‘Kwa Jina la Roho Takatifu’
“Basi enendeni, mkawafanye mataifa yote kuwa wanafunzi, mkiwabatiza kwa jina la . . . Roho Mtakatifu [roho takatifu, NW].”—MATHAYO 28:19.
1. Yohana Mbatizaji alitumia usemi gani mpya kuhusu roho takatifu?
KATIKA mwaka wa 29 wa Wakati wa Kawaida wetu, Yohana Mbatizaji alikuwa mwenye shughuli katika Israeli akimtayarishia Mesiya njia, na katika huduma yake, alitangaza jambo jipya juu ya roho takatifu. Bila shaka, Wayahudi tayari walijua yale ambayo Maandiko ya Kiebrania yalisema juu ya roho. Lakini, huenda ikawa walishangaa wakati Yohana aliposema hivi: “Kweli mimi nawabatiza kwa maji kwa ajili ya toba; bali yeye ajaye nyuma yangu . . . atawabatiza kwa Roho Mtakatifu [roho takatifu, NW].” (Mathayo 3:11) ‘Ubatizo wa roho takatifu’ ulikuwa usemi mpya kwao.
2. Yesu alitanguliza usemi gani mpya uliohusisha roho takatifu?
2 Yule ambaye angekuja alikuwa Yesu. Katika maisha yake ya kidunia, Yesu kwa kweli hakubatiza mtu yeyote kwa roho takatifu, ingawa mara nyingi alisema juu ya roho. Isitoshe, baada ya ufufuo wake, alirejezea roho takatifu katika njia nyingine mpya. Aliwaambia wanafunzi wake hivi: “Basi, enendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu [roho takatifu, NW].” (Mathayo 28:19) Maneno “kwa jina la” humaanisha “kwa utambuzi wa.” Ubatizo wa maji kwa utambuzi wa Baba, Mwana, na roho takatifu ungekuwa tofauti vilevile na ubatizo kwa roho takatifu. Huo pia ulikuwa usemi mpya uliohusisha roho takatifu.
Kubatizwa kwa Roho Takatifu
3, 4. (a) Batizo za kwanza kwa roho takatifu zilitukia wakati gani? (b) Zaidi ya kuwabatiza, roho takatifu ilitendaje kuelekea wanafunzi wa Yesu katika Pentekoste 33 W.K.?
3 Kwa habari ya ubatizo kwa roho takatifu, Yesu aliahidi wanafunzi wake hivi kabla ya kupaa kwake: “Ninyi mtabatizwa katika Roho Mtakatifu [roho takatifu, NW] baada ya siku hizi chache.” (Matendo 1:5, 8) Muda mfupi baadaye, ahadi hiyo ilitimizwa. Roho takatifu ilishuka juu ya wanafunzi 120 hivi waliokuwa wamekusanyika katika chumba cha orofani Yerusalemu wakati Yesu, kutoka mbinguni, alipofanya batizo zake za kwanza kwa roho takatifu. (Matendo 2:1-4, 33) Tokeo likiwa nini? Wanafunzi hao wakaja kuwa sehemu ya mwili wa kiroho wa Kristo. Kama mtume Paulo aelezavyo, ‘Katika roho moja wao wote walibatizwa kuwa mwili mmoja.’ (1 Wakorintho 12:13) Kwa wakati ule ule, walipakwa mafuta kuwa wafalme na makuhani wa wakati ujao katika Ufalme wa Mungu wa kimbingu. (Waefeso 1:13, 14; 2 Timotheo 2:12; Ufunuo 20:6) Roho takatifu ilitumikia pia kuwa muhuri na dalili ya kwanza ya urithi mtukufu wa wakati ujao, lakini si hayo tu.—2 Wakorintho 1:21, 22.
4 Miaka michache mapema zaidi, Yesu alikuwa amemwambia Nikodemo hivi: “Mtu asipozaliwa mara ya pili, hawezi kuuona ufalme wa Mungu. . . . Mtu asipozaliwa kwa maji na kwa Roho, hawezi kuuingia ufalme wa Mungu.” (Yohana 3:3, 5) Sasa wanadamu 120 walikuwa wamezaliwa mara ya pili. Kupitia roho takatifu, walikuwa wamefanywa wana wa kiroho wa Mungu, ndugu za Kristo. (Yohana 1:11-13; Warumi 8:14, 15) Utendaji huo wote wa roho takatifu ni wa ajabu kuliko miujiza kwa njia ya kipekee. Isitoshe, tofauti na miujiza ya wakati mmoja tu, roho takatifu haikukoma baada ya kifo cha mitume bali imeendelea kuwa yenye kutenda katika njia hiyo hadi siku yetu. Ni pendeleo kwa Mashahidi wa Yehova kuwa na washiriki wa mwisho-mwisho wa mwili wa Kristo waliobatizwa kwa roho miongoni mwao, na hao hutumikia wakiwa “mtumwa mwaminifu mwenye akili” wa kuandaa chakula cha kiroho kwa wakati wake.—Mathayo 24:45-47.
Kubatizwa ‘kwa Jina la . . . Roho Takatifu’
5, 6. Batizo za kwanza kwa roho takatifu ziliongozaje kwenye batizo za maji?
5 Lakini vipi kuhusu ubatizo wa maji ulioahidiwa kwa jina la Baba, na Mwana, na roho takatifu? Wale wanafunzi wa kwanza waliobatizwa kwa roho hawakupitia ubatizo wa maji wa jinsi hiyo. Walikuwa tayari wamepokea ubatizo wa Yohana, na kwa kuwa huo ulikubalika kwa Yehova katika wakati huo hasa, hawakuhitaji wabatizwe upya. Lakini katika Pentekoste 33 W.K., umati mkubwa wa nafsi ulipokea ubatizo huo mpya wa maji. Hilo lilitukiaje?
6 Ubatizo kwa roho takatifu wa wale 120 ulikuwa umeandama na sauti kubwa iliyovuta makutano ya watu. Hao walishangaa kusikia wanafunzi wakisema katika ndimi, yaani, lugha geni zenye kueleweka na wale waliokuwako. Mtume Petro alieleza kwamba muujiza huo ulikuwa ushuhuda kwamba roho ya Mungu ilikuwa imemiminwa na Yesu, aliyekuwa amefufuliwa kutoka wafu na sasa alikuwa akiketi kwenye mkono wa kuume wa Mungu mbinguni. Petro aliwatia moyo wasikilizaji wake hivi: “Basi nyumba yote ya Israeli na wajue yakini ya kwamba Mungu amemfanya Yesu huyo mliyemsulibisha [mliyemtundika, NW] kuwa Bwana na Kristo.” Kisha akamalizia kwa kusema hivi: “Tubuni mkabatizwe kila mmoja kwa jina lake Yesu Kristo, mpate ondoleo la dhambi zenu, nanyi mtapokea kipawa cha Roho Mtakatifu [roho takatifu, NW].” Nafsi zapata 3,000 ziliitikia.—Matendo 2:36, 38, 41.
7. Wale 3,000 waliobatizwa katika Pentekoste 33 W.K. walibatizwaje kwa jina la Baba, na Mwana, na roho takatifu?
7 Je! yaweza kusemwa kwamba hao walibatizwa kwa jina la (kwa utambuzi wa) Baba, Mwana, na roho takatifu? Naam, Ingawa Petro hakuwa amewaambia wabatizwe kwa jina la Baba, walikuwa tayari wamemtambua Yehova kuwa Bwana Mwenye Enzi Kuu, kwa kuwa walikuwa Wayahudi wa kiasili, washiriki wa taifa lililojiweka wakfu Kwake. Petro alikuwa amesema hivi: ‘Mkabatizwe kwa jina la Mwana.’ Kwa hiyo ubatizo wao ulionyesha kumtambua kwao Yesu Kristo kuwa Bwana na Kristo. Sasa walikuwa wanafunzi wake na walikubali kwamba kutoka wakati huo msamaha wa dhambi ulikuwa kupitia yeye. Mwishowe, ubatizo huo ulikuwa kwa utambuzi wa roho takatifu, na huo ulipatwa kwa kuitikia ile ahadi kwamba wangepokea roho ikiwa zawadi ya bure.
8. (a) Pamoja na ubatizo wa maji, Wakristo wapakwa-mafuta wamepokea ubatizo gani mwingine? (b) Ni nani zaidi ya wale 144,000 wanaopokea ubatizo wa maji kwa jina la roho takatifu?
8 Wale waliobatizwa majini siku ya Pentekoste 33 W.K. walibatizwa kwa roho pia, wakipakwa mafuta kuwa wafalme na makuhani wa wakati ujao katika Ufalme wa kimbingu. Kulingana na kitabu cha Ufunuo, kuna 144,000 tu wa hao. Kwa hiyo wale wanaobatizwa kwa roho takatifu na hatimaye ‘kutiwa muhuri’ wakiwa warithi wa Ufalme wanapata kuwa 144,000 tu. (Ufunuo 7:4; 14:1) Hata hivyo, wanafunzi wote wapya—tumaini lao liwe ni nini—wanabatizwa katika maji kwa jina la Baba, na Mwana, na roho takatifu. (Mathayo 28:19, 20) Basi, ubatizo kwa jina la roho takatifu unadokeza nini kwa Wakristo wote, kama ni wa “kundi dogo” au ni wa “kondoo wengine”? (Luka 12:32; Yohana 10:16) Kabla ya kujibu hilo, acheni tuangalie utendaji fulani-fulani wa roho katika enzi ya Kikristo.
Tunda la Roho
9. Ni utendaji gani wa roho takatifu ulio wa maana kwa Wakristo wote?
9 Utendaji wa maana wa roho takatifu ni katika kutusaidia tusitawishe nyutu za Kikristo. Ni Kweli, kwa sababu ya kutokamilika hatuwezi kuepuka kutenda dhambi. (Warumi 7:21-23) Lakini tunapotubu kwa moyo mweupe, Yehova hutusamehe kwa msingi wa dhabihu ya Kristo. (Mathayo 12:31, 32; Warumi 7:24, 25; 1 Yohana 2:1, 2) Isitoshe Yehova hututazamia tushindane dhidi ya mwelekeo wetu wa kutenda dhambi, na roho takatifu hutusaidia tufanye hivyo. “Enendeni kwa Roho,” akasema Paulo, “wala hamtazitimiza kamwe tamaa za mwili.” (Wagalatia 5:16) Paulo aliendelea kuonyesha kwamba roho yaweza kutokeza sifa njema sana ndani yetu. Aliandika hivi: “Lakini tunda la roho ni upendo, shangwe, amani, ustahimilivu, fadhili, wema, imani, upole, kujidhibiti.”—Wagalatia 5:22, 23, NW.
10. Tunda la roho husitawishwaje katika Mkristo?
10 Roho hutokezaje tunda kama hilo ndani ya Mkristo? Haitukii bila jitihadi yoyote kwa sababu tu sisi ni Wakristo waliojiweka wakfu na kubatizwa. Ni lazima tuifanyie bidii. Lakini tukishiriki pamoja na Wakristo wengine wanaoonyesha sifa hizo, tukisali kwa Mungu kupata roho yake ili itusaidie tusitawishe sifa mahususi, tukiepuka mashirika mabaya na kujifunza Biblia kupata shauri na mifano mizuri, basi tunda la roho litakua ndani yetu.—Mithali 13:20; 1 Wakorintho 15:33; Wagalatia 5:24-26; Waebrania 10:24, 25.
Kuwekwa Rasmi na Roho Takatifu
11. Wazee wanawekwa rasmi na roho takatifu katika njia gani?
11 Paulo, alipokuwa akizungumza na wazee wa Efeso, alijulisha utendaji mwingine wa roho takatifu aliposema hivi: “Jitunzeni nafsi zenu, na lile kundi lote nalo, ambalo Roho Mtakatifu amewaweka [roho takatifu imewaweka, NW] ninyi kuwa waangalizi ndani yake, mpate kulilisha kanisa lake Mungu, alilolinunua kwa damu yake [ya Mwana wake, NW] mwenyewe.” (Matendo 20:28) Naam, waangalizi wa kundi, au wazee, huwekwa rasmi na roho takatifu. Kwa njia gani? Ni kwamba ni lazima wazee waliowekwa rasmi watimize sifa zinazoorodheshwa katika Biblia iliyopuliziwa roho. (1 Timotheo 3:1-13; Tito 1:5-9) Wanaweza kusitawisha sifa hizo kwa msaada wa roho takatifu pekee. Zaidi ya hayo, baraza la wazee linalompendekeza mzee mpya husali kupata mwongozo wa roho takatifu ili watambue kama anastahili kulingana na sifa hizo au la. Na kuwekwa rasmi hasa kunafanywa chini ya usimamizi wa mtumwa mwaminifu mwenye akili aliyepakwa mafuta kwa roho.
Ongozweni na Roho
12. Roho yaweza kutuongozaje kupitia Biblia?
12 Wakristo hutambua kwamba Maandiko Matakatifu yaliandikwa chini ya uvutano wa roho takatifu. Kwa hiyo, wanayachungua sana ili kupata hekima yenye kupuliziwa roho, kama wale Mashahidi wa Yehova wa kabla ya wakati wa Ukristo walivyofanya. (Mithali 2:1-9) Wanayasoma, wanatafakari juu yayo, na kuyaacha yaongoze maisha zao. (Zaburi 1:1-3; 2 Timotheo 3:16) Hivyo wanasaidiwa na roho ‘kuyachunguza mafumbo ya Mungu.’ (1 Wakorintho 2:10, 13; 3:19) Kuwaongoza watumishi wa Mungu katika njia hiyo ni utendaji wa maana wa roho ya Mungu kwa wakati wetu.
13, 14. Yesu alitumia nini kushughulika na matatizo katika kundi, na anafanyaje vivyo hivyo leo?
13 Zaidi ya hayo, katika kitabu cha Ufunuo, Yesu aliyefufuliwa alipeleka ujumbe mbalimbali kwa makundi saba katika Esia Ndogo. (Ufunuo, sura 2 na 3) Katika huo alifunua kwamba alikuwa amechunguza makundi hayo na kutambua hali yao ya kiroho. Alipata kwamba mengine yalikuwa yakiweka mfano mwema wa imani. Katika mengine, wazee walikuwa wameruhusu farakano, ukosefu wa adili, na uvuguvugu ufisidi kundi. Kundi katika Sardisi, kujapokuwa nafsi chache zenye uaminifu, lilikuwa limekufa kiroho. (Ufunuo 3:1, 4) Yesu alishughulikaje na matatizo hayo? Kwa roho takatifu. Alipotoa shauri kwa makundi hayo saba, ujumbe wa Yesu ulimalizia katika kila kisa kwa maneno haya: “Acheni yeye ambaye ana sikio asikie ambacho roho husema kwa makundi.”—Ufunuo 2:7, 11, 17, 29, NW; 3:6, 13, 22.
14 Leo pia, Yesu huyachunguza makundi. Na anapotambua matatizo, bado huyashughulikia kwa njia ya roho takatifu. Roho yaweza kutusaidia tutambue na kushinda matatizo moja kwa moja kupitia usomaji wetu wa Biblia. Msaada waweza kupatikana pia kupitia vichapo vya Biblia vilivyochapishwa na mtumwa mwaminifu mwenye akili aliyepakwa mafuta kwa roho. Au waweza kutoka kwa wazee waliowekwa kwa roho katika kundi. Hali iwe ni nini, kama shauri ni kwa watu mmoja mmoja au kwa kundi kwa ujumla, je, tunayatii maneno ya Yesu: “Acheni yeye ambaye ana sikio asikie ambacho roho husema”?
Roho na ile Kazi ya Kuhubiri
15. Roho ilitendaje kuelekea Yesu kwa habari ya kazi ya kuhubiri?
15 Pindi moja wakati Yesu alipohubiri katika sinagogi katika Nazareti, alionyesha utendaji mwingine tena wa roho. Rekodi yatuambia hivi: “Akakifungua chuo, akatafuta mahali palipoandikwa, Roho wa Bwana yu [roho ya Yehova i, NW] juu yangu, kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao, na vipofu kupata kuona tena, kuwaacha huru waliosetwa.” Kisha akaanza kuwaambia hivi: “Leo maandiko haya yametimia masikioni mwenu.” (Luka 4:17, 18, 21; Isaya 61:1, 2) Naam, Yesu alipakwa mafuta kwa roho takatifu ili ahubiri habari njema.
16. Katika karne ya kwanza, roho takatifu ilihusikaje sana katika kuhubiriwa kwa habari njema?
16 Muda mfupi kabla ya kifo chake, Yesu alitabiri juu ya kampeni tukufu ya kuhubiri ambayo ingetimizwa na wafuasi wake. Alisema hivi: “Lakini lazima kwanza Habari Njema ihubiriwe kwa mataifa yote.” (Marko 13:10, HNWW) Maneno hayo yalikuwa na utimizo wa kwanza katika karne ya kwanza, na daraka la roho takatifu katika hilo lilikuwa la maana sana. Roho takatifu ndiyo ilimwelekeza Filipo amhubiri towashi Mwethiopia. Roho takatifu ilimwelekeza Petro kwa Kornelio, na roho takatifu ilielekeza kwamba Paulo na Barnaba watumwe kutoka Antiokia wakiwa mitume. Baadaye, Paulo alipotaka kuhubiri katika Esia na Bithinia, roho takatifu ilimzuia kwa njia fulani. Mungu alitaka kazi ya kutoa ushahidi isonge hadi katika Ulaya.—Matendo 8:29; 10:19; 13:2; 16:6, 7.
17. Leo, roho takatifu inahusikaje katika kazi ya kuhubiri?
17 Leo, roho takatifu inahusika sana tena katika kazi ya kuhubiri. Katika utimizo zaidi wa Isaya 61:1, 2, roho ya Yehova imewapaka mafuta ndugu za Yesu ili wahubiri. Katika utimizo wa mwisho wa Marko 13:10, wapakwa-mafuta hao, wakisaidiwa na umati mkubwa, wamehubiri habari njema katika “mataifa yote” kihalisi. (Ufunuo 7:9) Na roho huwategemeza wao wote katika hilo. Sawa na katika karne ya kwanza, hiyo hufungua maeneo mapya na kuongoza maendeleo ya ujumla ya kazi hiyo. Inaimarisha watu mmoja mmoja, ikiwasaidia washinde woga na wasitawishe stadi zao za kufundisha. Isitoshe, Yesu aliwaambia wanafunzi wake hivi: “Mtachukuliwa mbele ya maliwali na wafalme kwa ajili yangu, kuwa ushuhuda kwao na kwa mataifa. Lakini hapo watakapowapeleka, msifikiri-fikiri jinsi mtakavyosema . . . , Kwa kuwa si nyinyi msemao, bali ni Roho wa [roho ya, NW] Baba yenu asemaye [isemayo, NW] ndani yenu.”—Mathayo 10:18-20.
18, 19. Roho inaunganaje na bibi-arusi katika kualika wale wenye mioyo misikivu ‘wayatwae maji ya uzima bure’?
18 Katika kitabu cha Ufunuo, Biblia hukazia tena kushughulika kwa roho takatifu katika kazi ya kuhubiri. Hapo mtume Yohana aripoti hivi: “Na Roho na Bibi-arusi wasema, Njoo! Naye asikiaye na aseme, Njoo! Naye mwenye kiu na aje, na ayatwae maji ya uzima bure.” (Ufunuo 22:17) Bibi-arusi, anayewakilishwa na mabaki wa wale 144,000 walio duniani bado, hualika wote wayatwae maji ya uhai bure. Lakini ona kwamba, roho takatifu pia husema “Njoo!” Kwa njia gani?
19 Ni kwamba ujumbe unaohubiriwa na jamii ya bibi-arusi—leo ikisaidiwa na umati mkubwa wa kondoo wengine—hutoka katika Biblia, iliyoandikwa chini ya uvutano wa moja kwa moja wa roho. Na roho hiyo hiyo imefungua mioyo na akili za jamii ya bibi-arusi ili waelewe Neno lililopuliziwa roho na kulieleza hilo kwa wengine. Wale waliobatizwa kuwa wanafunzi wapya wa Yesu Kristo hupendezwa kuyatwaa maji ya uhai bure. Na wanasisimuka kushirikiana pamoja na roho na bibi-arusi katika kusema “Njoo!” kwa wengine zaidi. Leo, zaidi ya milioni nne hushiriki pamoja na roho katika kazi hiyo.
Kuishi Kulingana na Ubatizo Wetu
20, 21. Twaweza kuishije kulingana na ubatizo wetu kwa jina la roho takatifu, na twapaswa kuuonaje ubatizo huo?
20 Ubatizo kwa jina la roho takatifu ni tangazo rasmi la peupe kwamba tunaitambua roho takatifu na kukiri daraka layo katika makusudi ya Yehova. Unadokeza kwamba tutashirikiana na roho, tukiepuka kufanya lolote kuzuia utendaji wayo miongoni mwa watu wa Yehova. Hivyo, tunatambua na kushirikiana na mtumwa mwaminifu mwenye akili. Tunashirikiana na mpango wa wazee kundini. (Waebrania 13:7, 17; 1 Petro 5:1-4) Tunaishi kulingana na hekima ya kiroho wala si ya kimwili, na kuruhusu roho ifinyange utu wetu, kuufanya uwe wa mfano wa Kristo zaidi. (Warumi 13:14) Na tunajiunga kwa moyo wote pamoja na roho na bibi-arusi katika kusema “Njoo!” kwa wale mamilioni ambao huenda wakaitikia bado.
21 Ni jambo lenye uzito kama nini kubatizwa ‘kwa jina la roho takatifu’! Hata hivyo, ni mibaraka iliyoje iwezayo kutokea! Idadi ya wale wanaobatizwa hivyo na izidi kuongezeka. Na sisi sote na tuendelee kuishi kulingana na maana ya ubatizo huo, tunapomtumikia Yehova na kuendelea ‘kuwaka roho.’—Warumi 12:11, NW.
Unakumbuka Nini Juu ya Roho Takatifu?
◻ Roho takatifu ilikuwa yenye kutenda kazi kwa njia zipi katika Pentekoste 33 W.K.?
◻ Tunaweza kutokezaje matunda ya roho?
◻ Wazee huwekwa rasmi na roho takatifu katika njia gani?
◻ Yesu hushughulikaje na matatizo kundini kwa njia ya roho takatifu?
◻ Roho huhusikaje sana katika kazi ya kuhubiri?
[Picha katika ukurasa wa 15]
Ubatizo ambao Petro alihubiri ulikuwa pia kwa jina la Baba na la roho takatifu
[Picha katika ukurasa wa 17]
Roho inahusika sana katika kuhubiriwa kwa habari njema