Maisha na Huduma ya Yesu

Yesu na Mtawala Kijana Tajiri

YESU aendeleapo kupitia wilaya ya Perea kuelekea Yerusalemu, mwanamume kijana akimbia na kujitupa chini kwa kupiga magoti mbele yake. Mwanamume huyo aitwa mtawala, labda ikimaanisha kwamba ana cheo mashuhuri katika sinagogi la hapo au hata kwamba yeye ni mshiriki wa Sanhedrini. Pia, yeye ni tajiri sana. “Mwalimu Mwema,” yeye auliza, “ni lazima nifanye nini ili kurithi uhai wa milele?”

“Kwa nini wewe waniita mimi mwema?” Yesu ajibu. “Hakuna mtu mwema, isipokuwa mmoja, Mungu.” Yaelekea kwamba mwanamume huyu kijana atumia neno “mwema” kama cheo, kwa hiyo Yesu amjulisha kwamba cheo hicho ni cha Mungu tu.

“Ingawa hivyo,” Yesu aendelea kusema, “ikiwa wewe wataka kuingia katika uhai, zishike amri kwa uendelevu.”

“Zipi?” mwanamume huyo auliza.

Akitaja tano za Amri Kumi, Yesu ajibu hivi: “Yaani, Ni lazima wewe usiue, Ni la zima wewe usifanye uzinzi, Ni lazima wewe usiibe, Ni lazima wewe usitoe ushuhuda wa bandia, Heshimu baba yako na mama yako.” Na akiongezea amri iliyo ya maana hata zaidi, Yesu asema: “Ni lazima wewe upende jirani yako kama wewe mwenyewe.”

“Mambo haya yote mimi nimeyashika kutoka ujana wangu na kuendelea,” mwanamume huyo ajibu kwa weupe wote wa moyo. “Ningali na ukosefu wa nini?”

Kwa kusikiliza ombi la mwanamume huyo lenye juhudi na bidii nyingi ya moyoni, Yesu ahisi upendo kwake. Lakini Yesu ahisi kwa fahamu zake kwamba mwanamume huyu ana ushikamano mwingi kwa mali za kimwili, na kwa hiyo aonyesha wazi uhitaji wake: “Jambo moja linakosekana kuhusu wewe: Enda, kauze vitu ambavyo wewe unavyo na uwape maskini, na wewe utakuwa na hazina mbinguni, na uje uwe mfuasi wangu.”

Yesu atazama, bila shaka akiwa na sikitikio, huku mwanamume huyo akiinuka na kugeuka aende zake kwa huzuni ya kina kirefu. Utajiri wake wampofusha asiione thamani ya hazina ya kweli. “Itakuwa vigumu kama nini,” Yesu aomboleza, “kwa wale walio na pesa kuingia ndani ya ufalme wa Mungu!”

Maneno ya Yesu yawagutusha wanafunzi. Lakini wao washangaa hata zaidi aendeleapo kutaja kanuni ya ujumla: “Kwa uhakika, ni rahisi zaidi ngamia kupita katika jicho la sindano ya kushonea kuliko mtu tajiri kuingia ndani ya ufalme wa Mungu.”

“Kwa uhakika, ni nani awezaye kuokolewa?” wanafunzi wataka kujua.

Akiwatazama moja kwa moja, Yesu ajibu hivi: “Kwa wanadamu haiwezekani, lakini sivyo ilivyo kwa Mungu, kwa maana mambo yote yawezekana kwa Mungu.”

Kwa kuona kwamba wao wamefanya chaguo lenye kutofautiana sana na lile la mtawala kijana tajiri, Petro asema hivi: “Tazama! Sisi tumeacha vitu vyote na kukufuata wewe.” Kwa hiyo auliza hivi: “Kutakuwako nini hasa kwa ajili yetu?”

“Katika kuumbwa upya,” Yesu aahidi, “Mwana wa binadamu aketipo juu ya kiti chake kitukufu cha ufalme, nyinyi ambao mmenifuata mimi mtaketi wenyewe pia juu ya viti vya ufalme kumi na viwili, mkihukumu makabila kumi na mawili ya Israeli.” Ndiyo, Yesu anaonyesha kwamba kutakuwako kuumbwa upya kwa hali zilizopo duniani ili mambo yawe kama yalivyokuwa katika bustani ya Edeni. Na Petro na wanafunzi wale wengine wataipokea thawabu ya kutawala pamoja na Kristo juu ya Paradiso hii ya duniani pote. Kwa uhakika, thawabu hiyo nzuri ajabu inastahiki kufanyiwa dhabihu yoyote!

Ingawa hivyo, hata sasa kuna thawabu fulani-fulani, kama vile Yesu alivyotaarifu kwa uthabiti: “Hakuna mmoja ambaye ameacha nyumba au akina ndugu au akina dada au mama au baba au watoto au mashamba kwa ajili yangu na kwa ajili ya habari njema ambaye hatapata mara mia sasa katika kipindi hiki cha wakati, nyumba na akina ndugu na akina dada na akina mama na watoto na mashamba, pamoja na minyanyaso, na katika mfumo wa mambo unaokuja uhai wa milele.”

Kama vile ambavyo Yesu aahidi, kokote ambako wanafunzi wake huenda ulimwenguni, wao wakiwa pamoja na Wakristo wenzao huona shangwe ya uhusiano wenye ukaribu na thamani kubwa kuliko ule ambao wao huuonea shangwe wakiwa pamoja na washiriki wa jamaa ya kiasili. Yaonekana kwamba yule mtawala kijana tajiri apoteza thawabu hii na hata ile ya uhai wa milele katika Ufalme wa kimbingu wa Mungu.

Baadaye Yesu aongezea hivi: “Hata hivyo, wengi walio wa kwanza watakuwa wa mwisho, na wa mwisho wawe wa kwanza.” Yeye amaanisha nini?

Amaanisha kwamba watu wengi walio “wa kwanza” katika kuona shangwe ya mapendeleo ya kidini, kama yule mtawala kijana tajiri, hawatauingia Ufalme. Watakuwa “wa mwisho.” Lakini wengi, kutia na wanafunzi wanyenyekevu wa Yesu, ambao hudharauliwa kwa kuonwa na Mafarisayo wenye kujihesabia uadilifu kuwa ni “wa mwisho”—kuwa ni watu wa bara, au ‛am ha·’aʹrets—watakuwa “wa kwanza.” Kuwa kwao “wa kwanza” kwamaanisha watapokea pendeleo la kuwa watawala wenzi pamoja na Kristo katika Ufalme. Marko 10:17-31; Mathayo 19:16-30; Luka 18:18-30, NW.

◆ Ushuhuda waonyesha kwamba yule mwanamume kijana tajiri ni mtawala wa aina gani?

◆ Kwa nini Yesu akataa kuitwa mwema?

◆ Tukio la mtawala kijana latoaje kielezi cha hatari ya kuwa tajiri?

◆ Yesu awaahidi wafuasi wake thawabu gani mbali-mbali?

◆ Ni jinsi gani walio wa kwanza waja kuwa wa mwisho, na wa mwisho kuwa wa kwanza?