Sura 5
Nuru ya Elimu Wakati wa “Umalizio wa Mfumo wa Mambo”
1. Ni ndoa gani mashuhuri ambayo “Mwana-Mfalme wa Amani” alitabiri kwa wakati huu wa “umalizio wa mfumo wa mambo,” na ni katika mfano gani?
KUHUSU ule “umalizio wa mfumo wa mambo” yule “Mwana-Mfalme wa Amani” alisema kwenye Mathayo 24:38, (NW) kwamba kungekuwako “wanaume wakioa na wanawake wakipewa katika ndoa.” Lakini katika kipindi icho hicho cha wakati, inaanza huko mbinguni ndoa iliyo kubwa zaidi ya zote. Ni ndoa aliyoitaja Yesu katika mfano wake wa wachukuaji wa taa, wale wanawali kumi.—Mathayo 24:3, NW; 25:1-12.
2. (a) Ndoa hiyo ya mfano inafanywa wakati gani wa siku? (b) Ni nini kinachofuata arusi, na mwangaza unatolewaje?
2 Ndoa hii inafanyiwa Mashariki ya Kati. Inafanywa usiku sana, kukaribia usiku wa manane. Arusi ya bibi-arusi na bwana-arusi wake inafanywa kwanza kisha inafuatwa na mwandamano wa kwenda kwenye nyumba ya karamu. Njia haiangazwi na taa za barabarani. Mwangaza unatolewa na wale wanaoshiriki mwandamano wa kwenda kwenye karamu, na wanaosimama kando kando wanaweza kutazama mwandamano ukipita, wakiwatakia hao waliotoka kuoana ndoa yenye furaha.
3, 4. (a) Ni nani wanaopendezwa na mwandamano huo unaofuata, na kwa matayarisho gani? (b) Utimizo wa mfano huo unaongeza ushuhuda kwenye uhakika gani? (c) Tunaweza kufurahi tukifanya nini?
3 Kupatana na mwelekeo wao wa kike, wanawali wanapendezwa na arusi hii. Kwa hiyo, katika mstari wa msafara, wanawali kumi wanangojea mpaka mwandamano wa arusi unafika walipo. Wao wanatamani kuiangaza pindi hiyo, na kwa sababu hiyo wote waja wakiwa na taa za mkononi zimewashwa, lakini ni watano tu walio na akiba ya mafuta ya dharura ya kuwashia taa. Hao watano ni wanawali wenye akili. Utimizo wa mfano huu wapaswa utupendeze sisi leo, kwa kuwa kulingana na Yesu Kristo, unatoa uthibitisho zaidi kwamba tumo katika ule umalizio wa mfumo huu wa kale.—Mathayo 25:13.
4 Sisi tunaweza kuwa wenye furaha ikiwa tu wenye akili na kufahamu utimilizo wa ndoa hii ipitayo ndoa zote na mambo yanayohusiana nayo! Ni nani leo walio na kibali cha kuingia kwenye karamu ile? Je! Ni ye yote wa sisi? Na tuone!
5. Ni jambo gani lililofanyiza tofauti kati ya hao wanawali kumi, na ni nini lililotukia wakati Bwana-arusi alipokawia?
5 Ule mfano ambao Yesu alitoa wa wanawali kumi unahusu “Ufalme wa mbinguni,” ile serikali ya ulimwengu kwa ajili ya kubariki wanadamu wote. Kwa hiyo Yesu Kristo aliendelea kusema hivi: “Ndipo ufalme wa mbinguni utakapofanana na wanawali kumi, waliotwaa taa zao, wakatoka kwenda kumlaki bwana arusi. Watano wao walikuwa wapumbavu, na watano wao wenye busara. Wale waliokuwa wapumbavu walizitwaa taa zao, wasitwae na mafuta pamoja nao; bali wale wenye busara walitwaa mafuta katika vyombo vyao pamoja na taa zao. Hata bwana arusi alipokawia, wote wakasinzia wakalala usingizi.”—Mathayo 25:1-5.
6. (a) Hao wanawali kumi walifananisha nani? (b) Kwa sababu gani bibi-arusi hatajwi katika mfano huo?
6 Basi hao wanawali kumi walifananisha nani? Walifananisha wale waliotazamiwa kuwa washiriki wa bibi-arusi wa Bwana-arusi wa kiroho, Yesu Kristo. Bila shaka ni kwa sababu hii bibi-arusi hakutajwa katika mfano wa Yesu; ni bwana-arusi peke yake anayetokea. Hivyo, hakuna mvurugo kuhusiana na elezo hilo kana kwamba wanawali hao walifananisha jamii nyingine bado.
7. Ni wakati wa pindi gani ilipoonekana kana kwamba Bwana-arusi alikuwa amekawia kuja kwake kumchukua bibi-arusi, na kwa sababu gani?
7 Kuunganishwa kwa wale waliotazamiwa kuwa washiriki wa jamii ya bibi-arusi na Bwana-arusi wao wa kimbingu katika ndoa hakukutukia, kama ilivyotazamiwa, mwishoni mwa zile “nyakati zilizowekwa za mataifa” 1914. (Luka 21:24, NW) Kwa kufaa, kwao ilionekana kama kwamba Bwana-arusi alikuwa amekawia, ijapokuwa kuwapo kwake katika Ufalme wa kimbingu kulitukia 1914. Miaka hiyo yenye huzuni ya Vita ya Ulimwengu ya Kwanza ilipata kuwa kama usiku wenye giza jingi sana katika mambo yaliyoipata jamii hiyo ya wanawali.
8. (a) Ilikuwaje kwamba, kwa njia ya mfano, kusinzia na kwenda kulala kwa upande wa wanawali hao kulitukia? (b) Bwana-arusi alikuja kwenye hekalu kwa kusudi gani, na kwa sababu gani jambo hilo lilihusu jamii ya bibi-arusi?
8 Kwa njia ya mfano, kusinzia na kwenda kulala kulitukia upande wa hao wanawali. Kule kuhubiriwa peupe kwa habari njema za utawala wa miaka elfu wa Kristo uliokuwa ukija kubariki wanadamu wote kulikoma kabisa. Kuanzia ule mwaka wa mwisho wa Vita ya Ulimwengu ya Kwanza, kipindi chenye maana kubwa cha hukumu kilianza kwa hao wanawali wa mfano. Ni kwa sababu Mfalme anayetawala Yesu Kristo alikuwa amekuja kwenye hekalu la kiroho. Alipofika humo, alianza kuhukumu ili kusafisha wale waliopewa mgawo wa kutoa utumishi hekaluni kwa Yehova Mungu. (Malaki 3:1-3) Huo ulikuwa ndio wakati wa kufunuliwa kwake ambapo, akiwa yule Bibi-arusi wa kimbingu, alitazamiwa awapokee kwake mwenyewe katika mbingu wale washiriki waliokubaliwa wa jamii ya bibi-arusi ambao wakati huo walikuwa wamekwisha kufa.
9. Ni wakati gani ulipopata kuwa wakati kwa jamii ya wanawali kuamshwa kutoka kutotenda, na kwa sababu gani?
9 Mwaka wa 1919, kufuata kufunguliwa kwa wale washiriki wanane wenye kujulikana wa Sosaiti ya Mnara wa Mlinzi kutoka kifungo kisicho cha haki, ulikuwa ndio wakati uliotazamiwa wa ile jamii ya wanawali waliokuwa wangali hai duniani waamshwe kutoka usingizi wao wa kutotenda. Kazi ya kutoa nuru ya elimu ulimwenguni pote ilikuwa mbele yao. Ulikuwa wakati wao, wakiwa na taa zilizowashwa wamlaki Bwana-arusi, aliyekuwa amekuja kwenye hekalu la kiroho. Ilikuwa hivyo ili watu kutoka kwa mataifa yote waiendee makundi makundi “nyumba ya [Yehova]” iliyokuwa ni kana kwamba imeinuliwa juu ya vilele vya milima.—Isaya 2:1-4.
Kuzitayarisha Taa Zao
10. Mafuta yaliyochotwa kutoka vyombo vya wanawali wenye akili yalifananisha nini?
10 Wale wenye akili wa jamii ya wanawali walikuwa wamekuja wakiwa na akiba ya mafuta ya dharura ya kuwashia taa katika vyombo vyao. Hawakukawia kuzijaza taa zao tena. Mafuta hayo yenye umajimaji ya kutoa nuru yalifananisha Neno na roho takatifu ya Yehova yenye kutoa nuru ya elimu. Basi, yale mafuta yaliyochotwa kutoka vyombo vya wale wanawali wenye akili yalifananisha nini? Ni akiba ya kiasi cha roho ya Yehova inayotoa nuru juu ya Neno lake lililoandikwa ambayo mabaki ya wanafunzi waliozaliwa kwa roho wa Bwana-arusi walikuwa nayo ndani yao wenyewe wakati kazi ya ulimwenguni pote ya kutoa nuru ya elimu kuhusu “ufalme wa mbinguni” baada ya vita ilipotazamiwa ianze.
11. Vyombo vya mafuta vya mfano vilikuwa nini?
11 Vile vyombo vilifananisha wanawali wa mfano wenye akili wenyewe wakiwa ndio waliokuwa na yale mafuta ya mfano yenye kutoa nuru ya elimu. Hii haimaanishi kwamba, kwanza wakati huo, jamii hiyo ya wanawali ilipakwa mafuta kwa roho ya Yehova. Hapana, hao wanawali sio wanaojipaka mafuta wenyewe kwa roho yake. Ni Yeye anayefanya hivyo!—Isaya 61:1, 2; Luka 4:16-21.
12. (a) Ni unabii gani wa Yoeli uliokaribia kutimizwa juu ya wanawali wenye akili? (b) Wakati ulifika lini ili waache nuru ya elimu iangaze kupitia taa zao?
12 Katika kuunga mkono kwamba walikuwa wamegawiwa kazi kubwa ya kutoa nuru ya elimu kwa ulimwengu kuhusu “ufalme wa mbinguni,” wanawali hao wenye akili walipewa pendeleo la kuona utimizo wa Yoeli 2:28, 29 juu yao. Hivi ndivyo mtume Petro anavyotumia maneno ya mistari hiyo: “Itakuwa siku za mwisho, asema Mungu, nitawamwagia watu wote [roho] yangu, na wana wenu na binti zenu watatabiri; na vijana wenu wataona maono; na wazee wenu wataota ndoto.” (Matendo 2:17) Hivyo tokea 1919 wale wa jamii ya wanawali wa mfano wenye akili walipaswa wachukue vyombo vyao vya kutoa nuru ya elimu, taa zao za mfano—wao wenyewe. Walifanya hivyo ili watoe nuru ya elimu kwa wale wote ambao walikuwa wangali katika giza la kiroho. Kwa sababu ya namna ya maisha waliyo nayo chini ya uvutano wa Neno na roho ya Mungu, wao wanakuwa “mianga katika ulimwengu.” (Wafilipi 2:15) Hivyo walianza kufuata hatua za Bwana-arusi alipokuwa anajitayarisha kuwachukua washiriki wote wa jamii ya Bibi-arusi kwake mwenyewe katika Ufalme wa kimbingu baada ya kifo chao duniani.—Mathayo 5:14-16.
Matokeo ya Upumbavu wa Kiroho
13. Wanawali wenye akili waliitikiaje ombi la wale wanawali wapumbavu?
13 Namna gani, sasa, juu ya wale wapumbavu wa jamii ya wanawali? Yesu anaendelea kusema hivi: “Wale wapumbavu wakawaambia wenye busara, Tupeni mafuta yenu kidogo; maana taa zetu zinazimika. Lakini wale wenye busara wakawajibu, wakisema, Sivyo; hayatatutosha sisi na ninyi; afadhali shikeni njia mwende kwa wauzao, mkajinunulie.”—Mathayo 25:8, 9.
14. Kwa sababu gani wanawali waliokataa kugawa mafuta yao walikuwa wenye akili badala ya kuwa wenye ubinafsi?
14 Wale waliokataa kuwagawia hao wapumbavu hawakuwa wenye ubinafsi, walikuwa tu wenye akili. Walikuwa wanashikamana na kusudi lao la kwanza, la kutakia mema na kuangaza sehemu za karibu karibu zenye giza kwa ajili ya Bwana-arusi. Hawakuwa na lazima ya kubadili msimamo wao, wapunguze kiasi chao wenyewe cha roho takatifu ya Yehova ili wawaridhishe hao waliokuwa wapumbavu kiroho. Hao wapumbavu hawakuwa wamejiweka tayari kuingia mara moja kwenye mapendeleo ya utumishi yaliyokuwa yanatoa nafasi kwao mwaka wa 1919.
15. (a) Wakati kipindi chenye amani kilipoanza, ni nani kati ya jamii ya wanawali walioanza kuonyesha maelekeo ya upumbavu wa kiroho? (b) Kwa sababu gani wale wanawali wenye akili hawakuweza kuwasaidia wale wanawali waliokuwa wapumbavu kiroho?
15 Kile kipindi cha amani kilipokuwa kinaanza, baadhi ya wale waliodai kuwa washiriki walio wakfu na kubatizwa, walianza kuonyesha upumbavu wa kiroho. Baada ya kifo cha msimamizi wa kwanza wa Sosaiti ya Mnara wa Mlinzi, Charles Taze Russell, hawakuingia kabisa kwenye roho ya matukio pamoja na chombo kionekanacho cha Yehova Mungu chini ya msimamizi wacho mpya, J. F. Rutherford. Mioyo yao haikupatana kabisa na namna mambo yalivyokuwa yakifanywa. Walionyesha ukosefu wa kuthamini namna Yehova alivyokuwa akishughulika na watu wake. Hivyo, wale waliokuwa kama wanawali wenye akili hawangeweza kutia roho ya ushirikiano wa kutoka moyoni katika hao wapumbavu waliokuwa wakijitenga wenyewe zaidi na zaidi.
16. Upumbavu wa kiroho ulifanywaje uonekane kwa upande wa wale wanawali wapumbavu?
16 Kwa njia hiyo upumbavu wa kiroho ulifanywa uonekane. Namna gani? Kupitia kushindwa kuwa na yale mafuta ya mfano wakati huo wa maana sana kulipokuwa na uhitaji mkubwa wa nuru ya elimu ya kiroho kadiri matukio mapya yalivyosonga mbele, yakionyesha kwamba yule Bwana-arusi alikuwapo. Kwa hiyo ulikuwa ni wakati wa kutoka nje kumlaki na taa ya mtu ikiwa imewashwa na kuangaza kabisa, kwa njia ya mfano. Lakini badala yake, wale waliofanana na wanawali wapumbavu, ambao taa zao zilikuwa zinazimika, waliachana na wale waliokuwa wenye akili.
17. Ni hasara gani isiyorekebika waliyopata wale wanaofananishwa na wanawali wapumbavu, kama inavyoonyeshwa katika Mathayo 25:10?
17 Lo! Ni hasara iliyoje isiyorekebika inayotokea wakati mmoja anayedai kuhesabiwa kati ya jamii ya wanawali anapopoteza pendeleo na nafasi isiyoweza kurudiwa ya kumlaki Bwana-arusi wa kiroho, Yesu Kristo! Wale wapumbavu kati ya wanawali wa kisasa wanapatwa na hasara ya namna hiyo, kama inavyoonyeshwa na maneno mengine haya ya mfano wa Yesu: “Na hao walipokuwa wakienda kununua, bwana arusi akaja, nao waliokuwa tayari wakaingia pamoja naye arusini; mlango ukafungwa.”—Mathayo 25:10.
18. (a) Wale wanawali wapumbavu wa karne hii wanashindwa kushirikishwa na pendeleo gani? (b) Kwa sababu gani wale wapumbavu wanaonekana kuwa wamechelewa mno kushiriki sehemu katika mwandamano wa ndoa na kuingia katika karamu?
18 Ni msiba ulioje unaowapata hao wanawali wapumbavu wa kisasa! Katika kipindi hiki chenye giza ambalo halijapata kuonekana katika historia yote ya kibinadamu, wao wanashindwa kushiriki katika kazi ya kutoa nuru ya elimu kwa wale wanaokaa katika giza la kiroho na katika uvuli wa kifo kwenye “vita ya siku ile kuu ya Mungu Mwenyezi”! (Ufunuo 16:14) Bila mafuta kwenye taa zao za mfano za kuangaza njia yao, waliondoka na kulazimika kutafuta njia yao kupitia giza la usiku wa manane. Kwa sababu hiyo wanachelewa kufuata hatua za Bwana-arusi katika mwandamano wenye shangwe kupitia ule mlango na kuingia katika karamu ya arusi yenye kuangaza sana. Wao wamepoteza kitambulisho chao cha kuwa wafuasi wake ambao wamo katika mstari wa kufanya arusi pamoja naye katika Ufalme wa kimbingu. Wao hawakupatikana wakiwa “tayari” katika wakati uliowekwa. Lo! Ni mfano wenye onyo kama nini wanaotoa!
19. Kwa kufuatia jambo hili mpaka limalizikapo tunangojea kupata nini?
19 Uhakika huo wenye kuumiza unaonyeshwa waziwazi sana katika sehemu ya kumalizia ya ule mfano uliotolewa na Yesu Kristo, yule Bwana-arusi, hasa kwa ajili yetu tunaoishi katika ule “umalizio wa mfumo wa mambo.” Kwa hiyo acheni sasa tufuatie jambo hilo zaidi! Nuru ya elimu yenye kutia furaha inatungojea kwa kufanya hivyo, kama tutakavyoona katika sura inayofuata.
[Picha katika ukurasa wa 45]
Wale wanaofanana na wale wanawali wapumbavu hawataingia katika karamu ya arusi