Je, Uko Tayari kwa Siku ya Yehova?

“Hiyo siku ya BWANA iliyo kuu [“kubwa,” “NW”] i karibu; i karibu, nayo inafanya haraka sana.”—SEFANIA 1:14.

1. Maandiko hufafanuaje siku ya Yehova?

SIKU ya Yehova “iliyo kuu na itishayo” karibuni itaujia mfumo huu mwovu wa mambo. Maandiko yanaifafanua siku ya Yehova kuwa siku ya vita, giza, kiruu, taabu, maumivu makali, yenye kutia hofu, na yenye kufanya ukiwa. Hata hivyo, kutakuwako waokokaji, kwa kuwa “mtu awaye yote atakayeliita jina la BWANA ataponywa.” (Yoeli 2:30-32; Amosi 5:18-20) Ndiyo, wakati huo Mungu atawaharibu maadui wake na kuwaokoa watu wake.

2. Kwa nini twapaswa kuwa na hisi ya uharaka juu ya siku ya Yehova?

² Manabii wa Mungu walihusisha uharaka na siku ya Yehova. Mathalani, Sefania aliandika hivi: “Hiyo siku ya BWANA iliyo kuu i karibu; i karibu, nayo inafanya haraka sana.” (Sefania 1:14) Hali hiyo ni ya hima hata zaidi leo kwa sababu Mfishaji Mkuu wa Mungu, Mfalme Yesu Kristo, yuko karibu ‘kujifungia upanga wake pajani kwa ajili ya kweli na upole na haki.’ (Zaburi 45:3, 4) Je, uko tayari kwa siku hiyo?

Walikuwa na Mataraja Makubwa

3. Wakristo fulani Wathesalonike walikuwa na mataraja gani, nao walikuwa wamekosea kwa sababu gani mbili?

³ Watu wengi wamekuwa na mataraja yasiyotimizwa kwa habari ya siku ya Yehova. Wakristo fulani wa mapema katika Thesalonike walisema, “siku ya Yehova ipo hapa!” (2 Wathesalonike 2:2) Lakini kulikuwa na sababu mbili za msingi za kutokuwapo karibu kwa siku hiyo. Akitaja mojawapo ya sababu hizo, mtume Paulo alikuwa amesema hivi: “Wakati wowote ule ambao wanasema: ‘Amani na usalama!’ ndipo uharibifu wa ghafula utakapokuwa hapohapo juu yao.” (1 Wathesalonike 5:1-6) Katika “wakati [huu] wa mwisho,” sisi wenyewe twasubiri utimizo wa maneno hayo. (Danieli 12:4) Wathesalonike walikosa pia uthibitisho mwingine wa kwamba siku ya Yehova iliyo kubwa ilikuwa imefika, kwa kuwa Paulo aliwaambia kwamba: “Haitakuja isipokuwa uasi-imani uje kwanza.” (2 Wathesalonike 2:3) Paulo alipoandika maneno hayo (wapata mwaka wa 51 W.K.), “uasi-imani” kutoka katika Ukristo wa kweli haukuwa umesitawi kikamili. Leo, twauona ukiwa umesitawi sana katika Jumuiya ya Wakristo. Hata hivyo, yajapokuwa mataraja yao yasiyotimizwa, hao watiwa-mafuta waaminifu katika Thesalonike, walioendelea kumtumikia Mungu kwa uaminifu mpaka kifo, hatimaye walipokea thawabu ya kimbingu. (Ufunuo 2:10) Sisi nasi tutathawabishwa tukidumu tukiwa waaminifu huku tukingojea siku ya Yehova.

4. (a) Siku ya Yehova inafungamanishwa na nini kwenye 2 Wathesalonike 2:1, 2? (b) Wale waitwao kwa kawaida Mababa wa Kanisa walikuwa na maoni gani kwa habari ya kurudi kwa Kristo na mambo yaliyohusiana nako?

⁴ Biblia hufungamanisha “siku kuu ya BWANA” pamoja na “kuwapo kwa Bwana wetu Yesu Kristo.” (2 Wathesalonike 2:1, 2) Waitwao kwa kawaida Mababa wa Kanisa walikuwa na mawazo mbalimbali juu ya kurudi kwa Kristo, kuwapo kwake, na Utawala wake wa Miaka Elfu. (Ufunuo 20:4) Katika karne ya pili W.K., Papias wa Hierapolisi aliwazia mataraja ya uzalishaji wa ajabu wa dunia wakati wa ule Utawala wa Mileani wa Kristo. Justin Martyr alisema tena na tena juu ya kuwapo kwa Yesu na alitarajia Yerusalemu lililorudishwa liwe kitovu cha Ufalme Wake. Irenæus wa Lyons alifundisha kwamba baada ya Milki ya Roma kuharibiwa, Yesu angetokea kwa kuonekana kwa macho, angemfunga Shetani, na kutawala katika Yerusalemu la kidunia.

5. Wasomi fulani wamesema nini juu ya “Kuja kwa Pili” kwa Kristo na Utawala wake wa Mileani?

⁵ Mwanahistoria Philip Schaff alionelea kwamba “itikadi yenye kutokeza zaidi” katika kipindi kilichotangulia lile Baraza la Nisea katika 325 W.K. ilikuwa “ile itikadi ya kutawala kusikoonekana kwa Kristo kwa miaka elfu moja katika utukufu duniani pamoja na watakatifu waliofufuliwa, kabla ya ufufuo na hukumu ya ujumla.” Kichapo A Dictionary of the Bible, kilichohaririwa na James Hastings, chataarifu hivi: “Tertullian, Irenæus, na Hippolytus wangali wanatarajia Kuja [kwa Yesu Kristo] kuliko karibu; lakini kwa sababu ya Mababa wa Alexandria twapata mawazo mapya. . . . Mafundisho ya Augustine yalipolinganisha Mileani na kile kipindi cha wapiganaji wa Kanisa (wale walio duniani), Kuja kwa Pili kwaahirishwa hadi wakati ujao ulio mbali.”

Siku ya Yehova na Kuwapo kwa Yesu

6. Kwa nini hatupaswi kukata maneno kwamba siku ya Yehova i mbali?

⁶ Dhana zenye makosa zimeongoza kwenye mitamauko, lakini tusifikiri kwamba siku ya Yehova iko mbali. Kuwapo kwa Yesu kusikoonekana, ambako kwahusianishwa na siku ya Yehova Kimaandiko, tayari kumeanza. Mnara wa Mlinzi na vichapo vinavyohusiana nalo vya Mashahidi wa Yehova mara nyingi vimeandaa uthibitisho wa Kimaandiko kwamba kuwapo kwa Kristo kulianza katika mwaka 1914.a Hivyo, basi, Yesu alisema nini juu ya kuwapo kwake?

7. (a) Ni zipi baadhi ya sehemu za ishara ya kuwapo kwa Yesu na ya umalizio wa mfumo wa mambo? (b) Twaweza kuokolewaje?

⁷ Kuwapo kwa Yesu kulikuwa kichwa cha mazungumzo muda mfupi baada ya kifo chake. Baada ya kumsikia akitabiri uharibifu wa hekalu la Yerusalemu, mitume wake Petro, Yakobo, Yohana, na Andrea waliuliza hivi: “Ni wakati gani mambo haya yatakuwa, nayo itakuwa ni nini ishara ya kuwapo kwako na ya umalizio wa mfumo wa mambo?” (Mathayo 24:1-3; Marko 13:3, 4) Akiwajibu, Yesu alitabiri vita, njaa kuu, matetemeko ya dunia, na mambo mengine ya “ile ishara” ya kuwapo kwake na ya umalizio wa mfumo wa mambo. Alisema hivi pia: “Yeye ambaye amevumilia hadi mwisho ndiye atakayeokolewa.” (Mathayo 24:13) Tutaokolewa tukivumilia kwa uaminifu hadi mwisho wa uhai wetu wa sasa au hadi mwisho wa mfumo huu mwovu.

8. Kabla ya mwisho wa mfumo wa Kiyahudi, ni nini lililopaswa kutimizwa, na ni nini kinachofanywa juu ya hilo leo?

⁸ Kabla ya mwisho, sehemu ya maana hasa ya kuwapo kwa Yesu itatimizwa. Kwa habari yayo, alisema hivi: “Habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.” (Mathayo 24:14) Kabla ya Waroma kuharibu Yerusalemu na kabla ya mfumo wa mambo wa Kiyahudi kwisha katika 70 W.K., Paulo aliweza kusema kwamba habari njema ‘zilihubiriwa katika viumbe vyote chini ya mbingu.’ (Wakolosai 1:23) Hata hivyo, leo, kazi ya kuhubiri yenye kuenea zaidi inafanywa na Mashahidi wa Yehova “katika dunia yote inayokaliwa.” Katika miaka michache iliyopita, Mungu amefungua njia ili ushahidi mkubwa utolewe katika Ulaya Mashariki. Kukiwa na mashine za kuchapa na vifaa vinginevyo ulimwenguni pote, tengenezo la Yehova liko tayari kwa ajili ya utendaji ulioongezeka, hata katika “eneo lisiloguswa.” (Waroma 15:22, 23) Je, moyo wako wakuchochea ufanye yote uwezayo katika kutoa ushahidi kabla ya mwisho kuja? Ikiwa ndivyo, Mungu aweza kukutia nguvu uwe na sehemu yenye kuthawabisha katika kazi iliyo mbele.—Wafilipi 4:13; 2 Timotheo 4:17.

9. Yesu alitoa hoja gani, kama ilivyorekodiwa kwenye Mathayo 24:36?

⁹ Kazi ya kuhubiri Ufalme iliyotabiriwa na sehemu nyingine za ishara ya kuwapo kwa Yesu zinatimizwa sasa hivi. Kwa sababu hiyo, mwisho wa mfumo huu mwovu wa mambo u karibu. Ni kweli kwamba, Yesu alisema hivi: “Kuhusu siku hiyo na saa hiyo hakuna mtu ajuaye, wala hao malaika wa mbingu wala Mwana, ila Baba tu.” (Mathayo 24:4-14, 36) Lakini unabii wa Yesu waweza kutusaidia tuwe tayari kwa “siku hiyo na saa hiyo.”

Walikuwa Tayari

10. Twajuaje kwamba yawezekana kukaa macho kiroho?

¹⁰ Ili kuokoka siku ya Yehova iliyo kubwa, lazima tukae macho kiroho na kusimama imara kwa ajili ya ibada ya kweli. (1 Wakorintho 16:13) Twajua kwamba uvumilivu huo wawezekana, kwa kuwa familia ya kimungu ilifanya hivyo, ikaokoka Furiko lililoharibu wanadamu waovu katika 2370 K.W.K. Akilinganisha muhula huo na kuwapo kwake, Yesu alisema hivi: “Kama vile siku za Noa zilivyokuwa, ndivyo kuwapo kwa Mwana wa binadamu kutakavyokuwa. Kwa maana kama walivyokuwa katika siku hizo kabla ya Furiko, wakila na kunywa, wanaume wakioa na wanawake wakiozwa, hadi siku ambayo Noa aliingia ndani ya safina; nao hawakujali mpaka furiko likaja na kuwafagilia mbali wote, ndivyo kuwapo kwa Mwana wa binadamu kutakavyokuwa.”—Mathayo 24:37-39.

11. Noa alifuatia mwendo upi ujapokuwa ujeuri uliokuwapo siku yake?

¹¹ Kama sisi, Noa na familia yake waliishi katika ulimwengu wenye jeuri. ‘Wana wa kimalaika wa Mungu wa kweli’ wasiotii walikuwa wamechukua mwili wa kibinadamu na walikuwa wamechukua wake ambao kupitia kwao walizaa Wanefili wenye sifa mbaya—wadhalimu ambao bila shaka walifanya hali ziwe zenye jeuri zaidi. (Mwanzo 6:1, 2, 4; 1 Petro 3:19, 20) Hata hivyo, “Nuhu [“Noa,” NW] alikwenda pamoja na Mungu” katika imani. Yeye alikuwa “mkamilifu katika vizazi vyake”—kizazi kiovu cha siku yake. (Mwanzo 6:9-11) Kwa kumtegemea Mungu kupitia sala, twaweza kufanya vivyo hivyo katika ulimwengu huu wenye jeuri huku tungojeapo siku ya Yehova.

12. (a) Zaidi ya kujenga safina, Noa alifanya kazi ipi? (b) Watu waliitikiaje kuhubiri kwa Noa, na walipatwa na matokeo yapi?

¹² Noa anajulikana sana kuwa mjenzi wa safina kwa ajili ya kuhifadhiwa kwa uhai wakati wa Gharika. Alikuwa “mhubiri wa uadilifu” pia, lakini kizazi chake ‘hakikujali’ ujumbe wake aliopewa na Mungu. Walikula na kunywa, walioa na kuolewa, walilea familia, wakaendelea na mambo ya kawaida ya maisha hadi Furiko lilipowafagilia mbali. (2 Petro 2:5; Mwanzo 6:14) Hawakutaka kusikia juu ya mwenendo na usemi mnyoofu, kama vile kizazi kiovu cha leo huziba masikio yacho ili kisisikie yale ambayo Mashahidi wa Yehova wanasema juu ya “toba kuelekea Mungu,” imani katika Kristo, uadilifu, na “hukumu itakayokuja.” (Matendo 20:20, 21; 24:24, 25) Hakuna rekodi ipatikanayo juu ya idadi ya watu walioishi duniani Noa alipokuwa akitangaza ujumbe wa Mungu. Lakini jambo moja ni hakika, idadi ya watu duniani ilipunguzwa sana katika 2370 K.W.K.! Gharika hiyo ilifagilia mbali waovu, ikihifadhi tu wale waliokuwa tayari kwa tendo hilo la Mungu—Noa na wengine saba katika familia yake.—Mwanzo 7:19-23; 2 Petro 3:5, 6.

13. Noa alikuwa na uhakika kamili katika agizo gani la kihukumu, naye alitendaje kwa kupatana nalo?

¹³ Mungu hakumtahadharisha Noa miaka mingi mapema juu ya siku na saa hususa ya Furiko. Hata hivyo, Noa alipokuwa na umri wa miaka 480, Yehova aliagiza hivi: “Roho yangu haitashindana na mwanadamu milele, kwa kuwa yeye naye ni nyama; basi siku zake zitakuwa miaka mia na ishirini.” (Mwanzo 6:3) Noa alikuwa na uhakika kamili katika agizo hilo la hukumu ya Kimungu. Baada ya kufikia umri wa miaka 500, “akawazaa Shemu, na Hamu, na Yafethi,” na desturi ya siku hizo yadokeza kwamba wana wake walikuwa na umri wa miaka 50 hadi 60 walipooa. Noa alipoambiwa ajenge safina ili kuhifadhi uhai wakati wa Furiko, yaonekana wana hao na wake zao walimsaidia katika kazi hiyo. Kujengwa kwa safina yamkini kulisadifiana na utumishi wa Noa akiwa “mhubiri wa uadilifu,” kukimshughulisha kwa miaka 40 hadi 50 ya mwisho kabla ya Furiko. (Mwanzo 5:32; 6:13-22) Kwa miaka yote hiyo, yeye na familia yake walitenda kwa imani. Acheni sisi pia tuonyeshe imani huku tukihubiri habari njema na kungojea siku ya Yehova.—Waebrania 11:7.

14. Hatimaye Yehova alimwambia Noa nini, na kwa nini?

¹⁴ Safina ilipokuwa karibu kumalizika, huenda Noa akawa alifikiri kwamba Furiko lilikuwa karibu, ingawa hakujua wakati hasa ambapo lingetukia. Hatimaye Yehova alimwambia hivi: “Baada ya siku saba nitainyeshea dunia mvua, siku arobaini mchana na usiku.” (Mwanzo 7:4) Hilo lilimpa Noa na familia yake wakati wa kutosha tu kuingiza aina zote za wanyama ndani ya safina na wao wenyewe waingie kabla ya Furiko kuanza. Hatuhitaji kuijua siku wala saa ya mwanzo wa uharibifu wa mfumo huu; hatukukabidhiwa mgawo wa kuwaokoa wanyama, na wanadamu wenye uwezekano wa kuokoka tayari wanaingia safina ya ufananisho, paradiso ya kiroho ya watu wa Mungu.

“Fulizeni Kulinda”

15. (a) Katika maneno yako mwenyewe, ungeelezaje maneno ya Yesu yapatikanayo kwenye Mathayo 24:40-44? (b) Kutojua wakati barabara wa kuja kwa Yesu kutekeleza kisasi cha Mungu kuna tokeo jipi?

¹⁵ Kwa habari ya kuwapo kwake, Yesu alieleza hivi: “Wakati huo watu wawili watakuwa [wakifanya kazi] katika shamba: mmoja atachukuliwa na mwingine aachwe; wanawake wawili watakuwa wakisaga [nafaka ziwe unga] kwenye kinu cha mkono: mmoja atachukuliwa na mwingine aachwe. Kwa hiyo, fulizeni kulinda kwa sababu hamjui ni siku gani Bwana yenu anakuja. Lakini jueni jambo moja, kwamba ikiwa mwenye nyumba angalijua ni katika lindo gani mwizi anakuja, angalifuliza kuwa macho na hangaliruhusu nyumba yake ivunjwe na kuingiwa. Kwa sababu hiyo nyinyi pia jithibitisheni wenyewe kuwa tayari, kwa sababu kwenye saa msiyoifikiri kuwa hiyo, Mwana wa binadamu anakuja.” (Mathayo 24:40-44; Luka 17:34, 35) Kutojua wakati barabara wa kuja kwa Yesu kutekeleza kisasi cha Mungu huelekea kutudumisha tukiwa macho na hutupa sisi fursa ya kila siku ya kuthibitisha kwamba twamtumikia Yehova kwa sababu zisizo zenye ubinafsi.

16. Ni nini kitakachowapata watu mmoja-mmoja ‘wanaoachwa’ na wale ‘wanaochukuliwa’?

¹⁶ Watu mmoja-mmoja ‘wanaoachwa’ waharibiwe pamoja na waovu watatia ndani wale ambao wakati mmoja walinurishwa lakini wanamezwa katika njia ya maisha yenye ubinafsi. Na tuwe miongoni mwa wale ‘wanaochukuliwa,’ waliojitoa kikamili kwa Yehova na wenye shukrani kikweli kwa maandalizi yake ya kiroho kupitia “mtumwa mwaminifu na mwenye busara.” (Mathayo 24:45-47) Hadi mwisho kabisa, acheni tumtumikie Mungu kwa “upendo kutokana na moyo safi na kutokana na dhamiri njema na kutokana na imani bila unafiki.”—1 Timotheo 1:5.

Matendo Matakatifu Ni ya Lazima

17. (a) Ni nini kilichotabiriwa kwenye 2 Petro 3:10? (b) Ni yapi baadhi ya matendo na vitendo vinavyotiwa moyo na 2 Petro 3:11?

¹⁷ Mtume Petro aliandika hivi: “Siku ya Yehova itakuja kama mwizi, ambayo katika hiyo mbingu zitapitilia mbali kwa kelele ya kuchatachata, lakini elementi zikiwa moto sana zitafumuliwa, na dunia na kazi zilizo ndani yayo zitagunduliwa.” (2 Petro 3:10) Mbingu na dunia za ufananisho hazitasalimika moto wa hasira yenye kuwaka ya Mungu. Kwa hiyo Petro aongeza hivi: “Kwa kuwa vitu vyote hivi vitafumuliwa hivyo, nyinyi mwapaswa kuwa watu wa namna gani katika matendo matakatifu ya mwenendo na vitendo vya ujitoaji-kimungu!” (2 Petro 3:11) Miongoni mwa matendo hayo na vitendo hivyo ni kuwapo kwa ukawaida kwenye mikutano ya Kikristo, kufanyia wengine mema, kuwa na sehemu yenye maana katika kuhubiri habari njema.—Mathayo 24:14; Waebrania 10:24, 25; 13:16.

18. Ikiwa twakuza ufungamano pamoja na ulimwengu, twapaswa kufanya nini?

¹⁸ “Matendo matakatifu ya mwenendo na vitendo vya ujitoaji-kimungu” hututaka ‘tufulize kujitunza wenyewe bila doa kutokana na ulimwengu.’ (Yakobo 1:27) Lakini vipi ikiwa twakuza ufungamano pamoja na ulimwengu huu? Labda twashawishwa kuingia katika msimamo wenye hatari mbele ya Mungu kwa kutafuta vitumbuizo visivyo safi au kwa kusikiliza muziki na nyimbo ambazo huendeleza ile roho isiyo ya kumwogopa Mungu ya ulimwengu huu. (2 Wakorintho 6:14-18) Ikiwa hivyo ndivyo ilivyo, acheni tutafute msaada wa Mungu katika sala ili tusipitilie mbali pamoja na ulimwengu bali tutakuwa na msimamo uliokubalika mbele ya Mwana wa binadamu. (Luka 21:34-36; 1 Yohana 2:15-17) Ikiwa tumejiweka wakfu kwa Mungu, bila shaka tutataka kufanya yote tuwezayo ili tujenge na kudumisha uhusiano wenye shauku pamoja naye na hivyo tuwe tayari kwa ile siku ya Yehova iliyo kubwa na yenye kutia hofu.

19. Kwa nini masongamano ya wapiga-mbiu wa Ufalme yaweza kutarajia kuokoka umalizio wa mfumo huu mwovu wa mambo?

¹⁹ Noa aliyekuwa mtu wa kimungu na familia yake waliokoka Furiko lililoharibu ule ulimwengu wa kale. Watu mmoja-mmoja waliokuwa wanyoofu waliokoka mwisho wa mfumo wa mambo wa Kiyahudi katika 70 W.K. Mathalani, mtume Yohana alikuwa angali akitenda katika utumishi wa Mungu yapata miaka ya 96-98 W.K., alipoandika kitabu cha Ufunuo, simulizi lake la Gospeli, na barua tatu zilizopuliziwa. Kati ya yale maelfu ya watu walioikubali imani ya kweli kwenye Pentekoste ya 33 W.K., yamkini wengi wao waliokoka ule mwisho wa mfumo wa Kiyahudi. (Matendo 1:15; 2:41, 47; 4:4) Leo masongamano ya wapiga-mbiu wa Ufalme yaweza kutarajia kuokoka umalizio wa mfumo mwovu wa mambo uliopo.

20. Kwa nini twapaswa kuwa ‘wahubiri wa uadilifu’ wenye bidii?

²⁰ Kuhifadhiwa kuingia ulimwengu mpya kukiwa mbele yetu, acheni tuwe ‘wahubiri wa uadilifu’ wenye bidii. Ni pendeleo kama nini kumtumikia Mungu katika siku hizi za mwisho! Na ni furaha iliyoje kuelekeza watu kwenye “safina” ya siku ya kisasa, paradiso ya kiroho inayofurahiwa na watu wa Mungu! Mamilioni ya watu walio ndani yayo sasa na wadumu waaminifu, wenye macho kiroho, na tayari kwa ile siku ya Yehova iliyo kubwa. Lakini ni nini kitakachotusaidia sisi sote kukaa macho?

[Maelezo ya Chini]

Ungejibuje?

◻ Watu fulani wamekuwa na mataraja gani kwa habari ya siku ya Yehova na kuwapo kwa Kristo?

◻ Kwa nini twaweza kusema kwamba Noa na familia yake walikuwa tayari kwa Furiko?

◻ Ni nini kitakachowapata wale ‘wanaofuliza kulinda’ na wale wasiofanya hivyo?

◻ Kwa nini matendo matakatifu ni ya lazima, hasa tukaribiapo siku ya Yehova iliyo kubwa?