Maisha na Huduma ya Yesu

Masomo Kuhusu Talaka na Kuhusu Kupenda Watoto

YESU na wanafunzi wake wako njiani kwenda Yerusalemu wakahudhurie sikukuu ya Kupitwa ya 33 W.K. Wauvuka Mto Yordani na kuifuata njia ipitayo katika wilaya ya Perea. Yesu alikuwamo Perea majuma machache mapema ya hapo, lakini ndipo alipoitwa aende Yudea kwa sababu Lazaro rafiki yake alikuwa mgonjwa. Akiwamo Perea wakati huo, Yesu alinena kwa Mafarisayo kuhusu talaka, na sasa wao wamletea tena jambo hilo.

Miongoni mwa Mafarisayo kuna fikira za namna mbalimbali kuhusu talaka. Musa alisema kwamba mwanamke angeweza kutalikiwa kwa sababu ya kuwa ana “neno ovu” [jambo fulani la ukosefu wa ustahifu, NW]. Watu fulani huamini kwamba hii yamaanisha kutokuwa safi katika mambo ya ngono tu. Lakini wengine wafikiria “neno ovu” kuwa lahusisha makosa madogo sana. Kwa hiyo, wakikusudia kumshawishi Yesu, Mafarisayo wauliza: “Je! ni halali mtu kumwacha mkewe kwa kila sababu?” Wao wana uhakika kwamba lolote ambalo Yesu atasema litamhusisha katika matata pamoja na Mafarisayo walio na maoni tofauti.

Yesu ashughulikia swali hilo kwa ustadi, bila kupendeza maoni yoyote ya kibinadamu, bali akirejezea muundo asilia wa ndoa. “Hamkusoma,” yeye auliza, “ya kwamba yeye aliyewaumba mwanzo, aliwaumba mtu mume na mtu mke, akasema, Kwa sababu hiyo, mtu atamwacha babaye na mamaye, ataambatana na mkewe; na hao wawili watakuwa mwili mmoja? Hata wamekuwa si wawili tena, bali mwili mmoja. Basi aliowaunganisha Mungu, mwanadamu asiwatenganishe.”

Yesu aonyesha kwamba kusudi asilia la Mungu ni kwamba wenzi wa ndoa washikamane, kwamba wasipate talaka. Ikiwa ndivyo ilivyo, Mafarisayo wajibu, “jinsi gani basi Musa aliamuru kumpa hati ya talaka, na kumwacha?”

“Musa, kwa sababu ya ugumu wa mioyo yenu, aliwapa ruhusa kuwaacha wake zenu,” Yesu ajibu, “lakini tangu mwanzo haikuwa hivi.” Ndiyo, Mungu aliposimamisha imara kiwango cha kweli kwa ndoa katika bustani ya Edeni, hakufanyiza uandalizi wowote wa talaka.

Yesu aendelea kuwaambia hivi Mafarisayo: “Nami nawaambia ninyi, Kila mtu atakayemwacha mkewe, isipokuwa ni kwa sababu ya uasherati [Kigiriki, por·neiʹa], akaoa mwingine, azini.” Hapo basi aonyesha kwamba por·neiʹa, ambao ni ukosefu mbaya sana wa adili, ndiyo sababu moja tu inayokubaliwa na Mungu ya talaka.

Kwa kung’amua kwamba ndoa yapasa kuwa muungano wa kudumu ulio wenye hii sababu moja ya talaka, hisia za wanafunzi zawasukuma kusema hivi: “Mambo ya mtu na mkewe yakiwa hivyo, haifai kuoa.” Hakuna shaka kwamba mtu aliye na wazo la ndoa apaswa kufikiria kwa uzito udumifu wa kifungo cha ndoa!

Yesu asonga mbele na kuongea juu ya useja. Aeleza kwamba wavulana fulani huzaliwa wakiwa matowashi, wasiweze kufunga ndoa kwa sababu ya kutositawi nguvu za uzazi. Wengine wamefanywa matowashi na wanadamu, wakitendwa ukatili wa kufanywa hoi kingono. Mwisho, watu fulani hukandamiza tamaa ya kufunga ndoa na ya kufurahia ngono ili waweze kujitoa kwa ukamili zaidi watumikie mambo yanayohusu Ufalme wa mbingu. “Awezaye kulipokea neno hili [la useja], na alipokee,” Yesu amalizia.

Sasa watu waanza kumletea Yesu watoto wao wachanga. Hata hivyo, wanafunzi wagombeza watoto hao na kujaribu kuwaambia waende zao, bila shaka wakitaka kumhami Yesu asipatwe na mkazo usiohitajiwa kabisa. Lakini Yesu asema: “Waacheni watoto wadogo waje kwangu, msiwazuie; kwa maana watoto kama hawa ufalme wa Mungu ni wao. Amin, nawaambieni, Ye yote asiyeukubali ufalme wa Mungu kama mtoto mdogo hatauingia kabisa.”

Hapa Yesu aandaa masomo mazuri kama nini! Ili kupokea Ufalme wa Mungu, ni lazima tuige unyenyekevu na ufundishiko wa watoto wachanga. Lakini kielelezo cha Yesu chatoa pia kielezi cha jinsi lilivyo jambo la maana, hasa kwa wazazi, kutumia wakati pamoja na watoto wao. Sasa Yesu aonyesha upendo wake kwa wadogo-wadogo kwa kuwatia mikononi mwake na kuwabariki. Mathayo 19:1-15; Kumbukumbu 24:1; Luka 16:18; Marko 10:1-16; Luka 18:15-17.

◆ Mafarisayo wana maoni gani tofauti-tofauti juu ya talaka, na kwa hiyo wajaribu kumshawishije Yesu?

◆ Yesu ashughulikaje na jitihada ya Mafarisayo kumshawishi, naye atoa nini kuwa ndiyo sababu moja tu ya talaka?

◆ Kwa nini wanafunzi wa Yesu wasema haifai kufunga ndoa, na Yesu aandaa pendekezo gani?

◆ Yesu atufundisha nini kwa shughuli zake pamoja na watoto wachanga?