwezekani kuridhisha watu. Hakuna jambo linalowafurahisha. Yohana ameishi maisha ya kuepuka mno vitu kwa kujinyima akiwa Mnaziri, kwa kupatana na tangazo la yule malaika, “Ni lazima asinywe hata kidogo divai wala kinywaji cho chote kikali.” Na hata hivyo watu wasema yeye ana shetani. Kwa upande mwingine, Yesu anaishi kama watu wale wengine, bila kuzoea kujiepusha mno na vitu, naye anapewa shtaka la kufanya mambo kupita kiasi.

Watu hao ni wagumu kupendeza kama nini! Wao ni kama wenzi wa kucheza nao, baadhi yao wanakataa kuitikia kucheza dansi wakati watoto wale wengine wanapopiga filimbi au wanakataa kuitikia kwa huzuni wakati wenzao wanapoomboleza. Hata hivyo, Yesu anasema: “Hekima inathibitishwa kuwa adilifu kwa kazi zayo.” Ndiyo, wonyesho wa wazi—zile kazi—zinafanya iwe wazi kwamba mashtaka yaliyofanywa dhidi ya Yohana na Yesu ni ya uwongo.

Yesu anaendelea kuonyesha kwamba ina masuto yasiyo na kifani ile miji ya Korazini, Bethsaida, na Kapernaumu, ambako yeye amefanya kadiri iliyo kubwa zaidi ya kazi zake za ajabu. Kama yeye angalizifanya katika miji ya Kifoinike ya Tiro na Sidoni, Yesu anasema, miji hiyo ingalitubu katika mavazi-gunia na majivu. Akilaumu vikali Kapernaumu, mji ambao inaonekana ndio unakuwa kituo kikubwa cha makao yake wakati wa huduma yake, Yesu anatangaza hivi: “Litakuwa jambo lenye kuvumilika zaidi kwa nchi ya Sodoma Siku ya Hukumu kuliko kwa ninyi.”

Yesu anamaanisha nini kwa kusema hivyo? Kwa wazi yeye anaonyesha kwamba, wakati wa Siku ya Hukumu watakapofufuliwa wenye kiburi katika Kapernaumu, itakuwa vigumu zaidi kwao kukiri makosa yao na kumkubali Kristo kuliko vile itakavyokuwa vigumu kwa Wasodoma wa kale watakaofufuliwa kutubu kwa unyenyekevu na kujifunza uadilifu.

Halafu Yesu anamsifu peupe Baba yake wa kimbingu. Anavutwa moyoni kufanya hivyo kwa sababu Mungu anaficha kweli za kiroho zenye thamani kubwa zisionwe na wenye hekima na wenye maarifa lakini anawafunulia walio dhalili, watu walio kama watoto wachanga, mambo hayo yaliyo mazuri ajabu.

Mwisho, Yesu anatoa mwaliko huu unaovuta watu: “Njoni kwangu, ninyi nyote mnaomenyeka na kulemewa na mizigo, nami nitawaburudisha ninyi. Bebeni nira yangu na kujifunza kwangu, kwa maana mimi ni mwenye tabia pole na hali ya kujishusha katika moyo, na ninyi mtapata burudisho la nafsi zenu. Kwa maana nira yangu ni ya fadhili na mzigo wangu ni mwepesi.”

Yesu anatoaje burudisho? Anafanya hivyo kwa kuandaa uhuru wa kuondolewa katika mapokeo yenye kutumikisha ambayo viongozi wa kidini wametumia kulemeza watu, kutia ndani, kwa mfano, virekebi vya kushika Sabato. Pia, yeye anawaonyesha njia ya kupata kitulizo wale wanaohisi uzito unaowalemea sana wa kutawalwa na wakuu wa kisiasa na wale wanaohisi uzito wa dhambi zao kupitia dhamiri inayosumbuliwa. Anawafunulia hao wenye kusumbuka jinsi dhambi zao zinaweza kusamehewa na jinsi wanaweza kufurahia uhusiano wenye thamani kubwa pamoja na Mungu.

Nira yenye fadhili ambayo Yesu anawatolea ni moja ya wakfu kamili kwa Mungu, kuweza kutumikia Baba yetu wa kimbingu mwenye huruma na rehema. Na mzigo mwepesi ambao Yesu anawatolea wale wanaomjia yeye ni ule wa kutii matakwa ya Mungu ya kupatia uzima, amri Zake, ambazo si zenye kulemea hata kidogo. Mathayo 11:16-30; Luka 1:15; 7:31-35; 1 Yohana 5:3, NW.

♦ Kizazi cha Yesu kinafananaje na watoto?

♦ Litakuwaje jambo la kuvumilika zaidi kwa Sodoma kuliko kwa Kapernaumu?

♦ Ni kwa njia zipi watu wanalemewa, na ni kitulizo gani Yesu anachowatolea?