Je! Wewe Walaani Vikali Ulimwengu Kupitia Imani Yako?
“Kwa imani Noa . . . [alijenga] safina ili kuokoa watu wa nyumba yake; na kupitia imani hii alilaani vikali ulimwengu.”—WAEBRANlA 11.7, NW.
1, 2. Twaweza kujifunza nini kwa kuchunguza maisha ya Noa?
YEHOVA alimpa Noa na jamaa yake—hesabu ya watu wanane tu—lile pendeleo la kuwa wanadamu pekee waliookoka Gharika. Maisha za marika wengine wote wa Noa zilikatizwa wakati Mungu alipowafagia katika kaburi lenye maji. Kwa kuwa kwa njia hiyo Noa ndiye baba wa kale kwetu sote, yatupasa tushukuru sana kwa imani aliyojizoeza.
2 Twaweza kujifunza mengi kwa kuchunguza maisha ya Noa. Maandiko yatuambia ni kwa nini Mungu alimpendelea kwa kumpa wokovu huku Yeye akiharibu watu wa kizazi cha Noa. Kumbukumbu ili hili la maandishi ya kimungu laonyesha wazi kwamba kizazi chetu chakabiliana usoni na hukumu ya jinsi hiyo kutoka kwa Mungu. Kwa habari hiyo Yesu alisema: “Kutakuwapo dhiki kubwa ambayo haijatokea namna yake tangu mwanzo wa ulimwengu hata sasa, wala haitakuwapo kamwe.” (Mathayo 24:21) Kwa kuiga imani ya Noa, sisi twaweza kuwa na lile tumaini hakika la kuokoka uharibifu ulio karibu sana mfumo huu mwovu uliopo.—Warumi 15:4; linganisha Waebrania 13:7.
3. Kwa nini Yehova alileta Gharika?
3 Wakati wa miaka 1,656 kuanzia kuumbwa kwa Adamu mpaka Gharika, ni wanadamu wachache sana waliokuwa na mbetuko wa kutenda mema. Maadili yalishuka haraka yakafikia kiwango cha chini ajabu. “Bwana [Yehova, NW] akaona ya kuwa maovu ya mwanadamu ni makubwa duniani na kwamba kila kusudi analowaza moyoni mwake ni baya tu sikuzote.” (Mwanzo 6:5) Jeuri, utafutaji wa anasa, na kuwapo kwa malaika waliojivika miili ya kibinadamu ambao walioa wanawake na kuzaa watoto majitu ni miongoni mwa mambo yaliyoongoza kwenye mtekelezo wa hukumu ya Mungu juu ya ulimwengu huo wa kale wa aina ya binadamu. Kwa Noa, Yehova alisema hivi: “Mwisho wa kila mwenye mwili umekuja mbele zangu; kwa sababu wameijaza dunia dhuluma.” Saburi ya Muumba, aliye “Hakimu wa dunia yote,” ikawa imefikia ukomo.—Mwanzo 6:13; 18:25, NW.
Noa Alitembea Pamoja na Mungu
4. (a) Yehova alikuwa na maoni ya jinsi gani kuhusu Noa, na kwa nini? (b) Ingawa haki ya Mungu ilidai kwamba ulimwengu mwovu huo uharibiwe, upendo wake ulidhihirishwaje kwa ajili ya Noa na jamaa yake?
4 Noa alitofautiana kama nini na watu wa siku yake! Yeye “alipata upendeleo katika macho ya Yehova. . . . Noa alikuwa mtu mwadilifu. Yeye alijithibitisha kuwa asiye na dosari miongoni mwa marika wake. Noa alitembea pamoja na Mungu wa kweli.” (Mwanzo 6:8, 9, NW) Noa alitembeaje pamoja na Mungu? Kwa kutenda mambo yafaayo kama kuhubiri akiwa mtetezi wa uadilifu na kujenga safina kwa imani na utii. Hivyo, ingawa ulimwengu huo wa kale uliharibiwa kwa sababu ulikuwa mfisadi kabisa, Mungu “alimweka Noa, mhubiri wa uadilifu, akiwa salama pamoja na wengine saba wakati alipoleta gharika juu ya ulimwengu wa watu wasiohofu Mungu.” (2 Petro 2:5, NW) Ndiyo, Mungu wetu mwenye upendo na haki, Yehova, hakuwaharibu waadilifu pamoja na waovu. Yeye alimwagiza Noa ajenge safina kubwa sana iwe ya kujiokoa mwenyewe, watu wa nyumba yake, na wanyama kadhaa, yote hayo yakiwa kwa ajili ya kujaza wakaaji duniani tena baada ya Gharika. Noa “alifanya hivyo hasa.” —Mwanzo 6:22, NW.
5. Maandiko yaelezaje juu ya uadilifu na imani ya Noa?
5 Safina ilipokwisha, Mungu alimwambia Noa hivi: “Ingia wewe na jamaa yako yote katika safina; kwa maana nimekuona wewe u mwenye haki [uadilifu, NW] mbele zangu katika kizazi hiki.” Paulo ajumlisha mambo pamoja kwa muhtasari huu: “Kwa imani Noa, baada ya kupewa onyo la kimungu la mambo yasiyoonwa bado, alionyesha hofu ya kutii Mungu na kujenga safina ili kuokoa watu wa nyumba yake; na kupitia imani hii alilaani vikali ulimwengu, naye akawa mrithi wa uadilifu ambao ni kulingana na imani.”—Mwanzo 7:1; Waebrania 11:7, NW.
6. Ni jinsi gani Noa alilaani vikali ulimwengu wa siku yake kupitia imani yake?
6 Noa alikuwa na imani ya kutokeza. Yeye aliamini mambo aliyoyasema Mungu kuhusu kufutilia mbali kizazi hicho. Noa alikuwa na hofu yenye afya juu ya kutomchukiza Yehova na alijenga safina kwa utii kulingana na maagizo aliyopewa na Mungu. Zaidi ya hilo, akiwa mhubiri wa uadilifu, Noa aliambia wengine juu ya uharibifu uliokuwa unakaribia sana. Ingawa wao hawakutii maneno yake, yeye alikataa kuacha ulimwengu mwovu huo ‘umminye awe katika mfinyango wao.’ (Warumi 12:2, Phillips) Badala ya hivyo, kupitia imani yake, Noa alilaani vikali ulimwengu kwa sababu ya uovu wao na akaonyesha kwamba ulistahili uharibifu. Utii wake na vitendo vya uadilifu vilionyesha kwamba wengine zaidi ya yeye na jamaa yake wangaliweza kuokoka kama wangalikuwa na nia ya kubadili mtindo wa maisha yao. Kwa kweli, Noa alithibitisha kwamba iliwezekana kuishi maisha yenye kufurahisha Mungu kujapokuwa na mibano kutoka kwenye mnofu wake mwenyewe usiokamilika, ulimwengu mwovu uliomzunguka, na Ibilisi.
Kwa Nini Mungu Ataharibu Mfumo Huu
7. Twajuaje kwamba sisi tunaishi katika siku za mwisho?
7 Kila mwongo wa miaka ya karne hii ya 20 umeona ulimwengu ukizama kwa kina kirefu zaidi katika uovu. Imekuwa hivyo hasa tangu mwanzo wa Vita ya Ulimwengu 1. Aina ya binadamu imeingia sana katika mambo kama vile ukosefu wa adili katika ngono, uhalifu, jeuri, vita, chuki, pupa, na utumizi mbaya wa damu hivi kwamba wale wapendao mambo yafaayo hushangaa kwa kujiuliza kama kweli yawezekana hali zikawa mbaya kuliko zilivyo sasa. Hata hivyo, Biblia ilitabiri katika kizazi chetu ukuzi wa uovu mwingi ajabu, hiyo ikitoa uthibitisho zaidi kwamba sisi tumo katika “siku za mwisho.”—2 Timotheo 3:1-5; Mathayo 24:34.
8. Watu fulani wamesema nini kuhusu ufahamivu wa kwamba kuna dhambi?
8 Leo, wazo la dhambi limemalizwa nguvu katika akili za watu wengi sana. Zaidi ya miaka 40 iliyopita, Papa Pius 12 alionelea hivi: “Dhambi ya karne hii ni kupoteza hisia yote kuhusu dhambi.” Kizazi kilichopo chakataa kukiri kuna dhambi na hatia. Katika kitabu chake Whatever Became of Sin? Dakt. Karl Menninger alitaarifu hivi: “Neno lenyewe ‘dhambi’ . . . limekuwa karibu kutoweka —neno hilo, pamoja na wazo lenyewe. Kwa nini? Kwani hakuna mtu yeyote mwenye kutenda dhambi tena?” Wengi wamepoteza uwezo wa kutambua yafaayo kutoka kwa yasiyofaa. Lakini sisi hatushangazwi na jambo hilo, kwa maana Yesu alitabiri matukio hayo alipokuwa akizungumzia ‘ishara ya kuwapo kwake’ katika “wakati wa mwisho.”—Mathayo 24:3; Danieli 12:4, NW.
Kigezo cha Hukumu Kilichowekwa Katika Siku ya Noa
9. Yesu alilinganishaje siku ya Noa na lile ambalo lingetukia wakati wa kuwapo Kwake?
9 Yesu alifanya ulinganifu kati ya matukio ya siku ya Noa na mambo ambayo yangetukia wakati wa kuwapo Kwake katika mamlaka ya Ufalme, kuanzia 1914. Alisema: “Kama vile siku za Noa zilikuwa, hivyo ndivyo kuwapo kwa Mwana wa binadamu [Yesu] kutakuwa Kwa maana kama vile walikuwa katika siku hizo kabla ya gharika, wakila na wakinywa, wanaume wakioa na wanawake wakipewa katika ndoa, mpaka siku ambayo Noa aliingia katika safina; na wao hawakujali mpaka gharika ikaja na kufagilia mbali wote, hivyo ndivyo kuwapo kwa Mwana wa binadamu kuta kuwa.”—Mathayo 24:37-39, NW.
10. Ni jinsi gani watu kwa ujumla hawayajali matukio ya maana ambayo yashirikishwa na kuwapo kwa Kristo?
10 Ndiyo, kama katika siku ya Noa, leo watu hawajali. Kwa kushughulika sana na maisha ya kila siku na mifuatio ya ubinafsi, wao hukataa kutambua kwamba hali zilizopo zatofautiana sana na zile za wakati uliopita na zalingana kabisa na mambo ambayo Yesu alisema yangeutia alama wakati wa mwisho Kwa miaka mingi, Mashahidi wa Yehova wamekuwa wakiambia kizazi hiki kwamba kuwapo kwa Yesu akiwa Mfalme wa Kimesiya mbinguni kulianza 1914 na kwasonga mbele sambamba na “umalizio wa mfumo wa mambo.” (Mathayo 24:3, NW) Watu walio wengi waudhihaki ujumbe wa Ufalme, lakini hata jambo hili lilitabiriwa mtume Petro alipoandika hivi: “Nyinyi mwajua hili kwanza, kwamba katika siku za mwisho watakuja wadhihaki pamoja na dhihaka yao, wakiendelea kulingana na tamaa zao wenyewe na kusema: ‘Ku wapi huku kuwapo kwake kulikoahidiwa? Kwani, tangu ile siku mababu zetu walipolala usingizi wa kifo, mambo yote yaendelea sawa-sawa kama yalivyokuwa tangu mwanzo wa kuumba.’”—2 Petro 3:3, 4, NW.
11. Kwa nini kizazi cha leo hakitakuwa na udhuru wakati dhiki kubwa iwasilipo?
11 Hata hivyo, kizazi cha leo hakitakuwa na udhuru wakati dhiki kubwa iwasilipo. Kwa nini? Kwa sababu kuna masimulizi ya Biblia kuhusu hukumu za kale za kimungu ambazo ziliweka kigezo kwa jambo ambalo Mungu atafanya katika siku yetu. (Yuda 5-7) Unabii wa Biblia unaotimizwa mbele ya macho yetu wenyewe waonyesha wazi kabisa ni wapi tulipo katika mkondo wa wakati. Kizazi hiki pia chauona wazi utendaji wa kuhubiri wa Mashahidi wa Yehova na kumbukumbu kama lile la Noa la matendo ya kushika uaminifu wa kimaadili.
12. Kwa kueleza wazo kuu hasa, Petro alinganishaje uharibifu wa ulimwengu wa siku ya Noa na ule ambao utakuja juu ya “mbingu na dunia zilizopo sasa”?
12 Petro aeleza jambo litakalotukia kwa wale wasioyajali mambo haya ya uhakika. Kama Yesu, mtume afanya hivyo kwa kurejezea yaliyotukia katika siku ya Noa, akisema: “Kulingana na tamaa yao, wanakosa kufahamu uhakika huu, kwamba tangu zamani zilikuwako mbingu na dunia zikisimama imara nje ya maji na katikati ya maji kwa lile neno la Mungu; na kwa njia hizo ule ulimwengu wa wakati huo ulipatwa na uharibifu wakati ulipogharikishwa kwa maji. Lakini kwa neno lile lile zile mbingu na dunia zilizopo sasa zimewekwa akiba kwa ajili ya moto nazo zimewekewa ile siku ya hukumu na ya kuharibiwa watu wasiohofu Mungu.”—2 Petro 3:5-7, NW.
13. Kwa sababu ya matukio makubwa yaliyoko mbele, ni shauri gani kutoka kwa Petro lapasa kutiiwa?
13 Huku tukiwa twakabiliwa usoni na hukumu hiyo ya Mungu iliyo hakika, sisi tusidanganywe wala kutishwa na wadhihaki. Hatuhitaji kuushiriki mwisho wao. Petro ashauri hivi: “Kwa kuwa vitu vyote hivyo vitafumuliwa hivyo, nyinyi yawapasa kuwa watu wa namna gani katika vitendo vitakatifu vya mwenendo na matendo ya ujitoaji kimungu, mkingojea na kukaribisha akilini kuwapo kwa siku ya Yehova, ambayo kupitia kwayo mbingu zikiwa katika moto zitafumuliwa na vitu vya asili vikiwa na moto mwingi sana vitayeyuka! Lakini ziko mbingu mpya na dunia mpya ambazo sisi tunangojea kulingana na ahadi yake, na katika hizo uadilifu utakaa.”—2 Petro 3:11-13, NW.
Iga Imani ya Noa Ili Uendelee Kuwa Hai
14. Ni maswali gani yaweza kutusaidia tujichanganue wenyewe?
14 Leo, sisi twakabili usoni magumu yale yale yaliyokabiliwa na Noa na jamaa yake katika kuwa wenye kutazamia kuokoka na kubaki tukiwa hivyo. Kama Noa, Mashahidi wa Yehova wanalaani vikali ulimwengu kwa imani yao yenye kutegemezwa na kazi zilizo njema. Lakini kila mmoja wetu angeweza kujiuliza hivi: ‘Mimi binafsi naendeleaje? Kama dhiki kubwa ingekuja kesho, je! Mungu angenihukumu kuwa nastahili kuokoka? Kama Noa, ambaye ‘alijithibitisha kuwa bila dosari miongoni mwa marika wake,’ je! mimi nina moyo mkuu wa kuwa tofauti na ulimwengu? Au nyakati fulani huwa ni vigumu watu kuiona tofauti kati yangu na mlimwengu kwa sababu ya njia yangu ya kutenda, kunena, au kuvaa?’ (Mwanzo 6:9, NW) Yesu alisema hivi kuhusu wanafunzi wake: “Wao si sehemu ya ulimwengu, kama vile mimi si sehemu ya ulimwengu.”—Yohana 17:16, AW; linganisha 1 Yohana 4:4-6.
15. (a) Kulingana na 1 Petro 4:3, 4, twapaswa kuwa na maoni ya jinsi gani kuhusu fikira za kilimwengu na mwenendo wetu wa hapo kwanza? (b) Twapaswa kufanya nini tukichambuliwa na waliokuwa rafiki zetu wa kilimwengu hapo kwanza?
15 Petro ashauri hivi: “Wakati ambao umepita unatosha kwa ajili ya nyinyi kuwa mmefanya mapenzi ya mataifa wakati nyinyi mliendelea katika vitendo vya mwenendo mlegevu, ashiki, mazidio katika kunywa divai, ulevi na ulafi, mashindano ya ulevi, na ibada ya sanamu haramu. Kwa sababu nyinyi hamwendelei kukimbia pamoja nao katika mwendo huu kwenye dimbwi la chini lile lile la ufasiki, wanatatizwa na huendelea kutukana nyinyi.” (1 Petro 4:3, 4, NW) Huenda wale waliokuwa rafiki zako walimwengu wakanena mambo ya kukutusi kwa sababu unatembea pamoja na Mungu na hukimbii tena pamoja nao. Lakini wewe, kama Noa, laani vikali watu hao kwa imani yako na kazi njema zenye kufanywa kwa kiasi.—Mika 6:8.
16. Mungu alikuwa na maoni ya jinsi gani kuhusu Noa, na ni maswali gani yangeweza kutusaidia tuchunguze fikira zetu na mwenendo wetu?
16 Mungu alimfikiria Noa kuwa mtu wa uadilifu. Huyo mzee mwaminifu wa ukoo “alipata upendeleo katika macho ya Yehova.” (Mwanzo 6:8, NW) Wakati wewe uchunguzapo fikira zako na mwenendo wako kulingana na viwango vya Mungu, je! wahisi kwamba yeye akubali mambo unayotenda, na mahali pote ambapo wewe huenda? Je! nyakati nyingine wewe hucheza-cheza katika vitumbuizo vya tabia zilizoshuka ambavyo vimeenea sana sasa? Neno la Mungu lasema kwamba yatupasa kufikiria mambo safi, yafaayo, na yenye kujenga. (Wafilipi 4:8) Je! wewe unajifunza Neno la Mungu kwa bidii ya uendelevu ili ‘kuzoeza nguvu zako za ufahamivu kupambanua yafaayo na yasiyofaa pia’? (Waebrania 5:14, NW) Je! wewe hukataa washirika wabaya na kuthamini sana ushirika pamoja na waabudu wenzako wa Yehova kwenye mikutano ya Kikristo na katika pindi nyinginezo? — 1 Wakorintho 15:33; Waebrania 10:24, 25; Yakobo 4:4.
17. Sisi tulio Mashahidi wa Yehova, twawezaje kuwa kama Noa?
17 Baada ya kuripoti juu ya kumalizwa kwa safina, Maandiko yasema hivi: “Noa aliendelea na kufanya kulingana na yote ambayo Mungu alikuwa amemwamuru. Yeye alifanya hivyo hasa.” (Mwanzo 6:22, NW) Mtu huyo mwenye kuhofu Mungu alikuwa mwenye bidii ya uendelevu katika kuhubiri pia akiwa shahidi wa Yehova. Kama Noa, wewe na uwe mtetezi thabiti wa mambo yafaayo ukiwa mhubiri wa uadilifu mwenye ukawaida. Stahimili katika kuvumisha onyo la mwisho wa ulimwengu huu mwovu, hata ingawa ni wachache wenye kusikiliza. Fanya kazi kwa muungamano pamoja na waamini wenzako ili kazi ya kufanya wanafunzi ikamalizike kabla ya ule mwisho.—Mathayo 28:19, 20.
18. Ni kwa msingi gani Yehova anaamua ni nani ataokoka dhiki kubwa?
18 Kwa kutumia viwango vile vile vya uadilifu na haki kama alivyofanya katika siku ya Noa, sasa Mungu anaamua ni nani apaswa kuokoka na ni nani apaswa kuangamia wakati wa dhiki kubwa. Yesu alifananisha kazi ya mgawanyo wa wakati uliopo na mtenganisho wa mchungaji wa kondoo kutoka kwenye mbuzi. (Mathayo 25:31-46) Watu wenye kutegemeza maisha zao juu ya tamaa na mifuatio ya ubinafsi hawataki ulimwengu wa zamani uishe nao hawataokoka. Lakini wale wenye kuepuka kuhusika katika kinyaa cha ulimwengu huu, ambao wadumisha imani imara katika Mungu, na ambao wanaendelea kuhubiri ujumbe wa Ufalme, wakivumisha onyo la hukumu ya Yehova inayokuja wataona shangwe ya kupata upendeleo wa kimungu wakiwa waokokaji. Yesu alisema: “Wakati ule watu wawili watakuwako kondeni; mmoja atwaliwa, mmoja aachwa; wanawake wawili watakuwa wakisaga; mmoja atwaliwa, mmoja aachwa.”—Mathayo 24:40, 41; 2 Wathesalonike 1:6-9; Ufunuo 22:12-15.
Rithi Mibaraka Pamoja na Noa
19. Isaya na Mika walitabiri mkusanyo gani wa ndani kwa ajili ya siku za mwisho?
19 Katika unabii mbalimbali ulio sambamba, wote wawili, Isaya na Mika manabii wa Mungu, walieleza jambo ambalo lingetukia wakati wa siku za mwisho. Walitangulia kuona yale tunayoona yakitimizwa leo—mtiririko wa watu wenye mioyo ya uadilifu wakitoka katika ulimwengu wa zamani na kupanda kwenda juu kwenye mlima wa ibada ya kweli. Wao watolea wengine mwaliko huu: “Njoni, twende juu mlimani kwa Bwana [Yehova, NW], nyumbani kwa Mungu wa Yakobo, naye atatufundisha njia zake, nasi tutakwenda katika mapito yake.” (Isaya 2:2, 3; Mika 4:1, 2) Je! wewe unatembea pamoja na songamano hili lenye furaha?
20. Ni mibaraka gani itaonewa shangwe na wale ambao hulaani vikali ulimwengu kupitia imani yao?
20 Isaya na Mika pia walitaja mibaraka itakayoonewa shangwe na wale ambao hulaani vikali ulimwengu kwa imani yao. Amani na haki ya kweli itadumu miongoni mwao, nao hawatajifunza vita tena. Watakuwa na tumaini hakika la kupata urithi kutoka kwa Yehova na “wataketi kila mtu chini ya mzabibu wake, na chini ya mtini wake.” Lakini ni lazima kila mtu afanye uamuzi imara, kwa maana Mika aonyesha kwamba miendo miwili yawezekana, akisema: “Mataifa yote watakwenda, kila moja kwa jina la mungu wake, na sisi tutakwenda kwa jina la BWANA [Yehova, NW], Mungu wetu, milele na milele.” —Mika 4:3-5; Isaya 2:4.
21. Wewe waweza kushirikije katika ile baraka kubwa ya uhai wa milele duniani?
21 Maandiko yaonyesha wazi jambo lenye kuhitajiwa ili kuokoka dhiki kubwa: imani imara. Noa alikuwa na imani ya jinsi hiyo, lakini je! wewe unayo? Ikiwa unayo, wewe kama yeye utakuwa “mrithi wa uadilifu ambao ni kulingana na imani.” (Waebrania 11:7, NW) Noa aliokoka uharibifu ulioamriwa na Mungu ambao ulikuja juu ya kizazi chake. Si kwamba aliishi tu miaka 350 baada ya Gharika bali yeye ni wa kufufuliwa pia akiwa na tumaini la kuishi milele duniani. Lo, ni baraka kubwa kama nini! (Waebrania 11:13-16) Wewe waweza kushiriki katika baraka hiyo pamoja na Noa, jamaa yake, na mamilioni ya wengine wapendao uadilifu. Jinsi gani? Kwa kuvumilia mpaka mwisho na kulaani vikali ulimwengu kupitia imani yako.
Je! Wewe Wakumbuka?
◻ Kwa nini ni jambo la maana Wakristo wachunguze maisha ya Noa?
◻ Watu wa kizazi hiki hawajali jambo gani, hiyo ikiongoza kwenye uharibifu wao?
◻ Kama Noa, ni jinsi gani sisi twaweza kulaani vikali ulimwengu huu?
◻ Ni jinsi gani sisi twaweza kuwa kama Noa mhubiri wa uadilifu?