“Tazama! Simba wa Kabila la Yuda”

1-3 Yesu anakabili hatari gani, naye anafanya nini?

UMATI wa watu unamtafuta Yesu. Watu hao wana mapanga na marungu huku wakitembea pamoja na maaskari. Wakiwa na nia mbaya, wanapita kwenye barabara zenye giza za Yerusalemu na kuvuka Bonde la Kidroni mpaka Mlima wa Mizeituni. Ingawa mwezi ni mpevu, wamebeba mienge na taa. Je, wanaitumia kwa sababu mawingu yamezuia mwanga wa mwezi? Au wanatazamia kwamba yule wanayemtafuta amejificha gizani? Vyovyote vile, tuna uhakika kuhusu jambo hili: Yeyote anayetazamia kwamba Yesu atajificha kwa sababu ya woga, hamjui hata kidogo.

² Yesu anajua kwamba maisha yake yako hatarini. Hata hivyo, anasimama na kusubiri. Umati huo unakaribia ukiongozwa na Yuda, ambaye wakati fulani alikuwa rafiki yake anayeaminika. Yuda, anamsaliti Yesu aliyekuwa bwana wake, huku akimtambulisha kwa kumsalimu kwa unafiki na kumbusu. Hata hivyo, Yesu anabaki akiwa mtulivu. Kisha, anajitokeza mbele ya umati. Anauliza, “Mnamtafuta nani?” Wanamjibu: “Yesu Mnazareti.”

³ Watu wengi wangeogopa ikiwa wangekutana na umati kama huo wenye silaha. Huenda hivyo ndivyo umati huo unavyotazamia Yesu atende. Lakini, Yesu haogopi, hatoroki, wala kuwadanganya kwa sababu ya woga. Badala yake, anasema hivi: “Ni mimi.” Hana wasiwasi wowote, naye anaonyesha ujasiri hivi kwamba wanaume hao wanashangaa. Wanaume hao wanarudi nyuma, na kuanguka!—Yohana 18:1-6; Mathayo 26:45-50; Marko 14:41-46.

4-6. (a) Mwana wa Mungu anafananishwa na nini, na kwa nini? (b) Yesu alionyesha ujasiri katika njia gani tatu?

⁴ Ni nini kilichomsaidia Yesu kubaki akiwa mtulivu na kujizuia alipokabili hatari? Aliweza kufanya hivyo kwa sababu alikuwa jasiri. Ujasiri ni mojawapo ya sifa ambayo kiongozi anahitaji kuwa nayo. Hakuna mwanadamu yeyote ambaye amewahi kuonyesha ujasiri kuliko Yesu au hata kufikia kiwango chake. Katika sura iliyotangulia, tulijifunza kuhusu unyenyekevu na upole wa Yesu. Kwa kufaa aliitwa “Mwanakondoo.” (Yohana 1:29) Hata hivyo, ujasiri wa Yesu unamfanya astahili kuitwa jina lingine. Biblia inasema hivi kumhusu Mwana wa Mungu: “Tazama! Simba wa kabila la Yuda.”​—Ufunuo 5:5.

⁵ Mara nyingi, simba huwakilisha ujasiri. Je, umewahi kumwona simba-dume uso kwa uso? Ikiwa umewahi, inaelekea kwamba alikuwa amefungiwa katika hifadhi ya wanyama. Hata hivyo, bado inaogopesha. Mnapotazamana uso kwa uso na mnyama huyo mkubwa na mwenye nguvu, ni wazi kwamba haogopi chochote. Biblia inasema hivi kumhusu, “Simba, mnyama mwenye nguvu zaidi kuliko wanyama wote, ambaye hamkimbii yeyote.” (Methali 30:30) Kristo ana ujasiri kama huo.

⁶ Acheni tuchunguze jinsi Yesu alivyoonyesha ujasiri kama wa simba katika njia tatu: kuitetea kweli, kutetea haki, na kukabiliana na upinzani. Pia, tutaona kwamba sisi sote, tunaweza kumwiga Yesu katika kuonyesha ujasiri iwe sisi ni jasiri au la.

Aliitetea Kweli kwa Ujasiri

7-9. (a) Ni nini kilichotendeka Yesu alipokuwa na umri wa miaka 12, na kwa nini unaliona jambo hilo kuwa lenye kuogopesha? (b) Ni katika njia gani Yesu alionyesha ujasiri akiwa na walimu huko hekaluni?

⁷ Katika ulimwengu unaotawaliwa na Shetani, “baba ya uwongo,” mtu anahitaji ujasiri ili kuitetea kweli. (Yohana 8:44; 14:30) Yesu hakusubiri hadi alipokuwa mtu mzima ili aitetee kweli. Yesu alipokuwa na umri wa miaka 12, wazazi wake walimsahau huko Yerusalemu baada ya sherehe ya Pasaka. Kwa siku tatu, Maria na Yosefu walimtafuta sana. Hatimaye, wakampata ndani ya hekalu. Alikuwa akifanya nini huko? Alikuwa “ameketi katikati ya walimu, akiwasikiliza na kuwauliza maswali.” (Luka 2:41-50) Fikiria jinsi mazungumzo hayo yalivyokuwa.

⁸ Wanahistoria wanasema kwamba baadhi ya viongozi wakuu wa dini walikuwa na mazoea ya kubaki hekaluni baada ya sherehe na kufundisha katika mojawapo ya kumbi kubwa zilizokuwepo. Watu walikuwa wakiketi miguuni pao ili kuwasikiliza na kuwauliza maswali. Walimu hao walikuwa watu wenye elimu. Waliijua vizuri Sheria ya Musa na pia sheria na mapokeo mengi yaliyotungwa na wanadamu kadiri miaka ilivyopita. Je, ungehisije ikiwa ungekuwa umeketi katikati yao? Wengi wangeogopa. Namna gani ikiwa ungekuwa na umri wa miaka 12 tu? Vijana wengi ni wenye haya. (Yeremia 1:6) Wengine wanafanya kila wawezalo kuepuka kuonekana na walimu wao; wanaogopa kuambiwa wafanye jambo fulani, kupewa mgawo fulani, na wanaogopa kuaibishwa au kudhihakiwa.

⁹ Lakini Yesu alikuwa ameketi katikati ya wanaume hao wenye elimu, na bila woga aliwauliza maswali yaliyowasaidia kufikiri. Naye alifanya mengi hata zaidi. Simulizi hilo linasema: “Wote waliomsikiliza walikuwa wakishangazwa na majibu yake na uwezo wake wa kuelewa.” (Luka 2:47) Biblia haituambii mambo aliyosema wakati huo, lakini tunaweza kuwa na uhakika kwamba hakukariri hadithi na falsafa za uwongo zilizopendwa sana na walimu hao wa kidini. (1 Petro 2:22) Alitetea kweli ya Neno la Mungu, na kwa kweli wale waliomsikiliza walishangaa kuona mvulana mwenye umri wa miaka 12 akijieleza kwa ufahamu na ujasiri.

10. Leo vijana Wakristo huiga jinsi gani ujasiri wa Yesu?

¹⁰ Leo, vijana wengi Wakristo wanafuata hatua za Yesu. Ni kweli kwamba wao si wakamilifu kama kijana Yesu alivyokuwa mkamilifu. Hata hivyo, wao pia hawasubiri mpaka wawe watu wazima ili waitetee kweli. Wakiwa shuleni au nyumbani, wanawauliza watu maswali kwa busara, wanawasikiliza, na kuwahubiria wengine kweli kwa heshima. (1 Petro 3:15) Wengi kati ya vijana hao, wamewasaidia wanafunzi wenzao, walimu, na majirani kuwa wafuasi wa Kristo. Kwa kweli, Yehova anapendezwa sana na ujasiri wao! Neno lake linawafananisha vijana hao na matone ya umande wenye kuburudisha na wenye kupendeza.​—Zaburi 110:3.

11, 12. Yesu alionyeshaje ujasiri katika kuitetea kweli akiwa mtu mzima?

¹¹ Akiwa mtu mzima, Yesu alionyesha ujasiri tena na tena katika kuitetea kweli. Mwanzoni mwa huduma yake alipatwa na hali ambayo ingewaogopesha watu wengi. Yesu alilazimika kumkabili Shetani, ambaye ni hatari zaidi na mwenye nguvu zaidi kati ya maadui wote wa Yehova akiwa mwanadamu tu na si malaika mkuu. Yesu alimpinga Shetani na kuthibitisha kwamba alitumia vibaya Maandiko yaliyoongozwa na roho. Yesu alimaliza mazungumzo hayo kwa kumwamuru hivi kwa ujasiri: “Nenda zako, Shetani!”​—Mathayo 4:2-11.

¹² Hivyo, Yesu alituwekea mfano katika huduma yake, kwa kulitetea Neno la Baba yake kwa ujasiri ili lisipotoshwe au kutumiwa vibaya. Kama ilivyo leo, wakati huo pia ilikuwa kawaida kwa viongozi wa dini kufundisha uwongo. Yesu aliwaambia hivi viongozi wa dini wa siku zake: “Mnalibatilisha neno la Mungu kwa mapokeo yenu ambayo mlipewa.” (Marko 7:13) Wanaume hao waliheshimiwa sana na watu, lakini Yesu aliwashutumu bila woga na kuwaita viongozi vipofu na wanafiki.a (Mathayo 23:13, 16) Tunawezaje kuiga mfano wa Yesu wa kuwa jasiri?

13. Tunapomwiga Yesu, tunahitaji kukumbuka nini, lakini tuna pendeleo gani?

¹³ Bila shaka, tunakumbuka kwamba hatuna uwezo wa kusoma mioyo wala mamlaka ya kuhukumu kama Yesu. Hata hivyo, tunaweza kuiga ujasiri wake katika kuitetea kweli. Kwa mfano, tunapofunua uwongo wa kidini—mambo yasiyo ya kweli ambayo dini zinafundisha kumhusu Mungu, kusudi lake, na Neno lake—tunaangaza nuru katika ulimwengu uliotiwa giza na propaganda za Shetani. (Mathayo 5:14; Ufunuo 12:9, 10) Tunawasaidia watu kuwa huru kutoka katika utumwa wa mafundisho ya uwongo yanayowafanya wawe na woga usiofaa na kuharibu uhusiano wao pamoja na Mungu. Ni pendeleo kubwa sana kwetu kuona utimizo wa ahadi hii ya Yesu: “Kweli itawaweka ninyi huru”!—Yohana 8:32.

Alitetea Haki kwa Ujasiri

14, 15. (a) Ni katika njia gani Yesu alitangaza “haki”? (b) Yesu alipuuza ubaguzi gani alipozungumza na mwanamke Msamaria?

¹⁴ Unabii wa Biblia ulitabiri kwamba Masihi angeyatangazia mataifa “haki.” (Mathayo 12:18; Isaya 42:1) Bila shaka, Yesu alianza kufanya hivyo alipokuwa hapa duniani. Sikuzote alionyesha ujasiri, kwa kutenda haki na bila ubaguzi aliposhughulika na watu. Kwa mfano, alikataa kuiga ubaguzi na upendeleo uliokuwa umeenea sana wakati huo.

¹⁵ Yesu alipozungumza na mwanamke Msamaria kwenye kisima cha Sikari, wanafunzi wake walishangaa sana. Kwa nini? Katika siku hizo, Wayahudi waliwachukia Wasamaria; chuki hiyo ilianza zamani sana. (Ezra 4:4) Isitoshe, marabi fulani waliwadharau wanawake. Sheria za kirabi, zilizoandikwa baadaye, zilimzuia mwanamume asizungumze na mwanamke; hata zilionyesha kwamba wanawake hawastahili kufundishwa Sheria ya Mungu. Hasa wanawake Wasamaria, walionwa kuwa wasio safi. Yesu alipuuza ubaguzi wa aina hiyo, naye akamfundisha hadharani mwanamke Msamaria (aliyeishi maisha mapotovu kiadili), na kumfunulia kwamba yeye ni Masihi.​—Yohana 4:5-27.

16. Kwa nini Wakristo wanahitaji ujasiri ili kupinga ubaguzi leo?

¹⁶ Je, umewahi kuwa pamoja na watu ambao ni wabaguzi? Huenda wakawadhihaki watu wa jamii au taifa lingine, kuzungumza kwa dharau kuhusu watu wa jinsia nyingine, au kuwadharau wale ambao hali yao ya kiuchumi au ya kijamii ni tofauti na yao. Wafuasi wa Kristo hawakubaliani na maoni hayo yenye chuki, na wanafanya kila wanaloweza kuondolea mbali ubaguzi wowote katika mioyo yao. (Matendo 10:34) Kila mmoja wetu, anapaswa kusitawisha ujasiri ili asionyeshe ubaguzi.

17. Yesu alichukua hatua gani hekaluni, na kwa nini?

¹⁷ Pia, ujasiri ulimwezesha Yesu kutetea usafi wa watu wa Mungu na mpango wa ibada safi. Mapema katika huduma yake, Yesu aliingia hekaluni huko Yerusalemu na alishangaa alipowaona wafanyabiashara na watu waliokuwa wakibadili pesa wakifanya biashara zao huko. Akiwa na bidii ya kufanya yaliyo mema, Yesu aliwafukuza watu hao wenye pupa pamoja na bidhaa zao. (Yohana 2:13-17) Alifanya jambo kama hilo tena karibu na mwisho wa huduma yake. (Marko 11:15-18) Bila shaka, matendo hayo yalimfanya awe na maadui wenye nguvu, lakini hakusita kufanya hivyo. Kwa nini? Tangu alipokuwa mtoto, aliliita hekalu hilo nyumba ya Baba yake, naye aliamini hivyo. (Luka 2:49) Kuchafua ibada safi iliyokuwa ikiendelezwa humo kulikuwa ukosefu wa haki ambao hangeweza kuuvumilia. Bidii yake ilimpa ujasiri wa kuchukua hatua.

18. Wakristo leo wanaweza kuonyeshaje ujasiri inapohusu usafi wa kutaniko?

¹⁸ Leo pia, wafuasi wa Kristo wanahangaikia sana usafi wa watu wa Mungu na mpango wa ibada safi. Wakitambua kwamba Mkristo mwenzao ametenda dhambi nzito, hawapuuzi jambo hilo. Wanalifunua kwa ujasiri. (1 Wakorintho 1:11) Wanahakikisha kwamba wazee wa kutaniko wamejulishwa kuhusu jambo hilo. Wazee wanaweza kuwasaidia walio dhaifu kiroho na pia, wanaweza kuchukua hatua ili kuwasaidia kondoo wa Yehova wabaki wakiwa safi.​—Yakobo 5:14, 15.

19, 20. (a) Ni matendo gani yasiyo ya haki yaliyokuwa yameenea katika siku za Yesu, na watu walimshinikiza afanye nini? (b) Kwa nini wafuasi wa Kristo wanakataa kujihusisha katika siasa na jeuri, na wanapata thawabu gani kwa sababu ya msimamo wao?

¹⁹ Hata hivyo, je, tunapaswa kufikia mkataa kwamba Yesu alikuwa akipinga ukosefu wa haki wa kila aina katika jamii ulimwenguni? Bila shaka, kulikuwa na ukosefu mwingi wa haki. Nchi yao ilikuwa ikitawaliwa na serikali ya kigeni. Waroma waliwakandamiza Wayahudi kwa kutumia jeshi lenye nguvu, waliwatoza kodi kupita kiasi, na hata kuingilia desturi zao za kidini. Haishangazi kwamba watu wengi walitaka Yesu ajihusishe na siasa za siku hizo. (Yohana 6:14, 15) Kwa mara nyingine tena, Yesu alihitaji kuonyesha ujasiri.

²⁰ Yesu alieleza kwamba Ufalme wake si sehemu ya ulimwengu. Aliwafundisha wafuasi wake kupitia mfano wake kwamba wajiepushe na mizozo ya kisiasa ya siku hizo na kukazia fikira kazi ya kuhubiri habari njema ya Ufalme wa Mungu. (Yohana 17:16; 18:36) Aliwafundisha somo muhimu kuhusu kutounga mkono upande wowote umati wa watu ulipokuja kumkamata. Petro alichukua hatua mara moja, kwa kutumia upanga wake na kumjeruhi mtu. Ni rahisi kuelewa kwa nini Petro alifanya hivyo. Ikiwa kuna wakati ambapo mtu angekuwa na haki ya kuonyesha jeuri, basi ingekuwa usiku huo, Mwana wa Mungu asiye na hatia aliposhambuliwa. Hata hivyo, Yesu aliwawekea wafuasi wake walio duniani mfano wanaoweza kufuata hata leo: “Rudisha upanga wako mahali pake, kwa maana wote wanaochukua upanga wataangamia kwa upanga.” (Mathayo 26:51-54) Kama ilivyo leo pia, wafuasi wa Kristo wanahitaji ujasiri ili kuendeleza amani. Kwa sababu ya msimamo wao wa Kikristo wa kutounga mkono upande wowote, watu wa Mungu wanaepuka kabisa kujihusisha katika vita vinavyoendelea leo, mauaji ya watu, fujo, na matendo mengine kama hayo ya jeuri. Sifa hiyo nzuri ni mojawapo ya thawabu ya ujasiri wao.

Alikabili Upinzani kwa Ujasiri

21, 22. (a) Yesu alipata msaada gani kabla ya kukabili jaribu kali zaidi maishani mwake? (b) Ni katika njia gani Yesu alionyesha ujasiri mpaka mwisho?

²¹ Mwana wa Yehova alijua mapema kwamba angekabili upinzani mkali akiwa hapa duniani. (Isaya 50:4-7) Mara nyingi, alitishiwa kuuawa na tishio la mwisho ni lile linalotajwa mwanzoni mwa sura hii. Ni nini kilichomsaidia Yesu kuendelea kuwa jasiri alipokabili hatari hizo? Yesu alikuwa akifanya nini kabla ya umati huo kuja kumkamata? Alikuwa akisali kwa Yehova kwa bidii. Na Yehova alifanya nini? Biblia inatuambia kwamba Yesu ‘alisikilizwa vizuri.’ (Waebrania 5:7) Yehova alimtuma malaika kutoka mbinguni ili kumtia nguvu Mwana wake mwenye ujasiri.​—Luka 22:42, 43.

²² Muda mfupi baada ya kutiwa nguvu, Yesu aliwaambia hivi mitume wake: “Simameni twende.” (Mathayo 26:46) Wazia ujasiri wake aliposema maneno hayo. Aliwaambia “twende,” akijua kwamba atauambia umati huo usiwadhuru rafiki zake, kwamba waliokuwa pamoja naye watamwacha na kukimbia, na kwamba angekabili jaribu kali zaidi maishani mwake akiwa peke yake. Alishtakiwa isivyo haki na kinyume cha sheria, akadhihakiwa, akateswa, na kuuawa kikatili. Chini ya hali hizo zote, aliendelea kuonyesha ujasiri hadi mwisho.

23. Eleza ni kwa nini Yesu hakuwa mtu asiyejali alipokabili hatari na hata kifo.

²³ Je, Yesu alikuwa mtu asiyejali? Hapana; kuna tofauti kubwa kati ya kutojali na ujasiri wa kweli. Kwa kweli, Yesu aliwafundisha wafuasi wake wajihadhari, watumie hekima na kuondoka mahali penye hatari ili kuendelea kufanya mapenzi ya Mungu. (Mathayo 4:12; 10:16) Hata hivyo, katika kisa hiki Yesu alijua kwamba hawezi kuepuka hatari hiyo. Alijua kile ambacho Mungu alitaka afanye. Yesu alikuwa ameazimia kudumisha utimilifu wake, hivyo hakurudi nyuma, badala yake alisonga mbele na kukabili jaribu hilo.

24. Kwa nini tunaweza kuwa na uhakika kwamba tunaweza kuonyesha ujasiri hata tunapokabili jaribu lolote?

²⁴ Wafuasi wa Yesu wamekuwa wakitembea kwa ujasiri katika hatua za Bwana wao. Wengi wao wamesimama imara hata wanapodhihakiwa, kuteswa, kukamatwa, kufungwa, kunyanyaswa, na hata kuuawa. Watu wasio wakamilifu wanatoa wapi ujasiri wa aina hiyo? Ujasiri huo hautokani na uwezo wao wenyewe. Kama Yesu alivyopokea msaada kutoka juu, ndivyo ilivyo kwa wafuasi wake pia. (Wafilipi 4:13) Basi, usiogope mambo ambayo huenda yakatokea wakati ujao. Azimia kuendelea kuwa mtimilifu, na Yehova atakupa ujasiri unaohitaji. Endelea kuimarishwa na mfano wa Kiongozi wetu, Yesu, ambaye alisema: “Jipeni moyo! Mimi nimeushinda ulimwengu.”​—Yohana 16:33.