MAONI YA BIBLIA
Ndoa
Je, ndoa ni mkataba tu kati ya watu wawili?
“Kile ambacho Mungu ameunganisha mtu yeyote asikitenganishe.” —Mathayo 19:6.
BIBLIA INASEMA NINI?
Mungu huona ndoa kuwa jambo muhimu zaidi ya mkataba tu kati ya watu wawili. Ni muungano mtakatifu kati ya mwanamume na mwanamke. Biblia inasema hivi: “Tangu mwanzo wa kuumba ‘[Mungu] aliwafanya mwanamume na mwanamke. Kwa hiyo mwanamume atamwacha baba yake na mama yake, na hao wawili watakuwa mwili mmoja’ . . . Kwa hiyo kile ambacho Mungu ameunganisha mtu yeyote asikitenganishe.”a—Marko 10:6-9; Mwanzo 2:24.
Maneno “kile ambacho Mungu ameunganisha,” hayamaanishi kwamba Mungu ndiye huwachagulia watu wenzi wa ndoa. Badala yake, kwa kuwa Muumba wetu ndiye Mwanzilishi wa mpango wa ndoa, Biblia inakazia uzito wa muungano huo. Kwa hiyo, wenzi wa ndoa ambao huona ndoa kuwa muungano mtakatifu na wa kudumu hujitahidi sana kufanya ndoa yao ifanikiwe. Pia wao hufanikisha ndoa yao kwa kutafuta mwongozo wa Biblia kuhusu jinsi wanavyoweza kutimiza madaraka yao wakiwa mume au mke.
Mume ana daraka gani?
“Mume ni kichwa cha mke wake.”—Waefeso 5:23.
BIBLIA INASEMA NINI?
Ili kuwe na utaratibu katika familia, lazima kuwe na mtu wa kufanya maamuzi ya mwisho. Biblia inampa mume daraka hilo. Lakini hilo halimpi ruhusa ya kuwa dikteta au mnyanyasaji. Kwa upande ule mwingine, kupuuza madaraka yake kutamfanya mke akose kumheshimu kwa kuwa amemtwika mzigo usio wake. Badala yake, Mungu anamtaka mume ajitahidi kumtunza mke wake na kumheshimu akiwa mwandamani wake mwaminifu na wa karibu sana. (1 Timotheo 5:8; 1 Petro 3:7) Waefeso 5:28 inasema hivi: “Waume wanapaswa kuwa wakiwapenda wake zao kama miili yao wenyewe.”
Mume anayempenda mke wake kikweli huthamini uwezo na vipawa vyake na humwonyesha heshima kwa kufikiria maoni yake, hasa katika mambo yanayohusu familia. Hapaswi kusisitiza uamuzi wake ufuatwe eti kwa sababu tu yeye ndiye kichwa cha familia. Wakati Abrahamu, mwanamume aliyemwogopa Mungu alipokataa kusikiliza shauri linalofaa ambalo mke wake alitoa kuhusu jambo fulani katika familia yao, Yehova Mungu alimwambia hivi: “Sikiliza sauti yake.” (Mwanzo 21:9-12) Abrahamu alitii kwa unyenyekevu, na familia yake ikawa na amani, umoja, na pia baraka za Mungu.
Mke ana daraka gani?
“Wake, jitiisheni kwa waume zenu wenyewe.”—1 Petro 3:1.
BIBLIA INASEMA NINI?
Kabla tu ya kuumba mke kwa ajili ya mwanamume wa kwanza, Mungu alisema hivi: “Si vema huyo mwanamume aendelee kuwa peke yake. Nitamfanyia msaidizi, awe kikamilisho chake.” (Mwanzo 2:18) Kikamilisho ni kitu kinachofanya kingine kiwe kamili. Kwa hiyo, Mungu hakumuumba mwanamke awe sawa na mwanamume au ashindane naye, bali awe mwenzi wake. Pamoja wangeweza kutimiza agizo la Mungu la kuzaa watoto na kuijaza dunia.—Mwanzo 1:28.
Ili kumwezesha mwanamke atimize daraka lake, Mungu alimpa sifa fulani za pekee za kimwili, kiakili, na kihisia. Anapotumia sifa hizo kwa hekima na upendo, anachangia pakubwa kufanikiwa kwa ndoa yake na anamsaidia mume wake kuhisi akiwa ameridhika na kwamba mke wake anampenda. Kwa maoni ya Mungu, mwanamke huyo anastahili sifa.b—Methali 31:28, 31.
a Biblia inasema kwamba kukosa uaminifu katika ndoa ndio msingi pekee wa talaka.—Mathayo 19:9.
b Wenzi wa ndoa watapata mapendekezo mazuri kuhusu ndoa na familia katika makala yenye kichwa “Msaada kwa Ajili ya Familia” ambayo huchapishwa kwa ukawaida katika gazeti Amkeni!