“Acheni Sisi Pia Tuvue Kila Uzito”

“Mimi nimehuzunika na kuvunjika moyo sana,” aliomboleza Mary. Akirejezea mzigo wa madaraka ya Kikristo, mwanamke huyo Mkristo aliongeza hivi: “Mimi huona rafiki wakiunguza nishati zao za moyoni. Mimi pia husikia huo uchovu na huo mkazo. Tafadhali nisaidie nifahamu kwa nini.”

JE! WEWE pia huona kwamba uko chini ya mkazo, ukiwa umechoka sana usiweze kushughulikia madaraka yako ya kitheokrasi kwa kufaa? Je! nyakati nyingine inaonekana kana kwamba huduma ya Kikristo ni mzigo mzito, usioweza kuchukulika? Wakristo wengi waaminifu hupatwa na vipindi vya kuvunjika moyo, kwa kuwa sisi huzungukwa daima na nguvu zisizofaa zinazoweza kupunguza shangwe yetu. Kuwa Mkristo wa kweli leo ni mwito wa ushindani kweli kweli. Hivyo, nyakati nyingine wengine huenda wakaona kwamba huduma ya Kikristo ni mzigo mzito.

Kutafuta Kisababishi

Maandiko huonyesha wazi kwamba Yehova hajatuwekea madai yasiyofaa. Mtume Yohana alisema kwamba “amri zake [Mungu] si nzito.” (1 Yohana 5:3) Yesu vilevile aliwaambia wafuasi wake hivi: “Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu; kwa maana nira yangu ni laini, na mzigo wangu ni mwepesi.” (Mathayo 11:29, 30) Kwa wazi si mapenzi ya Yehova kwamba tuone tumelemewa sana au kugandamizwa katika utumishi wetu kwake.

Basi, Mkristo mwaminifu aweza kupataje kuona madaraka yake ya Kikristo kuwa mzigo wenye kulemeza? Yaelekea, mambo kadhaa yanahusika. Angalia maneno haya ya mtume Paulo: “Acheni sisi pia tuvue kila uzito . . . , na acheni sisi tukimbie kwa uvumilivu katika shindano la mbio ambalo limewekwa mbele yetu sisi.” (Waebrania 12:1, NW) Maneno ya Paulo yanaonyesha kwamba Mkristo aweza nyakati nyingine kujiwekea mizigo isiyohitajiwa. Hiyo haihusishi kwa lazima dhambi nzito. Lakini Mkristo aweza kufanya makosa katika maamuzi yanayotatanisha maisha yake sana, yakifanya iwe vigumu sana kwake kukimbia shindano ambalo limewekwa mbele yetu sisi.

Maoni Yenye Usawaziko Kuhusu Vitu vya Kimwili

Chukua, kwa mfano, jambo kuhusu kazi ya kimwili. Katika nchi nyingi, hali za kiuchumi huenda zikamwacha Mkristo bila hiari ila kufanya kazi kwa muda wa saa nyingi. Lakini, mara nyingi watu hufanya kazi ili kufanya maendeleo tu au kukusanya vitu vya kuwapendeza. Kwa kurudia tena mahitaji yao halisi, Wakristo wengine wameona kwamba ni jambo la hekima kufanya marekebisho katika hali yao ya kuajiriwa kazi. Hali ilikuwa hivyo kwa Debbie na mume wake, ambao wote wawili ni Mashahidi wa Yehova. Yeye asema hivi: “Hali yetu ya kifedha ilikuwa imebadilika, na hakukuwa tena uhitaji wa kweli kwa mimi kuendelea kufanya kazi kwa wakati wote. Lakini haikuwa rahisi kuacha.” Upesi akaanza kuhisi mbano wa kuwa na mengi sana ya kufanya. Aeleza hivi: “Jumamosi ilikuwa siku yangu ya pekee kufanya kazi za nyumbani. Mara nyingi sikuwa nikihisi kwenda katika utumishi wa shambani. Niliona vibaya kuhusu jambo hilo, na dhamiri yangu ilinisumbua, hata hivyo nilipenda kazi yangu! Hatimaye, nikapaswa kukabili ukweli. Kulikuwako suluhisho moja tu. Niliiacha kazi.” Ni kweli, rekebisho kubwa kama hilo huenda lisiwezekane kwa wengine. Hata hivyo, uchunguzi wenye uangalifu wa ratiba yako ya kazi huenda ukafunua uhitaji wa mabadiliko fulani.

Huenda ikawa kuna njia nyingine nyingi za kujipunguzia wenyewe mizigo isiyohitajiwa. Vipi kupunguza safari zetu za anasa, utendaji mbalimbali wa michezo, au tafrija nyingine—kutia na wakati unaotumiwa kutazama televisheni? Na hata baada ya kutimiza usawaziko unaofaa katika mambo hayo, marekebisho ya daima huenda yakahitajiwa ili kudumisha usawaziko huo.

Kuwa Mwenye Kiasi Ni Muhimu

Kuwa mwenye kiasi katika mambo kama hayo kutatusaidia kubadilika kulingana na hali mpya zinapotokea. Hivyo, twaweza kudumisha maoni chanya (mazuri) kuhusu huduma yetu.—Waefeso 5:15-17; Wafilipi 4:5.

Je! wewe hujipata kuwa chini ya mbano wa kufanya kiasi ambacho wengine hufanya katika utumishi wa Mungu? Hilo pia laweza kuongeza hangaiko na mvurugo kwa maisha yako. Ingawa mfano mzuri wa wengine waweza kwa hakika kukutia moyo kufanya zaidi, kuwa mwenye kiasi kutakusaidia uweke miradi inayoweza kutimizwa kulingana na hali na uwezo wako mwenyewe. Maandiko yanatuambia hivi: “Lakini kila mtu na aipime kazi yake mwenyewe, ndipo atakapokuwa na sababu ya kujisifu ndani ya nafsi yake tu, wala si kwa [kulinganishwa na, NW] mwenzake. Maana kila mtu atalichukua furushi lake mwenyewe.”—Wagalatia 6:4, 5.

Desturi na mapokeo ya mahali fulani huenda yakaongezea mizigo yetu pia. Katika siku ya Yesu watu walichoshwa kwa kujaribu kufuata kanuni na mapokeo mengi yaliyotolewa na wanadamu. Leo, watu wa Yehova wamewekwa huru na mapokeo ya dini bandia. (Linganisha Yohana 8:32.) Hata hivyo, Mkristo angeweza kujishughulisha sana na desturi za mahali fulani. Kwa mfano, nyakati nyingine mambo kama arusi hutia ndani desturi zenye matengenezo mengi. Desturi hizo huenda zisiwe mbaya, na huenda hata zikawa za zamani na zenye kupendeza. Hata hivyo, huenda Wakristo wasiwe na wakati au fedha za kufanya mambo hayo yote, na kujitahidi kufanya hivyo kungeweza kuongeza mizigo mingine isiyohitajiwa.

Fikiria kile kilichotukia wakati Yesu alipotembelea mwanamke aitwaye Martha. Badala ya kunufaika kikamili na hekima ya Yesu ya kimbingu, “Martha alikuwa akihangaika kwa utumishi mwingi.” Alikuwa amelemewa na mambo mengi madogo madogo. (Luka 10:40) Lakini Yesu alidokeza kwa fadhili kwamba Martha angeweza kurahisisha mipango yake ya chakula ili anufaike na mafundisho yake. (Luka 10:41, 42) Hilo laonyesha vizuri kwamba uamuzi mzuri na kuwa mwenye kiasi kutakusaidia kutimiza usawaziko unaofaa katika huduma yako ya Kikristo.—Yakobo 3:17.

Uamuzi mzuri unahitajiwa pia unapowachagua waandamani wako. Mithali 27:3 huonya hivi: “Jiwe ni zito, na mchanga hulemea; lakini ghadhabu ya mpumbavu ni nzito kuliko hivi vyote viwili.” Bila shaka, washirika wako wa karibu watakuwa na uvutano wenye nguvu juu ya namna yako ya kufikiri. Kushiriki na wale walio wepesi kulaumu na kuchambua wengine kundini kwaweza kupanda mbegu za kuvunjika moyo na fikira hasi (zisizofaa). (1 Wakorintho 15:33) Ukitambua kwamba hilo ni tatizo, kufanya mabadiliko yenye hekima katika washirika wako kungeweza kupunguza mzigo wako.

Uwe Mwenye Kiasi Katika Kutembea Pamoja na Mungu

Kwenye Mika 6:8, tunapata swali hili lenye kuchochea fikira: “BWANA [Yehova, NW] anataka nini kwako . . . ila kwenda kwa unyenyekevu [kiasi, NW] na Mungu wako”? Kiasi kinafasiliwa kuwa utambuzi wa mtu wa hali za kupungukiwa kwake. Wale wasiotambua hali za kupungukiwa kwao wanaweza kujielemea na shughuli nyingi mno. Hilo limetukia kwa Wakristo wakomavu, hata waangalizi, likitokeza kuvunjika moyo, kuvurugika, na kupoteza shangwe. Kenneth, mzee Mkristo, alikiri hivi: “Nilijiona mwenyewe nikiingia katika hali ya kushuka moyo, nami nikasema, ‘Sitakubali hilo litendeke kwangu.’ Kwa hiyo nilipunguza baadhi ya shu-ghuli zangu na kukazia fikira kwenye yale niliyoweza kufanya.”

Hata Musa yule nabii mnyenyekevu alikuwa na tatizo la kutambua hali za kupungukiwa kwake mwenyewe. Kwa hiyo Yethro, mkwe wake, alilazimika amsaidie Musa afikiri kwa uwazi kuhusu ile kadiri kubwa sana ya kazi aliyokuwa akijaribu kushughulikia mwenyewe. “Ni jambo gani hili uwatendealo hao watu?” akauliza Yethro. “Jambo hili ufanyalo si jema. Huna budi utadhoofika wewe . . . maana jambo hili ni zito mno kwako; huwezi wewe kulitenda peke yako. . . . Utajipatia katika watu hawa watu walio na uwezo, . . . kisha, kila neno lililo kubwa watakuletea wewe, lakini kila neno dogo wataliamua wenyewe; basi kwako wewe mwenyewe utapata nafasi zaidi, nao watauchukua huo mzigo pamoja nawe.” Musa alianza mara moja kuwakabidhi wengine sehemu ya kazi yake, hivyo akipata kipumziko kutoka kile kilichogeuka kuwa mzigo usioweza kuchukulika.—Kutoka 18:13-26.

Kwenye pindi nyingine Musa alimwambia Yehova hivi: “Mimi siwezi kuwachukua watu hawa wote peke yangu, kwa kuwa ni mzigo mzito sana wa kunishinda.” Tena, jibu lilikuwa kukabidhi wengine sehemu ya kazi. Huenda hilo pia likawa suluhisho kwa tatizo lako ikiwa unaona kuwa unaelemewa na shughuli nyingi mno.—Hesabu 11:14-17.

Yehova Hutusaidia Tuchukue Mzigo

Yesu alisema kwamba nira yake ilikuwa yenye fadhili na mzigo wake ulikuwa mwepesi lakini si bila uzito wowote. Nira ambayo Yesu alitualika tujitie si nira ya uzembe. Hiyo ni nira ya wakfu kamili kwa Mungu tukiwa wanafunzi wa Yesu Kristo. Kwa hiyo, kadiri fulani ya uzito au mbano hutokana na kuwa Mkristo wa kweli. (Mathayo 16:24-26; 19:16-29; Luka 13:24) Hali za ulimwengu zizidipo kuwa mbaya, mibano itaongezeka. Hata hivyo, tuna sababu zuri kuwa na mtazamo chanya (mzuri) kwa sababu mwaliko wa Yesu unadokeza kwamba wengine wangeenda chini ya nira yake pamoja naye na kwamba angewasaidia.a Hivyo, maadamu tunafuata mwelekezo wa Kristo, mzigo wetu utabaki ukiweza kuchukulika kwa sababu yeye atatusaidia.

Mungu hujali wale wampendao, naye hulinda mioyo na nguvu za akili za wale wote wanaomtwika mzigo wao kwa sala. (Zaburi 55:22; Wafilipi 4:6, 7, NW; 1 Petro 5:6, 7) “Na ahimidiwe Bwana [Yehova, NW], siku kwa siku hutuchukulia mzigo wetu; Mungu ndiye wokovu wetu,” alisema mtunga zaburi. (Zaburi 68:19) Naam, uhakikishiwe kwamba Mungu atakuchukulia mzigo siku kwa siku pia ukivua kila uzito na kukimbia kwa uvumilivu katika shindano la mbio ambalo limewekwa mbele yako.

[Maelezo ya Chini]

[Picha katika ukurasa wa 24]

Wazee wenye hekima wana nia ya kukabidhi wengine kazi fulani na kushiriki mzigo