Uvumilivu Unaopata Ushindi

“Mnahitaji kuwa na uvumilivu, ili mweze kufanya anayotaka Mungu na kupokea kile alichoahidi.”—WAEBRANIA 10:36, HNWW.

 1. Kwa nini uvumilivu ni wa lazima kwa kila mtu anayemtumikia Yehova Mungu leo?

ULIMWENGU huu mzima umo katika uwezo wa mungu mwenye fitina ya uasi. Mtawala wao asiyeonekana, Shetani Ibilisi, anakazia jitihada zake zote katika kumpinga Yehova na kupiga vita dhidi ya kutetewa kwa enzi kuu ya Yehova ya ulimwengu wote mzima kupitia Ufalme wa Kimesiya. Hilo lafanya iwe lazima kwamba yeyote anayejiweka wakfu kwa Mungu na kuchukua upande Wake wa suala la enzi kuu atakuwa akipingwa daima na ulimwengu huu. (Yohana 15:18-20; 1 Yohana 5:19) Hivyo, kila mmoja wetu apaswa ajitie nguvu ili avumilie mpaka ulimwengu huu ushindwe kabisa kwenye Har–Magedoni. Ili kuwa miongoni mwa wale washindi wa Mungu wanaoshinda ulimwengu kwa imani na uaminifu wao wa kimaadili, ni lazima tuendelee kuwa imara mpaka mwisho. (1 Yohana 5:4) Twaweza kufanya hivyo jinsi gani?

2, 3. Yehova Mungu na Yesu Kristo ni mifano mikubwa zaidi ya uvumilivu kwa jinsi gani?

² Kwanza, twaweza kutafuta kitia moyo katika mifano miwili ya uvumilivu yenye kutokeza. Hao ni nani? Mmoja ni Yesu Kristo, “mzaliwa wa kwanza wa viumbe vyote,” ambaye amestahimili kwa uaminifu katika utumishi wa Mungu tangu alipoumbwa zamani sana wakati usiojulikana. Kwa kuende-lea kwake kumtumikia Mungu kwa uvumilivu, Yesu alipata kuwa mfano kwa viumbe wote wenye akili walioumbwa baada yake mbinguni na duniani. (Wakolosai 1:15, 16) Hata hivyo, mfano mkubwa zaidi wa uvumilivu ni Yehova Mungu, ambaye amevumilia kwa muda mrefu uasi dhidi ya enzi kuu yake naye ataendelea kufanya hivyo mpaka achukuapo hatua kumaliza suala la enzi kuu kwa njia yenye kukata maneno.

³ Kwa njia inayoonyesha mfano mzuri, Yehova amevumilia katika mambo yanayohusu heshima na maoni yake binafsi ya ndani kabisa. Amejizuia anapokabili hali yenye kutia uchungu sana na amejizuia asichukue hatua dhidi ya wale ambao wamemletea suto—kutia na Shetani Ibilisi. Tunashukuru kwa ajili ya uvumilivu wa Mungu na kwa ajili ya rehema yake. Bila hizo, hatungefurahia kuwapo hata kwa kitambo kidogo sana. Kwa kweli, Yehova Mungu amejipatia sifa bora isiyolinganika na yoyote kwa uvumilivu wake.

4, 5. (a) Kielezi cha Paulo cha mfinyanzi kinaonyeshaje uvumilivu wa Mungu na rehema yake? (b) Rehema ya Mungu itathibitikaje kuwa haikuwa imetumiwa bure?

⁴ Mtume Paulo hutaja uvumilivu na pia rehema ya Mungu asemapo hivi: “Mfinyanzi je! hana amri juu ya udongo, kwa fungu moja la udongo kuumba chombo kimoja kiwe cha heshima, na kimoja kiwe hakina heshima? Ni nini basi, ikiwa Mungu kwa kutaka kuonyesha ghadhabu yake, na kuudhihirisha uweza wake, kwa uvumilivu mwingi, alichukuliana na vile vyombo vya ghadhabu vilivyofanywa tayari kwa uharibifu; tena, ili audhihirishe wingi wa utukufu wake katika vile vyombo vya rehema, alivyovitengeneza tangu zamani vipate utukufu; ndio sisi aliotuita, si watu wa Wayahudi tu, ila na watu wa Mataifa pia?”—Warumi 9:21-24.

⁵ Kama maneno hayo yanavyoonyesha, muda wa kipindi hiki cha uvumilivu wake, Yehova anaendelea na kusudi lake tukufu naye huonyesha rehema juu ya vyombo fulani vya kibinadamu. Yeye hutayarisha vyombo hivyo kwa ajili ya utukufu wa milele na hivyo kushinda makusudi maovu ya mpinzani wake mkubwa, Shetani Ibilisi, na wote wanaounga Shetani mkono. Si wote kati ya aina ya kibinadamu wamekuwa vyombo vya ghadhabu, wanaostahili uharibifu. Hilo laleta sifa kwa uvumilivu wenye saburi wa Mungu Mweza Yote. Rehema yake haitakuwa ya bure. Itatokeza (1) familia tukufu ya Ufalme mbinguni chini ya Mwana mpendwa wa Yehova, Yesu Kristo, na (2) jamii ya viumbe vya kibinadamu walioponywa na kukamilishwa juu ya dunia-paradiso, wote wakiwa warithi wa uhai wa milele.

Kuvumilia Hata Mwisho

 6. (a) Ni kwa nini Wakristo hawawezi kuepuka jaribu la uvumilivu? (b) Neno la Kigiriki kwa “uvumilivu” huonyesha nini kwa kawaida?

⁶ Kukiwa na tumaini zuri ajabu kama hilo huko mbele, maneno ya Yesu yenye kutia nguvu yapasa kuwa masikioni mwetu daima, yaani: “Mwenye kuvumilia mpaka mwisho, ndiye atakayeokoka.” (Mathayo 24:13) Ni jambo la muhimu kuanza vizuri katika mwendo wa uanafunzi wa Kikristo. Lakini jambo lenye maana hatimaye ni jinsi tunavyovumilia, jinsi tunavyoumaliza mwendo huo. Mtume Paulo alikazia hilo aliposema hivi: “Mnahitaji kuwa na uvumilivu, ili mweze kufanya anayotaka Mungu na kupokea kile alichoahidi.” (Waebrania 10:36, HNWW) Neno la Kigiriki linalotafsiriwa “uvumilivu” hapa ni hy·po·mo·neʹ. Kwa kawaida hilo huonyesha uvumilivu wenye moyo mkubwa, uthabiti, au saburi ambao haupotezi tumaini unapokabili vizuizi, minyanyaso, majaribu na vishawishi. Tukitumaini kushinda na kupata wokovu hatimaye, ni lazima tustahimili jaribu la uvumilivu kuwa sehemu ya matayarisho yanayohitajiwa kwa ajili ya wokovu huo.

 7. Ni lazima tuepuke danganyo gani, na ni mfano gani utakaotusaidia tuvumilie?

⁷ Hatupaswi kujidanganya wenyewe kwa wazo la kujipendeza kwamba twaweza kumaliza jaribu hilo upesi. Yehova alijitahidi sana, ili masuala ya enzi kuu ya ulimwengu wote mzima na ya uaminifu wa kimaadili wa mwanadamu yaweze kujibiwa kwa njia yenye kukata maneno. Yeye amevumilia mambo yasiyopendeza hata ingawa angaliweza kuyakomesha mara moja. Yesu Kristo pia alikuwa mfano mzuri wa uvumilivu. (1 Petro 2:21; linganisha Warumi 15:3-5.) Tukiwa na mifano hiyo mizuri mbele yetu, kwa hakika sisi pia tuna nia ya kuvumilia mpaka mwisho.—Waebrania 12:2, 3.

Sifa ya Ustahili Inayohitajiwa

 8. Paulo alionyesha sifa gani ambayo sisi sote twahitaji?

⁸ Hakuna mtumishi yeyote wa Mungu, hata kutoka nyakati za mapema kabisa, ambaye ameachiliwa asihitaji kuthibitisha uaminifu wake wa kimaadili kwa kuvumilia. Watu mashuhuri sana katika historia ya Biblia waliobaki waaminifu mpaka kifo na kustahili kupata uhai wa milele mbinguni walihitaji kuthibitisha uthabiti wao. Kwa mfano, Sauli wa Tarso, aliyekuwa Farisayo zamani, aliwaambia Wakorintho hivi: “Sikuwa duni ya mitume walio wakuu kwa lo lote, nijapokuwa si kitu. Kweli ishara za mtume zilitendwa katikati yenu katika saburi yote, kwa ishara na maajabu na miujiza.” (2 Wakorintho 12:11, 12) Ijapokuwa mizigo ya kazi hiyo, Paulo alithamini huduma yake sana sana hivi kwamba alivumilia na kujaribu kwa bidii kutoiletea lawama.—2 Wakorintho 6:3, 4, 9.

 9. (a) Mabaki ya wapakwa-mafuta wameonyeshaje uvumilivu, na kukiwa na tokeo gani? (b) Ni nini kinachotumika kuwa kichocheo kwetu kuendelea kwa uaminifu katika utumishi wa kimungu?

⁹ Katika nyakati za karibuni zaidi, Wakristo wapakwa-mafuta waliokuwa wakimtumikia Mungu kabla ya vita ya ulimwengu ya kwanza walijua kwamba mwaka 1914 ungetia alama mwisho wa Nyakati za Wasio Wayahudi, na wengi wao walitazamia kupokea thawabu yao ya kimbingu katika mwaka huo unaostahili kukumbukwa. Lakini hilo halikutukia. Kama mambo ya hakika yanavyoonyesha, waliongezewa miongo ya miaka zaidi. Katika urefusho huo wa mwendo wao wa maisha ya kidunia usiotazamiwa, walipata kusafishwa mkononi mwa Yehova Mungu. (Zekaria 13:9; Malaki 3:2, 3) Uvumilivu wa kuendelea ulitokeza maendeleo zaidi kwao. Wakiwa watumishi wa Yehova, walishangilia kutajwa wazi kuwa watu wa jina lake. (Isaya 43:10-12; Matendo 15:14) Leo, wakiwa wamepitia vita vya ulimwengu viwili na mapigano mengine madogo madogo, wanasisimuka kusaidiwa katika kueneza habari njema na umati mkubwa wa kondoo wengine unaoongezeka, ukiwa sasa na idadi ya zaidi ya milioni nne. Paradiso ya kiroho wanayofurahia imeenea kotekote duniani, hata kufikia visiwa vya bahari vya mbali sana. Kutendewa huko kwa upendeleo, tunakothamini zaidi na zaidi kadiri tuendeleavyo kuishi, kumetumika kuwa kichocheo cha kuendelea kwa uaminifu katika utumishi wa kimungu hata mapenzi na makusudi ya Mungu yatimizwe kikamili.

10. Ili tusidhoofike, ni nini kinachohitajiwa kwa kawaida?

¹⁰ Kwa kuwa thawabu yetu inategemea uthabiti wetu, sikuzote tunahitaji uhimizo juu ya jambo hili lenye umaana sana. (1 Wakorintho 15:58; Wakolosai 1:23) Ili kusiwe kudhoofika kokote miongoni mwa watu wa Yehova, ni lazima tutiwe moyo kwa kawaida tushikilie kweli na lile pendeleo lenye thamani sana la kueneza kweli, kama vile makundi yaliyokuwa yamefanyizwa karibuni tu yalivyotiwa moyo katika karne ya kwanza na ziara za kurudia za Paulo na Barnaba. (Matendo 14:21, 22) Acheni iwe nia na azimio letu thabiti kwamba, kama mtume Yohana alivyosema, kweli itadumu ndani yetu, “nayo itakuwa pamoja nasi hata milele.”—2 Yohana 2.

Kungoja kwa Uvumilivu Usioyumbayumba

11. Ni nini kinachoonekana kuwa kanuni ya Mungu kwa watumishi wake, na hiyo ilionyeshwaje katika kisa cha Yusufu?

¹¹ Inachukua wakati ili jaribu linalotuhusu likamilishwe. (Yakobo 1:2-4) Ngoja! Ngoja! Ngoja! yaonekana kuwa ilikuwa ndiyo kanuni ya Mungu kwa watumishi wake wa zamani walipojaribiwa kuhusu nia yao ya kuendelea katika imani. Lakini kungoja huko, hatimaye, kulithibitika kuwa kwenye kuthawabisha sikuzote kwa wale watumishi waaminifu. Yusufu, kwa mfano, alihitaji kungoja miaka 13 akiwa mtumwa na mfungwa gerezani, lakini ono hilo lilisafisha utu wake.—Zaburi 105:17-19.

12, 13. (a) Abrahamu alikuwaje mfano wa uvumilivu mwaminifu? (b) Imani na uvumilivu wa Abrahamu watokezwa kuwa kiolezo kwetu kwa njia gani?

¹² Abrahamu alikuwa tayari mwenye umri wa miaka 75 wakati Mungu alipomwita kutoka Uri wa Wakaldayo kwenda kwenye Bara Lililoahidiwa. Alikuwa mwenye umri wa miaka karibu 125 wakati alipopokea uthibitisho wa ahadi ya Mungu yenye kufungwa kwa kiapo—hilo lilitukia mara tu Abrahamu alipoonyesha nguvu ya imani yake kwa kufikia hatua ya kumtoa Isaka, mwana wake mpendwa, akiachishwa tu wakati malaika wa Yehova alipozuia mkono wake asitoe dhabihu hiyo. (Mwanzo 22:1-18) Miaka hamsini ilikuwa muda mrefu kwa Abrahamu kungoja akiwa mgeni katika bara la kigeni, lakini yeye alishikamana na uaminifu wake hata miaka 50 mingine mpaka alipokufa akiwa na umri wa miaka 175. Katika wakati huo wote, Abrahamu alikuwa shahidi na nabii mwaminifu wa Yehova.—Zaburi 105:9-15.

¹³ Imani na uvumilivu wa Abrahamu unatolewa kuwa kiolezo kwa watumishi wote wa Mungu wanaotaka kupokea ahadi zilizoahidiwa kupitia Yesu Kristo, Mbegu ya Abrahamu. (Waebrania 11:8-10, 17-19) Kuhusu yeye, twasoma hivi katika Waebrania 6:11-15: “Nasi twataka sana kila mmoja wenu aidhihirishe bidii ile ile, kwa utimilifu wa matumaini mpaka mwisho; ili msiwe wavivu, bali mkawe wafuasi wa hao wazirithio ahadi kwa imani na uvumilivu. Kwa maana Mungu, alipompa Ibrahimu ahadi, kwa sababu alikuwa hana mkubwa kuliko yeye mwenyewe wa kumwapa, aliapa kwa nafsi yake, akisema, Hakika yangu kubariki nitakubariki, na kuongeza nitakuongeza. Na hivyo kwa kuvumilia akaipata ile ahadi.”

14. Kwa nini tusifikiri kwamba jaribu la uvumilivu ni la daima na thawabu ni moja isiyoweza kupatikana?

¹⁴ Tayari mabaki ya wapakwa-mafuta wameona miaka 77 ikipita tangu mwisho wa Nyakati za Wasio Wayahudi katika 1914, wakati ambao wengine wao walitazamia kutukuzwa mbinguni kwa kundi la Kikristo la kweli. Hatujui ni muda gani zaidi mabaki wapaswa kungoja. Je! twapaswa kuyumbayumba na kufikiri kwamba kungoja huko ni kwa daima na kwamba ile thawabu ni kama kujaribu kushika hewa? La! Hilo halingetetea kamwe enzi kuu ya Mungu au kuliheshimu jina lake. Yeye asingehesabiwa haki mbele ya ulimwengu wakati anapotupa sisi ushindi na mwishowe zawadi ya uhai wa milele. Ujapokuwa urefu wa wakati, mabaki, pamoja na waandamani wao waaminifu wenye mfano wa kondoo, wamepiga moyo konde kumngojea Yehova atende kwa wakati wake mwenyewe. Kwa kuonyesha uvumilivu huo ulio mfano mzuri, wanafuata mwendo wa Abrahamu.—Warumi 8:23-25.

15. (a) Shime yetu ni ipi, na Mungu ametutegemeza kwa ushindi kupitia maono gani? (b) Ni uhimizo gani uliotolewa na Paulo ambao wabaki ukiifaa siku yetu?

¹⁵ Basi, shime ingali ni uvumilivu usioyumbayumba katika kufanya mapenzi ya Mungu. (Warumi 2:6, 7) Katika wakati uliopita ametutegemeza katika dhiki kali, kutia na vifungo vya gerezani na kambi za mateso, ametupitisha kwa ushindi wenye utukufu kwa jina na kusudi lake.a Katika muda ambao ungali wabaki ili kukamilisha jaribu letu, Yehova ataendelea kufanya ivyo hivyo. Himizo la Paulo lingali linafaa kwa siku yetu: “Mnahitaji saburi na uvumilivu thabiti, ili mpate kufanya na kutimiza kikamili mapenzi ya Mungu, na hivyo kupokea na kutwaa na kufurahia kabisa kile ambacho kimeahidiwa.”—Waebrania 10:36, The Amplified Bible; Warumi 8:37.

16. Kwa nini hatupaswi kuuona wakfu wetu kwa Yehova katika njia yenye mipaka au kuwa na masharti fulani?

¹⁶ Maadamu Yehova ana kazi ya kufanywa nasi katika ulimwengu huu mwovu, basi tunataka, kwa kufuata mfano wa Yesu, kufanya kazi hiyo mpaka imalizike. (Yohana 17:4) Wakfu wetu kwa Yehova haukutegemea mapatano kwamba tungemtumikia kwa muda mfupi tu ndipo Har–Magedoni ije. Wakfu wetu ulikuwa wa milele. Kazi ya Mungu kwetu haitaisha na vita ya Har–Magedoni. Hata hivyo, ni baada ya kukamilisha kazi hiyo ambayo yapasa kufanywa kabla ya Har–Magedoni kwamba tutaona mambo matukufu yatakayokuja baada ya vita hiyo kubwa. Kisha, kuongezea pendeleo lenye furaha la kuendelea kufanya kazi yake, tutathawabishwa na mibaraka aliyoahidi ambayo imetumainiwa kwa muda mrefu sana.—Warumi 8:32.

Upendo kwa Mungu Unatusaidia Tuvumilie

¹⁷ Labda, nyakati zinapokuwa zenye mikazo, huenda tukauliza: ‘Twaweza kuvumiliaje zaidi?’ Jibu ni nini? Kwa kumpenda Mungu kwa moyo, akili, nafsi, na nguvu zetu zote. “Upendo huvumilia, hufadhili; upendo hauhusudu; upendo hautakabari; haujivuni; huvumilia yote; huamini yote; hutumaini yote; hustahimili yote. Upendo haupungui neno wakati wo wote.” (1 Wakorintho 13:4, 7, 8) Tusipovumilia kwa sababu ya upendo wetu kwa Mungu, uvumilivu wetu hauna thamani yoyote. Lakini tukivumilia chini ya magumu kwa sababu ya ujitoaji wetu kwa Yehova, basi uvumilivu wetu utakuwa na tokeo la kufanya upendo wetu kwake uwe wa kina kirefu zaidi. Upendo kwa Mungu, Baba yake, ulimwezesha Yesu avumilie. (Yohana 14:30, 31; Waebrania 12:2) Kusudi letu la kweli likiwa upendo kwa Mungu, Baba yetu, ni nini ambacho hatutaweza kuvumilia?

¹⁸ Ni upendo wetu kwa Yehova Mungu usioyumbayumba ambao umetuwezesha kuendelea kuwa washindi juu ya ulimwengu katika wakati huu wa jaribu wenye hatari zaidi. Na Yehova, kupitia Yesu Kristo, ataendelea kutupa msaada tunaohitaji haidhuru ni kwa muda mrefu zaidi kadiri gani ambao mfumo huu wa kale utaruhusiwa uweko. (1 Petro 5:10) Bila shaka, hatufanyi utabiri wowote kuhusu muda gani unaobaki bado, na hatuweki tarehe fulani hususa. Tunamwachia Yehova Mungu, Mweka Wakati Mkuu, jambo hilo.—Zaburi 31:15.

¹⁹ Hata hivyo, kizazi kilichotabiriwa kushuhudia na kuona “umalizio wa mfumo wa mambo” kimezeeka sana. (Mathayo 24:3, 32-35, NW) Kwa hiyo acheni tusisahau kamwe kwamba kila siku ipitayo ambayo tunavumilia inapunguza siku moja kwa Shetani na roho waovu wake kuchafua ulimwengu wote mzima kwa kuwako kwao kwenyewe na twasonga siku moja karibu zaidi na wakati ambao Yehova hatazidi kuvumilia tena kuwako kwa “vyombo vya ghadhabu vilivyofanywa tayari kwa uharibifu.” (Warumi 9:22) Karibuni, wakati ustahimilivu wa Yehova ufikapo mwisho, ataonyesha ghadhabu yake kwa wanaume na wanawake wasiomhofu Mungu. Hivyo, atafunua kutokubali kwake kwa kimungu kwa mwendo wao wa tendo, hata ingawa aliwaruhusu waendelee kwa kipindi hicho chote cha wakati.

²⁰ Lingekuwa jambo la upumbavu sana kwetu sisi kuacha kuendeleza jitihada zetu zenye upendo za kupata zawadi tukufu ambayo tunatolewa kupitia Yesu Kristo. Badala ya hivyo, tuna nia ya kuendelea kwa uaminifu tukiwa Mashahidi kwa Yehova katika wakati huu wenye umaana sana ambao Yehova yu karibu kujitetea mwenyewe kuwa Mwenye Enzi Kuu wa Ulimwengu Wote Mzima.

[Maelezo ya Chini]

Ungeitikiaje?

◻ Kwa nini hatuwezi kuepuka kujaribiwa uvumilivu wetu?

◻ Twataka kuepuka danganyo gani?

◻ Ili kuepuka kudhoofika kokote kwetu, ni nini kinachohitajiwa?

◻ Shime yetu ni ipi?

◻ Katika nyakati za mikazo, ni nini kitatusaidia tuvumilie?

17, 18. (a) Katika nyakati za mikazo, ni nini kitatusaidia tuvumilie tukiwa na kibali cha Mungu? (b) Ni nini kitatusaidia kupata ushindi, nasi hatusemi nini kuhusu wakati unaobaki?

19, 20. (a) Twapaswa kuonaje kila siku ipitayo ambayo tunavumilia? (b) Ni upumbavu upi tunaotaka kuepuka, na kwa nini?

[Picha katika ukurasa wa 11]

Watu wa Mungu, kama Mashahidi hawa katika Port of Spain, Trinidad, sikuzote wamekuwa na nia ya kumngojea Yehova