Hatimaye Amani!—Mungu Asemapo
“Kwa wingi wa utawala wa Mwana-Mfalme na kwa amani hakutakuwa na mwisho.”—ISAYA 9:7, NW.
1. Huku viongozi wa ulimwengu wakizungumza daima juu ya amani, ni nini kimetokea muda wote wa historia ya kibinadamu?
VIONGOZI wa ulimwengu daima wanazungumza juu ya amani, na watu kwa ujumla wanasema kwamba wanataka amani. Hata hivyo, hali ya leo inatukumbusha yale aliyosema nabii Yeremia: “Tulitazamia amani, lakini hayakuja mema yo yote; tulitazamia wakati wa kupona, na tazama, kufadhaika tu!” (Yeremia 8:15) Kwa kweli, tangu Kaini alipomuua Abeli, ulimwengu haujawa na amani ya kweli badala yake umesumbuliwa na jeuri. Nayo karne yetu ya 20 imekuwa ndicho kizazi chenye jeuri kupita kinginecho chote, kukiwa na vita ambavyo vimesababisha vifo vya watu 100 milioni. Katika wakati wetu asilimia 97 ya idadi ya watu ulimwenguni imehusika katika angalau vita moja. Kwa hiyo huku viongozi wa ulimwengu wakisema juu ya amani, wameongoza watu wao katika msiba mmoja baada ya mwingine.
2. Ni hasara gani ya jeuri zaidi inayotokea katika mataifa yote?
2 Kwenye jeuri yote hiyo lazima uongezwe uhalifu wenye jeuri. Kwa mfano, katika United States, kila mwaka karibu watu 20,000 wanauawa kimakusudi. Wanawake zaidi ya 80,000 wanalalwa kinguvu, kukiwa na visa vingine vingi vya kulalwa kinguvu visivyoripotiwa. Karibu wanawake milioni mbili wanapigwa vibaya sana na wanaume wanaoishi nao. Na karibu robo moja ya washiriki wote wa jamaa wanasumbuliwa na namna moja au nyingine ya uhalifu. Ripoti moja inamalizia hivi: “Sisi tumekuwa jamii yenye ujeuri sana.” Hali ni kama hiyo katika nchi zilizo nyingi.
3. Ni jeuri gani kubwa hata zaidi ambayo ingeweza kufanyiwa jamaa ya kibinadamu sasa?
3 Hata hivyo, yote hayo si kitu yakilinganishwa na ujeuri ambao unaweza kufanywa na silaha za nyukilia za leo. Kuna za kutosha kuua kila mtu duniani mara 12 kwa kurudia! Daktari mmoja alisema: “Tiba ya kisasa haitaweza kuwasaidia wanaopatwa na matokeo ya vita ya nyukilia.” Kwa sababu gani? Mwingine alijibu hivi: “Madaktari walio wengi, wauguzi, na mafundi wa mitambo wangeuawa . . . Mahospitali yangeharibiwa. Kwa hiyo ni wachache sana wangeachwa wenye ujuzi wa kutosha na vifaa ili kuokoa ye yote.”
4, 5. (a) Ni elezo gani lililotolewa na kichapo kimoja juu ya ukosefu wa amani katika wakati wetu? (b) Aliyekuwa hapo zamani afisa wa serikali alitoaje elezo kama ilo hilo?
4 Kuhusu ukosefu wa amani katika wakati wetu, makala kuu katika Encyclopcedia Britannica ya karibuni, kitabu cha kila mwaka, ilikuwa na kichwa hiki: “Ulimwengu Wetu Wenye Kuvunjika-vunjika—Tisho la Machafuko ya Utawala Duniani Pote.” Ilisema: “Baada ya 1945 ilidhaniwa kwamba kwa vyo vyote ‘maendeleo’ yangefuata na kwamba wakati ujao wa ulimwengu wa kisasa ungekuwa kwa msingi wenye ushikamano na upatano.” Lakini, dhana hizo, ilisema, “zimethibitika kuwa zenye kuongozwa vibaya kabisa,” ikiongeza hivi: “Yale ambayo yametukia badala yake . . . ni kwamba kwa polepole na bila kuacha ulimwengu unapasuliwa na mvunjiko-vunjiko wa polepole. Nchi nyingi ambazo umoja wazo wa muundo na wa kiroho ulichukuliwa vivi hivi zimekuwa zikitengana . . . [kuwa] makabila, mbari, [madhehebu za] kidini, . . . magenge ya mijini, vikundi vya kuua watu, vyama vya wavamizi wenye kuogofya, vyama vya washambulizi, vikundi vya wachoyo wenye jeuri wenye kufuatia mapendezi yao wenyewe tu.”
5 Vivyo hivyo aliyekuwa hapo zamani mkuu wa cheo cha juu wa serikali katika United States alisema: “Hali zinazotokeza ukosefu wa imara wa kimataifa zinapata ushindi wa historia juu ya zile kani zinazofanya kazi ili kuleta ushirikiano wenye kufungamanisha zaidi. Mkataa usioepukika unaofikiwa na uchanganuzi wo wote wa mielekeo ya duniani pote usiopendelea upande wo wote ni kwamba msukosuko wa kijamii, kisiasa, misiba ya kiuchumi, na kutopatana kwa kimataifa yataelekea kuwa yenye kusambaa zaidi katika pindi inayobaki ya karne hii.” Alimalizia hivi: “Tisho wanaloelekeana nalo wanadamu, kwa ufupi ni . . . mchafuko wa utawala duniani pote.”
‘Wageni Kutoka Anga za Juu’
6. Mhariri mmoja wa gazeti alielezaje mambo ambayo yangesemwa na wageni kutoka anga za juu, juu ya ulimwengu leo?
6 Kwa sababu ya yote haya, mhariri aliandika hivi katika gazeti la Cleveland: “Kama wageni wangefika juma lijalo kutoka kwenye galaksi ya mbali, je! tungewaambia kwamba tulihitaji kujiua wenyewe ili tuthibitishe ukuu wa ukomunisti au ukapitolisti? Je! tungewaambia kwamba sisi tulikuwa jamii moja ambayo ilijigawanya yenyewe katika mataifa, na kwamba mataifa hayo yalikuwa yameapa kuuana katika vipindi mbalimbali vya sherehe za kutamani kumwaga damu? Tungeelezaje kwamba tuliacha wengine wa jamii yetu wafe njaa, na wengine wagae-gae katika ufasiki na ujinga, kwa sababu uvumbuzi wa njia za mauaji ya ujumla ulikuwa wa maana zaidi kwetu sisi? Bila shaka wageni hao kutoka katika galaski ya mbali wakirudi makwao wangetueleza sisi kuwa washenzi. . . . Tungeweza kujitetea kwamba tulitengeneza sanaa kubwa-kubwa na tukaamini katika haki. Wangetabasamu kwa huzuni na kuondoka kabla ya milipuko.”
7, 8. (a) Ni ‘wageni’ gani wenye nguvu ambao sasa wanafanya ukaguzi wa wanadamu? (b) Kwa sababu gani wapo hapa?
7 ‘Bila shaka,’ huenda wengine wakasema, hakuna ‘wageni kutoka anga za juu, wanaofanya ukaguzi wa namna hiyo.’ La, si kutoka anga za juu za kimwili. Lakini kwa miaka fulani sasa, wageni wenye nguvu sana, wenye akili sana wamekuwa wakifanya ukaguzi kamili wa yale ambayo wanadamu wamekuwa wakijitendea wao wenyewe na dunia. Kwa kuongezea, wanahakikisha kwamba ujumbe ulio waziwazi unatolewa “kabla ya milipuko kutokea.”
8 Wageni hao wenye nguvu ambao wamekuwa wakikagua wanadamu ni akina nani? Neno la Mungu linatuambia kwamba wao ni wajumbe wa Mungu katika makao ya kiroho, malaika waaminifu, ambao yeye amepeleka duniani waikague. Kuhusu viumbe hao wa kiroho, Zaburi 103:20 inasema hivi: “Mhimidini [Yehova], enyi malaika zake, ninyi mlio hodari, mtendao neno lake, mkiisikiliza sauti ya Neno lake.” Malaika hao wenye nguvu wanatajwa mara nyingi katika Biblia. Kwa mfano, Mathayo sura ya 25, unabii unaohusu wakati huu tunamoishi, unasema hivi kwenye mistari 31 na 32: “Hapo atakapokuja Mwana wa Adamu katika utukufu wake, na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua kama vile mchungaji abaguavyo kondoo na mbuzi.”
9. Kristo Yesu anashiriki sehemu gani wakati wa ukaguzi huu wa wanadamu?
9 “Mwana wa Adamu” huyo ni mjumbe mkuu wa Mungu, Yesu Kristo. Tangu alipofufuliwa akapaa mbinguni, amekuwa akingojea Yehova ampe mgawo huu wa pekee. Kama Zaburi 110:1 inavyoeleza, Yehova alimwambia hivi: “Uketi mkono wangu wa kuume, hata niwafanyapo adui zako kuwa chini ya miguu yako.” Utimizo wa unabii huu wa Biblia unaonyesha waziwazi kwamba wakati wa Mungu kumpeleka kiumbe huyu mwenye nguvu sana wa kiroho aanze kutenda ulifika mwaka wa 1914.
10. Ni malaika wangapi wangeweza kuwa pamoja na Kristo wanaposaidia katika ile kazi ya kutenga?
10 Lakini hangekuja peke yake. Kama Mathayo 25:31 ilivyosema: “Malaika watakatifu wote” wangekuwa pamoja naye. Hao wangeweza kuwa wangapi? Ufunuo 5:11, NW, unasema hivi: “Nami niliona, na kusikia sauti ya malaika wengi kukizunguka kile kiti cha enzi [cha Mungu] . . . na hesabu yao ilikuwa elfu kumi mara elfu kumi na elfu mara elfu.” Kumi moja la elfu ni 10,000. Kumi moja la elfu mara kumi moja la elfu ni 10,000 mara 10,000, jumla ya malaika milioni 100! Hata hivyo, Ufunuo husema kwa wingi, juu ya “makumi elfu ya makumi elfu” ya malaika wakimtumikia Mungu. Hayo ni mamia mengi ya mamilioni ya malaika, labda hata mabilioni au zaidi. Chini ya mwelekezo wa Kristo, viumbe hao wa kiroho wanasaidia wajumbe wa Mungu duniani katika kazi ya kutenganisha wanadamu katika vikundi viwili, kimoja kwa ajili ya “kukatiliwa mbali milele,” kile kingine kwa ajili ya “uzima wa milele.”—Mathayo 25:46, NW; ona pia Mathayo 13:41, 42.
“Injili ya Milele”
11. Ni nini ile “injili ya milele” ambayo majeshi ya kimalaika wanategemeza katika wakati huu?
11 Ni nini ujumbe mkuu ambao wageni hao wa kimalaika wanategemeza duniani wakati huu? Ufunuo 14:6 hutuarifu hivi: “Kisha nikaona malaika mwingine, akiruka katikati ya mbingu, mwenye injili ya milele, akiwahubiri hao wakaao juu ya [dunia], na kila taifa na kabila na lugha na jamaa.” Hii “injili ya milele” ni nini? Inahusiana na kile ambacho Yesu alisema kingekuwa kimojapo cha shuhuda nyingi za kwamba tunaishi katika siku za mwisho. Kwenye Mathayo 24:14, NW alitangaza hivi: “Na habari njema hizi za ufalme zitahubiriwa katika dunia yote inayokaliwa na watu, kuwa ushuhuda kwa mataifa yote; na ndipo ule mwisho utakapokuja.”
12, 13. (a) Ni nini ulio utawala wa Ufalme? (b) Ni kwa sababu gani ujumbe wa Ufalme ni habari zilizo jema zaidi sana?
12 Ufalme wa Mungu ni serikali ya kimbingu ambayo itatawala juu ya dunia baada ya kuondolewa kwa utawala wa kibinadamu uliopo. (Danieli 2:44; Mathayo 6:9, 10) Mfalme wao ni Kristo Yesu, naye ana watawala washirika pamoja naye. (Ufunuo 14:1-4; 20:4) Ufalme huo ndio ule unaosemwa kwenye Danieli 7:14 kwa maneno haya: “Naye akapewa mamlaka, na utukufu, na ufalme, ili watu wa kabila zote, na taifa zote, na lugha zote, wamtumikie; mamlaka yake ni mamlaka ya milele, ambayo haitapita kamwe, na ufalme wake ni ufalme usioweza kuangamizwa.”
13 Ni kwa nini ujumbe juu ya utawala wa Ufalme ni habari njema hivyo, habari zilizo njema zaidi ya zote? Ni kwa sababu utaleta ulimwengu mpya, muundo mpya wa jamii ya kibinadamu. Chini ya Ufalme wa Mungu wanadamu watapokea baraka nzuri ajabu hivi kwamba Zaburi 37:11 husema hivi juu ya wale watakaoishi wakati huo: “Wenye upole watairithi [dunia], watajifurahisha kwa wingi wa amani.” Ndiyo, “Yehova mwenyewe atabariki watu wake kwa amani.” (Zaburi 29:11, NW) Leo, kabla ya Ufalme huo kuchukua uongozi kamili wa mambo ya dunia, habari njema juu ya utawala wao wa amani, wenye kudumu mikononi mwa “Mwana-Mfalme wa Amani” zinahubiriwa katika mataifa yote. Hilo linafanywa na watumishi wa kidunia wa Mungu chini ya mwongozo wa Kristo na malaika.—Isaya 9:6, 7, NW.
14. (a) Ni njia ipi moja ambayo katika hiyo tunaweza kuwatambua hakika watumishi wa Mungu wa kidunia? (b) Ni kwa jinsi gani baraka ya Mungu iliyo wazi imekuwa juu yao?
14 Watumishi hawa wa kidunia wa Mungu ni akina nani? Basi, ni nani pekee wanaotembelea watu kwa ukawaida wakiwa na habari njema za Ufalme? Hata wapinzani wanawatambua kuwa ni Mashahidi wa Yehova. Sasa wakiwa zaidi ya milioni tatu, hesabu ya watangazaji hao wa Ufalme zinaongezeka kwa haraka sana. Mwaka jana, wahudumu wapya wa habari njema 225,868 waliagizwa rasmi. Na katika mwaka huo mmoja, makundi mapya ya Mashahidi wa Yehova 2,461 yalianzishwa duniani pote, wastani wa zaidi ya 6 kila siku, yakifanyiza jumla ya makundi 52,177 katika nchi 208. Kweli kweli, unabii wa Isaya 60:22 unapata utimizo wao: Yehova anahimiza kazi ya kuhubiri na kukusanya katika “wakati wake.” Na sasa ndio wakati wake!
15. Ni nini ulio msingi wa kuhukumia watu leo?
15 Jinsi watu wanavyozitikia habari za utawala wa Ufalme ndio msingi wa kuamulia kama watatengwa kwa ajili ya “kukatiliwa mbali milele” au kwa ajili ya “uzima wa milele” katika ulimwengu mpya. Wengi wanaitikia kama wale wanaoelezwa kwenye 2 Nyakati 36:15 na 16: “[Yehova] . . . akatuma kwao kwa mikono ya wajumbe wake, akiondoka mapema, na kutuma; kwa sababu aliwahurumia . . . Lakini waliwadhihaki wajumbe wa Mungu, na kuyadharau maneno yake, na kuwacheka manabii wake, hata ilipozidi ghadhabu ya [Yehova] juu ya watu wake.” Lakini wengine wanaitikia ifaavyo na kuja chini ya ulinzi wa Yehova. “Bali kila anisikilizaye [hekima ya kweli] atakaa salama, naye atatulia bila kuogopa mabaya.”—Mithali 1:20, 33; Mathayo 25:34, 46, NW.
Majeshi ya Kimbingu Yatenda
16. Ni kwa jinsi gani Mungu atasema karibuni na wanadamu wasiotii?
16 Kabla ya muda mrefu, kazi ya kuhubiri ya watumishi wa Yehova itakamilishwa kwa kadiri ambayo yeye ameazimia. Saburi ya Mungu kwa wanadamu wasiotii itakoma. Ule ujumbe wa amani ambao amekuwa akisema kwa wanadamu katika kizazi hiki utabadilika. Badala yake, “Wakati huo atasema nao katika hasira yake na katika kuudhika kwake vikali atawasumbua.” (Zaburi 2:5, NW) Kama Yehova mwenyewe anavyotangaza: “Kwa ukali wangu, katika moto wa ghadhabu yangu, nitalazimika kusema.” (Ezekieli 38:19, NW) Kisha atampa Kristo ishara aongoze majeshi yake ya kimbingu yachukue hatua dhidi ya ulimwengu huu wenye kuasi na usiotii sheria.
17. Ni jinsi gani uwezo wa malaika mmoja tu ulionyeshwa?
17 Yale ambayo majeshi hayo yatatimiza yaweza kuonwa kutokana na yale iliyotendewa Ashuru wakati wa Yehova wa kutenda ulipofika dhidi yayo. Wafalme wa Pili 19:35 hueleza hivi: “Ikawa usiku uo huo malaika wa [Yehova] alitoka, akakiingia kituo cha Waashuri, akawapiga watu mia na themanini na tano elfu. . . . Walikuwa maiti wote pia.” Hayo yalitimizwa na malaika mmoja tu! Yale yatakayotimizwa karibuni na makumi ya maelfu ya makumi ya maelfu ya malaika yatakuwa yenye kuogopesha sana.
18. Uharibifu kwenye mwisho wa mfumo huu utakuwa kamili jinsi gani?
18 Yeremia 25:31 hadi 33 hueleza yale yatakayotokea kwa maneno haya: “[Yehova] ana mashindano na mataifa, atateta na watu wote wenye mwili; na waovu atawatoa wauawe kwa upanga; asema [Yehova]. [Yehova] wa majeshi asema hivi, Tazama, uovu utatokea kutoka taifa hata taifa, na tufani kuu itainuliwa toka pande za mwisho wa dunia. Na waliouawa na [Yehova] siku ile watakuwapo, toka upande mmoja wa dunia hata upande wa pili; hawataliliwa, wala kukusanywa, wala kuzikwa; watakuwa samadi juu ya uso wa nchi.”
19. Ni mambo gani mengine madogo-madogo yanayoongezwa na Ufunuo sura ya 19?
19 Ufunuo sura ya 19 hueleza jinsi Yehova atatimiza yote hayo. Ni kwa kumwagiza mfalme wake Yesu Kristo kutenda akiwa na, kama mstari 14 unavyosema: “Majeshi yaliyo mbinguni” yakimfuata. Halafu mistari 17 na 18 husema: “Kisha nikaona malaika mmoja amesimama katika jua; akalia kwa sauti kuu, akiwaambia ndege wote warukao katikati ya mbingu, Njoni mkutane kwa karamu ya Mungu iliyo kuu; mpate kula nyama ya wafalme, na nyama ya majemadari, na nyama ya watu hodari, na nyama ya farasi na ya watu wawapandao, na nyama ya watu wote, waungwana kwa watumwa, wadogo kwa wakubwa.” Na mistari 19 hadi 21 hueleza juu ya kuharibiwa kwa mashirika yote ya kibinadamu kwa sababu yalikataa kusikiliza aliposema Mungu kupitia kwa wajumbe wake wa dunia.
20. Ni kwa sababu gani ulimwengu huu haungeweza kukoma katika maangamizi makubwa ya nyukilia?
20 Hivyo, karibuni wakati wa Mungu utakuja aukomeshe mfumo huu wa ulimwengu wenye jeuri, unaovunjika-vunjika. Lakini mwisho huo hautakuwa kujiangamiza wenyewe kupitia vita ya nyukilia miongoni mwa mataifa. Kama hilo lingetokea, waadilifu wangeangamizwa pamoja na waovu. Hata hivyo, “milipuko” ya Mungu dhidi ya huu ulimwengu haitakuwa hivyo bali itakuwa yenye kuchagua sana. Kutakuwako na waokokaji watakaoingia katika ule ulimwengu mpya. Kama Mithali 2:21 na 22 inavyosema: “Maana wanyofu watakaa katika [dunia], na wakamilifu watadumu ndani yake. Bali waovu watatengwa na [dunia], nao wafanyao hila watang’olewa.”
21. Ni maswali gani mengine yatakayozungumzwa katika makala yetu itakayofuata?
21 Ni kwa sababu gani ulimwengu huu umekuja kwenye hali hii ambapo uharibifu huu wa duniani pote umekaribia sana? Si inawezekana kwamba jitihada za sasa za kuleta amani za viongozi wa ulimwengu zitazaa tunda ili kwamba mfumo huu uweze kuokolewa? Na ikiwa tunataka kutiwa miongoni mwa “wanyofu” na “wakamilifu” watakaookoka waingie katika ule ulimwengu mpya na kuendelea kuishi, tunapaswa kujiendeshaje sisi wenyewe katika wakati huu wa maana zaidi sana katika historia yote ya binadamu? Makala yetu ifuatayo itazungumzia maswali haya.
Majibu Yako Ni Nini?
◻ Ukosefu wa amani umekuwaje wazi, hasa katika wakati wetu?
◻ Majeshi ya kimalaika yanahusikaje katika kutenga wanadamu leo?
◻ Ni kwa sababu gani ujumbe wa Ufalme ni “injili ya milele”?
◻ Watu watahukumiwa kwa ajili ya kupata uzima au kifo kwa msingi gani?
[Picha katika ukurasa wa 13]
Kazi ya Mashahidi wa Yehova inategemezwa na majeshi ya kimalaika