Mfuate Yesu kwa Kuendelea
1 Katika pindi moja Yesu alisema: “Ikiwa yeyote ataka kunifuata, na ajikane mwenyewe na kuchukua mti wake wa mateso na kunifuata kwa kuendelea.” (Mt. 16:24) Bila shaka twataka kuitikia maneno ya Yesu kwa vitendo. Na tuchunguze kinachohusika na kila fungu la maneno la mwaliko wake.
2 “Na Ajikane Mwenyewe”: Tunapoweka maisha zetu wakfu kwa Yehova, twajikana wenyewe. Maana ya msingi ya neno la Kigiriki linalotafsiriwa “kana” ni “kusema la.” Hilo lamaanisha kuacha tamaa yetu ya makubwa, tamaa zetu, starehe, na raha za ubinafsi—tukiazimia kumpendeza Yehova kwa umilele wote.—Rom. 14:8; 15:3.
3 “Kuchukua Mti Wake wa Mateso”: Maisha ya Mkristo ni maisha ya kubeba mti wa mateso wa utumishi wenye kujidhabihu kwa Yehova. Njia moja ambayo roho ya kujidhabihu yaweza kuonyeshwa ni kwa kujikakamua mwenyewe katika huduma. Kufikia sasa mwaka huu, watangazaji wengi wamefurahia upainia-msaidizi. Labda wewe uko miongoni mwao na waweza kukiri kwamba baraka unazopata zinalipia zaidi dhabihu unazofanya. Wale wasioweza kutumikia wakiwa mapainia wasaidizi mara nyingi wamepanga kutumia wakati zaidi katika kuhubiri wakiwa watangazaji wa kutaniko. Yakiwa na mradi huo, makutaniko fulani yameratibu mikutano yao ya utumishi wa shambani dakika chache mapema zaidi ya walivyokuwa wakifanya hapo kwanza. Wengine wamekuwa na matokeo bora kabisa pia walipoamua kuzuru ‘nyumba moja tu’ au kuhubiri ‘dakika chache zaidi tu.’
4 Njia nyingine ambayo roho ya kujidhabihu yaonyeshwa ni kwa kuweka miradi ya kibinafsi. Wakiwa na mpango mzuri na kwa kurekebisha ratiba yao, wengine wamekuwa mapainia wa kawaida. Wengine wameweza kupanga mambo yao ili watumikie katika utumishi wa Betheli au mishonari. Wengine wamehama kwenye eneo lililo na uhitaji mkubwa wa watangazaji wa Ufalme.
5 “Kunifuata kwa Kuendelea”: Ijapokuwa wanafunzi wa Yesu walipatwa na majaribu mengi, walitiwa moyo na bidii na uvumilivu wake katika huduma. (Yn. 4:34) Walihisi wamefanywa upya katika roho yao kwa sababu ya kuwapo kwake na ujumbe wake. Ndiyo sababu wale waliomfuata walionyesha shangwe ya kweli. (Mt. 11:29) Hali kadhalika sisi na tutiane moyo tuvumilie katika kazi ya maana zaidi ya zote ya kuhubiri Ufalme na kufanya wanafunzi.
6 Sote na tuitikie kwa vitendo mwaliko wa Yesu wa kumfuata kwa kuendelea na kusitawisha roho ya kujidhabihu. Tufanyapo hivyo, tutakuwa na shangwe kubwa sasa na twaweza kutazamia hata baraka nyingi zaidi wakati ujao.