Utendaji Uliopanuliwa Wakati wa Kuwapo kwa Kristo
“Kisha Mfalme atawaambia wale walioko mkono wake wa kuume, Njoni, mliobarikiwa na Baba yangu, urithini ufalme mliowekewa tayari tangu kuumbwa ulimwengu.”—MATHAYO 25:34.
1. Pa·rou·siʹa ya Kristo imekuwaje sawa na “siku za Nuhu”?
KUWAPO kwa Kristo—tukio lililongojewa kwa muda mrefu! Wakati kama ule wa “siku za Nuhu,” ambao Yesu alizungumzia kuhusiana na “mwisho wa dunia [mfumo wa mambo, NW],” uliwasili katika mwaka wa 1914. (Mathayo 24:3, 37) Lakini kuwapo, au pa·rou·siʹa kwa Kristo, kungemaanisha nini kwa mabaki wapakwa kwa roho wa “mtumwa mwaminifu mwenye akili”? (Mathayo 24:45) Kwamba, wao wangelazimika kuongeza utendaji wao zaidi na zaidi wakiwa wachukuaji nuru! Mambo mazuri ajabu yalikuwa karibu yatukie! Kazi ya kukusanya isiyopata kufanywa kamwe ilikuwa karibu ianze.
2. Ni utakaso gani umetukia kwa utimizo wa Malaki 3:1-5?
2 Hata hivyo, kwanza Wakristo hao wapakwa kwa roho walihitaji kutakaswa. Kama vile Malaki 3:1-5 lilivyokuwa limetabiri, Yehova Mungu na “mjumbe [wake] wa agano,” Yesu Kristo, walikuja kukagua hekalu la kiroho katika masika ya 1918. Hukumu ingeanza na “nyumba ya Mungu.” (1 Petro 4:17) Malaki 3:3 lilitabiri hivi: “Naye [Yehova] ataketi kama asafishaye fedha na kuitakasa, naye atawatakasa wana wa Lawi, atawasafisha kama dhahabu na fedha.” Kilikuwa kipindi cha kusafisha na kutakasa.
3. Kwa nini ilikuwa muhimu kwamba utakaso wa kiroho utukie?
3 Kwa kupitia hukumu hiyo, iliyokuwa na upeo wayo katika 1918, mabaki ya jamii ya mtumwa walitakaswa uchafu wa kilimwengu na kidini. Kwa nini Yehova aliwatakasa? Ni kwa sababu hekalu lake la kiroho lilihusika. Huo ni mpango wa kihekalu wa kumwabudu Yehova kwa msingi wa dhabihu yenye kufunika ya Yesu Kristo. Yehova alitaka hekalu lake liwe katika hali safi ili wakati ambapo waabudu wengi wenye matumaini ya kidunia wangeletwa humo, wangepata mahali ambapo enzi kuu yake ya ulimwengu wote mzima inastahiwa, mahali ambapo jina lake linatakaswa, na mahali ambapo sheria zake za uadilifu zinafuatwa. Hivyo, wangemthamini Yehova na kujiunga katika kujulisha makusudi yake matukufu.
Mapendeleo Zaidi
4, 5. (a) Swali la Yesu Kristo linataka nini kwa kila mmoja wa jamii ya mtumwa leo? (b) Maneno “mtumwa mwaminifu mwenye akili” na ‘watu wa nyumba yake’ yanapasa yaeleweke katika njia zipi? (c) Yesu alimpa mtumwa huyo utume gani?
4 Katika 1919 jamii ya mtumwa iliyotakaswa ingeweza kutazamia utendaji uliozidi kupanuka. Huko nyuma katika 1914, Yesu Kristo, Bwana-Mkubwa wao, alikuwa amepata Ufalme wa kimbingu. Aliporudi kwa walio wa nyumba yake ili kukagua watu wote wa ‘nyumba yake,’ alivikwa heshima ya kifalme, ambayo hakuwa amekuwa nayo alipokuwa hapa duniani. Yeye alikuta nini? Je! jamii ya mtumwa ilikuwa yenye shughuli nyingi za kutunza faida za Bwana-Mkubwa? Kama ambavyo imerekodiwa kwenye Mathayo 24:45-47, Yesu aliuliza swali lililomtaka kila mmoja wa wanafunzi wapakwa kwa roho achunguze ujitoaji wake binafsi kwa Mesiya wa Yehova: “Ni nani basi yule mtumwa mwaminifu mwenye akili, ambaye bwana wake alimweka juu ya nyumba yake, awape watu chakula kwa wakati wake? Heri [ni mwenye furaha, NW] mtumwa yule, ambaye bwana wake ajapo atamkuta akifanya hivyo. Amin, nawaambieni, atamweka juu ya vitu vyake vyote.”
5 Bila shaka, masimulizi ya Yesu ya mtumwa huyo mwaminifu hayafaani na binadamu yeyote mmoja. La, bali yanasimulia kundi la wapakwa kwa roho waaminifu wa Kristo wakiwa pamoja, kama kikundi. Watu wa nyumba yake ni wafuasi wa Kristo wapakwa kwa roho wakiwa mtu mmoja mmoja. Yesu alijua kwamba yeye angewanunua wafuasi hao wapakwa kwa roho kwa damu yake mwenyewe, kwa hiyo kwa kufaa aliwarejezea wote pamoja kuwa mtumwa wake. Wakorintho wa Kwanza 7:23 husema juu yao hivi: “Mlinunuliwa kwa thamani; msiwe watumwa wa wanadamu.” Yesu aliagiza jamii yake ya mtumwa iache nuru yayo ing’ae ili iwavutie na kuwafanya wanafunzi wengine na kulisha watu wa nyumba yake hatua kwa hatua kwa kuwapa chakula chao cha kiroho kwa wakati unaofaa.
6. Mtumwa huyo alithawabishwaje likiwa tokeo la ukaguzi wa Yesu?
6 Tangu kuwapo kwa Kristo kulipoanza hadi kufikia 1918, jamii ya mtumwa ilikuwa ikijitahidi kuwatolea watu wa nyumba yayo chakula kwa wakati wake, ijapokuwa kutopendwa na wengi, kunyanyaswa, na hata kujapokuwa kadiri fulani ya mchafuko. Hayo ndiyo mambo ambayo Bwana-Mkubwa alikuta alipoanza ukaguzi wake. Bwana Yesu alifurahi, na katika 1919 aliitamka kuwa yenye furaha jamii hiyo iliyokubaliwa ya mtumwa mwaminifu. Ni nini iliyokuwa zawadi yenye kupendeza ya mtumwa huyo kwa ajili ya kufanya yale ambayo Bwana-Mkubwa wake alimweka afanye? Kupandishwa cheo! Naam, madaraka makubwa zaidi yalitolewa katika kusogeza mbele faida za Bwana-Mkubwa wake. Kwa kuwa sasa Bwana-Mkubwa alikuwa mfalme wa kimbingu, basi, mali zake za kidunia zikawa zenye thamani hata zaidi.
7, 8. (a) Ni nini ‘vitu vyote’ vya Bwana-Mkubwa? (b) Ni nini kinachotakwa kwa mtumwa katika kutoa uangalizi juu ya vitu hivyo?
7 Basi, “vitu vyake vyote” ni nini? Hivyo ni vitu vyote vya kiroho ambavyo vimekuwa mali ya Kristo duniani kuhusiana na mamlaka yake akiwa Mfalme wa kimbingu. Bila shaka hiyo ilitia ndani utume wa kufanya wanafunzi wa Kristo, kukiwa na pendeleo tukufu la kutenda wakiwa wawakilishi wa Ufalme wa Mungu uliosimamishwa kwa mataifa yote ulimwenguni.
8 Kupandishwa cheo huko ili kuangalia mali zote za Bwana-Mkubwa kulitaka kwamba jamii hiyo ya mtumwa itoe wakati na uangalifu mwingi zaidi katika kufanyiza kazi ya Ufalme na, naam, kujenga vifaa vikubwa zaidi kwa ajili ya kazi hiyo. Sasa jamii hiyo ikawa na eneo kubwa zaidi la kazi—dunia nzima yenye kukaliwa na watu.
Kuwakusanya Kondoo
9. Ni nini limekuwa tokeo la upanuzi wa utendaji wa mtumwa?
9 Basi, kwa utii, jamii ya mtumwa mwaminifu mwenye akili ya Kristo ilipanua utendaji wayo. Tokeo likawa nini? Wa mwisho wa wale 144,000 walikusanywa. Kisha njozi ya Yohana iliyorekodiwa kwenye Ufunuo 7:9-17 ukawa uhalisi wenye kusisimua, na kuchangamsha moyo. Hasa tangu 1935, jamii ya mtumwa imekuwa ikionea shangwe kukunjuka kunakoendelea kwa utimizo wa njozi hiyo. Kutoka duniani kote, “mkutano mkubwa” wa mamilioni ya watu sasa husongamana kwenye nyua za hekalu la kiroho la Yehova wakiwa waabudu wake. Malaika wa Yehova alimwambia Yohana kwamba hapana mtu aliyeweza kuuhesabu mkutano huo mkubwa. Hilo lamaanisha hakuna mpaka uliowekewa idadi ya watu ambao jamii ya mtumwa italeta kwenye hekalu la kiroho la Yehova. Maadamu njia iko wazi, kazi ya kuwakusanya ndani itaendelea.
10. Mtumwa anahusika katika utendaji upi wenye upendo leo?
10 Jamii ya mtumwa mwaminifu ina daraka zito la kutunza idadi inayozidi kuongezeka ya “kondoo wengine,” wakijua kwamba hao wenye mfano wa kondoo wa kutoka mataifa yote ni wenye thamani sana kwa Bwana-Mkubwa, Yesu. Kwa hakika wao ni kundi lake la mifugo. (Yohana 10:16; Matendo 20:28; 1 Petro 5:2-4) Kwa hiyo wakiwa na upendo kwa Bwana-Mkubwa na kwa kondoo, jamii ya mtumwa hutimiza kwa furaha mahitaji ya kiroho ya mkutano mkubwa.
11-13. Msimamizi wa Watch Tower Society wa wakati huo alitoa elezo gani lifaalo kuhusu utendaji wa mtumwa?
11 Naam, sehemu kubwa zaidi ya utume wa kuchukua nuru wa mtumwa huyo inatia ndani kule kukusanywa kwa raia hao wa kidunia wa Ufalme wa Mungu. Akizungumzia utendaji unaozidi kukua wa mtumwa mwaminifu, F. W. Franz, aliyekuwa msimamizi wa Watch Tower Society wakati huo, alisema hivi kabla tu ya kifo chake katika Desemba 1992:
12 “Yesu Kristo ametumia tengenezo kwa njia ya kustaajabisha zaidi na zaidi wakati wote, kulingana na miaka yangu 99 ya kuishi. Si mwanadamu wa vivi hivi anayeelekeza tengenezo, bali ni lazima awe ni Bwana Yesu Kristo. Kwa kuwa limefanikiwa kwa utukufu na kwa njia ya ajabu zaidi kuliko tulivyofikiri. Leo tuna tengenezo ambalo limepanuka ulimwenguni pote. Linatenda kazi katika Kizio cha dunia cha Kaskazini na katika Kizio cha dunia cha Kusini, Mashariki na Magharibi. Ni mtu mmoja tu ambaye angeweza kuwa ameleta upanuzi huo wenye kutazamisha—Mwana wa Mungu, anayeongoza jamii ya mtumwa mwaminifu mwenye akili. Yeye amekuwa akitimiza madaraka yake, na hilo ndilo limechangia upanuzi huu mtukufu ambao tumeona.
13 “Jambo hilo halitimizwi na mwanadamu mmoja. Tuna tengenezo ambalo ni la kitheokrasi, nalo hutenda kwa njia ya kitheokrasi, kwa njia inayoelekezwa na Mungu. Hakuna mtu, hata mwanzilishi wa Watch Tower Bible and Tract Society, anayeweza kudai au kuonwa kuwa ndiye aliyefanya yale yaliyotimizwa duniani pote yawezekane. Ni jambo la ajabu sana.” Je! wote walio wa mkutano mkubwa hawakubaliani kwa moyo wote na hisi hizo za Ndugu Franz? Naam, kwa kweli, wao ni wenye shukrani sana kwa utendaji uliopanuka wa mtumwa mwaminifu.
Raia wa Ufalme
14, 15. (a) Yesu alitoa kielezi cha nini katika mfano wa talanta (Mathayo 25:14-30)? (b) Kwa kufaa, ni nini kinachofuata katika Mathayo sura 25?
14 Katika Mathayo sura 25, kielezi cha Yesu kuhusu kondoo na mbuzi husimulia kazi hiyo kubwa ya kuwakusanya raia wa kidunia wa Ufalme wa Mungu. Katika mfano unaokitangulia, ule mfano wa talanta, Yesu atoa kielezi cha kwamba wanafunzi wapakwa kwa roho wanaotumaini kutawala pamoja naye katika Ufalme wake wa kimbingu ni lazima wajitahidi kuongeza mali zake za kidunia. Basi kwa kufaa sana, katika mfano wake unaofuata, Yesu aonyesha yale yanayohitajika kwa wale wanaotaka kuwa raia za Ufalme wake wa kimbingu.
15 Ona maelezo yake kwenye Mathayo 25:31-33: “Hapo atakapokuja Mwana wa Adamu katika utukufu wake, na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua [atawatenganisha watu, HNWW] kama vile mchungaji abaguavyo kondoo na mbuzi; atawaweka kondoo mkono wake wa kuume, na mbuzi mkono wake wa kushoto.”
16. Mataifa yanakusanywaje na watu wanatenganishwaje?
16 Yesu aliwasili kwa utukufu wake katika 1914. Akianzisha ushambulizi, yeye, pamoja na malaika zake, waliwashambulia na kuwaondosha maadui wake wa kishetani kutoka mbinguni. Yale yanayofuata katika mfano wake yanatusaidia tuthamini kwamba kuketi kwa Yesu juu ya kiti cha ufalme kitukufu hufananisha cheo cha hukumu wakati wa kuwapo kwake. Kukusanywa kwa mataifa yote mbele zake kunamaanisha kwamba Yesu anatendea mataifa yote kana kwamba yote yaweza kuwa kundi lake la mifugo, kwa kusema kitamathali. Ni kundi la mifugo lenye mchanganyiko wa kondoo na mbuzi. Ingawa inaweza kuchukua sehemu ya siku kutenganisha kondoo kutoka kwa mbuzi katika kundi halisi la mifugo, kutenganishwa kwa watu duniani pote ambao wako huru kuchagua kati ya mema na mabaya huchukua wakati mwingi zaidi. Hiyo ni kwa sababu kutenganishwa huko kunategemea mwendo wa kutenda wa kila mtu mmoja mmoja.
17. Kwa nini hali leo ni yenye uzito kwa watu wote?
17 Katika mfano huo, Mfalme-Mchungaji anawaweka watu wenye mfano wa kondoo upande wake wa kulia na wenye mfano wa mbuzi upande wa kushoto. Upande wa kulia wageuka kuwa hukumu yenye kupendeleka—uhai wa milele. Upande wa kushoto ni hukumu isiyopendeleka—ile ya uharibifu wa milele. Uamuzi wa Mfalme wa jambo hilo una matokeo mazito.
18. Kwa nini kutoonekana kwa Mfalme hakumpi yeyote sababu ya kutoa udhuru?
18 Kutokuonekana kwa Mwana wa Adamu anayetawala wakati wa kuwapo, au pa·rou·siʹa, kwake, hakumpi yeyote sababu ya kutoa udhuru. Watu wengi zaidi na zaidi leo wenye mfano wa kondoo wanajiunga na jamii ya mtumwa katika kuhubiri habari njema za Ufalme wa Mungu ulimwenguni pote, wakiacha nuru yao ing’ae. Kweli kweli, ushahidi wao umefikia sehemu zote za dunia.—Mathayo 24:14.
19. Ni sifa zipi za jamii ya kondoo zinazotolewa kielezi katika mfano wa kondoo na mbuzi?
19 Kwa nini yule Mfalme-Mchungaji awathawabisha wale wanaofanyiza jamii ya kondoo na wakati ujao wenye baraka? Kwa sababu ya utegemezo wao wa moyo wote wa kazi ya kuhubiri Ufalme na fadhili wanayoonyesha kuelekea ndugu zake wapakwa kwa roho, jambo ambalo Yesu huona kuwa latendewa kwake mwenyewe. Kwa hiyo, Mwana wa binadamu wa kifalme awaambia hivi: “Njoni, mliobarikiwa na Baba yangu, urithini ufalme mliowekewa tayari tangu kuumbwa ulimwengu.”—Mathayo 25:34; 28:19, 20.
Kumsaidia Mfalme
20, 21. Kondoo hutoa uthibitisho gani kwamba wanasimama kwenye upande wa Ufalme?
20 Ona kwamba wakati Mfalme anapowaalika kondoo hao warithi milki ya kidunia ya Ufalme wa Mungu, wao wanashangaa. Wanamwuliza: ‘Bwana, ni lini tulipokufanyia mambo hayo yote?’ Yeye anajibu: “Amin, nawaambia, kadiri mlivyomtendea mmojawapo wa hao ndugu zangu walio wadogo, mlinitendea mimi.” (Mathayo 25:40) Yesu alipomtokea Mariamu Magdalene katika siku yake ya ufufuo, alizungumza kuhusu ndugu zake wa kiroho alipomwambia Mariamu hivi: “Enenda kwa ndugu zangu.” (Yohana 20:17) Wakati wa kuwapo kwake kusikoonekana, Yesu ana mabaki wachache tu wa ndugu zake wa kiroho 144,000 ambao bado wako katika mwili duniani.
21 Kwa kuwa Yesu haonekani akiwa mbinguni, ni kwa njia isiyo ya moja kwa moja tu kwamba watu hao wenye mfano wa kondoo wanamfanyia yeye mambo hayo yenye upendo. Wanamwona akiwa katika kiti chake cha ufalme kwa macho yao ya imani tu. Yesu athamini jitihada zote wanazotia kusaidia ndugu zake wa kiroho, ambao watakuwa warithi washirika pamoja naye mbinguni. Yeye anahesabu yale yanayofanywa kwa ndugu zake kuwa yanafanywa kwake binafsi. Watu wenye mfano wa kondoo wanafanya mema kimakusudi kwa ndugu wa Kristo kwa sababu wanawatambua hao kuwa hivyo. Wao wanafahamu kwamba ndugu wa kiroho wa Kristo ni mabalozi wa Ufalme wa Yehova, na wanataka kutoa uthibitisho hususa kwamba wanachukua msimamo wao pamoja nao upande wa Ufalme huo.
22. Jamii ya kondoo inathawabishwaje? (Linganisha Ufunuo 7:14-17.)
22 Yehova alikuwa ameona kimbele kwamba jamii hiyo ya wenye mfano wa kondoo ingetokea wakati huo wa kuwapo kwa Mwana wake, naye amewawekea thawabu nzuri ajabu! Mkutano mkubwa utarithi baraka za amani hapa duniani wakati wa Utawala wa Mileani wenye furaha wa Mfalme wa Yehova, Yesu Kristo.
23. Kondoo huwasaidia ndugu za Ufalme kwa kujua katika njia zipi?
23 Tunapofikiria unabii mbalimbali wa Biblia unaohusu wakati wa kuwapo kwa Kristo, pamoja na mfano wa Yesu wa kondoo na mbuzi, tunaona nini? Hili: Kumfanyia mema mmoja wa ndugu za kiroho wa Mfalme bila kujua au bila kutazamia si ndilo jambo linalomfanya mtu awe kondoo mwenye msimamo wa uadilifu mbele za Mungu na Mfalme wake. Wale wa jamii ya kondoo wanajua yale wanayofanya, hata ingawa hawamwoni Mfalme anayetawala kwa macho yao halisi. Wao wanajitahidi kusaidia ndugu za Mfalme si katika njia ya kimwili tu bali pia katika njia ya kiroho. Jinsi gani? Kwa kuwasaidia katika kuhubiri habari njema za Ufalme wa Mungu na katika kuongoza mafunzo ya Biblia ili kufanya wanafunzi wa Kristo. Hivyo, leo kuna wachukuaji nuru zaidi ya milioni nne wanaotangaza Ufalme wa Mungu.
Utendaji Uliopanuka
24. Ni kazi zipi zenye upendo ambazo zimefanya wale wa jamii ya mtumwa wawe watu wenye furaha zaidi duniani leo?
24 Acheni tuorodheshe baadhi ya matendo mengi mema ya jamii ya mtumwa mwaminifu. Kwanza, jamii ya mtumwa imewekwa juu ya mali zote za Bwana-Mkubwa—faida zake za Ufalme duniani—na mali hizo huzidi kuongezeka. Pili, jamii hiyo inatoa chakula cha kiroho si kulisha walio wa nyumba yake tu bali pia mkutano mkubwa unaozidi kupanuka. Tatu, jamii ya mtumwa inaongoza katika kueneza nuru ya Ufalme. Nne, utendaji wayo wenye upanuzi mkuu zaidi ni ule wa kukusanywa kwa mkutano mkubwa wa kondoo wengine, kuwaleta kwenye hekalu la kiroho la Yehova. Tano, jamii ya mtumwa, ikiwa na utegemezo wa moyo wote kutoka kwa walio wa mfano wa kondoo, inaandaa vifaa vikubwa zaidi kwa ajili ya ofisi za tawi tufeni pote, kutia ndani na kwenye makao makuu katika United States. Kazi zenye upendo za aina hiyo zimefanya jamii ya mtumwa kuwa ndiyo yenye watu wenye furaha zaidi duniani leo, nao wamefanya mamilioni ya watu wengineo kuwa wenye furaha pia. Hao wote humshukuru Yehova Mungu na Yesu Kristo, ambao wameelekeza utendaji uliopanuka wa mtumwa mwenye akili!
25. Kondoo wanaweza kuendeleaje kuitegemeza jamii ya mtumwa, wakiwa na taraja gani mbele yao?
25 Jamii ya mtumwa inatenda kazi sasa kwa bidii zaidi ya wakati mwingine wowote kwenye wajibu wayo mbalimbali waliopewa na Mungu. Wakati uliobaki kabla ya kufyatuka kwa “dhiki kubwa” karibu umekwisha! (Mathayo 24:21) Ni jambo muhimu kama nini kwamba wale walio kondoo za Mungu wabaki wakiwa upande wa kulia wenye upendeleo wa Mfalme-Mchungaji wake! Kwa hiyo, basi, acheni wote waendelee kwa bidii kutegemeza mtumwa mwaminifu mwenye akili. Ni kwa kufanya hivyo tu kwamba siku fulani hivi karibuni sana wote wenye mfano wa kondoo wataweza kusikia maneno yenye furaha: “Njoni, mliobarikiwa na Baba yangu, urithini ufalme mliowekewa tayari tangu kuumbwa ulimwengu.”
Je! Waweza Kujibu?
◻ Ni kuhukumu gani kwa kwanza kulikofuata kule kutawazwa kwa Mfalme?
◻ Mathayo 24:45-47 limekuwaje na utimizo wa ki-siku-hizi?
◻ Kuhusu utendaji uliopanuka, jamii ya mtumwa na mkutano mkubwa wanashukuru zaidi juu ya nini?
◻ Mathayo 25:34-40 linatimizwaje wakati wa pa·rou·siʹa?
[Picha katika ukurasa wa 16]
Bwana-Mkubwa humpa mtumwa mwaminifu mali zake zote
[Picha katika ukurasa wa 18]
Yesu amechukua kiti chake cha ufalme kitukufu ili kuhukumu ainabinadamu