Mileani—Tukufu Inakaribia

”Na mimi niliona viti vya ufalme, na kulikuwa wale walioketi juu yavyo na nguvu za kuhukumu zilipewa kwao. Ndiyo, mimi niliona nafsi za wale waliouawa kwa shoka kwa ajili ya ushuhuda waliotoa kwa Yesu na kwa ajili ya kusema juu ya Mungu, na wale ambao hawakuwa wameabudu wala hayawani-mwitu wala mfano wake na ambao hawakuwa wamepokea alama juu ya kipaji cha uso wao na juu ya mkono wao. Na wao wakaja kwenye uhai na wakatawala wakiwa wafalme pamoja na Kristo kwa miaka elfu moja.” “Na [Mungu] atapangusa kabisa machozi kutoka macho [ya ainabinadamu], na kifo hakitakuwapo tena, wala hakutakuwapo kuomboleza wala kuguta wala maumivu tena. Vitu vya kwanza vimepitilia mbali.”—Ufunuo 20:4; 21:4, NW.

HIVYO ndivyo Biblia hutabiri mileani tukufu inayokaribia—Utawala wa Miaka Elfu wa Yesu Kristo na baraza la ushirika la wafalme wa kimbingu. Labda wewe una mbetuko wa kuondolea mbali unabii huu kuwa mazingaombwe tu, mauzauza. Ingawa hivyo, kuna sababu ya kutosha ya wewe kuona Mileani hii kuwa uhalisi unaokuja.

Kwanza, funzo la Biblia litakufunulia kwamba hiyo imeshughulika na mileani sita zilizopita za historia ya kibinadamu kwa njia nzuri ajabu ya kutumainika. Zaidi ya hilo, Biblia ni kitabu cha unabii, na hesabu kubwa ya matabiri yayo, au unabii, tayari yametimizwa kwa kila kijambo.a Ikiwa hivyo, kwa nini Biblia isitegemeke katika kutabiri Mileani inayokaribia ya utawala wa Kristo? Ingawa hivyo, huenda wewe ukashangaa juu ya yale ambayo Biblia hutuambia juu ya kipindi hicho. Kitatimiza kusudi gani? Na lililo la upendezi hususa kwako ni kwamba, kitakuwa na matokeo gani maishani mwako?

Urithi Wapotezwa

Biblia huonyesha kwamba Utawala wa Miaka Elfu wa Kristo ndiyo njia yake ya kupitishia “watoto” wake urithi wenye thamani kubwa kabisa. Lakini urithi gani? Tena “watoto” gani? Urithi ungeweza kufasiliwa kuwa kitu ambacho mtu hupitishia wazao wake wakati wa kufa kwake. Adamu baba yetu wa kale alipothibitika kuwa mkosa utii kwa Mungu, alijipotezea yeye mwenyewe na wazao wake wote—jamii nzima ya kibinadamu—haki ya kuwa na uhai wa milele katika paradiso ya kidunia. Hivyo Adamu alipitisha urithi wa dhambi, kifo, na mashaka kwa wazawa wake.—Mwanzo 3:1-19; Warumi 5:12.

Yesu alikuja duniani katika mnofu ili kurudishia ainabinadamu urithi ambao Adamu alipoteza. Alifanya hivyo kwa kuthibitika kuwa mwaminifu kwa Yehova Mungu, kwa nia ya kupenda akatoa uhai wake kwa ajili ya ainabinadamu. (Yohana 3:16) Kwa kuishi maisha makamilifu yasiyo na dhambi, Yesu aliipata haki ya uhai wa milele ulio mkamilifu katika Paradiso duniani—kitu kile kile ambacho Adamu alipoteza. Hata hivyo, Yesu hakutumia kamwe haki hiyo; wala hakuipoteza alipokufa na kufufuliwa kwenye uhai wa mbinguni. Kwa hiyo angeweza kuitumia iwe urithi wa thamani kubwa wa kuwapitishia “watoto” wake.—Warumi 5:18, 19.

Wale Warithi—“Watoto” wa Kristo

Kwenye Isaya 9:6 kwa unabii Yesu huitwa “Baba wa milele.” Yeye huwa Baba wa Milele wa ulimwengu uliofidiwa wa ainabinadamu, akiwa katika cheo cha kuwapitishia urithi watoto hawa wa kufidiwa au wa kimalezi. (Mathayo 20:28; ona pia Zaburi 37:18, 29.) Hilo laonyeshwa wazi katika ahadi yake: “Njoni, nyinyi ambao mmebarikiwa na Baba yangu, rithini ufalme uliotayarishwa kwa ajili yenu kuanzia kuwekwa msingi wa ulimwengu.” Alisema zaidi hivi: “Wenye furaha ni wenye tabia-moyo pole, kwa kuwa watairithi dunia.”—Mathayo 5:5; 25:34, NW.

Hata hivyo, ili dunia iwe urithi wenye ustahiki ni lazima hali zibadilishwe kabisa kabisa—ziletwe kwenye ukamilifu! Ni lazima iwe ulimwengu ambamo amani kamilifu na upatano hutawala miongoni mwa viumbe wote wa Mungu. (Isaya 11:6-9) Ni lazima kila dalili ya kutokamilika kwa kibinadamu ifutwe, kutia na kifo. (1 Wakorintho 15:25, 26) Hii yamaanisha kwamba wafu, walio sehemu ya ainabinadamu iliyofidiwa, ni lazima wafufuliwe. Ni kwa njia hii tu wao wangeweza kupata fursa ya kuwa warithi wa Kristo!—Yohana 5:28, 29.

Hivyo, Utawala wa Miaka Elfu wa Kristo utakuwa kipindi chenye furaha ambamo kidato kwa kidato ainabinadamu ‘yawekwa huru na utumwa wa uharibifu’ na kufikia ukamilifu. (Warumi 8:21) Kwa kupendeza, hata vyanzo vya kilimwengu hutambua hilo kuwa kusudi la mileani. Webster’s Ninth New Collegiate Dictionary (chapa ya 1985) hufasili “mileani” kuwa “kipindi cha furaha kubwa au ukamilifu wa kibinadamu.”

Yapita Utawala wa Sulemani

Mileani hii tukufu yaweza kufananishwa na utawala wa miaka 40 wa Mfalme Sulemani wenye amani na ufanisi juu ya Israeli wa kale. (1 Wafalme 4:24, 25, 29) Malkia wa Sheba alipomzuru Mfalme Sulemani, alisema: “Ndizo kweli habari zile nilizozisikia katika nchi yangu za mambo yako na za hekima yako. Lakini mimi sikuzisadiki habari hizo, hata nilipokuja na kuona kwa macho yangu; tena, tazama, sikuambiwa nusu; wewe umezidi kwa hekima na kufanikiwa kuliko habari nilizozisikia. Heri watu wako, na heri watumishi hawa wako, wasimamao mbele yako sikuzote, wakisikia hekima yako”!—1 Wafalme 10:6-8.

Ikiwa amani, ufanisi, na hekima ya utawala wa miaka 40 wa Mfalme Sulemani vilipita, ndiyo, vikayazidi maradufu matazamio ya malkia wa Sheba, basi ni hakika kwamba Utawala wa Miaka Elfu wa Mfalme Sulemani wa kimbingu aliye mkubwa zaidi, Yesu Kristo, utaupita uwazio wa kibinadamu! Kwa maneno ya Yesu mwenyewe, yeye ni “mkuu kuliko Sulemani.” (Mathayo 12:42) Jaribu kuona picha ya hali zenye afya, ufanisi, amani, uadilifu, na furaha duniani kwa kadiri uwezayo kuwazia, nawe hutaweza kupata hata kiwazo kimoja cha mambo yaliyo akibani katika Mileani ya Kristo.

Je! Itasadifiana na Mileani ya Tatu?

Matukio ya ulimwengu tangu 1914 yaonyesha kwamba tunaishi katika “umalizio wa mfumo wa mambo.” Zaidi ya hilo Yesu alisema kwamba kizazi chenye kushirikishwa na matukio haya yaliyotabiriwa ‘hakingepita kamwe mpaka mambo yote haya yatukie.’ Basi, je! hii yamaanisha kwamba Utawala wa Mileani ya Kristo utasadifiana (utalingana) na mileani ya tatu?—Mathayo 24:3-21, 34, NW.

Yesu alionya wanafunzi wake wasikisie-kisie. Alisema: “Si kazi yenu kujua nyakati wala majira, Baba aliyoyaweka katika mamlaka yake mwenyewe.” (Matendo 1:7) Na kuhusu ‘saa na siku’ hususa ambapo matukio haya yangetukia, Yesu alisema kwamba ajuaye ni Baba yake, Yehova Mungu peke yake. (Mathayo 24:36) Hivyo, Biblia haiungi mkono wowote wa manabii wenye kuongezeka ambao hutabiri siku ya maangamizi yasiyo na tumaini lolote wala harakati ambazo huonyesha kwamba mwisho wa ulimwengu utafika igongapo ile dakika ya usiku-kati wa kuamkia Mwaka Mpya, 1999.

Hata hivyo, matukio ya sasa ya ulimwengu yaonyesha wazi kwamba wakati wa mwisho wa mfumo huu wa mambo ulio na giza ‘umesonga sana’ na kwamba Mileani ya Kristo ‘imekaribia.’ (Warumi 13:12, NW) Badala ya kukisia-kisia juu ya siku na saa hususa ya kuja kwayo, sasa ndio wakati wa kutwaa marifa juu ya matakwa ya Mungu ya kuokokea. (Yohana 17:3) Kwa njia hii wewe waweza kujifunza jinsi ya kuwa miongoni mwa wale ambao Yesu atasema kwao hivi: “Njoni, nyinyi ambao mmebarikiwa na Baba yangu, rithini ufalme uliotayarishwa kwa ajili yenu kuanzia kuwekwa msingi wa ulimwengu.” (Mathayo 25:34, NW) Mashahidi wa Yehova wana nia na uwezo wa kukusaidia uwe miongoni mwa wale watakaoona shangwe ya baraka za Mileani tukufu inayokuja.b

[Maelezo ya Chini]

[Blabu katika ukurasa wa 6]

“Njoni, nyinyi ambao mmebarikiwa na Baba yangu, rithini ufalme uliotayarishwa kwa ajili yenu kuanzia kuwekwa msingi wa ulimwengu”