Uongozi Wenye Kutenda wa Kristo Leo

“Mimi nipo pamoja na ninyi sikuzote mpaka umalizio wa mfumo wa mambo.”—MATHAYO 28:20, NW.

 1. Ni katika njia gani Kristo alikabidhi “mali” zake kwa wanafunzi wake?

WAKATI Kristo alipokaribia kuwaacha wanafunzi wake na kurudi mbinguni katika 33 W.K., yeye ‘aliweka kwao mali zake.’ Hilo lilihusu kuwa “mabalozi badala ya Kristo” na kuchukua kazi ya kuhubiri aliyokuwa ameanza, wakiieneza kufika “sehemu ya mbali zaidi sana ya dunia.” Kabla ya kuwaacha, yeye alikuwa amewaagiza ‘wafanye wanafunzi kutoka kwa watu wa mataifa yote.’ Je! sisi tuna ushuhuda wa kwamba yeye alikuwa mwangalifu kuona jinsi walivyokuwa wakitekeleza utume huu? Kweli kweli tunao!—Mathayo 25:14; 2 Wakorintho 5:20, NW; Matendo 1:8, NW; Mathayo 28:19, NW.

 2. Ni jambo gani linaloonyesha kwamba Kristo alikuwa akifuata karibu-karibu utendaji wa makundi ya karne ya kwanza?

² Zaidi ya miaka 60 baada ya Kristo kupaa mbinguni, yeye alionyesha kwamba alikuwa akifuata kwa uangalifu utendaji wa makundi ya Kikristo duniani. Katika Ufunuo uliopewa mtume Yohana, aliyekuwa mshiriki wa baraza lenye kuongoza la karne ya kwanza, Yesu Kristo alipeleka ujumbe mbalimbali kwa makundi saba yaliyokuwako Esia Ndogo. Kwa matano yayo yeye alisema: “[Mimi] nayajua matendo yako.” Naye alionyesha kwamba yeye alifahamiana sana na yale yaliyokuwa yakiendelea ndani ya yale mengine mawili, Smirna na Pergamo. Yeye alitoa kitia-moyo na shauri lililo wazi kwa kila kundi. Hakungekuwa na shaka lo lote katika akili zao kuhusu ni nani aliyekuwa kiongozi wao mwenye kutenda.—Ufunuo 1:11; 2:1–3:22.

 3. Ule ujumbe mbalimbali saba ulipelekewa nani hasa, na ni jambo gani linalothibitisha hilo?

³ Kwa kweli, ujumbe huo mbalimbali saba haukuwekewa mipaka katika mweneo wao kwa hayo makundi saba ya Esia. Shauri zuri na maonyo yaliyokuwamo yalitumika kwa makundi yote, kuanzia karne ya kwanza kufika “siku ya Bwana,” ambapo tupo sasa.a Macho ya Kristo, yaliyofananishwa na “mwali wa moto,” yamekuwa yakiendelea kuangalia yale ambayo yamekuwa yakiendelea ndani ya “[makundi, NW] yote.”—Ufunuo 1:10; 2:18, 23.

Bwana na Mtumwa Wake

 4. Kristo ‘alisafiri’ ng’ambo jinsi gani na kisha akarudi “baada ya siku nyingi”?

⁴ Baada ya yeye kujifananisha na “mtu atakaye kusafiri, [aliyeita] watumwa wake, akaweka kwao mali zake,” Kristo aliongeza hivi: “Baada ya siku nyingi akaja bwana wa watumwa wale, akafanya hesabu nao.” (Mathayo 25:14, 19) Katika 33 W.K. Kristo ‘alikwenda zake mbinguni,’ alipoketishwa kwenye “mkono wa kuume wa Mungu.” (1 Petro 3:22) “Baada ya siku nyingi,” kufuatia kutawazwa kwake katika 1914, Kristo alianza ‘kutiisha katikati ya adui zake.’ Kwa kumvurumisha Shetani na mashetani zake chini kwenye dunia. (Zaburi 110:1, 2, NW; Ufunuo 12:7-9) Ndipo alipoelekeza fikira zake kwa watumwa wake. Wakati ulikuwa umefika wa kufanya hesabu pamoja nao. Zaidi ya wakati mwingine wo wote, yeye alikuwa ndiye Kiongozi wao mwenye kutenda.

 5. Wakati wa kufanya hesabu ulifika lini, na wale waaminifu walithawabishwaje?

⁵ Historia ya kisasa ya watu wa Mungu huonyesha kwamba wakati huu wa kufanya hesabu ulifika katika 1918-19. Ule mfano wa talanta unatoa mfano wa jinsi Bwana angefanya hesabu pamoja na mabaki ya watumwa wake wapakwa-mafuta. Wangelazimika kutoa hesabu kila mtu mmoja mmoja kuhusu njia ambayo walikuwa wametumia mali zake, “kila mtu kwa kadiri ya uwezo wake,” au uwezekano wa kiroho. Wale waliokuwa wamekuwa wakizaa matunda waliingia katika furaha ya Bwana yao, aliyesema kwao: “Ulikuwa mwaminifu kwa machache, nitakuweka juu ya mengi.”—Mathayo 25:15, 20-23.

 6. Wakristo hao waaminifu wapakwa-mafuta walijumlika kuwa nini, na ni nini Bwana yao aliweka kwenye uangalizi wao?

⁶ Wakristo hao wapakwa-mafuta mmoja mmoja walipatikana wakiwa mabalozi waaminifu kwa mfalme aliyekuwa sasa akitawala, wakiwa na moyo wa kupenda wa kufanya wanafunzi kwa ajili ya Bwana yao. Kwa ujumla walionekana kuwa yule “mtumwa” ambaye juu yake Bwana yao alikuwa amesema: “Hasa ni nani mtumwa mwaminifu na mwenye akili ambaye bwana yake aliweka juu ya watu wa nyumba yake, kuwapa chakula kwa wakati unaofaa? Mwenye furaha ni mtumwa huyo ikiwa bwana yake anapofika anamkuta akifanya hivyo. Kweli kweli nawaambia ninyi, Yeye atamweka juu ya mali zake zote.”​—Mathayo 24:45-47, NW.

 7. (a) “Mali” za Kristo zimeongezeka jinsi gani tangu 1914? (b) Ni nini kinachoonyesha kwamba Kristo ndiye pia Kiongozi mwenye kutenda wa “kondoo wengine?”

⁷ “Mali” za Kristo zimekuwa nyingi zaidi tangu 1914. Yeye amevikwa “uweza wa kifalme,” unaohusu mamlaka iliyoongezeka na madaraka makubwa zaidi. (Luka 19:11, 12, NW) Kwanza yeye alianza na akaendelea kukusanya ndani mabaki ya “wana wa ufalme,” wale Wakristo wapakwa-mafuta 144,000 “walionunuliwa katika wanadamu” wakawe wafalme na makuhani pamoja naye mbinguni. (Mathayo 13:38; Ufunuo 14:1-4; 5:9, 10) Kisha, kama ambavyo imedhihirishwa kihistoria tangu 1935, yeye amekuwa akikusanya ndani “mkutano mkubwa” wa “kondoo wengine” ambao juu yao yeye alisema: “Hao nao imenipasa kuwaleta.” (Ufunuo 7:9, 10; Yohana 10:16) Ndiyo, yeye Ndiye ambaye huleta ndani “kondoo” hawa, naye anakuwa Kiongozi wao mwenye kutenda. Kwa kupendeza, andiko la Kigiriki linamaanisha kihalisi, “Na hao ni [jambo la] maana kabisa [kwangu] mimi kuongoza.” Yeye anaongozaje kwa kutenda “kondoo” zake zote leo?

Waangalizi Katika Mkono wa Kuume wa Kristo

 8, 9. (a) Ni njozi gani aliyopokea mtume Yohana? (b) Ni nini kilichofananishwa na vinara vya taa saba na nyota saba?

⁸ Mtume Yohana, mshiriki wa baraza lenye kuongoza la kundi la Kikristo la kwanza, alipokea njozi ambayo katika hiyo ‘aliona vinara vya taa saba vya dhahabu; na katikati ya vile vinara aliona mtu mfano wa Mwanadamu . . . Naye alikuwa na nyota saba katika mkono wake wa kuume.’ Yesu Kristo alimweleza Yohana hivi: “Siri [takatifu, NW] ya zile nyota saba ulizoziona katika mkono wangu wa kuume, na ya vile vinara saba vya dhahabu. Zile nyota saba ni malaika wa yale [makundi, NW] saba.”—Ufunuo 1:12-20.

⁹ Kikitoa maelezo juu ya fungu hili la maneno, kitabu “Then Is Finished the Mystery of God” kinasema: “Je! ‘malaika’ hawa ni wale wasioonekana? Hapana. Mtume Yohana alipokea ufunuo wote kutoka kwa Yesu Kristo kwa njia ya malaika wa kimbingu, na lingekuwa jambo lisilopatana na akili kwake kuwa akiandikia tena malaika katika mbingu, katika makao yasiyoonekana. Wao hawahitaji ujumbe mbalimbali ulioandikiwa yale makundi saba katika Esia. Maana ya msingi ya jina la cheo ‘malaika’ ni ‘mjumbe; mchukuaji wa ujumbe.’ . . . Kwa kuwa hizi nyota saba za mfano zinaonekana zikiwa juu ya mkono wa kuume wa Yesu, ziko katika uangalizi na amri yake na chini ya mwelekezo wake, ‘mkono wa kuume’ wake wa uweza unaotumiwa ukiwa unaweza kuzielekeza na kuzilinda. . . . Kama vile vile ‘vinara vya taa saba’ katika ‘siku ya Bwana’ ya kinjozi vilivyofananishwa na makundi yote ya Kikristo ya kweli katika hii ‘siku ya Bwana’ halisi, ya sasa tangu 1914 W.K., ndivyo zile ‘nyota saba’ zinavyofananisha waangalizi wote wa makundi hayo ya leo waliozaliwa kwa roho, wapakwa-mafuta wenye mfano wa malaika.”b​ —Kurasa 102-4.

10. Ni “mali” gani zilizoongezeka ambazo zimewekwa kwenye uangalizi wa mtumwa?

¹⁰ Waangalizi hao wapakwa-mafuta walio katika mkono wa kuume wa Kristo wote ni sehemu ya jamii ya yule “mtumwa” ambaye Yeye ameweka “juu ya mali zake zote.” Kwa sababu mtumwa wa Bwana mwenyewe amevikwa madaraka yaliyopanuliwa tangu 1914, “mali zake zote” lazima zihusu vitu vingi zaidi kwa mtumwa kuliko katika wakati uliopita. Jambo moja ni kwamba, wakiwa “mabalozi badala ya Kristo,” sasa mabaki ni mabalozi wa Mfalme anayetawala akitawala juu ya Ufalme uliosimamishwa. (2 Wakorintho 5:20, NW) Wamekabidhiwa mambo yote ya kiroho ambayo ni mali ya Bwana duniani. Ni lazima wao watumike katika utimizo wa unabii mbalimbali unaohusika tangu kusimamishwa kwa Ufalme. Huo unatia ndani kuhubiri “habari njema hizi za ufalme . . . katika dunia yote inayokaliwa na watu kwa ushuhuda.” (Mathayo 24:14, NW) Zaidi ya wakati mwingine wo wote, ni lazima waendelee kufanya “wanafunzi kutoka kwa watu wa mataifa yote,” hivyo kukusanya ndani ule “mkutano mkubwa” usio na hesabu. (Mathayo 28:19, 20, NW; Ufunuo 7:9) Ndiyo, hivi “vitu vinavyotamaniwa na mataifa yote” ni sehemu ya “mali” za Kristo zilizoongezeka duniani.​—Hagai 2:7.

11. (a) “Mali” hizo zilizoongezeka zilifanya jambo gani liwe la lazima kabisa? (b) Ni nani anayeelekeza kazi, na jinsi gani?

¹¹ Yote haya yanamaanisha kazi zaidi kwa jamii ya “mtumwa,” eneo kubwa zaidi la utendaji, likienea kihalisi kufika “dunia yote inayokaliwa na watu.” Inahitaji pia makao makuu makubwa zaidi na vifaa vya tawi kwa ajili ya kusimamia kazi na kwa kazi ya uchapishaji na uenezaji wa vitabu vya kutumia katika kuhubiri na funzo la kibinafsi. Kama ilivyokuwa katika karne ya kwanza, kazi hii inaendeshwa chini ya uongozi wenye kutenda wa Yesu Kristo, ambaye kwa njia ya mfano yumo “katikati ya vile vinara [vya taa, NW],” au makundi. Yeye anayaelekeza kwa njia ya waangalizi wapakwa-mafuta, ambao yeye kwa kwa njia ya mfano anawashika “katika mkono wake wa kuume.” (Ufunuo 1:13, 16) Kama ilivyokuwa katika nyakati za Ukristo wa kwanza, kikundi cha hawa waangalizi wapakwa-mafuta wanajumlika kuwa Baraza Linaloongoza lionekanalo la kundi la Kristo duniani. “Mkono wa kuume” wake wa uwezo unaotumiwa unaelekeza hawa wanaume waaminifu wanaposimamia kazi ya Ufalme.

Kwa Njia ya Roho

12, 13. (a) Kwa sababu ya ongezeko kubwa, ni swali gani linalotokea? (b) Kristo anatumiaje roho kutimiza uhitaji wa waangalizi miongoni mwa wanafunzi wake duniani?

¹² Wale wa “kondoo wengine” wakiwa sasa na hesabu inayozidi milioni tatu, wakipangwa kitengenezo katika makundi yapatayo 52,000, inaonekana wazi kwamba mabaki wapakwa-mafuta wanahitaji msaada katika kuangalia mali za dunia za Bwana. Hesabu iliyo chini ya 9,000, kutia akina dada wengi, wanashiriki mifano ya Ukumbusho, kwa hiyo hata hakuna mwangalizi mmoja mpakwa-mafuta kwa kila kundi. Je! hili linamaanisha kwamba Yesu Kristo hasimamii yale makundi ambamo hamna “malaika” aliyezaliwa kwa roho, au ‘nyota’?

¹³ Sivyo kabisa! Kama vile tumeona katika makala iliyotangulia, katika karne ya kwanza Kristo aliongoza kwa kutenda kundi lake kwa njia ya roho takatifu. Leo yeye anatumia washiriki wa Baraza Linaloongoza waliozaliwa kwa roho kuweka waangalizi waliochaguliwa kutoka miongoni mwa “kondoo wengine.” Hao lazima watimize matakwa yale yale kama wazee wapakwa-mafuta, kama yalivyoonyeshwa katika Maandiko kama vile 1 Timotheo 3:1-7 na Tito 1:5-9. Sifa hizi za kimaandiko ziliandikwa chini ya mwelekezo wa roho takatifu. Mapendekezo na kuwekwa rasmi kwenye vyeo kunafanywa baada ya sala na chini ya mwongozo wa roho takatifu. Kwa hao wazee wasiopakwa mafuta shauri la Paulo linatumika kwa nguvu ile ile: “Jiangalieni ninyi wenyewe na kundi lote, ambalo miongoni mwake roho takatifu imeweka ninyi kuwa waangalizi.”—Matendo 20:28, NW.

14. (a) Unabii wa Isaya 32:1, 2 tayari unatimizwaje? (b) Wazee wote ni lazima wajitiishe jinsi gani kwa “mkono wa kuume” wa Kristo?

¹⁴ Hivyo, katika makumi ya maelfu ya makundi, Mfalme mwadilifu anayetawala Yesu Kristo anatumia “kondoo wengine” wakiwa “wana-wafalme” kulinda “kondoo” zake kutokana na upepo, dhoruba, na ukame wa kiroho. (Isaya 32:1, 2, NW) Kama Daudi wa kale, wazee, wawe wapakwa-mafuta au “kondoo wengine,” wanasali kwa Yehova hivi: “Roho yako ni nzuri; na iniongoze mimi katika nchi ya unyofu.” (Zaburi 143:10, NW) Na Yehova anasikia sala zao. Kwa njia ya Mwanaye, Yeye anawapa roho Yake, na Yesu anatumia njia hii kuongoza kwa kutenda wanafunzi wake duniani. Basi, ni lazima wazee wote wajitiishe kwenye “mkono wa kuume” wa Yesu wa uongozi, mwongozo, na mwelekezo, anaotumia kwa njia ya roho na washiriki waliozaliwa kwa roho wa Baraza Linaloongoza.

Kwa Njia ya Malaika

15. Ni njia gani nyingine aliyo nayo Kristo ya kuongoza kwa kutenda wanafunzi wake duniani?

¹⁵ Makala iliyotangulia ilitaja kwamba malaika walitumiwa katika karne ya kwanza kuongoza na kukomboa Wakristo wa kwanza na kuwasaidia katika kazi yao ya kuhubiri. Je! lingekuwa jambo la akili kufikiri kwamba Mfalme wetu anayetawala Yesu Kristo hatumii tena malaika katika kuongoza kwa kutenda wanafunzi wake leo? Si kwamba tu hilo lingekuwa jambo lisilo la akili bali lingekuwa pia lisilo la kimaandiko.

16, 17. Sisi tuna uthibitisho gani kwamba Kristo anatumia malaika katika kazi ya kuvuna “wana wa ufalme” na katika kukusanya “kondoo wengine?”

¹⁶ Kulingana na mfano wa Yesu wa ngano na magugu, wakati wa mavuno ungekuja kwenye “umalizio wa mfumo wa mambo” ulioanza katika 1914. Wakati huo wa mavuno, “wana wa ufalme” wangetenganishwa na “wana wa yule mwovu.” Ni nani ambao Bwana angetumia kufanya kazi ya kuvuna. “Wavunaji ni malaika.” Kristo aliongeza: “Mwana wa mtu atawatuma malaika zake, nao watakusanya kutoka ufalme wake vitu vyote vinavyoleta kukwazika na watu wanaovunja sheria.” (Mathayo 13:37-41, NW) Kristo anatumia malaika kulinda ndugu zake duniani.

¹⁷ Lakini namna gani “kondoo wengine”? Je! Kristo anatumia malaika kuwakusanya? Bila shaka! Mfano wake wa kondoo na mbuzi unasema: “Hapo atakapokuja Mwana wa Adamu katika utukufu wake, na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua kama vile mchungaji abaguavyo kondoo na mbuzi.” (Mathayo 25:31, 32) Kristo anatumia malaika zake katika kazi hii ya kubagua. Kama vile malaika mmoja alivyoelekeza hatua za Filipo kwa towashi Mwethiopia, vivyo hivyo kuna ushuhuda mwingi leo kwamba Kristo anatumia malaika zake kuelekeza hatua za Mashahidi wake kwa wenye mfano wa kondoo. Watu wengi wameshuhudia uhakika wa kwamba walikuwa wamesali wapate msaada kabla tu ya Shahidi kubisha mlango wao.​—Matendo 8:26, 27

Uhakika Kamili Katika Mwelekezo wa Kristo

18, 19. Kwa msingi wa yale yaliyotukia katika karne ya kwanza, sisi tuna uhakika juu ya nini?

¹⁸ Katika karne ya kwanza, hali hazikuruhusu sikuzote Kristo atumie baraza lenye kuongoza katika Yerusalemu kutatua tatizo fulani moja moja la pekee. Wakati Paulo alipokuwa peke yake katika kaskazini mwa Esia Ndogo na akahitaji kujua ni eneo gani lingefuata kufunguliwa, Kristo alitenda kupitia roho. (Matendo 16:6-10) Leo Mashahidi wa Yehova wana uhakika kwamba wo wote wa ndugu zao wanaotengwa na Baraza Linaloongoza kwa muda kwa sababu ya mateso wangali chini ya uongozi wenye kutenda wa Kristo, kwa njia ya roho na tegemezo la kimalaika.

¹⁹ Huko nyuma katika nyakati za Ukristo wa kwanza, mengine ya maamuzi yaliyofanywa na baraza lenye kuongoza huenda yakawa yalikuwa magumu kufahamika wakati huo. Bila shaka ndivyo ilivyokuwa wakati Paulo aliporudishwa Tarso au wakati alipopelekwa kwenye hekalu baada ya safari yake ya tatu ya umisionari. (Matendo 9:30; 21:23-25) Hata hivyo, kwa kweli Kristo ndiye aliyeongoza maamuzi hayo. (Matendo 22:17-21; 23:11) Leo sisi tunaweza kuwa na uhakika kwamba lo lote ambalo Kristo anaruhusu litukie miongoni mwa wanafunzi wake duniani lina kusudi fulani bora litakalotimiza, sawa na ilivyokuwa katika karne ya kwanza.

20. Sisi tunasadikishwa juu ya nini, na azimio letu ni nini?

²⁰ Hivyo, tunaposoma katika Biblia kwamba Kristo “ndiye kichwa cha mwili, kundi,” sisi tunasadikishwa kwamba yeye si kichwa kwa jina tu. (Wakolosai 1:18, NW) Sisi tunajua, kutokana na mambo yaliyoonwa, kwamba yeye ni Kichwa halisi, mwenye kutenda. Tunaposoma kitabu cha Matendo na kuona jinsi Kristo alivyoelekeza mambo miongoni mwa Wakristo wa kwanza, sisi tunaweza kuona kwamba yeye anatumia njia zile zile leo. Sisi tunaona ushuhuda wa Kristo akitumia roho takatifu, malaika, na yule “mtumwa mwaminifu mwenye akili” na Baraza Linaloongoza lake, kuweka rasmi wazee wanaostahili kiroho. Tukiwa na uhakika katika mwelekezo wenye kutenda wa mambo wa Kristo, sisi tumeazimia kuendelea “kusema kweli” na kukua katika upendo “katika mambo yote ndani ya yeye aliye kichwa, Kristo.”—Waefeso 4:15, NW.

[Maelezo ya Chini]

Mambo Makuu ya Kukumbuka

◻ Sisi tuna uthibitisho gani kwamba Kristo alifuata karibu-karibu utendaji wa kundi la karne ya kwanza?

◻ Kristo alimweka nani rasmi juu ya “mali” zake zote, na hizo zinatia nini ndani?

◻ Ni nani wanaofananishwa na nyota saba katika mkono wa kuume wa Kristo?

◻ Kristo anatumiaje roho takatifu, malaika, na Baraza Linaloongoza la wapakwa-mafuta katika kuongoza kundi lake leo?

◻ Ni kwa sababu gani sisi tunaweza kuwa na uhakika kamili katika mwelekezo wa Kristo wa mambo leo?

[Sanduku katika ukurasa wa 20]

Majaribu yanayokuja kwa sababu ya vita, mapinduzi au mateso ya moja kwa moja na kupigwa marufuku na serikali huenda yakafanya msiweze kuendeshe ibada ya Kikristo kwa jinsi ilivyopangwa kikamili. Huenda zikatokea hali zinazofanya isiwezekane kufanya mikutano mikubwa ya kundi. Huenda kupashana habari na afisi ya tawi kukakatizwa kwa muda. Huenda ziara za waangalizi wa mizunguko zikakatizwa. Huenda vitabu vipya visifike. Yo yote ya mambo hayo yakikupata, imekupasa ufanye nini?

Jibu ni: chini ya hali hizo fanya yo yote uwezayo, na ufanye sana uwezavyo, katika ibada safi. Inawezekana kuwa na funzo la kibinafsi. Kwa kawaida vikundi vidogo vya akina ndugu vinaweza kukutana ili kujifunza katika nyumba. Vitabu vilivyotumiwa zamani katika kujifunza, na hata Biblia yenyewe, vyaweza kutumiwa kuwa msingi wa mikutano. Usifadhaike wala kuwa mwenye wasiwasi. Kwa kawaida, baada ya muda mfupi kutakuwako namna fulani ya kupashana habari na ndugu wenye madaraka. Baraza Linaloongoza linatafuta njia za kupashana habari na akina ndugu.

Lakini hata ikiwa unajikuta uko peke yako bila ndugu zako zote za Kikristo, kumbuka kwamba hauko peke yako bila Yehova na Mwanaye Yesu Kristo.​—Tumefanywa Tengenezo Tutimize Huduma Yetu, ukurasa 168.

[Picha katika ukurasa wa 17]

Kwa njia ya mfano Kristo yumo katikati ya makundi, akishika waangalizi katika “mkono” wake wa kuume