Maisha na Huduma ya Yesu

Kuondoka Nyumbani kwa Yairo na Kuzuru Tena Nazareti

SIKU imekuwa yenye shughuli nyingi kwa Yesu—safari ya baharini kutoka Dekapoli, akiponya yule mwanamke mwenye ugonjwa wa kutokwa damu, na kufufua binti Yairo. Lakini siku haijaisha. Kwa wazi Yesu anapokuwa anaondoka nyumbani kwa Yairo, wanaume wawili vipofu wanamfuata, wakipaaza sauti hivi: “Uturehemu, Mwana wa Daudi.”

Kwa kumwita Yesu “Mwana wa Daudi,” wanaume hao kwa njia hiyo wanaonyesha imani kwamba Yesu ndiye mrithi kwenye kiti cha ufalme cha Daudi, na hivyo kwamba yeye ndiye yule Masihi aliyeahidiwa. Hata hivyo, yaelekea Yesu anapuuza vilio vyao vya kutaka msaada, pengine ili kujaribu uendelevu wao. Lakini wanaume hao hawaachi. Wanamfuata Yesu kwenda mahali anakokaa, na anapoingia ndani ya nyumba, wanamfuata ndani.

Humo Yesu auliza: “Mnaamini kwamba naweza kufanya hili?”

“Naam, Bwana,” wanajibu kwa uhakika.”

Kwa hiyo, akiyagusa macho yao, Yesu anasema: “Kwa kadiri ya imani yenu mpate [“na itukie kwenu ninyi,” NW].” Mara hiyo wanaweza kuona! Ndipo Yesu awaagiza kwa nguvu: “Angalieni hata mtu mmoja asijue.” Lakini wakijawa na furaha, wao wanapuuza amri ya Yesu na kusema juu yake kila mahali mashambani.

Mara wanaume hao waondokapo, watu wanaleta mwanamume aliyepagawa na shetani ambaye shetani huyo amenyang’anya usemi wake. Yesu afukuza huyo shetani, na mara hiyo yule mwanamume aanza kuongea. Umati wa watu wastaajabia miujiza hii, wakisema: “Haijaonekana hivi katika Israeli wakati wo wote.”

Mafarisayo, wapo, pia. Wao hawawezi kukana miujiza ile, lakini katika ile hali yao mbovu ya kutoamini wanarudia shtaka lao kuhusu chanzo cha kazi zenye nguvu za Yesu, wakisema: “Kwa nguvu za mkuu wa pepo [“mashetani,” NW] atoa pepo [“mashetani,” NW].”

Muda mfupi baada ya matukio hayo, Yesu arudi kwenye mji wa nyumbani kwake Nazareti, wakati huu akiambatana na wanafunzi wake. Kama mwaka mmoja unaotangulia, yeye alikuwa amezuru sinagogi na kufundisha huko. Ijapokuwa mwanzoni watu wa listaajabia maneno yake yenye kupendeza, baadaye walichukizwa na fundisho lake na wakajaribu kumuua. Sasa, kwa rehema, Yesu anafanya jaribio jingine la kuwasaidia ambao hapo zamani walikuwa jirani zake.

Ingawa mahali pengine watu wanamwendea Yesu makundi-makundi, hapa kwa wazi hawafanyi hivyo. Basi, katika Sabato, yeye aenda kwenye sinagogi ili akafundishe. Walio wengi wa wale wanaomsikia wanashangaa. “Huyu amepata wapi hekima hii na miujiza hii?” wanauliza. “Huyu si mwana wa seremala? Mamaye si yeye aitwaye Mariamu? Na nduguze si Yakobo, na Yusufu, na Simoni, na Yuda? Na maumbu yake [dada zake, NW] wote hawapo hapa petu? Basi huyu amepata wapi haya yote?”

‘Yesu ni mtu tu wa mahali hapa kama sisi,’ wanatoa sababu. ‘Sisi tulimwona akikua na tunajua jamaa yake. Anawezaje kuwa ndiye Masihi?’ Kwa hiyo ujapokuwa ushuhuda wote—hekima yake kuu na miujiza—wao wanamkataa. Hata watu wake wa ukoo, kwa sababu ya kumjua sana, wanajikwaa katika yeye, jambo hilo likimfanya Yesu kukata maneno hivi: “Nabii hakosi kupata heshima, isipokuwa katika nchi yake, na nyumbani mwake mwenyewe.”

Kweli kweli, Yesu anastaajabia ukosefu wao wa imani. Kwa hiyo yeye hafanyi miujiza yo yote huku isipokuwa kuwawekelea mikono yake watu wagonjwa wachache na kuwaponya. Mathayo 9:27-34; 13:54-58; Marko 6:1-6; Isaya 9:7.

◆ Kwa kumwita Yesu “Mwana wa Daudi,” wanaume hao vipofu wanaonyesha wanaamini nini?

◆ Mafarisayo wanashikilia elezo gani kwa miujiza ya Yesu?

◆ Kwa sababu gani ni wonyesho wa rehema kwa Yesu kurudi kusaidia wale walio katika Nazareti?

◆ Yesu anapokewaje katika Nazareti, na kwa sababu gani?

[Picha ya ukurasa mzima katika ukurasa wa 9]